منهاج محرم
بين السيده زينب والعباس ع
انضر تجاعيد العمر – بان الكبر – لمن رحت
هم تدري جم موته متت – واتحيرت - واتعذبت
آني متت مرتين * يمك ويم حسين
يخويه...
***************************
وينك يعباس الكمر - بعيوني ارسملك صور
من انظر الها
ابعينك سهم جن منكسر - وصورة جفوف اعله النهر
مكسوره جنها
واختك يبو الغيره انسبت - واسكينه ياخويه انولت
من يفزع الها
شتموا اهلنا ابلا سبب - واسياط ياخويه وضرب
بمتوني كلها
بعيوني شاهدتك حلم - يمه النجم - عالمشرعه
ياخويه اشوفنك ترد - انداس الورد - والفاجعه
تنضر عدوي العين
يمك ويم حسين
يخويه...
***************************
كلش طويله سفرتي – لوتدري خويه بحالتي
صعبه صعبه
حرمه اوحيده ابلا ولي – لا امي يمي ولا علي
وناس غربه
ايشتموني وآنه ام الخدر – وبجفه يسطرني الشمر
قاسي كلبه
بجفوفي نيشان الحبل – والصار ما شاله العقل
وعيني تربه
انظر عله اسنان الرمح – راس انذبح – يقره الكهف
ابهالحضه هاي اتشتت – واتراجفت – مثل السعف
واتعاتب اويالبين
يمك ويم حسين
يخويه...
**********************
شمروني بحجار وصحت – وينك يبو فاضل كلت
زينب سبيه
ياخويه هم عندك علم – جم مره حيدر ينشتم
وامي الزجيه
وآني الجنت مدّلله – اذتني خويه كربله
والغاضريه
جبريل هز مهدي بزغر – وهزاني بحباله الشمر
مجتوفه اديه
عالهزله خويه اتذكرت – لمن جنت – انوي السفر
بيدك تقدم ناكتي – واوسادتي – وتجوه الضهر
عشت آني احله اسنين
يمك ويم حسين
يخويه...
**********************
بعينك يبو فاضل سهم – وبعيني دخان الخيم
وي دمعها
يعيوني وينك ناشدت – هالجلمه عندي وعاتبت
وجن سمعها
جنه يكلي ابحسرته – كطعوا يمينه ويسرته
من كطعها
انترسن اعيوني ابدمع – من نضرته بهالوضع
وهم شلعها
يعيوني عباس اشبعد – ماضل بلد – بي ما مشينه
اينشدوني عنك عن قصد – راسك اصد – يبره الضعينه
وروحي تناشد وين
يمك ويم حسين
يخويه...
**********************
طير وجنت اتصورك – تحميني لودار الفلك
وانته يميني
تاليها بغيابك تهت – اختك عزيزه اتيسرت
مربيه عيني
زينب اخيتك يافحل – حرمه اوحيده ابلا اهل
ويعله ونيني
تاليها معقوله انسبي – وّدوني لديار اجنبي
امترب جبيني
ياخويه بديار الغرب – بيك الكلب – سولف سوالف
بعيوني شاهدت العجب – مجلس اطب – آنه ومضايف
والهم صبح همين
يمك ويم حسين
يخويه...
**********************
خادم اهل البيت (ع) الصغير
زيد الشمري
عظم الله اجورنا واجوركم بمصاب سيد الشهداء عليه السلام لبيك ياحسين لبيك ياحسين 💔💔💔💔💔💔💔
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
