كرونيك :❤زواج_تقليدي❤

زواج_تقليدي الحلقة 73

زواج_تقليدي
الحلقة 73

تعدات ساعة غير ربوع و قريب يوصلو للدار ليليا عينيها لمعت أول مرات البقعة لي وصلولها كلها خضرة و الجبال ضاهرة مخرجا راسها من الشباك و دازا روحها باش تزيد ترا أكثر، تبسيمة عريضة على فمها و هيا كي الصغار قالت لوائل "وصلنا؟" غزرلها و ضحك كيفاه مخرجا راسها من الشباك و تثبت في البقعة قالها "قريب" دارتلو و قالتلو "انتوما ديما تجيو لنا؟" قالها " قبل كونا كل عام لازم نجيو مرتين ثلاثة لكن توا معدش كي قبل" دخلت راسها من الشباك و قالتلو "و علاش ماعدش تجيو؟" قالها "كانت كيف العادة في عائلتنا أنو كل عام لازم نمشيو باش نعديو وقت مع بعضنا و نتفرهدو بابا بنا الدار قبل ما يبدا بالشركات و كي نجحو كثرت الخدمة عليه و بعد كي انا خذيت الخدمة عليه ما عادش لقيت وقت" تبسمت هذي حاجة جديدة عرفتها عليه و المرة هذي هوا لي حكهالها موش هيا لي سمعت بيها من بقعة أخرة، تكات راسها على الكرسي و قالتلو "أنا اخر مرة مشيت وقتلي انا صغيرة لكن ديما نحب نمشي و نحب الغابات برشا" قالها "مالا جيت للبقعة الصحيحة على خاطر الدار بيدها في وسط غابة" تبسمت و قالتلو "جاوو"
بعد درجين وصلو و هبطو يلقاو هند و محمد واقفين يستناو فيهم قالهم محمد "يا ولدي وينكم أنا لي منعرفش الثنية و وصلت" تبسم وائل و غزر لأختو و قالو "يحرز معاك gps " ضحك محمد و قالو "صحيح"، دخلو للدار و طاحو ينحيو فالملاحف لي مغطين بيهم الأثاث عل الغبرة كملو نضمو كل شي و طلعو دبشهم للبيوت و هند و محمد خرجو باش يستكشفو، ليليا بدلت دبشها و لبست روبا على خاطر الدجين سخنها، هبطت من البيت تلقا وائل قاعد على الفوتاي مشاتلو و تلوج على هند و محمد بعينيها غزرلها و قالها "خرجو باش يحوسو" بوزت ليليا شفايفها و قالتلو "يااا مستناونيش" تبسم وائل و قالها "و أنا علاش موجود هنا" عينيها لمعو و تبسمتلو و قالتلو "يعني باش نخرجو زدا أحنا" تبسملها و قالها "عندك شك" قام و خرجو يتمشاو و ليليا منبهرة بلي تشوف فيه قالتلو "وين ماشين؟" قالها وائل "عندي بقعة باش نوري هالك نتصور باش تعجبك" قعدو يمشيو و ليليا ندمت لي هيا مجبتش معاها الكاميرا متصوراتش أنهم باش يبعدو برشا على الدار و لا انها باش ترا بقائع كيما هكا، بعدو على الدار و دخلو للغابة ليليا تغزر لحاجة تنسا حاجة