مزنه في وگر الشيذمان

...34...

#مزنه_في_وگر_الشيذمان
بـقـلـم / شهد الحسناوي
البارت الرابع والثلاثون

انتَ لو بس ينفتحلك باب گلبي
تشوف بي امك وابوك وديرتك
وحروف اسمك
والعيون الـ تنذر الشوف اعله طولك
حتى خوف الوادم الـ رادت تضمك
ياهو احن مني ويحبك ؟

مزن

طفرت بسرعه وشفت رجلي بيها دم من راسه شلون ما حسيت يا الله
گعدته وجسمي يرجف
- فيصل كوم دم ... متاذي انتَ مجروح

كمت حتى اتصل على يوسف منعني من لزم ايدي كعدت كدامه بلگوه مفتح عينه
- ما اريد مستشفى ولا اريد احد غيرج
همس بخفوت واني دموعي نزلت

سند راسه على جتفي باوعت الجرح وره
.... بركبته شكله يخوف مبين أثر ضَربه قويه
همست بفزع
- ما تموت انتَ لا تموت وتعوفنـي وحدي ما اكدر بدونك

- ما اعوفج بس اسمعي ...
حجاها بتقطع
زادت دموعي
- شنو جاي تودعني هاي شبيك فيصل

- يبعد انه نضفي الجرح و عَقمي بنيتي

مسحت دموعي وكتله
- شنـو ... شنـو انضفه انييي ... وين اعرف

سكت رديت كتله
- ما اعرف اني واخاف

- كِله كزاز
جان يهمس بتعب وبگل كلمه صوته يخفت اكثر

- شنو كله كزاز فيصل خاف يدخل ويمشي ويه الدم و موزين
ضليت اكل بروحي اكل خاف متأذي دمـار لو وريد لو اي شي بهاي المنطقه خاف يحتاج خياط
هالمكان حساس ومو بكيفي العب بي

گمت جبت علبة الاسعافات الاوليه
رجعتله لكيته ساند راسه ع القنفه وفاقد
ركضت عليه
- فيصل اكعد

- گاعد ما راح افقد اشتغلي مزن بتأني اذا ظلن راح يمشن ويه الدم وتاليها يتسمم لو يصير بي عارض ثاني

- فيصل خاف أأذيك لو اسوي شي غلط

- ثقتي كلها بيج

ركزت على هاي الحجايه منه واخذت نفس
لبست الكفوف وعقمتها مد ايده لشي ماعرف شسمه اتصور ملقط او غير شي خلا بـ أيدي وگـال
- عقمي واشتغلي بي

اخذته عقمته واتقربت عليه اكثر مسحت على وجهه
- ما راح أأذيك ارتاح

ما حجه كلشي باوعت ع الجرح غمضت عيوني بقوه وخوف من شكله مفتوح يخوف
كله كزاز ناعم بديت اشيل وحده وحده
واباوع على ردة فعله ماكـو ما اصدر اي صوت
بس مغمض عيونه
ظليت على هذا الحال لحد ما كملته كله وتاكدت بعد ماكو سحبت الكطنه خليت بيها معقم وصرت امسح عليها بخفه على كيفي
ظليت اعقم بيها لحد ما كملت ومسحت الدم
حطيتلها مَرهم مال جروح نوب ضمدتها

گملت ذبيت الگفوف و عقمت ايدي
- فيصل

ما رَد عليه گررت هم ما رَد تقربت عليه
خليت ايدي على وجهه شبه فاقد هاي ليش هيج صار
ضليت اكعد بي لحد ما فتح عيونه فجأه صارت بعيوني جفلت
ياب على نظرتهن الحاده الچتاله على كولته