رواية دكتوري
الحلقة 12
مهند: تعالي معايا لعند نحكي معاك بعدها ديري لي تبي اديريه
تولين و كانت فـ يدها شيشه اميه فتحتها ع اساس بتشرب و لقت روحها كابتها ع وجهه مهند و عزقت عليه الشيشه و مهند نصدم م حركتها لي جت فجأة هكِ و طلق يدها و بدا يمسح فـ الميه م ع وجهه و تولين لقتها فرصه مشت و سيباته و فجأة تولين توقف ع صوت واحد يعيط بإسمها م بعيد
مهند: تووووووليييين وقفي نحكي معاك انا لدرجه الكل لاحظو فـ الجامعه ان فـ بينهم مشكله
تولين: التفتتله و شافتله بنظرة استحقار و مشت كملت طريقها و مهند قاعد يمشي وراها و يناديلها
مهند: تولين اصبري بنحكي معاك، تولين اسمعيني لو مره وحده فـ حياتك انا نحبك لي تبيها نديرها لك تولين ، والله نحبك و نبيك انا شاريك ي تولين و ربي و صحت امي نحبك تولين ما تخلينيش هكِ
تولين مكمله طريقها و ماردتش عليه نهائي و وصلت لعند المدرج بتخش وقف قدامها مهند و شد باب المدرج و ماخلاهش تفتحه
مهند: اسمعيني المره هدي بس و بعدها قررري و لو قررتي نسيبو و ح نحترم قرارك
تولين: مهند بنحضر محاضرتي حول م قدامي
مهند شدهاا م يدها وخداها لعند شارع المكيفات ( طبعا شارع المكيفات فـ جامعه العرب يطلعك ع الساحه) ووقف مقابلها و تولين كانت طول الطريق ساكته حبت تسمعه و تعطي فرصه
تولين: لو تفكر تكدب عليا اقسم بالله ي مهند هدي ح تكون آخر مره تشوفني فـ حياتك، احكي بوضوح و بصراحه بلا تأليف و كدب
مهند: باهي اهدي تولين و اسمعيني للاخر و انا والله نحبك
مشت تولين و سيباته و مهند ماحوتك قنعها ووقفها تاني
تولين: تعرف تقول نحبك او نبيك مره اخري مش ح نسمع ولا كلمه ح نمشي و نخليك تحكي بروحك فاهم مهند لان كلمة نحبك مش ساهله و لي يحب ما يخونش ي خاين
مهند: باهي تمام حاضر خلاص اسف معاك حق فـ كل شي اسمعيني بس
تولين: تفضل احكي نسمع فيك
مهند: انا مش قادر نحكي ع الغلط لي درته و ما عنديش ما نحكي بس لي تبيها انتي انا انديرها اهم شي ما تسيبينش بتهزبي هزبي بديري اي شي انا معاك لكن ما تخلينيش تولين انا متعلق بيك اكتر ما تتخيلي انا والله غلطان م ساسي لراسي و مش عارف كيف قدرت ندير هكِ لأني ما فكرتش انك ح تعرفي و باهي لي عرفتي ع خاطر توقفيني ع الغلط لي ماشي فيه
تولين: تمام انت ما تبيش تخسرني صح؟ و مستعد أدير اي شي يرد ثقتي فيك، بصراحه انا بعد لي شفته طحت م عيني بكل و احتمال معش نحترمك م خيانتك بس لو زي ما قلت ما تبيش تخسرني انا نبي منك حاجه وحده اديرها
مهند: لي تبيه والله نديره غير قولي بس
تولين: المصحف ، لما تحلف ع المصحف قدام عيوني انا وقتها ح نرد نحكي معاك
مهند: حاضر هدي بس و الله حاضر و ح نصكر الايميل بكل ع خاطرك و معش نبي فيس واتس بس و لو تبيني نغير الرقم عادي انا ح نغيره اهم شي ما تسيبينش
تولين: تمام و توا نبي نمشي للمدرج لو كملت كلامك
مهند: باهي خليك معايا شويه و لا نخش معاك اصلا مرايفلك
تولين: مهند مش كان حكيت معاك معناها تبدأ تمعشقلي، مش ح يكون بيني و بينك كلام الا لما تحلف ع المصحف وقتها ح نرد نحكي لكن توا خلاص لعند تحلف
مهند: يعني حتي اليوم بتحرميني منك، يعني مش ح نرقدو ع الخط مع بعضنا؟ تولين باهي نحكو فون بس
تولين: لما تحلف ع مصحف ي مهند و توا انتهي ألكلام بينا، عندي محاضره باااي و مشت و سيباته
أنت تقرأ
دكتوري (مكتملةة)
Romansaالكاتبة: هديل بن عامر ..رواية : دكتوري قصة حقيقيه م ارض الواقع و إضافة بسيطه م الخيال تتكلم ع مجموعه طلبة طب ف جامعة العرب و اغلبهم م نفس الجامعه حبو بعضهم و في لي م جامعه قاريونس و كل شخص فيهم قصته تختلف عن الاخر بس لي جمعهم هو الحب و في لي النصيب...
