#الحسن (الوطن عشق رجاله )
ﺍﻟﺠﺰﺀ ﺍﻟﺴﺎﺑﻊ ﻭﺍﻷﺭﺑﻌﻴﻦ 💎
للكاتبة GomanFared
ﻃﻠﻌﺖ ﻟﻴﻠﺘﻬﺎ ﻣﺘﺄﺧﺮﺓ ﺷﻮﻳﻪ ﻛﺎﻥ ﻋﻨﺪﻱ ﺍﺟﺘﻤﺎﻉ .. ﻛﻨﺖ ﺣﺎﻃﻪ ﺻﻐﺎﺭﻱ ﻓﻲ ﺣﻮﺵ ﺍﺧﺘﻲ ﻓﻜﺮﺕ ﻧﺒﺎﺕ ﻋﻨﺪﻫﺎ ﺑﺎﻟﻤﺮﺓ ﻭﻗﻠﺖ ﻧﺨﻄﻢ ﻉ ﺍﻟﺤﻮﺵ ﻧﺠﻴﺐ ﻣﻨﻪ ﺣﻮﺍﻳﺞ .. ﺍﻭﻝ ﻣﺎﻭﺻﻠﺖ ﺩﺭﺳﺖ ﻭﻧﺰﻟﺖ ﻟﻤﺎ ﺟﺖ ﻋﻴﻨﻲ ﻉ ﺍﻟﺤﻮﺵ ﺍﺗﻔﺎﺟﺌﺖ ﺷﻔﺖ ﻭﺍﺣﺪ ﻣﻦ ﺍﻷﺿﻮﻳﻪ ﻣﺘﺎﻋﻪ ﻣﻔﺘﻮﺣﻪ .. ﺷﻜﻴﺖ ﻫﻠﺒﻪ ﺍﻥ ﻓﻲ ﺷﻲ ﻹﻧﻲ ﺣﺮﻳﺼﻪ ﻓﺤﻜﺎﻳﻪ ﺍﻟﻀﻲ ﻭﻻﺯﻡ ﻧﺼﻜﺮﻩ ﻛﻠﻪ ﻗﺒﻞ ﻟﻨﻄﻠﻊ ..
ﺍﻭﻝ ﺣﺎﺟﻪ ﺩﺭﺗﻬﺎ ﺍﻥ ﻟﻮﺣﺖ ﺍﻟﺘﻠﻴﻔﻮﻥ ﻓﻲ ﻓﺘﺤﺔ ﻣﺠﺎﺭﻱ ﻛﺎﻧﺖ ﻣﻮﺟﻮﺩﻩ ﻓﻲ ﺍﻟﺸﺎﺭﻉ ﻭﺩﺭﺗﻬﺎ ﺑﻄﺮﻳﻘﻪ ﻏﻴﺮ ﻣﻠﺤﻮﻇﻪ .. ﻭﺧﺪﻳﺖ ﻧﻔﺲ ﻭﺗﻮﺟﻬﺖ ﻟﺤﻮﺷﻲ ﻓﺘﺤﺖ ﺍﻟﺒﺎﺏ ﻭﺧﺸﻴﺖ .. ﻗﻌﺪﺕ ﻧﻤﺸﻲ ﻟﻴﻦ ﻭﺻﻠﺖ ﻟﻠﺼﺎﻟﻪ ﻭﺍﻧﺼﺪﻣﺖ ﻟﻤﺎ ﺷﻔﺖ ﻓﻴﻬﺎ ﺣﻮﺍﻟﻲ 7 ﻧﻔﺎﺭ ﻣﺘﻮﺯﻋﻴﻦ ﻓﻴﻬﺎ ﻭﻛﻠﻬﻢ ﻣﻠﺘﻤﻴﻦ .. ﺷﻔﺖ ﺻﻐﺎﺭﻱ ﺭﺍﻗﺪﻳﻦ ﻉ ﺭﺟﻞ ﻭﺍﺣﺪ ﻛﺎﻥ ﻣﻘﻌﻤﺰ ﻉ ﺍﻟﻜﻨﺒﻪ .. ﻣﻘﻨﻊ ﻭﻛﺎﻥ ﻳﻤﺸﻲ ﺑﺈﻳﺪﻩ ﻉ ﺷﻌﺮﻫﻢ ﻭﻫﻤﺎ ﺭﺍﻗﺪﻳﻦ ..
ﺍﻟﻜﻮﺑﺮﺍ : ﺭﺑﻲ ﻳﺼﻮﻥ ..
ﻧﻬﻠﻪ ﺑﺤﺪﻩ : ﻣﻨﻮ ﺍﻧﺖ ﺍﻧﺘﻢ ﻣﻨﻮ ..
ﺍﻟﻜﻮﺑﺮﺍ ﺑﺴﺨﺮﻳﻪ : ﻉ ﺇﻣﺎ ﺳﺆﺍﻝ ﻧﺒﺪﺍ ﻧﺠﺎﻭﺏ ﺍﻷﻭﻝ .. ﻭﻗﻌﺪ ﻳﺄﺷﺮ ﺑﺼﺒﻌﻪ .. ﻣﻨﻮ ﺍﻧﺖ .. ﻭﻻﺍﻧﺘﻢ ﻣﻨﻮ ..
ﻧﻬﻠﻪ ﻗﺪﻣﺖ ﻭﺑﺤﺪﻩ : ﺣﻮﻝ ﻣﻦ ﻉ ﺻﻐﺎﺭﻱ ﺧﻠﻴﻬﻢ ..
ﺍﻟﻜﻮﺑﺮﺍ ﻗﻌﺪ ﻳﺸﺒﺤﻠﻬﻢ ﻭﻳﺸﺒﺤﻠﻬﺎ : ﺧﻔﺘﻲ ﻋﻠﻴﻬﻢ ﻫﻠﺒﻪ .. ﺻﺢ .. ؟ !
ﻧﻬﻠﻪ ﺗﺸﺒﺤﻠﻪ ﺑﻨﻈﺮﺓ ﻏﻞ ﻣﻤﺰﻭﺟﻪ ﺑﺎﻟﺨﻮﻑ ..
ﺍﻟﻜﻮﺑﺮﺍ ﺣﻂ ﺍﻳﺪﻩ ﻭﺭﺍ ﻇﻬﺮﻩ ﻭﻃﻠﻊ ﻣﺴﺪﺱ ﺳﺤﺐ ﻭﺟﻬﻪ ﻉ ﺍﻟﺼﻐﺎﺭ ..
ﻧﻬﻠﻪ ﻣﺎﺗﺖ ﻣﻦ ﺍﻟﺨﻮﻑ ﻭﻣﺎﻗﺪﺭﺗﺶ ﺍﺩﻳﺮ ﻭﻻ ﺭﺩﺕ ﻓﻌﻞ ..
ﺍﻟﻜﻮﺑﺮﺍ : ﻣﺎﻧﺘﺮﺩﺩﺵ ﻟﺤﻈﻪ ﻧﻔﺮﻍ ﺍﻟﻤﺨﺰﻥ ﻓﻴﻬﻢ .. ﻣﺶ ﺗﻘﻮﻟﻲ ﻣﺎﻳﺪﻳﺮﻫﺎﺵ ﻭﻳﻘﺘﻞ ﺍﻃﻔﺎﻝ ﻭﻏﻴﺮ ﻳﺨﻮﻑ ﻓﻴﺎ .. ﻻﺍﺍﺍ ﺍﻧﻲ ﺩﺍﻳﺮﻫﺎ ﻗﺒﻞ ﻭﺑﺪﻡ ﺑﺎﺭﺩ ﻭﻻﻫﻤﻨﻲ .. ﻭﻣﺴﺘﻌﺪ ﻧﺪﻳﺮﻫﺎ ﺗﻮﺍ ﻭﺍﻧﻲ ﻧﺸﺒﺤﻠﻬﻢ ..
ﻧﻬﻠﻪ ﺑﻨﺒﺮﺓ ﺣﺎﺩﻩ ﺗﺘﺨﻠﻠﻬﺎ ﺭﻋﺸﻪ : ﺷﻦ ﺗﺒﻲ ..
ﺍﻟﻜﻮﺑﺮﺍ : ﺷﺎﻃﺮﻩ ... ﻳﺎﻧﻮﻧﻮ ... ﺍﻣﻤﻤﻢ ﻃﻠﺐ ﺑﺴﻴﻂ ﻭﺻﻐﻴﻴﻴﻴﺮ ...
ﻧﻬﻠﻪ ﺑﺤﺪﻩ : ﺷﻦ ﻫﻮ ...
ﺍﻟﻜﻮﺑﺮﺍ ﺑﻌﺪ ﺍﻟﺼﻐﺎﺭ ﺑﻬﺪﻭﺀ ﻭﻧﺎﺽ ﻭﻗﺮﺏ ﻣﻨﻬﺎ : ﺭﻳﺘﻲ ﺍﻟﺠﻮ ﺍﻟﻠﻲ ﻛﻨﺘﻲ ﺍﺩﻳﺮﻱ ﻓﻴﻪ .. ﺗﺤﺮﻳﺎﺗﻚ ﻭﺭﺍ ﻧﺎﺱ ﻣﻦ ﺟﻤﺎﻋﺘﻨﺎ .. ﻧﺘﻴﺠﺔ ﺗﺤﺮﻳﺎﺗﻚ ﻧﺒﻴﻚ ﺗﻘﺪﻣﻴﻬﺎ ﻟﻠﻨﺎﺋﺐ ﺍﻟﻌﺎﻡ ﻣﻊ ﺗﻌﺪﻳﻞ ﺑﺴﻴﻂ ..
ﻧﻬﻠﻪ : ﺍﻟﻠﻲ ﻫﻮ؟
ﺍﻟﻜﻮﺑﺮﺍ : ﺣﻄﻴﻬﺎ ﻛﻠﻬﺎ ﻓﻲ ﺭﺍﺱ ﺍﻟﺒﻲ ..
ﻧﻬﻠﻪ ﺳﺎﻛﺘﻪ ﻭﺗﻔﻜﺮ ..
ﺍﻟﻜﻮﺑﺮﺍ : ﺷﻮﻓﻲ ﻳﺎﺳﻤﺤﻪ ﺍﻧﻲ ﻫﻨﻲ ﻣﺎﻧﺎﺧﺪﺵ ﻓﺮﺍﻳﻚ ﻭﻻﻧﻌﺮﺽ ﻋﻠﻴﻚ ﻓﻲ ﻋﺮﺽ ﺍﻧﻲ ﻫﻨﻲ ﻧﺄﻣﻤﺮ .. ﻭﺍﻧﺘﻲ ﻏﺼﺐ ﻋﻨﻚ ﺣﺘﻨﻔﺪﻱ ..
ﻧﻬﻠﻪ ﺑﻌﺪ ﺍﻟﺘﻔﻜﻴﺮ : ﺗﻤﺎﻡ ... ﺑﺲ ﻧﺒﻲ ﺷﻲ ﻳﺤﻤﺴﻨﻲ ﻟﺘﻨﻔﻴﺪ ﺍﻷﻣﺮ ..
ﺍﻟﻜﻮﺑﺮﺍ : ﻫﻬﻬﺎﻉ ... ﺗﻌﺠﺒﻴﻨﻲ .. ﺣﺘﻜﻮﻧﻲ ﻓﻲ ﺣﻤﺎﻳﺘﻨﺎ ﻭﺑﻤﺠﺮﺩ ﻣﺎﻳﺘﻜﻠﺒﺶ ﺍﻟﺒﻲ 7 ﻣﻠﻴﻮﻥ ﻳﻮﺭﻭ ﺣﻴﻨﺤﻄﻮﺍ ﻓﻲ ﺣﺴﺎﺏ ﺍﻧﻲ ﺑﻨﻔﺴﻲ ﺣﻨﻔﺘﺤﻬﻮﻟﻚ ﺑﺮﺍ ..
ﻧﻬﻠﻪ ﻫﺰﺕ ﺭﺍﺳﻬﺎ ﺑﺈﻳﺠﺎﺏ ..
ﺍﻟﻜﻮﺑﺮﺍ : ﺗﻢ ﻳﺎﺣﻠﻮﺓ ..
ﻧﻬﻠﻪ : ﺍﻣﻢ ..
ﺍﻟﻜﻮﺑﺮﺍ : ﺷﻨﻮ ﺍﻻﻣﻤﻢ .. ﺗﻢ ....
ﻧﻬﻠﻪ : ﺗﻢ .. ﺗﻢ ..
ﺍﻟﻜﻮﺑﺮﺍ ﺍﺷﺮ ﻟﻮﺍﺣﺪ ﻣﻦ ﺭﺍﺟﻠﻪ .. ﺍﻟﻠﻲ ﻗﺪﻡ ﻭﺧﺪﻱ ﻣﻦ ﻧﻬﻠﻪ ﺷﻨﻄﺘﻬﺎ .
ﻧﻬﻠﻪ ﺑﻌﺼﺒﻴﻪ : ﺷﻦ ﺍﻟﻮﻗﺎﺣﻪ ﻫﺎﺩﻱ ..
ﺍﻟﻜﻮﺑﺮﺍ ﺣﻂ ﺍﻟﻤﺴﺪﺱ ﻉ ﻓﻤﻪ ﻋﻤﻮﺩﻳﺎ : ﺍﺷﺸﺸﺸﺸﺶ .. ﺷﺸﺶ ..
ﺍﻟﺮﺍﺟﻞ ﻧﻔﺾ ﺍﻟﺸﻨﻄﺔ ﺗﻨﻔﻴﻆ ﻭﻓﻼﻫﺎ ﻓﻠﻲ ..
ﺍﻟﺮﺍﺟﻞ : ﻧﻈﻴﻒ ..
ﺍﻟﻜﻮﺑﺮﺍ ﺷﺒﺢ ﻟﻨﻬﻠﻪ : ﻛﻮﻳﺲ ﻳﺎﺣﻠﻮﺓ ﻃﻠﻌﺘﻲ ﺑﺮﺍﺀﺓ .. ﻟﻮ ﻃﻠﻊ ﺍﻟﻠﻲ ﻛﻨﺖ ﺷﺎﻙ ﻓﻴﻪ ﺻﺢ .. ﻛﻨﺖ ﻃﺮﺑﻘﺖ ﺻﻐﺎﺭﻙ ﻗﺪﺍﻡ ﻋﻴﻮﻧﻚ ﻭﻟﺤﻘﺘﻚ ﺑﻴﻬﻢ ... ﻭﺗﻮﺍ ﻧﺨﻠﻮﻙ ﻳﺎﺣﻠﻮﻩ ﺍﺣﻼﻡ ﺳﻌﻴﺪﻩ ... ﻭﻃﻠﻊ ﻭﻃﻠﻌﻮﺍ ﺭﺟﺎﻟﺘﻪ ﻭﺭﺍﻩ ﻭﻫﻲ ﻃﻮﻝ ﻣﺸﺖ ﻟﺼﻐﺎﺭﻫﺎ ﺗﺘﻔﺤﺺ ﻓﻴﻬﻢ ﻧﺎﺿﻮﺍ ﻣﻔﺰﻭﻋﻴﻦ ﻣﻨﻬﺎ ﺣﻀﻨﺘﻬﻢ ﺑﻘﻮﺓ ..
ﻧﻬﻠﻪ : ﻣﺎﻓﻲ ﺷﻲ ﻳﺎﻣﺎﻣﺎ ﻣﺎﻓﻲ ﺷﻲ ... ﺍﻟﻠﻪ ﻳﺎﺧﺪﻩ ﻫﺎﻟﺤﻘﻴﺮ .. ﻟﻔﺖ ﺑﻌﻴﻮﻧﻬﺎ ﻟﻘﺖ ﻭﺭﻗﻪ ﻣﻄﺒﻘﻪ ﻣﺪﺕ ﺍﻳﺪﻫﺎ ﻭﺧﺪﺗﻬﺎ ﻭﻓﺘﺤﺘﻬﺎ ﺍﻟﻠﻲ ﻛﺎﻥ ﻓﻴﻬﺎ
( ﺍﺧﺮ ﻣﺮﺓ ﺩﻋﺖ ﻓﻴﻬﺎ ﻋﻠﻴﺎ ﻣﺮﺍﺓ ﺑﻴﺘﺘﻬﺎ ﻣﺤﺮﻭﻗﻪ ﻓﻲ ﺣﻮﺷﻬﺎ .. ﺩﻋﺖ ﻋﻠﻴﺎﺗﻘﻮﻝ ﺍﻟﻠﻪ ﻳﺤﺮﻗﻚ ﻛﻴﻒ ﻣﺎﺣﺮﻗﺖ ﻗﻠﺒﻲ )
ﻧﻬﻠﻪ ﺑﺼﺪﻣﻪ " ﺷﻴﻄﺎﻥ "
ﺍﻟﻮﻗﺖ ﺍﻟﺤﺎﺿﺮ ..
ﻧﻬﻠﻪ : ﻫﺬﺍ ﻟﻠﻲ ﺻﺎﺭ .. ﺍﻧﻲ ﺗﻮﺍ ﻋﻨﺪ ﺍﺧﺘﻲ .. ﻟﻜﻦ ﺧﺎﻳﻔﻪ ﻳﻠﺤﻘﻬﺎ ﺷﻲ ﻭﺍﻧﻲ ﻣﺎﻧﺒﻴﺶ ﻧﻀﺮﻫﺎ ..
ﺍﻟﺤﺴﻦ : ﺍﻟﻴﻮﻡ ﺗﻌﺎﻟﻲ ﺑﻬﻴﺌﺔ ﺣﻨﻘﻮﻟﻚ ﻋﻠﻴﻬﺎ ﻓﻲ ﺭﺳﺎﻟﻪ ﻭﻣﻌﺎﻙ ﺻﻐﺎﺭﻙ .. ﻟﻨﻔﺲ ﺍﻟﻤﻜﺎﻥ ﺍﻟﻠﻲ ﺗﻼﻗﻴﻨﺎ ﻓﻴﻪ ..
ﻧﻬﻠﻪ : ﺗﻢ ...
ﺍﻟﺤﺴﻦ : ﻻﺯﻡ ﻧﺼﻜﺮ ﺗﻮﺍ .. ﺻﻜﺮ .. ﻭﺧﺪﻱ ﻧﻔﺲ ﻋﻤﻴﻖ ﻭﻟﻒ ﻗﺎﻡ ﺭﺍﺳﻪ ﻟﻠﺮﻭﺷﻦ ﻟﻘﻲ ﺳﺮﻣﺪ ﻳﻬﺪﺭﺯ ﻣﻊ ﺍﻟﻀﻴﻒ ﻭﻳﻀﺤﻜﻮﺍ ﻛﻤﻞ ﻃﺮﻳﻘﻪ ﻭﺧﺸﻠﻬﻢ ...
***
ﻭﻳﻨﻚ ﻫﺬﺍ ﻛﻠﻪ ﻻﺗﺘﺼﻞ ﻭﻻﺩﻭﺭ ﻧﺘﺼﻞ ﺑﻴﻚ ﺧﺎﺭﺝ ﺍﻟﺨﺪﻣﻪ ﺷﻦ ﺻﺎﺭ ..
ﻣﻨﺬﺭ : ﺧﻔﺘﻲ ﻋﻠﻴﺎ ﻳﺎﻟﺒﺮﺗﻘﺎﻟﻪ ..
ﺭﻳﺤﺎﻧﻪ ﺑﻀﺤﻜﻪ : ﻣﺶ ﻭﻗﺖ ﺑﺮﺍﺩﺗﻚ ﻭﻗﻮﻟﻲ ﻭﻳﻨﻚ ...
ﻣﻨﺬﺭ ﺗﻨﻬﺪ : ﺗﻠﻴﻔﻮﻥ ﺍﻧﺨﻨﺐ .. ﻭﻓﻨﻔﺲ ﺍﻟﻮﻗﺖ ﺍﻧﺸﻐﻠﺖ ﺑﺎﻟﺨﺪﻣﻪ
ﺭﻳﺤﺎﻧﻪ : ﺍﻳﻪ ﺣﻘﻪ ﻣﺎﻗﻠﺘﻠﻴﺶ ﺷﻦ ﺗﺨﺪﻡ ..
ﻣﻨﺬﺭ ﺑﺈﺑﺘﺴﺎﻣﻪ ﺍﻟﻢ : ﻓﻲ ﻣﻜﺘﺐ ﺍﺳﺘﻴﺮﺍﺩ ﻭﺗﺼﺪﻳﺮ ..
ﺭﻳﺤﺎﻧﻪ ﺑﺈﻋﺠﺎﺏ : ﺣﻠﻮﻭﻭ ﻫﻠﺒﻪ ..
ﻣﻨﺬﺭ : ﺍﻣﻤﻢ ..
ﺭﻳﺤﺎﻧﻪ : ﺍﺣﻤﻢ .. ﻣﺎﺧﺎﻃﺮﻛﺶ ﺗﺸﻮﻓﻨﻲ ..
ﻣﻨﺬﺭ ﺑﻬﻴﺎﻡ : ﺍﻧﻲ ﺍﻟﻠﻲ ﺧﺎﻃﺮﻱ ..
ﺭﻳﺤﺎﻧﻪ ﺑﻀﺤﻜﻪ : ﺗﻤﺎﻡ .. ﻏﺪﻭﺓ ﻓﻲ ﺣﺪﻳﻘﺔ *****
ﻣﻨﺬﺭ : ﺗﻤﺎﻡ .. ﻟﻜﻦ ﺍﻣﺘﻰ ..
ﺭﻳﺤﺎﻧﻪ : ..11
ﻣﻨﺬﺭ ﺑﺈﺑﺘﺴﺎﻣﻪ : ﺗﻢ ﻳﺎﻟﺒﺮﺗﻘﺎﻟﻪ ...
ﺭﻳﺤﺎﻧﻪ ﺿﺤﻜﺖ ﻭﺳﻜﺘﺖ ... ﻭﺑﻌﺪﻫﺎ ﻛﻤﻠﻮﺍ ﻫﺬﺭﺯﺓ ...
***
ﺟﻌﻔﺮ : ﻣﺎﻫﻨﺎﻙ ﻣﺎﻛﻠﺖ ..
ﺯﻳﻨﺐ : ﻫﻲ ﻣﺎﻛﻠﺘﻬﺎ ﻧﺎﻗﺼﻪ ﺍﻟﻴﻮﻣﻴﻦ ﻫﺎﺩﻭﺍ ﺷﻜﻠﻬﺎ ﺍﻟﻘﺮﺍﻳﻪ ﺷﺎﻏﻠﺘﻬﺎ ﺷﻬﺎﺩﺓ ﺍﻟﺴﻨﻲ ...
ﺟﻌﻔﺮ : ﺻﺢ .. ﺑﺲ ﻣﺶ ﻉ ﺣﺴﺎﺏ ﺻﺤﺘﻬﺎ .. ﺗﻮ ﺑﻌﺪﻳﻦ ﻧﻬﺪﺭﺯ ﻋﻠﻴﻬﺎ ..
ﻓﻲ ﺩﺍﺭ ﺍﻣﻴﺮﺓ ..
ﺍﻣﻴﺮﺓ : ﺍﻳﻪ ﺗﻤﺎﺿﺮ ﻓﻀﻪ ﺭﺟﺎﻟﻲ .... ﺍﻳﻪ ﻧﺒﻴﻚ ﺗﻨﻘﺸﻲ ﻋﻠﻴﻪ ﺍﺳﻢ ﺳﺮﻣﺪ .... ﺍﻳﻪ ﺣﻠﻮ ﻭﻻ ...... ﻻ ﻋﺎﺩ ﻣﺶ ﻟﻬﺎﻟﺪﺭﺟﻪ ﺷﻦ ﺩﺧﻞ ﻫﺬﺍﻛﺎ ﺍﻟﻤﺬﻳﻊ .... ﺷﻦ ﻗﺎﻟﻮﻟﻚ ﻋﻠﻴﺎ ﻣﻬﺒﻮﻟﻪ ....... ﺗﻤﺎﻡ .... ﺑﺎﻟﻠﻪ ﻋﻠﻴﻚ ﻓﻲ ﺍﺳﺮﻉ ﻭﻗﺖ ... ﺍﻭﻛﻲ .. ﺳﻼﻡ .. ﺻﻜﺮﺕ ﻭﻫﻲ ﻣﺒﺘﺴﻤﻪ ﻭﺗﺘﺨﻴﻞ ﻓﺮﺩﺓ ﻓﻌﻞ ﺳﺮﻣﺪ ﻟﻤﺎ ﻳﺸﻮﻑ ﻫﺪﻳﺘﻬﺎ ...
ﺍﻣﻴﺮﺓ " ﻭﺍﺧﺪ ﻗﻠﺒﻲ ﻭﻋﻘﻠﻲ ﻧﺮﻗﺪ ﻭﺍﻧﻮﺽ ﻭﺍﻧﻲ ﻧﻔﻜﺮ ﻓﻴﻪ "💗
ﺑﻌﺪ ﺍﻟﻤﻐﺮﺏ ..
ﺍﻧﻔﺘﺢ ﺑﺎﺏ ﺍﻟﺤﻮﺵ ﺧﺶ ﺍﻟﺤﺴﻦ ﻭﺭﺍﻩ ﻣﺮﺍﻩ ﻻﺑﺴﻪ ﻣﻼﻳﻪ ﻭﺧﻤﺎﺭ ﻭﻣﻌﺎﻫﺎ 3 ﺻﻐﺎﺭ ﻫﻴﺌﺘﻬﻢ ﺯﻱ ﺍﻟﻤﺸﺮﺩﻳﻦ
ﺑﺮﻧﻴﻪ ﻭﺍﻗﻔﻪ ﻓﻲ ﺍﻟﺠﻨﺎﻥ ﺗﺸﺒﺤﻠﻬﻢ ﻭﻣﺘﻔﺎﺟﺌﻪ ... ﻗﺪﻣﺖ ﺑﺴﺮﻋﻪ ﻟﻠﺤﺴﻦ ..
ﺑﺮﻧﻴﻪ ﺑﺘﺴﺎﺅﻝ : ﻣﻨﻮ ﻫﺎﺩﻡ ..
ﺍﻟﺤﺴﻦ ﺧﺪﻱ ﺣﻨﺎﻩ ﻉ ﺗﺮﻛﻴﻨﻪ : ﻫﺎﺩﻱ ﻣﺮﺍﻩ ﻣﺎﻋﻨﺪﻫﺎ ﺣﺪ ﻏﻴﺮ ﺭﺑﻲ ﻃﻠﺒﺘﻨﻲ ﻧﺨﻠﻲ ﺻﻐﺎﺭﻫﺎ ﻋﻨﺪﻱ ﻫﺎﻟﻴﻮﻣﻴﻦ ﻟﻴﻦ ﺍﺩﺑﺮ ﻓﻲ ﺣﻮﺵ .
ﺑﺮﻧﻴﻪ ﺗﺸﺒﺢ ﻟﻠﻤﺮﺍﺓ ﻭﺍﻟﺼﻐﺎﺭ : ﺑﺎﻩ ﻋﻼﺵ ﻣﺎﺗﻘﻌﺪﺵ ﺣﺘﻰ ﻫﻲ ﻣﻌﺎﻫﻢ ﻭﺍﻧﺖ ﺩﺑﺮﻟﻬﻢ ﺣﻮﺵ ..
ﺍﻟﺤﺴﻦ : ﻫﻲ ﻋﺰﻳﺰﺓ ﻧﻔﺲ ﻟﻤﺎ ﻋﺮﺿﺖ ﻋﻠﻴﻬﺎ ﻧﻔﺲ ﺍﻟﻌﺮﺽ ﺭﻓﻀﺖ ..
ﺑﺮﻧﻴﻪ : ﺑﺎﻩ ﺑﺘﺨﻠﻴﻬﻢ ﻓﺤﻮﺷﻚ؟
ﺍﻟﺤﺴﻦ : ﺍﻳﻪ .. ﺍﻟﺘﻔﺘﻠﻬﻢ .. ﻳﺎﺍﺧﺘﻲ ﺟﻴﺒﻲ ﺻﻐﺎﺭﻙ ﻭﺗﻌﺎﻟﻲ ﻭﺭﺍﻱ ..
ﻣﺸﻲ ﺍﻟﺤﺴﻦ ﻭﻫﻲ ﻭﺭﺍﻩ ..
ﺍﻟﺤﺴﻦ ﺗﻠﻔﺖ ﻟﺤﻨﺎﻩ : ﻋﻠﻴﺎ ﻟﻮﻃﺎ ﻭﻻﻓﻮﻕ ..
ﺑﺮﻧﻴﻪ : ﻓﻮﻕ ..
ﺍﻟﺤﺴﻦ ﻫﺰ ﺭﺍﺳﻪ ﺑﺈﻳﺠﺎﺏ ﻓﺘﺢ ﺍﻟﻔﺎﺻﻞ ﺧﺸﺖ ﺍﻟﻤﺮﺍﺓ ﻭﺻﻐﺎﺭﻫﺎ ﻭﺧﺶ ﻫﻮ ﺑﻌﺪﻫﻢ ... ﺭﻛﺐ ﻫﻮ ﺍﻟﺪﺭﻭﺝ ﻭﺭﻛﺒﻮﺍ ﺑﻌﺪﻩ ﻭﺻﻞ ﻓﻲ ﺷﻘﺘﻪ .. ﻓﺘﺢ ﺍﻟﺒﺎﺏ ﻭﺩﺧﻠﻬﻢ ... ﻭﺳﻜﺮ ﺍﻟﺒﺎﺏ ..
ﺍﻟﺤﺴﻦ : ﻋﻠﻴﺎ ... ﻋﻠﻴﺎﺍﺍ ...
ﻃﻠﻌﺖ ﻋﻠﻴﺎ ﻣﻦ ﺩﺍﺭ ﺍﻟﻨﻮﻡ ﻭﺭﻛﺒﺖ ﺍﻟﺪﺭﺟﺘﻴﻦ ﻭﺗﻔﺎﺟﺌﺖ ..
ﺍﻟﺤﺴﻦ : ﺍﺣﻤﻢ .. ﺗﻔﻀﻠﻮﺍ ﻗﻌﻤﺰﻭﺍ .. ﻣﺸﺖ ﺍﻟﻤﺮﺍﻩ ﻭﻗﻌﻤﺰﺕ ﻉ ﺍﻟﺼﺎﻟﻮﻥ ﻫﻲ ﻭﺻﻐﺎﺭﻫﺎ .. ﻭﺍﻟﺤﺴﻦ ﺧﺪﻱ ﻋﻠﻴﺎ ﻣﻦ ﺍﻳﺪﻫﺎ ﻭﺩﺧﻠﻬﺎ ﻟﺪﺍﺭ ﺍﻟﻨﻮﻡ ..
ﻋﻠﻴﺎ ﺑﺈﺳﺘﻐﺮﺍﺏ ﺷﺪﻳﺪ : ﻣﻨﻮ ﻫﺎﺩﻡ ..
ﺍﻟﺤﺴﻦ : ﻧﻌﺮﻓﻚ ﺍﻡ ﻗﻠﺐ ﺍﺑﻴﺾ ﻭﻛﺒﻴﺮ ﺻﺢ؟
ﻋﻠﻴﺎ : ﺍﻟﺤﺴﻦ ﺧﺶ ﻓﻲ ﺍﻟﻤﻮﺿﻮﻉ ...
ﺍﻟﺤﺴﻦ : ﺍﺣﻤﻢ .. ﺣﺒﻴﺒﺘﻲ .. ﺍﻟﻠﻲ ﺑﺮﺍ .. ﻧﻬﻠﻪ ﻭﺻﻐﺎﺭﻫﺎ ..
ﻋﻠﻴﺎ ﻓﺘﺤﺖ ﻋﻴﻮﻧﻬﺎ ﻉ ﻭﺳﻌﻬﻢ ﺑﺼﺪﻣﻪ ..
ﺍﻟﺤﺴﻦ ﺣﻂ ﺍﻳﺪﻩ ﻉ ﺫﺭﺍﻋﻬﺎ ﻭﺣﻜﺎﻟﻬﺎ ﺑﺄﺧﺘﺼﺎﺭ ﻋﻦ ﻗﺼﺘﻬﺎ ..
ﻋﻠﻴﺎ ﺍﻧﺰﻋﺠﺖ ﻓﻲ ﺍﻟﺒﺪﺍﻳﻪ ﺑﻌﺪﻳﻦ ﺗﻔﻬﻤﺖ ..
ﻋﻠﻴﺎ : ﻧﺒﻲ ﻧﻄﻠﻊ ﻧﻜﻠﻤﻬﺎ ..
ﺍﻟﺤﺴﻦ : ﻋﻠﻴﺎﺍ ..
ﻋﻠﻴﺎ ﺑﻀﺤﻜﻪ : ﺧﻴﺮﻙ .. ﻣﺎﺗﺨﺎﻓﺶ ﻣﺶ ﺣﻨﻀﺎﻳﻘﻬﺎ ..
ﺍﻟﺤﺴﻦ ﺍﺑﺘﺴﻢ ﻉ ﺟﻨﺐ ﻭﺧﺪﺍﻫﺎ ﻣﻦ ﺍﻳﺪﻫﺎ ﻭﻃﻠﻌﻬﺎ ﻣﻌﺎﻩ .. ﻭﺻﻠﻮﺍ ﻓﻲ ﺍﻟﺼﺎﻟﻪ .. ﻋﻠﻴﺎ ﻗﻌﻤﺰﺕ ﻗﺮﻳﺒﻪ ﻋﻠﻴﻬﺎ ..
ﻋﻠﻴﺎ : ﻗﻴﻤﻲ ﺧﻤﺎﺭﻙ ..
ﻧﻬﻠﻪ ﻗﺎﻣﺎﺗﻪ ...
ﻋﻠﻴﺎ " ﻋﻄﻴﻚ ﺩﻋﻮﻩ ﺍﺣﻠﻰ ﻣﻦ ﺍﻟﺼﻮﺭﺓ " : ﺍﻃﻤﻨﻲ ﻉ ﺻﻐﺎﺭﻙ ﻋﻨﺪﻱ ﻭﻋﺪ ﻣﻨﻲ ﻗﺪﺍﻡ ﺭﺑﻲ ﻭﻗﺪﺍﻣﻚ ﺍﻧﺘﻲ ﻭﺍﻟﺤﺴﻦ ﻣﺶ ﺣﻨﻘﺼﺮ ﻋﻠﻴﻬﻢ ﺑﺸﻲ .. ﺷﺒﺤﺘﻠﻬﻢ ﻋﻠﻴﺎ ﻭﺍﺿﺢ ﺍﻧﻬﻢ ﺻﻐﺎﺭ ﻫﻠﺒﻪ ..
ﻋﻠﻴﺎ ﺑﺄﺑﺒﺘﺴﺎﻣﻪ : ﺷﻦ ﺍﺳﻤﺎﺋﻬﻢ ﻭﻛﻢ ﻋﻤﺎﺭﻫﻢ ..
ﻧﻬﻠﻪ ﺑﺈﺑﺘﺴﺎﻣﻪ : ﺑﻨﺘﻲ ﺍﻟﻜﺒﻴﺮﻩ ﻫﻴﺎ ﻋﻤﺮﻫﺎ 5 ﺳﻨﻴﻦ .. ﻭﺍﻟﺘﺎﻧﻴﻪ ﺳﻤﺎ ﻋﻤﺮﻫﺎ 4 ﺳﻨﻴﻦ .. ﻭﻭﻟﺪﻱ ﺍﻭﻳﺲ ﻋﻤﺮﻩ ﺳﻨﺘﻴﻦ ..
ﻋﻠﻴﺎ : ﻫﻴﺎ ﺳﻤﺎ ﺍﻭﻳﺲ ... ﺭﺑﻲ ﻳﺤﻔﻈﻬﻢ ...
ﻧﻬﻠﻪ : ﺗﺴﻠﻤﻲ .. ﻭﺳﺎﻣﺤﻴﻨﻲ ﺣﺘﺘﻌﺒﻲ ﻣﻌﺎﻫﻢ ..
ﻋﻠﻴﺎ ﺍﺑﺘﺴﻤﺖ : ﻣﺎﺗﻘﻮﻟﻴﺶ ﻫﻜﻲ ﺍﻥ ﺷﺎﺀ ﺍﻟﻠﻪ ﺭﺑﻲ ﻳﻔﺮﺝ ﻋﻦ ﻗﺮﻳﺐ ..
ﻧﻬﻠﻪ ﺗﻨﻬﺪﺕ : ﺁﺍﺍﺍﻣﻴﻦ .. ﺷﺒﺤﺖ ﻟﻠﺤﺴﻦ .. ﻻﺯﻡ ﻧﻄﻠﻊ ﺗﻮﺍ ...
ﺍﻟﺤﺴﻦ : ﺗﻤﺎﻡ ﻫﻴﺎ ﻧﻮﺿﻲ ..
ﻋﻠﻴﺎ ﻏﺎﺭﺕ ﺑﺲ ﺗﺤﺎﻭﻝ ﺗﺘﻤﺎﻟﻚ ﻧﻔﺴﻬﺎ ...
ﻧﺎﺿﺖ ﻧﻬﻠﻪ ﻭﺳﻠﻤﺖ ﻉ ﺻﻐﺎﺭﻫﺎ ﻭﺣﻀﻨﺘﻬﻢ ﺑﻘﻮﺓ ﺍﻟﺤﺴﻦ ﻭﻋﻠﻴﺎ ﺗﺄﺛﺮﻭﺍ ﻫﻠﺒﻪ .. ﻭﻗﻔﺖ ﻉ ﺣﻴﻠﻬﺎ ﺣﻄﺖ ﺧﻤﺎﺭﻫﺎ ...
ﺍﻟﺤﺴﻦ : ﻋﻠﻴﺎ ﻣﺎﺗﺒﻲ ﺷﻲ ..
ﻋﻠﻴﺎ ﺷﺒﺤﺘﻠﻬﻢ ﺑﻀﺤﻜﻪ : ﺍﺳﺘﻨﻰ ﺷﻮﻳﻪ .. ﺧﺸﺖ ﺩﺍﺧﻞ ﻗﻌﺪﺕ ﺷﻮﻳﻪ ﺑﻌﺪﻳﻦ ﻃﻠﻌﺖ ﻭﻋﻄﺎﺗﻪ ﻭﺭﻗﻪ : ﺟﻴﺒﻬﻢ ﻛﻠﻬﻢ ..
ﺍﻟﺤﺴﻦ ﺑﺮﻓﻌﺔ ﺣﺎﺟﺐ : ﺑﺎﻩ ..
ﺍﺑﺘﺴﻤﺖ ﻧﻬﻠﻪ ﺑﺈﺭﺗﻴﺎﺡ ﻣﻦ ﺗﺤﺖ ﺧﻤﺎﺭﻫﺎ ...
ﻭﻃﻠﻌﺖ ﻭﺭﺍ ﺍﻟﺤﺴﻦ ﻭﻫﻲ ﻣﺴﺘﻮﺩﻋﻪ ﺍﻟﻠﻪ ﺻﻐﺎﺭﻫﺎ ﻗﺒﻞ ﻛﻞ ﺣﺪ ...
***
ﺟﻨﺎﻥ ﻛﺎﻧﺖ ﻣﺘﻜﻴﻪ ﻉ ﺳﺮﻳﺮﻫﺎ ﻭﺧﻮﻟﻪ ﺭﺍﻗﺪﻩ ﺑﺲ ﺍﻟﺰﻭﺯ ﻛﺎﻧﻮﺍ ﻳﻔﻜﺮﻭﺍ .. ﺟﻨﺎﻥ ﺑﺤﺰﻥ ﺷﺪﻳﺪ ﻣﺼﺪﻭﻣﻪ ﻫﻠﺒﻪ ﻓﺎﻟﻔﻬﺪ ﻣﺎﺗﻮﻗﻌﺘﺶ ﺍﻥ ﻳﺘﺨﻼ ﻋﻨﻬﺎ ﺑﻜﻞ ﺳﻬﻮﻟﻪ ﻭﻫﻲ ﻛﺎﻧﺖ ﻣﺴﺘﻌﺪﻩ ﺗﺤﺎﺭﺏ ﻉ ﺧﺎﻃﺮﻩ ..
ﺍﻣﺎ ﺧﻮﻟﻪ ﻓﻜﺎﻧﺖ ﻣﺶ ﻋﺎﺭﻓﻪ ﻫﻲ ﺷﻦ ﺗﺒﻲ ﻧﺎﺩﻣﻪ ﻹﻧﻬﺎ ﺭﺩﺕ ﻉ ﺭﻳﺎﺽ ﺑﺎﻟﺮﻓﺾ .. ﻭﻓﻲ ﻧﻔﺲ ﺍﻟﻮﻗﺖ ﻣﺎﺗﺒﻴﺶ ﺗﺨﺶ ﺗﺠﺮﺑﻪ ﺟﺪﻳﺪﻩ ﺣﺎﻟﻴﺎ ..
ﺍﻣﺎ ﺍﻟﺤﺴﻦ ﻓﺮﺟﻊ ﺣﻂ ﻧﻬﻠﻪ ﻓﻲ ﺍﻟﻤﻜﺎﻥ ﺍﻟﻠﻲ ﺗﻼﻗﻮﺍ ﻓﻴﻪ ﻭﻫﻲ ﻣﻨﻪ ﻭﻟﺖ ﻟﺤﻮﺷﻬﺎ ﺑﻌﺪ ﻏﻴﺮﺕ ﻫﻴﺄﺗﻬﺎ ﻓﻲ ﻭﺣﺪﻩ ﻣﻦ ﺣﻤﺎﻣﺎﺕ ﻣﻮﻝ ﻛﺒﻴﺮ ... ﺯﻱ ﻣﺎﺍﺗﻔﻘﺖ ﻣﻊ ﺍﻟﺤﺴﻦ ﺣﺘﻜﻤﻞ ﻓﻲ ﺍﻟﻠﻲ ﻳﺒﻮﻩ ﺍﻟﻜﻮﺑﺮﺍ ﻭﺟﻤﺎﻋﺘﻪ ﻟﻴﻦ ﺍﻃﻴﺤﻬﻢ ﻛﻠﻬﻢ ..
ﺍﻣﺎ ﻫﻮ ﺧﻄﻢ ﻉ ﻭﺍﺣﺪ ﻣﻦ ﺍﻟﻤﺤﻼﺕ ﻭﺷﺮﻱ ﺍﻟﻠﻲ ﻗﺎﻟﺖ ﻋﻠﻴﻪ ﻋﻠﻴﺎ ﻭﺭﻭﺡ .. ﺭﻛﺐ ﻃﻮﻝ ﻟﺤﻮﺷﻪ ﻓﺘﺢ ﺍﻟﺒﺎﺏ ﻭﺧﺶ .. ﻳﺴﻤﻊ ﻓﻲ ﺻﻮﺕ ﺍﻟﺘﻠﻔﺰﻳﻮﻥ ﻣﻔﺘﻮﺡ ﺧﺶ ﻟﻠﺼﺎﻟﻪ ﺍﻟﺪﺧﻼﻧﻴﻪ ﻟﻘﻲ ﻋﻠﻴﺎ ﻣﻘﻌﻤﺰﺓ ﺗﺘﻔﺮﺝ ﻣﻌﺎﻫﻢ ﻉ ﺍﻟﺮﺳﻮﻡ ﻭﻓﻲ ﺣﺠﺮﻫﺎ ﻭﺣﺪﻩ ﻣﻦ ﺍﻟﺒﻨﺎﺕ ﻭﺍﻟﻮﻟﻴﺪ ﺭﺍﻗﺪ ﻭﻣﻐﻄﻴﺎﺗﻪ .. ﺍﺑﺘﺴﻢ ﻭﻫﻮ ﻳﺘﺄﻣﻞ ﻓﻴﻬﻢ ..
ﺍﻟﺤﺴﻦ : ﺳﻤﻮﺣﻪ ..
ﻋﻠﻴﺎ ﺳﻤﻌﺖ ﺻﻮﺗﻪ ﺍﻟﻔﺘﺖ ﺟﻨﺒﻬﺎ ﺷﺎﻓﺎﺗﻪ ﺍﺑﺘﺴﻤﺖ : ﺟﺒﺖ ﺍﻟﻠﻲ ﻗﺘﻠﻪ ﻋﻠﻴﻪ .. ﺍﻟﺤﺴﻦ ﺭﻓﻊ ﺍﻟﺸﻜﺎﺭﻩ ﻓﻮﻕ ..
ﻋﻠﻴﺎ ﺑﻀﺤﻜﻪ : ﻳﻠﻼ ﻫﻴﺎ ﻭﺳﻤﺎ ﻧﺪﻳﺮﻭﺍ ﺍﻟﻜﻴﻜﻪ ﺍﻟﻠﻲ ﻗﻠﺘﻠﻜﻢ ﻋﻠﻴﻬﺎ .. ﻧﺎﺿﻮﺍ ﻣﻌﺎﻩ ..
ﺍﻟﺤﺴﻦ ﻳﺸﺒﺤﻠﻬﺎ ﺯﻳﻬﻢ ﻓﻲ ﺑﺮﺍﺋﺘﻬﻢ ﺍﻟﻔﺮﻕ ﺑﻴﻨﺎﺗﻬﻢ ﺍﻟﺠﺴﻢ ﺑﺲ .. ﺧﺪﺕ ﺍﻟﺸﻜﺎﺭﻩ ﻣﻨﻪ ﻭﻣﺸﺖ ﻣﻌﺎﻫﻢ ﻭﻫﻮ ﻟﺤﻘﻬﻢ ﻭﻳﺘﻔﺮﺝ ﻋﻠﻴﻬﻢ ﻭﻫﻤﺎ ﻣﻨﺴﺠﻤﻴﻦ ﻭﻳﻀﺤﻜﻮﺍ
ﺍﻟﺤﺴﻦ " ﻣﺎﺍﺳﺘﻐﺮﺑﻮﻫﺎﺵ ﺑﻜﻞ ".. ﻭﺍﺑﺘﺴﻢ .. ﻭﻫﻮ ﻳﺘﺄﻣﻞ ﻓﻴﻬﻢ ..
ﻋﻠﻴﺎ ﺷﻮﻳﻪ ﻗﺎﻣﺖ ﺭﺍﺳﻬﺎ : ﺍﻟﺤﺴﻦ ﺑﺮﺍ ﻗﻌﻤﺰ ﺣﺪﺍ ﺃﻭﻳﺲ ..
ﺍﻟﺤﺴﻦ ﺑﺄﺑﺘﺴﺎﻣﻪ ﻫﺰ ﺭﺍﺳﻪ ﺑﺈﻳﺠﺎﺏ ﻭﻫﻲ ﺍﺑﺘﺴﻤﺖ ﻭﻟﻬﺖ ﻣﻊ ﺍﻟﺒﻨﺎﺕ ..
***
ﻓﻲ ﺍﻟﻤﺮﺑﻮﻋﻪ ..
ﺳﺮﻣﺪ : ﻭﺍﻧﺘﻲ ﻣﻘﺘﻨﻌﻪ ﺑﻴﻪ %100
ﺍﻧﻌﺎﻡ ﺑﺨﺠﻞ : ﺍﻳﻪ ..
ﺳﺮﻣﺪ : ﺣﺎﺳﻪ ﺍﻧﻚ ﺣﺘﻜﻮﻧﻲ ﺳﻌﻴﺪﻩ ﻣﻌﺎﻩ ..
ﺍﻧﻌﺎﻡ : ﻧﺘﻤﻨﻰ ..
ﺳﺮﻣﺪ : ﺇﻥ ﺷﺎﺀ ﺍﻟﻠﻪ ﺧﻴﺮ ..
ﺍﻧﻌﺎﻡ : ﺣﺴﻴﺘﻚ ﻣﺶ ﻣﺘﺤﻤﺲ ﻟﻠﻤﻮﺿﻮﻉ ..
ﺳﺮﻣﺪ ﺑﺈﺑﺘﺴﺎﻣﻪ : ﺗﺒﻲ ﺍﻟﺤﻖ ﻻ .. ﻣﺶ ﻣﺘﺤﻤﻞ ﺑﻌﺪﻙ ﻋﻨﻲ ..
ﺍﻧﻌﺎﻡ : ﻫﻬﻬﻬﻬﻬﻬﻬﻪ ...
ﺳﺮﻣﺪ : ﺍﺷﺮﻃﻲ ﻋﻠﻴﻪ ﺗﻌﻴﺸﻲ ﻓﻲ ﻃﺮﺍﺑﻠﺲ ..
ﺍﻧﻌﺎﻡ : ﻫﺬﺍ ﺍﻟﻠﻲ ﺑﻴﺼﻴﺮ ... ﺑﻴﺠﻴﺐ ﺍﻫﻠﻪ ﻭﺑﻴﻌﻴﺸﻮﺍ ﻫﻨﻲ ﻫﻤﺎ ﺍﺻﻼ ﻣﻔﻜﺮﻳﻦ ﻓﻴﻬﺎ ﻣﻦ ﻗﺒﻞ ..
ﺳﺮﻣﺪ : ﻛﻮﻳﺲ ..
ﺍﻧﻌﺎﻡ : ﺍﻳﻪ ﺣﻘﻪ ﺷﻦ ﻗﺼﺔ ﺍﻟﺴﻔﺮ ﺍﻟﻠﻲ ﻃﻠﻌﺖ ﻓﺠﺄﺓ ..
ﺳﺮﻣﺪ : ﻧﺒﻲ ﻧﻄﻤﻦ .. ﺍﻟﻌﻤﻠﻴﻪ ﻣﺘﺎﻉ ﺍﻟﺮﺋﻪ ﻣﺶ ﻣﺮﻳﺤﺘﻨﻲ ﻧﺒﻲ ﻧﺘﺄﻛﺪ ﻣﻨﻬﺎ ...
ﺍﻧﻌﺎﻡ : ﻋﻨﺪﻙ ﺣﻖ ﻋﻄﻴﻬﻢ ﻣﺎﻳﻘﻄﻊ ﺍﻳﺪﻳﻬﻢ ..
ﺳﺮﻣﺪ ﺑﺈﺑﺘﺴﺎﻣﻪ : ﺁﺍﺍﻣﻴﻦ ..
***
ﻃﻴﺒﻮﺍ ﺍﻟﻜﻴﻜﻪ ﻭﺯﻳﻨﻮﻫﺎ ﻭﻧﻌﺴﻬﻢ ﺍﻟﻨﻮﻡ ﻓﺮﺷﺘﻠﻬﻢ ﻓﻲ ﺍﻟﺼﺎﻟﻪ ﺍﻟﺪﺧﻼﻧﻴﻪ ﻭﺣﻄﺖ ﻓﻴﻬﺎ ﺩﻓﺎﻳﻪ ﻭﻓﺮﺷﺖ ﻣﻌﺎﻫﻢ ..
ﺍﻟﺤﺴﻦ ﻳﺸﺒﺤﻠﻬﺎ ﻛﻴﻒ ﺗﻤﺪﺩﺕ ﺑﺤﺪﺍﻫﻢ .. ﺣﻂ ﺍﻳﺪﻩ ﻭﺭﺍ ﺭﺍﺳﻪ ﻳﺤﻚ ﻓﻲ ﺷﻌﺮﻩ : ﻧﺤﺼﻞ ﻣﻜﺎﻥ ﻣﻌﺎﻛﻢ .. ؟
ﻋﻠﻴﺎ ﺍﺑﺘﺴﻤﺖ ﻭﺍﺷﺮﺕ ﺟﻨﺒﻬﺎ : ﻳﺴﺪﻙ ﻫﺬﺍ ..
ﺍﻟﺤﺴﻦ ﺷﺒﺤﻠﻪ ﺷﻮﻳﻪ ﺑﻌﺪﻳﻦ ﻗﺎﻝ : ﺑﻄﺮﻳﻘﻪ ﻭﺣﺪﻩ ﺑﺲ .. ﻃﺮﺡ ﻓﺮﺍﺵ ﺣﺪﺍﻫﺎ ﻭﺭﻗﺪ ﺧﺪﺍﻫﺎ ﻓﺤﻀﻨﻪ ...
ﻋﻠﻴﺎ ﺑﻀﺤﻜﻪ : ﻣﺎﻳﺼﻌﺐ ﻋﻠﻴﻚ ﺷﻲ ..
ﺍﻟﺤﺴﻦ : ﻋﻨﺪﻙ ﺷﻚ ..
ﻋﻠﻴﺎ : ﺗﺲ ﺗﺲ ..
ﺍﻟﺤﺴﻦ : ﺍﺭﻗﺪﻱ ﻫﻲ ... ﺧﺪﺍﻫﺎ ﻓﻲ ﺣﻀﻨﻪ ﻭﺭﻗﺪﻭﺍ ... ﺑﺲ ﻃﻮﻝ ﺍﻟﻠﻴﻞ ﻋﻠﻴﺎ ﻛﺎﻧﺖ ﺗﻔﻴﻖ ﻭﺗﺸﻮﻑ ﻑ ﺍﻟﺼﻐﺎﺭ ﻭﺗﻄﻤﻦ ﻋﻠﻴﻬﻢ ﻭﺗﻮﻟﻲ ﺗﺮﻗﺪ ﻭﺍﻟﺤﺴﻦ ﻓﺴﺪ ﻧﻮﻣﻪ ﻟﻜﻦ ﻣﺎﺍﻫﺘﻤﺘﺶ ﺍﻟﻤﻬﻢ ﺍﻧﻪ ﻣﺮﺗﺎﺡ ﻻﻥ ﺍﻷﻣﺎﻧﻪ ﺍﻟﻠﻲ ﻋﻨﺪﻩ ﻓﻲ ﺍﻟﺤﻔﻆ ﻭﺍﻟﺼﻮﻥ ...💖
ﺟﻲ ﺍﻟﻴﻮﻡ ﺍﻟﻠﻲ ﺑﻌﺪﻩ ﻋﻠﻴﺎ .. ﻣﺸﺖ ﻟﻠﺠﺎﻣﻌﻪ ﻭﺧﻠﺖ ﺍﻟﺼﻐﺎﺭ ﻋﻨﺪ ﺍﻫﻠﻬﺎ ﺑﻄﻠﺐ ﻣﻦ ﺍﻟﺤﺴﻦ ... ﻭﺯﻳﻨﺐ ﺣﺒﺘﻬﻢ ﻫﻠﺒﻪ ﻭﺩﺍﺭﺕ ﺑﺎﻟﻬﺎ ﻋﻠﻴﻬﻢ ﻛﻮﻳﺲ ..
ﻧﻬﻠﻪ ﻛﺎﻧﺖ ﺗﺘﺼﻞ ﺑﻌﻠﻴﺎ ﺑﻌﺪ ﻋﻄﺎﻫﺎ ﺍﻟﺤﺴﻦ ﺭﻗﻤﻬﺎ ﺗﻄﻤﻦ ﻉ ﺍﻟﺼﻐﺎﺭ ﻭﻓﻨﻔﺲ ﺍﻟﻮﻗﺖ ﻗﺎﻋﺪﻩ ﻣﺎﺷﻴﻪ ﻓﻲ ﺍﻟﻠﻲ ﻃﻠﺒﻪ ﻣﻨﻬﺎ ﺍﻟﻜﻮﺑﺮﺍ ...
***
ﺩﺧﻠﻴﻬﻢ ﺷﻔﺎﺷﻔﻴﻚ ﻫﺎﺩﻡ ..
ﺭﻳﺤﺎﻧﻪ : ﻻ ﻣﺶ ﻣﺪﺧﻠﺘﻬﻢ ..
ﻣﻨﺬﺭ ﺷﺒﺤﻠﻬﺎ ﺑﻨﺺ ﻋﻴﻦ : ﻋﻨﺎﺩ ﺣﻤﻴﺮ ..
ﺭﻳﺤﺎﻧﻪ : ﺗﻜﻠﻢ ﻋﻦ ﻧﻔﺴﻚ ..
ﻣﻨﺬﺭ ﺑﻀﺤﻜﻪ : ﺟﺮﻭﺓ ..
ﺭﻳﺤﺎﻧﻪ ﺑﻀﺤﻜﻪ : ﺑﺎﻩ ﻗﻮﻟﻲ ﺷﻦ ﺑﺘﺠﻴﺒﻠﻲ ﻣﻦ ﺑﺮﺍ ..
ﻣﻨﺬﺭ : ﻫﺬﺍ ﻫﻤﻚ ﻳﺎﻣﺎﺩﻳﻪ ..
ﺭﻳﺤﺎﻧﻪ ﺑﻀﺤﻜﻪ ﻣﻐﺮﻭﺭﺓ : ﻣﺎﻻ ﺑﺘﻬﻤﻨﻲ ﺍﻧﺖ .. ﺍﻛﻴﺪ ﺍﻟﻬﺪﺍﻳﺎ ﺍﻫﻢ ..
ﻣﻨﺬﺭ : ﻫﻬﻬﻬﻬﻬﻬﻬﻬﻪ ﺟﺮﻭﺓ ﻣﺴﺘﻐﻠﻪ ..
ﺭﻳﺤﺎﻧﻪ : ﻫﻬﻬﻬﻬﻬﻬﻬﻬﻪ ...
ﻣﻨﺬﺭ ﺗﻨﻬﺪ ﻭﻫﻮ ﻳﺸﺒﺤﻠﻬﺎ : ﺷﻦ ﺣﺎﻝ ﺍﻟﻌﻴﻠﻪ ..
ﺭﻳﺤﺎﻧﻪ : ﺍﻟﺤﻤﺪ ﻟﻠﻪ ..
ﻣﻨﺬﺭ : ﻣﺮﺕ ﻭﻟﺪ ﻋﻤﻚ ﺷﻦ ﺣﺎﻟﻬﺎ
ﺭﻳﺤﺎﻧﻪ ﺑﺈﺳﺘﻐﺮﺍﺏ : ﻣﻦ ﻓﻴﻬﻢ ..
ﻣﻨﺬﺭ : ﻣﺮﺕ ﺍﻟﻀﺎﺑﻂ ..
ﺭﻳﺤﺎﻧﻪ ﺑﺮﻓﻌﺔ ﺣﺎﺟﺐ : ﺗﻌﺮﻓﻬﺎ ﺍﻧﺖ ..
ﻣﻨﺬﺭ ﻫﺰ ﺭﺍﺳﻪ ﺑﺈﻳﺠﺎﺏ : ﻗﺮﻳﺒﺘﻲ ..
ﺭﻳﺤﺎﻧﻪ ﺑﺸﻬﻘﻪ : ﻣﺎﺗﻘﻮﻟﺶ ﺍﻧﺖ ﺧﻄﻴﺒﻬﺎ ﺍﻷﻭﻝ ..
ﻣﻨﺬﺭ : ﺣﺸﺎ ﻭﻛﻼ ﻭﺍﻟﻌﻴﺎﺫ ﺑﺎﻟﻠﻪ ﻛﻠﺐ ﺍﻟﺰﻳﻨﻪ ﺷﻦ ﺟﺎﺑﻪ ﻟﻴﺎ ..
ﺭﻳﺤﺎﻧﻪ : ﺗﺤﺒﻪ ﻫﻠﺒﻪ ﺷﻜﻠﻚ ..
ﻣﻨﺬﺭ : ﻟﺪﺭﺟﻪ ﻛﺎﻥ ﻧﻠﻘﻰ ﻧﻔﺠﺮ ﻓﻴﻪ ..
ﺭﻳﺤﺎﻧﻪ : ﺃﻭﻭﻭﻭﻑ .. ﺷﻜﻠﻚ ﺗﺤﺒﻬﺎ ..
ﻣﻨﺬﺭ ﺑﺈﺑﺘﺴﺎﻣﻪ : ﺍﻳﻪ ﻟﻜﻦ ﺯﻱ ﺃﺧﺘﻲ .. ﻗﺮﻳﺒﺘﻲ ﻣﻦ ﺑﻌﻴﺪ ..
ﺭﻳﺤﺎﻧﻪ : ﺍﻣﻤﻤﻢ ...
ﻣﻨﺬﺭ : ﻭﺍﻧﺘﻲ ﻳﺎﻟﺒﺮﺗﻘﺎﻟﻪ ﻣﺎﻓﻴﺶ ﻓﺤﻴﺎﺗﻚ ﺟﺪﻳﺪ ..
ﺭﻳﺤﺎﻧﻪ ﺑﻀﺠﺮ : ﺍﻧﺖ ﺍﻟﺤﺎﺟﻪ ﺍﻟﻮﺣﻴﺪﻩ ﺍﻟﺠﺪﻳﺪﻩ ﻓﺤﻴﺎﺗﻲ ..
ﻣﻨﺬﺭ ﺑﺮﻓﻌﺔ ﺣﺎﺟﺐ : ﻭﻋﻼﺵ ﺗﻘﻮﻟﻲ ﻓﻴﻬﺎ ﻫﻜﻲ ..
ﺭﻳﺤﺎﻧﻪ : ﻫﻜﻲ ..
ﻣﻨﺬﺭ ﻫﺰ ﺭﺍﺳﻪ ﺍﻳﻤﻴﻦ ﻭﻳﺴﺎﺭ ﻭﻫﻮ ﻳﻀﺤﻚ .. ﻭﺭﻳﺤﺎﻧﻪ ﺷﺒﺤﺘﻠﻪ ﻉ ﺟﻨﺐ ﻭﺿﺤﻜﺖ ..
ﺭﻳﺤﺎﻧﻪ ﺗﻌﻮﺩﺕ ﻉ ﻣﻨﺬﺭ ﺻﺢ ﻣﺶ ﺣﺎﺳﻪ ﺍﺗﺠﺎﻫﻪ ﺑﺸﻌﻮﺭ ﺣﺐ ﺍﻭ ﻣﺎﺷﺎﺑﻪ ﺫﻟﻚ .. ﻟﻜﻦ ﺣﺴﺖ ﺍﻧﻪ ﺷﻲ ﺣﻠﻮ ﺧﺶ ﻟﺤﻴﺎﺗﻬﺎ ﻟﻤﺎ ﺗﻜﻮﻥ ﻣﻌﺎﻩ ﺍﻭ ﺗﻜﻠﻤﻪ ﻻﺯﻡ ﺗﻀﺤﻚ 💕..
***
ﻋﻠﻴﺎ ﻗﺪﺍﻡ ﺣﻮﺵ ﺍﻫﻠﻬﺎ ﺗﺴﺘﻨﻰ ﻓﻲ ﺍﻟﺼﻐﺎﺭ ﺍﻣﺘﻰ ﻳﻄﻠﻌﻮﺍ .. ﻃﻠﻌﻮﺍ ﻭﻃﻠﻌﺖ ﻭﺭﺍﻫﻢ ﺃﻣﻴﺮﻩ
ﺍﻣﻴﺮﺓ : ﻟﻠﻮﺷﻪ ﻧﻄﻠﺐ ﻣﻨﻚ ﻃﻠﺐ ..
ﻋﻠﻴﺎ ﺑﺮﻓﻌﺔ ﺣﺎﺟﺐ : ﺷﻨﻮ ..
ﺍﻣﻴﺮﺓ ﻣﺪﺕ ﻛﻴﺴﻪ ﻫﺪﺍﻳﺎ ﺻﻐﻴﺮﻩ ﻟﻌﻠﻴﺎ ﻭﻭﺟﻬﻬﺎ ﺍﺣﻤﺮ : ﺍﻋﻄﻴﻬﺎ ﻟﺴﺮﻣﺪ ...
ﻋﻠﻴﺎ ﺗﺸﺒﺢ ﻟﻠﻜﻴﺴﻪ ﻭﺗﺸﺒﺤﻠﻬﺎ ..
ﺍﻣﻴﺮﺓ ﺑﺘﻮﺳﻞ ﻭﻋﻴﻮﻥ ﻣﻌﺒﻴﺎﺕ ﺩﻣﻮﻉ : ﺍﺭﺟﻮﻙ ﻟﻠﻮﺷﻪ ..
ﻋﻠﻴﺎ ﺍﺳﺘﺴﻠﻤﺖ : ﺑﺎﻩ .. ﻭﻫﻲ ﺗﺎﺧﺪ ﻓﻲ ﺍﻟﻜﻴﺴﻪ ﺷﺪﺕ ﺍﻳﺪ ﺍﻣﻴﺮﻩ .. ﺭﺩﻱ ﺑﺎﻟﻚ ﻉ ﺭﻭﺣﻚ ﺍﺭﺟﻮﻙ ..
ﺍﻣﻴﺮﺓ ﺑﺄﺑﺘﺴﺎﻣﻪ : ﺍﻧﻲ ﻗﺪ ﻧﻔﺴﻲ ﺍﻃﻤﻨﻲ ..
ﻋﻠﻴﺎ ﺗﻨﻬﺪﺕ ﻭﻫﺰﺕ ﺭﺍﺳﻬﺎ ﺑﺈﻳﺠﺎﺏ ﻭﻃﻠﻌﺖ ﻭﺍﻣﻴﺮﻩ ﺳﻜﺮﺕ ﻭﺭﺍﻫﺎ ﺍﻟﺒﺎﺏ ﻭﻫﻲ ﺣﺎﻃﻪ ﺍﻳﺪﻫﺎ ﻉ ﻗﻠﺒﻬﺎ ﻭﺗﻀﺤﻚ .. ﻭﺑﻌﺪﻫﺎ ﺧﺸﺖ ﺩﺍﺧﻞ ...
***
ﻋﺒﺪﺍﻟﻘﺪﻭﺱ : ﻏﺪﻭﺓ ﺑﻨﺘﻲ ﺑﺘﺮﻭﺡ ﺍﻧﺖ ﺍﻃﻠﻊ ﺍﺳﺘﻘﺒﻠﻬﻢ ..
ﻣﻨﺼﻒ " ﺧﺎﺩﻡ ﻋﻨﺪ ﺑﻮﻙ ﻳﺎﻭﺍﻃﻲ :" ﺣﺎﺿﺮ ..
ﻋﺒﺪﺍﻟﻘﺪﻭﺱ : ﺷﻦ ﺩﺍﺭﺕ ﻧﻬﻠﻪ ..
ﻣﻨﺼﻒ : ﻃﻠﻌﺖ ﻣﺶ ﺳﺎﻫﻠﻪ ﺗﺒﻲ ﻓﻠﻮﺱ ...
ﻋﺒﺪﺍﻟﻘﺪﻭﺱ ﻳﻔﻜﺮ ...
ﻣﻨﺼﻒ : ﺧﻴﺮﻙ ..
ﻋﺒﺪﺍﻟﻘﺪﻭﺱ : ﻣﺶ ﻋﺎﺭﻑ ﻓﺸﻲ ﻣﺶ ﻣﺮﻳﺤﻨﻲ ..
ﻣﻨﺼﻒ : ﺍﻧﺖ ﺍﻟﻤﻮﺳﻮﺱ ﺑﺲ ...
ﻋﺒﺪﺍﻟﻘﺪﻭﺱ : ﺍﻥ ﺷﺎﺀ ﺍﻟﻠﻪ ..
ﻣﻨﺼﻒ " ﻗﺮﻳﺐ ﺣﺘﺮﻓﻌﻚ ﻭﺭﺍ ﺍﻟﺸﻤﺲ "
***
ﻛﻴﻒ ﺭﺍﺡ؟ !!
ﺍﻟﻔﻬﺪ : ﻣﺶ ﻓﺎﻫﻢ ﻣﺶ ﻋﺎﺭﻑ ﻛﻴﻒ ﻋﻘﻠﻲ ﻭﺍﻗﻒ ..
ﺍﻟﺤﺴﻦ : ﻣﺤﻤﺪ ﺍﻟﻤﻠﻒ ﻣﻘﻴﻮﻡ ..
ﺍﻟﻔﻬﺪ : ﻣﺎﻧﺒﻴﺶ ﻧﺸﻚ ﻓﻲ ﺣﺪ ﻣﻦ ﺍﻟﺰﻣﻼﺀ ..
ﺍﻟﺤﺴﻦ : ﺷﻚ ﺣﺘﻰ ﻓﻨﻔﺴﻚ .. ﻫﻜﻲ ﺗﻌﻠﻤﺖ ﺍﻟﻠﻲ ﺣﻮﺍﻟﻴﺎ ﻛﻠﻬﻢ ﻣﺤﻞ ﺷﻚ ﺣﺘﻰ ﻟﻮﺗﻔﺎﻭﺗﺖ ﺑﻴﻨﺎﺗﻬﻢ ﻧﺴﺒﺔ ﺍﻟﺸﻚ ..
ﺍﻟﻔﻬﺪ : ﻭﻫﺬﺍ ﺍﻟﻠﻲ ﺣﻨﺪﻳﺮﻩ ﺣﻨﻌﺮﻑ ﻣﻦ ﻫﻮ ...
ﺍﻟﺤﺴﻦ : ﺍﻫﻢ ﺷﻲ ﺗﻮﺍ .. ﺍﺩﻳﺮ ﺍﻟﻠﻲ ﺑﻨﻘﻮﻟﻚ ﻋﻠﻴﻪ ... ﻗﻮﻟﻠﻬﻢ ﺍﻧﻚ ﺿﻴﻌﻴﺘﻪ ﻭﺧﻠﻴﻬﻢ ﻳﻌﺮﺿﻮﻙ ﻟﻠﻤﺤﺎﺳﺒﻪ ﻭﻗﺘﻬﺎ ﺣﺘﻌﺮﻑ ﻣﻦ ﺍﻟﻠﻲ ﺧﺪﺍﻩ ...
ﺍﻟﻔﻬﺪ ﺳﻜﺖ ﻭﻳﻔﻜﺮ ...
***
ﺍﻟﻌﺸﻴﻪ ﺳﺮﻣﺪ ﻛﺎﻥ ﻣﺎﺷﻲ ﺑﺎﻟﻘﻴﻼﺍ ﻣﻦ ﺍﻟﻤﺮﺑﻮﻋﻪ ﻟﺪﺍﺭﻩ ﻗﺎﺑﻼﺗﻪ ﻋﻠﻴﺎ ..
ﻋﻠﻴﺎ؛ ﻛﻴﻒ ﺣﺎﻟﻚ ﺍﻟﻴﻮﻡ ..
ﺳﺮﻣﺪ ﺑﻀﺤﻜﻪ : ﺍﻫﻮﺍ ﻧﺒﺮﺯ ..
ﻋﻠﻴﺎ ﺑﻀﺤﻜﻪ : ﻛﻮﻳﺲ .. ﻏﺪﻭﺓ ﻣﺴﺎﻓﺮ ..
ﺳﺮﻣﺪ : ﺇﻥ ﺷﺎﺀ ﺍﻟﻠﻪ ﺍﻟﺼﺒﺢ ..
ﻋﻠﻴﺎ : ﺗﻤﺎﻡ .. ﺳﺮﻣﺪ ﺗﻔﻀﻞ ..
ﺳﺮﻣﺪ ﻳﺸﺒﺢ ﻟﻠﻜﻴﺴﻪ ﺑﺈﺳﺘﻐﺮﺍﺏ : ﺷﻨﻮ ﻫﺬﺍ ..
ﻋﻠﻴﺎ : ﺧﻮﺩﻫﺎ ﻭﺣﺘﻌﺮﻑ ... ﺧﺪﺍﻫﺎ ﺳﺮﻣﺪ ﻭﻫﻮ ﻣﺴﺘﻐﺮﺏ ﻭﻋﻠﻴﺎ ﻣﺸﺖ .. ﺧﺶ ﺑﻴﻬﺎ ﻟﺪﺍﺭﻩ ﻭﺳﻜﺮ ﺍﻟﺒﺎﺏ .. ﻭﺻﻞ ﻓﻲ ﺍﻟﺴﺮﻳﺮ ﺣﻮﻝ ﻗﻴﻼﺗﻪ ﻭﻗﻌﻤﺰ ... ﻓﺘﺢ ﺍﻟﻜﻴﺴﻪ ﺷﺎﻑ ﻭﺭﻗﻪ ﻣﻄﺒﻘﻪ ﻓﺘﺤﻬﺎ ﻭﻗﺮﺍﻫﺎ
( ﺣﺒﻴﺖ ﻧﺪﻳﺮﻟﻚ ﺣﺎﺟﻪ ﺗﻘﻌﺪ ﻣﻨﻲ ﻣﻌﺎﻙ ﺗﺬﻛﺮﻧﻲ ﺑﻴﻬﺎ ﻭﻳﻦ ﻣﺎﺗﻤﺸﻲ .. ﺍﻟﺒﺴﻪ ﺩﻳﻤﺎ ﺍﺣﻠﻰ ﻣﻦ ﻫﺬﺍﻛﺎ ﺍﻟﺨﺎﺗﻢ )
ﺳﺮﻣﺪ ﺣﺘﻰ ﻣﻦ ﻋﻴﻮﻧﻪ ﺿﺤﻜﻮﺍ ﻭﻗﻠﺒﻪ ﺑﻴﻔﺮ .. ﻃﻠﻊ ﺍﻟﺒﺎﻛﻮ ﻭﻓﺘﺤﻪ ﻭﺷﺎﻑ ﺧﺎﺗﻢ ﻓﻀﻪ ﻣﻨﻘﻮﺵ ﻋﻠﻴﻪ ﺍﺳﻤﻪ ..
ﺳﺮﻣﺪ " ﺁﺍﺍﺍﺍﺍﻩ ﻳﺎﺃﻣﻴﺮﻩ ﻋﻼﺵ ﻫﻜﻲ ﺑﺲ .." ﻗﺮﺏ ﻣﻨﻪ ﺍﻟﻮﺭﻗﻪ ﻭﺍﻟﻜﻴﺴﻪ ﺷﻢ ﺭﻳﺤﻪ ﺣﻠﻮﺓ ﻧﻔﺲ ﺍﻟﺮﻳﺤﻪ ﺍﻟﻠﻲ ﺷﻤﻬﺎ ﻋﻠﻴﻬﺎ ﻟﻤﺎ ﻋﺘﺮﺕ ﻓﻴﻪ ﻟﻴﻠﺘﻬﺎ .. ﺳﺮﻣﺪ ﻏﻤﺾ ﻋﻴﻮﻧﻪ ﺑﺄﻟﻢ ﻭﻓﺘﺤﻬﻢ ..
ﺳﺮﻣﺪ " ﺇﻋﺪﺍﺩﺍﺗﻲ ﺑﺪﺕ ﺗﻠﺨﺒﻂ ﻭﻫﺎﺩﻱ ﻣﺶ ﻋﻼﻣﺔ ﺧﻴﺮ ﺑﻜﻜﻞ .."
ﺗﺎﻧﻲ ﻳﻮﻡ ﺍﻟﺼﺒﺢ 🌄
ﻭﺍﻗﻔﻪ ﻓﻲ ﺍﻟﺠﻨﺎﻥ ﺗﺸﺒﺢ ﻓﻲ ﺍﻟﻮﺭﺩ ﻛﻴﻒ ﺗﻔﺘﺢ ﻭﻣﻨﻈﺮﻩ ﺣﻠﻮ ﺑﺎﻟﻤﺮﻩ ...
ﻭﻗﻔﺖ ﺑﺤﺪﺍﻩ ﻭﻗﻌﺪﺕ ﺗﺸﻢ ﻓﻴﻪ .. ﺧﻄﺮ ﻫﻮ ﻉ ﺑﺎﻟﻬﺎ .. ﻫﻮ ﺍﺻﻼ ﻣﺎﻏﺎﺑﺶ ﺑﻜﻞ ﻋﻦ ﺑﺎﻟﻬﺎ .. ﻭﻗﻔﺖ ﺣﺪﺍ ﺍﻟﻮﺭﺩ ﺧﺪﺕ ﺻﻮﺭﺓ ﻭﻛﻴﻒ ﺟﺖ ﺑﺘﺒﻌﺘﻬﺎ ...
ﺟﻌﻔﺮ : ﺍﻣﻴﺮﻩ ﺑﺎﺑﺎ ﺍﻟﺴﺎﻋﻪ 8 ﺇﻻﺭﺑﻊ ...
ﺍﻣﻴﺮﺓ ﺑﻌﺠﻠﻪ : ﻫﻴﺎ ﻫﺎﻧﻲ ﻃﺎﻟﻌﻪ .. ﻭﺗﻮﺟﻬﺖ ﻟﻠﺒﺎﺏ ﻭﻃﻠﻌﺖ ﺑﺴﺮﻋﻪ ..
ﻓﻲ ﺣﻮﺵ ﺍﻟﺤﺎﺝ ﻋﻠﻲ ..
ﺑﺮﻧﻴﻪ : ﺭﺩ ﺑﺎﻟﻚ ﻉ ﺭﻭﺣﻚ ..
ﺳﺮﻣﺪ : ﺍﻣﻲ ﺍﻭﻝ ﻣﺮﺓ ﻧﺴﺎﻓﺮ؟ 🤣!
ﺑﺮﻧﻴﻪ : ﻗﺒﻞ ﺯﻱ ﺍﻟﻘﺮﺩ ﻣﺎﻓﻴﻚ ﺷﻲ ﻟﻜﻦ ﺗﻮﺍ ﺍﻧﺖ ﻣﺮﻳﺾ ..
ﺳﺮﻣﺪ : ﻳﻘﻮﻟﻮﺍ ﺍﻟﻘﺮﺩ ﻓﻲ ﻋﻴﻦ ﺍﻣﻪ ﻏﺰﺍﻝ ﺇﻻ ﺍﻧﻲ ﻏﺰﺍﻝ ﻓﻲ ﻋﻴﻦ ﺍﻣﻪ ﻗﺮﺩ ..
ﻛﻠﻬﻢ : ﻫﻬﻬﻬﻬﻬﻬﻬﻬﻬﻬﻬﻬﻬﻬﻪ
ﺑﺮﻧﻴﻪ ﺑﻀﺤﻜﻪ : ﻗﺮﺩ ..
ﺷﺒﺢ ﻹﻧﻌﺎﻡ ﻫﻠﺒﻪ ﻭﺍﺑﺘﺴﻢ ﻗﺮﺏ ﻭﺑﺎﺱ ﺭﺍﺳﻬﺎ : ﺳﺎﻣﺤﻴﻨﻲ ..
ﺍﻧﻌﺎﻡ ﻓﻬﻤﺖ ﺍﻧﻪ ﻗﺎﻝ ﻫﻜﻲ ﺑﺴﺒﺐ ﻋﺪﻡ ﺭﺿﺎﻩ ﻉ ﻣﻮﺿﻮﻋﻬﺎ : ﺣﺘﻔﺮﺣﻠﻲ ﺍﻧﺘﻲ ﺍﻛﺜﺮ ﻭﺍﺣﺪ .. ﺍﺑﺘﺴﻢ ﺳﺮﻣﺪ ..
ﺍﻟﺤﺴﻦ : ﺗﻲ ﻫﻴﺎ ﻭﺍﻧﺖ ﻋﺸﺖ ﺍﻟﺪﻭﺭ ...
ﺳﺮﻣﺪ ﺑﻀﺤﻜﻪ : ﺍﺳﺘﻐﻔﺮ ﺍﻟﻠﻪ ﻣﺶ ﻣﻬﻨﻴﻨﻲ ﺣﺘﻰ ﻓﻲ ﺍﻟﻮﺩﺍﻉ ..
ﺳﺎﺭﺓ : ﻭﺩﺍﻉ ﺷﻨﻮ ﺍﻟﻠﻄﻒ .. ﻛﻠﻪ ﺍﺳﺒﻮﻉ ﺑﺎﻟﻜﺜﻴﺮ ..
ﺳﺮﻣﺪ ﺑﻀﺤﻜﻪ :
ﺧﻠﻴﻨﻲ ﻧﻌﻴﺶ ﺍﻟﺪﺭﺍﻣﺎ ..
ﺿﺤﻜﻮﺍ ﻛﻠﻬﻢ .. ﺳﻠﻢ ﻉ ﻫﺎﻟﻪ ﻭﻋﻠﻴﺎ ﻭﻃﻠﻊ ﻫﻮ ﻭﺍﻟﺤﺴﻦ ﻭﻣﻌﺎﻫﻢ ﻣﺮﻋﻲ ﻭﺣﺴﺎﻥ .. ﺗﻮﺟﻬﻮﺍ ﻟﻠﻤﻄﺎﺭ .. ﻭﺻﻠﻮﺍ .. ﺧﺸﻮﺍ ﻭﻫﻮ ﻳﻤﺸﻲ ﻉ ﻗﻴﻼﺗﻪ ﻻﻗﻮﺍ ﻣﺤﻤﺪ ﻳﺴﺘﻨﻰ ﻓﻴﻬﻢ ﻷﻧﻪ ﻫﻮ ﺍﻟﻠﻲ ﺣﻴﻤﺸﻲ ﻣﻌﺎﻩ .. ﻣﺸﻲ ﻗﺒﻠﻬﻢ ﺑﺶ ﻳﺸﻮﻑ ﺍﻟﻮﺿﻊ ﻭﻳﻘﻮﻟﻠﻬﻢ ﻉ ﻣﻮﻋﺪ ﺍﻟﺮﺣﻠﻪ ﺑﺶ ﻣﺎﻳﺘﺸﺤﻄﻮﺵ ﻉ ﺍﻟﻔﺎﺿﻲ ..
ﺍﻟﺤﺴﻦ : ﻛﻠﻪ ﺣﻴﻤﺸﻲ ﺗﻤﺎﻡ ..
ﺳﺮﻣﺪ ﺍﺑﺘﺴﻢ : ﺍﻥ ﺷﺎﺀ ﺍﻟﻠﻪ ..
ﺣﺴﺎﻥ : ﻋﻢ ﺳﺎﻡ .. ﺍﻭﻝ ﻣﺮﺓ ﺣﻨﻔﻘﺪﻙ ﻣﺪﻩ ﻃﻮﻳﻠﻪ ﻫﻜﻲ ..
ﺳﺮﻣﺪ ﺑﻀﺤﻜﻪ : ﻣﺎﺗﻔﻘﺪ ﻏﺎﻟﻲ ..
ﻣﺮﻋﻲ : ﺗﻮﺻﻠﻮﺍ ﺳﺎﻟﻤﻴﻦ ﻭﻃﻬﻮﺭﺍ ﺍﻥ ﺷﺎﺀ ﺍﻟﻠﻪ ..
ﺳﺮﻣﺪ : ﺗﺴﻠﻢ ..
ﺳﻤﻌﻮﺍ ﻧﺪﺍﺀ ﺍﻟﻄﺎﻳﺮﺓ 🗣
ﻣﺤﻤﺪ : ﻫﻴﺎ ﺳﺮﻣﺪ ..
ﺳﺮﻣﺪ ﻫﺰ ﺭﺍﺳﻪ ﺑﺈﻳﺠﺎﺏ ﺷﺒﺤﻠﻬﻢ ﻭﺍﺑﺘﺴﻢ ﺑﻐﻤﺰﺓ ﻭﻣﺸﻲ ..
ﺍﻟﺤﺴﻦ : ﻟﻴﻪ ﻓﻮﻕ 6 ﺳﻨﻴﻦ ﻣﺎﺳﺎﻓﺮﺵ ..
ﺣﺴﺎﻥ : ﺍﻳﻪ ...
ﻣﺮﻋﻲ : ﻣﻦ ﺗﻮﺍ ﻓﻘﺪﺗﻪ ..
ﺍﻟﺤﺴﻦ ﺗﻨﻬﺪ ﻭﻗﻌﺪ ﻳﺸﺒﺤﻠﻪ ﻟﻴﻦ ﺍﺧﺘﻔﻲ ... ﻭﻃﻠﻌﻮﺍ ﺍﻟﺘﻼﺛﻪ ...
ﻃﺎﺭﺕ ﺍﻟﻄﺎﻳﺮﺓ ﻣﺘﺎﻉ ﺍﻟﺮﺣﻠﻪ ﺍﻟﻠﻲ ﺣﺠﺰ ﻓﻴﻬﺎ ﺳﺮﻣﺪ ..
💥🤚 ﺑﺲ ﻟﺤﻈﻪ .. ﻫﺬﺍ ﻣﻨﻮ ﺍﻟﻠﻲ ﻣﺘﻮﺟﻪ ﻟﺴﻴﺎﺭﺓ ﺳﻮﺩﺍ ﻋﺎﻟﻴﻪ ﻣﻈﻠﻤﻪ ﻓﻲ ﻧﺺ ﺍﻟﻤﻄﺎﺭ .. ﺍﻳﻪ ﻳﻤﺸﻲ ﺑﺼﻌﻮﺑﻪ ﺑﺎﻟﻘﻴﻼﺕ .. ﻗﺮﻳﺐ ﻳﻮﺻﻞ ﻟﻠﺴﻴﺎﺭﺓ ﻧﺰﻝ ﻭﺍﺣﺪ ﺿﺨﻢ ﺍﻟﺠﺴﻢ ﻓﺘﺤﻠﻪ ﺍﻟﺒﺎﺏ ﺍﻟﺨﻠﻔﻲ .. ﺧﺪﻱ ﻣﻨﻪ ﺍﻟﻘﻴﻼﺕ ﻭﺭﻛﺐ ﺍﻟﺴﻴﺎﺭﺓ .. ﻭﻓﻲ ﺟﻨﺒﻪ ﺭﻛﺐ ﺷﺨﺺ ﺗﺎﻧﻲ ..
ﺗﺤﺮﻛﺖ ﺳﻴﺎﺭﺓ ﺳﻮﺩﺍ ﺻﻐﻴﺮﻩ ﻗﺪﺍﻣﻬﻢ ﻭﺗﺤﺮﻛﺖ ﺍﻟﺴﻴﺎﺭﻩ ﺍﻟﻌﺎﻟﻴﻪ ﺍﻟﺴﻮﺩﺍ ﻭﻭﺭﺍﻫﺎ ﺯﻭﺯ ﺗﺎﻧﻴﺎﺕ ﺳﻮﺩ ﻟﻜﻦ ﻛﺒﺎﺭ ﺷﻮﻱ ..
ﺧﻠﻴﻨﺎ ﻧﻘﺮﺑﻮﺍ ﺍﻟﻠﻘﻄﻪ ﺍﻛﺜﺮ ﻟﻠﺴﻴﺎﺭﺓ ﺍﻟﺴﻮﺩﺍ ﺍﻟﻌﺎﻟﻴﻪ ..
: ﻭﻳﻦ ﺗﻮﺍ ..
ﺳﺮﻣﺪ : ﻝ ..**** ﺑﻨﻘﻌﺪﻭﺍ ﻏﺎﺩﻱ ﻟﻴﻮﻡ ...3\29
: ﺗﻢ ...
ﺭﻥ ﺗﻠﻴﻔﻮﻧﻪ ..
ﺳﺮﻣﺪ : ﺍﻭﻓﻔﻔﻒ ..
: ﻣﻨﻮ ..
ﺳﺮﻣﺪ ﺑﺘﺬﻣﺮ : ﺍﻟﻨﻔﺦ ﺟﻤﺎﻋﻪ ﺍﻹﺫﺍﻋﻪ ... ﺭﺩ ﻋﻠﻴﻬﻢ .. ﺍﻫﻼ ......
ﻻﻳﻮﺭﻳﻚ ﺑﺎﺱ ..... ﻻ ﺣﺎﻟﻴﺎ ﻻ .... ﻃﺎﻟﻊ ﺍﺳﺒﻮﻉ ﺑﺮﺍ ﺍﻟﺒﻼﺩ ..... ﺇﻥ ﺷﺎﺀ ﺍﻟﻠﻪ ..... ﺗﻤﺎﻡ ... ﻻﻳﻮﺭﻳﻜﻢ ﺑﺎﺱ ... ﻣﻊ ﺍﻟﺴﻼﻣﻪ
: ﺷﻦ ﻳﺒﻮﺍ ..
ﺳﺮﻣﺪ ﺑﺘﺬﻣﺮ : ﺍﻃﻠﻊ ﻓﻲ ﺍﻟﺒﺮﻧﺎﻣﺞ .. ﻛﺬﺍ ... ﻳﺒﻮﻙ ﺗﺨﺶ ﻓﻲ ﻣﺪﺍﺧﻠﻪ ﻣﻊ ﺍﻹﻋﻼﻣﻲ ﻓﻼﻥ .... ﻗﺎﺗﻠﻬﻢ ﺍﻟﺪﻓﺎﻉ ﻋﻦ ﺣﺮﻳﻪ ﺍﻹﻋﻼﻡ ...
: ﻧﻔﺎﻕ ...
ﺳﺮﻣﺪ : ﻫﺬﺍ ﺩﻳﺪﻧﻬﻢ ﻛﻠﻬﻢ ... ﺍﻳﻪ ﺑﻨﺴﺄﻟﻚ .. ﻓﻮﺍﺣﺪ ﻗﺒﻞ ﻛﻠﻤﺘﻮﻧﻲ ﻋﻠﻴﻪ ﺍﺳﻤﻪ " ﺍﻟﺒﻴﺮﺍ ..."
: ﺍﻫﺎ ... ﻫﺬﺍ ﻣﺎﺕ ﻓﻲ ﺍﻟﺼﻔﻘﻪ ﺍﻻﺧﻴﺮﻩ ﺍﻟﻠﻲ ﻓﺸﻠﺖ ﺑﺴﺒﺐ ﺍﻟﺤﺴﻦ ..
ﺳﺮﻣﺪ : ﻋﻨﺪﻙ ﻟﻴﻪ ﺻﻮﺭﺓ ...
: ﺗﻘﺮﻳﺒﺎ .. ﺧﺪﻱ ﺗﻠﻴﻔﻮﻧﻪ ﻭﻗﻌﺪ ﻳﺪﻭﺭ ﻟﻴﻦ ﻋﺘﺮ ﻉ ﺻﻮﺭﻩ ﻟﻴﻪ ﻣﺪﻟﻪ ﺍﻟﺘﻠﻴﻔﻮﻥ .. ﺧﺪﺍﻫﺎ ﻗﻌﺪ ﻳﺘﻤﻌﻦ ﻗﺮﺏ ﺍﻟﺼﻮﺭﺓ ﺍﻛﺜﺮ ﻣﻂ ﺷﻮﺭﺍﺑﻪ ﺑﺈﺳﺘﻴﺎﺀ ﻭﺭﺩﻟﻪ ﺍﻟﺘﻠﻴﻔﻮﻥ ..
: ﺷﻦ ﻓﻲ ...
ﺳﺮﻣﺪ : ﻫﻼﻝ ﻣﺮﺍﺟﻊ ﻗﻮﻟﻠﻬﻢ ﻳﺠﻴﺒﻮﻩ ﻏﺎﺩﻱ .. ﺑﻴﻨﻲ ﻭﺑﻴﻨﻪ ﺣﺴﺎﺏ ﻭﻻﺑﺪ ﻧﺘﺤﺎﺳﺒﻮﺍ ..
: ﺗﻢ ...
ﺻﻮﺕ ﻣﺴﺞ ﺟﻲ ﻉ ﺍﻟﺘﻠﻴﻔﻮﻥ ﻛﺎﻥ ﺻﻮﺭﺓ ﻓﺘﺤﻬﺎ .. ﻋﻴﻮﻧﻪ ﺍﻟﻠﻲ ﻛﺎﻧﺖ ﻧﻈﺮﺗﻬﻢ ﺣﺎﺩﻩ ﺑﺨﺒﺚ .. ﺗﻐﻴﺮﺕ ﻟﻨﻈﺮﻩ ﺗﺎﻧﻴﻪ ﺗﻤﺎﻣﺎ .. ﻳﺘﺄﻣﻞ ﻓﻴﻬﺎ ﻛﻴﻒ ﻣﺼﻮﺭﻩ ﺑﺤﺪﺍ ﺍﻟﻮﺭﺩ ﻭﻣﺒﺘﺴﻤﻪ ﺑﺒﺮﺍﺀﻩ ﻭﻛﺎﺗﺒﻪ ﺗﺤﺖ ﺍﻟﺼﻮﺭﺓ .. ( ﺗﻮﺻﻞ ﺳﺎﻟﻢ ..(💗..
ﺣﻂ ﺗﻠﻴﻔﻮﻧﻪ ﻓﻲ ﺟﻴﺒﻪ ﻭﺷﺒﺢ ﻟﻠﺮﻭﺷﻦ ﺑﻀﻴﻖ ﺷﺪﻳﺪ ﻣﺨﻨﻮﻕ .. ﻣﺨﻨﻮﻕ ﻟﺪﺭﺟﻪ ﺍﻟﻤﻮﺕ ﺑﺲ ﻟﻸﺳﻒ ﻣﺎﻓﻴﺶ ﻣﻮﺕ .. ﻋﺬﺍﺏ ﻻﻧﻬﺎﻳﺔ ﻟﻪ ﻋﺬﺍﺏ ﺳﺮﻣﺪﻱ ..
" ﻋﻤﺮﻱ ﻣﺎﺣﺴﻴﺖ ﺑﺼﻌﻮﺑﺔ ﺍﻟﺤﻴﺎﺓ ﺍﻟﻠﻲ ﻋﺎﻳﺸﻬﺎ ﺇﻻ ﻟﻤﺎ ﻃﻠﻌﺘﻲ ﺍﻧﺘﻲ ﻓﻲ ﺣﻴﺎﺗﻲ .. ﺍﻭﻝ ﻣﺮﺓ ﻟﻤﺎ ﻧﺎﺩﻳﺘﻲ ﺑﺈﺳﻤﻲ ﺑﻠﻬﻔﻪ ﺍﻛﺜﺮ ﻣﻦ ﻣﺮﺓ .. ﻟﻤﺎ ﺷﻔﺘﻚ ﻷﻭﻝ ﻣﺮﺓ ﺑﺸﻜﻠﻚ ﺍﻟﺨﺠﻮﻝ ﺍﻟﻠﻲ ﺫﻭﺏ ﻗﻠﺒﻲ ﻓﺼﺪﺭﻱ ﻭﺍﻧﺘﻲ ﺗﻄﻠﺒﻲ ﻣﻨﻲ ﻓﺎﻟﺼﻮﺭﺓ .. ﻣﻦ ﻳﻮﻣﻬﺎ ﻋﺮﻓﺖ ﺷﻨﻮ ﻣﻌﻨﻰ ﺍﻟﺨﻮﻑ .. ﺧﻔﺖ ﻣﻨﻚ .. ﻫﺮﺑﺖ ﻣﻨﻚ .. ﺗﻌﻤﺪﺕ ﻣﺎﻧﺪﻭﺭﺵ ﻋﻠﻴﻚ .. ﺑﺶ ﻣﺎﺗﺒﺪﻳﺶ ﺳﺒﺐ ﺿﻌﻔﻲ .. ﻧﻘﻄﺔ ﺿﻌﻔﻲ .. ﺍﻧﻲ ﺍﻟﻠﻲ ﻣﺎﻳﻨﻔﻌﺶ ﻳﻜﻮﻥ ﻟﻴﺎ ﻧﻘﻄﺔ ﺿﻌﻒ ﻷﻥ ﺍﻷﻛﻴﺪ ﺣﺘﻜﻮﻥ ﻓﻴﻬﺎ ﻧﻬﺎﻳﺘﻲ .. ﺍﻧﻲ ﺳﺮﻣﺪ ﻋﻠﻲ ﺍﻟﺼﺎﺩﻕ .. ﺍﻟﻤﻌﺮﻭﻑ ﻋﻨﺪ ﺍﻫﻞ ﺍﻟﻠﻴﻞ ﺑﺎﻟﻜﻮﺑﺮﺍ ... ﺗﺎﺟﺮﺕ ﻓﻲ ﺍﻟﻤﺨﺪﺭﺍﺕ .. ﺍﻟﺴﻼﺡ .. ﺍﻟﺒﺸﺮ .. ﺗﺎﺟﺮﺕ ﺣﺘﻰ ﻓﻲ ﺍﻟﺬﻣﻢ ... ﻋﺸﺖ ﺣﻘﻴﻘﺘﻴﻦ ... ﻋﺸﺖ ﺑﻮﺟﻬﻴﻦ .. ﻛﻞ ﻭﺟﻪ ﻛﺎﻥ ﻳﻤﺜﻞ ﺟﺰﺀ ﻣﻦ ﺣﻘﻴﻘﺘﻲ .. ﺍﻟﺠﺰﺀ ﺍﻟﻠﻲ ﻣﺘﻤﻨﻰ ﻟﻮ ﻛﺎﻥ ﻫﻮ ﻭﺟﻬﻲ ﺍﻟﺤﻘﻴﻘﻲ ﺍﻟﻮﺣﻴﺪ ﺍﻹﻧﺴﺎﻥ ﺍﻟﻤﺮﺡ ﺍﻟﻤﺤﺒﻮﺏ .. ﻭﻭﺟﻬﻲ ﺍﻟﻠﻲ ﺍﺟﺒﺮﺕ ﻧﻌﻴﺶ ﺑﻴﻪ .. ﺍﻟﺸﻴﻄﺎﻥ ﺍﻟﺨﺒﻴﺚ ﺍﻟﻤﺠﺮﻡ ﺍﻟﻠﻲ ﻣﺎﺗﻌﺮﻓﺶ ﺍﻟﺮﺣﻤﻪ ﻟﻘﻠﺒﻪ ﻃﺮﻳﻖ .. ﺍﻟﺮﺣﻤﻪ ﺍﻟﻠﻲ ﺗﺨﻠﻴﺖ ﻋﻨﻬﺎ ﺍﻭﻝ ﻣﺮﺓ ﻟﻤﺎ ﻛﺎﻥ ﻋﻤﺮﻱ 14 ﺳﻨﻪ ﻧﻔﺬﺕ ﻋﻘﻮﺑﻪ ﺑﺎﻟﻤﻮﺕ ﻓﺮﺿﻬﺎ ﻛﺒﻴﺮﻧﺎ ﻉ 4 ﺧﺎﻧﻮﻩ .. ﻧﻔﺬﺗﻬﺎ ﺑﺪﻭﻥ ﺗﺮﺩﺩ ﻭﻣﻦ ﻳﻮﻣﻬﺎ ﻗﺘﻞ ﺍﻟﻨﻔﺲ ﻋﻨﺪﻱ ﺷﻲ ﻋﺎﺩﻱ ﺟﺪﺍ ... ﺗﺮﺑﻴﺖ ﻓﻲ ﻭﺳﻂ ﺧﻼﻧﻲ ﻧﻌﺮﻑ ﻧﻬﺮﺏ ﻛﻮﻳﺲ ﻣﻦ ﺍﻟﻮﺍﻗﻊ ﺍﻷﺳﻮﺩ ﺍﻟﻠﻲ ﺍﻧﻔﺮﺽ ﻋﻠﻴﺎ ... ﻭﺍﻗﻊ ﺍﺟﺒﺮﺕ ﻧﻌﻴﺸﻪ ﻣﺎﻛﺎﻧﺶ ﻋﻨﺪﻱ ﺧﻴﺎﺭ ﺗﺎﻧﻲ ﻏﻴﺮ ﺍﻟﻤﻮﺕ .. ﺍﻟﻤﻮﺕ ﺍﻟﻠﻲ ﻃﺎﻝ ﻭﺍﺣﺪ ﻣﻦ ﺧﻮﺗﻲ ﻹﻧﻪ ﺭﻓﺾ ﻫﺎﻟﻮﺍﻗﻊ .. ﺍﻟﻤﻮﺕ ﺍﻟﻠﻲ ﺍﻧﻲ ﻧﺨﺎﻑ ﻣﻨﻪ ﻫﻠﺒﻪ ﻣﺶ ﺷﻮﻳﻪ ... ﺁﺍﺍﺍﻩ ... ﺧﻼﺹ ﻣﺤﻜﻮﻡ ﻋﻠﻴﺎ ﻧﻜﻤﻞ ﺍﻟﻄﺮﻳﻖ ﻷﺧﺮﻩ ﺍﻟﻄﺮﻳﻖ ﺍﻟﻠﻲ ﻣﺠﺒﺮ ﻧﻜﻤﻠﻪ ﻭﻟﻮ ﺣﺪ ﻓﻜﺮ ﻳﻮﻗﻔﻨﻲ ﺣﻨﻌﻔﺲ ﻋﻠﻴﻪ ﻣﻦ ﻛﺎﻥ ﻳﻜﻮﻥ "....
... ﻳﺘﺒﻊ .
