أ هي صدفه أم أنه القدر

(البارت الثالث)✨

عدي يومين علي ابطالنا ومفيش جديد باسم بيكلم سلمي وسلمي بتتعلق بيه لحد ما كان اليوم ده نقطه التحول في حياه الجميع
عند باسم قاعد بيفكر هو خلاص وصل لهدفه وكلامه مع سلمي تضيع وقت مش اكتر هو وصل للداته
فلاش باك
تليفون سلمي قفل مره واحده من غير سبب بس سلمي ماخدتش في بالها في الناحيه التانيه كان بإسم قاعد يضحك
وفرحان أنه قدر يضحك على سلمي بالسهوله دي وقدر يهكر التليفون من غير اي مشاكل وأول حاجه راح ليها كان المعرض فتح علشان يشوفها بس اتصدم من جمالها كانت فوق ما تخيل. كانت صاحبه بشره قمحيه وعيون خضر واسعه أوي وشعر اسمر طويل جدا كانت جميله أوي وهو صحيح شاف أحلي منها قبل كده كتير بس فيها حاجه مميزه فاق من أفكاره علي عقله بيقوله فوق كده ده شغل ركز الأوضاع اليومين دول صعبه وانت محتاج اي فلوس اخد نسخه من الداته العلي التليفون وكان في قمه السعاده بانتصاره
عوده للواقع
باسم: أنا خلاص جبت اخري ولازم أخلص الليله .
تليفون سلمي بيرن باسم باسم
سلمي: اذيك عامل إيه
باسم : اخر فل
سلمي: فل 🤔 ماشي
باسم : ايه الشعر الجاحد ده
سلمي: جاحد مش مهم عجبك
باسم:سحر العيون شدني
حسيت بشعور هزني
وسط الرياح عقلي تاه
مسمعتش غير صوت صياح
عقلي بيقول لا مش معقول اوعك تسلمي
وفجأة ومن غير اي انظار قلبي اعلن القرار 😂🤣🤣🤣تصدقي ضحكتتي بس بجد انت عيونك جامدين مش تقولي أن عيونك خضراء
سلمي: انت عرفت من فين وليه بتتكلم كده
باسم: لا أنا عرفت حاجات كتير افتحي كلمني كاميرا
سلمي: أنا مش فاهمه عرفت ايه وعايز الكاميرا ليه وبعدين احنا قولنا كاميرا لا
باسم: ده كان زمان ايام الحب والولهان إنما حالياً أنا في شغل
سلمي: شغل ايه أنا مش فاهمه
باسم: افهمك أنا دخلت في البدايه فهمتك اني وحيد وانت صدقتي وبقيتا أصحاب فاكره صور الكاميرات والروابط الشوفتيها دي كانت اومر انت بتسمحي لي انك اخترق بياناتك و هكذا وكانت الخطوه الاخيره لما ضغطي علي مكالمتي ساعة التليفون ما اتقفل
سلمي بصدمه ودموع : يعني انت مش بتحبني
باسم: واللهي انت تنحبي وخصوصا العيون دول بس لا أنا آسف ده وقت الشغل شغل أنا كل همي البيانات العلي تليفونك وانت الحمدلله تليفونك مليان صور ليكي وحبايبك كتير يعني كانت صفقه حلوه اوي افتحي خليني اشوف القمر
سلمي: فتحت الكاميرا وكانت منهاره من العياط وكانت أول مره تشوف باسم كان طويل وعريض شعره بني غامق وعيونه بني فاتح علي عسلي بس متغلقه ببرود فظيع تحسي انها ممكن تقتلك وبشرته قمحي شكله كان يوحي بالقسوه فاقت علي صوته ايه لسه مش مصدقه
سلمي: انت ليه بتعمل كده
باسم: في العاده محدش بيعرف والمفروض اني ماأقولش بس بصراحه أنا عجبني شعرك وجو ديزني بتاعك ده وعيونك خطفوا قلبي واقولك ليه أنا مجرد صياد كل مهمتي أنا اجيب صور للبنات فقط وعندنا البيشتريها واحنا بنقبض التمن لا اكتر ولا اقل يعني ما شغلي أن ابيع الصور دي ليهم
سلمي: هم مين
باسم: مش شغلي ومش لازم اعرف المهم انت بصراحه حلوه اوي وكانت فرصه سعيده جود باي يا قلبي
سلمي كانت بتعيط ومنهاره وهو بيضحك أوي وقفل بس اغرب حاجه أنه حس بنغزه في قلبه علي عياطها بس شال الاوهام دي من دماغه وكمل شغله
فضلت سلمي طويل الليل في حاله صدمه وعياط متواصل
بدأ يوم جديد ومحدش عارفه يحمل ايه معه
ساره رايحه لسلمي تصحيها من النوم وتقول لها علي موضوع قرارها وعلي البعثه ،خبطت علي الباب ودخلت لقت سلمي قاعده ساره كويس انك صحيتي يا سوسكا أنا عايزه اقولك على حاجه أنا بما أني مش ضامنه موضوع البعثه ده بفكر اكمل دراسات واعمل بحث وبفكر يكون بيناقش تأثير البيئه في الطفل وبابا هيفرح اوي بالفكره دي ايه رايك
ساره: فيه ايه أنت تعبانه ايه ده انت بتعيطي
سلمي: انا تعبانه يا ساره تعبانه اوي أنا انضحك عليا الخاين النصاب طلع بيشتغلني
ساره بعدم فهم: هو مين ده انا مش فاهمه حاجه
سلمي: هاحكيلك كل حاجه
وحكت لساره كل حاجه بالتفصيل
ساره بذهول وعتاب: كده ومتقوليش يا سلمى وأنا اخر من يعلم وبعدين انت اذي تحبي واحد عمرك ما شوفتيه 🤨
سلمي: حبت عقله وطريقة تفكيره و كلامه المبادئ العنده اهتمامه ... بس طلع نصاب وحرامي
ساره حست أن ده مش وقت عتاب وأنها لازم تساعدها
ساره: خلاص ورني رقمه
سلمي : خدي بس هتعملي إيه
ساره: هتفاهم معه واتصلت على الرقم
باسم: من الزفت البتصل دلوقتي بص علي الرقم لقي سوسكا حس بحاجه غريبه وكنسل
سلمي: كنسل اتصل تاني
ساره: اه
باسم: أما أشوف عايزه إيه الو ايو سوسكا ينفع حد يصحي حد دلوقتي ده احنا لسه ٨ بس ايه وحشتنك أنا عارف انك حبتني 😈
ساره: أنا أختها يا استاذ
باسم: استاذ ماشي في ايه عايز انت كمان تجربي حظك
ساره: أنا مش هارد عليك انت قولت انك كل هدفك فلوس في حد بيشتري الحاجات دي أنا هدفع ضعف البيدفعه قولت ايه
باسم: اممممم هيبقي كتير عليكي
ساره: مش مشكلتك
باسم : أنا آسف مقدرش أخون الجماعه العندي
ساره: قول عايز كام الذيك معرفش الاخلاص
باسم: مش هينفع سلام يا قمر
وقفل الخط و هو مضايق أوي
ساره: الحيوان مش موافق ياخد فلوس مقابل الصور بس انا هاصرف وحقك لازم اجيبه والحيوان ده هيتربي من أول وجديد
سلمي: انت هتعملي إيه أنا مش عايزه مشاكل
ساره حاضر يا سلمي اتصلت ساره بايمي وقالت ليها تقابلها في آلكافيه
إيمي راحت لساره وكان باين عليها القلق
إيمي: في ايه قلقتني
ساره: هاحكيلك علي كل حاجه
وحكت لايمي علي كل حاجه وطلبت منها المساعده بحجة أن ابن خالتها ظابط شرطه
إيمي: أنا هساعدك بس مصطفي لقضايا الجنائيه مش شرطة نت
ساره: بس اكيد عنده فكره او يعرف حد يساعدنا أو اي حاجه
ايمي: تمام واتصلت بمصطفى
اذيك يا مصطفي عامل ايه وحشتني يا بني وميرا مراتك عامله إيه
مصطفي: احنا كويسن أنت عامله ايه وعايزه ايه ما أنا عارفك مش بتفتكرني كده من غير سبب 😅😅
ايمي: أنا لا خالص بس المره دي عندي طلب عايزه منك خدمه أنا جايه ليك القسم
مصطفي: خير أنا مستنيكي وربنا يستر
وصلت ايمي وساره بعد حوالي ١٥دقيقه ودخلت لمصطفي الهو رئيس مباحث اسكندريه(عنده ٢٨ سنه مش طويل او قصير صاحب بشره بيضاء وعيون سوداء وشعر اسود كثيف ومن أكف الظابط في اسكندريه
إيمي: اذيك يا مصطفي اعرفك دي ساره صحبتي واكتر من أختي
مصطفي: اتشرفنا يا انسه ساره اتفضلي
إيمي: عايزك في مشكله وعارفه انك هتساعدني
مصطفي بقلق: خير
حكت إيمي كل حاجه لمصطفى بالتفصيل
مصطفي بتفكير: بس انا مش هاعرف اساعد أنا ممكن أقدم لك خدمه أنا أعرف واحد صحبي بيمسك القضايا دي وهو اشطر واحد فيها اسمه الرائد سليم المصري وكمان بيشتغل في المخبارات ممكن يساعدك
إيمي: كويس ممكن نروح له
مصطفي: تمام بس هو في الشغل ميعرفش أننا أصحاب ولما نروح مش عايز اسمع صوتك علشان هو عصبي وأنا بس الهتكلم تمام
ايمي: ايه هو انت بتتكلم عن دركولا
مصطفي: حاجه ذي كده ولو سمعك هتكون اخرتك
ايمي: حاضر هتكتم خالص 🤐
مصطفي أخدهم لمكان تاني ودخلوا مكتب كان شكله غريب ويتميز بالفخامه بس كان فاضي
إيمي: الدركولا مش هنا بس الصراحه المكتب جامد اوي
ساره: عيب وبعدين أنا محتاجين يساعدنا يبقي لازم نحترمه
إيمي: حاضر يا ست المحترمه بس ايه ده دي صورته الواد شكله مز
ساره: قولنا عيب وكفايا أنا مش فائقه للهزار
ايمي: طول عمرك خنيقه ، بس قمر
ومصطفى قاعد يضحك من تحت لتحت
إيمي: بتضحك ليه ⁦⁦ ⁦⁦⁩⁦
إيمي بصت وشافت الصدمه لقت شخص طويل عريض صاحب عيون سوداء غامقه أوي وشعره اسود وكثيف لونه قمحي وصاحب جسم رياضي عن رغم جماله بس كأن شكله لا يوحي بالاطمئنان أبدا كان نظرته ليها كفيله بقتلها بلعت رقيها لما شفته وراها
ايمي: انت مين وبتعمل ايه هنا
سليم: افندم انت المين ده مكتبي
إيمي: هو انت الرائد سليم بس انت مش شبه الصوره انت أحلي بكتير
سليم: انت بتقولي حاجه مصطفى مين البلوه دي وبتعمل ايه في مكتبي
مصطفي ومش قادر يخبي ضحكته دي بنت خالتي ايمي ودي صحبتها ساره
سليم: امممممم بنت خالتك خلاص لمها علشان ماقومش معها بالواجب
مصطفي: سليم دي بنت خالتي
سليم: بس انت دلوقتي في مكتبي ووقت شغلي يعني أكيد عايزني في شغل وأنا بفرق بين حياتي الخاصه والشغل
مصطفي: تمام دي أنسه ساره
بص سليم علي ساره وكانت بنت مش طويله أوي بشترها بيضاء بس مديه علي قمحي شويه عيونها سوداء وواسعه وصاحبة رموش كثيفة جدا وفي عيونها لمعه تجذب أي حد
شفايفها صغيرين ومليانين لونهم كريزي
محجبه ولبسه فستان طويل لونه أزرق في ابيض مش واسع أوضيق بس محتشم مناظرها يدل على أنها هادئه أوي صحيح جمالها مش من الجمال الصارخ بس جمال هادي وبيعث بالطمئنينه
سليم: أهلا بحضرتك خير
مصطفي أنا هاحكيلك كل حاجه مصطفي حكي لسليم كل حاجه وسليم وشه مش بيدل علئ اي تعبيرات
سليم: خلصت
مصطفي: باستغراب اه
سليم: أنا سليم المصري ودي قضيه تافه ومش محتاجه إني ادخل فيها أي ظابط ممكن يحلها تروح تقدم بلاغ وهم هيقوموا باللازم
مصطفي: علشاني أنا يا سليم وبعدين احنا مش عايزين بلاغات ودي كده
سليم: انت عارفه إني مليش في الكلام ده
إيمي: متقول أنك مش عارف تتصرف وانك خايف
سليم وقف وبص ليها جامد وهي خافت أوي
ساره: ايمي مش قصدها هي بس
سليم: أنا محدش يتحداني أنا سليم المصري
ساره: بس انا طالبه مساعدة حضرتك أرجوك احنا محتاجينك
سليم: ماشي والحوار ده هيتحل في ٤٨ ساعه بالكتير بس لو البت دي فتحت بقوها هتكون اخرتها على أيدي
ساره: حاضر
سليم: بالنسبة لسوسكا دي فين وبعدين إيه سوسكا دي إسمها ايه
ساره: سلمي إسمها سلمي
سليم: طب عايزها علشان نعمل محضر واخد أقولها وأشوف الجهاز وأشوف المحادثه من غير ما يكون اتحذف منها. حاجه واعمل كشف علي الحساب يعني علشان اشوف شغلي
ساره: هو حضرتك لازم تعمل للموضوع قانوني مينفعش من غير ورق
سليم: أنا هاحترم انك متعرفيش من سليم المصري فياريت تفكري في اي كلمه قبل ما تقوليها
مصطفي خلاص سلمى هتكون عندك كمان ساعه يا باشا
سليم : لا ١٥ دقيقه بالكتير تكون هنا
ساره: اذي استحاله الطريق بس بياخد نص ساعه وهي اكيد لسه مش جاهزه
سليم: انتم حرين بس انا عندى شغل تاني
ساره: بس بس بس 😳🤯
مصطفي علشان عارف دماغ صاحبه :حاضر. يا سليم باشا
نزلوا وطول الطريق ساره وايمي ساكتين خالص ومصطفى بيضحك على شكلهم وكان عارف أن ده الهيحصل وراحوا البيت دخلت ساره لسلمي
لقتها قاعده بتعيط
ساره: سوسكا حبيتي البسي بسرعه علشان مستعجلين
سلمي: هنروح فين أنا مش عايزه اروح في حته
ساره: ياله بسرعه هاقولك في الطريق
سلمي قامت وقالت أنا لبسه اصلا أنا مغيرتش من الصبح ..
ساره: بس لبسك ده وسليم هيضايق بس هنتاخر ولازم .
سلمي: انت بتقولي ايه جمعي
ساره: ياله فاضل ٩ دقائق
نزلوا ومصطفى ساق باقصي سرعه لانه عارف دماغ صاحبه نزلوا وفي الطريق سلمي فهمت كل حاجه
دخلوا المكتب لقوه قاعد وحاطط رجله علي المكتب وماسك الساعه اتاخرتوا ٥ دقائق
بص لقي سلمي قدامه كانت طويلة ورفيعه وجسمها متناثق جدا وبشرتها قمحي وعيونها خضراء شعرها اسمر طويل جدا كانت لبسه بلوزه نص كم بيضاء شيفون علي بنطلون تحت الركبة بحاجه بسيطه وشعرها مفرود وشكلها متبهدل من العياط
بص لها من فوق لتحت انت بقي العامله الموال ده كله طب اقعدي ورني تليفونك. اخد التليفون وقعد يقرأ المحادثه ويضحك وكل شويه يبص ليها من فوق لتحت انت اذي عبيطه كده ودخل التليفون علي شويه اجهزه بس المفاجأة مفيش اي برامج خبيثه والروابط كلها ملهاش أساس ومش مربوطه باي برامج والاكونت اختفي والرقم متهكر يعني بمعني تاني باسم اختفي
سليم: سلمى انت البعتى الصور دي صح
سلمي: لا والله هو الهكر الجهاز
سليم : مفيش اي وسيله إختراق هنا
سلمي : حضرتك شوفت المحادثه يعني هتعرف
طب ما ممكن تكوني مسحتي حاجات
ساره: أنا مسمحش لحضرتك تشكك في أختي وبعدين هي منهاره براحه عليها
سليم: مش انت الهتعرفتي شغلي
ساره: انت بتبص لي كده ليه أنا عمري ما خوفت من حد ومش هخاف منك لو مش هتحترمنا احنا متشكرين ومش عايزين مساعده ، أنا ممكن أسمح أنك تهيني ،انما سلمي خط أحمر
سليم بابتسامه جانبيه: عجبتني ثقتك
ساره: احممم ......
سليم: ده إحنا طلعنا بتكسف كمان
ساره: ممكن نخلص شغل
سليم : ماشي أنا هادخل التليفون علي جهاز وهيبان كل حاجه اتعملت عليه من يوم ما جه لحد دلوقتي ولو طلعت السنيورة البعته الصور ساعتها أنا مش هساعدكم وهحاسبكم علي تضيع وقتي ولو طلع العكس مبقاش سليم المصري لو مجبتش الواد ده هنا وخلته يندم على زو كل حاجه
ساره: وأنا واثقه في أختي وهثبت لك أنها مظلومه
سليم: ،😏😏انتوا محدش فيكم مظلوم انتوا صنف كذاب وغبي 😡
ساره: 😦انت انت انا هامشي أحسن
طلعت ساره وطلع كله بره وساره كل تفكيرها في سليم وطريقة كلامه معها ليه عن رغم أنها مضيقه منه اوي بس حاسه أنه شايل كتير وبعدين شالت الأفكار دي من دماغها وقالت إنها لازم تركز على سلمي
عندنا في النحيه التانيه سلمي الكل تفكيرها في أنها حبت باسم واتعلقت بيه ومش مدركه أنها اصلا وقعت في مشكله وأنه كان بيلعب بيها أما بالنسبة لايمي قاعدة تشتكي لمصطفي من سليم ومصطفى بيضحك عليها
عدي نص ساعه كل واحد بيفكر في نحيه لحد ما سليم رن الجرس كله دخل
سليم: انسه سلمي انت عندك حق الصور اتسرقت
ساره: أنا قولتك
سليم: بس أختك كانت مغفله اوي وانا شوفت المحادثه كلها لو عيله١٤ سنه مش هيدخل عليها الحوار
ساره ببرود: المهم هتعرفوا توصلوا للصور دي
سليم: اكيد أنا بدأت اعمل سيرش بس الغريب اختفاء كل الروابط واي حاجه ممكن توصلنا ليه شكله محترف وبعدين أنا دلوقتي مش مشكلتي أني اجيب صور أختك بس انا عايز اعرف من الناس الوراه وبتشتري الصور ومجنداه للموضوع ده ليه اصلا
ساره: ده شغل حضرتك أنا المهم عندي سلمى وبس
سليم: انا عندي خطه 😈 بس محتاج مساعده سلمي
يا تري إيه الخطه دي ؟ وسلمي هتوصل لفين ؟!
🌼_______________🌼