مزنه في وگر الشيذمان

مشهد

مشهد

*#مزنه_في_وگر_الشيذمان*

*بـقـلم /شهد الحسناوي

مشاهد من القصه *
.
.
.

- تألمتُ كثيراً ولكن لم اعد أشعر والشعور المبهم ما بين الشيء واللاشيء
,مليئ بالهدوء ومنهلك ما بين رغبة وتبلد
أرغب بالعزلة وأحتاج لحديث مع شخص ما ,
أما الآن أرى بكل وضوح أن سداً أُقيم بيني وبين العالم
وأن الأشياء لم تعد تبدو لي كما بدت لي من قبل ,
أمر منتهي تماماً لكنه مازال يطفح بوضوح في واجهة أيامي
و أنا أجاهد في أن لا أكترث لماذا فعلت بي گل هذا
يا .. شيذباني الأشهب .. فأني أحبتتك حباً أقل قليله اتساع السماء لكنك قابلت حبي لك بماذا ؟
بالقساوه بالتثني بعدم الرحمه واحملتني ذنب ليس ذنبي وعاقبتني عليه عقاباً شديداً مؤلماً
.. لقد أسلت الدماء من عروقي ياشيذماني من دون ذنب ..
.. لقد ظلمتني وألمتني وعذبتني وافترستني من دون ذنب ..
.. لم تراعي حبي لك و قابلتني بعدم الرحمه يا ذئبي من دون ذنب ..
.. لقد قسيت علي و عذبتني گثيراً من دون ذنب ..
.. فمـا ذنبي لأتعاقب على شيء لن افعلهُ ولم أكن اعلم بهِ ..
.
.
.
.
.
.
.. أمي هي سبب ألامي ..
.. أنا التي دفعت ثمن گل شيء فعلته في حياتها ..
.. هي من دمرت وعذبت واوجعت
هذه المزنه وأخيراً جعلتها تسقط
. على وگر الشيذبان الأشهب .
ليگون هذا العذاب هو العذاب الأگبر
المفترس،عديم،الرحمه،القاسي،المؤلم
الموجع،المعذب الروحي،المحب المنقد ..

.
.
.
.
.
.
.

* المـشهـد الأول *

... رجلج ديتعرضلي يمه لخاطر الله صدگيني لييش اتبله عليه

دموعي نزلت بقهر وحركن خدودي واني اشوفهه واكفه متصنمه تباوع عليه وما مصدكتني فقدت وظليت الطم على وجهي وكعدت وصرخت بقهر

... لج يمه اكثرررر من مره دايحاول يتعرضلي بنتج اني افزعيلي وابعدي عني احمينييي لخاطر الله يمه اني بنتج لخاطر الله مره حني عليه يمه ولا تأذيني وصدكيني

ضربتني راشدي وجرتني من شعري
... بلا قلة ادب مزززنه احترمي نفسج ولا تكولين هيج واثقه بي ثقه عمياء رجال شكبره شكده تردي يتعرضلج ويتعده عليج لييش واني عنده يحبني ويموت عليه

ظلت دموعي تنزل ... يمه والله ما مجذبه عليج بحرف يمه اني بنيه وذنبي بركبتج واغلا شي عند البنيه شرفهه والعباس ما دا اجذب عليج بولا حرف صار اكثر من مره يتعرضلي واذا كرره وحق الحق اكتله وما اضمنلج ردة فعلي اهم شي ميلطخ برائتي

سمعتني هيج حجيت وهي خزرتني ومدتني بلكاع وتضرب بيه بدون رحمه معادتهه عشت وياهه سنيني كلهه هيج حرمتني من كلشي مافد يوم فرحة كلبي و طيبة خاطري بشي حلو أو بكلمه حلوه دومهه تضرب بيه ومسويتني خدامه

ما خلت مكان بيه ما ضربته يالله عافتني وطلعت واحس جسمي يموتني ويوجعني حيل تعدلت وكعدت وصرخت من الوجع ونزلت دموعي اكثر صارت كدامي المرايه باوعت على وجهي احمر وازرك كله اثار ومخرمش صرخت بفزع

... خالوووووو وينك خالووو فدوه تعالي اخذني مناا تعبت والله تعبت كافي ظلم واذى كافي كضيت عمري من وعيت عالدنيا واني متعذبه واربعه وعشرين ساعه اخدم وفوك كل هذا انضرب واتأذه وعايشه بجحيم

.
.
.
.
.
.
.
.
.
.

* المـشهـد الثاني *

لازمني من نحري وخانكني ويهمس بفحيح ونفسه الحار يضرب بوجهي و عيونه حمر والعروك بگصته احسهه راح تطك من العصبيه

... عايني و وجدي و اسمعيني زين امج العار تنسيهه وماريدهه يمر ذكراها بهالبيت لانهه تنكسه بس ينذكر اسمهه بي فااهمه چلمة جدي بس هذي اليمشن بهل بيت موش انتِ التمشين چلمتج عليه انه والكفل زينب ما تخسريني شي چيله اطكهه براسج وينتهي كلشي

دموعي نزلت من الخنكه اريد اجر نفس ماكو من شافني هيج دفرني كعدت ولزمت نحري اخذ نفس

رجع عليه يالله هذا شبي تخبل
جرني من شعري وعاط بوجهي
... عايني ولج هاذي المياعه البغداديه اطشر راسج اذا عدتيهه بعد وچلماتج والفاضج تعدلينهه احنه موش بـ بغداد وعلى حل شعرج والطلعه والمخالطه هاذي سوالفجن كِلهن اعرفنهه وهنا ماكووو امحيهه من بالج لا يبدر مني غير تصرف وياج بالعماره بولايتي انتِ وكلشي اله حدود هنا ... زين منه لفيناج وخليناج هنا خدامه تنطكين تنحبسين تنحرمين من الزاد تنجبين وتسكتين وما اسمعلچ نفس

اسمع بكلامه ومو راضيه استوعب هالشي شيحجي هذا

باوعت عليه يباوعلي بكره وحقد وغل بادلته نفس النظرات وداخلي مهضوم مقهور من الحاله الأني بيهه البنيه بلا سند فلس متسوه بس ياحيف ياهو يسندهه ويوكف وياهه اذا همه اهلهه هيج يعاملوهه جذب اليكلك البنيه تتربه بعز بعد ما يموت ابوهه ماكو عز مثل عز الاب رغم اني مشايفه ابويه وما ربيت بعز بس داشوف كلمن عدهه ابو عزيزه ويعزوهه الوادم والماعدهه اب تنذم وتنذل وتاكلهه الوادم

نزلت دموعي والقهر هاج عليه وكل مواجعي فـزن رفعت راسي عليه واجتي عيوني المدمعه والحزينه بعيونه العصبيه الحمرا

... رحم الله والديك ما قصرت هاي عود انت ابن العم هيج تسوي لعد الغريب شترجه منه

عندما يبعث الله النور الى شخص قاسي وحاد الطباع يدعى بالشيذمان الاشهب ( الذئب ) على هيئة مَـزن يسقط على وگرهُ ويشاركهُ بهِ
فماهي ردة فعل الشيذمان عندما يرى ما حدث بعد هذه المزنه وبلمح البصر أصبح شخص آخر يشارگهُ وگره الذي لطالما عاش فيه وحده لسنين عديده ......

هلوو ورداتي شلونكم
شنـو رأيگـم بأحداث قصتي الجديده؟

قصة حقيقيه 100% في محافظة ميسان ( العماره )

بعيده گل البعد عن الخيال وتعرفوني أبداً ما احب امزج وادمج الخيال بلحقيقه

أگيد استغربتو من الأسم اسم غريب ونكدر نكول ما مطروق * مزنه في وكرالشيذمان *

المَـزن : الها معاني 2 المطر أو العاصفه هنا احنه راح ناخذ من معناها ونخصه بلاسم العاصفه
الوگـر : البيت أو المسگن
الشيذمان : الذئب

( العاصفه في بيت او مسگن الذئب )

عرفتو هسه معنى الأسم ورداتي

لا تنسوون تضغطون ع الـ ⭐⭐ ورداتي لطفاً
صوتو عليهه وعلقو عالفقرات شجعوني وشوفوني حبكم وحماسكم الهه حته ابلش بيهه عن قريب بعد كلبي

.
.

.
.
.
.