The Rules [ COMPLEDED ]

(1)

[ Unicode ]

6.14.2018

" လမ်းခွဲရအောင် "

" ကောင်းပြီလေ "

ChanYeol ခေါင်းပေါ်သေသေသပ်သပ်လှန်တင်ထားသည့်ဆံပင်တွေကို ခပ်ကြမ်းကြမ်းဆွဲဖွလိုက်သည်။ ရန်ဖြစ်လို့ လမ်းခွဲမယ်လို့ထုတ်ပြောတိုင်းမှာ အမြဲလိုလို BaekHyun ဖက်က " ကောင်းပြီလေ၊ လမ်းခွဲကြတာပေါ့ " လို့သာ ပေါ့ပေါ့ပါးပါးဖြေတတ်သည်။

အကြောင်းအရင်းကိုမမေး အမြဲတစ္ဆေ Chan Yeol ၏ မေးခွန်းကိုသာသွေးအေးအေးဖြင့် မှင်သေသေဖြေတတ်သည်။ ဤသည်ကား BaekHyun အပေါ် ChanYeol မကြိုက်ဆုံးသောအချက်ဖြစ်သည်။

" အကြောင်းပြချက်ကိုမင်းမမေးဘူးလား "

ထိုသို့မေးတိုင်း BaekHyun ရယ်သည်။

" လမ်းခွဲတာ အကြောင်းပြချက်လိုလို့လား။ ဒီတိုင်းစိတ်ကုန်သွားလို့ မတွဲချင်တော့တာ မဟုတ်ဘူးလား "

ဤသို့ပြန်ဖြေတတ်သည်။ ကိုယ့်ချစ်သူကိုပင် ထရိုက်ပစ်ချင်စိတ်ပေါက်အောင် Baek Hyun က လမ်းခွဲခါနီးဆို ဂဂျိုးဂဂျောင်သိပ်လုပ်တတ်သည်။ လူနှစ်ဦး လမ်းခွဲကြခြင်းအပေါ်ကို ကလေးကစားစရာလို့သာအပျော် တမ်းသတ်မှတ်ထားပုံရသလို အချိန်တန်ရင် BaekHyun ဆီ ChanYeol ပြန်ရောက်လာမှာပဲလို့လည်း တရားသေတွေးထားပုံရသည်။

" လမ်းခွဲရမှာကိုသိပ်ပျော်နေတာလား၊ မင်းကိုချုပ်ချယ်မယ့်သူမရှိတော့ဘူး၊ လွတ်လွတ်လပ်လပ် ကဲချင်တိုင်းကဲလို့ရပြီးဆိုပြီးသိပ်ကိုမှ ဝမ်းသာနေတာလား "

BaekHyun ခေါင်းတစ်ချက်ကုတ်လိုက်သည်။ မှာထားသည့် စားစရာတွေကစားပွဲ ပေါ်အဆင်သင့်ရောက်နေပြီ၊ ဇွန်း၊ခရင်းကိုင်ပြီးစားရုံပဲကို တရားတွေလာဟောနေသော ChanYeol ကြောင့် မျက်နှာလေးကဇီးရွက် ပမာသေးငယ်နေရှာပြီ။ စားချင်လွန်းလို့တကူးတကကြိုတင်မှာယူထားရသည့် စျေးကြီးကြီးအစားအသောက်များကို Baek Hyun ဝမ်းဗိုက်ထဲသို့သွပ်သွင်း၊ပိတ်လှောင်ထားချင်ပေမယ့် ChanYeol ကထိုကဲ့သို့လုပ်ခွင့်မပြု။

" အေး ငါဒီလောက်ပြောနေတာတောင် မင်းက စားဖို့တွေးနေနိုင်သေးတယ်နော် "