حلت باب لغرفة ونزلت درجة درجة .... قلبها يضرب فلالف تحسه راح يخرج ... حاجة وحدة دور في راسها واش جابه في هذا لوقت .. مدامهم حكاو وتفقو على لموضوع لي راح يحكوه علاش راجع . اصلا قبل بساعة كانت معاه .... افكارها تدي وتجيب خايفة من ردة فعل بوها .... وصلت لعند لباب ... ترددت انها تدخل اما صوت خديجة لي جاها من ورا خلاها تتلفت مفزوعة ..._خديجة: سيلا ... ارواحي لهنا ( شاورتلها بيدها ) ..._تنهدت ومشات لعندها. .._خديجة: واش صرا ... علاش راكي هنا ... وعلاش آدم جانا في هذا لوقت .._سيلا: يعني ... هو ..._خديجة: ايه نسمع فيك احكي ..._سيلا: راح نبقى شهر عندكم .. ( حكاتها بزربة) ..._ضربت خديجة صدرها بيدها وجبدتها تكركر فيها للكوجينة ..._خديحة: علاش واش صرا .. يعني نتي وياه متعاركين ... علاش شهر ..._سيلا: لموضوع مشي كيما فهمتيه ... آدم مسافر ... عنده خدمة يكملها لثم . على هذاك قررنا مبقى عندكم ... شهر ... لحتى يرجع ..._خديجة: اممم ... يعني هذا هو لموضوع ... مكانش حاجة ثانية ..._سيلا: ايه ... اكيد هذا هو لموضوع ... واش راح يكون كاين ..._خديجة: يعني علاش مابقيتيش مع عزيزة..._بلعت ريقها تخمم واش تجاوبها ... يعني هذا سؤال في محلو ... اما ماعملتلهش حساب ..._سيلا: ايه كنت راح نبقى ... اما آدم حكالي انو نبقى معاكم لانو عزيزة مش ديما تبقى فلفيلا ..._خديجة: يعني هذا قرار آدم مشي نتي قتيله نمشي لدارنا ..._سيلا: لااا ( هزتلها راسها بمعنى لا ) .._خديجة: اوكي .... شدي دخليلهم لقهوة....._تبسمت وشدت صينية لقهوة من يدها ... متاكدة انو كلامها ماقنعهاش اما مضطرة تكبش فيها للآخر وماتبدلهش ولا تفضح روحها ... وحتى حد ماراح يلوم آدم ... راح يقولة انتي حبيتي هاك ... ولا لعيب فيك ... على هذاك بقات ساكتة ... لانو كل حد وظروفو ... مش لازم نحكمو من عندنا ....بلعت ريقها ودخلت ... تبسمت وحطت فناجل لقهوة قدامهم ... وقعدت مقابلتهم ..._سيلا بنتي ... آدم حكالي على سفرته ..._طلعت راسها شافت قي بوها ورجعت شافت فيه ... ماتوقعتش انو راح يجي ويحكيلهم ... هزت راسها في بوها ..._سيلا: ايه ..._ايه معليش ... شهر ويخلص ... اصلا ليام قاعدة تجري ... وانتي تستانسي معانا لحتى يرجع هو من سفرته ..._آدم: سيلا ممكن نغسل وجهي ..._سيلا بنتي امشي معاه لفوق ..._بلعت ريقها وشافت في بوها ... ماتوقعتش يطلب منها تمشي معاه لغرفتها._سيلا: بابا لحمام حدا لكوجينة ... نسيت ._لا بنتي مانسيتش ... اما خوك قاعد يدوش ... على هذاك قتلك مشو لغرفتك ..._هزتله راسها وجات واقفة .... تلفت هو شاف في بوها وستاذن منه ... طلعت مع دروج (سلالم) وهو وراها ... وصلت لباب لغرفة .. حطت يدها عليه وبقات تحكي ..._سيلا: علاش جيت ..._آدم: جيت حبيت نحكي مع بوك باش متواجهيش مشاكل في غيابي ... وباش نعطيك مفتاح شقة .. ثيابك مزالهم فيها ...دزت باب لغرفة ودخلت ... ودخلت هو وراها سكره وتركز عليه ..._سيلا: لحمام فلجيهة هذيك ... راح تلقى منشفه واش لازمك ..._آدم: يعني صدقتي انو حاب نغسل .._سيلا: مالا علاش طلبت نوديك للحمام ..._آدم: مانعرف ... اصلا انا ومش عارف علاش راني هنا._سيلا: نظن حكينا فلموضوع ... علاش كل مرة تذكرني بلي راح يصرا ..._آدم : مش قاعد نذكر فيك... انتي اكثر وحده عارفة انو ماعنديش مصلحة فلامور هذي . . لا حاجتي باش نتعبك ولا شي.... اما مش حاب نسافر وضميري يانب فيا .... مش حاب نحس انو ظلمتك ورايا ..._سيلا: تهنى ... مش قاعد تظلم فيا ... اصلا انا قررت نرجع نكمل حياتي وين حبست ... على هذاك خليك متهني مسيو آدم ....ضيق عينيه فيها كانو نبرتها وطريقتها فلكلام معاه ماعجبتهاش ... دور راسه على غرفتها يتفرج فيها ... وين كانت هي واقفة ضامة يديها لصدرها ومركزة معاه ... جات عينه على سريرها ... شاف تليفون محطوط عليه ... هز حاجبه لفوق ورجع تبسم شبه تبسيمة ..._آدم: شايفك ماضيعتيش وقت كثر وجبتي تليفون ..._سيلا: كان عندي من قبل. .._آدم: ممكن ندخل للحمام نغسل ..._سيلا: ايه تفضل ... حل لباب نتاع صال دو بان ودخل .. ورجع سكره ... قرب حل سباله نتاع لما غسل يديه وبلل وجهه ... ورجع يدور في عينيه عليه ...كلشي منظم فيه... رجع شاف جيهة لخزانة . حلها لقاها حاطة شومبوان نتاعها وصابون وصوالح هاك .... جات عينه على كريم كانت محطوطة .. جبدها قلبها ورجع قربها من خشمه ( نيفه) ... تبسم ورجعها لبلاصتها .... رفد لمنشفة مسح بيها وجهه ورجعها لبلاصتها ... وجا خارج ... لقاها واقفة قدام وجهه .. وقت شافته رجعت لورا ..._سيلا: واش ... علاش قاعد تخزر ( تشوف) فيا هاك ..._آدم: صار لازم نمشي .... رجع دخل يده في جيبه ... هذا لكارت نتاع شقه باش تقدري تحليها..._ضمت شفافها .... ورجعت مدت يدها شدتها عليه . .. يعني مجبورة تديها عليه لانو غراضها مزالو فيها ...._رجع حط يديه على كتافها هزها وتبسم ..._آدم: ردي بالك على روحك ..._هزتله راسها ورجعت ورا .... عدى يده على وجهه ومشى جيهة لباب حله وخرج .... رجعت قربت ملباب تسمع في صوت خطواته وقت لي نزل ... رجعت حبت تلحقة وتردت ... اصلا علاش تلحقه ... هو فلاخير راح يمشي لحقاته ولا لا ... مشات رتمات على سرير ... وحطت يديها على كتفها تتحسس فلبلاصة لي تلمسها منها. .. ورجعت تنهدت .... سمعت صوت طوموبيل برا وقت لي مشات ... ناضت تجري ... بقات تبع فيه ملشباك بعينيها لين ختفى .... شوي وسمعت صوت لباب ... تلفتت لقات ختها جات ... مشات عنقتها وفرحت وقت عرفت انو سيلا راح تبقى معاهم شهر كامل ....فلجهة ثانية .... طاوله طويله منصوبة وسط صاله كبيرة كلشي منظم فيها .... قاعد على لكرسي وهاز جرنال في يده يقرا فيه ... سمع صوتها وقت دخلت ... قربت جيهته طبعت بوسة على خده وقدت بجنبه ... حط لجورنال على جيهة ورجع شاف فيها..._شادية: بونجور بابا ..._عثمان: بونجور ... صحة نوم ..._شادية: والله تاعبة ... عندي مدة ماخذيتش نومه هاك ..._عثمان: اييه .. واش كاين جديد ... هز شوكة وسكين في يده ورجع ياكل ..._سكتت شادية شوي ورجعت حكات ..._شادية: شي ... عندي امور نقضيهم في نهاية لاسبوع ..._عثمان: ...._شادية: راح نمشي سمانه ونرجع ... بابا تعرف انو امور لخدمة وشركة مشي جوي .... نحب ننفرد بخدمتي وحدي .._عثمان: ومراد تاعك عنده علم بلموضوع . ._شادية: ايه عنده ... وماعترضش ..._رجع حط شوكة من يده وشاف فيها يتمالك في اعصابه ..._عثمان: تعرفي بلي انا اعصابي تلفت منكم..... عندكم اكثر من عام مع بعض ... ونخطبتو ولتوا مش مقرين وقتاش تعرسو ... راه لموضوع بدا يقلقني ... اذا علاقتكم مشي جدية افسخو لخطبة ..._شادية: بابا ..._وقف في بلاصته ورجع حكى ..._عثمان: حكي معاه ليلة يجي لعندنا يتعشى ونحكو فلموضوع ..._هو مشى وهي تنهدت ورجعت هزت تليفون ... تحكي معاه حلت عينيها تتثاوب ... رجعت تشوف مع سقف لغرفة ... تململت في بلاصتها وجبدت تليفونها من تحت راسها تشوف مع لوقت ... لقاتها 6:00 نتاع صباح ... رمات لغطا من فوقها ومشات دخلت للصال دو بان ... عملت دوش خفيف وخرجت .... نشفت شعرها وبقات دور بلمنشفة .... رجعت للصال دو بان فتحت لخزانة وجبدت لكرام منها ... ومشات دهنت كامل جسمها بيه ... ولبست ثيابها دخلانية ... وبقات تفركس على حاجة تلبسها من لي شراتهم .... فلاخير جبدت لباس طويل ومفتوح شوي ملتحت فلنوار..... ولبست بوت ... وقفت قدام لمرايا ... حطت وشاح على رقبتها ... وشافت مع يدها .. بقات تتامل في خاتم زواجها .... حبت تنزعه من يدها .. ورجعت تردت ... فلاخير قتنعت وحطاته فلصاك ... وتنهدت ... بقات تخمم زعما يكون وصل ولا مزال. ... اذا مشى فلوقت لي خرج فيه من عندها يكون وصل .... خمت تبعثله ميساج تطمن عليه ورجعت تردت ... راجل هرب منك يا سيلا وخلاك وراه ... باش ماتدخليش حياته ونتي تخمي فيه .... عوجت فمها ورفدت حطت شوي مكياج بلاك تروح صفورية وجها .... تفقدت صاكها وشافت مع ساعة كانت 7:30 يعني راه عندها لوقت ... نزلت حبة حبة باش مايحسوش عليها ... وطول ماوصلت عند لباب وحابه تخرج وتحبسها خديجة._خديجة: سيلا ..._سكرت عينيها ورجعت تلفتتلها بشوي ..._خديجة:وين على صباح ربي .._عدلت روحها ورجعت تحكي ..._سيلا: نخدم ..._خديجة: وعلاش ماعنديش علم بلموضوع .._سيلا: هاكي عرفتي ..._خديجة: ايه ... راه آدم وصاني عليك .... وقال ديرو بالكم عليها ... يعني راح نظل وراك ..._سيلا: يوووه ماما خديجة انا بنتك ولا لا . هذا لكلام علاه ... رجعت تحكي وتشاور بيديها .... هو سافر وانا هنا حابين تخنقوني ... قتلك ماشية نخدم اصلا انا شكون عندي هنا ..._خديجة: خاتمك وين يا لالا ... وتقوليلي حابين تخنقوني ... هاكي راجلك مشى من ونتي رجعتي تمكيجي ورامية خاتمك ... وين راه ..._سيلا: راه في صاكي ... شوفي يديا كيفاش راهم ملبرد ... ورجع يوجعني لخاتم.... تو وقت نوصل للخدمة نحطه تهني ..._خديجة: حطيه دروك (تواا) ..._تنهدت ورجعت نزلت على شفافها تكثم في غيضها ...وجبدت لخاتم حطاته في صبعها ...._سيلا: مليح هاك ..._خديجة: ايه احسن. ...هيا امشي وقت توصلي عيطيلي ..._سلمت عليها ومشات للشركة.... اما شي ماحبش يمشي من بالها . كل ما تتفكر ليلة لبارح ولي صرا جسمها يرجف وتحس بقشعريرة صرات في بدنها اما ترجع تكبس روحها كل ما تتفكر انو خانها ... وماعبرهاش ... ولا كلف روحه يعتذر منها ...سيلا تحكي :_عطيت لمول طاكسي دراهم ونزلت قدام شركة ... تنهدت ومشيت داخلة ... نشوف في حركة بزاف ... ناس جاية رايحه كل حد متلهي بخدمته ... اصلا اول مرة تشوف ضجه كيف هاك قبل شركة كان مسيطر عليها لهدوء ... مشات خطوات للداخل .... عرضتها عبير ..._عبير: سيلااا ._تبسمت ومشات جيهتها سلمت عليها ..._عبير: وين راكي يا بنت توحشتك بزاااف.... هيا رواحي ليلة عاملين حفلة. ...._سيلا: حفلة !!! _شادية: حبي وين راك ... راني ملصباح نعيطلك وشي ... ماتجاوبش ..._مراد: شادية مارانيش فاضي عندي خدمة ..._شادية: ايه اما بابا يحب يحكي معاك. .._مراد: لواش ..._شادية: مانعرف .... ممكن على زواجنا ..._مراد: نحكي معاك وقت نفضى تو راني مشغول ..._علق عليه ورجع حط صوابعه على نواضره ... لتو مش عارف كيفاش يقدر يتخلص منها ... حتى آدم سافر ومايرجعش الا من مورا شهر ... ولهذاك لوقت لازم يتحمل شادية وبوها .... هز روحه ومشى وقف قريب ملشباك يتفرج لبرااا ... شافها وقت نزلت ملطاكسي ودخلت ... تنهد ورجع دور عينيه ...سيلا تحكي:_وقت دخلت للشركة عرضتني عبير ... سلمت عليا وحكاتلي انو كاين حفلة.... مانعرف لواش بتحديد ... اما حسيتها جات في وقتها باش نتفرهد شوي ونبدل جو ..... ستاذنت منها وطلعت للفوق ... مشيت طول لمكتبي..... حطيت صاكي على جنب وشلت لخاتم من صبعي ورجعته فلصاك .... رتبت مكتبي..... وخرجت نجيب كاس قهوة نصحصح بيه. ... اول ماحليت لباب لقيته خارج حتى هو من مكتبه.... دخلت بعضي شوي .. ورجعت حكيت ..._سيلا: بونجور ..._هزلي راسه ومشى .... طلعت حاجبي مستغربه. .. ماتوقعتش تكون ردة فعله هاك ... اصلا تبدل جملة.... خليته يمشي قدامي وانا وراه .... قربت ملماكينة نتاع لقهوة خذيت كاس ورجعت لورا صدمت في وحده ورايا طاح لكاس في لرض .... وانا زلجت قريب لانطيح .... اما اول مافقدت توازني لحقني هو .. حسيت بيديه لتفو على ظهري وجبدني ليه .... لتوا مش مستوعبه لي صرا .... قريب لا نطيح قلبي بقى يضرب فلالف ... بقيت شاردة نسمع غير في اصوات لموظفين لي دايرين بينا .... رجعت فلت روحي منه وبقيت واقفة نتفرج عليهم .... رجع حكى ومشى ..._مراد: حتاطي لمرة لجاية ..._هزيتله راسي ... وبللت شفافي لي حسيتهم شاحو ملصدمة .... تي غير نفكر انو ممكن راني طحت في لرض نخجل ... اصلا انا هاك ديما من مصيبة لختها ... قربت مني عبير تستفسر اذا راني مليحه هزيتلها راسي بواه ومشيت للحمام دخلت وسكرت على روحي .... بقيت واقفة نشوف مع لمرايا .... ورجعت حليت سباله ... بللت رقبتي ... وعديت يدي على شعري .. . ![]()
![]()
حبست طوموبيل قدام شركة ... ونزلت ... رافدة بوشاتها في يدها وداخله ... حاسة روحها ليوم متفرهدة خاصة بعد لي صرا ... حست روحها عملت انجاز كبير ... وقدرت تبعد آدم من مرته لي مش معروف هويتها . اما هروبه ملبلاد يفسر انو قرر يمشي ويخليها .... وقرر انو يرجع كيف قبل .... هذا شي رضى غرورها حتى ولكان ماشافش فيها اما احسن مايكون مع غيرها ... ليلة لبارح كانت كافية باش تفهم منه انو سفرته هذي اشارة على انو آدم راح يرجع كيف ماكان .... لمعة لي كانت تشوفها في عيونه وقت تساله على مرته راح تختفي ... هو ماعرفش روحه ... ومالاحظش تغيرات لي صراتله ... اما هي شافتها ... ودرستها ... وفلاخير لقاتلها حل .... خرجت ملحمام ورجعت لمكتبها ... حطت لاوراق قدامها وبقات غاطسة فيهم ... كل شوي يمشي بالها ليه ... تخمم فيه واش يكون يدير ... زعما راح ينساها ... زعمة نسى لي صرا بينهم لبارح. .. رجعت حطت يدها على شفافها تتبسم ... اما طول مارجعلها عقلها .. ورجعت قطبت حواجبها ... وقت تتفكر واش عمل فيها تعيفه كثر.... عدت يدها على وجها. .. وبقات تفركس فلاوراق ... تلهي في روحها بيهم .... شوي ونحل لباب نتاعها ... دخلت شادية ... وبقات واقفة تشوف فيها ورجعت حكات. .._شادية: مراد هنا ..._سيلا: ايه هنا .... تقدري تمشي لمكتبه تلقيه ..._شادية: كنت فيه ومالقيتهش ..._سيلا: اااا ... ممكن خرج ... اما تو يرجع استنيه ...._شادية: نتي جديدة؟!_سيلا: ايه جديدة ... يعني عندي اسبوعين ملي بديت نخدم ..._شادية: ايه مليح ... انا خطيبة مراد ..._سيلا: متشرفين ..._هزتها ملفوق للتحت وخرجت .... كانو تحب تحطها عند حدودها وتعلمها كيفاش ماتتعداهاش ... ديما وقت تدخل وحده جديدة للشركة شادية اول وحده تتعرف عليها ... وتتاكد منها ... هذا لكل خاطرها تخاف انو مراد يحب وحده غيرها ... بينها وبين روحها عارفة انو مراد ممكن يجي وقت يتخلى عليها .. خاطر حبهم مشي قوي .. ولا خلي نقولو مبني على مصلحة وللزوج يعرفو هذا شي ملبداية ... اما شادية مع لوقت تعلقت بيه وحباته ... ومن وقتها ديما تحاول تخليه يبادلها نفس لحب ...سكر عينيه ورجع حلهم وقت سمع نداء لي يقول انو طياره نزلت فلمطار ... عدى يده على وجهه ....وناض يتكسل ... شاف مع لوقت ونزل .... اول ماحط رجليه على لرض ... جاه صياحها من بعيد ..._سارة: آدم ... آدم .. ( المهم لحوار بينهم راح يكون بلغة الفرنسية ... باش مانظلش نترجم راح نكتب بلفصحى 
)_شاورلها بيده ... ورجع رفد صاكودوه (حقيبته) على كتفه ... ومشى جيهتها. ._سارة: لا اصدق انك عدت بهذه سرعة. ... عندما اتصلت البارحة واخبرتني انك سوف ترجع فرحت كثيرا .._تبسم وقرب منها عنقها .... ومشاو ... كانت طوموبيل نتاعها براااا ....._سارة: هل تقود انت سياره ام انا ..._آدم: خلي انا نسوقها ..._شد عليها لمفتاح ومشى ركب وهي حداه .... طول طريق وهي تحكي وتستفسر واش صرا معاه ... وحتى هي حكاتله واش صرا من وقت ما سافر عليها ..
أنت تقرأ
#زواج_تقليدي 😍🔞
Mystery / Thrillerسلام حبوباتي هاني جبتلكم الكرو لي طلبتوها # سلاااام حبوباتي 😘😘😘 ،،،،،، هاني جيت ،،، وسعولييي 🏃🏃🏃🏃🏃🏃 ..... جيتكم بموضوع ناااار 🔥🔥🔥🔥🔥🔥🔥🔥🔥🔥🔥🔥 ،،،،، المهم مش حابة نطول في المقدمة ،،، العنوان وحدو يكفي ويوفي ،،، #زواج_تقليدي ،،،،،،🔥...
