الحلقه 24-25
منقولة
#غادرتني_المشاعر
الحلقة 24
معتز: الحمد الله . وكان يبحت في شهد يبي ياكلها وكال . شن تقري انتي
شهد: نقرأ ثانيه هندسا
معتز:به مشاء الله شن داير فيها
شهد: كويس
معتز: انا نشتغل مع حاتم
شهد: اه قالي حاتم
معتز: وشن قالك اخره وضحك لان كان مستقصد ان يحرج شهد
شهد: هههه متحشما بكل ويدوبك كلام يطلع منها وراسها لوطا
وقعدو شهد ومعتز يتعرفو ع بعضهم لعند خش عليهم حاتم بالقهوه وشهد استأذنت منهم وطلعت
علينا في مطبخ
طبعا نحنا لما شفنها طلعت جينها نجرو
انا: ها شن صار
اسيل: احكي
موده: تي هيا ازح
شهد: تي اسكتن طح سعدكن خلني انتنفس اشويه عليك تزلييط
انا: امطولا ع الحال هذا انتي
شهد: قعمزت ع كرسي . ياحناتي شكلا حلو بكل ووسيم مش جميل بس شفتا اول ماخشيت بس وبعدها كملتها راسي في لوطا لعند حفظت رسمت الفرشا تاريتها سمحا فرشتنا
موده : هههههه عطك الخير باهي
شهد: وقعد يسأل فيا شن نقرأ ومواليد كم وقعد يحكيلي ع روحا
اسيل: به سألتيه انتي
شهد: تي نقولك راس في الوطا تقوليلي سألتيه
كملها هو يسأل وانا انجاوب وقعد يحرج فيا لان عرفني مزلطا
انا: هابا عليه شكلا مش ساهل
موده: به عجبك
شهد: تبن الحق ننقنا عجبني اسلوب وشخصيتا وكلاما حسيت بروحي متريحا امعاه
انا: ناقصا اتقولي انحبا وخلاص
اسيل: ههههههههه حسيتها حتي انا
شهد: خزي والله حيوانات اصلا وانا حماره الي نحكي معاكن
موده: تعدليش عليهن هذينا تفهات احكيلي انا
انا: خلاص شن تبيها تحكيلك اكثر من هكي
شهد: صاح شن تبيني نحكيلك كيف قعمزت
موده: والله صدقن فيك تستهليها الحق عليا
شهد : هههههه نشفط عليك يا دودو
اسيل: زعمك انجيبو تباسي فاكهه
موده: ظنيش كملن مالنش واجد كيف حطينهن
انا: خلنهن عند يروحو وخلاص
وقعدنا اشويه هكي لعند ماطلع حاتم وقاللنا قولولهن هيا وعديت قتلهم هيا قالولكم وطبعا روحو الصبايا وقعمزنا في صاله وقعدت شهد تحكي ع مقابلتها هي ومعتز لماما وعمتي واجديده وبعدها خش علينا حاتم
حاتم : ها ياعمتي زينب شن رايكم في العرب
ماما: مشاء الله عليهن اما وخواتا ناس راقيين ويخشو القلب
عمتي نعيمه : ننقنا عجبوني عرب كويسين
حاتم: وانتي ياشهد شن رايك في معتز
شهد: طبعا منحرجا وخلاص الكلام دوبك يطلع منها كويس
حاتم: يعني عجبك
شهد: اه
انا: تمزطت من حشم شهد . عجبها راه وقالت موفقا عليه
شهد: بحتت فيا منصدمه
وحاتم: زرتا ضحكا . تو انا نسأل فيك انتي ياقزما
انا: اصلا عليك تمزيط مش عجبها عليش تمرخاي والحشم هذا
ماما: نووور كنك ياعقرب الشمس
انا: ماكني شي يانبع الحنان
ماما: به اس عيب خلي اختك تحكي
انا: ها احكي يابرنسيسا شهد ومزطينا
حاتم: ههههههه كلا انتي تبطليش طولت لسان بكل
ماما: شي هذي كل حاجه عندها بسرعا ديما شايطا فيها النار
حاتم: به انا معتز تو قالي عجبتني البنت ومافيش شي يأخرني فهو يرجا في ردنا نحنا قالي كان انا عجبتها رن عليا وقولي بيش انديرو حاجه رسميا بعدها
ماما: به نحنا يجي عمك ونحكولا ونقولولك
حاتم: تم معناها نرجاكم اترنو عليا
ماما: ان شاء الله
حاتم: خلاص هيا انتوكلو نحنا
عمتي نعيمه : هيا
ماما: غير خليكم للعشا مازال بدري
عمتي نعيمه: لا خلاص وين يازينب مسيبين صلاح من بدري خلينا نروحو
انا: به ياعمتي نعيمه خلي بنات يباتن امعانا اليوم
عمتي نعيمه: كان بيباتن تعتهن يباتن
اسيل: به تو نقعدو
انا: انبصر راه انجامل فيكم وانتي ماصدقتي
كلهم:😂😂😂😂
اسيل: ضربتتي ع كتفي خزي حيوانا
