كرونيك :❤زواج_تقليدي❤

زواج_تقليدي الحلقة 79

زواج_تقليدي الحلقة 79

هبطو هند و محمد يدهشرو بالنوم هوما بيدهم توا قامو، الطقس تحسن على قبل لكن باقي فما وهج بارد قررو انهم يشعلو النار قدام الدار و يسهرو غادي، ليليا و هند حضرو ماكلة خفيفة و هزو ملاحف باش يتغطاو بيهم و مخادد و زرابي باش يفرشوهم على الحشيش و وائل و محمد جابو حطب و شعلو النار دارو بالنار باش يتدفاو و قعدو ياكلو و يحكيو، تكا وائل على المخدة و جبد ليليا حطها على صادرو و هيا مكنتش من العاكسين زادت لسقتلو و حطت يديها على صدرو و قعدو يتفرجو على النجوم و هند و محمد كانو كيفهم كل زوز في عالمهم الخاص قعدو اكاكا لين تبدل الطقس و ولات الريح قوية طفات النار قامو لمو كل شي و دخلو وائل طلع للبيت و ليليا قعدت تعاون في هند في الكوجينة كملت و طلعت الفوق و دخلت للتولات تغزر لروحها في المراية غزرت لسروال الدار و التوب لي لبستهم نفخت و تمنات لي هوما في دارهم باش تلبس حاجة ما خير حتى من المكياج موش عاملة و فمها شايح بلتو و حلت شعرها من الكعكة شعرها الحرير الطويل هبط على كتافها عدات عليه يديها باش تستويه و خرجت من التولات و دخلت لبيتهم، أول ما دخلت ضربها وهج سخون البيت دافية عكس الدار بحكم وائل شعل السخان تلفتت تلقاه واقف قدام الشباك منغير تريكو و يغزر البارا قربتلو و كل خطوة تمشيها قلبها يزيد يضرب اكثر، تلفت وائل يلقاها قدامو تفاجئ كان سارح في تفكيرو و مشلقش بيها كيف دخلت و قربتلو دخل بعضو درجين التالي كان في حرب ما بين مخو و قلبو مخو إلي ميحبوش يفرح و ديما يفكرو بالماضي و قلبو إلي يقولو هاذي هيا هاذي هيا فرصتك باش تنسى لي تعدا و تحل صفحة جديدة هوا عارف انو مخو ديما لي يربح لكن ميحبش يعاود يغلط نفس الغلطة لي غلطها ميحبش بعد ما عطاها امل يجبد بيها و بروحو علا خاطر هو زادا تعلق بيها، ليليا تفاجئت كيف رات نظرتو الباردة لي كل ما يبعد عليها يغزرهالها خافت خافت ليرجع كي قبل ،حطت يديها على خدو و توقعت انو باش يبعد كالعادة لكن وائل متحركش من بقعتو لان ل لمسيتها و سكر عينيه كاينو يستحلا فيها
-----