رجعت مكتبها ولسه بتفكر في كلامها مع شهاب ،سألت نفسها كتير هو ليه بيعاملها بالطريقه دي مع انو بيعرفها بس من اسبوع .. غطت راسها بين ايديها وبعدها بدت تشتغل .. الوقت عدا بسرعه وهي ما انتبهت .. الساعه كانت 8:00 .. شالت تلفونها عشان تشوف الساعه وطلعت بسرعه بعد ما شالت شنطتها .. وقفت قدام المعرض وواضح انو السواق رجع لانها اتاخرت .. عاينت حولينها واتزكرت انو ماعندها رقمو .. وقفت للحظات على امل انو يرجع بس ما رجع .. اتلفت وراها لما سمعت صوت صهيب ..
صهيب: ليه واقفه براك
شمس: امم ، السواق شكلو لقاني اتاخرت ورجع
صهيب: طيب انا راجع البيت اصلا يلا
شمس: لا بس اديني رقمو وحرج معاه
صهيب: ليه دا كلو وحتقيفي في البرد دا براك ، يلا يلا
اتقدم لناحيه عربيتو وما استناها ترد اصلا .. وهي اتحركت وراه بخطوات بطيئه وطلعت معاه ..
اول ما وصلو شكرتو وهو ردا ليها بابتسامه .. دخلو مع بعض وسلمو على الكل وشمس طلعت ..
صهيب قعد جنب امو
روضه: انت وشمس جيتو مع بعض ؟
صهيب: اي شكلو السواق ما جاها
روضه: اها
بسمه عاينت ليه وهو عاين ليها .. طلعت وملامحها بتتكلم ..
استأذنهم وطلع وراها .. قبل ما تصل غرفتها جا ونداها ..
صهيب: بسمه
بسمه: خير
صهيب: مالك
بسمه: ولا شي
صهيب: لا واضح انك زعلانه في شي ؟
بسمه: قلت لا ما بتفهم ..
فتحت باب غرفتها ودخلت ..
نجمه جات طالعه وراهم ..
نجمه: صهيب ؟مالك واقف هنا
صهيب: كنت بتكلم مع بسمه وكالعادة ..
نجمه: ما تزعل منها عارفها حمقا وما بتعرف هي بتعمل في شنو ..
صهيب: عارف والله
واتحرك عشان يدخل غرفتو
نجمه اتحركت وراه ودخلت غرفة شمس ..
نجمه: شمس ؟ صاحيه
شمس: اي تعالي
نجمه: مالك ماقعدتي معانا تحت
شمس: تعبانه بس
نجمه: بكرة حنطلع كلنا رأيك شنو تطلعي
شمس: ماحقدر والله كل الوقت مشغوله
نجمه: لا طبعا حكلم جدو ونطلع انا واخواني وصهيب واثار وبسمه واياد ووضاح حتنبسطي صدقيني
شمس: وين طيب
نجمه: ما عليك خليها مفاجاءة
شمس:طيب
نجمه: حلو حمشي اكلم البقيه
طلعت ..
شمس كانت حاسه بنفس الاحساس البجيها كل فترة .. احساس انها وحيدة مهما كان الوحلينها كتار .. اشتاقت لامها ولابوها الهي اصلا ما بتعرفهم ولا حصل شافتهم .. ويمكن اشتاقت تكون اخت وليها اخ .. غمضت عيونها وغطت وشها بايديها وبكت .. كانت بتبكي بتنهد وصوتها عالي .. بتحاول تتحكم في تنهيدها العالي بس ماقدرت ..
شهاب كان ماري بجنب غرفتها وسمع صوتها وهي بتبكي .. ماقدر يدخل واستناها لما هدت ووقفت بعدين رجع ..
دخل لقى صهيب بيلعب ضغط وبيتنفس بصوت عالي ..
شهاب: صهيب انت مجنون ؟
صهيب: استنى خليني اكمل
شهاب جا وقومو: انت راسك دا وين عايز تموت يعني ؟
صهيب ضحك: اموت شنو ياخ مافيني الا العافيه
شهاب:لو ما خايف على نفسك خاف على الحوليك لما يفقدوك بسبب عنادك دا ، قلبك تعبان مافي داعي تجهد نفسك ياخ
صهيب:ما تخاف علي ..
ودخل الحمام ..
كان بعاين لنفسو في المرايه وهو معرق وبينهد بتعب وكأنو بعاقب في نفسو!!
________
وفي معظم الاوان يجدر بالكثير منا الابتعاد ..
لوحه ثم لوحه ، كان يفرغ وقته في تلك اللوحات .. اصبحت غرفته متحف حديث ، كان يرسم العالم الخارج وهو يحبس نفسه بين اربعه جدران دون ان يكترث لاحدهم ، ربما سينال من نفسه قريباً ربما سيتخلص من سادار ويعود لحيثه لمكانه ، يعود إليهم ..
رما نفسو في السرير وبعاين لسقف الغرفه ، بدت الاحداث تتسلسل من جديد ، ببشاعه كأنها حلصت امس .. انتفضت وقام من السرير عشان يتناسى الزكريات الكانت بتحوم وتجوب في اطراف الغرفه كلها ..
_______
رقدت على جنبها بعد ما كانت مبحلقه في السقف .. مسحت اخر دمعه من عيونها الورمت بسبب البكاء ووقف فتحت شباك الغرفه مع انو الجو كان بارد جدا بس ما اكترثت .. بدت تستنشق الهواء البارد يمكن يبرد جوفها من النار الكانت شابه في جواها ..
اخدت نفس وبعدها دخلت عشان تستحمى ..
_____
الساعه 10:00 مساءاً
نجمه: ماما البت دي طيبه ومسكينه وحبيتها والله
بشرى ابتسمت: اي فعلاً
نجمه: بس مرات بحسها غامضه وعاوزة تقول شي وفي اخر لحظه تسكت ..
بشرى: كيف يعني
نجمه: ما بعرف دا غير انو انا حاسه اني شفتها قبل كدا
بشرى: تشوفيها وين عاد يمكن بتشبه زول تاني بس
نجمه: ما عارفه ، طيب انسي عايني احنا بكرة حنطلع كلمتك صح
بشرى: اي ميمونه كلمتني
نجمه باستها في خدها: طيب يلا تصبحي على خير
بشرى: وانتي من اهله
طلعت من غرفه امها وكانت راجعه غرفتها .. وقفت وعاينت ل اياد البأشر ليها من بعيد .. اتقدمت ومشت عليه وهو باشر ليها عشان ما تجي .. بس ما قدرت تفهمو وجات عليه ..
نجمه: اتبكمت ؟ليه بتأشر لي
اياد: هشششش
نجمه وطت صوتها:في شنو
اياد: حرامي حرامي
نجمه وسعت عيونها: شنووووو؟
اياد: اسكتي يا غبيه حيسمعنا
نجمه: وين طيب
اياد:كان حايم في الصاله ومغطي وشو وطلع شكلو طلع فوق ..
نجمه: اياد ؟ دا ما واحد من مقالبك الغبيه دي صح ؟
اياد: مقالب شنو تعالي وراي من سكات وامسكي العصايه دي لما اقولك اديني ليها
نجمه: انت جنيت افترض كان مسلح
اياد: معاك راجل يابت يلا
طلعو السلم بخطوات بطيئه لحد ماوصولو اول درج وقفو .. كان في زول ماشي في الطابق التاني فعلا وبيتلفت ..
اياد اتقدم بخطوات سريعه ..ونجمه بتقولو هلينا نرجع حيموتنا .. وهو لسه مستمر ..
يتبع
