دكتوري (مكتملةة)

الحلقة 18

#رواية_دكتوري

الحلقه#18

اصيل: بنقولك حاجه أماني بما ان ليا فتره و انا داسها ف تشجعت اليوم و نبي نقولها لك
أماني: نسمع فيك قولها شني ان شاء الله خير
اصيل: اماني انا معجب بيك و هو الحق مش معروف اعجاب او حب لكن الايام ح تحدد الشي هدا
اماني: ككيف دكتور ، قصدي كيف هكي صار
اصيل: بلا منها كلمه دكتور و الرسميات لي بينا، و بنقولك ان ف مره درتيلي لايك ع كومنت ف صفحه طلبة الطب ليها فتره القصه هدي المهم دخلت ع بروفايلك و شفته قبل ما نحكي معاك و لما تاني يوم عرفت اسمك و عرفت ان هدا بروفايلك بديت نراقب ف كل شي تنزلي فيه و تأكدت وقتها انك مش مرتبطه او انك ف علاقه مع شاب ف الشي هدا عجبني فيك و خلاني نتقرب منك ب حجة المحاضرات،
اماني: اوه ماي قود فاجأتني بجد ما توقعتش انك تعرف بروفايلي م قبل قصدي وهدا كله صاير و انا ماكنتش حاسه ب هكي
اصيل: كيف نخليك تحسي او تعرفي طالما ما كنتش نقدر نحكيلك ف مواضيع خارج الدراسه ، هبله انتي هههههه
أماني: ههههههه باهي ممكن نخشو للمحاضرة، و تشرحلنا دكتور اصيل
اصيل: ييي ع كلمة دكتور ، تمام حاضر دكتوره اماني خشي انتي و انا بنمشي ناخد نسكافيه م الكافتيريا و نجي نعطيكم المحاضرة
*****

ف حوش ريماس لي معبي ناس أقاربهم و جيرانهم و صحباتها لمناسبة الدفع و دايرين بيان كبير و ريماس كانت ف الكوافير و اتصل بيها حمادي
حمادي: حلالي حبيب عمري و حياتي و اخيرا بتبدي ملكي انا بس و يقولو هدي خطيبه حمادي
ريماس: ي حليلي ي حبيبي و ربي بنطير م الفرحه و حتي انت بيقولو عليك خطيب ريماس لي وفي بوعده ي حياتي انت مستاحشتك بكل
حمادي: خطرها بنخش انا لي نلبسك الدبله مش شوري و نبي نصور سيلفي معاك
ريماس: شن تحكي انت تبي ماما تقلتنا لالا مش ح نقدرو ي قلبي بعد نتزوجو عاود اللقطه ما تمشيش ف خاطرك اما توا لالا طلعها م بالك
حمادي: باهي معناها نجيك ف الكوافير نشوفك ، بالله ما تصكريهش و تقولي لا
ريماس: باهي ي قلبي تعال، بس قبل ما يجي منذر و ياخدني باهي
حمادي: تمام ي حلالي

******
الكاتبة: هديل بن عامر

تولين لي قاعده ف الدار قررت أن تفتح فونها ع خاطر صحباتها لي كل شويه يتصلن م فون امها و يطمنن عليها و ع اخبارها و فتحت الفون خشت ع الواتس تشوف مهند باعتلها او لا مالقتش اي مسج منه خشت ع ستوري اخته لقتها منزله ان عندهم عيت خالتهم و منها بدا يتصل رقم غريب مابتش ترد لعند ما الرقم لقت منه 20 مكالمه ف قررت ترد
تولين: ايوه
مهند: بابي حبيبي
تولين: حضرتك من؟؟
مهند: للدرجه هدي صوتي تغير و لا انتي لي نسيتيني
تولين: اهاا عرفتك اهلين
مهند: تولين كنها نبرة صوتك تغيرت
تولين: صحتك تمام ؟ امورك تمام؟
مهند: كل شي تمام، ما كنتش متوقع انك تنسيني بالسرعة هدي معقوله اسبوع كامل ما ترنيش عليا و لا تسألي و لا ادوري هنت عليك بسرعه هدي
تولين: عارف انت شن لي شدني عليك و ما خلانيش نتصل او نسأل ع اخبارك ف مش داعي نكثرو م الحكي الفاضي
مهند: نحبك ي تولين مش قادر ننساك انا ، شن الحل ،و انتي وعدتيني انك مش ح تسيبيني الا ف حاله تخش ف حياتي بنت و مافيش بنت غيرك ف حياتي
تولين: شن ندير هلي و هلك خشو ف موضوعنا و دمرو علاقتنا مش حد براني غير اهالينا،
مهند: بس تقدري تحاربي انتي ع خاطري لو تبيني جديات
تولين: اكيد نقدر نحارب العالم كله لما تكون ايدي ف ايدك و ماترخيش بيا ف الأخير، ح نحارب كل شخص يدمر علاقه حبنا مدام انت تبيني و انا نبيك
مهند: و هدا لي نبيه انا، وأنا معاك و الله ما نرخي بيك و لا نسيبك غير اوقفي معايا و ح تاخدي راجل،
تولين: شفت بنت خالتك و سلمت و حكيت معاها مهند
مهند: و ربي ما صارت و لا شفتها و لا اي شي انا اصلا كنت عند احمد صاحبي ما شفتهش بكل ، بس قوليلي اكيد انتي طلعتي ف فتره الاسبوع هدي كلها و ما كلمتينيش
تولين: وين بنطلع ماعندي وين نطلع
مهند: ع اساس ما نعرفكش انتي تموتي بدون طلوع جاوبي بصراحه ي تولين ، فكيني م الجو اصلا عارفك ديما مش حاسبتيني راجل تطلعي بدون ما تقوليلي و ما دوريش فيا بكل انا كاني راجل اصلا راه نخليك ما تحركيش م قدام الباب الا بإذني لكن انتي ما تصدقي نتعاركو ع خاطر تاخدي راحتك ف الطلوع
تولين: مهند شن دخل الموضوع هدا لما سالتك ع بنت خالتك ،عنديش جو لكلامك هدا بالله مش ناقصه بكل
مهند: ينعجد ام الرصيد عاودي عليا نبيك رصيدي بيتم
تولين: والله مزال ما عبيت لان توا غير فتحت شفرتي
مهند: تم تم ديما مصكرتيها و خلي ينفعك الطلوع متاعك وفصل الخط