الحلقه 7
منقولة
مسلسل (غادرتني المشاعر )
الحلقه 7...
مشينا المطار وكان طبعا تفكيري وعقلي كلا عند سيف مش عارف شن صارلي حبيتا وكنت نسأل في روحي في حب هكي ولا هو مجرد اعجاب بس حسيت روحي تعلقت به اكثر من لازم مع ان كل الي صار بينا مجرد نظرات من بعيد
ركبنا الطيارا وكانت جنبي اسيل وحسام وكنت طول الرحله وانا انفكر في لحظات الي صارن بينا وفي كلاما مانسيتش منا حرف حفظتا كلما كلما
اسيل: اوني فيش اتفكري
انا: بصوت واطي بيش مايسمعنش حسام في سيف يا سول رايفت عليه
اسيل: تنهدت وماعرفتش شن اتقولي
انا: سكتت ورديت نفكر فيه لعند مانزلت الطياره في مطار بنغازي الله رديت لبلادي ولحبيبتي ومدينتي بنغازي ع قد ماكنت زعلان ع قد مافرحت بترويحتي لحوشنا وبلادنا
روحنا كل واحد ع حوشا واول ماخشيت لحوشنا ضميت شنطتي في دولاب ودرت شاور وخشيت لسريري وقعدت نفكر ونفكر في سيف لعند مانعست ورقدت
ماما: نور نور نوضي ياماما خلاص ساعه 2 الظهر
انا: باهي وعيت
نضت خشيت الحمام وطلعت صليت الظهر ونزلت لوطا لقيت ماما وشهد مقعمزات في صاله
شهد: صح النوم يابرنسيسا
انا: مش فظيتلك
ماما: وكنك ياحنه مسكتك عنزتك
انا: خهههههههه مش عارف منين اتجيبي فيه الكلام هذا
شهد: عدا هذي لما اتنوض تبيلها كم ساعه بيش تنطلق وترد كيف ماكانت
انا: عليك جو قلق تو تبيلنا بيش انتعودو ع نظامنا من جديد
ماما: اها صاح تبيلنا بيش انردو ع روتينا
شهد: تعاودنا ع جوها مصر
انا: اها وتنهدت وع طول جا في بالي سيف
ماما: امتا تبن تمشن للجامعه
شهد: بالنسبه ليا بكره بنمشي
انا: مش عارف تو انشوف نمشي ولا لا بالجو خليها
ماما: جو عينك سادك خلاص لكي اسبوع كامل وانتي تدهوري تو ابدي في قريتك وفي محضراتك بيش اتكملي بسرعه
انا: به ياماما ان شاء الله
ماما: لقيت عندنا 5 كروت فرح جيتنا
شهد: عليك جو امتا
ماما: الاسبوع الجاي ان شاء الله
وقعدت نهدرز انا وماما وشهد ولعند ماجا بابا وتغدينا وبعدها قعمزت عالفيس انا وشهد اشويه هكي وقعدت نكتب في اسم سيف بالانجليزي والعربي ع امل اني نلقه
رن عليا موبايل وكان حسام
انا: الو
حسام: ايوا خير يابترأ
انا: ييييييي نقصتك انت
حسام: خهههههههه كنك كلمة الحق وجاعا
ولا تبيني انقولك ياطويله يانخله مثلا وانتي قصيره
انا: سامو اختصر شن تبي
حسام: ياجربا انتي شن نبي منك
انا: صح معاك الحق به كنك متصل
حسام: شي كسدت وقلت نسأل عليكم وبعدين عليك جو ممل بكل تعودت ع جو مصر
انا: حتي انا ملا حسني بكل وضايق علمي
حسام: به شن رايكن انجي نأخذكن انتن والبنات ونديرو برما ع بنغازي ليا واجد عليها انا واصحابي كلهم مازالو ماروحو الي قاعد مازال في مصر والي في المغرب والي في تونس مكسد وعنديش ماندير
انا: اها طبعا مكسد مالكي غير نحنا بس بعد يجوك اصحابك تو اتفوتنا
حسام: شور يا ياناني الحياة مصالح
انا: به يامصلحجي جيب البنات ونحنا نوتو اروحنا ماعلي ماجيتو
حسام: تم تشاو
انا: باي
قلت للشهد ومشيت للماما وقتلها بيجينا حسام ونبرو اشويه وتينا اروحنا وجانا حسام بسيارتا وطلعت انا وشهد وموده واسيل وقعد حسام يبرم بينا من شارع لشارع وخذالنا سندوتشات كلينهن في سياره وصلنا حسام للحوش واتفقت انا والبنات بكره نمشو للجامعه
