مزنه في وگر الشيذمان

...14...

#مزنه_في_وگر_الشيذمان
بـقـلـم /شهد الحسناوي
البارت الرابع عشر

خليني اعله ضيمي العاش وياي
وعلى حفنة سنيني المني راحن
على حيلي وشبابي وكشخة اصباي
كبل جية خريفي اوراگي طاحن
ماعندي ابتسامة تعانگ شفاي
بس الگاها الگه جروحي صاحن
ركضن عالراب وما لگن ماي
ولا ضلهَن ضلُيل ولا استٍراحن
المشاعر ما محلها تعيش بحشاي
ماتن و انتهنَّ وبروحي فاحن

مزن

قهرني كلامها حيل صعب موقفها واحساسها بالتالي تحي نفسها عاجزه تجاه نفسها وتجاه ابنها وهالشي بحد ذاته صعب
بس ما عرفت شنو الغلط اللي قصدته والعقاب

- انتِ صح غلطتي بس هالسنوات عقاب صارن الج واكيد اتعظتي وعرفتي حجم غلطتج وعواقبها اللي موش تغضبنه احنه بس لا غضبتي ربج هم

دنكت وسكتت اردف هو
- اما بلنسبه لنظرج هذا كِله امتحان واختبار من ربج الج لا تفقدين الامل

- يرجعلي نظري صار حلم بلنسبه الي

ظلت تتراوح ببالي غلطتها الله الاعلم شمسويه بس رغم كل هذا انقهرت عليها العيشه بلظلام صعبه وخاصه هي صارلها سنين هيج
باوعت عليها وكتلها

- ظلي احلمي لابد يجي يوم وتعيشين الحلم صدكيني هذا المُر كله راح يمُر وينسي مريت بالفتره اللي مريتي بيها مريت بالم مريت بعجز وبقلة حيله

وكل انسان بحياته يمر بهاي الفتره يحس نفسه جاي يتحمل اشياء فوك طاقته يحس بشعور محلو يحس مستقبله مجهول يحس بعجز تجاه نفسه ما بيده يسوي شي ويغير الواقع هذا كله مريت بي ومريت بهواي اشياء وحتى حالتي النفسيه تدمرت
فقدت الامل كلش وصلت لمرحله ادعي على نفسي اموت

بس بيوم وليله كعدت وفكرت اني ليش هيج جاي اظلم نفسي اني ليش جاي اخرب ملامحي بلحزن وادمر نفسيتي واحرك بروحي

كمت بحزني التجئ لربي اللي ما عندي غيره كمت ما اشوف السلبيات والتجئ للايجابيات بس حتى تحلى بعيني الصوره واكدر اكمل الحياة
صـرت اقضي وقتي بالدعاء بالصلاة بقراءة القران هذني من افضل الاشياء اللي ممكن للانسان ان يلتجى الهن بوقت حزنه واذيته وهو فقط التوجه الى الله

مرت عليه ايام حِزن واكتئاب كلش بس تعمق بروحي وبكلبي الايمان والثقه تجاه عباره توجهت الي من شخص هي ... انتِ قويه و راح تجتازين كلشي شنو صار وشنو راح يصير وياج انتِ گده خلي ثقه وايمان بكلبج ولا تفكرين بصعوبة ظرفج فكري بقوة الرب اللي انتِ تعبدي وتدعي ...

حرفياً هذا الكلام كدر يشجعني ويخليني استمر بحياتي خلاني اواجه كلشي مريت بي احنه مؤمنين واسلام والله هو ربنا وهو القادر على كل شي ( يقل للشيء كُن فيگون )