أمستردام

٨

تاني يوم ..
الساعه 6:30

الشمس بدت تشرق ..
شمس كانت بتعمل في شعرها بعد ما اخدت حمام دافي ، الجو كان ادفى غير كل يوم .. طلعت من غرفتها ونزلت تحت .. ما كانت شايفه زول وواضح انو الكل نايم .. دخلت المطبخ الكان على يسار السلم ..

ابتسمت لما شافت نجمه سابقاها وبتعمل في قهوة
شمس: صباح الخير
نجمه: هلا صباح النور
شمس: ما افتكرت انو حيكون في زول صاحي
نجمه: ما متعودة اصحى متأخر دا العادي
شمس قعد سفره صغيره جنبها ..
نجمه: قهوه ولا شاي
شمس: حعمل براي ما مشكله
نجمه ضحكت: عادي ي بت
شمس: طيب يا ستي شاي
نجمه: انا حطلع الحديقه الجو احسن للليله تطلعي ؟
شمس: ليه لا يلا ..

طلعو مع بعض بالباب البفتح على الحديقه الخلفيه .. وقعدو تحت مظله خشبيه كبيرة نوعا ما ..

شمس قعدت وختت كبايتها: بيتكم حلو
نجمه ابتسمت: شكراً ، انتي كمان حلوة
شمس اكتفت بالابتسامه ..
نجمه:جدو طراك كتير وطول الوقت يمدح في رسمك
شمس: دا من زوقه ، انتي بترسمي برضو صح ؟
نجمه: ما انا بس .. انا وجدو وصهيب ود عمتو و عمو فياض كمان جدو قال برسم وفي .. ( ما كملت وسكتت)
شمس لا اراديا قالت: وشهاب؟
نجمه: لا بس هو شاطر في الشغل مع جدو

انقطع حديثهم ب صوت ميمونه ..
ميمونه: ما شا الله صاحيين بدري
نجمه: تعالي تعالي يا ميمونه ..
شمس انتبهت انو نادتها باسمها بس ما علقت ..
ميمونه: شمس كيفك
شمس: حمدلله وانتي
ميمونه:حمدلله تمام
نجمه: استني اعملك قهوتك وارجع
ميمونه: لا انا اسيبكم وامشي اجهز الشاي للكل
نجمه: نجي نساعدك طيب
ميمونه: لا الخدم معاي .. ( ورجعت )

شمس عاينت لنجمه: اممم انتو بتنادوها باسمها عادي؟
نجمه: منو؟ ميمونه؟
شمس: اي
نجمه ضحكت: ايوه هي المانعانا نناديها بغير اسمها ، في السودان غير طبعا عشان كدا استغربتي صح
شمس ضحكت: عندنا جريمه لو تعلمين
نجمه: لا هنا عادي ..
سكتو بعدها للحظات ..
نجمه كانت بتسرق النظرات لشمس .. كانها بتحاول تتحق من شي ..
نجمه: من وين جايبه لون عيونك العسلي ؟
شمس سكتت وماردت ..
نجمه: اسفه لو ضايقتك ب سؤالي ..
شمس: ابداً ، بس حتصدقي لو قلت ليك ما عارفه
نجمه: ايوا يمكن من جدك او جدتك وما بتعرفي
شمس: انا يتيمه ما بعرف اهلي ولا شفت شكلهم ..
نجمه سكتت لثواني: معليش ما كنت عارفه
شمس: عادي ..

اتونسو بعدها عادي لوقت طويل ..

_____

من غرفه في الطابق التاني ..
بسمه كانت بتعاين لشمس ونجمه من فوق ..
بسمه: اثار ، اثار تعالي شوفي ..
اثار زحت غطاها بنعاس: في شنو ؟
بسمه: نجمه وشمس قاعدين مع بعض
اثار: ها ويعني شنو بليز يا بسمه خليني انوم

بسمه قفلت الشباك وجات قعدت جنب اثار ..
بسمه: عاوزة افهم جدو ما لقى مكان يقعدها فيه غير هنا ..
اثار رفعت الغطا: نفس سؤالي يجيبها هنا على اي اساس؟
بسمه: ما واثقه فيها وما حبيتها ..
اثار ضحكت بخباثه: لانها حلوة صح؟
بسمه: دي حلوة؟ لا طبعا
اثار: هههههههه دي الحقيقه وسيبيني انوم ممكن
بسمه: استني ، انا امس ماما قالت لي كلام غريب ما فهمتو
اثار: كلام شنو
بسمه: قالت لي انتي ما عارفه شمس بالنسبه لجدو شنو ورجعت قالت لي ما مهم
اثار قعدت: اي واضح اصلا
بسمه: ماما كانت قاصدة شنو؟
اثار: خليني انوم ووعد اصحى وافكر معاك ( رقدت واتغطت)
بسمه: يارب النوم ينفعك ..

_______

كان ساند نفسو على السرير وبفكر وواضح انو طول الليل ما نام.. طفي المنبه وحاول اكتر من مرة ينوم بس ما قدر .. دخل اخد حمام ولبس تشيرت ابيض وجكت اسود وغطا راسو ونزل ..

نجمه وشمس بعد ونسه طويله دخلو يساعدو ميمونه ..
شمس: انا الحعمل الفطور لو ماعندكم مانع
ميمونه: مافي مانع يابتي بس ما تتعبي نفسك
شمس: انا اصلا بحب المطبخ مافي تعب
ميمونه ابتسمت: البريحك
شمس عاينت لنجمه: وانتي حتساعديني
نجمه: حاضر
بدو يجهزو .. يطلعو ويقطعو مع بعض ..
شمس: حطلع اجيب سماعتي عشان بحب اسمع اغاني وانا بشتغل ..
طلعت السلم بخطوات سريعه وشهاب كان نازل .. صدمتو وكانت حتقع وتضرب راسها بس في اخر لحظه مسكها ..
شهاب: المرة دي انتي المستعجله
شمس شكراً
واتحركت من جنبو بسرعه .. وهو كمل ..

يبدو أن احدهم اغرم بالاخر..!

تعاليقكم
يتبع