أمستردام

٧

وقفت وحست انها لازم ترجع بس قالت في نفسها انو لازم يشوفهم لانو طلبهم .. اتقدمت خطوات ووصلت لممر طويل والصوت فجاءة وقف .. كانت ماشه وفي لوحات فخمه بتزين الممر .. ماشه وهي مبتسمه لا اراديا .. اتمحت ابتسامتها لما شافت سيف ومجاهد وايمان طالعين من غرفه ابوهم وملامحهم غريبه نوعا ما .. مافي واحد وقف ولا عبرها ماعدا مجاهد ابتسم عشان ما يحسسها ب شي ومشى طوالي ..
اتوقعت انو دي الغرفه وقفت وطرقت الباب .. دخلت لما سمعت كلمه "ادخل" ..
مقداد كان خاتي ايديه بين راسو وميمونه قاعدة جنبو ..
شمس: اسفه اني قاطعتكم بس دي الرسومات الطلبتهم ..وكانت طالعه فورا ..
مقداد:تعالي ياشمس ما مشكله ..
شمس اتقدمت وقعدت جنبهم ومدت ليه رسوماتها: اتفضل
مقداد شالهم منها وابتسم رغم انو مزاجو متعكر ..
مقداد: شفتي يا ميمونه ما شا الله دافنشي معانا في البيت
شمس ضحكت: لا ما للدرجه دي
ميمونه مسكت يدها: لا للدرجه دي واكتر ما شا الله عليك
مقداد عاين لميمونه: سوي لينا شاي لو ممكن
ميمونه: حاضر
شمس وقفت: لا انا حمشي انوم عشان اقدر اصحى بدري للشغل
مقداد: اولاً بكرة الجمعه وتانيا عايز اتناقش معاك في كم حاجه
شمس هزت راسها بمعنى طيب .. وميمونه طلعت تعمل الشاي ..
مقداد وقف وكان ماسك وحده من لوحاتها وبدأ يسأل فيها .. شمس كانت بتضحك لانو كان بضحكها ومرتاحه لاول مرة من جيتها .. انتبهت لصورة كانت معلقه وراها واتمعنت فيها ورجعت عاينت لمقداد ..
شمس: دا ولدك صح ؟
مقداد سكتت لثواني ..
شمس: اسفه ماقصدي اسأل
مقداد: عادي يا بتي ، ايوا دا ولدي فياض
شمس: يشبهك شديد
مقداد: الله يرحمه
شمس: الله يرحمه ..
سكتو لثواني وميمونه جات داخله .. ختت الشاي وبدت بينهم ونسه طويله كانهم بيعرفو بعض من سنين .. او مرة شمس تحس بالانتماء الكانت بتتمنى تعيشو من سنين .. عدت ساعات واستأذنت منهم عشان ترجع غرفتها وبدت تلم في رسوماتها ..
مقداد: خلي الرسمه دي وشيلي البقيه ححتفظ بيها ..
شمس: طيب .. تصبحو على خير
ردو ليها: وانتي من اهلو ..

طلعت بهدوء وكان في شعور جواها مراودها لحدي مارجعت غرفتها .. ختت لوحاتها وغسلت وشها وصورة فيااض ما فارقت مخيلتها .. وفي ثواني غطت في نومها

اما مقداد وميمونه اول مرة ينومو ب سلام قبل سنين طوويله .. شنو الحصل قبل 19 سنه في بيت الاسعدي والسبب الخلاه يرمي شمس السنين دي كلها وهي حفيدتو ؟

________

اما شهاب كان منتظر اخوه علاء واياد ووضاح .. نزل من غرفتو وقعد في مدرجات السلم .. بحاول يتصل عليهم بس ما بردو .. طفا نور تلفونو بسرعه لما شاف الخادمه ماشه تفتح الباب .. دخلو وراء بعض واتكلمو معاها وهي رجعت غرفتها .. كانو ماشين بهدوء وبيتلفوتو حولينهم بترقب .. شهاب ضوا الفلاش في وشهم .. خلاهم يتخلعو ورجع طفاهو ..
علاء بهمس: شهاب ؟ دا انت
شهاب: كنتو وين حضرتكم
اياد: كنا في النادي
شهاب: انت بالذات تسكت
رجع عاين لوضاح: كنتو وين يا استاذ وضاح
وضاح: ما قالك كنا في النادي
علاء: دي شنو الحركات دي ياخ رعبتنا
شهاب: كويس انكم بتنرعبو برضو
اياد قعد جنب شهاب: احنا فعلا كنا في النادي
شهاب: كنتو في النادي؟ وعارفين انو جدو مانع النادي يوم الخميس ولا ماعارفين
علاء: عارفين لكن ..
شهاب وقف: انا فاهم انكم ما حتغلطو يا علاء وانكم تطلعو وتنبسطو دا حقكم بس ما على حساب جدو
اياد: جدو مفروض يفهم انو احنا ما صغار
وضاح: هو نفسو بقول انتو كبرتو والكلام دا ولما يجي وقت الجد بيتراجع ..
شهاب كان طالع وببتكلم وهم وراه ..
شهاب:ما علينا ، حاولو بس عشانو ، على الاقل اعملو حاجه عشان ترضوه بالاول ياخي استأذنو على الاقل
اياد ضحك بصوت عالي: رد على اخوك يا علاء انا داخل انوم ، ووضاح لحقو ..
علاء: نستأذن جدو ؟ وفكرك حيوافق ؟
شهاب: اي حيوافق
علاء: دا المستحيل بام عينه ، انا تعبان تصبح على خير .. دخل وراهم وقفل الباب ..
اما شهاب دخل الغرفتو هو وصهيب الكانت جنب غرفتهم .. اتزكر انو ما اتصل على صهيب من الصباح ، فتح الاسكايبي وصهيب كان اونلاين .. بس صهيب سبقو واتصل عليه ..
صهيب: شهاب كيفك
شهاب: حمدلله والله
صهيب: غريبه صاحي للساعه دي
شهاب: علاء واياد ووضاح بخلوك تنوم
صهيب: انت عارف احسن حاجه في سفرتي دي اني فارقت وشوشهم التلاته
شهاب ضحك: والله ايامك
صهيب: الشغل ماشي كيف
شهاب: الشغل منتظرك ما تفرح انا سايب ليك شغل بارت B كله
صهيب: ونعم الاخوه
شهاب بضحكه: لالا انت ركز في شغلك الهناك واعتبر دا خلصان ..
شهاب بدأ يسمع صوت ضرب وتكسير ..
شهاب: طيب لبكرة
صهيب: تمام ..

رما اللابتوب وشبه كان عارف الصوت جاي من وين .. فتح الباب بسرعه واتوجه لجهه السلم ..

من جهه تانيه شمس صحت بنفس الاصوات الكانت بتعلى اكتر .. لبس شالها وفتحت الباب .. كانت بتعاين من مكانها بس ما كان في شي .. طلعت واتقدمت لجهه الصوت .. صرخت بصوت عالي لما حست بيد في كتفها .. اتلفت بسرعه وضربت الكان وراها ..
شمس: انت ؟
شهاب اشر ليها تهدأ بايديه: انتي بتعملي في شنو هنا
شمس سكتت للحظه: سمعت صوت ..
شهاب: اي صوت ؟
شمس: كان في صوت تكسير و..
شهاب قاطعها: انا ما سمعت شي احسن ترجعي غرفتك الوقت اتاخر
شمس ماردت عليه .. صلحت شالها ومشت بخطوات بطيئه لناحيه غرفتها .. دخلت وقفلت الباب بعد ما عاينت لشهاب الكان مراقبها بعينو وكانو منتظرها تدخل ..
- انا متاكدة اني سمعت صوت اكيد ما بتهيأ لي ..
اتنهدت ورمت الشال وقررت تنوم وما تركز في الموضوع ..

يتبع