ولربما لن تكون النهايه سعيدة كالعادة ..
____
شمس عاينت لمقداد وادركت انو هو حاليا جدها ، ادركت انو ديل ما مجرد ناس عايشه معاهم ديل عيلتها ، بس الما قدرت تدركو فعلا انها شمس ، وانها غير شرعيه ..
الدكتور هو الكان قاطع لحديثهم ..
ايمان اتناست حديثها الحاد مع شمس واتقدمت للدكتور: بسمه كويسه!
الدكتور: ايوة بس ..
ايمان: بس شنو ؟
وضاح: بس شنو يادكتور
الدكتور: يمكن ماتقدر تتحرك تاني ، بتك جاها شلل نصفي ..
وضاح استغفر بخفوت واتوجهه لجهه غرفتها لاول مرة يحس انو غلط في حق اختو ..
الدكتور: اتماسكو مرحله وحتعدي واكيد مع العلاج الفيزيائي حترجع تتحرك
ميمونه برغم زعلها من ايمان الا انها جات عليها وحضنتها لانها كانت بتبكي بقوة ..
شهاب وقف ولحق وضاح ل بسمه وبعدها اثار والكل .. حتى نجمه لحقتهم بعد ما عاينت لشمس لثواني ..
كانت واقفه مهزوزه كالعادة ، حتى الحقيقه طلعت مرة ، الحقيقه الكانت منتظراها طلعت مرة ، فقدت الامل في انو ابوها يرجع للحياة ويضمها ويمكن امها ، وفي نفس الوقت لقت نفسها في حقيقه صعب تصديقها ..
خطواتها كانت بطيئه وفي رجفه ، طلعت من المستشفى وما كانت عارفه تتوجهه ل وين ، ما كانت راسمه طريق تاني غير بيت الاسعدي ، ما اتوقعت في يوم تكره تمشي البيت الوحيد الأواها ..
كان بعاين ليها وما قادر حتى يوقفها ، ما ناداها بإسمها ولا حاول يضمها ويحسسها انو متمسك بيها ، رجع ليه نفس الشعور القديم ، شعور الاسعدي ، الجبروت والعزة ، نفس الشعور الخلاه يغلط ويرميها بس عشان سمعتو ، قعد في اقرب كرسي وبعاين في الاتجاه الهي مشت منو ..
____
وضاح كان واقف جنب بسمه: بسمه ، بقيتي كيف؟
بسمه: حمدلله
وضاح: لسه زعلانه مني
بسمه غيرت اتجاه وشها وعاينت لشهاب: لا
شهاب: حمدلله على سلامتك
بسمه: سلامتي؟ ، انا ماحقدر امشي تاني وتقول لي سلامتي؟ انتو السبب كلكم وقفتو معاها ضدي ..
نجمه: دا شنو الكلام دا يا بسمه انتي عارفه انو شمس ماغلطانه!!
ايمان جات داخله: مافي زول يجيب سيرتها هنا ..
بسمه عيونها لمعت: ماما خليهم يطلعو برا
اياد: احنا جينا نطمن عليك
بسمه: ماعايزة اشوف زول حتى جدو ما تخلو يجي ، اطلعو برة ..
كلهم طلعو ورا بعض ، شهاب عاين ليها وطلع وراهم ، فضلت امها الجات عليها وحضنتها
ايمان: حتبقي كويسه انا جنبك فاهمه ..
_
سيف عاين لابوه: عرفتا ليه طلبنا منك ترجعها؟
مجاهد: ابوك فيهو المكفيه ياسيف
مقداد: سيف بقول الحقيقه ، كان لازم تعرف على الاقل
سيف: وهسي عرفت والله يستر من الحيحصل
روضه: الحيحصل انها لازم ترجع السودان
بشرى بصوت واطي: لا طبعا فكرو بعقل
..
حديث عقيم جداً دار بيناتهم ، مقداد وميمونه فضلو ساكتين يعاينو لبعض ..
