#منقولة (غادرتني المشاعر )
الحلقه 1...
انا نور مواليد 93 بنت حلوه ومن عيله معروفه وعندي اخت وحده اسمها شهد مواليد 90 نقرأ انا وشهد في جامعه شهد اقتصاد وانا نقرأ انجليزي وكنا ديما انا واختي متقربات من بعضنا وطبعا نحنا دلوعات بابا وماما لان كنا البنتين الوحيدتين لهما فكانو اموفرينلنا كل شي وكنا انا وشهد اهم حاجه في حياة بابا لدرجة انا بابا تعارك مع خوه علينا لان كانو ديما يعيرو فيه ويقولولا انت عندك بنات شن يبن ايديرلك
وبابا كان ديما يعند فيهم علينا وكان ديما يقوللهم حنعلمهن ونربيهن احسن تربيه
وكنا عيشين حياتنا بطول وبالعرض ومبسوطات
لعند ماجا اليوم الي كان بدايه لتغير حياتي للابد
شهد :نور مازالتي مالبستي بابا نزل راه وقال الحقني في السياره وماما حتي هي كملت
انا: به هي شويه بس
شهد: الصبر يارب عليك اتمرخاي عندك
انا :باهي سكنتي خلاص
كملت هيا ياحنه وانتي زي المارد امصبيا ع راسي
شهد: هيا يا ام لسان طويل
انا : علي اساس حسستيني ان قصير الي عندك
شهد : واااااو انتي الي يحكي معاك يحصل فيك
نزلت انا وشهد وركبنا في سياره طبعا كان شهر رمضان وكان كل عيد نحنا وعمامي الثالثه نطلعو انعيدو برا ليبيا والمره هذي قررنا ان العيد يكون في مصر
ماما : يابنات اشرن حجاتكن الي نقصات بيش نروحو بدري نمشو لعيت عمكم ونروحو للحوش ونحطو الحاجات الي تبن تشرنهن في الشناطي راه معش فيها الوقت ضيق
انا وشهد : ان شاء الله ياماما
ونزلنا للمحلات وشيرينا الدبش والحاجات الي نبوهن كلهن
وتكينا ع عمي صلاح
طبعا عمي صلاح تسكن امعاه اجديده و عندا 4 شباب و3 بنات
عندا حاتم ومحمد متزوجين ويسكنو امعاه في نفس الفيلا ومالك وحسام هذوم الشباب لصغار هما الاثنين سنجل والبنات طبعا موده واسيل صحباتي انا وشهد المقربات موده كيف مواليدي واسيل مواليد 92 وعائشه هذي اختهم الكبيره متزوجه وراجلها اسما فؤاد ومازالت عروس وحتي هي ماشيه معنا المصر
طبعا عيت عمي هذوما انموتو فيهم ونحبوهم ويحبونا واقرب عم لبابا وديما مصبي مع بابا بحكم ان هو اصغر واحد في خوتا وعمي صلاح هو كبيرهم خشينا نحنا سلمنا ع عمتي عزيزه مرات عمي وكنينها لثنين وهدرزنا ع مشيا وساعه كم انوضو ومن يشيلنا للمطار وكيف يسير
طبعا نحنا متصلين بالفندق وحجزين الغرف غادي وجونا ميه الميه وطبعا انا والبنات من الفرحه نبو نطيرو
انا : ياموده شن اخبار حسام
موده :ياحنه كويس اتصل بينا امبدري وعيد علينا وقال ياريتني امعاكم
انا :رايفت عليه واااااااجد بكل بكل
اسيل :حتي هو قالي سلميلي ع البترأ نور واااااجد
انا : نجك ليا ديما مذكرني
شهد : ع اساس الي يسمعك هكي يقول ماتكلمش فيه وانتي اربعه وعشرين ساعه اتكلمو في بعضكم
انا:تي انتي شن فهمك اصلا منقهره مني
موده واسيل :هههههههههههههه
طبعا حسام هذا اقرب شخص ليا تقدرو تقولو راسين في شيشه ويكون خويا في رضاعه لان ماما رضعت حسام فقعدت انا وحسام وموده واسيل وشهد خوت في الرضاعه حسام طبعا مواليد 89 وجذاب وشخصيه حلوه بكل ومتفهم وطبعا انا بالنسبه له مش اخت بس صديقه وصندوق اسراره يحكيلي في كل شي ويشكيلي في هما وحزنا واول وحده يقولي في كل قرار هو خذ في حياتا وهو تو قاعد يقرأ في بريطانيا وطبعا مش حيحضر العيد امعنا وانا مرايفه عليه ليا 6 شهور ماشفتش نحكي امعاه بس ع فيس ولسكاي
نردو لقصتنا
شهد : به ياأوني تو اتشوفي
انا : تي انبصر كلو الي زعلك
شهد : خلاص به
طلعت انا وموده وشهد واسيل للصاله وقعمزنا وقعدنا انهدرزو معهم ونشفطو
حاتم : ياعمي توفيق شن صار في الموضوع الي حكيتلك عليه
بابا : والله ياحتوما مازالت مانقشتهم فيه
طبعا نحنا كلنا :?????????!!!!!!!!!!!!!!
مش فهمين شي
حاتم : اصلا الجماعه مستعجلين
عمي صلاح : شن تحكو انتم فهمونا
بابا : بيما ان الموضوع انفتح خلوني نحكيه لكم وخلاص
حاتم عندا صاحبه وكويس وجاهز من جميع النواحي ويبي يخطب وحاتم دلا علي شهد وحكالي وانا طبعا ماحصلتش فرصه ناقش الموضوع ونشوف راي شهد
شهد : 😳
انا وموده واسيل :
حاتم :شن رايك ياشهد انقولا ايجي وتشوفيه وكان عجبك وهكي ع خير وكان ماعجبكش مافيش نصيب
شهد : راي الاول والاخير لبابا
بابا: خلاص معناها بعد انروحو خليه يتفضل
وطبعا نحنا انابشو في شهد
انا : وين ياحنه خلاص مانك ماشيه لمصر الي وانتي ضمنا روحك
شهد:سكري فمك راه كف
اسيل: الله الله وين ع لعيون الي قلوب قعدن من توا
شهد : والله كان ماتسكتي يااسيل نبص
اسيل :لاخلاص ماحد يجي شور شهودي
انا وموده : خزيه ياخوافه
ونحنا مقعمزين ونهدرزو وجونا تمام وكانت ساعه 2 مشينا درنا سحور وسحرنا كلنا مع بعضنا
وقعمزنا جنب اجديده كانت ادير في لعدالا وكل مجموعه تهدرز مع بعضها
مالك : السلام عليكم وسلم علينا كلنا
وقعمز وقعد يهدرز هو والشباب وبابا
شهد : نووور انتي افطني لروحك
انا : خطيني تراه
موده : واااااو مازالتي انتي عليك كره
اسيل : خاطري نعرف شن دايرلك بس
انا : خوكن هذا نكحل بالسم ولا نشوفه مش زرطتا نهائين وبارد وكأنا مش خوكن ع فكره راه شكلا هكي ولاد حرام
اسيل :ضربتني ع كتفي هيييي ياقرده افطني لروحك تغلطي في ماما هكي
موده وشهد :ههههههههههههه كلا البنت هذي لسانها متبري منها
نحكيلكم قصة مالك شاب حلوه اسمر وطويل وجسما حلو بكل انظني هذي احلا حاجه فيه مواليد87 مغرور وعصبي وشايف روحه بكل ومايحبش حاجه اسمها بنات وماعندش ثقه في البنات بكل
وانا الوحيده الي ديما انتعارك امعاه وناقش فيه عالموضوع هذا لان خواتا وشهد يخفن منا ومن عصبيتا وانا الوحيده الي متمردا عليه
وهو يبدل فيا في نفس الشعور الي هو شعور الكره والعدوانيه
انا : صبيت خشيت الحمام وانا طالعا من الحمام
مطبسا نفض في سروالي من تحت
رفعت راسي وحقيت مالك جاي من الممر
مالك : يبحت فيا ورافع حاجبه وبنظرة لئم
انا : كنك اتبحت هكي تعال كولني وخلاص
مالك : ضحكه هزو فكيني من حركات البنات زارق عليكي
انا : اوكي ياخطير يا هدهد سليمان انت
مالك : تي بطلي جلطه خيرلك
انا : باهي كان مابطلتش انت شن تبي ادير يعني
مالك : والله نضربك
انا : يامامي خفت حسني
مالك : به وجهك نبي انخش لحمام
انا : خش ان شاء الله خشا بلا طلعا
مالك : شنو قالتي
انا : سلامتك شي
مالك : خوافه
انا : مانيش معبرتك اصلا
وعديت من ياله وانا نمشي انتمتم هالحيوان البارد ثقيل
اتجيني اسيل تجري وتمسكني من يدي وتجري بيا شور الدار
اسيل :نور الله يربحك ساعديني
.
.
.
#يتبع
