فاطمه:سمعت صوت بجي نزلت مرعوبة
جان اشوف امي حاضنه سيف وكاعده بلكاع وتبجي وسيف ايده مشدودة عرفت متصاوب
سيف:يايمه اهدي بس افهمج والله مابيه شي شوفي مثل الطلقة كدامج
الام:ولكم يمه شااهدأ متكلي يايمه متصوب واني مادري يمه سودة بوجهي
سيف:اسم الله يايمه ليش هيج تحجين بدل ماتكومين تحضريلي غدة من ايدج الحلوة هاي(وهو يبوس بايدها)
الام :يمه جنك على غدة اصيرلك غدة من فدوة اروح لطولك الحلو
سيف:من فدوة اني اروح لترابج (وهو يبوس راسها)
...كل هذا وفاطمه واكفة وتبجي
سيف:ها فاطمه لتكوليلي انتي هم حتبدين مثل امي ترا مبيه حيل وتعبان والله
فاطمه:سلامتك من التعب خوية
تعال اخذك للغرفة
سيف:ترة اني متصوب بايدي مو برجلي
فاطمه:اي حتى لو لازم واحد يداريك ويباريك
سيف:ماشي
رحنه اني وفاطمه للغرفة
فاطمه:هسة احضرلك الحمام حته تسبح بين مااحضرلك هدوم وماما تحضر الغدة
سيف:ماشي تسلمين
كعدت اريد افتح قيطان البسطال (حشاكم)
مكدرت لان بايد.وحدة
فاطمه:عوفه عوفه اني انزعك
سيف:لالالا ميحتاج ان....
فاطمه قاطعته وهي تفك قاياطيني
فاطمه:شنو لالالا اني اختك وغصبا عليه اساعدك ماشي
وسوالف المقامات هاي انساها احنه اخوان
سيف:مو سالفة مقامات بس...
فاطمه:لعد سالفة شنو هاا
صدك يلة تعال انزعك القميص علمود ايدك متتأذة
سيف:ها لا اني انزعه ميحتاج
فاطمه:لا إله الا الله
كمت جاي انزعه القميص شفت اثار على ضهرة
شمرت القميص من ايدي وشهكت
فاطمه:عزة بعيني هاي شبيك منو سوة هيج
سيف:اششششش يمعودة نصي صوتج لتسمعج امي تكلبها مناحه
مبية شي هاي مالت التدريب
فاطمه :اممم صدكتك
يلة كوم اسبح حته احطلك من المرهم الي جنت استعمله يلة
سيف:ماشي .......
طبيت سبحت وكملت طلعت لكيت فاطمه محضرة الهدوم بدلت طبت هية
فاطمه:ليش لبست مو كلت اجي اسوي ضهرك بلمرهم
سيف:يلة مو مشكلة ورة الغدة عود
فاطمه:وك ماشي يلة
سيف:فاطمة مااريد امي تدري عن اي شي
فاطمه:لتخاف مراح اكول شي
نزلت للغدة لكيت امي محضرة الغدة
سيف:شنو هاي الريحه يابوية عاشت ايدج يوم
الام:الف عافية حبيبي
كعدت اريد اكل اخذت الخاشوكة جان امي اخذتها مني
الام:جيبها اني اوكلك
سيف:يمه شنو السالفة شنو طفل اني....
الام قاطعته :اي طفل بعيني تبقة يلة افتح حلكك
سيف فتحت حلكي مجبور
فاطمه كامت تضحك علية
فاطمه:يعني هسة لو يشوفوك الجنود الي يشتغلون وياك والله تصير مضحكة
سيف:سكتي يمعودة ستري علينه
الام:ليش عيني يصير مضحكة شنو قابل ابني وادلل بي احد عنده شي يمي
سيف:لا يابة شعدنه يمج بعد سويلي جتي الطيارة جتي
الام:اكل وانته ساكت كافي الهبطه الي هبطتها هاي 3 اليوم كل عمري هيج مخايفة ردت اموت اله اشوية(😢😢)
سيف (وهو يبوس ايديها ):اسم الله عليج بعد حيلي
اني اسف خليتج تعيشين هيج خوف وان شاءالله متتكرر
المهم كملنه الغدة
صعدنه اني وفاطمه للغرفة
فاطمه:يلة انزع التشيرت حته احطلك المرهم
سيف:عفية بنية متنسين
فاطمه:لا ماانسة نزع سيف التشيرت شفت ضهرة كله اثار تعذيب
صرت ادهن المرهم
سيف:ااخخخ ولج يحرك
فاطمه(وهي تبجي ):هسة يهدة الجرح اصبر شوية
سيف وهو يكوم بعد ماكان نايم:هاي شنو نوب انتي كنتي تبجين ياعيني شبيجن انتي وامي والله مابي شي
فاطمه(وهي تحضنه):هواي خفت سيف هواي خفت لتروح واني مشايفتك وممصالحتك خفت لتخليني وحدي
سيف(وهو يطبطب على ضهرها): لاتخافين مااروح اله واني شايفج خريجه لاتخافين
بعدين هسة يلة دريت انتي هلكد تحبيني عبالي بعدج....
فاطمه:بعدج شنو هاا
سيف:عبالي بعدج تكرهيني وتخافين مني
فاطمه: اشششش مااريدك تكول هذا الحجي مرا ثاني ماشي اني سامحتك وبعد مااخاف منك ماشي والماضي صار وانتهى واتمنى ننسا ماشي
سيف:صدك يعني متحجين هيج بلسانج حجي قلب ولسان يعني هااا
فاطمه:اي لتخاف
سيف :فدوة لكلبج الحنين (وهو يبوس راسها)......
اما بلنسبة للبطلة
سارة:حياتي هاي الفترة مشت بشكل ممل جدا ماعدا حدث واحد بس وهو
بيوم جنت دامشي بلكلية شفت ابن عمي (الشفية)
فأني تجاهلته وكأنه ماموجود
لكن هو صاحني
ابن العم؛سارة سارة اوكفي شوية
سارة :نعم اخي رايد شي
ابن العم :عندي موضوع وياج اتمنى تسمعيني
سارة:كول شعندك
ابن العم:نروح للكافتريا نحجي
سارة:لا والله تريد احجي وي واحد منحط مثلك وبلكافتريا
ابن العم:والله مااخذ من وقتج بس 5 دقايق
سارة:بابا يدري انته جيت
ابن العم :اي يدري والله اني كتله
سارة:امري لاالله امشي
رحنه للكافتريا
وكعدنا
ابن العم:شتشربين
سارة:لا شكرا مااريد.شي منك
ابن العم:حقج وماالومج
سارة:خلص يلة شتريد ترة عندي محاضرة يلة
ابن العم:ماشي
سارة اني اعرف غلطت بحقج هواي وجذبت على عمي هم وجنت السبب باذيتج وتعذيبج
بس والله جنت مو بوعيي بس
موضوع انه انتي نجحتي من السادس وصرتي دكتورة ورفعتي راس ابوج
وانه اني رسبت ونزلت راس ابوي وعيرني انه انتي احسن مني هواي اذاني جان كل همي تنزلين من عين ابوي وعين عمي وعين الكل ولذلك هيج سويت
بس بعدين من ضهرت الحقيقة وابوي طلب مني احضر يوم الفصل يمكم وسمعت طلبج منهم انه اعتذر من عمي مو منج صحيت وعرفت انتي جوهرة ومتنزلين راس عمي
سارة:وهسة المطلوب مني شنو ورة هلغوة هاي
ابن العم :اريد تسامحيني وادري اني مااستحق السماح بس والله ندمان وابوي طاردني من البيت وكل العشيرة متحاجيني
اريد تسامحيني حته هم همين يسامحوني ارجوج اني صحتي مو تمام
سارة:شبيها صحتك مو تمام
ابن العم: كليتي تعبانه جان لازم بلفترة الي مضت اغسلها 4_5 مرات بس بعد الي صار ما سويت لان مستمسكاتي بلبيت ومااكدر اخذهن
سارة:هاا يعني لو ما انت مريض متجي وتطلب السماح
ابن العم:لا والله بس ندمان والندم اكلني وماادري بيا طريقة اعتذر منج لو اعتذرلج الاف المرات هم ميكفي وانتي بعد بكيفج
سارة :على العموم اني ميهمني انته مريض او لا بس اني اكلك كلمه وحدة اني سامحتك بس مو علمود سواد عيونك لو مريض لا اني سامحتك لان الله بجلالة قدره يسامح اني منو ومااسامح روح الله يسامحك
ابن العم (ودمعت عيونه):متوقعت صراحه هيج راح تسامحيني بهاي السرعة اثبتيلي شكد اني حقير ووضيع
سارة:هسة يلة دريت
يلة مع السلامه وروح للبيت علمود تتعالج مااريد.عمي يعاني من فقدان الضنا ....
طلعت من الكافتريا رغم هذا الشي صعب علي لكن اني مااريد اشيل حقد.بقلبي على احد اريد ابدة بداية جديدة بحياتي حياة صافية تماما من الماضي الي اذاني....
نهاية الجزء الاول من قصة(الدكتورة والضابط)
الجزء الثاني ماادري شوكت يبدة والله يعلم اني شكد.جنت اريد اكمل لكن ضروفي ماسمحتلي اكمل الي جنت مخططه اله
المهم مع السلامه واذا غلطت بحق احد.سامحوني
واذا احد غلط بحقي فاني مسامحته
مع تحياتي لكم(بنت العراق)
أنت تقرأ
الدكتورة والضابط
Randomقصة فتاة عادية عايشة حياتها بكل هدوء حتى دخولها كلية الطب ياترى شصار وياهاا (القصة خيالية )
