كرونيك :❤زواج_تقليدي❤

"زواج تقليدي" الحلقة 13

"زواج تقليدي" الحلقة 13

الأيامات فيسع متعدات و تحضيرات العرس الكل كاملة على قد ما يقرب العرس قد متزيد تتوتر اكثر فرحت عمرها موش كاملة خائفة لا تطلع غلطة و باش تندم عليها خائفة لا تفشل أنها ترودو يحبها كيما تحبو و تحنن قلبو عليها تنهدت و تذكرت أمها شدتها غصة الوقت هذا الكل كانت تتضاهر بالقوة قدامهم لكنها كانت حاسة علاخر و قلبها واجعها و الخوف تملكها، صحيح ام وائل المدة الكل كانتلها كي أمها و تعامل فيه كي بنتها إلى انها حست بنقص لغياب امها و بفضل هدى أم وائل و هند تمكنت انها تكمل تجهيزات العرس إلي هو غدوة كل ما تفكر فالي باش يصير غدوة كرشها تدور اعلاها ماهيش مصدقة إلى هيا باش تولي مرت وائل باش ترقد في فرشو و باش تقوم بجنبو الفكرة بركا خلات عينيها تلمع و قلبها يدق ليلة كاملة منجمش يجيهم نوم وائل إلي مخو باش يتحرق مالتخمام و العصب يهيز فيه و يجي و ليليا إلي الفرحة غامرتها و الخوف يسري في بدنها. قامت الصباح على صوت التزغريت و رائحة البخور غمرتها حلت عينيها تلقى هدى و هند و عمتها الي تحبها قدامها قامت تضحك و نقزت على عمتها بتبوس فها و تعنق " يا عمتييي شبيك مقوتليش راني جيتك للمطار و أنا قلت أكيد موش جاية " و مشات تبوس في هدى و هند ضحكت عمتها و جبدتها لها تزيد تعنق فيها و تبوس فماش ما تطير الوحشة و قتلها "حبيت نعملك مفاجئة .. زيد ميجيش منو نتعبو العروسة في نهار عرسها"
تبسمت ليليا تبسيمة عريضة و قتلها "تعبك راحة" خرجو من البيت و هبطو اللوطة يلقاو بوها قاعد يستنا فيهم و يضحك من عينيه " إيجا عندي يا أحلى عروسة بنيتي كبرت و ولات عروسة " مشاتلو و عينيها دمعو و هي تتبسملو " عيش باباتي " عنقتها و بسلها جبينها خلاتهم هدى بعد ما تهنات على ليليا لازمها تمشي باش تاقف مع ولدها و خلات حذاها هند.