كرونيك :❤زواج_تقليدي❤

"زواج تقليدي" الحلقة 25

"زواج تقليدي" الحلقة 25

جا باش يجاوبو تكلمت ليليا " بابا منصور، قررنا نأجلوه على خاطر وائل عندو برشا خدمة ال période هاذي و زيد انا قررت الأيامات هذي باش نشد الخدمة مع بابا" و تلفتت لبوها و تبسمتلو قالها بوها "بنيتي تنجم تشد الخدمة وقت ما تحب المهم متوما تكونو فرحانين" قعد وائل مركز معاها عجبتو كيفاه جاوبت في بقعتو كي راتو يتغصور و زاد تفاجئ كي عرف لي هي باش تخدم قلهم بوه "على راحتكم، و تذكرو راهي الخدمة موش أهم من علاقتكم" و تلفت يغزر لولدو كأنو يقصد فيه كان هو خاطر يعرفو يتنفس الخدمة ما يقبلش اي حاجة تكون اقل مالممتاز قلو وائل "أكيد بابا" طاح الليل و قامو الكل باش يتعشاو في jardin قعدو الكل و ليليا البقعة الوحيدة لي قعدت بحذا وائل و زيد قريبة عالاخر عيطتلها حماتها و قالتلها "أقعد شبيك واقفة" قعدت و حست الفوارة سرات في بدنها الوهج السخون لي خارج من بدنو و ريحتو لي غمرتها خلاوها تبلع في ريقها بسيف حضورو و قربو يخلي بدنها و بكلها تحس بيه مديت يديها بش تمد كاس الماء و هو في نفس الوقت مد يديه مرهاش جات يديه على يديها الزوز عملو pause و حسو بالكورون كي ضربهم يديها رقيقة و باردة عكسو هو الدافية بعدو يديهم الزوز فرد وقت و غزرو لقاو إلي هذا لاهي يتعشا غزرتلو عمللها براسو للكاس باش تشرب هزت شربت منو شويا و رجعتو خلات تراس شفايفها بالروج هزت المغرفة و بدات تاكل هي هزت راسها ملقاتش الكاس درتلو تلقاه يشرب فيه و من نفس البقعة لي قعد عليها تراس الروج متاعها شربو الكل و حط الكاس و غزرلها و هو يعدي في لسانو على شفتو اللوطانية إلي زادت حمارت شوية على جنب من الروج متاعها كي شرب شرقت و وجها حمار تفجعو عليها و مدولها الماء باش تشرب و حماتها تقول "سميلاا على بنتي سملاا على بنتي" و هو يغزرلها و يتبسم على جنب، كملو العشاء و جبدت هند ليليا على جنب و قتلها عندي ما نحكيلك دخلو لبيت هند و كي تأكدت هند إنو مفما حد يسمع فيهم بدات تحكي و عينيها يلمعو قالتلها "يا ليليا.. يا ليليا راني باش نموت" تفجعت ليليا و عينيها دمعو عيطت على طول صوتها "شنيااا"