الدكتورة والضابط

البارت 19

وصلنه الغرفتي
فتحت الباب جان اشوف الغرفة كلها بالونات وورود وزينه كلش حلوة جانت
بس لفتت نضري فد لوحة مكتوبة عليها سامحيني
سارة :بابا هاي شنو هاي المفاجئة الحلوة اويي كلش كيوت
الاب:مو فد شي مهم هيج سويتلج فد هدية صغيرة
لان احتمال باجر من نروح لبغداد نخلص اجراءات التسجيل وتبقين هناك بلقسم الداخلي
سارة :اممم وهاي اللوحة هم ضمن المفاجئة لو شنو
اشرت عل  اللوحة نفسها
الاب:ااااااه لا هاي اعتذار صغير اتمنى تقبلي مني
سارة اني الي سويته بيج مو قليل ومو بس هيج لا وفوكاها ضلم
كلشي بكفة وشعرج الي كصيته بيدي بكفه
سارة :ايي شعري الي جنت متقبل اكصه كصيته بيدك بس يلة مو هواي كصيته
الاب :لا والله شوبلة فتحي داشوفه
سارة :ءءء لا مابيه حيل انوب ارجع الف الشال من جديد
الاب:سارة فتحي الشال
سارة استسلمت وفتحت الشال وفليت شعري جان بابا يشهك
الاب:لج كصيته لحد جتفج وتكولين مو هواي الله لا ينطي العافية الله لا يوفقني
وضرب ايدة حيل بلحياط 3 مرات بلكوة لزمته
سارة 😢😢بابا فدوة كافي فدوة اروحلك كافي
كعدته على السرير رحت جبت اسعافات اولية كعدت كدامه بلكاع اخذت ايده اريد اعقمها
سحب ايدة مني
سارة :ليش بابا خلي اعقمها مو زين انوب تلتهب
الاب:تلتهب ماتلتهب يطبها مرض
لج سارة اني مجرم اني واحد حرام تكولين علي اب اني...
قاطعته سارة :لا يابة لتكول هيج انته احلى واحسن واحن اب اني شفته بحياتي
الاب:ليش تحجين هيج ليش تحبيني اني انسان المفروض متحبي المفروض تكرهي لج اني ضربتج عذبتج هنتج كفرت بيج وانتي لحد هسة تحبيني
سارة اسمعه دايحجي نزلت يم رجله ابجي
سارة :بابا فدوة كافي كافي سد.هذا الموضوع كافي ابوس رجلك كافي
كمت ابوس برجله بس علمود يسكت صعبة تشوف اغلى شخص عندك هيج يحجي على روحه
شالني من الكاع وضمني بصدرة كمت ابجي واعاتب بي
سارة :يابة رحمه لمحمد كافي خلي نسد هذا الموضوع كانما ماعشنا كانما نمسح من ذاكرتنا
الاب:ماشي بس بشرط
سارة : موافقة والله موافقة بكلشي تكوله موافقة بس خلي نسد هذا الموضوع
الاب لعد غمضي عيونج وشنو اسوي مراح تمنعيني
سارة :بس مراح تاذي نفسك
الاب:ماشي
عدلت كعدتي وغمضت عيني كام بابا باس راسي وجتفي وباس ايدي جنت احس بدموعه
نزل راد يبوس رجلي ردت اوخرة جان يكول
الاب:ها شتفقنه مو علاساس مراح تمنعيني
سارة 😢😢😢مرديت ضليت ابجي
باس رجلي كمت اشهك بقة كاعد بلكاع
الاب:اني اسف اعتذر سامحيني
سارة فتحت عيني شفته كاعد بلكاع ومنزل راسه نزلت يمه بلكاع اخذت ايده كمت ابوس بيها
سارة :خلص خلص انتهى الموضوع بعد مينفتح ابد ابد ماشي
الاب :ماشي بعد ابوج ماشي
سارة :انطيني وعد
الاب :وعد مراح ينفتح هذا الموضوع مرة ثانية
سارة :يلة يابة نروح
الاب:يلة امشي
رحنه للبيت ومشه اليوم عادي باجر نروح لبغداد علمود الجامعه
كعدنه الصبح تريكنه وطلعنه لبغداد
وصلنه للجامعه دخلنه وصلنه كدام الكلية وقفت باوعت على اللافتة
(جامعه بغداد كلية الطب البشري)
قلت بقلبي :اييي وينج نورس تعاي شوفي هذا حلمنه الي ملحكتي تعيشي هاي اني اليوم وحدي هنا وينج
الاب:يلة بابا امشي فتنة وكملنه الاجراءات راح ابقة بلقسم الداخلي لان خلصنه الاجراءات من وقت
الاب:يلة بابا هاي وصلتج لباب القسم الداخلي يلة فوتي واني راح ارجع
سارة :للحظة رجعت سارة الطفلة الي تخاف تضيع
سارة 😢:هاا وين تروح بابا ابقة يمي لتخليني وحدي
الاب:ههه لج بابا صرتي جبيرة بعد لازم تعتمدين على نفسج
سارة:مااااا لتروح ابقة يمي
الاب:يلة بابا فوتي يلة
اخذت الجنط وفتت للقسم مكان غريب وناس غربة متعرفهم واول مرة ابقة وحدي بهيج وضع
اجتي وحدة كانما عرفت اني جديدة
البنية :ها قلبي انته مرحلة اولى ياقسم
سارة :ايي مرحلة اولى قسم طب
البنية :يااا طلعتي دكتورة شسمج اني اسمي نور
سارة :عاشت الاسامي اني سارة سلمنه وكذا
البنية :يلة خلي اوديج لقطاع الطبية انتي غرفة يارقم
سارة :غرفة 8
البنية يلة امشي
اخذتني لقطاع الطبيه وصلنه لغرفة ثمانية
شفت حاطين ورقة على الباب بيها اسماء البنات الي بلغرفة جان اسمي هم موجود
البنية :يلة قلبي هاي وصلتج لحد باب الغرفة تردين شي
سارة :لا قلبي تسلمين تعبتج وياي
راحت البنية دكيت الباب وفتت اجنه جنه 5 بنات 4 واني الخامسة فتت سلمت
سارة :مرحبا اني سارة وياكم بلغرفة
البنات اهلا وسهلا
سارة هلا بيكم بس بلا زحمة وين سريري
البنية هاي سريري ابو الطابقين تردين الفوق لو الجوة
سارة :لا اريد الجوة اخاف اوكع واني نايمة
البنية: تمام لعد يلة اني اسمي فاطمة تشرفت بيج
سارة :الي الشرف رتبت غراضي وفراشي باوعت للساعة ب8 خابرت امي
سارة :الوو ها ماما شلونج قلبي
الام:هلا يمه هلا سارة شلونج ماما وين انتي شسويتي اكلتي صليتي رتبتي غراضج هاا
سارة :ههه ياا ماما انطيني مجال احجي اي رتبت غراضي وصليت وهسة راح اكل عندج بعد اوامر
.... لحد ما خلصت المكالمة
فتحت العلاكة مالت الاكل جانت ماما ممبقية شي ممسويته كليجه وكيك وووو الى اخره من ذني السوالف طلعت الساهون
هاي الحلويات الايرانية
جان فد وحدة تعيط
مريم :عزةةةةة هاي شنو
سارة :شنو قلبي شبيج
مريم :هذا ساهون
سارة :ايي قلبي اتفضلي
مريم :والله مااقول لا هاي الحلاوة صار سنتين مماكلة منها
انطيته وقدمت للبنات تعشيت وخلصت كعدنه نسولف بيناتنه
سارة :اني من ديالى انت  منين
فاطمة :اني من الجنوب
مريم اني من الموصل
والبنات ال2 البقية من واسط
سارة :اكول فاطمه اريد اطلب منج طلب بس خاف تضوجين
فاطمه :كولي قلبي مااضوج
سارة :احجي شوية مثل اهل الجنوب هيج بلجا وهاي السوالف
فاطمة  :جا بس هاي انتي تامرين خية جا اشلونج اخبارج كيفج
سارة :اييي فدوة شكد كيوت
فاطمة:والله انتي الكيوت
ايي شنو رايكم نلعب لعبة الصراحه حته نتعرف على بعض
سارة ومريم اوكي
جبنه بطل وبدينه نعلب مريم فرت البطل ووقف على فاطمة
مريم :صراحة لو جرأة
فاطمه :ممم صراحة
مريم :مشيتج بيها خلل من الطفولة لو حادث
فاطمة :لالا حادث
مريم :خاف زعلتي
فاطمة :لا قلبي ليش ازعل
ضلينه نعلب لحد مااجت اخر فرة علية
فاطمة :صراحه لو جرأة
سارة :صراحه
فاطمه :اصابيعج ليش هيج صاير بيهن
سارة بكلبي (متوقعت هيج سؤال يالله شكوللها )
سارة انجويت بلدهن
فاطمة :همم يلة امشن ننام
سارة ومريم اي والله يلة
نمنه كلنه بليل حسيته فاطمه ترد تنزل من الدرج مال السرير رادت تتزحلك
سارة :الله الله ديري بالج قلبي
فاطمة :اسفة كعدتج من النوم
سارة لا قلبي مو مهم
بس انتي ديري بالج لو اني اصعد انام فوق مو احسن
فاطمه لالا ميحتاج جنت نعسانه ومشفت الدرج
سارة :هاا تمام براحتج لعد
ومشت الايام لحد موصلنه لليوم الي انزل بي لاهلي
اني وفاطمة بس ننزل البنات مينزلون
طلعنه للدوام اني وفاطمة نفس القاعة فكعدنه وحده بصف الثانية
سارة :اني اروح للكافتيريا اجيب قهوة تردين شي
فاطمه :ايي جيبلي ماي وياج
سارة :تمام .
رحت للكافتيريا اشتريت قهوة وماي
من رجعت لكيت القاعة كلها مخبوصة واكو فد بنية تعيط ومفهمت شنو السالفة بس الصدمة انو شفت الشفية واكف وياها ويأيد كلامها
باوعت على فاطمة شفتها مصدومة
فاطمة :سارة ليش كذبتي عليه
سارة :ببشنو كذبت عليج
فاطمة :سارة انتي.......
الى اللقاء في البارت القادم باذن الله
مع تحياتي لكم
(بنت العراق)
متابعيني الاعزاء النشر راح يصير كل3 ايام بارت
وشكرا