تاني يوم ..
صحو بصوت ميمونه الكانت بصرخ باعلى حسها .. نزلو ورا بعض وبسرعه .. سيف وبشرى وروضه ومجاهد وايمان .. كانو جارين لغرفه الجد .. اول ما فتحو الباب ميمونه كانت بتصرخ وبتنادي ..
سيف: يا امي في شنو ؟
ميمونه: ابوك ما برد علي .. مقداد يا مقداد ..
مجاهد جا عليهو وختا راسو في فخدو .. وفحص عيونو بسرعه .. كان جسمو مسخن ..
مجاهد: اسعاف ، سيف اتصل على الاسعاف سريع ..
كلهم كانو خايفين عليه وبدو يبكو .. شمس كانت واقفه بعيد بتعاين وبتفرك في ايديها بتوتر .. نجمه كانت بتبكي ونفس الشي بشرى وايمان ..
ماهي الا دقائق والاسعاف جا واخدو ولحقو كلهم للمستشفى .. كانو وافقين كلهم منتظرين الدكتور يطلع ويطمنهم ..
وضاح عاين لبسمه: انتي ما حتبطلي البتعملي فيه دا
بسمه: نعم؟ قصدك شنو
وضاح: جدو دايما تعبان بسببك وبسبب مشاكلك المابتخلص دي
بسمه: ومشاكلك انت؟ ناسيها
شهاب: انتو حتتشاكلو هنا عايزين تفضحونا ؟
ميمونه: راعو لجدكم ياخ
ايمان:خلاص اسكتو ..
وضاح طلع واياد لحقو ..
نجمه كانت بتبكي وماسكه في ايد امها ..
شمس جات عليها: حيبقى كويس ادعيلو
نجمه: اول مرة يحصل معاه كدة
شمس: ما تخافي ادعيلو بس ..
اول ما الدكتور طلع بدو يسألو فيه ..
( اتكلم معاهم انجليزي ، حترجم )
الدكتور: مافي خطر ، اتمنى مافي زول يدخل لحدي مانتاكد من صحتو ..
سيف: طيب هو كيف صاحي؟
الدكتور: لسه فاقد الوعي بس حيصحى في الساعات الجايه وللوقت داك حنخلي في العنايه بس ما تخافو أءمن ليه ..
ومشي ..
شهاب سند راس ميمونه عليه: راجلك اسد ما تخافي عليه ..
ميمونه: الحمدلله ..
كلهم اتهدوا براحه بعد كلام الدكتور ..
____
اياد: ماشي وين يا وضاح اقيف
وضاح: ما حطلع راجع
اياد: ياخ تزعل من الهبله دي انت ما عارف بسمه
وضاح: بسمه شنو انا زعلان على جدو ووضعو اتخيل لو جاتو حاجه
اياد: لالا ما بتجيهو حاجه جدو كويس بس بكون تعب من الحصل امس وهس حيطلع الدكتور ويورينا انو كويس
وضاح: يارب
اياد: خلينا نرجع ..
وضاح: شويه والحقك
اياد: طيب ما تتأخر
وضاح هز راسو بمعنى طيب ..
اياد اول ما رجع سألهم وقالو ليه الدكتور طمنهم عليع مافي خطر ..
سيف: يلا كلكم ارجعو الحمدلله جدكم كويس
صهيب: نرجع وين وليه كلنا حنقعد لحدي ما يطلع
ميمونه: اسمعو كلام عمكم
مجاهد: انتي زاتك يا امي حتمشي معاهم حنقعد انا وسيف وحنطمنكم اول باول
ميمونه: لا انا حقعد لحدي مايصحى
مجاهد: ما حتستفيدي من قعدتك غير التعب احسن تمشي واول مايصحى انا حجي واجيبك
سيف:خليها براحتها ..
البقيه كلهم طلعو ماعدا ايمان ..
سيف: وانتي برضو حتقعدي ؟
ايمان: اي ابوي ذي ما هو ابوكم
مجاهد: كان عملتي حسابو امس
ايمان: مجاهد انا مصدعه ما ناقصه
ماردا عليها: حنزل اجيب لينا مويه وارجع ..
___
اول ما دخلو البيت ..
بشرى وروضه دخلو غرفهم والبقيه اتوزعو في البيت ..
شهاب دخل المطبخ يشرب .. وشمس ونجمه قعد في الصاله ..
بسمه كانت قاعدة في درجات السلم وبتعاين لشمس الكانت متجاهلاها تماماً ..
بسمه: شكلو في ناس جات وجابت معاها المصايب ..
نجمه اتنهدت .. ووضاح عاين لبسمه بس ما انتبهت لنظرتو .. شهاب وصهيب عاينو لشمس عشان يشوفو ردة فعلها بس ما ابدت اي ردة فعل ..
اثار: اي ما معروف الجاي شنو
صهيب:اثار انتي عايزة تتربي من الاول صح؟
وضاح عاين لبسمه:ما اثار براها ..
شهاب: بسمه واثار لو سمحتو اطلعو غرفكم ..
بسمه عاينت ليه بسرعه كأنها منتظراهو يتكلم: ليه ان شا الله قلت شي غلط؟
وضاح جا عليها وشهاب مسكو بسرعه .. بسمه رجعت لوراء وطلعت السلم
بسمه: البيقول الحقيقه هو الغلطان دايما ..
وطلعت غرفتها ..
شهاب: حتضرب اختك يا وضاح؟
وضاح: اي حضربا تاني وتالت لو عايزة لانها ما اتربت
صهيب عاين لاثار الكانت لسه قاعدة اول ما لاحظت ليهو بهاين ليها طوالي طلعت وراه ..
شمس انسحبت براحه وطلعت حديقه البيت الخلفيه ..
نجمه: خلاص يا وضاح ..
قعدو مع بعض وكل واحد شرد ورجعو يفكرو في جدهم المرمي بين اجهزة قياس النبض وغيرها ...
اما شمس كانت شايله شجرة صغيرة وبتقطع فيها .. كانت بتقول من جواها انها لازم تستحمل وما تركز مع البيحصل في البيت كبيرة او صغيرة ،مع انها اتعودت على الكلام الحارج في بيت عبد المنعم ومن زمايلاها في الدراسه .. بس كانت بتتجنب كل حرف بيتقال ليها لحدي ما اتعودت وبقا ما بهمها ..
شنو اللسه منتظر شمس في مملكه الاسعدي ؟
منو الحيساعدها تطلع من الخراب الهي فيه؟
ولسه قصه موت ابوها وامها ما اتعرفت ..
تابعوني ..
