الساعه 12:00
- تعبت والله ..
- لازم لابتوب كدة ما حخلص لبكرة ..
شالت بعضها وطلعت .. لاقت علاء ماشي على غرفتو ..
شمس: اممم علاء استنى
اتلفت عليها: شمس؟ شنو المصحيك للوقت دا
شمس: مشغوله وما عرفت اخلص محتاجه لابتوب فلو ينفع ..
علاء قاطعها: استني طيب اجيبلك حقي
اتقدم لنهايه الممر ودخل .. وهي كانت مستنيه .. دقايق وجا طالع باللابتوب بتاعو ..
علاء: اتفضلي
شمس: حرجعو في اقرب فرصه
علاء: ما عليك محتاجه مساعدة؟
شمس: لا .. اي
علاء: لا ولا اي
شمس: بصراحه نعست ولسه في شغل
علاء طيب خلينا نقعد في البلكونه بس اغير ملابسي وارجع ..
شمس: اوكي
كانت ماسكه لابتوبها في ايد وتلفونها في ايد .. انتبهت للطابق التالت وكالعادة كان مظلم .. سمعت صوت من نفس الجهه وبسرعه اتقدمت للبكلونه .. فيها كراسي ومحاطه بانوار على مدى سور البلكونه ..
علاء: نبدأ
شمس: اي يلا ..
ختت اللابتوب في التربيزه القدامها وهو قعد قصادها ..
شمس: شهاب كلفني ارد على 2000 مسج ومعظهم انجليزي وفي جزء هولندي ، انا حرد على الانجليزي وانت الهولندي
علاء: طيب عندي فكرة احسن
شمس: شنو
علاء: انا حرد بالابتوب وانتي بتلفونك كدا حنخلص اسرع
شمس: اي ممكن ..
بدو يشتغلو والنعاس كان واضح في عيون شمس .. اما علاء كان متعود نوعا ما ..
علاء: انتي كيف قدرتي تخلصي جامعه بالسرعه دي
شمس: لا انا ما قريت جامعه
علاء: جد ؟ ليه طيب
شمس: ظروفنا كانت شويه كعبه فما كان ينفع اكمل ..
علاء: القروش قصدك ؟
شمس: اي ممكن تقول كدا
علاء: اهلك متواصلين معاك صح
سكتت لثواني وابتسمت ابتسامه باهته: امم
علاء:كترت اسئله معليش
شمس اكتفت بابتسامه .. وغرقت في التفكير ..
فجاءة بيجي صوت كأنو صوت تصفير .. كان واطي في البدايه وبعدها بدا يعلى ..
علاء عاين لشمس: انتي سامعه الانا سامعو؟
شمس هزت راسها بمعنى اي
فجاءة نور الصاله طفى ..
علاء: في زول هنا ؟
مافي رد ولسه الصوت بيعلى ..
شمس حست بالخوف ووقفت ورجعت لوراء ..
علاء همس: انا عرفت الصوت جاي من وين ..
شمس: لا ما تمشي اتصل على اياد خلي يفتح النور ..
علاء: كاشفك يا نجمه تعالي ..
جات تضحك وما قادرة تشيل انفاسها من الضحك ..
نجمه: اسفه بس ماقدرت
علاء: حركاتك الغبيه دي ما حتوقفيها
شمس اتنهدت براحه: ليه يا نجمه ..
نجمه بضحك: ام سوري
علاء: المصحيك شنو انتي كمان
نجمه: كنت برسم وسمعت صوتكم انتو المصحيكم شنو
شمس: عندي شغل وعلاء بساعدني
نجمه:اها طيب انا كمان حساعدكم
شمس: لا كملي رسم حنخلص اصلا
نجمه: لا عادي ..
قعدو مع بعض .. وبدو يتبادلو الشغل لحدي ما خلصو ..
_____
تاني يوم
الصباح ..
غرفه بنفسجيه ، اثاثها فخم ..
روضه جات طالعه من الحمام .. ومجاهد واقف قدام المرايه ، عدل لياقته ورش عطر ..
روضه: انت طالع ؟
مجاهد: اب عندي شغل عاوزة شي
روضه: لا ، عاوزة اسألك
مجاهد: عن شمس طبعا ما ملاحظه انك شاغله نفسك اكتر مني
روضه: اي لاني مستغربه هي حتقعد هنا لمتين
مجاهد: طول عمرها دة كلام ابوي
روضه: ابوك دة مش نفيو الرماها الرميه دي قبل 19 سنه
مجاهد: روضه انا ما فايقلك عندي شغل
وطلع خلاها واقفه ..
_____
في المعرض ..
طرقت الباب بهدوء .. ودخلت بعد ما سمعت " ادخل "
شمس: صباح الخير
شهاب: صباح النور
شمس: امم دي خلصت شغلي ورديت على كل الرسائل
شهاب: متاكدة ؟
شمس: اي
شهاب: حتى رسايل الوكلاء الهولندين ؟
شمس اتعلثمت: اي ساعدني فيهم علاء
شهاب: بس دا ما اتفاقنا
شمس: اتفاقنا يا استاذ شهاب اني اخلصهم وخلصتهم ، وبعدين انا ما اتعلمت هولندي كيف ارد عليهم ؟
شهاب: ما مشكلتي انك ما متعلمه وجايه بواسطه ..
شمس عقدت حواجبها باستغراب: واسطه ؟
شهاب: اي واسطه ولا انتي فاكرة انو عندك مؤهلات عشان تشتغلي هنا ؟
شمس: فعلا انا ما متعلمه ولا بعرف اكتر من لغتين وجيت واسطه وماعندي اصل ولا فصل بس دا ما بيديك الحق انك تقلل مني قدراتي
شهاب: قدراتك ؟ اي قدرات البتتكلمي عنها دي ؟
شمس رخت صوتها: انا اشتغلت هنا بموهبتي انت اشتغلت هنا بشنو ؟ بواسطه برضو صح ؟
شهاب: انتي عارفه انو انا ممكن اطردك صح ؟
شمس: ما حتقدر
اردفت لكلامها: اتوقع اني سلمتك الشغل عن اذنك ..
وطلعت .. سندت نفسها في باب المكتب وغمضت عيونها وبعدها رجعت مكتبها .. صهيب كان جاي من جهه الممر التاني واستغرب لما شافها سانده نفسها على الباب ..
اما شهاب رجع قعد في كرسيه وابتسم بدم بارد ، فتح ايميل الشركه وبدأ يراجع فيهم من الاول ..
الباب انفتح ..
صهيب: صباحو
شهاب: اهلين صهيب تعال
صهيب قعد جنبو: لقيت ماعندي شغل فاقلت اجي ندردش حبه
شهاب: اها تشرب شي
صهيب: لا ، انت مالك ؟
شهاب: مالي ؟
صهيب: دي منو الكانت طالعه من مكتبك
شهاب: شمس ؟
صهيب: الجابها جدو البيت ؟
شهاب: اي
صهيب: شكلها مسكينه
شهاب: ما يغرك
صهيب: ليه محسسني انك بتعرفها من سنين
شهاب: ابدا بس اسبوع شغل بخليني اعرف الشخصيه الانا بتعامل معها
صهيب باستهبال: يا خطير انت ..
غيرو الموضوع واتونسو وبعدها صهيب رجع مكتبو وشهاب ما زال يفكر ..
* ماراجعت الاخطاء *
* حطول البارت من هنا وجاي *
يتبع
