Everyone scare of me Except him!! (System) (Own Creation) [Completed]

Arc_5 [The End]

#Unicode

ဟန်ရှင်းဝူနဲ့ မင်ဂျွန်ဆောင်းတို့ ဝမ်ချင်ယွဲ့ဆီကို လာလည်ကြသည်။ သူတို့ဆန္ဒအရတော့ မဟုတ်ပေ။ ဟန်မင်းကြီးက ဝမ်ချင်ယွဲ့ကို ဂရုစိုက်ပေးရမယ်လို့ တစ်ချက်လွှတ်အမိန့်တော် ပါးလိုက်သည်လေ။ ဒါကြောင့် ဝမ်ချင်ယွဲ့နေထိုင်နေတဲ့ ဧည့်နန်းဆောင်ဆီကို နှစ်ယောက်သား လာခဲ့ကြသည်။ ဟန်မင်းကြီးရဲ့အမိန့်တော်က ဟန်ရှင်းဝူကို ရည်ညွှန်းတာဖြစ်သည်။ ဒါပေမယ့် ဟန်ရှင်းဝူကို ပက်ကျိလို တွယ်ကပ်နေတဲ့ မင်ဂျွန်ဆောင်းကြီးကလဲ ဘေးကနေ လိုက်ပါလာလေသည်။ ဟန်ရှင်းဝူတို့နှစ်ယောက်ကတော့ တပြုံးပြုံးတပျော်ပျော်နဲ့ ဧည့်နန်းဆောင် တံခါးဝကို ရောက်လာကြသည်။ တိုက်တိုက်ဆိုင်ဆိုင်ပဲ တံခါးက ပွင့်လာပြီး ဝမ်ချင်ယွဲ့က ထွက်လာသည်။

ဝမ်ချင်ယွဲ့ နန်းဆောင်အပြင်ကို ထွက်ပြီး လေ့လာချင်တာကြောင့် နန်းဆောင်တံခါးကို ဖွင့်လိုက်တော့ တွေ့လိုက်ရတာက ချောမောခန့်ညားတဲ့ လူနှစ်ယောက်ပင်။ တစ်ယောက်က ညို့ပြာရောင် ဝတ်ရုံရှည်ကို ဝတ်ထားပြီး သူမကို ပြုံးပြနေသည်။ နောက်တစ်ယောက်ကတော့ အညိုရောင် ဝတ်စုံကို ဝတ်ထားပြီး ခုနကတစ်ယောက်ထက် အရပ်အနည်းငယ် ပိုမြင့်ကာ သူ့ဘေးက တစ်ယောက်ကိုပဲ ကြည့်နေသည်။ ထိုနှစ်ယောက်ကတော့ ဟန်အိမ်ရှေ့စံနဲ့ စစ်သူကြီးမင် ဖြစ်ကြောင့် သူမ သိလိုက်၏။ ဒါကြောင့် သူမ အချိုသာဆုံး ပြန်ပြုံးပြလိုက်ပြီး နှုတ်ဆက်လိုက်သည်။
"ဟန်အိမ်ရှေ့စံ...စစ်သူကြီးမင်"

ဟန်ရှင်းဝူ ခေါင်းပြန်ညိတ်ပြလိုက်ကာ သူမကို မေးလိုက်သည်။
"ဝမ်မင်းသမီးက ဘယ်သွားမလို့ပါလဲ"

"အာ..ကျွန်မ နန်းဆောင် အပြင်ကို ထွက်ကြည့်ချင်လို့ပါ"

"အော်...အစောင့်လဲ မပါပဲ သွားမလို့လား"
ဟန်ရှင်းဝူက သူမအနောက်ကို တစ်ချက်ကြည့်ကာ မေးလိုက်သည်။

"ဟုတ်ပါတယ်..လွတ်လွတ်လပ်လပ် သွားချင်လို့ပါ"
ဝမ်ချင်ယွဲ့က ပြန်ဖြေသည်။

"ဒါက မင်းသမီးတစ်ယောက်အတွက် အန္တရာယ်များလွန်းပါတယ်။ ပြီးတော့ မင်းသမီးက ဝမ်အင်ပါယာမှာလဲ မဟုတ်ဘူးလေ။ ဒါက စွန့်စားရာ ကျလွန်းပါတယ်"
ဟန်ရှင်းဝူက တာဝန်အရ သတိပေးလိုက်ပေမယ့် ဘေးက သဝန်တိုတတ်သူ ဂျွန်ဆောင်းကတော့ မျက်မှောင်ကြီးကြုတ်သွားသည်။ ရှင်းဝူက ဘာလို့ သူမကို စိုးရိမ်နေရတာလဲ?