#غادرتني_المشاعر
الحلقه{21}..
في الصبح :
نضت قعدت انتأمل في سقف الدار اول مره انشوف الثريا امتاع داري تريتا شكلها حلو
بعد فترة التأمل الي دامت قريب ساعه
بحتت في فوني ولقيت مسج من سيف ايصبح فيه عاليا وننصدم في ساعه كانت 2 الظهر نطيت منفجعا وطلعت خشيت الحمام توضيت وصليت ونزلت لوطه لقيت ماما وشهد وعيات ويشربن في قهوه
طبعا انا مش شوري تكييف مش من الجماعه الي يتكيفو
انا: خيييير
ماما: خير صح النوم ياحنه
انا: عليك رقده كنك ماوعيتينيش
ماما: قلت ماعندك ماديري وتعبانين خليكي راقده حتي شهد مابيتيش انوعيها ناضت بروحها
انا: ننقني بكل مش غير تعبانه انحس في روحي متكسره تكسير وجسمي كلا مدهكل
ماما: هذا البحر يتعب الواحد وبذات انتن زطتن زيطه ولكن يومين ترقدنش كويس ترقدو متأخر وتنوضو بدري
شهد: ننقنا درنا جو مش عادي
انا: اها عليك جو كان عليا راه ماروحتش بكل
ماما: خلاص عاد سفر وسفرتو وعيدتو في مصر روحنا من مصر قعدتو قريب اسبوعين وشلنكم زردا تو وقت لقرايا خلاص مش امتحناتكن قريب اشقن بيهن ان شاء الله معش في زردا الا ع العيد الكبير وانتن طيبات
شهد: ان شاء الله حتي انا نبي نبدأ من بكره
انا: طبعا مش عجبني الكلام بس قلت ان شاء الله
وقعدنا نهدرزو نحنا وماما ومشينا الجو لعند ماجا بابا تغدينا وهدرزنا اشويه
طبعا بابا من نوعيه الي يحكيلنا في كل شي ويأخذ في راينا وعطينا حرية الراي وديرنا كيف صحباتا مش بناتا بس بحترام وادب وفي دلاله بينتنا بذات انا وهو لان شهد من نوعيه الي تحشم وتنحرج شخصيتها عكسي تماماً
بابا: كلموني العرب الي جيين لشهد وقالولي يبو يجو يوم الاربعاء
ماما: وشن قتلهم
بابا: قتلهم يتفضلو
انا: باهي يابابا انت سألت عليه الراجل وشن يشتغل ومواليد الكم وهكي
بابا: انا حكيلي عليه حاتم وقالي راجل مافيش كيفا بكل ادب وأخلاق ومتعلم ولاد ناس وافق عليه وانت مغمض عيونك
وخلاص دبينا زكاه ليا حاتم فأكيد الشاب كويس
انا:باهي ان شاء الله خير
ماما: غريبه حاتم ماجابش للخواتا
بابا: ماهو قالتها له اشويه قالي ياعمي شاب عاقل ويبيها مواليد ثمانينات لكن انا قتلا عندي لكي وحده من تسعينات لكن كأنه ثمانينات عقل وهدؤ وان شاء الله تريحك قالي اسيل وموده طايشات ومازالن في نظري صغار لكن شهد عاقله وفهما
ماما: اه به ان شاء الله فيها الخير. معناها مازال يومين بس مادرنا موالح وجبنا حاجات الي نقصات واكيد شهد تبي تشري لبسا بيش تطلعلهم بيها
الي هذك هو
بابا: اه ديرن اموركن من تو راه المقابله في نفس اليوم لان نحنا العيل عارفينا وهو عارفنا يعني كان شهد عجبها وهي عجباتا خلاص نتفقو امتا العرس
