كرونيك :❤زواج_تقليدي❤

زواج_تقليدي الحلقة 69

زواج_تقليدي
الحلقة 69

وصلو للدار عرضتهم عائشة سلمو عليها و قالتلهم الي الكلهم في الjardin يستناو فيهم، دخلو يلقاوهم قعدين يفدلكو سلمو عليهم و قعدو، هدى قالت لعائشة باش تبدا تحط في العشاء، فكرة العشاء كانت فكرة هند هيا لي قترحتو على أمها و أمها ما كانتش من الرافضين هيا بيدها توحشتهم، رغملي هند ما هياش مصلحجية اما المرة هاذي تلزت تعمل هكا عندها قداه و هي تحب تمشي مع محمد باش يعديو أيامات في دار الجبل، من الخطبة و بوها شادلهم العسة و زيد محمد ديما في الخدمة و مينجموش يعديو برشا وقت مع بعضهم صحيح هو عندو ثيقة فيها و في محمد لكن التقاليد فوق كل شي يقولها بنيتي عرسو و أمشيو لوين تحبو هيا فاهمتو و عارفة لكن عارفة زدا إلي وقت توا موش كيما قبل و بعد تخمام كبير لقات حل إنو كي وائل و ليليا يمشيو معاهم أكيد بوها ما هو باش يقول شئ سير تو انو خوها معاها، بداو ياكلو و هند موش عارفة كيفاه تجبدلهم الموضوع تشجعت و قالت في قلبها هاذي فرصتي كان منتصرفش توا نقعد أكاكا خذات نفس و قالتلهم و هي تلعب بالفرشيطة "حقا" الكلهم دارولها يستناو فيها اش باش تقول و هي زادت توترت كملت قالتلهم "انتوما تعرفو إلي العرس مزالو جمعة كهاو و اكيد ليليا تعرف كيفاه تبدا متوترة و الستراس ياكل فيك" عملتلها ليليا أي براسها كملت هند "اذاكا علاه قولت علاش منمشيوش أنا و ليليا و معنا وائل و محمد لدار الجبل نعديو ثلاثة أيام غادي"و دارت لبوها تشوف في الريكسيون متاعو و قالت "بابا تعرف الجبل أكثر بقعة نحبها و تنحيلي الستراس زيد عندي قداه ممشيتش غادي" بوها قعد يغزرل لبنتو تترجا فيه بعينيها صحيح هو يحب بنتو ديما قدام عينيه اما كان حاجة باش تفرحها ما يسلش زيد معاهم وائل قالها "صحيح" و غزار لوائل باش يشوف أش باش يقول، ليليا كي سمعت عينيها لمعو هيا زادا تحب الجبل و المناطق الطبيعية أخر مرة مشات مع أمها و بوها و هي صغيرة غزرت لوائل لي معجبتوش الفكرة قد ما عجبتهم ميحبش يبعد على خدمتو لازم كل شي قدامو غزرلهم يلقاهم الكل يغزرولو يستناو فيه باش يجاوب تلفت لهند لي تغزرلو كي الصغار عينيها و هي تترجا فيه كي الصغار هوا زادا مذابيه أنو يفرح اختو لكن مينجمش 3 أيام على الأقل نهار دار باش يقولها "فكرة باهية و أنا موافق لكن.." طول هند قصت عليه و نقزت من بقعتها و مشات تعنق في خوها و تبوس و هي تقولو "عيشلي خويا يا ربي راو ما كيفو حد" قامو الكل يضحكو و وائل سكت ما عندو ما يعمل