غادرتني المشاعر
الحلقه 59 ماقبل الاخيره ..
نضنا الصبح ع صوت الفون انا وموده وكانت ساعه 7 وعنا حسام وقاللنا وتن اروحكن هيا
نضت انا وموده نشوفوش قدامنا وحده تحلف للتانيه اتخش قبلها للحمام بيش اتحصل اشوية غفوه
موده: نوضي يا أوني انتي
انا: لالا عدي انتي وطولي جوا
موده: وراس نور نوضي خليني انغفي حتي خمس دقايق بس
انا: تي عدي روحي
موده: عليك قصه مش عارف ليش منوضينا من صبح ربي
انا: خساره فيك اصلا يدهورو فيك وانتي شي خميرة نوم
موده: حي ع اساس تراه من الي تحكي
انا: هههه ع اقل انا مش مخطوبه بس انتي مقريا فتحتك وراجلك معاك بدل ما تصبي اتكمي روحك لرحله كيف هذي مش حتعوض واحلا جو ايام الخطبه ياهبلا
موده: نطت من سرير وقعمزت وشعرها مشفشف
حي صاح والله صدقتي خليني انخش نبدأ في روحي
انا: فرحت لان نرقدلي اشويه علي ماطلعت
خشت موده للحمام وسكرتا وانا حطيت الورغان وسقمت رقدتي وغمضت عيوني عابيا ع رقدا سمحا
واشويه تطلع موده من حمام
موده: انتي ياهمي
انا: هممممم
موده: صاح انا مخطوبه بس انتي في من يحبك وحيقعد يدور عليك ويبحت فيك ولازم تلفتي انتباها وتخليه مايشوفش غيرك وانتي عارفا ان في عيون محطوطات عليه واولهن سمر
انا: فنصت عيوني وذكرت ان مالك امس اعترفلي بحبا وانا عطيتا اشاره اني موافقا ومش رافضا
انا: هيييييي صاح خطرتيه عليا ونضت نجري للحمام وخشيت انا وموده مع بعضنا من باب وقعدنا انتعاركو عليه
انا: وراس دودي حرام عليك بعدين خوك هذا لازم يشوفني سمحا
موده: عدي روحي انتي وخويا وانا خطيبي يشوفني مشفشفا عندك عادي
انا: تو تلبسي انتي نوعيتك ماطوليش بس انا نأخذ في وقت ع مانلبس فخليني نخش قبلك
وراسك وراس زياد الغالي
باهي الله يربحك
موده: لالا عدي روحي
انا: خزيه خليني انخش بيش اليوم انديرلك جو مع زياد وغمزتلها
موده: عيونها قلوب . باهي وافقت
انا: خزيه صايعا
موده: ضربتني ع كتفي قلتها المؤدبا
انا: هههههههههه عادي عادي راجلك فيش حد براني
المهم ضحكت عليها وخشيت للحمام ادوشت وحكيت اسنوني وطلعت بدشمبر الحمام وخشت موده للحمام وانا فتحت الدولاب
وكانت اول مره من بعد ميتت المرحوم نصبي قدام دولاب ونقعد حايرا شن نبي نلبس ونهتم بلبسي وبمنظري ان لازم يكون حلو
وقعدت قريب نص ساعه لعند في الاخير قررت نلبس سروال جينز لونا احمر وكان ضيق بكل ومن لوطا مسفوط
وعليه بلوزا مخططا ابيض بالاسود ولبست كويش فيه عاليا اشوية ولونا ابيض كريمي ووشاح حتي هو لونا ابيض كريمي وشنطا سودا
ولبست خلخال بسيط في كراعي
ودرت رسمة عين ومسكارا واحمر خدود برونزي وروج وردي هادي
وبخيت عطر وخذيت مستكا ولفيت وشاح امتاعي لفا خفيفا
