#زواج_تقليدي 😍🔞

Part*13

حليت عينيا وانا نتململ في بلاصتي ،،، جبدت تليفون شفت لوقت لقيتها 10 تاع صباح ،، تقعدت في بلاصتي نتكسل ورجعت شفت مع لغرفة ،،، ستغربت واش جابني هنا ،،، رجعت حطيت راسي نتفكر ،،، ايه لبارح كان عرسي وهذي داري جديدة ،،، رميت لغطا من فوقي ،، ومشيت جيهة لفاليز جبدت تروسة (محفظة صغيرة ) كان فيها صوالح لحمام وغيرهم ،،، مشيت بيها جيهة دوش ،، رميت قشي وحليت لما خليته ينزل عليا ،،، تاعبة وحاسة جسمي مكسر ،،، نهار ليامس تعبني ،،، غسلت شعري وعملت جال دوش ،، ولفيت روحي بلمنشفة ،،، وقفت قدام مرايا نشفت شعري وطلعته لفوق ،،، وجبدت واش نلبس ،،، شفت لباس قصير شوي ،،، عملتهملي ماما خديجة مع شهرتي للدار ،،، جبدته حطيته على جيهة ،،، وشفت لي كرام لي جبتهم معايا ،،،، خيرت واحد منهم عجبني ،، دهنت جسمي بلكامل ،،، ولبست ومشيت نشفت شعري شيحته ،،، ولبست في رجليا وخرجت ،،، بقيت ندور قلت بلاك رجع ،،، دخلت للصالون مكان والو ،،، حسيت روحي نغلي ،،، حتى باش نخرج مانقدرش ،،، لكارط عنده يعني انا قاعدة مسجونه هنا وهو مش معروف وقتاش يرجع ،،، مشيت جيهة لكوجينة ،،، عملت كاس قهوة نقعد بيه راسي ،،، جبدت تليفوني نشوف ،،، لقيت عندي شعال من ابال ،، دخلت لقيت وحده من عند ماما خديجة ظاهر حبت تطمن عليا ،،، وزوج من عند مراد ،،، فديت فديت لا خدمة لا والو ،،، وزيد آدم لي مشى ومزال مايرجع ماكلفش روحه حتى يعيطلي ،،، بدا تليفون يصوني لقيتها عزيزة ،،، ستنيت شوي ورجعت رديت ،،_عزيزة: بنتي سيلا ،،، كيراكي يا عمري ،،، عيطت نطمن عليكم ،،،_سيلا: مليحة لباس ،،،_عزيزة: ايه بنتي احكيلي ،،، تهنيتو .،._سيلا: تهنينا؟_عزيزة: بنتي ماتحشميش احكيلي انتي وآدم قضيتوها ؟ ،،_وقت قاتلي ماتحشميش فهمت قصدها ،،، واش نقولها تهنيت مع راجلي لي مشى بلاما يقولي وين راح ،،،_سيلا: ايه ،،،_عزيزة: الحمد لله ،،، نستنى حفيدي يجي عن قريب نشالله ،،، تفاهمتومع خديجة ورا ظهر جايين عندك ،،،_سيلا: نشالله ،،،_علقت عليها وحطيت تليفون ،،، بقيت نمشي رايحة جاية ،،، واش نعمل ،،، نعيطله ،،، ولا نستنى يرجع ،،، واذا مارجعش ،،، احسن نرسله ميساج ،،،رفدت تليفون يديا يرجفو كتبت ميساج بزربة وحطيته ،،، ورجعت لبلاصتي نستنى فيه يرد عليا ،،،آدم يحكي:حليت عينيا على صوتها جاي ملكوجينة تعيط عليا ،،،_يسرى: آدم فيق راه نهار طلع ،،،نضت في بلاصتي نتكسل ،،، لولا ستغربت وجودي هنا ورجعت تفكرت انو لبارح انا جيت لعندها ،،، جيت نوض حبسني تليفوني ،،، شفت لقيت ميساج ،،، دخلت فيه لقيتها سيلا ،،، نسيتها كامل تكون تقلقت ،،،_سيلا:" رجع للدار عزيزة وماما جايين لعندنا مورا ظهر " ،، رسلتلها اوكي ونضت مشيت جيهة صال دو بان غسلت وجهي ،،، ودخلت للكوجينة ،،، لقيتها مصنفة ومجهزة ،،،_صباح لخير ،،_يسرى: صباح نور ،،، اقعد قهوتك راح تبرد ،،،_مشيت قعدت ترشفت شوي ورجعت شفت فيها تبان ناشطة على غير لعادة ،،،_راكي لباس ليوم ،،_يسرى: ايه اكيد ،، هيا كمل وخلينا نمشو ،،، راح نوديك لمكان رايع بزاف ،،، وراح نبدا منه صفحة جديدة في حياتي .،،،،                     سيلا تحكي :ستنيت دقايق ،،، وقت جاوبني بميساج ،،، ضحكت على روحي ماكلفش روحه حتى يعيطلي ،،، وفوق هذا شي. ،، رسلي ميساج فيه كلمة ،،، اوكي ،،، ضربت طاولة ،،، ونضت ،،، غسلت كاسي ،، ومشيت شعلت تيفي ،،، بقيت مقابلاته ،،، نتفرج وبالي في حاجه ثانية ،،، ههه علاش واش كنت نستنى مثلا ،،، عرس وفرحة ،،، واحلام ،،، وفارس احلام ،،، ونهاية سعيدة ،،، اكيد لا لي مكتوبله يشقى في حياته ،،، يكفيها للأخير وهو على نفس لحاله ،،، وهذا حالي ،،، مكانش لازم نتجاوز حدودي ونتمنى شغلات بعيدة عليا ،،، من وقت ماجيت لهذي دنيا وانا هاك مرارة في مرارة ،،، حتى وقت قلت خلاص لحياة ضحكتلي لقيت روحي نتعرض لصفعة ثانية ،،، وهذي لمرة صفعة قوية ،،،، رميت روحي في لرض نتفرج مع سقف لغرفة ،،، راسي يدي ويجيب ،،، اول وحده جات في بالي هذيك يسرى ،،، زعما يكون مشى عندها ،،، لاتصال لي جاه عندو علاقة بلموضوع ،،، غيابو لمفاجئ ،،، هو قال راح يكون سند ليا ،،، وراح يكون صديق حقاني ،،، علاش سمح فيا في اول فرصة جاته ،،، انا ضعيفة وهشة لهذي درجة ،،، انا بلا شخصية ،، لحد انو مايعبرنيش ويمشي ويخليني ،،، والله يا سيلا نتي حابة على روحك هاك ،،، رفدت تليفون وسجلت رقمه ،،، حسيت ناري شاعلة ولازم نطفيها ،،،بدا تليفونه يصوني وقلبي معاه يضرب ،،،، حتى رفد،،،نطقت بلاما نخمم ،،،_سيلا: واش حاسب روحك ،،، كيفاش مش عاملي حساب ،،، خالني هنا مش قادرة حتى نخرج برا ،،، كاين حد يمشي نهار ليلة عرسه ،، ومايقولش حتى وين مشى ،،، وفوق هذا شي ،،، مشي معبرني وماكلفتش روحك تشرحلي ،،،رميت هذا لكلام وبقيت ننهج صدري طالع هابط ،،، نستنى في رده يجيني ،،، اما لصدمة انو نسمع صوت ثاني ،،،_يسرى: عفوا ،،، شكون معايا ،،،_سكرت وحطيت تليفون نشوف فيه مصدومة ،،، رجال لكل كيف بعض ،،، وانا لي كنت حاطة في بالي انو هو عكسهم صدقت كلامه ،،، وقت حكى انو مكانش وحده قبلي ،،، صدقت وقت قالي ماعنديش مشكل نتزوجك ،،، وانا لي قلت انو طريقي راح تكون ساهلة باش نكسب قلبه ،،، ههه ظاهر راجل عارف كيفاش يمشي ،،، ومش طفل صغير ،،، يا ربي كيفاش صدقته ،،،، بايت عندها ،،، ويقولي عندي شغلة نقضيها ونرجع ،،، يعني ليلة لي كان ملمفروض معايا قضاها معاها ،،، آآه يا ربي ،،، بقيت نضحك من قلبي ،،، لين دموع نزلو مع خدودي ،،، حرقوني كيف ما حرقني هو ،،، كيفاش ماعمليش حساب ،،، وفوق هذا صاحبته تجاوب فيا وتقولي شكون نتي ،،، واش نقولها مرته انا. ، مرته لي ماعبرهاش ،،، ولا راعى مشاعرها ،،،آدم يحكي :_وين حابتنا نمشو ،،،،_يسرى : آدم حاسة ليوم على غير لعادة ،،، حاسة انو حياتي جديدة ليوم رايحة تبدا ،، وبوجودك نتا جنبي ،،،_طلعت حاجبي مستغرب ،،، مرات نحسهاوتحب تحكي شي ويرجع يوحل في حلقها وتبلعه ،،، فرحت اني نشوفها فرحانه ،،، لاحظت انو هذي لمرة قدرت تتجاوز مشاكلها بسرعة على غير لعاده ،،، مرات نوحل فيها كثر من سمانه وهي تبكي ،،، نضت مشيت جيهة لحمام نغسل يديا ،،، سمعت تليفوني يصوني ،،، تكون سيلا نسيتها كامل ،،، ولازم نرجع لعندها ،،، حتى انا مشيت بلاما نحكي معاها تكون ستنتني ،،،، وقت دخلت للكوجينة لقيت يسرى تحكي فلتيليفون ،،، شفتها تلفتتلي مستغربه ،،،                                        نضت مسحت دموعي ،،، ومشيت غسلت وجهي ،،، وتبسمت مش لازم نبكي ،،، اصلا علاش نبكي انا لانحبو لا والو ،،، دخلت للكوجينة حطيت موسيقى وبقيت نوجد فلفطور لماما خديجة وقت يجو نحطلهم ،،،، غطست فلتطياب ماحسيتش بلوقت كيفاش فات ،،، وقت خلصت كلشي ،،، غطيت عليه ،،، ومشيت للدوش ،، باش ماتبقاش فيا ريحة تطياب ،،، عملت دوش خفيف ،،، ودخلت لبست لباس ،،، طويل اما مفصل كامل جسمي ،،، تعطرت ومشطت شعري وحطيت مكياج غامق ،،، وبقيت قاعدة نلعب بلتيليفون ،،، شوي وسمعت صوت لباب نحل ،،،آدم يحكي:بقيت واقف نشوف فيها مستغربة تخزر فيا ،،،ورجعت قربت جيهتي ،،،،_يسرى: تليفونك كان يصوني ،،، جاوبت ،، آسفة تفضل ،،، ظاهر وحدة غالطة عيطت عندك ،،، خاطر وقت سمعت صوتي علقت ،،، شديت تليفون من يدها ورجعت شفت شكون ،،، لقيتها سيلا ،،، عديت يدي على شعري ،، وشفت فيها ،،،_واش قالت ،،،_يسرى: ماسمعتهاش ،،، ومانحبش نتذكر واش قالت ،،، خاطر نسيتو ،،،_لازم نمشي ،،،جيت ماشي ،،، لحقتني شدتني من يدي تحكي ،،،_يسرى: آدم ،،،_حسيت ملامح وجها متغيرة ،،، انا متأكد انو هي سمعت حاجة ،،، وقاعدة تحاول متركزش معاها ،،،_امم نسمع فيك ،،،_يسرى: ماتمشيش ،،،خليك حدايا ،،،_آدم: راح نرجع ،،، اما دروك مجبور نمشي ،،،،تلفت وخرجت ،،، ماحبيتش نتلفتلها ،،، باش ماتجبرنيش نظل معاها ،،، ركبت فلطوموبيل ومشيت ،،، حاولت نعيط لسيلا اما ظاهر ماشافتهش ،،، تعديت شريت قضيان للدار ،،، ورجعت شديت طريق لعند سيلا ،،،، اول ماوصلت طلعت نزرب ،،، حليت لباب ودخلت ،،، عرضتني ريحة قوية ،،، حطبت لقضيان ومشيت نحوس عليها ،،،_سيلا ،،، سيلا ،،،_سمعت صوت تيفي جاي ملصالون ،،، دخلت لقيتها شادة تليفون وغاطسة فيه ،،، وقت شافتني ،،، بقات حاطة عينيها فيا ،،، كانو نظراتها كان فيهم نوع ملتأنيب ،، لي ماحسيتش بيه وانا بعيد عليها ،،، اما دروك حسيت بحجم لغلطة لي عملتها ،،،                                    سيلا تحكي : كنت قاعدة شادة تليفون شاغلة روحي بيه ،،، حتى سمعت صوت لباب وقت نحل ،،، سمعت صوته يعيط عليا ،،، ماجاولتهش بقيت في بلاصتي ،،، حتى شفته وقف قدامي يشوف معايا ،،، طلعت راسي شفت فيه ورجعت حطيته ،،، وقت سمعته يحكي ،،،_آدم: ديزولي سيلا تلهيت ،،،_حسيت نار شعلت داخلي ،،، تلهى هههه ،،، ليلة عرسه تلهى ،،، خلي نساله نشوف بواش تلهى ،،،_بواش تلهيت ،،،؛؟_آدم: موضوع مايخصكش ،،_وقفت في بلاصتي ،، ورجعت مشيت جيهته عينيا في عينيه ،،، وقفت قدامه ،،، وطلعت راسي نشوف معاه ،،،_سيلا: بواش تلهيت ،،، بصحبتك ،،، ولا واش ،،، نعيطلك باش تقولي نتي شكون ،، اذا ناوي تخلي زواجنا بينا ،،، وماتحكيش عليه لواش تزوجتني ملاصل ،،، شكون هذي لي مخلاكش قلبك تخليها وحدها ،،، شكون هذي لي مشيت ليلة عرسك تجري وراها ،،،، رفدت يدي ودزيته ،،،_خليك بعيد عليا ،،، ووقت تجي عزيزة ،،، وماما خديجة راح نحكولهم كامل واش كاين ،،، وراح نقولهم انو زواج هذا حتى حد ماقابل منا بيه ،،،، انا مانحبش كرامتي طيح في لرض ،،، على لاقل حترمني ،،، حترم زواج لي بينا ،،، مش عيني عينك ،،_حسيته مصدوم من ردة فعلي ،،، بقى يشوف في صدره ويشوف في يديا .،، لي قاعدين يدزو فيه ،،، ماحسيتش كيفاش لوالي يدي رجعهالي ورا ظهري ،،، ولزني ليه حتى انفاسنا تخلطو ،،،، سمعته يحكي في كلام يا دوب ينسمع ،،،_آدم: اذا لي قاهرك كرامتك ،،، خليني نرجعهالك ،،، ارواحي غرفتنا لهيت ،،، نرجعك مرتي وخلي كرامتك ترجعلك ورضي غرورك ،،، اما بعدها تحملي نتائج لي راح يصير وحدك ،،، بقى يجبد فيا ماشي جيهة لغرفة ،،، بقيت مصدومه مش عارفة واش قاعد يصير ،،، من كلامه لكل شديت آخر شي قاله ،، تحملي نتائج لي راح يصير ،،، حسيت حد وجا عطاني صفعة فيقني بلي قاعد يصير ،،، نطرت يدي منه ،،، ورجعت لورا ،،،_واش قاعد دير ؟!_آدم: مش حابة يكون زواجنا حقيقي ،،، والله انا ماعنديش مشكل ،،، اذا كانت كاينة علاقة بينا ولا لا ،،، مستعد دروك نرجعك مرتي ،،،،، اما بعدها لا عاد تلوميني على شي ،،، ماتلومينيش اذا ماحبيتكش ،،، ماتلومينيش اذا ماحسيتيش بلحب معايا ،،، ماتلومينيش اذا خليتك تتعذبي ،،،_سيلا: نتا واش ،،، واش ،،،_آدم: ولا شي ،، انسان عايش بلاهدف ،،، عايش وخلاص ،،، انسان ماعندهش مشكل اذا خسر كلشي ليوم ولاغدوة ،،، عادي اذا خسرك نتي ولا غيرك ،،، انسان ماتتوقفش حياته عند شخص ولا نقطة محددة ،،، مش حابك تضيعي معايا ،،،، يجي وقت وتفدي وتمشي ،،، اصبري شهر ولا اقل منو وراح تطلبي طلاق ،،، علاش حابة تخسري روحك معايا ،،،_بلعت ريقي ،،، نشوف فيه ،،، علاش هذا لكدس ملهم ،،، علاش حياته معقدة وصعيبة هاك ،،، علاش هذا لكلام دروك ،،، وين حبيت نحكي سمعنا صوت لباب لي ماحبش يحبس،،،