![]()
يا امرأة أحبها..تفجر الشعر إذا داست على أي حجر..يا امرأة تحمل في شحوبهاجميع أحزان الشجر..ما أجمل المنفى إذا كنا معاً..يا امرأة توجز تاريخي..و تاريخ المطر!!![]()
مشيت بقيت نشوف فلثياب معاها ،،، خيرتلي لباسات تاع خرجة ،،، من كل لالوان ،،، وانا نتبسم وخلاص ،،، كل شوي نتلفت خايفة يمشي ومانحكيش معاه ،،، دخلنا لركن فيه حقايب نتاع ليد ،،، ختارتلي ،،، واي حاجه تسقسيني عليها نقولها باهية ،،، درنا قريب ساعتين حتى رجليا تعبو ،،، طلبت ملموظفة لي تم تدي لاغراض لي شريناهم ،،، وشدتني هي من يدي ،،،_عزيزة: خلينا نمشو نتقهوو ،،، لحال راه بارد ،،، وتكوني تعبتي ،،، ونرجعو زيدي شوفي واش باقي ،،، مزال لبيجامات ،،، وفي رجليك ماشريناش ولمكياج ،،،_سيلا: ايه اما خلاص راح نشريهم مع ماما خديجة بلاما تعبي روحك ،،،_عزيزة: امشي امشي قال نتعب في روحي نتي بنتي ،،، كيفك كيف آدم ،،، وانا فرحانه انو نتي راح تكوني مرت حفيدي ،،،،_سكت وتبعتها ،،. كان واقف متركز على لحيط وحاط يديه في جيوبه ،،، وقت شافنا تلفت شاف فينا ،،،_آدم: كملتوو؟!_عزيزة: مزال باقي شوي اغراض ،،، اما سيلا تكون تعبت ،،، على هذاك حبيت نمشو نتقهوو ونريحو شوي ،،،_مشى قدامنا وحنا وراه ،،،، بقيت نحكي مع روحي ،،، هذا عادي مايحكي معايا مامعبرني ،،، كيفاش راح نتعامل معاه ،،، وزيد علاش يبان احلى على تصاور ،،، وزعما عجبته ولا لا ،،،،وصلنا لاقرب كافيتيريا ،،،، كانت رشات ملمطر طيح ،،، ريحة تراب لي مخلطة مع ريحة لورد خلتني نسكر عينيا ونحس بيها ،،،، شعال لحال يكون شباب هاك ،،،_قعدنا على طاولة صغيره ،،، جا نادل يدي طلباتنا ،،،_عزيزة: نحبو قهوة سخونة ،،،، واذا كاين شي حاجه قاتو ولا جيبلنا ،،،،_كنت قاعدة حدا عزيزة وهو مقابلنا ،،، يبان هادي مش ملنوع لي يعصب ،،، ولا ممكن هو طبيعته هاك مايظهرش واش كاين داخله ،،، كان يشوف لبرا ،،،، وحدي لقيت روحي نتبسم ،،،، شكله حلو بزاف ،،،، يعني ممكن اذا تزوجنا نرجع نحبه ،،، ايه علاش لا ،،، ماما خديجة قالت جربي شغلات ثانية فلحياة،،، كيما الحب مثلا ،،،فيقني من سرحتي نادل لي جا حطلنا لقهوة ،،، ومعاها حلوى مغطية بلشوكولا ملفوق ،،، من ريحتها قدرت نميزها هذي نوتيلا ،،،، بلعت ريقي ،،، وانا نتخيل في روحي ناكل فيها ،،، ملصباح ماكليت شي ،، حتى ملقهوة نسكبت عليا ،،،، حطيت يدي على شعري رجعته ورا ،،، ورفدت كاس لهوة لي قدامي ترشفت منه شوي ،،،_عزيزة: ايه سيلا ماحكيتيلناش على لخدمة نتاعك ،،،_حسيت صوتي أخيراا راح يخرج من حلقي ،،، مش متعودة على هذا نوع ملصمت ،،،_سيلا: هي بديت الخدمة من ثلاث ايام ،،، في شركة ،،، يخدمو في مجال الخياطة ،، وتصميم وشغلات هاك ،،،_حسيته مركز معايا ،،،، ويشوف فيا ،،، كانو موضوع خدمتي يهمه ،،،_عزيزة: ايه مليح هاكي تقريبا تخدمي كيف آدم ،،، هو مصمم ومصور محترف ،،، حفيدي لغالي ،،،_سيلا: ايه اما انا قريت اقتصاد ،،، يعني خدمتي هذي مش اختصاصي ،،، مانعرفش نرسم ،،، اما نقوم بلحسابات وغيرهم ،،،_عزيزة: ايه بنتي المهم ربي يوفقك ،،، سمحولي نمشي نغسل ونرجع ،،،_لا وين وين ماشية وخلتني معاه ،،،، بلعت ريقي ورجعت ناكل ،،، نظراته هذي خلتني نرتبك،،، لدروك مزاله مركز معايا كيف قبل ،،، بقيت ناكل نلهي في روحي منه ،، اما والو راجل دخلني بعضي عينوه ماتنحوش عليا ،،،_سيلا: واااش. ،، علاش تشوف فيا ،،،_آدم: امسحي فمك ،،،_سيلا: ااه ديزولي ،،، رفدت مسحت شفافي ورجعت شفت فيه ،،،_سيلا: نحب نخدم ،،،_آدم: ،،،،،،،،_سيلا: قصدي مش حابة نحبس لخدمة بعد زواج ،،،_آدم: هههه ،،، ايه عادي ماعنديش مشكل ،،،،،_قلبي بقى يضرب وحسيت سخانه شدتني في وجهي ،،،، بلعت ريقي ،،، ممكن ماستنيتش يقبل بهذي سهوله ،،، وممكن ضحكته لي جات بلا مسبق انذار ،،،_سيلا: يعني ماعندكش مشكل صح ،،،_آدم: وي ،،،_تبسمت ورجعت ناكل براحة ،،،_عزيزة: هيا سيلا خلينا نكملو واش بقى مابقاش لحال ،،_سيلا: ايه جاية ،، رفدت صاكي وجيت نايضة ،،، حسيت بساقي لتوات ،،، قريب لانجي على فمي ،،، اما يديه سبقوني ولتفو على ظهري ،،، كبشت فيه بيديا ،،، مفزوعة ،،،_آدم: راكي لباس ،،، هزيتله راسي ،،، وعزيزة جات تجري ،،،_عزيزة: اللطف على بنتي ،،، راكي لباس ،،،_سيلا: ايه لباس ،،،_شدتني من يدي وكملت تمشي بيا لبراا راجعين للبوتيك ،،، وخليته ورايا قاعد يشرب في قهوته ،،،_هذا الشخص خلاني نحس بتناقض داخلي مابين الخوف وما بين الامان ،،، مش متعودة على انو الشغلات لي تمر بحياتي تكون هادية وطبيعية لهذي درجة ،،، العواصف لازم تحظر ،،، دروك ولا بعد وقت قصير ،،، فات الوقت خفيف مع عزيزة ماتسكتش ملحكي. ،، حسيت روحي مطمنة وفرحانه ،،، كملنا شرينا واش كان خصني لكل ،،، ورجعنا للطوموبيل ،،،، كانت لمطر بدات تنزل ،،، شدينا طريق للدار ،،، كان ليل طاح ،،، عاونوني نزلت صوالح للدار ،،، لاقتنا ماما خديجة عند لباب ،،، سلمت عليهم .،، وعرضتهم يدخلو ،،، اما عزيزة قالت انو لازم تمشي خاطر آدم عنده صوالح بزاف يقضيهم ،،، ودعتهم من عند لباب ،،، وهو كان فلطوموليل يستنى في خالتي ،،، سلمت عليها وسكرت لباب ،،، دار كانت دافية داخل ،،، وقلبي كان دافي كثر ،،، كنت حاسة روحي حابة نطير ملفرحة ،،،، شخصية آدم جذبتني ليه كثر ،،، حتى انو يبان متواضع. ،، ومايحكيش بزاف ،،، ويبان ناضج ،،،، جبدتني ختي من يدي ،،، بفضول تحب تفهم واش صرا ،،، وماما خديجة توجد فلعشا وتضحك ،،،_ايه يا لالة ،،، وين كنتي وواش عملتي احكيلي كل شي ،،،_سيلا : ههه صبري عليا نمشي نبدل ،،، ونشف هذا شعر ونجي ،،،_ايه ازربي مالا ،،، ليلة مانطلقك حتى تحكيلي كلش ،،، طلعت لغرفتي نضحك عليها ،،،، بدلت قشي لي كان كله قهوة ،،، الحمد لله كنت لابسة مونتويا ليوم ولا كشفت روحي قدام لجماعة ،،، نحيت تريكو وشفت مع سرتي ،،، مزالها حمرة ظاهر فيا تحرقت ،،، جا على بالي مراد ،،، راجل مسكين وقف معايا ،،، وهذا لي صدمني ،،، تقول تحرقت ولا صراتلي حاجه ،،، اول مرة حد يتلهى بيا بهذي طريقة ،،،، جبدت لبومادة من صاكي ،،، حطيت منها كيف ما وصاني ،،، ولبست بيجامتي ،،، ودخلت للصال دو بان غسلت وجهي ،،،، رجعت شفتوفي شفافي ،،، جا بين عينيا كلامه ،،، مسحي فمك ،،، وانا لي كنت رايحة نشعل فيه بسباب نظراته لي وتروني ،،،، لميت شعري لفوق ،،، وغسلت سنيا ،،، وجبدت كرام مرطب حطيت منه على جسمي ،،، وواحد آخر حطيت منه على وجهي ،،، خفت يجيني نسيم( الوجه يتقشر) وعرسي بقاله ايام ،،، لبست شلاكتي ،،، ونزلت تحت ،،، بقيت قاعده مع ختي حكيتلها كامل واش صرا ،،، من قصة مراد حتى لي رجعت لهنا ،،،،_شوي وعيطتلنا ماما خديجة ،،، قعدنا تعشينا وعاونتها فلجلي نتاع صحون ،،، نشفتهم ورجعتهم لبلاصتهم ،،، ورجعنا قعدنا فلصالة ،،، شعلنا تليفيزيون ،،، وبقينا نتفرجو ،،، رحت جبت كامل واش شرينا ،،، حطيناهم وبقينا نتفرجو عليهم وكاين صوالح لي قستهم ،،،_اروى: ياي شوفي هذا لباس شعال شباب ،،، بربي نوضي قيسيه ،،،_سيلا: والله خلاص تعبت غدوة نكمل نقيسهم ،،،_اروى: قتلك نوضي ،،، هيا تحركي ،،،_مشيت لبسته ونزلت عندها ،،،_اروى: والله مواتيك ،،، تقول عملوه عليك ،،، خير ملسراول لي تلبسيهم كل يوم ،،،_سيلا: واش قصدك ،،، واش يدور في راسك ،،،_اروى:هاكي زيدي قيسي معاه هذا لبوت ،،، وصاك ،،، شوفي كيفاش جاوك ،،، هذو تاع خدمة ،،،_سيلا: حابتني نمشي نخدم بيهم ،،، انا حتى مزال مانتزوج ،،، وزيد شراتهملي نلبسهم بعد زواج مشي قبله ،،_اروى: مدامها شراتهملك يعني صارو ملكك ونتي حرة فيهم ،،، علاش هذا تعقيد ،،،_سيلا: اروى خلاص انا طفيت ،،، نمشي نرقد ،،، خليهم غدوة نلبسهم غير اعتقيني ،،، والله تعبت ،،،ستأذنت منهم وطلعت لغرفتي رتميت فوق سرير كيف ما جيت ،،، ناض تليفون يصوني ،،، ويعاود ،، جاوبت وعينيا مغمضين ،،،_سيلا: الوو ،،_مراد: واش راكي ،، ريحتي ،،،_سيلا: اممم ،،،_نضت مفزوعة شفت فلنيميرو ،،، اول مره نشوفه ،،،_سيلا: شكون معايا ،،،_مراد: مراد ،،،_سيلا: مراد ،،، شكون مراد ،،، ايه واه مسيو تذكرتك ،،،، ايه الحمد لله ،، لباس ،،، اما من وين جبت نيميرو نتاعي ،،،_مراد: هههه نسيتي قدمتيه في ورقة تعريف نتاعك ،،،_سيلا: ااا صح ،،، يعيشك اما صرت لباس ،،،_مراد: ايه الحمد الله حبيت نطمن عليك ،،، تصبحي بخير ،،، علق عليها وحط تليفون ... وبقى يشوف مع سقف الغرفة. ورجع يتبسم ... تفكر صباح مين كانت تتمشى عين مسكرة وعين محلوله. ... وعاود ضيق عينيه ... علاش قاعد يخمم فيها ... وعلاش شغلتله باله لدرجه جبد لاوراق يحوس عليها بينهم حتى لقاها وماتهنى حتى عيطلها .... لهذي درجه امرها يهمه. ... ممكن جذباته بساطتها ... اكيد هو عنده حبيبته ... وراه مرتبط بيها ... ماعندهش علاش يشغل باله بيها ... نفخ ورجع نزل للتحت..... جبد لما شرب وخرج للجنينة. ... سجل نيميروها وعيط. ...._شادية؛ الووو ... حبيبي وينك ..._مراد: فلبيت .... واش كاين._شادية: والو غير توحشتك. .. ستنيتك تعيطلي .... حكيت مع يسرى ملشركة قالت خرجت .._مراد : وي كانت عندي خدمة خرجت. ...._شادية: راك لباس ..._مراد: اممم ... متوحشك ..._حطت شعرها على جنب ورجعت تحكي باغراء ..._مراد: لي توحشني يجيني ....رجع نفخ ... وبعد تليفون على وذنه ... حتى هو مشي عارف علاش قالها توحشتك ... وهو فلاصل مافكرش فيها جملة. .... علق حتى بلاما يجاوبها صكر تليفون ... ومشى للداخل .... حاب يرتاح وغدوة ويشوف واش قاعد يصرا معاه ....طلع نهار كيف لعادة ... ليوم نضت نعطس ظاهر فيا مرضت من بارح ... مشيت غسلت وجهي .... ونزلت تقهويت وباقي نعطس ... اففف مش وقتو خلاص .... لقيت ختي في وجهي .._سيلا؛ بعدي من وجهي مش ناقصاتك ..._اروى ؛ لا ماتتسبيش ... شدي لبسي هذو ...._اففف ... خطفتهم من يدها وطلعت لبست ... وحطيت شوي مكياج ... شوي هالات كانو تحت عينيا ولوني شاحب .... شفت روحي مع لمرايا .... لباس شوي قصير اما مع لبوت راح يتوالم معاه. .. لبست مونتويا وشعري خليته هابط على وجهي كيف لعادة ... حطيت وشاح على رقيتي ونزلت. ...._اروى؛ ستني باقي لبرفان ... جابت دوشتني بيها وماسابتني الا بطلوع روح ... خرجت برا لقيت لحال مشمس ليوم فرحت بزاف. ... بقيا نتمشى حتى وصلت للمحطة نتاع لباص ... ليوم طول على غير لعادة ... شفت مع لوقت لقيتها 8 لا راح نطول هاكا. وصلت 8:10. ... عرفت بلي ركبة مكانش شديت طاكسي ومشيت معاه ..... طول طريق وانا ندعي مايزيدش يطول ... وقت وصلت ... طلعت نجري لمكتبي ... سلمت عليهم ودخلت ... لقيتهم يشوفو معايا ... ضيقت عينيا ... واش كاين ... قعدت على لكرسي لقيت ضرف محطوط على مكتبي ... حليته نقراا فيه ورجعت حليت عينيا على وسعهم .... هذي ورقة فصل ... يعني فصلوني ملخدمة ... اما انا واش عملت. .. جات عبير عندي لي كلاها لفضول._عبير؛ واش كاين ... واش فيها لورقه._سيلا: شكون حطها هنا. ..._عبير: قبل ما توصلي بعشر دقايق ... جا لاستاذ مراد حطها ومشى رفدت صاكي ،،، وضرف ومشيت لفوق ،،،نحوس على المكتب نتاعه ،،، كيفاش هاك بسهولة ،،، يفصلني حتى قبل مايحكي معايا ،،،، لا وجاي هو يحط فلظرف ،،، ياخي لعباد كيفاش يتبدلو بين ليلة ونهار ،،، لبارح كان متلهي بيا ويعيط يسقسي عليا ،،، وليوم يطرد فيا بلا سبب ،،، اذا على تاخير يعطيني انذار ،،، مشي يطردني ،،، سقسيت واحد لقيته قدامي على مكتب المدير دلني عليه ،،، مشيت دقيت مرتين ،،، رد عليا ملداخل ،،،_مراد: تفضل ،،،_حليت لباب ودخلت لقيته حاط راسه فلاوراق لي قدامه ،،، كحيت باش يشوف فيا ،،،، شفته طلع راسه شاف معايا ملفوق للتحت ،،، وىجع حط راسه فلاوراق ،،،_مراد: واش خصك ،،،_سيلا: كيفاش واش خصني ،،، هذا واش ،،، انا عملت شي حاجه لي تخليك تطردني ،،،،_مراد: لا ،،،_سيلا: مالا هذا علاه ،،،_حطيت ورقة لفصل قدامه ،،، نستنى في تبرير ولا جاجه يحكيها ،،، اما جوابه صدمني ،،،_مراد: انا حبيت نفصل ،،، من راسي ،،،ومكانش سبب ،،،_سيلا: كيفاش مكانش سبب ،،، انا محتاجه هذي لخدمة بزااف ،،،،_مراد: تلقي غيرها ،،، ماعجبنيش تخدمي عندي ،،، وهذي شركتي وانا حر ،،،،_سيلا: يعني ماعادش نجي لهنا ،،،_حط يديه تحت لحيته وحركلي راسه بواه ،،،_حسيت روحي نهديت غير لبارح كنت فرحانه انو آدم قبل اني نخدم وليوم تقلعت ،،، خليت لورقة محطوطة فوق مكتبه ورفدت صاكي وجيت خارجه ،،، حبسني صوته مرة ثانية ،،،_مراد: ستني ،،،_تلفت ،،، شفته جبد ظرف ملدرج ،،، ومشى جيهتي ،،،_مراد: تفضلي ،،،، هذو تاع تعبك معانا ،،،_طلعت حاجبي مستغربة وحليته ،،، لقيت فيه دراهم ،،، شفت فيه بتحدي ،،،_سيلا: هذو مايعوضوش كرامتي ،،، رميتهم في وجهه وخرجت ،،،، حسيت دموعي راح ينزلو ،،، خرجت برا شركة وبقيت واقفة نشوف فلفراغ ،،، مش عارفة واش هذا ،،، علاش سعادة عندي مادومش ،،، علاش وين نقول خلاص رتحت ،،، نلقى باب تعاسة جديد نفتح في وجهي ،،،، بدات لمطر تنزل ،،،، رجعت نمشي تحته منهارة ،،، حتى رجعت مانحسش بشفافي لي يرعشو ،،، عينيا ماحبوش يحبسو ،،، لي قاهرني علاش ديما هاك علاش ،،،، بقيت نمشي تايهة مش عارفة وين رايحة ،،،، شفت طوموبيل حبست قدامي ،،، بعدت عليها وجيت رايحه فلجيهة ثانية ،،،، حسيت بيد جبدتني لعندها ،،،، حسيت حاجه صدمت فيها ،،، بقيت مفزوعة ،،، مش عارفة واش صرا ،،، ولا مع شكون راني ،،، وشكون عنده جرأة يعمل هاك ،،، حسيت بيد جبدتني ،،، وحضن دافي ،،، وريحة غريبة ،،، كانو ريحة عطر راجل ،،، ومع ريحة تراب صار عندها ذوق خاص ،،،،دزبته بعيد ،،، وبقيت نشوف فيه مفزوعة ،،، واش هذي لجرأة ،،، وعلاش لحقني ،،،_سيلا: شكون عطاك حق تتعدى حدودك معايا ،،،_مراد: لحقتك نحب نعتذر ،،،_سيلا: هههه لا ،،، ويحب يعتذر ،،،، وعلاش تعتذر ،،،_مراد: آنسة سيلا ،،،، مانعرف علاش طردتك ،،، ومانعرف علاش لحقتك ،،، اما قاعدة تصير معايا شغلات غريبة ،،، مانيش فاهمها ،،، واحسنوشي انك تستقيلي ،،،،_سيلا: ماراك طردتني ،،، واش لزوم لاستقالة ،،،_مراد: خلينا نمشو في بلاصة دافية نحكو ،،، لمطر راهي قاوية ،،_سيلا: لا بلعادة ننتمي لهذا لمكان ولمطر مشي حاجه جديدة عليا ،،، اذا حاب تحكي معايا تظلك هنا وتحكي ،،،،_مراد: اوكي ،،، تقدري ترجعي تخدمي كأنو ما صار شي ،،،_سيلا: هههه ،،، قالك حد من قبل انو عندك مزاج متقلب ،،، من شوي كنت تقولي قدمي استقالتك ،،، ظاهر فيه لكلام معاك ما عندو نتيجه ،،،، تلفت وجيت ماشية ،،،، حسيته لحقني وجبدني من يدي ،،، حتى جا راسي في صدره ،،، بقيت ندز فيه ،،، هذا واش قاعد يعمل ،،،_مراد: مانعرف واش جابني هنا ،،، لاحقك ،، وواقف في وسط لمطر كيف لمجنون ،، لي ماتهمه صحته ،،،، بدل مانكون مع خطيبتي ولا متلهي بخدمتي ،،، لاحقك هنا ،،، من وين خرجتي نتي ،،،_بقيت نفارع فيه ووالو ،،،، تقول عامل بلعاني ،،، يدي وجعتني وهو كابس عليها ،،، واش دخلني في خطيبته وحياته ،،، مشي انا قتله لحقني ،،، ضربته في رجله ،،، حتى فلتني وجيت ماشية ،،،رجع جبدني اما هذي لمرة غرس شفافه في شفافي ،،،، حتى نفس نسد عليا ،،،، كل ما نلز يزيد يجبدني ليه ،،،، حسيت دوخة شدتني ،،،، وكرامتي نمسحت بيها لرض واش يستخايلني ،،،، لز وجهه وبقى يشوف معايا ،،،، وانا واصله معايا لفوق ،،،، رفدت يدي وعطيته كف ،،،، وجيت ماشية ،،، ورجعت تلفتله ،،،_سيلا: حتى ولكان تطلب اني نرجع بعد لي صرا مستحيل نرجع ،،،، انسان بلا اخلاق ،،،، نذل ،،،_كبشت في صاكي ومشيت نجري ،،، حاطه يدي فوق راسي ،،، شعري تبلل بلكامل ،،، الحمد لله ماكان حد كون شافني ،،، سمعتي طيح بلرض ،،،حط يده على شفافه ،،، ورجع تبسم ،،، ومشى جيهة طوموبيل ،،، ركب وديمارا بيها ،،،، طول طريق وهو يتبسم ،،، تقول مشي هو لي كلى كف من دقايق ،،،،باقي قدام لاوراق يكمل فلتصاميم لي مزال ماجهزتش ،،، عين على لبيسي وعين على رسومات ،،، يشوف واش لازم ،،،، بقات ثلاث ايام للافتتاح نتاع شركته ،،،، ولازم كلشي يكون جاهز ،،، رفد تليفونه وسجل نيميرو وطلبه ،،،_آدم: الوو ،،_يسرى: الحمد لله سمعت صوتك ،، وتفكرت انو كاين شكون يستنى فيك ،،،_آدم : لخدمة دايتلي وقتي حتى انو راح ننسى حالي ،،،_يسرى: واش راهي خالتي عزيزة وعمي احمد ،،، كيراك نتا وصحتك ،،،_آدم: مليح وانتي ،،،_يسرى: فرحانه مين سمعت صوتك ،،، ،_آدم: واش عاملة مع الخدمة ،،،_يسرى: مليحة حكيت مع مراد انو نتا رجعت ،،،، وفرح بلخبر ،،، اما ستنى اتصالك ،،، علاش ماعيطلهش ،،_آدم: مكانش عندي وقت ،،، ومانتذكرش انو انا ومراد صحاب ،،،_يسرى: ايه ،،، اما نتا عندك نسبة ملاسهم معانا ،،، وعزيزة اكدت علينا نخلو لجزء ملشركة ليك حتى ترجع ،،_آدم: وقت نخلص لي في يدي نرجع ،،، راح نسكر ،،، كنت حاب نطمن عليك ،،،علق عليها ورجع غطس فلخدمة لي قدامه ،،، غير دخلت طلعت طول لغرفتي ،،، منرفزة ومشي حابه نحكي مع حد ،،، رميت صاكي في جيهة ومونتو في جيهة ،،، وبقيت قاعدة على سرير ،،، نعاود في كل لي صرا معايا ،،، شفت مع ساعة راهي 9 نتاع صباح ،،، رجعت نفخت ،،، رجعت بلاخدمة ،،، حطيت يدي ورا ظهري ،،، حليت لهم نتاع لباس طيشته ولبست بيجامتي ،،، ودخلت للدوش ،،، جيت نغسل وجهي ،،، لقيت روج نتاعي مبلبز ،،، وكحلي سايل ،،، يعني انا كنت هاك وقت كنت جاية للدار ،،، رجعت تفكرت واش عمل فيا لكلب ،، مسحت شفافي ،،، ورجعت غسلتهم حتى رجعو بلونهم طبيعي ،،، غسلت وجهي بصابون حتر رجع صافي ،،، ولميت شعري ،،، وخرجت ،،، حاسة روحي تاعبة ،،، احسن شي نمشي نرقد ،،، ووقت نفيق نخمم واش نعمل ولا ندبر خدمة جديدة ،،،،سكر لبيسي ،،، وناض لبس لجاكيت نتاعه ،،، حط رشات ملبرفان ،،، عدل شعره قدام لمرايا ،،، وجمع تصاميم في ملف ،،، وخرج ،،، ركب فلموتو ومشى. ،، ساعة من زمان ،،، ووصل قدام شركة ،،، كانت دنيا شتا ولحال مقلب ،،، دخل ،، سلم على نتاع لاستقبال ،،، ودخل عرضاته سناء ،،،_سناء: لا مانيش مصدقة. آدم ،،، ولا قاعدة نحلم ،،_تبسم ومشى سلم عليها ،،،_آدم: واش راكي ،،، لباس ،،،_سناء: والله بشوفتك لباس ،،،_آدم: هههه_سناء: خير وقتاش رجعت ،،،_آدم: ماعنديش بزاف ملي رجعت ،،، عندي مشروع خدمة جابني هنا ،،، نكمله ونرجع ،،،_سناء: خلاص خلينا ملرجعة المهم راك هنا بينا ،،، والله شركة طافية بلا بيك ،،،_آدم: مراد عامل الواجب ،،_سناء: ايه عامله اما شركة تبقى محتاجه ليك ولابداعك ،،،_رجع حط راسه وشاف فيها ،،،_آدم: يعني راح نظل واقف ،،، ماتعرضينيش على كاس قهوة ،،_سناء: اكيد تفضل معايا لمكتبي ،،،_دخل هو وياها ،،، وحكاو على شغلات بزاف ،،، وحكاو على لمشروع جديد ،،، ومشى للجناح لخاص بيه ملشركة ،،، يعني شركة مقسومة على اجزاء ،،، وكاين جزء يبقى ليه ،،، بما انو شريك في هذي شركة ،،، تفقد كل شي ،،، وتفاهم مع سناء ثلاث ايام ويرجع يفتحها ،،،رفد ملفاته وجا خارج ،،، عند لباب تلاقا بمراد لي كان جاي مبلل ،،، وقت شافه ستغرب ورجع تبسم ،،،_مراد: آدم!!_آدم: ماتوقعتش تشوفني هنا ،،_مراد: والله وهذي غيبة ،،، وينك ،،،_سلم عليه ورجع يحكي ،،،_آدم: راح ترجع تشوفني كل يوم نشالله ،،،_مراد: ايه نشالله ،،، وبن ماشي خلينا نشربو كاس قهوة مع بعض ،،، ونحكو ،،،_آدم: غير مرة ،،، عندي واش ملهيني ليوم ،،_مراد: ايه براحتك ،،،_مراد دخل وهو خرج ،،، ركب فلموتو ومشى ،،،، ليوم عزيزة مأكدة عليه يجي يزورها يفطرو ويمشو يشوفو سيلا ويتفاهمو على نهار لعقد ،،، وصاله لي يعملو فيها لعرس ،،، وهو مش حاب عرس كبير ،،، ومنبه عليها يعملو فطور وصداق وخلاص ،،،، خاصة انو موضوع زواج هذا ماكانش في باله جملة ،،، غير جا للبلاد بدات عزيزة بدراما نتاعها باش تربطه بزواج ومايرجعش يخمم في العيشة برااا ،،،، حليت عينيا وشفت مع ساعة ،،، كان وقت ظهر ،،، عديت يدي على شعري ،، ونضت ،، مشيت غسلت وجهي ،،، ونزلت تحت ،،، كان سكات ،، مش عارفة اذا كاين حد فلدار ولا خرجو.،، شكون راح يخرج في هذا الوقت ،،، لحال مش تع خرجة ،،،_خديجة: سيلا،،، هذي نتي وقتاش رجعتي ،،،_لقيتها داخلة للدار رافدة لخبز ،،، وثيابها مبله ،،، مشيت حطيتلها شلاكتها ،،، وديت لخبز من يديها ،،،_سيلا: جيت قبيل ،،، اما طلعت لغرفتي رقدت على هاك ماشفتينيش ،،،_خديجة: آه. ،، قصدك ليوم ماخدمتوش ،،،_سيلا: مش هاك ،،،_خديجة: علاش واش كاين ،،،_علقت خيمارها وحطت ساكها ومشات للكوجينة وهي تحكي ،،،_سيلا: طردوني ،،،_خديجة: طردوك ،،، علاش واش صرا ،،،_سيلا: بلا سبة هاك مديري من راسه طردني ،،،_خديجة: معليش ،،، شفتي علاش قتلك لخدمة مشي دايمة ،،، وبراحه منها ،، عرسك باقيله ثلاث ايام ،،، تلهي بروحك ،،،_سيلا: ايه هاني راح نتلهى بروحي ،،،_مشيت غليت لحليب فوق نار ،،، ورجعت عمرته في كاس ،،، وحطيت شوكولا نتاع بودرة فيها ،،، كان ساخن ويشهي وقعدت مقابلتها فلطاوله وهي طيب ،،،_خديجة: ايه احكيلي ،،، كيفاش جاك آدم ،،، انا من رايي الولد باهي. ،،،، وساكت ،،، ويبان مش تع مشاكل ،،،_سيلا: ايه حتى انا لاحظت هذا شي ،،، نشالله نتفاهمو ،،،_خديجة: نشالله بعد زواج تتعرفي عليه كثر ،،، وراح تكوني فرحانه ،،،_رجعت نشرب فلكاس لي قدامي ،،، ودورت عينيا جيهة شباك ،،، مزالها مطر قاوية ،،، تقول حست على وجيعتي ،،، وحلفت انو ليوم ماتوقفش ،،،،_خديجة: اسمعي ،،، عزيزة بعثتلي رقم آدم ،،، من بعد احكي معاه ،،، راح تمشي نتي وياه تشرو خاتم لعرس ،،،، وحكو مع بعض ،،،_سيلا: لا لا علاش نمشي معاه ،،، خلاص خليهم هوما يختارو وحدهم ،،._خديجة: كيفاش وحدهم لازم يقيسو عليك ،،،_سيلا: لا منقدرش ،،_خديجة: علاش واش عندك ،،،_سيلا: والوو،،، اما ،،، عزيزة راح تمشي معانا ،،،_خديجة: هههه يعني خايفة تمشي معاه وحدك ،،،، سيلا راه يامات وتتزوجو ،،،، وقتها ثاني لازم عزيزة تكون معاكم ،،،_حسيت سخانة حكمتني في وجهي ،،، ماكانش قصدي هاك ملموضوع ،،، اما راجل ماحكيتش معاه من قبل ،،،، ومش عارفة كيفاش نتعامل معاه ،،، وهو يحكي كلمة وقص ،،،_خديجة: شدي مركي ننيميروها وعيطيله دروك قدامي ،،،، ولا هاتي انا نحكي معاه ،،،_فكتلها تليفونها من يدها وسجلت نيميرو آدم وطلباته ،،، بعدما خرج من الشركة مشى طول لعند عزيزة ،،، حبس لموتور عند دارها ،،، وحط لكاسك من راسه ،،، ومشى داخل لعندها ،،،، هي فلاصل فيلا كبيرة وقت كان صغير تربى فيها ،،،، مع بوه وامه ،،، وبعدما توفت امه في حادث سيارة ،،، لي نجى منه بوه ،،، اما والدته ماقدروش ينقذوها ،،،، فاتو سنتين من هاذيك الحادثة كان عمره 15 سنة وقتها ،،،، بوه قرر يعاود زواج ،،،، وعزيزة رفضت انو يديه معاه ،،، بقى معاها ،،، رباته وتحملت كلشي معاه ،،،، و آدم من وقت ماكان صغير ما يحكيش بزاف ،،، ومايعبرش على شعوره بسهولة ،،، حتى وقت توفت والدته ،،،، تقبل الامر بصمت ،،، لا بكى لا حكى ،،، ظل في غرقته مسكر على روحه ،،، ويكتب ولا يرسم ،،،، وقتها عزيزة خافت بزاف لايكون مرض ،،، ولا حاجه صراتله ملشوك ،،، بعد الجنازة رجعت وقفت على رجليها ومشات بيه عند طبيب نفساني عطاه دوا ،،، وعمله جلسات نتاع علاج ،،، اما كان يلقى صعوبة معاه ،،، خاتر آدم ماكانش يحكي كل شي ،،، يحكي بطريقة سطحية ومايحبش يتعمق ،،،، حتى وقت كان ينجح في شي حاجه في حياته ولا دراسته ،،،، مايحكيش ويتقبل شي بابتسامه وخلاص ،،،، ممكن هذا هو شي لي مخلاهش يعبر ولا يمد رايه في موضوع زواجه ،،، لي قيداته بيه عزيزة ،،، باش تخليه قدامها ومايخممش يسافر ،،، ووقت شافتها اسمهان تحوس لولدها على عروسة حكاتلها على سيلا واخلاقها ،،، وحكاتلها على وضعيتها وانو امها متوفية ،،، وهذا لي خلاها تتشجع باش تطلبها ليه ،،، ممكن هاك يكملو بعض ،،، خاطر وجيعتهم وحدة وظروفهم وحدة ،،،،_سلم عليها ومشا عنقها ملتالي ،،،، واقفة فلكوجينة وطيب في اكلته لي يحبها ،،،_عزيزة: اممم ،،، ماتبطلش هذي لعادة ،،، وقتاش ترجع تسلم قبل ماتدخل ،،، شي نهار تقتلني بلخلعة ،،،_آدم: علاش مش قادرة تميزيني ،،،_عزيزة: ههه عللش نتا ماتتميزش ،،، ولدي شبيب ،،، محلاك ومحلا رجولتك ،،، ربي يحفظك ليا ،،،_آدم: ايه ،،، واش عاملتلنا عزيزة ليوم للفطور ،،،_عزيزة: امشي حضر طاولة وتو تشوف واش محضرتلك ،،،_مشى يوجد في طاولة لفطور ،،، ورجع نتبه للتيليفون لي قاعد يصوني في جيبه ،،، جبده ورجع شاف شكون ،،،، ستغرب ،، نيميرو جديد هذا ،،،_آدم: الوو ،،_خديجة: مسيو آدم معايا؟!_آدم: ايه ،،، شكون معايا ،،_خديجة: كيراك ولدي ،،، انا خديجة ،،، ام سيلا ،،،_آدم: سيلاا؟! ،،، ااا واه عرفتك ،،، واش راكي خالتي ،،، صحتك لباس ،،،_خديجة: الحمد لله ولدي لباس ،،، عزيزة كيراهي ،،،_آدم: راهي مليحة ،،، الحمد لله ،،، اذا حابة تحكي معاها نمدلها تليفون ،،،_خديجة: لا ولدي ،،، كنت ديجا حكيت معاها قبيل ،،، الصراحة هذا نيميرو سيلا ،،، خليه عندك ،،، وتفاهمنا انا وعزيزة باش تمشو نتوما زوج تخيرو لخواتم ليوم ،،،_آدم: ليوم ،،،_خديجة: واه اذا ماعندك والو ،،،_آدم: قولها ساعة ونجي ونمشو نشروهم ،،،_خديجة: صحا ولدي ،،، سلملي على عزيزة ،،،_علق عليها ورجع تليفون فلجيب وكمل يوجد فلطاولة ،،،،خديجة: شفتي كيفاش ،، نتي عاملة قصة وحكاية طويله ،،، راجل هادي ،،، قتله وقال اوكي بعد ساعة يجيك ،،،_سيلا: ساعة ،،، مالا نمشي نوجد روحي من دروك ،،،_خديجة: ستني فطري وطلعي وجدي روحك ،،،_سيلا: لا نفسي مسكر ،،، هاني شربت كاس لحليب بشوكولا ،،، وقت نرجع من برا ناكل ،،،_طلعت نجري مع دروج ،،، شعري لازم نشيحه ،،، ونشوف واش نلبس ،،، _عدى نهار فلشركة ،،، بين لاوراق ولملفات لي لازمهم امضاء وكل شوي يرجع يضحك عليها ،،،، فاتو ثلاث ساعات ملي شافها ،،، وطول هذا لوقت لابتسامة ماتنحاتش من شفافه ،،، شوي وصونا تليفون نتاعه ،،، رفده يشوف شكون لقاها شادية ،،، علق ورجع حطه ،،، ماعندهش مورال باش يحكي معاها ومشي حاب يفسد فرحته ،،، رجع تذكر كلامها ،،،، بعد لي صرا حتى وتطلب مني نرجع مستحيل نرجع ،،، حس روحه تهور وقت فصلها ملخدمة ،،، اما واش يعمل اذا حس انو بدات تقلق فيه ،،، اصلا هو من وقتاش يعرفها باش تغير حاجه فيه ،،، رجع حط يديه على جبينه يخمم ،،، اكيد حاجه نتاع عناد ،،، ولا ممكن حب يجرب نوع ثاني ملبنات ،،، اما هو كيفاش يعرفها ،، من غير انو وصلها مرة للبيت ،،، وقرا ملفها شخصي لي كتباته بعناية ،،، نتاع وحده جاهلة هذا لعالم ،،، ومش عارفه الطريقة لي يمشي بيها ،،، اما حس انو هي اصدق حاجه صادفها في حياته ،،،،_ندق لباب ودخلت سناء ،،، في يدها شوي ملفات مدتهمله بمضيهم ورجعت تحكي ،،،_سناء: البنت جديدة نتا طردتها ،،،_مراد: لا سوء تفاهم ،، تصلي بيها وطلبي منها ترجع ،،،_سناء : اوكي ،،،
وقفت قدام لمرايا نعدل في شعري ،،،، لبست لباس من لي شريتهم لمرة لي فاتت لونه زرق ،،، ونشفت شعري وجبدته مليح ،،، وحطيت شوي مكياج ،،، ورفدت صاكي وجدته ،،،، وحطيت دراهم لي جبتهم ملسلسلة لي بعتها لمرة لي فاتت باش نشريله خاتم ،،، لبست بوتي ،،، ورجعت شفت مع ساعة ،،، راه وقت انو يجي ،،، نضت نلبس في مونتويا ،،، حتى رجع تليفون يصوني ،،، حسيت قلبي يضرب ،،، توترت ،،، ماعرفت اذا نجاوب انا ولا نمشي نعطي لماما خديجة ترد عليه ،،،، فلاخير رفدته ونزلت نجري لعندها ،،،_سيلا: شدي جاوبي ،،،_خديجة: واش ،،،_سيلا: راه يعيط ،،، شوفي واش بيه ،،،_رفدت تليفون جاوباته ومدتهلي في وذني ،،،_خديجة: احكي معاه وحدك ،،_مشات وخلتني ،،، حطيت بصوت واطي ،،،_سيلا: الوو ،،_آدم: راني برااا نستنى فيك ،،،، اذا واجدة اخرجي ،،،،_سيلا: ايه واجدة .،، راني جاية ،،،_علقت عليه ،،، وطلعت لغرفتي رفدت صاكي ونزلت ،،، ودعت ماما خديجة ،،، وحليت لباب،،، لقيته واقف متركز على لموتور ،،، ومكتف يديه ويشوف فلجهة ثانية ،،،، هذا جا هاك كيفاش راح نروحو مع بعض ،،، يعني نتفاهمو على لبلاصه وهو يلحقني بلموتور وانا نمشي فلباص ،،،،_مشيت جيهته ،،، مدخلة يديا في جيوبي ،،،_سيلا: صباح لخير ،،،تلفت شاف فيا ورجع يحكي ،،،_آدم: صباح نور ،،، راكي لباس ،،،_هزيتله راسي ،،، وبقيت نشوف مع طريق ،،،_آدم: يعني ماجبتش طوموبيل ،،، خاطر وقت خرجت ماكنتش عارف ،،، انو راح نتلقاك ،،، اذا ماعندكش ازعاج تركبي معايا هنا ،،،_سيلا: ااا ،،، هنا ،،، مانعرف ،،، ماجربتش نركب فيه من قبل ،،،_آدم؛ايه عادي ،،، انا راح نسوق وانتي ورايا ،،،،_شفته قرب جيهتي ،،، حطلي لكاسك ،،، نفس نتاعه كان سخون ،،،، صدره عريض ،،،، ولحيته وشعره اول مره نصادف كيفهم ،،، ولا مرة شفت حد هنا مطول شعره ،،، اما مواتيه ،،، كان مركز مع لكاسك يحطلي فيه ،،، ورجع حط تاعه فوق راسه وركب ،،، وطلب مني نركب من ورا ،،، قربت مشي عارفة كيفاش حتى نركب ،،،،_آدم: نساعدك؟!سيلا: لا خلاص هاني ركبت ،،،_بدا ينوض فلموتوىر ،،، باش يمشي حسيت انو راح نفقد توازني دورت يديا عليه بسرعة ،،، وراسي ضرب في ظهره ،،، اففف كان لازم نمشو هنا ،،،_آدم: راكي مليحه ،،،_سيلا: ايه ،،،_آدم: خليك شادة فيا ،،،_هزيتله راسي ،،، وخليته يمشي بيا ،،،، اول مرة نحس روحي مديت ثقتي لحد غريب ،،، راكبة وراه مدوره يديا عليه ،،، وراسي محطوط على ظهره ،،، دقات قلبي كانت تتسارع كلما يزيد فلسرعة ،،، مش متاكدة اذا كابينة وحدة قبلي ركبت فلموتور مع راجل في مدينتي ،،، كاين نوع ملجنان فلموضوع ،،، ممكن هو مالاحظهش خاطره قضى وقت طويل برا ،،،، اما الاحساس لي كنت عايشاته بنين ،،، ريح يلعبلي بشعري ،،، وقطرات ملمطر قاعدة هابطة علينا ،،، احساس اول مرة نذوقه ،،، ومتمنية انو مايخلاصش ،،، خاصة انو آدم خلاني نحس بشي اسمو الامان وفي نفس لوقت راحة ،،، ممكن مزال مانحكو ولا نتعرفو على بعض كثر ،،، اما صمته وكلماته لقاطعة لي يستعملها خلتني نحس بهدوءه وأمانه 
وأخيرا بعد ربع ساعة وصلنا قدام محل كبير ،،، فيه اي شي يخص العروسة ،،،، نزلت ،، نحي فلكاسك ونشوف مع لمحل ،،، نزل حتى هو عدل تريكوه ولجاكيت نتاعه وحط لموتور على جيهة وشد لكاسك من يدي حطه ،،، وجا ماشي للداخل ،،، عوجت فمي ولحقته نجري ،،،، جا يدور ليا صدمت فيه ،،، اففف ،،، حطيت يدي على نيفي لي وجعني ،،،_آدم: آسف ماشفتكش ،،، كنتي جاية تجري ،،،_سيلا: ايه خلاص عادي ،،،_آدم: كاين واحد صايغي هنا ،،، يبيع خواتهم نتاع عرسان ،،، ادخلي وشوفي اذا تلقي شي واحد يعجبك ،،،_سيلا: ونتا ،،، قصدي مراكش جاي معايا ،،،_آدم: راح نجي معاك ،،، اما مانعرفش في هذو شغلات ،، ختاري نتي ،،،_هزيتله راسي ،،، ومشينا دخلنا ،،، طلعنا فلاصونصير للفوق ،،، خاطر هذا بوتيك كبير ،،، وينباع اي شي يحتاجوه ،،، بقيت واقفه نشوف فيه ضغط على زر ،،، ورجع لاصونصير يمشي للفوق ،،، بلعت ريقي ،،، ريحة قاوية ،،، ريحة مش طبيعية ،،، والله دوخ صح ،،، تحسها ريحة تراب لي مبلول ،،، ريحة عندها نكهة خاصة ،،، حسيت خدودي حمارو ،،، الحمد لله ماطولناش ووصلنا لفوق ،،، لي شاغلي بالي هذا لانسان ،،، يعني مايحس مايحكي ،،، كلمة وقص ،،، يعني انا بلعادة كلامي قليل ،،، اما اول مرة نصادف انسان كثر مني ،،، ابتسامته شفتها مرة وحده ،،، وقت كنا في هذاك لمقهى صغير ،،، وقت حكينا فلخدمة ،،،، تحسه طفل صغير واعي وفي نفس الوقت مضيع طريقه فلحياة ،،،، الحياة لي عطاتني دروس ،، الوجيعة قبل السعادة ،،،، الفقد والحرمان ،،، قبل الكسب والعاطفة ،،،، كلشي في حياتي بدا من نقطة نهاية ،،، يعني هذي اشاره على انو حياتي راح تبدا مسار جديد ،،،، مسار معكوس ،،، يعني هذي طريق جديدة راح نلقى فيها سعادة ،،، سعادة مجهولة ومش معروفه ،،،، قاعدة نخير في خاتم عرسي ،،، مع شخص ممكن يكون هذا هو المقصود وممكن لا ،،، اما انا تعودت بحياتي لي قاعدة نعيشها من نقطة النهاية رجوعا للبداية ،،،، ممكن آدم مشي راجل المقصود ،،، ممكن الحياة كانت تمنحهلي وقت بديت من صفر ،،، تمنحهلي وقت نفقد كل شي ،،، ونتعرف عليه هو الاخير باش نعيش الحب ،،، اما الظاهر العكس ،،، لي ظاهر انو آدم راح يكون كيف نسمة لي تهب في حياتي وتمشي ،،، في قانوني ،،، وقواعد حياتي ،،، راح نفقده فلماضي لي راح يكون مستقبلي. ،، فلسفتي الغريبة لي ممكن دخلتكم في حيط ماراحش تتبدل. ،، خاطر هذا هو مضمونها من وقت ماجيت للدنيا ،،،_بعدما ماقضيت وقت طويل وصلت للخاتم المطلوب ،،، تلفتله نشوف فيه ووريته بعدما قسته في يدي ،،،_سيلا: واش رايك مليح ،،،_آدم: ايه مليح ،،، ناسبك في صبعك ؟!_سيلا: ايه مواتيني ،،،،خلينا نشوفولك خاتم ،،،_آدم: لا انا مشي ضروري ظ،،_سيلا: كيفاش ،،، يعني لازمنا للزوج ،،،_شفته خلاني نحكي ومشى حاسب صايغ على الخاتم لي كان في يدي ،،، عوجت فمي ومشيت عطيت للصايغ لخاتم حطها في علبة صغيره ،،، وهو تلفتلي وتبسم ،،،_آدم: هيا خلينا نمشو ،،،_خرجت لغش مالكني ،،، كيفاش نجي نشري خاتم ليا وهو لا ،،، لا سيد المعقد لازم نحكي معاه ونحط نقاط على الحروف ،،، اذا مش حاب يتزوج بيا يحكي ،،، علاش برودة دم هذي لكل ،،، ايا شيرات عييت وانا نكتبلكم تفاعلو رب ييحفضكم " (5082)'كلمة
أنت تقرأ
#زواج_تقليدي 😍🔞
غموض / إثارةسلام حبوباتي هاني جبتلكم الكرو لي طلبتوها # سلاااام حبوباتي 😘😘😘 ،،،،،، هاني جيت ،،، وسعولييي 🏃🏃🏃🏃🏃🏃 ..... جيتكم بموضوع ناااار 🔥🔥🔥🔥🔥🔥🔥🔥🔥🔥🔥🔥 ،،،،، المهم مش حابة نطول في المقدمة ،،، العنوان وحدو يكفي ويوفي ،،، #زواج_تقليدي ،،،،،،🔥...
