فتحت عيونها ببطء ، عاينت حوليها ، كلهم كانو واقفين جنبها ، مقداد وميمونه والكل .. انتبهت انها في غرفة مقداد ، ومقابلها صورة فياص ، اول ما فتحت حركت نفسها ببطء وحست بألم في رأسها وبسرعه رجعت ساكنه ..
ميمونه جات عليها وحضنتها عليها: انتي كويسه يا بتي ؟ ليه عملتي كدا؟ احنا اهلك واكيد ما حن..
شمس بعدت منها: ماعاوزة منكم حاجه لا اسم ولا عيلة انا بس عاوزة اعرف منو هي امي؟
سيف عاين لابوه بسرعه .. ونفس الشي الكل منتظرين الجد يجاوب بس ما كان في رد ..
شمس رفعت راسها بوجع ووقفت على حيلها واتوجهت لجهه جدها: ارجوك انا بس عاوزة اعرفها وأسلم عليها حسو بي انا اتشردت 20 سنه من دون هويه ومن دون اسم كل واحد بناديني بالاسم البجي على بالو طفولتي كلها كانت قيود ومشاكل ، كنت بشوف الاطفال وسط اهالهم وبستغرب دايما انا وين اهلي ، بس حاليا عرفت الاجابه ، ايوة عرفت اهلك هنا يا شمس ، رموك وانتي رضيعه لعيله سودانيه ما بتعرف الرحمه ، كله عشان السمعه والشرف والاسم ، كله عشان الاسعدي يفضل يحلق من دون ما يتهز ليه جناح صح! كل دا كوم واني دايما كنت منتظرة امي وابوي يرجعو لحياتي تاني اشوفهم! واقدر احضنهم اتكلم واحكيلهم كل الحصل معاي ..
مسحت دموعها النازله بغزارة : وهس بعد الامل الكبير دا والسنين الطويله دي اشوفهم بس على شكل صورة ، صورة معلقه في جدار ، جماد ما بيتحضن ولا بينطق!!!
واشرت على صورة فياض ..
الهويه الكنت عاوزاها والانتماء الكنت بتمناهو انا حاليا ما عاوزاه ، انا بس عاوزة اطلع من البيت دا واوعدكم مافي زول حيعرف انو عندك حفيدة غير شرعيه ابدا ..
اتحركت عشان تطلع من ميمونه: شمس انتي بت فياض ولدي ودا الاهم احنا جبناك عشان وكان لازم نصلح الغلط دا
شمس ابتسمت لكلامها: انتو ما غلطتو ، انتو وقتها كنتو مقرفين ويمكن لحدي اللحظه دي انتو مقرفين وما بتحبو غير نفسكم ..
وطلعت .. سيف لحقها ومسكها من يدها ورسم كف قوي على وشها ..
سيف: طول ما انتي في البيت دا اوعا صوتك يعلى ..
شمس:وانت ما من حقك تمد ايدك على
مسكها من يدها: حكسرها لك المرة الجايه لو رفعتهيا في وشي فاهمه
شهاب وصهيب والبقيه جو على صوتهم العالي ...
ميمونه وقفت بعجز تبكي وبشرى كانت بتهدي عكس روضه الكانت متحمسه لكل البحصل ..
شهاب مسك ابوه: في شنو يا ابوي
نجمه جات على شمس ومسكتها بس شمس بدون ما تحس لزتها ..
شمس: وجعتك كلمة مقرفين؟ ايوة مقرفين وحتفضلو كدا وعمري ما حسامح واحد فيكم انتو السبب في موت امي وابوي والذنب دا حيفضل ملاحكم طول العمر
سيف حاول يضربها بس شهاب كان ماسكو ..
مجاهد: اطلعي غرفتك يا شمس حالا
شمس وسط شهقاتها العاليه: حطلع من البيت كله ومن دون رجعه ، انبسطو ..
سيف رجع مسكها من يدها وكان ممشيها غصب عنها والكل وراه عدا مقداد الوقف قصاد باب غرفته جاهل البيحصل دا تماما ..
نجمه: بابا حرام عليك سيبها
سيف: اسكتي ي نجمه ..
طلع السلم وهو ماسكها بقوة ودخلها غرفتها وقفلها ..
نجمه: بابا بليز افتح الباب شمس مضروبه على راسها
سيف: شمس ما اتربت ولازم تتربى
نجمه: ما ذنبها انها ما اتربت منو الرمها الرميه دي مش انتو ؟
سيف اتمالك نفسو: نجمه احسن تسكتي
علاء: نجمه خلاص
وجا عليها حضنها لانها كانت بتبكي ..
سيف نزل وعاين لامو الكانت بتبكي برضو وبشرى بتهدي فيها ..
الكل مستنكر الحصل ..
اياد ووضاح طلعو لجدهم عشان يفقدوه ..
كان قاعد في السرير وضامي يده والحسرة باينه في ملامحو ..
اياد قعد جنبو: حتعدي ياجدو ما تزعل
وضاح بابتسامه: اياد كلامو صح ، وشمس حتتعود وحتسامح انا متأكد
مقداد: يا اولادي احنا غلطنا غلطه كبيرة شديد ما بتتغفر
وضاح: بس كان في سبب
مقداد:حتى لو كان في سبب ، شمس ذنبها شنو ؟ انتو في حاجات ما عارفنها لسه ..
اياد ووضاح عاينو لبعض وسكتو ..
عددت ساعات والكل في حالة صمت ...
نجمه كانت مع امها وميمونه .. وكلهم حولينها وبحاولو يهدوها ..
سيف ومجاهد كانو واقفين بتناقشو واحيانا صوتهم بيعلى ..
مقداد طلع من غرفتو واتوجهه للطابق التاني .. كلهم كانو بناظروه .. اول مرة يشوفوه باليأس دا ...
صهيب قعد تحت ميمونه ومسك ايديها: الحصل شنو ؟ ليه جدو اتخلى عن شمس!! عشان شنو ؟ كلنا عاوزين نعرف الحقيقه ..
ميمونه عاينت ليهم ، وكلهم كانو مترغبينها عشان تحكي الحصل زمان ..
وفعلاً بدت تحكي الحصل يومها ..
___
فتح الباب وعاين ليها ضامه نفسها في ارضيه الغرفه وصوت انينها كان واضح .. حضنت نفسها اكتر اول ما جا عليها بخوف .. وقتها هو اتراجع وقعد في الكرسي بعيد منها ...
اتكلم بصوت ضعيف: انا عارفك ما حتسامحيني وعارف انك مشتاقه لأبوك وامك بس انا ما بيدي حاجه ، انا مشتاق لفياض اكتر منك بكتير وندمان انو يومها نزل زعلان مني انا وميمونه ، ماقدرت اضم ولدي تاني للأبد ، تعصب ومبادئ بسببها فقدت فياض وللأبد ويمكن فقدت حفيدتي برضو ..
عاين ليها وهي لسه ساكته ..
وبدأ يحكي ليها الحصل قبل20 سنه ..
يتبع
