دكتوري (مكتملةة)

الحلقة 5

الحلقة 5

تولين: كيف هدا نتابع فيه و اخري م 2017 انا ضايفته عندي و لا متفاعل معايا اخري.. هالبارد خزززي البليددد تشوف لصوره عليك شكل شين
خليني نرقد و ان شاء الله ما يطلعلي كابوس بعد شوفت هالشكل المقرف
تولين: غطت وجهها و غمضت عيونها و رقدت طول

****
الكاتبة: هديل بن عامر

نورا: ناضت ع صوت المنبه س8 ك العاده خليني نرن عليه خير ما يهزبني زي امس
جمال: ناض ع رنت فونه..الوو صباح الورد
نورا : صباح الفل و الياسمين ..قاعد راقد ؟؟
جمال: لا قاعد مصبي،،قصدي شن رايك انتي توا؟
نورا: توترت اههاا غير نسأل انا..باهي هيا نوض و افطر ووتي روحك ع سبه نشوفو بعضنا
جمال: شكله تولين موصيتك؟ كيف نوضتيني هكي
نورا: اول مره هي؟
جمال: نورا قتلك !!!!
نورا: نعم شن في
جمال: تذكري قبل 3 شهور فاتو بعتيلي النصيحه متاعك لي كنت منزل ستوري طلبت نصيحه م المتابعين لي عندي و انتي خشيتي بعتيلي نصيحه
نورا: بضحكه خجوله هههههه و كيف نقدر ننسي اول دردشه بينا و سبب هالنصيحه نحن قاعدين أصدقاء توا وقعدت مصيبتي
جمال: أصدقاء باهي باه ي بلوتي اوكي خلاص انتلاقو باي و صكر الخط
نورا: بضحكه هالمستفزز ما عجبتش كلمة أصدقاء عارفته خاطره يسمع كلمه نحبك بس مش قايلتها له
جمال: أصدقاء و كل يوم نحكو و انتلاقو و نعزقلها ف ادواس و ما تبيش تفهم، غبيه هدي و لا طفوليه و لا تستعبط، ما علينا خليني نصبي نمشي نشوفها و نمشي لجامعتي نحضر المحاضرات

*****
الكاتبة: هديل بن عامر

راوند: اتقلب و تفكر تنوض و لا ترقد شويه بعد معاناة لالا خلاص خليني انوض وقت ع الجامعه و هي ف طريقها للتويليت جاها مسج ك العاده و جزء م روتينها المسج (صباحو سماحتي شن جوك اليوم؟ انا طالع ل رأس لانوف كان رنيتي وما حصلتينيش اعرفيني قاعد ف رأس لانوف المهم ديري بالك ع روحك و طمنيني..نحبك)
راوند: ردت ع المسج (انا الحمدلله تمام..اوكي تمام حاضر و حتي انت..نموت فيك)
راوند: خليني نصبي نوتي روحي خلاص س8 و ربع توا حي عليا
******
بينما سارة نايضه نشيطه اليوم م س 7
لابسه و مقعمزه ع الصالون و ترجي ف ساعه 8 و نص تجي ع خاطر ترن ع عبدالله
سارة: لا خليني نشوف تولين الخامره اكيد راقده وين ما جت اترن لقتها انتظار تشلط ع الصبح خليني حتي انا نرن عليه و بعد تشجيع اتصلت سارة ب عبد الله
عبدالله: بصوت هادي و ناعس بكل صباح الخير حبيبي
سارة: و قلبها يدق بسرعه ووجها انحمر كأنها اول مره تسمعها منه رغم ديما يقول فيها لها،، صباح الورد ي عيوني شن جوك
عبدالله: لما سمعت صوتك قعدت تمام
سارة: اممم باهي هي نوض وراك جامعه و لا مش جاي
عبدالله: معقوله و لمن نخليك..انا نغيب يوم ياخدوك مني بعدها
سارة: حي حي ع الرومانسيه الصباحيه هدي
عبدالله: بضحكه هبله انتي خلاص هي توا انتلاقو بعدين سلام
ساره: بصوت واطي سلامين ي نور العين
خليني انوض بابا مش عارفه اليوم شن صاير لي راقد لعند توا تحكي و هي فرحانه و متحمسه و ماشيه ف جهه دار باتها تبي تنوضه