دكتوري (مكتملةة)

بااارت تعااارف ع الكاتبة

أهلين ل كل شخص يقرا ف روايتى
اليوم تقصدت اني ما نزلكم حلقه حابة نتعرف عليكم و نعرفكم عليا
طبعا انا اسمي هديل عبدالله بن عامر م 97 م ليبيا بالتحديد م سكان بنغازي ، طالبة طب ، كنت نعشق عالم الروايات م لما كنت ف الاعدادي ،و فتحت الواتباد م سنة 2015 كنت ف الثانويه نقرا ف روايات خليجية ، كيبوبية ، عراقيه، و كانن قليل م الروايات الليبيه ، اول روايه ليا كانت اسمها فرقنا القدر و كتبتها باللغة العربية الفصحي ف سنه 2016 و كتبت رواية تانية اسمها جمعتنا صدفة و برضو باللغة العربية الفصحي ووقتها ما لقيتش تشجيع من اي حد و أساسا ما حكيتش لحد اني كاتبه رواية نزلت الحلقات الأولي ع الواتباد بعدها حسيت انها مصدر سخرية قدام الروايات الجميله ف وقتها ما كملتهش الرواية التانية و بدو امتحاناتي ف الثانوية وقفت كتابة و قراءة الروايات و م يومها معاش قريت اي روايه بس ما وقفتش كتابه خواطر ، قصائد ، حاجات زي هكي لكن حاجه تفوت ل 4 اسطر لا ما نكتبهش، المهم كملت مسيرتي ف الجامعة و نسيت عالم الروايات نهائي لعند وصلنا ل 2020 ف كورونا ووقفت القرايه حسيت ان اغلب الناس تحب تقرا الروايات لكن ما حاولتش و لا مره اني نقرا اي روايه حتي ان صديقتي كتبت رواية شجعتها و دعمتها انها تكمل و تكتب و اني انا ح ننشرها لها ع نطاق واسع بس ما حاولتش نقراها ابدا لعند ما  قررت نكتب قصص صديقاتي ك روايه بإضافة شويه م الخيال و طبعا نزلتها ع الفيس ف قروبات روايات حسيت ان العدد مبدئيا كويس بالنسبة ليا وقلت ولو نجحت الرواية و حبوها ف ح نكمل و نزلها ع الواتباد و ندير روايات اخري، و لو فشلت ف ح تكون تجربه حلوه بالنسبة ليا، هدا سبب رجوعي للكتابه و لدخولي مره تانيه لعالم الروايات ف بجد حابه انكم تدعموني لان بدعمكم أنتم أنا نقدر نستمر و نقدر نكمل نكتب طبعا مزال 3 حلقات و اتم رواية دكتوري، و ياريت ما تنسوش تعلقولي و تصوتولي ع كل حلقه و تعطوني رايكم فيها💜 لان يهمني رأيكم ، و ان شاء الله تكون قراءتكم مـمـتـعـةة للرواية