روايات من داخلي
اسفه عالتأخير لان كتبت الحلقه
ونبي اندير نسخ درت قص وعودتها من جديد
عليك اتشحوير .
مسلسل (غادرتني المشاعر )
الحلقه 12..
سيف : خير ياسموحه
انا: اهلين روحت
سيف: اه مروح تو قاعد في طريق
انا: بالي روحت
سيف: عليش كنك رايفتي عليا
انا: امممممممم مش واجد شويه بس
سيف: هههههههه صار اشويه
انا: اها
سيف: انا رايفت عليكي وااااجد بكل
انا: باهي خلاص تو سكر
سيف:عليش
انا: مش اتسوق انت
سيف: اها انسوق
انا: خلاص لما توصل كلمني
سيف: كيف خايفا عليا
انا: اكيد حنخاف عليك يعني
سيف: يانا عليا انا منك وخلاص
انا:سيييييف
سيف: عيوناااا
انا: سلامة عيونك خلاص بااااااي
سيف:باي
سكرت من سيف وحسيت روحي انحبا وتعلقت به وفي نفس الوقت انقول في حب بالسرعه هذي غريب الانسان هذا مسرع مايحب ومسرع ماقلبا يتعلق بالواحد وانا سارح وفي عالم سيف
شهد:اووووووي انتي وين ياحنه
انا: ديما زي المارد نطا ها شن تبي
شهد: خزيه العتب مش عليك عليا انا الي جايا نبي انقولك ع موضوع ونحكي امعاك
انا: موضوع شنو
شهد: عدي مالحي مش داويا
انا: وراس شهودي تحكي خلاص بلاش سماطه
شهد: ياحنه ذكرتي صاحب حاتم الي جا يبي يخطبني قبل العيد
انا: اها كنا
شهد: اليوم الراجل كلم بابا وقال انجوك الايام هذينا
انا: باهي
شهد : هذا الباهي ياحنه بابا وافق وقالا تفضلو في اي وقت
انا: لووووولي تبي تنخطبي واخيرن
شهد: تي مازال ياهمي غير خاليه ايجي ونشوفا ويعجبني ولا لا
انا: ع خير ان شاء الله بس من الي قالك
شهد: ماما تو قالتها ليا قالها لها بابا
انا: به خليني انوتي دبشي وحاجاتي
شهد: حتي انا بنعدي انوتي دبشي مازالت ماوتيتش
وقعدت انطلع في دبش الي نبيه وتيتا وكملت حوستي كلها وخشيت للسرير بحتت في فوني لقيت سيف مازال مارن عليا
وانا انفكر انرن عليه ورن هو عليا
نجك ليا لقلوب عند بعضها
انا: الو
سيف: خير ياأوزعا
انا: شن أوزعا هذي
سيف: معنها قصيره بالمصري
انا: ومن قالك انا قصيره ( ورقالي منها )
سيف: اصلك قصيره
انا: لالا طويله
سيف: ههههههههه القصر هذا كلا تحسابي روحك طويله امالا الطويل كيف يقعد
انا: سيف راه نسكر
سيف: والله زعلاتي ياطشه منها هذي الحقيقه
انا: سامط اصلك
سيف: لا والله انبصر قصيره اشويه بس
انا: ههههههه يعني انت مصمم ع رايك
سيف : شن درتي اليوم
انا: شي كسدت فالحوش اه قبل ماننسا بكره نحنا مشيين للشرق مبو نباتو يومين ونروحو
سيف: اه يعني زاردين
انا: اها
سيف: به غيري جوك وانبسطي غادي
انا: ان شاء الله
وقعدت نهدرز مع سيف لعند ساعه 4 بعدين خلاص كنت لازم نرقد حتي ساعتين لان 7 نبو نوضو ونمشو
نضنا وفطرنا وتينا سكوتنا وشلنا معنا اشويه موعين وتكو علينا عيت عمي
طبعا كانن 4سيارات
سيارتنا نحنا فيه بابا وماما وركبو معهم عمي ومراتا وسياره فيها حاتم ومراتا و ووليدهم ومعهم موده وشهد وسياره فيها محمد ومراتا ومعهم اجديده وسياره فيها انا واسيل ويسوق بينا حسام ومقعمز جنبا مالك وسياره فيها عائشه وراجلها (طبعا عايشه هذي اخت حسام الكبيره ماتنسوش)
