شالت لوحه من لوحاتها وطلعت من الغرفه ..
بسمه كانت بتعاين ليها لححدي ما طلعت ..
بسمه بتخاطب اثار: شفتي الحصل تحت
اثار: ملامحك كانت بتقول انك حتقومي تضربيها والله خفت عليها منك
بسمه: كانت ماسكه يدو وبتضحك معاه كأنو مافي غيرهم في الصاله
اثار: عشان اتربو مع بعض ولاب لاب لاب
بسمه: حتى اخوك الغبي كان بعاين ليها الوقت كلو
اثار: ما بسمحلك
بسمه: ششش انتو الاتنين اغبيه
اثار عاينت ليها وماردت ..
كل وحدة سرحت في حاجه ..
شمس اول ما نورا مشت طلعت غرفتها ..
غيرت ملابسها وبدت ترتب في الغرفه .. عاين للباب الانفتح ببطء ..
نجمه: صاحيه
شمس: اي تعالي
نجمه: جيت اخد رايك في الرسمه دي
شمس: دي الحتشاركي بيها
نجمه: اي غالباً
شمس: طيب استني اقفل الشباك الجو متلج .. بالمناسبه الشتاء ماراضي يخلص شكلو
نجمه: ولسه ماشفتي حاجه
شمس ضحكت وجات عليها ..
شمس:طيب ياستي هاتيها ، ومبدئياً كدا هي حلوة بس اكيد ما حتشاركي ب دي
نجمه:ليه ؟؟
شمس: كدة حتظلمي المعاك وتفوزي طبعا
نجمه اتنهدت وضحكت: اوكي يعني حلوة
شمس: طبعا ..
نجمه:ما ناقصها شي
شمس: لا لأنها كل ما تكون بسيطه للعين حتعجب الحيشوفها طوالي ..
نجمه: مرسسي
شمس: حتفوزي ان شا الله
نجمه: يارب .. طيب تصبحي على خير
شمس: استني عاوزة اتكلم معاك شويه
نجمه قعدت: اتفضلي ..
شمس: عندي سؤال بخص بسمه
نجمه: اتوقع عرفت سؤالك
شمس: هي لبه بتتصرف كدا معاي ؟ انا ما اذتيها في شي
نجمه:ماضروري تأذيها اول ما تقربي من حاجه بتخصها دا بكون تصرفها معاك
شمس: قصدك شنو
نجمه: بسمه كانت مرتبطه ب صهيب وماكان في زول عارف غير شهاب كانو بحب بعض شديد ولما انا عرفت وقتها كانو منفصلين ، كانت بتكره اني اتكلم مع صهيب واتعامل معاه والحاصل حالياً انها بتحب شهاب كلنا ملاحظين حتى شهاب عارف وكذا مرة صداها عشان صهيب لسه متعلق فيها .. وشغلك مع صهيب وشهاب والكم مرة الجيتو فيها مع بعض دة شي كافي يخليها تغلي منك وتكرهك فهمتي
شمس بتعاين باستغراب: بس انا مافي شي بيني وبين شهاب
نجمه: عارفه بس هي ما حتفهم كدا
شمس سككت وبقت تفكر في كلام نجمه ..
نجمه: ماتزعلي من اي حاجه بتعملها بصراحه بسمه طيبه بس عمتو ، عمتو بوظتها غيرتها من بسمه الكيوت الكان اي زول بحبها لبسمه الشرسه البتعمل مشاكل في الطالعه والنازله .
شمس: عادي
نجمه ابتسمت ..
شمس: في سؤال تاني
نجمه: قولي عادي
شمس: اممم ، الطابق التالت! ليه دايما مقفول ؟ او دة ما السؤال ، انا بسمع اصوات دايما و ..
نجمه قاطعتها: عادي حدو قافلو عشان ما ممكتمل وغالبا بتكون اصوات العواصف ..
شمس استدركت انها ما عاوزة تقول: اي يمكن ..
نجمه بابتسامه: في اي اسئله تاني
شمس:لا اتفضلي ..
طلعت وقفلت وراها الباب .. وخلت شمس ترجع تتذكر مواقفها مع شهاب مع انها كانت بسيطه او ما شي يخلي بسمه تزعل كدا ..
___
في غرفه مقداد ..
كان نايم على ظهرو وبعاين لسقف الغرفه ..
مقداد: ميمونه؟
ميمونه: ايوا
مقداد: صاحيه
ميمونه: اي خير عاوز شي
مقداد قعد وسند نفسو على راسيه السرير: لقيت الاوراق البتخص بيت فياض وعاوز اديهم لشمس وفي نفس الوقت ماعايزها تعرف الحصل ..
ميمونه: بصراحه يا مقداد انا فكرت كتير سكوتنا دا مافي صالحها حاليا شمس محتاجه تستقر ومحتاجه عيله وقعدتها كدا اكيد مخلياها متحسسه مننا
مقداد: ما حتسامح واحد فينا لو عرفت
ميمونه: فياض كان قلبو طيب واكيد شمس نفس الشي انا متاكدة انها حتسامحنا ..
مقداد سكت وزفر بضيق ..
____
صباح تاني يوم ..
بسرعه طلعت من الحمام ولبست كانت مستعجله .. سرحت شعرها ورشت عطرها .. وطلعت بسرعه وهي مستعجله ..
شهاب كان جاي من غرفتو لجهه السلم وما انتبه ليها .. اتصادموا بقوة بس المرة دي شهاب هو الوقع ..
شمس واقفه بتحاول تستدرك الحصل وهي كاتمه ضحكتها ،اما شهاب كان بعاين ل تلفنو الغالبا انكسر ..
وقف بسرعه ورفع تلفونو: شتتت
انتبه للصوت الطالع من شمس وهي كاتمه ضحكتها ..
شهاب:عادي اضحكي
شمس: ما حنتظرك تقول
وضحكت بصوت عالي ،كانت بتحاول تكتمها بس ماقدرت
شهاب: جيبي نظارات يمكن تشوفي
شمس بين ضحكها: شكلك يموت ..
انتبهت انو بعاين ليها بجديه: اسفه اسفه
شهاب ابتسم: ضحكتك حلوة
شمس: شكرا
وقفت تعاين ليه وهو نفس الشي ..
شهاب:السواق جا ولا لسه ؟
شمس: اتوقع ماجا حتصل عليه
شهاب:خليه ، حوصلك معاي
شمس:طيب
نزل ونزلت وراه وهي مستغربه ،،،
في العربيه ...
كان ساكت بعاين قدامو واحيانا بسرق نظرات لشمس الكانت ملتهيه بتلفونها ..
شهاب: ممكن سؤال
شمس رفعت راسها: اتفضل
شهاب: انا اسف على الكلام القلتو لما كنا في المكتب ..
شمس: دة اعتزار ما سؤال
شهاب ابتسم بخفه: السؤال جاي
شمس: عادي ولا يهمك متعودة ..
شهاب استغرب لما قالت متعوده:انتي خلصتي دراستك
شمس: لا
شهاب: السبب شنو
شمس: لاني لقيت فرصه العمر الخلتني اشتغل مع جدك اكيد ما حضيعها ..
شهاب: ما دة نفس سؤال ي جدو عادة ما بشغل زول الا وهو مخلص وشهادات وخبرة وموضوع طويل ..
شمس: انت شكلك مستكتر علي الشغل معاكم
شهاب ضحك: ابدا لو عاوز الموضوع مابياخد معاي كتير وحفصلك
شمس: ما حتقدر
شهاب: لاني ما حعمل كدا طبعا بس كنت مستغرب ..
شمس: في اي سؤال تاني
شهاب: لا كملي ..
دقايق ووصلو .. نزلو مع بعض واترافقو لحدي الطابق الفيه مكاتبهم ..
مع الايام شهاب اتعود على شمس وعلى الحديث الطويل الكان بيدور بينتاهم يومياً ، الكل كان ملاحظ لوجودهم الدايم مع بعض عكس الاول واولهم بسمه ، كانت صامته دايما وما بتبرز اي ملامح حيالهم ، كان في برود يخوف من جهتها ، صهيب دايما كان بلاحقها وما قادر ينساها لانو بسمه في يوم من الايام كانت احلى حاجه تحصل ليه في يحاتو وفجاءة ومن دون اي مبرر يفترقو ، يمكن صهيب ما عارف انها بتحب شهاب ..
يا ترى ردة فعل صهيب شنو لما يعرف؟
وسكوت بسمه وراه شنو ؟
حنعرف كلنا
* جزء بسيط اعفو دا القدرت اكتبو لأني لسه عيانه ، حعوضكم والله *
يتبع
