#الحسن (الوطن عشق رجاله )
ﺍﻟﺠﺰﺀ ﺍﻟﺘﺎﺳﻊ ﻭﺍﻷﺭﺑﻌﻴﻦ 🛡
للكاتبة GomanFared
ﺗﺎﻧﻲ ﻳﻮﻡ
ﺍﻟﺴﺎﻋﻪ 10 ﺍﻟﺼﺒﺢ ...
ﺑﻼﻝ ﻭﺍﺑﺘﺴﺎﻡ ﻛﺎﻧﻮﺍ ﻃﺎﻟﻌﻴﻦ ﻣﻦ ﺍﻟﺤﻮﺵ .. ﺍﻟﺰﻭﺯ ﺣﺎﻃﻴﻦ ﺍﻟﺴﻤﺎﻋﺎﺕ ﻓﻲ ﻭﺫﺍﻧﻬﻢ ﻭﺍﻟﻜﻼﻡ ﺍﻟﻠﻲ ﻳﺴﻤﻌﻮﺍ ﻓﻴﻪ ﻳﺘﺴﺠﻞ ..
ﻓﻲ ﻣﻜﺘﺐ ﺍﻟﺒﻲ ..
ﻋﺒﺪﺍﻟﻘﺪﻭﺱ : ﻳﻮﻡ 3\29 ﻭﺍﻗﻒ ﻋﻠﻴﻪ ﻫﻠﺒﻪ ﺣﺎﺟﺎﺕ
ﻋﺜﻤﺎﻥ : ﺍﻟﻤﻮﺿﻮﻉ ﻛﺒﻴﺮ ﻫﻠﺒﻪ ﻭﺧﺎﺷﻴﻦ ﻧﺎﺱ ﻣﻦ ﺑﺮﺍ ..
ﻣﻨﺼﻒ : ﻣﻦ ﺣﻴﺤﻀﺮ ﺑﺎﻟﺰﺑﻂ ..
ﻋﺜﻤﺎﻥ : ﺍﻟﻜﻮﻣﺎﻧﺪﺍ ﻭﺍﻟﻜﻮﺑﺮﺍ ...
ﻣﻨﺼﻒ : ﻻ ﺍﻟﺤﻜﺎﻳﻪ ﻛﺒﻴﺮﻩ ﻫﻠﺒﻪ ..
ﻋﺒﺪﺍﻟﻘﺪﻭﺱ : ﻭﻛﻴﻒ ﺣﻴﺼﻴﺮ ﺑﺎﻟﺰﺑﻂ ..
ﻋﺜﻤﺎﻥ ﺑﻀﺤﻜﻪ ﺳﺨﺮﻳﻪ : ﻋﺮﺱ ..
ﻣﻨﺼﻒ ﻭﺍﻟﺒﻲ : ؟؟؟؟ !!!
ﻋﺜﻤﺎﻥ : ﻋﺮﺱ ﻛﺒﻴﺮ ﻓﻲ ﺻﺎﻟﺔ ***** ﺣﺘﻄﻠﻊ ﺍﻟﺒﻀﺎﻋﻪ ﻓﻲ ﻣﻮﻛﺐ ﺍﻟﻌﺮﻭﺳﻪ ﺍﻟﻠﻲ ﺣﻴﺘﻮﺟﻪ ﻝ ****** ﻭﺣﻴﺼﻴﺮ ﻏﺎﺩﻱ ﺍﻹﺳﺘﻼﻡ ﻭﺍﻟﺘﺴﻠﻴﻢ ...
ﻣﻨﺼﻒ : ﻫﺎﻟﻤﺮﺓ ﺣﻨﺒﻴﻌﻮﺍ ﻭﻧﺸﺮﻭﺍ ..
ﻋﺜﻤﺎﻥ ﻫﺰ ﺭﺍﺳﻪ ﺑﺈﻳﺠﺎﺏ ...
ﻋﺒﺪﺍﻟﻘﺪﻭﺱ : ﺍﻟﻤﻄﻠﻮﺏ ﻣﻨﻲ ...
ﻋﺜﻤﺎﻥ : ﺍﻟﻔﻠﻮﺱ ﻣﺘﺎﻉ ﺍﻟﺼﻔﻘﻪ ﺣﻄﻠﻌﻬﻢ ﺑﻤﻌﺮﻓﺘﻚ ﻭﻗﺘﻲ ﻓﻨﻔﺲ ﺍﻟﻴﻮﻡ ..
ﻣﻨﺼﻒ : ﺍﻟﻜﺎﻣﻠﻴﻮﻥ ﺣﻴﻜﻮﻥ ﻣﻮﺟﻮﺩ
ﻋﺜﻤﺎﻥ : ﺍﻳﻪ ﻭﻣﻌﺎﻩ ﻋﺰ ﺍﻟﺪﻳﻦ ﺍﺑﻮ ﺍﻟﺨﻨﺴﺎﺀ ﺳﻤﻌﺘﻮﺍ ﺑﻴﻪ ..
ﻋﺒﺪﺍﻟﻘﺪﻭﺱ : ﺍﻳﻪ
ﻋﻨﺪ ﺑﻼﻝ ﻭﺍﺑﺘﺴﺎﻡ ..
ﺍﺑﺘﺴﺎﻡ ﺗﺴﻤﻊ ﻭﺩﻣﻮﻋﻬﺎ ﻳﻨﺰﻟﻮﺍ ﻭﺑﻼﻝ ﻣﺮﻛﺰ ﻋﻠﻴﻬﺎ .. ﺷﺪ ﺍﻳﺪﻫﺎ ... ﻫﻲ ﻓﻜﺘﻬﺎ ﻭﻗﻠﺒﺖ ﻭﺟﻬﻬﺎ ﺍﻟﺠﻬﺔ ﺍﻟﺘﺎﻧﻴﻪ ﻭﻗﻌﺪﺕ ﺗﺒﻜﻲ
.. ﻭﻫﻮ ﺗﻨﻬﺪ ﺑﺄﻟﻢ ﻉ ﺣﺎﻟﻬﺎ ..
***
ﻓﻲ ﺍﺣﺪ ﺍﻷﺣﻴﺎﺀ ﻓﻲ ﺍﻟﻌﺎﺻﻤﻪ ﻃﺮﺍﺑﻠﺲ ﺗﺤﺪﻳﺪﺍ ﻣﻨﺰﻝ ﻋﻤﺔ ﻫﻼﻝ ...
ﻧﺰﻟﻮﺍ ﺯﻭﺯ ﻣﻠﺘﻤﻴﻦ ﻣﻦ ﺳﻴﺎﺭﺓ ﺣﻄﻮﺍ ﺷﻲ ﻣﻐﻄﻲ ﻭﻃﻮﻝ ﻣﺸﻮﺍ ..
ﻓﻲ ﻧﻔﺲ ﺍﻟﻮﻗﺖ ﻋﻤﺔ ﻫﻼﻝ ﻣﺎﺷﻴﻪ ﺑﻄﻠﻊ ﺍﻟﻜﻨﺎﺳﻪ ﻓﺘﺤﺖ ﺍﻟﺒﺎﺏ ﻭﻣﺶ ﻣﺮﻛﺰﺓ ﻋﻔﺴﺖ ﻉ ﺷﻲ ﺷﺒﺤﺖ ﻟﻮﻃﺎ ..
ﻋﻤﺘﻪ : ﻫﻀﺎ ﺷﻨﻮ ... ﻃﺒﺴﺖ ﺑﺎﻟﺸﻮﻳﻪ ﻭﻫﻲ ﻣﺘﻮﺟﺴﻪ .. ﻣﺪﺕ ﺍﻳﺪﻫﺎ ﻭﻫﻲ ﺧﺎﻳﻔﻪ ﺣﻮﻟﺖ ﺍﻟﻐﻄﺎ ﺑﺎﻟﺸﻮﻳﻪ ... ﻓﺘﺤﺖ ﻋﻴﻮﻧﻬﺎ ﺍﻟﻠﻲ ﺗﻌﺒﻮﺍ ﺩﻣﻮﻉ ﺑﺼﺪﻣﻪ ﻭﻗﻌﺪ ﺗﺮﺟﻒ .. ﻭﻗﻌﺪﺕ ﺗﻘﻮﻝ ﺑﺼﻮﺕ ﻫﺎﻣﺲ ﻳﺮﻋﺶ : ﻧﺎﺍﺍﻋﻠﻴﺎ .. ﻧﺎﻋﻠﻴﺎ ... ﺧﺒﻄﺖ ﺍﻳﺪﻫﺎ ﻉ ﺻﺪﺭﻫﺎ ﻭﺗﻜﺮﺭ ﻓﻨﻔﺲ ﺍﻟﺠﻤﻠﻪ ﺗﺨﺒﻂ ﻭﺗﻘﻮﻝ ﻧﺎﻋﻠﻴﺎ ... ﻭﺑﻌﺪﻳﻦ ﻋﻴﻄﺖ ﻉ ﻃﻮﻝ ﺣﺴﻬﺎ ..
ﻃﻠﻌﻮﺍ ﻳﺠﺮﻭﺍ ﺑﻨﺎﺗﻬﺎ ﻭﺍﻡ ﻫﻼﻝ ﻗﺪﻣﻮﻟﻬﺎ ﻗﺪﻣﺖ ﺍﻛﺜﺮ ﻭﺣﺪﻩ ﻣﻦ ﺍﻟﺒﻨﺎﺕ ﻗﺎﻣﺖ ﺍﻟﻐﻄﺎ .. ﻭﻋﻴﻄﺖ " ﻫﻼﺍﺍﺍﺍﺍﺍﺍﺍﺍﺍﺍﺍﺍﺍﺍﺍﺍﺍﺍﻝ "
ﺍﻣﻪ ﺩﻓﺘﻬﻢ ﻭﻣﺸﺖ ﺗﺠﺮﻱ ﺷﺎﻓﺘﻪ ﻣﺸﺘﻠﻪ ﺣﻮﻟﺖ ﺍﻟﻐﻄﺎ ﺿﺮﺑﺖ ﺑﺈﻳﺪﻫﺎ ﺍﻟﺰﻭﺯ ﻉ ﻓﻤﻬﺎ .. ﻭﻣﺎﻫﻲ ﺍﻻ ﺛﻮﺍﻧﻲ ﻭﻃﺎﺣﺖ ﻣﻦ ﻃﻮﻟﻬﺎ ...
....
ﻭﻗﻒ ﺍﻟﺴﻴﺎﺭﺓ ﻓﺠﺄﺓ ...
ﺍﻟﺤﺴﻦ ﺑﺼﺪﻣﻪ : ﺷﻦ ﺗﻘﻮﻝ ........ ﺟﺎﺍﺍﺍﻱ ﺗﻮﺍ ﺟﺎﺍﺍﺍﻱ ...
ﺑﺴﺮﻋﻪ ﺗﻮﺟﻪ ﻟﺤﻮﺵ ﻋﻤﺔ ﻫﻼﻝ ﻭﻫﻮ ﻣﺶ ﻣﺴﺘﻮﻋﺐ ﺍﻟﺨﺒﺮ ﺍﻟﻠﻲ ﺟﺎﻩ ﻣﺶ ﻋﺎﺭﻑ ﻛﻴﻒ ﻭﺻﻞ ﻏﺎﺩﻱ .. ﻓﺘﺢ ﺍﻟﺴﻴﺎﺭﺓ ﻧﺰﻝ ﻭﺧﻼﻫﺎ ﻣﻔﺘﻮﺣﻪ ﻭﻣﺸﻲ ﻳﺠﺮﻱ ﻟﻘﻲ ﺍﻟﻨﺎﺱ ﻣﻠﻤﻮﻣﻪ ﺩﻓﻬﻢ ﻭﺧﺶ ﻟﻠﺤﻮﺵ .. ﻟﻘﻲ ﺯﻭﺯ ﺟﺜﺚ ﻓﻲ ﺍﻟﺠﻨﺎﻥ ﻭﺍﻟﻨﺴﺎﻭﻳﻦ ﻳﻌﻴﻄﻮﺍ ﻋﻠﻴﻬﻢ .. ﺟﺜﺔ ﻫﻼﻝ ﻭﺟﺜﺔ ﺍﻣﻪ ﺍﻟﻠﻲ ﻣﺎﺗﺤﻤﻠﺘﺶ ﺍﻟﻠﻲ ﺷﺎﻓﺎﺗﻪ ﻭﻟﺤﻘﺖ ﻭﻟﺪﻫﺎ ...💔
***
ﺍﻧﻌﺎﻡ ﻣﻘﻌﻤﺰﺓ ﻓﻲ ﺍﻟﺼﺎﻟﻪ ﺑﺘﻠﻴﻔﻮﻧﻬﺎ ﻭﻓﺎﺗﺤﻪ ﺍﻟﻤﺎﻳﻚ ﺣﺪﺍﻫﺎ ﺍﻣﻬﺎ ﻭﺳﺎﺭﺓ ﻭﻋﻠﻴﺎ ﻭﺍﻟﺼﻐﺎﺭ ...
ﺑﺮﻧﻴﻪ : ﺣﺎﻟﻚ ﺑﺎﻫﻲ
ﺳﺮﻣﺪ ﺑﻀﺤﻜﻪ : ﻭﺍﻟﻠﻪ ﺑﺎﻫﻲ ﻭﺯﺍﻫﻲ ﻭﻣﺎﻓﻴﺶ ﺧﻴﺮ ﻣﻦ ﺣﺎﻟﻲ
ﺑﺮﻧﻴﻪ : ﺍﺟﻌﻠﻪ ﺩﻭﻭﻡ ﻳﺎﺭﺑﻲ ..
ﺳﺮﻣﺪ : ﻳﻌﻨﻲ ﻻﺯﻡ ﻧﺴﺎﻓﺮ ﺑﺶ ﻧﺴﻤﻊ ﻣﻨﻚ ﻫﺎﻟﻜﻼﻡ ﺍﻟﺤﻠﻮ ..
ﺑﺮﻧﻴﻪ : ﺍﺳﻜﺖ ﻭﺍﻧﺖ ﻣﺎﻋﻨﺪﻙ ﻛﺎﻥ ﺍﻟﻘﻄﺎﻑ ...
ﺳﺮﻣﺪ : ﻫﻬﻬﻬﻬﻬﻬﻬﻬﻬﻬﻬﻬﻪ ﻫﺎﺩﻱ ﺍﻣﻲ ﺍﻟﻠﻲ ﻧﻌﺮﻓﻬﺎ ..
ﻛﻠﻬﻢ ﺿﺤﻜﻮﺍ
ﺳﺎﺭﺓ : ﻋﻤﻮﺍ ﺷﻦ ﺻﺎﺭ ﻓﻲ ﺭﻳﺘﻚ ..
ﺳﺮﻣﺪ : ﺍﻷﻣﻮﺭ ﺗﻤﺎﻡ ﻗﺎﻟﻮﻟﻲ ﺍﻟﻌﻤﻠﻴﻪ ﺻﺤﻴﺤﻪ ..
ﻛﻠﻬﻢ ﺑﺄﺻﻮﺍﺕ ﻣﺘﻘﻄﻌﻪ : ﺍﻟﺤﻤﺪ ﻟﻠﻪ ..
ﺳﻤﺎ : ﻟﻠﻮﺷﻪ ﻧﺒﻲ ﻣﻴﺎ ..
ﻫﻴﺎ : ﺣﺘﻰ ﻧﻲ ..
ﻋﻠﻴﺎ : ﺗﻮ ﻧﺠﻴﺒﻠﻜﻢ ﻗﻌﻤﺰﻭﺍ ﻫﻨﻲ ..
ﺳﺮﻣﺪ : ﺻﻮﺕ ﺻﻐﺎﺭ ﺑﺤﺪﺍﻛﻢ ..
ﺍﻧﻌﺎﻡ : ﺍﻳﻪ ﻣﺎﺗﻨﺪﺭﻳﺶ ﻋﻠﻴﻬﻢ ﻋﻨﺪﻧﺎ ﻣﻦ ﻗﺒﻞ ﻣﺎﺗﺴﺎﻓﺮ ..
ﺳﺮﻣﺪ : ﻻ ﻣﺎﻗﺎﻟﻲ ﺣﺪ ﻭﻻ ﺭﻳﺘﻬﻢ .. ﻣﻦ ﻫﻤﺎ ..
ﺑﺮﻧﻴﻪ : ﻫﺎﺩﻭﺍ ﺻﻐﺎﺭ ﻣﺮﺍﺓ ﻧﻌﺮﻓﻬﺎ ... ﺍﻟﻤﻬﻢ ﺗﻮﺍ ﻗﻮﻟﻲ ﺍﻣﺘﻰ ﻣﺮﻭﺡ ..
ﺳﺮﻣﺪ : ﻣﺶ ﻣﻌﺮﻭﻑ ﻟﻜﻦ ﻣﺶ ﺣﻨﻄﻮﻝ ...
ﺑﺮﻧﻴﻪ : ﺗﺮﻭﺡ ﺳﺎﻟﻢ ﻭﻟﻴﺪﻱ ..
ﺳﺮﻣﺪ : ﺁﺍﺍﻣﻴﻦ ..
***
ﺑﻼﻝ ﻭﺍﺑﺘﺴﺎﻡ ﻓﺎﻟﺴﻴﺎﺭﺓ ..
ﺍﺑﺘﺴﺎﻡ : ﻧﺒﻲ ﻧﻤﺸﻲ ﻣﻌﺎﻙ ...
ﺑﻼﻝ : ﺗﻲ ﻭﻳﻦ ﺑﺘﻤﺸﻲ .. ﺍﻟﺮﺍﺟﻞ ﻣﺤﺮﺹ ﻋﻠﻴﺎ ﻧﺸﻮﻓﻪ ﺑﺮﻭﺣﻲ .. ﺍﻟﻮﺿﻊ ﺣﺴﺎﺱ ﻳﺎﺃﺑﺘﺴﺎﻡ ..
ﺍﺑﺘﺴﺎﻡ ﺳﻜﺘﺖ ﻭﻫﻲ ﺧﺎﻳﻔﻪ ﻣﻦ ﻛﻞ ﺷﻲ ..
***
ﺍﻟﺤﺴﻦ ﻣﻮﺟﻮﺩ ﻣﻊ ﺍﻫﻞ ﻫﻼﻝ ﺍﻟﻠﻲ ﻧﺼﺒﻮﺍ ﺍﻟﺨﻴﻤﻪ ﻭﺭﻓﻌﻮﺍ ﻫﻼﻝ ﻭﺍﻣﻪ ﺑﺶ ﻳﻐﺴﻠﻮﻫﻢ .. ﻭﻳﺼﻠﻮﺍ ﻋﻠﻴﻬﻢ ﺍﻟﻈﻬﺮ .. ﺍﻟﺤﺴﻦ ﺣﺎﺱ ﺑﺎﻟﺬﻧﺐ ﺣﺎﺱ ﺍﻥ ﻫﻮ ﺍﻟﺴﺒﺐ ﻓﻲ ﺍﻟﻠﻲ ﺻﺎﺭ ﻫﻮ ﺍﻟﻠﻲ ﺍﻗﺤﻢ ﻫﻼﻝ ﻓﻲ ﺍﻟﻤﻬﻤﻪ .. ﻫﻼﻝ ﺍﻟﻀﺎﺑﻂ ﺍﻟﺒﺴﻴﻂ ﺧﻔﻴﻒ ﺍﻟﺪﻡ ﺍﻟﻄﻴﺐ ﺍﻟﻠﻲ ﺷﺎﻑ ﻓﻴﻪ ﺍﻟﺤﺴﻦ ﻣﻮﻫﺒﺔ ﺗﻤﺜﻴﻞ ﻗﻮﻳﺔ ﻭﺟﺮﺃﻩ . ﻭﺷﺠﺎﻋﻪ ﺧﻠﻮﻩ ﻳﺨﺘﺎﺭﻩ ﻟﻬﺎﻟﻤﻬﻤﻪ ﺍﻟﻠﻲ ﻛﺎﻥ ﻓﻴﻬﺎ ﻧﻬﺎﻳﺘﻪ ..
ﻳﻔﻜﺮ ﻗﺪﺍﺵ ﻣﺎﺯﺍﻝ ﺑﻴﻔﻘﺪﻭﺍ ﻣﻦ ﺍﺭﻭﺍﺡ ﺍﻛﺜﺮ ﻣﺎﻓﻘﺪﻭﺍ ﻗﺪﺍﺵ ... ﺍﻟﺒﻼﺩ ﻟﺘﻮﺍ ﺭﻳﺤﺔ ﺍﻟﻤﻮﺙ ﻧﻔﺎﺫﺓ ﻓﻴﻬﺎ ﺍﻟﻤﻮﺕ ﺍﻟﻠﻲ ﺧﻴﻢ ﻋﻠﻴﻬﺎ ﺍﺳﺘﻮﻃﻦ ﻓﻴﻬﺎ ﻭﻣﺎﻳﺒﻴﺶ ﻳﺠﻼ ..
ﺑﺲ ﺿﺮﻳﺒﺔ ﺑﻨﺎﺀ ﻭﻃﻦ ﻃﺎﻟﻊ ﻣﻦ ﻣﺮﺣﻠﺔ ﻓﻮﺿﻰ ﻃﻮﻳﻠﻪ ﻭﺣﺮﺏ ﻃﺎﺣﻨﻪ ﺣﺼﺪﺕ ﺍﺭﻭﺍﺡ ﻭﺍﺭﻭﺍﺡ ... ﺿﺮﻳﺒﺔ ﺍﻟﺒﻨﺎﺀ ﺣﺘﻰ ﻫﻮ ﺍﺭﻭﺍﺡ ﻭﺃﺭﻭﺍﺡ .. ﻭﺍﻟﻄﺮﻳﻖ ﻟﺪﻭﻟﺔ ﻣﺴﺘﻘﺮﺓ ﺫﺍﺕ ﺳﻴﺎﺩﻩ ﻣﺶ ﻣﻔﺮﺵ ﺑﺎﻟﻮﺭﺩ .. ﺑﻞ ﻣﻔﺮﻭﺵ ﺑﺎﻟﺪﻡ ...
ﺭﻭﺡ ﺍﻟﺤﻮﺵ ﺑﻌﺪ ﺻﻠﻮﺍ ﺍﻟﺠﻨﺎﺯﺓ .. ﻣﺶ ﻋﺎﺭﻑ ﻟﻤﺎ ﺑﻴﺨﺶ ﻣﻦ ﺑﺎﺏ ﺍﻟﺤﻮﺵ ﺷﻦ ﺣﻴﺪﻳﺮ .. ﻫﻞ ﺣﻴﺤﻜﻲ ﺍﻟﻠﻲ ﺻﺎﺭ ..
ﺍﻧﻌﺎﻡ ﻛﻴﻒ ﺣﺘﻜﻮﻥ ﺭﺩﻩ ﻓﻌﻠﻬﺎ .. ﺍﻧﻌﺎﻡ ﺍﻟﻠﻲ ﺷﺎﻓﺖ ﻓﻲ ﻫﻼﻝ ﻓﺮﺻﺔ ﺣﻠﻮﺓ ﻟﺤﺐ ﺟﺪﻳﺪ ﻭﺣﻴﺎﺓ ﺟﺪﻳﺪﻩ ... ﻛﻴﻒ ﺣﺘﺴﺘﻘﺒﻞ ﺍﻟﺨﺒﺮ؟ !!
ﺍﻟﺤﺴﻦ ﻓﻀﻞ ﺍﻟﻬﺮﻭﺏ .. ﻭﻟﻊ ﺳﻴﺎﺭﺗﻪ ﻭﻣﺸﻲ ﻷﻧﻪ ﺣﺎﻟﻴﺎ ﻣﺶ ﻣﺴﺘﻌﺪ ﻳﺸﻮﻑ ﻛﺴﺮﺓ ﺟﺪﻳﺪﻩ ﻟﻌﻤﺘﻪ ﺍﻟﻠﻲ ﻳﺸﻮﻑ ﻓﻴﻬﺎ ﺍﺧﺘﻪ ... ﺍﻧﻌﺎﻡ 💔
***
ﻓﻲ ﺍﺣﺪ ﻣﺪﻥ ﻭﺳﻂ ﻟﻴﺒﻴﺎ
ﺍﻓﻨﺪﻱ ﺍﺣﻤﺪ ...
ﺍﺣﻤﺪ : ﺷﻨﻮ ..
: ﺍﻟﻌﻤﻴﺪ ﻳﺒﻴﻚ ﻓﻲ ﻣﻜﺘﺒﻪ ..
ﺍﺣﻤﺪ ﻫﺰ ﺭﺍﺳﻪ ﺑﺈﻳﺠﺎﺏ ﻭﻃﻠﻊ ﻭﺭﺍ ﺍﻟﻌﻨﺼﺮ ﻃﻮﻝ ...
ﺗﻮﺟﻪ ﻟﻤﻜﺘﺐ ﺍﻟﻌﻤﻴﺪ ... ﻃﻖ ﻭﺧﺶ .. ﺍﺩﻯ ﺍﻟﺘﺤﻴﻪ ..
ﺍﻟﻌﻤﻴﺪ ﻣﺒﺮﻭﻙ : ﻋﻘﻴﺪ ﺍﺣﻤﺪ ﺗﻌﺎﻟﻰ ﻗﻌﻤﺰ ...
ﺍﺣﻤﺪ ﻗﺪﻡ ﻭﻗﻌﻤﺰ ..
ﺍﻟﻌﻤﻴﺪ : ﻛﻔﺎﺋﺘﻚ ﻋﺎﻟﻴﻪ ﺿﺎﺑﻂ ﻣﻤﺘﺎﺯ ﻭﺍﻟﻠﻲ ﺯﻳﻚ ﻣﻜﺴﺐ ﻟﻠﻤﻜﺎﻥ ﺍﻟﻠﻲ ﻳﻜﻮﻥ ﻓﻴﻪ ﺻﻴﺘﻚ ﻭﺻﻞ ﻟﻄﺮﺍﺑﻠﺲ .. ﻟﺬﻟﻚ ﺣﻴﺘﻢ ﻧﻘﻠﻚ ﻏﺎﺩﻱ ..
ﺍﺣﻤﺪ ﺗﻔﺎﺟﺄ : ﺑﺲ ﺍﻧﻲ ﻣﺘﺮﻳﺢ ﻫﻨﻲ ..
ﺍﻟﻌﻤﻴﺪ : ﻫﺬﺍ ﺍﻣﺮ ﻣﻦ ﻣﺮﺍﻛﺰ ﻋﻠﻴﺎ ..
ﺍﺣﻤﺪ : ﺍﻟﺴﺒﺐ ..
ﺍﻟﻌﻤﻴﺪ ﺑﺈﺑﺘﺴﺎﻣﻪ : ﺯﻱ ﻣﺎﻗﻠﺖ ﻛﻔﺎﺋﺘﻚ ..
ﺍﺣﻤﺪ ﺗﻨﻬﺪ : ﻻﺑﺪ ﻣﻦ ﺍﻹﻟﺘﺰﺍﻡ ﺑﺎﻷﻭﺍﻣﺮ ...
***
ﺍﻟﻌﺸﻴﻪ ..
ﺍﻧﻌﺎﻡ ﻣﻊ ﻋﻠﻴﺎ ﻭﻫﺎﻟﻪ ﻭﺍﻟﺼﻐﺎﺭ ﻓﻲ ﺍﻟﻜﻮﺟﻴﻨﻪ ﻛﺎﻧﻮﺍ ﻳﺒﻮﺍ ﻳﺪﻳﺮﻭﺍ ﺍﺟﻮﺍﺀ ﺣﻠﻮﺓ ﻟﻠﺼﻐﺎﺭ ﺍﻟﻠﻲ ﺍﺳﺘﺎﺣﺸﻮﺍ ﺍﻣﻬﻢ ﻭﻛﺎﻧﻮﺍ ﻳﺒﻜﻮﺍ ﻳﺒﻮﻫﺎ ..
ﺩﺍﺭﻭﺍ ﻛﻴﻜﻪ ﻭﻋﺼﻴﺮﻭﺍﻛﻼﺕ ﺣﻠﻮﺓ ﻭﻓﺮﺷﻮﺍ ﻓﻲ ﺍﻟﺠﻨﺎﻥ ﻭﻛﺎﻧﻮﺍ ﻣﻮﺗﻴﻴﻦ ﺍﻟﻌﺎﺏ ﺑﻴﻠﻌﺒﻮﻫﺎ ..
ﺍﻧﻌﺎﻡ ﺑﻌﺪ ﻭﺗﺖ ﺍﻟﺤﺎﺟﺎﺕ ﺑﺮﺍ ﺧﺸﺖ ﺩﺍﺧﻞ ﻓﻲ ﺍﻳﺪﻫﺎ ﺗﻠﻴﻔﻮﻧﻬﺎ ﺗﺘﻔﺮﺝ ﻉ ﺍﻟﻔﻴﺲ ...
ﺍﻧﻌﺎﻡ : ﻓﻲ ﺣﺎﺟﺎﺕ ﺣﻠﻮﺓ ﻫﻠﺒﻪ ﻣﻌﺮﻭﺿﻪ ﻓﻲ ﻗﺮﻭﺏ Get ....ready
ﻋﻠﻴﺎ : ﺷﻦ ﻫﻤﺎ ..
ﻫﺎﻟﻪ : ﺍﻧﻌﺎﻡ ﺗﺮﺍ ﻣﺎﻟﻘﻲ ﺍﻟﻌﺼﻴﺮ ..
ﺍﻧﻌﺎﻡ ﻭﻫﻲ ﺑﺘﺠﻴﺐ ﺍﻟﻤﺎﻟﻘﻲ ﻧﺎﺷﺖ ﺍﻟﺸﺎﺷﻪ : ﻳﻴﻲ ﺭﺍﺣﺖ .. ﺧﺪﺕ ﺍﻟﻤﺎﻟﻘﻲ ﻭﺭﺟﻌﺖ ﺗﺸﻮﻑ ﻟﻠﺘﻠﻴﻔﻮﻥ ﺑﺲ ﺍﻟﻠﻲ ﺟﻲ ﻗﺪﺍﻣﻬﺎ ﺷﻲ ﺧﻼﻫﺎ ﺗﻔﻠﺖ ﺍﻟﻤﺎﻟﻘﻲ ﺍﻟﻠﻲ ﻃﺎﺡ ﺗﻜﺴﺮ ﻭﺗﺒﺰﻉ ﻓﻲ ﺍﻟﻤﻜﺎﻥ ﻛﻠﻪ ...
ﻋﻠﻴﺎ ﻭﻫﺎﻟﻪ ﺍﻧﺨﻠﻌﻮﺍ .. ﺷﺎﻓﻮﻫﺎ ﻟﻘﻮﻫﺎ ﺗﺮﻋﺶ ﻣﻊ ﺑﻌﻀﻬﺎ ..
ﻋﻠﻴﺎ ﺑﺨﻮﻑ : ﺍﻧﻌﺎﻡ ﺧﻴﺮﻙ ...
ﺍﻧﻌﺎﻡ ﺟﺎﺣﻈﻪ ﻋﻴﻮﻧﻬﺎ ﻓﻲ ﺍﻟﺘﻠﻴﻔﻮﻥ ﺑﺼﺪﻣﻪ ﺷﺪﻳﺪﻩ ..
ﻫﺎﻟﻪ ﺟﺒﺪﺕ ﺍﻟﺘﻠﻴﻔﻮﻥ ﻣﺠﺮﺩ ﻣﺎﺷﺎﻓﺖ ﺍﻟﻠﻲ ﻓﻴﻪ ﺭﻋﺸﺖ ﻭﻗﻌﺪﺕ ﺗﻘﻮﻝ ﺑﺼﻮﺕ ﻳﺮﺟﻒ : ﺇﻧﺎ ﻟﻠﻪ .. ﻭﺇﻥ ﺇﻟﻴﻪ ﺭﺍﺟﻌﻮﻥ .. ﻋﻠﻴﺎ ﻭﻋﻴﻮﻧﻬﺎ ﺗﻌﺒﻮﺍ ﺩﻣﻮﻉ ﺟﺒﺪﺕ ﺍﻟﺘﻠﻴﻔﻮﻥ ﻭﺷﺎﻓﺖ ﺍﻟﺨﺒﺮ ﻭﺷﺒﺤﺖ ﻷﻧﻌﺎﻡ ﺍﻟﻠﻲ ﺗﺸﺒﺢ ﻓﻲ ﺍﻟﻔﺮﺍﻍ ﻭﻓﻤﻬﺎ ﻳﺮﺟﻒ ﻭﺩﻣﻮﻋﻬﺎ ﻳﺼﺒﻮﺍ ﻻﺣﻈﺖ ﻭﺟﻬﻬﺎ ﺍﻟﻠﻲ ﺍﺻﻔﺮ ﻭﻓﻤﻬﺎ ﺍﻟﻠﻲ ﻭﻻ ﺍﺑﻴﺾ .. ﺷﻮﻳﻪ ﻭﻃﺎﺣﺖ ﻭﺗﻠﻘﺘﻬﺎ ﻋﻠﻴﺎ ﻃﻮﻝ 💔..
***
ﻭﺍﻗﻒ ﺑﺴﻴﺎﺭﺗﻪ ﻉ ﺗﺮﻛﻴﻨﻪ ﺍﻟﻈﻼﻡ ﺑﺪﻱ ﻳﺤﻞ ﻭﺻﻞ ﺑﻴﻪ ﺍﻟﻐﻀﺐ ﻷﻗﺼﻰ ﻣﺮﺍﺣﻠﻪ ﺳﻤﻊ ﺻﻮﺕ ﻃﻖ ﻉ ﺑﺎﺏ ﺳﻴﺎﺭﺗﻪ .. ﺍﺷﺮ ﺑﺈﻳﺪﻩ ﻟﻠﺸﺨﺺ ﺍﻟﻠﻲ ﻭﺍﻗﻒ ﻉ ﺍﻟﺒﺎﺏ ﻳﺨﺶ ..
ﺑﻼﻝ ﻓﺘﺢ ﺍﻟﺒﺎﺏ ﻭﺭﻛﺐ : ﻛﻴﻒ ﺣﺎﻟﻚ ﻳﺎﻓﻨﺪﻱ
ﺍﻟﺤﺴﻦ : ﺑﺴﺮﻋﻪ ﻫﺎﺕ ﺍﻟﻠﻲ ﻋﻨﺪﻙ ..
ﺑﻼﻝ ﺣﺲ ﺍﻧﻪ ﻣﺶ ﻉ ﺑﻌﻀﻪ ﻋﻄﺎﻩ ﺍﻟﺠﻬﺎﺯ ... ﺧﺪﺍﻩ ﺍﻟﺤﺴﻦ .. ﺭﻥ ﺗﻠﻴﻔﻮﻥ ﺍﻟﺤﺴﻦ ﻛﺎﻧﺖ ﻋﻠﻴﺎ ﻣﺎﺑﺎﺵ ﻳﺮﺩ ..
ﺍﻟﺤﺴﻦ : ﺭﻛﺰﻭﺍ ﻣﻦ ﻳﺠﻴﻪ ﻭﻳﺨﺸﻠﻪ ..
ﺑﻼﻝ : ﺗﻤﺎﻡ .. ﺗﺒﻲ ﺷﻲ ﺗﺎﻧﻲ ..
ﺍﻟﺤﺴﻦ ﻫﺰ ﺭﺍﺳﻪ ﺑﺎﻟﻨﻔﻲ ... ﺑﻼﻝ ﻧﺰﻝ ﻭﻣﺸﻲ .. ﺭﻥ ﺗﻠﻴﻔﻮﻥ ﺍﻟﺤﺴﻦ .. ﺯﻓﺮ ﺑﻘﻮﺓ ﻭﺭﺩ ..
ﺍﻟﺤﺴﻦ : ﻫﺎﺍﻩ ..
ﻋﻠﻴﺎ ﺑﺨﻮﻑ : ﺍﻟﺤﺴﻦ ﺳﻤﻌﺖ ﺑﺎﻟﻠﻲ ﺻﺎﺭ ﻟﻬﻼﻝ ..
ﺍﻟﺤﺴﻦ ﺑﺨﻮﻑ : ﺍﻧﻌﺎﻡ ﻋﺮﻓﺖ ..
ﻋﻠﻴﺎ ﺑﺼﻮﺕ ﻣﺨﻨﻮﻕ : ﺍﻳﻪ ﻭﺧﺸﺖ ﻓﺤﺎﻟﺔ ﺻﺪﻣﻪ ..
ﺍﻟﺤﺴﻦ ﻃﻮﻝ ﺻﻜﺮ ﻋﻠﻴﻬﺎ ﻭﺗﺤﺮﻙ ﺑﺴﻴﺎﺭﺗﻪ ﻣﺘﻮﺟﻪ ﻟﻠﺤﻮﺵ ...
ﻃﻮﻝ ﺍﻟﻄﺮﻳﻖ ﻭﻫﻮ ﻳﻠﻮﻡ ﻓﻲ ﻧﻔﺴﻪ ﺣﻂ ﺍﻟﺬﻧﺐ ﻛﻠﻪ ﻓﻲ ﺭﻗﺒﺘﻪ ﻭﺻﻞ ﻟﻠﺤﻮﺵ ﻭﻧﺰﻝ ﻣﻦ ﺍﻟﺴﻴﺎﺭﺓ ﻭﺻﻜﺮ ﺑﺎﺑﻬﺎ ﻓﺘﺢ ﺍﻟﺒﺎﺏ ﻭﺧﺶ ﺩﺍﺧﻞ ﺭﻛﺐ ﺍﻟﺪﺭﻭﺝ ﺑﺴﺮﻋﻪ .. ﺣﻮﻝ ﻛﻨﺪﺭﺗﻪ ﺑﻐﻴﻆ ﻭﺧﺶ ﻃﻮﻝ ... ﺗﻮﺟﻪ ﻟﺪﺍﺭﻫﺎ ﻟﻘﺎﻫﻢ ﻭﺍﻗﻔﻴﻦ ﻭﻫﻲ ﻣﻘﻌﻤﺰﺓ ﻭﺗﺸﺒﺢ ﻓﻲ ﺍﻟﻔﺮﺍﻍ ﻭﻣﺎﻧﺰﻟﺘﺶ ﻣﻦ ﻋﻴﻨﻬﺎ ﺩﻣﻌﻪ ..
ﻗﺪﻡ ﻭﻗﻌﻤﺰ ﻗﺪﺍﻣﻬﺎ : ﺍﻧﻌﺎﻡ ...
ﺍﻧﻌﺎﻡ ﻗﺎﻣﺖ ﻋﻴﻮﻧﻬﺎ ﻓﻴﻪ ﻭﻣﺎﺗﻜﻠﻤﺘﺶ .. ﺷﺪﻟﻬﺎ ﺍﻟﺤﺴﻦ ﻭﺟﻬﻬﺎ ﺑﺈﻳﺪﻳﻪ ..
ﺍﻟﺤﺴﻦ : ﺍﻧﻌﺎﻡ ﺍﻧﺘﻲ ﻗﻮﻳﻪ ﻧﻌﺮﻓﻚ ﻳﺎﻣﺎ ﺗﺤﻤﻠﺘﻲ ﻳﺎﺇﻧﻌﺎﻡ .. ﻛﻠﻪ ﺍﺑﺘﻼﺀ ﻣﻦ ﺍﻟﻠﻪ ... ﻭﺭﺑﻚ ﻳﺒﺘﻠﻲ ﺍﻟﻠﻲ ﻳﺤﺒﻪ ..
ﺍﻧﻌﺎﻡ ﺑﺘﻮﻫﺎﻥ : ﻣﻌﻨﺎﻫﺎ ﻣﺎﺕ ﺣﻘﻪ ...
ﺍﻟﺤﺴﻦ ﻳﺸﺒﺤﻠﻬﺎ ﺑﻨﻈﺮﺓ ﺃﻟﻢ ...
ﺍﻧﻌﺎﻡ : ﺑﺎﻩ ﻋﻼﺵ ﺍﻧﻲ ﻫﻜﻲ ﻳﺼﻴﺮﻟﻲ .. ﻗﻮﻟﻲ ﻳﺎﻟﺤﺴﻦ ﻗﻮﻟﻲ ﻳﺎﻭﻟﺪ ﺧﻮﻱ ﻋﻼﺵ ﻫﻜﻲ ﻳﺼﻴﺮﻟﻲ .. ﺍﻧﻲ ﻛﻨﺖ ﻧﺤﺴﺎﺏ ﺭﻭﺣﻲ ﺑﻨﻔﺮﺡ ﺑﻨﺴﺘﻘﺮ ﺑﻨﺪﻳﺮ ﻋﻴﻠﻪ ﺑﻨﻠﺤﻖ ﻧﺠﻴﺐ ﺻﻐﺎﺭ .. ﻋﻼﺵ ﻫﻜﻲ ﻳﺎﻭﻟﻴﺪ ﺧﻮﻱ ﻗﻮﻟﻲ ﻋﻼﺵ ﺍﻧﻲ ﻫﻜﻲ ﺣﻈﻲ ..
ﺑﺮﻧﻴﻪ ﺗﺒﻜﻲ ﺑﺄﻟﻢ : ﺗﺮﺑﺤﻲ ﻳﺎﺑﻨﻴﺘﻲ ﺗﺮﺑﺤﻲ ... ﻭﻗﻌﺪﺕ ﺗﺒﻜﻲ ..
ﺍﻧﻌﺎﻡ ﺷﺒﺤﺖ ﻷﻣﻬﺎ : ﻗﻮﻟﻴﻠﻲ ﺍﻧﺘﻲ ﻳﺎﺃﻣﻲ ﺑﺎﻩ .. ﺑﺎﻟﻚ ﻏﻀﺒﺎﺗﻚ ﻭﻻﻏﺎﺿﺒﻪ ﺑﻮﻱ ..
ﻛﻠﻬﻢ ﻳﺒﻜﻮﺍ ﻭﺳﺎﺭﻩ ﻃﻠﻌﺖ ﻣﻦ ﺣﺪﺍﻫﻢ ﻣﺮﺓ ﻭﺣﺪﻩ ﻣﺸﺖ ﻟﺪﺍﺭ ﺍﻟﻤﻌﻴﺸﻪ ﻛﺎﻧﺖ ﻓﻴﻬﺎ ﻋﻠﻴﺎ ﺷﺎﺩﻩ ﺍﻟﺼﻐﺎﺭ ﻭﺩﻣﻮﻋﻬﺎ ﻳﻨﺰﻟﻮﺍ ..
ﺳﺎﺭﺓ ﺑﺒﻜﻲ : ﺍﻟﻠﻪ ﻻﻳﺴﺎﻣﺢ ﺍﻟﻠﻲ ﺩﺍﺭ ﻫﻜﻲ .. ﻭﻣﺸﺖ ﺭﻛﺒﺖ ﻟﺸﻘﺘﻬﺎ ..
ﻋﻠﻴﺎ ﺗﺤﺎﻭﻝ ﺗﺘﻤﺎﺳﻚ ﻗﺪﺍﻡ ﺍﻟﺼﻐﺎﺭ ﺑﺲ ﻣﺶ ﻗﺎﺩﺭﺓ ﺗﺸﺪ ﺩﻣﻮﻋﻬﺎ .. ﻟﻴﻦ ﺳﻤﻌﺖ ﺻﻮﺕ ﻋﻴﺎﻁ .. ﺍﻧﺨﻠﻐﻮﺍ ﺍﻟﺼﻐﺎﺭ ﺷﺪﺗﻬﻢ ﻭﺭﻛﺒﺘﻬﻢ ﻓﻮﻕ ﻟﺸﻘﺘﻬﺎ ﻭﻫﻲ ﺗﺒﻜﻲ ..
ﺍﻟﺤﺴﻦ ﺣﺎﺿﻨﻬﺎ ﺑﻘﻮﺓ ﻭﻫﻲ ﺗﺒﻜﻲ ﺑﺼﻮﺕ ﻋﺎﻟﻲ ﻓﻲ ﺣﻀﻨﻪ : ﻳﺎﺍﺍﺍﺍﺍﺭﻳﺘﻨﻲ ﺍﻧﻴﻴﻴﻴﻴﻲ ﺍﻟﻠﻲ ﻣﺘﺘﺘﺘﺘﺘﺘﺖ ﻳﺎﺍﺍﺍﺍﺍﺍﺍﺭﻳﺖ .. ﺁﺍﺍﺍﺍﺍﺍﺍﺍﻩ ﺁﺍﺍﺍﺍﺍﺍﺍﻩ ...
ﺍﻟﺤﺴﻦ ﺑﻐﻀﺐ : ﻳﺎﺇﻧﻌﺎﻡ ﻋﻬﺪ ﻋﻠﻴﺎ ﻗﺪﺍﻡ ﺭﺑﻲ ﻭﻗﺪﺍﻣﻚ ﻭﺍﻟﻠﻲ ﺣﺎﺿﺮ ﺍﻟﻠﻲ ﺩﺍﺭﻫﺎ ﻣﺶ ﺣﻴﻔﻠﺖ ﻣﻦ ﻳﺪﻱ ... ﻭﻟﻮ ﻓﺮﻃﺖ ﻓﺮﻭﺣﻲ ..
***
ﻣﻘﻌﻤﺰﺓ ﻓﻲ ﺩﺍﺭﻫﺎ ﺗﻘﺮﺍ ﻋﻨﺪﻫﺎ ﺍﺧﺘﺒﺎﺭ ﻣﻬﻢ ﺭﻥ ﻋﻠﻴﻬﺎ ﺭﻗﻢ ﻏﺮﻳﺐ
ﺷﺒﺤﺘﻠﻪ ﻗﻠﺒﺖ ﺍﻟﺘﻠﻴﻔﻮﻥ ﻉ ﻭﺟﻬﻪ ﻭﻛﻤﻠﺖ ﻗﺮﺍﻳﻪ .. ﻟﻴﻦ ﺟﺘﻬﺎ ﺭﺳﺎﻟﻪ .. ﺗﺄﻓﻔﺖ ﺧﺪﺕ ﺍﻟﺘﻠﻴﻔﻮﻥ ﻭﻓﺘﺤﺖ ﺍﻟﺮﺳﺎﻟﻪ
( ﺍﻣﻴﺮﺗﻲ ﺍﻧﻲ ﺳﺮﻣﺪ )
ﺍﺑﺘﺴﻤﺖ ﺑﻔﺮﺡ ﻗﻌﺪﺕ ﺷﺎﺩﻩ ﺗﻠﻴﻔﻮﻧﻬﺎ ﻭﺗﻘﺮﺍ ﻓﻴﻬﺎ ﻭﺗﻌﺎﻭﺩ ﻟﻴﻦ ﺭﻥ ﻣﺮﺓ ﺗﺎﻧﻴﻪ ... ﺭﺩﺕ
ﺍﻣﻴﺮﺓ ﺑﺨﺠﻞ : ﺍﻟﻮ .
ﺳﺮﻣﺪ : ﻗﻠﺒﻲ ﺳﻬﺮﺍﻥ ﻳﻨﺎﺩﻳﻚ ... ﻳﻠﻲ ﻭﺣﺸﺎﻧﻲ ﻋﻴﻨﻴﻚ ..
ﺍﻣﻴﺮﻩ : ﻫﻬﻬﻬﻬﻬﻬﻪ ..
ﺳﺮﻣﺪ ﺑﻀﺤﻜﻪ : ﻳﻌﺠﺐ ﻓﻴﻚ ﺻﻮﺗﻲ ﻭﻻﻣﺪﺍﻳﺮﻟﻚ ﺛﻠﻮﺕ ﺳﻤﻌﻲ ﻭﺗﺠﺎﻣﻠﻲ ﻓﻴﺎ ﻭﺧﻼﺹ ..
ﺍﻣﻴﺮﻩ ﺑﻀﺤﻜﻪ : ﺑﺎﻟﻌﻜﺲ ﻭﺍﻟﻠﻪ ﺻﻮﺗﻚ ﺣﻠﻮ ﻫﻠﺒﻪ ﻭﻳﺨﺶ ﺍﻟﻘﻠﺐ ..
ﺳﺮﻣﺪ : ﺍﻧﺘﻲ ﺍﻟﻠﻲ ﺣﻠﻮﻩ ﻫﻠﺒﻪ ﻭﺍﻗﺘﺤﺘﻤﺘﻲ ﻗﻠﺒﻲ ﺍﻗﺘﺤﺎﻡ ﻣﺶ ﺑﺲ ﺧﺸﺘﻴﻪ ..
ﺍﻣﻴﺮﻩ ﺑﺨﺠﻞ ﺷﺪﻳﺪ : ﺳﺮﻣﺪ ﺑﺎﻟﺸﻮﻳﻪ ﻋﻠﻴﺎ ﻣﺶ ﻫﻜﻲ ..
ﺳﺮﻣﺪ : ﺍﺍﻭﻩ ﺍﺳﻒ .. ﻋﺎﺭﻑ ﺭﻭﺣﻲ ﻣﻨﺪﻓﻊ ﻫﻠﺒﻪ ﺑﺲ ﺻﺪﻗﻴﻨﻲ ﺍﻟﻠﻲ ﻓﻘﻠﺒﻲ ﻉ ﻟﺴﺎﻧﻲ .. ﺑﺎﻩ ﺧﻞ ﻧﻐﻴﺮﻭﺍ ﺍﻟﻤﻮﺟﻪ .. ﻗﻮﻟﻴﻠﻲ ﺷﻦ ﺟﻮ ﺍﻟﻘﺮﺍﻳﻪ ..
ﺍﻣﻴﺮﺓ : ﺗﻤﺎﻡ ﺍﻫﻮ ﻋﻨﺪﻱ ﺍﺧﺘﺒﺎﺭ ﻏﺪﻭﺓ ﻧﻘﺮﺍ ﻓﻴﻪ ..
ﺳﺮﻣﺪ ﺑﻀﺤﻜﻪ : ﻗﺼﺪﻙ ﺗﻘﻮﻟﻲ ﻋﻄﻠﺘﻚ ﻉ ﻗﺮﺍﻳﻪ ..
ﺍﻣﻴﺮﺓ ﺑﻠﻬﻔﻪ : ﻻﻻ ﻭﺍﻟﻠﻪ ﻻ ﺍﻧﺖ ﺳﺄﻟﺘﻨﻲ ﻭﺍﻧﻲ ﺟﺎﻭﺑﺖ ..
ﺳﺮﻣﺪ ﺍﺑﺘﺴﻢ ...
ﺍﻣﻴﺮﻩ : ﺗﻮﺍ ﻫﺬﺍ ﻣﺶ ﻣﻬﻢ ﺍﻟﻤﻬﻢ ﺻﺤﺘﻚ ... ﺷﻦ ﺻﺎﺭ ﻣﻌﺎﻙ ..
ﺳﺮﻣﺪ : ﺍﻧﻲ ﺣﺘﻰ ﻟﻮ ﺻﺤﺘﻲ ﻣﺶ ﺗﻤﺎﻡ ﻏﺼﺐ ﻋﻨﻬﺎ ﺗﻮﻟﻲ ﻛﻮﻳﺴﻪ ﻓﻮﺟﻮﺩﻙ ..
ﺍﻣﻴﺮﻩ ﺑﻀﺤﻜﻪ : ﺳﺮﺭﺭﻣﺪ ... ﺧﻼﺹ ﻋﺎﺩ ...
ﺳﺮﻣﺪ : ﻫﻬﻬﻬﻬﻬﻬﻬﻬﻬﻪ ... ﺣﺎﻟﻲ ﺑﺎﻫﻲ ..
ﺍﻣﻴﺮﻩ : ﺍﻣﻤﻢ ﻛﻮﻳﺲ ...
ﺳﺮﻣﺪ : ﺗﻤﺎﻡ ﻧﺨﻠﻴﻚ ﺗﻘﺮﻱ ﻧﺒﻴﻚ ﻣﻦ ﺍﻷﻭﺍﺋﻞ ..
ﺍﻣﻴﺮﺓ ﺑﻀﺤﻜﻪ : ﺍﻛﻴﺪﺩﺩ ...
ﺳﺮﻣﺪ ﺑﻀﺤﻜﻪ : ﻧﺠﻪ ﻟﻴﺎ ﺍﻟﻮﺍﺛﻖ ﻣﻦ ﺭﻭﺣﻪ " ﻗﺎﻟﻬﺎ ﺑﺎﻟﺸﺮﻗﺎﻭﻱ "
ﺍﻣﻴﺮﺓ : ﻳﻠﻼ ﺑﺎﻱ ... ﺻﻜﺮﺕ ﻭﺣﻄﺖ ﺍﻟﺘﻠﻴﻔﻮﻥ ﻉ ﻗﻠﺒﻬﺎ ﻭﺗﺘﻨﻔﺲ ﺑﺼﻌﻮﺑﻪ ... ﺍﻩ ﻳﺎﺭﺑﻲ ﻛﻴﻒ ﺣﺒﻴﺘﻪ ﻫﻜﻲ ﺑﺲ ..
ﺍﻣﺎ ﺳﺮﻣﺪ ﻓﺼﻜﺮ ﻭﻫﻮ ﻳﻀﺤﻚ " ﺍﻣﻴﻴﻴﺮﺓ ﺁﺍﺍﺍﻩ ﻳﺎﺃﻣﻴﺮﻩ ...."
***
ﺭﻗﺪﺕ ﺍﻧﻌﺎﻡ ﺍﻟﻠﻴﻠﻪ ﻫﺪﻳﻜﺎ ﺑﺼﻌﻮﺑﻪ ﻭﻛﺎﻧﺖ ﺗﻨﻮﺽ ﻓﻲ ﺍﻟﻠﻴﻞ ﻭﻫﻲ ﻓﺤﺎﻟﺔ ﻫﻠﻊ ﻭﻛﺎﻧﺖ ﺳﺎﻫﺮﺓ ﺣﺪﺍﻫﺎ ﻫﺎﻟﻪ ﺗﻘﺮﺍ ﻋﻠﻴﻬﺎ ﺗﻬﺪﺍ ﻭﺗﺮﻗﺪ .. ﻭﺑﺮﻧﻴﻪ ﻣﺎﻗﺪﺭﺕ ﺗﺮﻗﺪ ﻏﻤﻀﺔ ﻣﻦ ﻗﻬﺮﺗﻬﺎ ﻉ ﺑﻨﺘﻬﺎ ...
ﻋﻠﻴﺎ ﻛﺎﻧﺖ ﺭﺍﻗﺪﻩ ﺣﺪﺍ ﺍﻟﺼﻐﺎﺭ ﻭﺗﻔﻜﺮ ﻓﻲ ﺣﺎﻝ ﺍﻟﺤﺴﻦ ﺍﻟﻠﻲ ﺍﻟﻐﻀﺐ ﻣﺴﻴﻄﺮ ﻋﻠﻴﻪ ﻭﻫﻮ ﻣﻘﻌﻤﺰ ﺑﺮﺍ ﻓﻲ ﺍﻟﺠﻨﺎﻥ ﻭﻛﺎﻥ ﻳﺴﻤﻊ ﻓﻲ ﺍﻟﺘﺴﺠﻴﻼﺕ ﻭﺑﺪﻱ ﻋﻘﻠﻪ ﻃﻮﻝ ﻳﺨﻄﻂ ﻟﻸﻧﺘﻘﺎﻡ ﻭﺍﻧﺘﻘﺎﻣﻪ ﻣﺶ ﺣﻴﻜﻮﻥ ﺳﺎﻫﻞ ﺑﻜﻞ .. ﺣﻴﻨﺘﻘﻢ ﻟﺰﻣﻼﺋﻪ ﺍﻟﻠﻲ ﺭﺍﺣﻮ ﻓﻲ ﺍﻟﻜﻤﻴﻦ .. ﻟﻬﻼﻝ .. ﻟﺪﻣﻮﻉ ﺍﻧﻌﺎﻡ ... ﺣﻴﻨﺘﻘﻢ ﻟﻜﻞ ﺣﺪ ﻻﻗﻰ ﻣﻦ ﻫﺎﻟﻤﺠﺮﻣﻴﻦ ﺯﻱ ﻣﺎﻻﻗﻮﺍ ﺯﻣﻼﺋﻪ ﻭﺍﻟﻨﺎﺱ ﺍﻟﻠﻲ ﻳﺤﺒﻬﻢ ...
***
🍃 ﻣﺮﻭﺍ 3 ﺍﻳﺎﻡ ﺧﻼﻟﻬﻢ ﺍﻟﺤﺴﻦ ﻛﺎﻥ ﻣﻮﺟﻮﺩ ﻓﻲ ﺍﻟﻤﺮﻛﺰ ﻓﻲ ﺍﺟﺘﻤﺎﻋﺎﺕ ﻣﺘﻮﺍﺻﻠﺔ ﻟﻠﺘﺨﻄﻴﻂ ﻟﻌﻤﻠﻴﻪ ﻛﺒﻴﺮﻩ ﻫﻠﺒﻪ ﺍﺷﺒﻪ ﺑﻤﻌﺮﻛﻪ .. ﺍﻟﺤﺴﻦ ﻣﺶ ﻗﺎﺩﺭ ﻳﺮﻗﺪ ﺍﻛﺜﺮﻣﻦ ﺳﺎﻋﻪ ﺍﻭ ﺳﺎﻋﺘﻴﻦ ﻓﻲ ﺍﻟﻴﻮﻡ ﻛﻞ ﺗﻔﻜﻴﺮﻩ ﻓﻲ ﺍﻟﻌﻤﻠﻴﻪ ﺍﻟﺠﺎﻳﻪ ﺍﻟﻠﻲ ﻻﺯﻡ ﻳﺨﻄﻄﻠﻬﺎ ﺑﺪﻗﻪ ﺍﻛﺒﺮ ﻫﻮ ﻭﺍﻟﻀﺒﺎﻁ ﺍﻟﻠﻲ ﻣﻌﺎﻩ ..
ﺍﻟﻴﻮﻡ ﺗﺤﺪﻳﺪﺍ ﻛﺎﻥ ﺍﻟﻌﻘﻴﺪ ﺍﺣﻤﺪ ﺍﻟﺘﻮﻣﻲ ﺟﺎﻱ ﻟﻄﺮﺍﺑﻠﺲ ﻭﺑﻄﺮﻳﻘﻪ ﻟﻠﻤﺮﻛﺰ " ﺟﻬﺎﺯ ﻣﻜﺎﻓﺤﺔ ﺍﻟﻤﺨﺪﺭﺍﺕ ..."
ﺟﺎﺩ ﺍﻟﻠﻪ : ﺍﻟﻀﺎﺑﻂ ﻫﺬﺍ ﺧﻼ ﺍﻛﺒﺮ ﺍﻟﺮﻭﺱ ﻳﺘﺠﻨﺒﻮﺍ ﻳﻤﺸﻮﺍ ﺑﻀﺎﻋﺘﻬﻢ ﻭﻳﻦ ﻣﺎﻫﻮ ﻣﻮﺟﻮﺩ ..
ﺍﻟﺤﺴﻦ : ﺍﺣﻤﺪ ﺍﻟﺘﻮﻣﻲ ( ﺍﻟﻬﺰﻳﻢ ) ﺍﺷﻬﺮ ﻣﻦ ﺍﻟﻨﺎﺭ ﻉ ﻋﻠﻢ ﻭﻭﺟﻮﺩﻩ ﻣﻌﺎﻱ ﻓﻲ ﺍﻟﻌﻤﻠﻴﻪ ﻫﺎﺩﻱ ﻣﻬﻢ ﺟﺪ
ﻃﻖ ﺍﻟﺒﺎﺏ ﺧﺶ ﻭﺍﺣﺪ ﻣﻦ ﺍﻟﻌﻨﺎﺻﺮ : ﺍﻻﻓﻨﺪﻱ ﺍﺣﻤﺪ ﺍﻟﺘﻮﻣﻲ ﻭﺻﻞ ..
ﺟﺎﺩ ﺍﻟﻠﻪ : ﺩﺧﻠﻪ ﻃﻮﻝ ..
ﻃﻠﻊ ﺍﻟﻌﻨﺼﺮ ﻭﺷﻮﻳﻪ ﻭﺧﺶ ﺍﺣﻤﺪ .. ﺃﺩﻯ ﺍﻟﺘﺤﻴﻪ ...
ﺟﺎﺩ ﺍﻟﻠﻪ ﺑﺈﺑﺘﺴﺎﻣﻪ ﻧﺎﺽ ﻭﻣﺪ ﺍﻳﺪﻩ : ﺍﻫﻼ ﺑﺎﻟﻌﻘﻴﺪ ﺍﻟﺘﻮﻣﻲ .
ﺍﺣﻤﺪ ﺳﻠﻢ ﻋﻠﻴﻪ : ﺷﻜﺮﺍ ﻳﺎﻓﻨﺪﻱ ...
ﺍﺣﻤﺪ ﺷﺒﺢ ﻟﻠﺤﺴﻦ : ﺍﻟﺤﺴﻦ ﺍﻟﺼﺎﺩﻕ ...
ﺍﻟﺤﺴﻦ : ﺍﺣﻤﺪ ﺍﻟﺘﻮﻣﻲ .. ﻭﺳﻠﻤﻮﺍ ﻉ ﺑﻌﺾ ...
ﺟﺎﺩ ﺍﻟﻠﻪ ﻳﺸﺒﺤﻠﻬﻢ ﺑﺈﺑﺘﺴﺎﻣﻪ : ﻗﻌﻤﺰﻭﺍ .. ﻗﻌﻤﺰﻭﺍ ..
ﺍﻟﺤﺴﻦ : ﻧﺒﻮﺍ ﻧﺪﺧﻠﻮﻙ ﻃﻮﻝ ﻓﻲ ﺍﻟﺠﻮ ...
ﺟﺎﺩﺍﻟﻠﻪ ﺑﻀﺤﻜﻪ : ﻏﻴﺮ ﺧﻠﻴﻪ ﻳﻮﺻﻞ ..
ﺍﺣﻤﺪ ﺑﺈﺑﺘﺴﺎﻣﻪ : ﺍﻧﻲ ﺟﺎﻱ ﻣﻦ ﻏﺎﺩﻱ ﻟﻬﻨﻲ ﻭﻛﻞ ﺗﻔﻜﻴﺮﻱ ﻓﻲ ﺍﻟﻌﻤﻠﻴﻪ ﺍﻟﺠﺎﻳﻪ ..
ﺍﻟﺤﺴﻦ ﺍﺑﺘﺴﻢ ﻉ ﺟﻨﺐ ...
ﺟﺎﺩﺍﻟﻠﻪ ﺷﺒﺤﻠﻬﻢ ﺍﻟﺰﻭﺯ ﻭﻗﺎﻝ ﺑﻀﺤﻜﻪ : ﺗﻼﻗﻴﺘﻮﺍ ...
***
ﺍﺣﻤﺪ ﺍﻟﺘﻮﻣﻲ ...
: ﺍﻳﻪ ..
ﺳﺮﻣﺪ ﺍﻟﻜﻮﺑﺮﺍ : ﺧﻞ ﻳﺠﻴﺒﻮﺍ ﺍﻟﻠﻲ ﺑﻴﺠﻴﺒﻮﻩ ... ﺍﻟﻤﻬﻢ ﺗﻮﺍ ﺭﻛﺰﻭﻟﻲ ﻓﻲ ﻳﻮﻡ ﺍﻟﺨﻤﻴﺲ ﻣﺎﺗﺨﻠﻮﺍ ﺷﻲ ﻳﺸﺘﺘﻜﻢ ..
: ﺗﻢ ... ﺑﺲ ﻻﺯﻡ ﻧﺎﺧﺪﻭﺍ ﺍﺣﺘﻴﺎﻃﺘﻨﺎ ..
ﺳﺮﻣﺪ ﺍﻟﻜﻮﺑﺮﺍ : ﺍﻛﻴﺪ ﻻﺯﻡ ﺗﺎﺧﺪﻭﺍ ﺍﺣﺘﻴﺎﻃﻜﻢ ﺍﻛﻴﺪ ﻣﻦ ﻏﻴﺮ ﻛﻼﻡ .. ﺧﻠﻴﻠﻲ ﺗﻮﺍ ﻫﺬﺍ ﻉ ﺟﻨﺐ .. ﺑﻨﺖ ﺍﻟﺼﻴﺪ ﺷﻦ ﺻﺎﺭ ﻣﻌﺎﻫﺎ
: ﻣﺎﺷﻴﻪ ﻓﻲ ﺍﻟﻤﻮﺿﻮﻉ ... ﺟﻤﺎﻋﺘﻨﺎ ﻭﺭﺍﻫﺎ ..
ﺳﺮﻣﺪ ﺍﻟﻜﻮﺑﺮﺍ ﻫﺰ ﺭﺍﺳﻪ ﺑﺈﻳﺠﺎﺏ ...
***
ﻗﺘﻠﻚ ﺗﻮﺍ ﺷﻔﺘﻬﻢ ﻳﺨﻮﻓﻮﺍ ..
ﺑﺮﻧﻴﻪ : ﻟﻄﻔﻚ ﻳﺎﺍﺍﺭﺏ ..
ﻋﻠﻴﺎ : ﺑﺎﻟﻚ ﺭﺟﺎﻝ ﺣﺎﻃﻬﻢ ﺍﻟﺤﺴﻦ ..
ﻫﺎﻟﻪ : ﻻﻻ ... ﺍﻭﻝ ﻣﺎﺣﻄﻨﻲ ﻋﻤﻲ ﺳﺎﻟﻢ ﻭﻣﺸﻲ ﻭﺍﻧﻲ ﻧﻔﺘﺢ ﻓﻲ ﺍﻟﺒﺎﺏ ﻗﺪﻣﻮﺍ ﺟﻴﻬﺘﻲ ﻣﻨﺎﻇﺮﻫﻢ ﺗﺨﻮﻑ ..
ﻋﻠﻴﺎ ﺗﺤﺎﻭﻝ ﺗﺘﺼﻞ ﺑﺎﻟﺤﺴﻦ ﺑﺲ ﻣﺎﻳﺮﺩﺵ ..
ﺑﺮﻧﻴﻪ : ﺣﺘﻰ ﻣﺮﻋﻲ ﻭﺣﺴﺎﻥ ﻓﺎﻟﺸﺮﻕ ..
ﻋﻠﻴﺎ : ﺧﻞ ﻧﻜﻠﻢ ﺍﻧﻌﺎﻡ ﻣﺎﺗﺮﻭﺣﺶ ﺗﻮﺍ ..
ﺑﺮﻧﻴﻪ : ﺍﻳﻪ ...
ﻋﻨﺪ ﺍﻧﻌﺎﻡ ﺍﻟﻠﻲ ﻗﺎﻋﺪﻩ ﺗﺨﺪﻡ ﺑﻜﻞ ﺟﻬﺪﻫﺎ ﺑﺶ ﻣﺎﺗﻔﻜﺮﺵ ﻓﻲ ﺷﻲ .. ﻭﻭﻟﺖ ﻛﺌﻴﺒﻪ ﻭﻣﻨﻌﺰﻟﻪ ﻭﻣﺎﺗﺒﻲ ﺗﺨﺎﻟﻂ ﺣﺪ ﻓﻲ ﺍﻟﺨﺪﻣﻪ ﺑﺘﺎﺗﺎ ﻭﻭﺟﻬﻬﺎ ﺩﻳﻤﺎ ﻣﺘﺠﻬﻢ ﻭﻫﻲ ﺍﻷﻧﺴﺎﻧﻪ ﺍﻷﺟﺘﻤﺎﻋﻴﻪ ﺍﻟﻤﺤﺒﻮﺑﻪ ﺍﻟﻠﻲ ﺗﺤﺐ ﺗﻬﺪﺭﺯ ﻭﺗﻀﺤﻚ ... ﺭﻥ ﺗﻠﻴﻔﻮﻧﻬﺎ ﺷﺎﻓﺖ ﺍﺳﻢ ﻋﻠﻴﺎ ﺭﺩﺕ ..
ﺍﻧﻌﺎﻡ : ﻧﻌﻢ ﻋﻠﻴﺎ ...
ﻋﻠﻴﺎ : ﺍﻧﻌﺎﻡ ﺑﺘﺮﻭﺣﻲ ﺗﻮﺍ ..
ﺍﻧﻌﺎﻡ ﻣﻀﻴﻘﻪ ﻋﻴﻮﻧﻬﺎ ﺑﺘﺴﺎﺅﻝ : ﺷﻮﻳﻪ ﻭﺑﻨﺮﻭﺡ ﻋﻼﺵ؟ !!
ﻋﻠﻴﺎ : ﺍﺳﻤﻌﻲ ﻓﻲ ﺳﻴﺎﺭﺓ ﻓﻴﻬﺎ ﺻﻴﺎﻉ .. ﺗﺤﻮﻡ ﺣﻮﺍﻟﻴﻦ ﺍﻟﺤﻮﺵ ﻭﺗﻮﺍ ﺭﻳﻨﺎﻫﻢ ﻭﺍﻗﻔﻴﻦ ﻭﻳﺸﺒﺤﻮﺍ ﻣﻦ ﺍﻟﺒﺎﺏ ..
ﺍﻧﻌﺎﻡ : ﺷﻦ ﻳﺒﻮﺍ ...
ﻋﻠﻴﺎ : ﻣﺶ ﻋﺎﺭﻓﻴﻦ ﻭﻻﻓﺎﻫﻤﻴﻦ ﺷﻲ ...
ﺍﻧﻌﺎﻡ ﺳﻜﺘﺖ ﺷﻮﻳﻪ ﺑﻌﺪﻳﻦ ﻗﺎﻟﺖ : ﻣﺎﻛﻠﻤﺘﻮﺵ ﺍﻟﺤﺴﻦ .
ﻋﻠﻴﺎ : ﻛﻠﻤﺘﻪ ﺍﻛﺜﺮ ﻣﻦ ﻣﺮﺓ ﻣﺎﻳﺮﺩﺵ ...
ﺍﻧﻌﺎﻡ : ﺗﻤﺎﻡ ﺗﻤﺎﻡ ﺗﻮ ﻧﺘﺼﺮﻑ ... ﺻﻜﺮﺕ ﺍﻧﻌﺎﻡ .. ﻗﻌﺪﺕ ﺗﻔﻜﺮ ﻟﻴﻦ ﻭﺻﻠﺖ ﻟﺸﻲ .. ﻧﺎﺿﺖ ﺧﺪﺕ ﺷﻨﻄﺘﻬﺎ ﻭﺧﺪﺕ ﺍﺫﻥ ﻭﻃﻠﻌﺖ ﻣﻦ ﺍﻟﻤﺼﺮﻑ ..
***
ﻣﻘﻌﻤﺰ ﻳﻔﻜﺮ ﻓﻲ ﺍﻟﻜﻼﻡ ﺍﻟﻠﻲ ﺳﻤﻌﻪ ﻣﻦ ﺯﻣﻴﻠﻪ ﺷﺒﺤﻠﻪ ﻫﻠﺒﻪ ..
ﺍﻟﺤﺴﻦ : ﻳﻘﻮﻟﻚ ﺍﻗﻄﻊ ﺍﻟﺮﺍﺱ ﻳﺒﺴﻮﺍ ﺍﻟﻌﺮﻭﻕ ﻭﺣﻨﻲ ﺿﻴﻌﻨﺎ ﻭﻗﺖ ﻫﻠﺒﻪ ﻣﻊ ﺍﻟﻌﺮﻭﻕ .. ﻭﺗﻮﺍ ﺟﻲ ﻭﻗﺖ ﻗﻄﻊ ﺍﻟﺮﺍﺱ ..
ﺍﺣﻤﺪ ﺳﻜﺖ ﺷﻮﻳﻪ ﻭﻗﺎﻝ : ﻫﻮ ﺍﻟﻠﻲ ﺍﻧﺖ ﺧﻄﻄﺘﻠﻪ ﻣﻤﺘﺎﺯ ﺑﺲ ﺍﻧﻲ ﻣﻦ ﺭﺍﻳﻲ ﻻﺯﻡ ﻳﺨﺸﻮﺍ ﻣﻌﺎﻧﺎ ﻭﺣﺪﻩ ﻣﻦ ﺍﻷﻣﻦ ﺍﻟﻌﺎﻡ .. ﻋﻤﻠﻴﺔ ﺯﻱ ﻫﺎﺩﻱ ﻣﻤﻜﻦ ﺗﺘﺠﺎﻭﺯ 24 ﺳﺎﻋﺎﺕ ﻻﻥ ﺣﺘﻤﺎ ﺣﺘﺼﻴﺮ ﻣﻮﺍﺟﻬﺎﺕ ..
ﺍﻟﺤﺴﻦ : ﺗﻮﻧﺸﻮﻑ ﺍﻟﻮﺿﻊ ....
ﺍﺣﻤﺪ : ﻣﻌﺎﺵ ﻣﺎﺯﺍﻝ ﺷﻲ ..
ﺍﻟﺤﺴﻦ ﻫﺰ ﺭﺍﺳﻪ ﺑﺈﻳﺠﺎﺏ ...
...
ﻧﺰﻟﺖ ﻣﻦ ﺳﻴﺎﺭﺗﻬﺎ ﺳﻜﺮﺕ ﺍﻟﺒﺎﺏ ﺭﻛﺒﺖ ﻣﻦ ﺍﻟﺪﺭﻭﺝ ﺑﺴﺮﻋﻪ ﺧﺸﺖ ﺩﺍﺧﻞ ﺑﻌﺪ ﺣﻮﻟﺖ ﻧﻈﺮﺍﺗﻬﺎ ...
...
ﺍﺣﻤﺪ : ﺗﻤﺎﻡ ﺑﻌﺪ ﺍﻟﻤﻐﺮﺏ ﻣﻮﻟﻲ ﺍﻥ ﺷﺎﺀ ﺍﻟﻠﻪ ...
ﺍﻟﺤﺴﻦ : ﻓﻲ ﺍﻷﻧﺘﻈﺎﺭ ...
ﺍﺣﻤﺪ ﺗﻠﻔﺖ ﻟﻠﺒﺎﺏ ﻓﺘﺤﻪ ﻭﻃﻠﻊ ﻭﺳﻜﺮﻩ ﻭﺭﺍﻩ ..
...
ﻫﻲ ﻣﺎﺷﻴﻪ ﺭﻥ ﺗﻠﻴﻔﻮﻧﻬﺎ ...
ﺍﻧﻌﺎﻡ : ﺍﻳﻮﻩ ﻋﻠﻴﺎ ...
ﻋﻠﻴﺎ ﺑﻬﻠﻊ : ﻧﻘﺰﻭﺍ ﻣﻦ ﻓﻮﻕ ﺍﻟﺒﺎﺏ ﻳﺎﺍﻧﻌﺎﻡ ..
ﺍﻧﻌﺎﻡ : ﺷﻨﻮﻭﻭﻭﻭ .... ﻉ ﻃﻮﻝ ﺑﺪﺕ ﺗﺠﺮﻱ ... ﻭﻗﻔﺖ ﺿﺎﺑﻂ ..
ﺍﻧﻌﺎﻡ : ﻣﻜﺘﺐ ﺍﻟﺤﺴﻦ ﺍﻟﺼﺎﺩﻕ ﻭﻳﻦ ..
ﺍﻟﻌﻨﺼﺮ : ﺍﺧﺮ ﻣﻜﺘﺐ ﻓﻲ ﺍﺧﺮ ﺍﻟﻤﻤﺮ ...
ﺍﻧﻌﺎﻡ ﻃﻮﻝ ﻣﺸﺖ ﺗﺠﺮﻱ ﺷﺒﺤﺖ ﻟﺘﻠﻴﻔﻮﻧﻬﺎ ﺗﺸﻮﻑ ﻓﻌﻠﻴﺎ ﻗﺎﻋﺪﻩ ﻉ ﺍﻟﺨﻂ ﻭﻻ ﻻ .. ﻭﻓﺠﺎﺃﺓ .. ﺍﻧﺨﺒﻄﺖ ﺑﺤﺎﺟﻪ ﺧﻠﺖ ﺗﻠﻴﻔﻮﻧﻬﺎ ﻳﺘﻨﻄﺮ ﻣﻨﻬﺎ ﺗﺒﻌﺎﺗﻪ ﺑﻌﻴﻮﻧﻬﺎ ﻟﻘﺎﺗﻪ ﻣﺘﻔﺘﺮﺵ ..
" ﺍﺳﻒ ﺟﺪﺍ ..."
ﺷﺒﺤﺘﻠﻪ ﺷﻮﻳﻪ ﺑﻌﺪﻳﻦ ﻣﺸﺖ ﺗﺠﺮﻱ .. ﻭﻫﻮ ﻣﻌﺎﻫﺎ ﺑﻌﻴﻮﻧﻪ .. ﻟﻘﻲ ﺭﻭﺣﻪ ﻻﺣﻘﻬﺎ ﻻ ﺇﺭﺍﺩﻳﺎ ..
ﻫﻲ ﻭﺻﻠﺖ ﻓﻲ ﻣﻜﺘﺒﻪ ﻓﺘﺤﺖ ﻋﻠﻴﻪ ﺍﻟﺒﺎﺏ ..
ﺍﻟﺤﺴﻦ ﺍﺗﻔﺎﺟﺎ : ﺷﻦ ﻓﻲ ...
ﺍﻧﻌﺎﻡ : ﻓﻲ ﻭﺣﺪﻳﻦ ﺗﻬﺠﻤﻮﺍ ﻉ ﺍﻟﺤﻮﺵ ..
ﺍﻟﺤﺴﻦ ﻃﻮﻝ ﺑﺪﻭﻥ ﻣﺎﻳﺮﺩ ﻃﻠﻊ ﻭﻓﻲ ﺍﻳﺪﻩ ﻣﺴﺪﺳﻪ ﺍﻟﻠﻲ ﺣﻄﻪ ﻉ ﺧﺼﺮﻩ ..
ﺍﺣﻤﺪ : ﺍﻃﻠﻊ ﺍﻧﺖ ﻭﻳﺎﻫﺎ ﻭﺣﻨﻠﺤﻘﻮﻛﻢ ﻃﻮﻝ ...
ﺍﻟﺤﺴﻦ ﻫﺰ ﺭﺍﺳﻪ ﺑﺈﻳﺠﺎﺏ ﻭﻣﺸﻲ ﻃﻮﻝ ﻭﻣﻌﺎﻩ ﺍﻧﻌﺎﻡ ...
ﻓﻲ ﺍﻟﺤﻮﺵ ..
ﺍﻟﻨﺴﺎﻭﻳﻦ ﻛﻠﻬﻢ ﻓﻲ ﺩﺍﺭﺍﻟﻤﻌﻴﺸﻪ ﻣﺴﻜﺮﻳﻦ ﻋﻠﻴﻬﻢ ﺍﻟﺒﺎﺏ ﻭﺣﺎﻃﻴﻦ ﻋﻠﻴﻪ ﻃﺎﻭﻟﻪ ﻳﺴﻤﻌﻮﺍ ﻓﻲ ﺍﺻﻮﺍﺕ ﺗﻘﺮﺑﻴﻊ ﻓﻲ ﺍﻟﺤﻮﺵ ﻭﻣﻴﺘﻴﻦ ﻣﻦ ﺍﻟﺮﻋﺐ .. ﻋﻠﻴﺎ ﺣﺎﺿﻨﻪ ﺍﻟﺼﻐﺎﺭ .. ﻭﻫﺎﻟﻪ ﻣﻘﻌﻤﺰﺓ ﻭﺷﺎﺩﻩ ﺑﻄﻨﻬﺎ ﻭﺗﻘﺮﺍ ﻓﻲ ﺃﺩﻋﻴﻪ ... ﻭﺑﺮﻧﻴﻪ ﺷﺎﺩﻩ ﻋﺼﺎ ﻛﺒﻴﺮﺓ ...
ﺑﺎﺏ ﺍﻟﺪﺍﺭ ﺍﻟﻠﻲ ﻫﻤﺎ ﻓﻴﻬﺎ ﺑﺪﻱ ﻳﺘﻘﺮﺑﻊ .. ﻋﻠﻴﺎ ﺣﻄﺖ ﺍﻟﺼﻐﺎﺭ ﻭﺭﺍ ﻇﻬﺮﻫﺎ ..
ﺑﺮﻧﻴﻪ : ﺗﻌﺎﻟﻮﺍ ﻭﺭﺍﻱ .. ﻭﻗﻔﻮﺍ ﻭﺭﺍﻫﺎ ﻋﻴﻮﻧﻬﻢ ﻉ ﺍﻟﺒﺎﺏ ﺍﻟﻠﻲ ﻳﻨﺪﻑ ﺑﻘﻮﺓ ... ﺩﻓﻪ .. ﺍﺗﻨﻴﻦ ﺗﻼﺗﻪ .. ﺍﻟﻄﺎﻭﻟﻪ ﺗﺤﺮﻛﺖ ﻫﻠﺒﻪ ... ﺍﺧﺮ ﺩﻓﻪ ﻛﺎﻧﺖ ﻗﻮﻳﻪ ﻭﺧﺸﻮﺍ .. ﻛﺎﻧﻮﺍ ﻣﻨﺎﻇﺮ ﻣﻘﺮﻓﻪ ﺍﻟﻐﺮﻳﺐ ﺍﻧﻬﻢ ﺣﺎﻣﻠﻴﻦ ﺳﻼﺡ ﺍﺑﻴﺾ ﻭﻭﺍﺿﺢ ﻋﻠﻴﻬﻢ ﻭﺍﺧﺪﻳﻦ ﺣﺎﺟﻪ .. ﻋﻴﻮﻧﻬﻢ ﻛﺎﻧﺖ ﻉ ﺍﻟﺼﻐﺎﺭ ﻋﻠﻴﺎ ﺍﻟﻠﻲ ﻛﺎﻧﺖ ﺗﺮﺟﻒ ﻣﻦ ﺍﻟﺨﻮﻑ ﺍﺩﺱ ﻓﻲ ﺍﻟﺼﻐﺎﺭ ﻭﺭﺍﻫﺎ ...
ﻗﺪﻡ ﻭﺍﺣﺪ ﻣﻨﻬﻢ ﺧﺒﻄﺎﺗﻪ ﺑﺮﻧﻴﻪ ﺑﺎﻟﻌﺼﺎ ﻟﻴﻦ ﻃﺎﺡ ﺍﻟﺘﺎﻧﻴﻴﻦ ﻭﺍﺣﺪ ﺗﻮﺟﻪ ﻟﻌﻠﻴﺎ ﻭﺍﺿﺢ ﺍﻧﻬﻢ ﻳﺒﻮﺍ ﺍﻟﺼﻐﺎﺭ ﺑﺲ ﺑﺮﻧﻴﺔ ﻛﺎﻧﺖ ﺗﺤﺎﻣﻲ ﻋﻠﻴﻬﺎ ﻭﺗﺨﻮﻑ ﻓﻴﻬﻢ ﻭﻫﻤﺎ ﻭﺍﺿﺢ ﻛﺎﻧﻮﺍ ﻳﺘﺤﺎﺷﻮﺍ ﻓﺒﺮﻧﻴﻪ ..
ﻭﺍﺣﺪ ﻣﻨﻬﻢ ﺍﺷﺮ ﻟﻮﺍﺣﺪ ﺗﺎﻧﻲ ﺑﻌﻴﻮﻧﻪ .. ﺧﺎﻭﺕ ﺑﺮﻧﻴﻪ ﻭﺧﺪﻱ ﺍﻟﻌﺼﺎ .. ﻭﺑﺮﻧﻴﻪ ﺣﺎﻭﻃﺖ ﻛﻨﺎﻧﻴﻬﺎ ﺑﺈﻳﺪﻳﻬﺎ ﺑﺶ ﺗﺤﻤﻴﻬﻢ ﺭﻏﻢ ﺍﻧﻬﺎ ﻛﺎﻧﺖ ﺧﺎﻳﻔﻪ ﻫﻠﺒﻪ ..
ﻫﻤﺎ ﺣﺎﻭﻃﻮﻫﻢ .. ﻭﺍﺣﺪ ﺟﺒﺪ ﻫﺎﻟﻪ ﺑﻘﻮﺓ ﻃﻴﺤﻬﺎ ﻭﺭﺍﻩ ..
ﻋﻴﻄﺖ ﻋﻠﻴﺎ .. ﻭﺑﺮﻧﻴﻪ ﺗﺒﻲ ﺗﺘﻼﺣﻘﻬﺎ ﺩﻓﻬﺎ ﺣﺘﻰ ﻫﻲ ﻭﻗﺮﺑﻮﺍ ﻣﻦ ﺍﻟﺼﻐﺎﺭ ..
ﻋﻠﻴﺎ ﺗﺸﺒﺤﻠﻬﻢ ﻭﺗﺴﻤﻊ ﻓﻲ ﻋﻴﺎﻁ ﺍﻟﺒﻨﺎﺕ ﻭﺧﻮﻫﻢ ﻭﺗﺬﻛﺮ ﻓﻲ ﻧﻬﻠﻪ .. ﻓﻲ ﻟﺤﻈﻪ ﺿﺮﺑﺖ ﺍﻟﻠﻲ ﻗﺪﺍﻣﻬﺎ ﺿﺮﺑﻪ ﺑﺮﺟﻠﻬﺎ ﺿﺮﺑﻪ ﺧﻼﺗﻪ ﻳﻨﻘﺰ ﻓﻲ ﻣﻜﺎﻧﻪ ﻛﻴﻒ ﺑﻴﺠﻴﻬﺎ ﺍﻟﺘﺎﻧﻲ ﺗﺠﻴﻪ ﺿﺮﺑﻪ ﻣﻦ ﺑﺮﻧﻴﻪ ﺍﻟﻠﻲ ﺧﺪﺕ ﺍﻟﻌﺼﺎ ﻣﺮﺓ ﺗﺎﻧﻴﻪ ﻭﻏﺎﻓﻼﺗﻪ .. ﻋﻠﻴﺎ ﻃﻮﻝ ﺟﺒﺪﺕ ﺍﻟﺼﻐﺎﺭ ﻃﻠﻌﺖ ﺑﻴﻬﻢ ﻣﻦ ﺍﻟﺪﺍﺭ .. ﻭﻫﻤﺎ ﻳﺠﺮﻭﺍ ﻃﺎﺡ ﺍﻟﻮﻟﺪ ﻋﻠﻴﺎ ﻗﺎﻣﺘﻪ ﺣﺴﺖ ﺑﻮﺟﻊ ﻗﻮﻱ ﻓﻲ ﻇﻬﺮﻫﺎ ﺑﺲ ﻣﺎﺩﻭﺭﺗﺶ .. ﻭﻣﺸﺖ ﺗﺠﺮﻱ ..
ﻭﺍﻟﻤﺠﺎﺭﻡ ﺍﺳﺘﺎﻗﻀﻮﺍ ﻓﻠﺤﻈﻪ ﺩﻑ ﻭﺍﺣﺪ ﻣﻨﻬﻢ ﺑﺮﻧﻴﻪ ﺟﺖ ﻣﻘﻌﻤﺰﺓ ... ﻭﻃﻠﻌﻮﺍ ﺍﻟﺰﻭﺯ ﻳﺠﺮﻭﺍ ﺧﺶ ﻭﺍﺣﺪ ﻣﻦ ﺑﺮﺍ ...
: ﻛﺒﺴﺴﺴﻪ ...
ﻣﻌﺎﺵ ﻋﺮﻓﻮﺍ ﺷﻦ ﻳﺪﻳﺮﻭﺍ ﺯﻭﺯ ﻃﻠﻌﻮﺍ ﻟﻠﺠﻨﺎﻥ ﻭﺍﺣﺪ ﺭﻛﺐ ﻓﻮﻕ ...
ﻓﻬﺎﻟﻠﺤﻈﻪ ﺧﺶ ﺍﻟﺤﺴﻦ ﻭﻣﻌﺎﻩ ﺍﻧﻌﺎﻡ ﻭﻭﺭﺍﻫﻢ ﻃﻮﻝ ﻋﻨﺎﺻﺮ ﺟﺎﻱ ﻣﻌﺎﻫﻢ ﺍﺣﻤﺪ ﺧﺸﻮﺍ ﻟﻠﺤﻮﺵ .. ﺍﻧﺘﺸﺮﻭﺍ ﺣﺘﻲ ﺑﺮﺍ ..
ﺧﺸﺖ ﺍﻧﻌﺎﻡ ﻣﻊ ﺍﻟﺤﺴﻦ ﺳﻤﻌﻮﺍ ﺻﻮﺕ ﺑﺮﻧﻴﻪ ﺗﺪﻋﻲ ﻭﺍﻟﺼﻮﺕ ﻭﺍﺿﺢ ﻣﻨﻴﻦ ﺟﺎﻱ ... ﻃﻮﻝ ﻣﺸﻮﺍ ﻳﺠﺮﻭﺍ ﻟﻠﺪﺍﺭ .. ﻟﻘﻮﺍ ﺑﺮﻧﻴﻪ ﻣﻘﻌﻤﺰﺓ ﻭﺍﻟﺒﺎﻳﻦ ﺍﻧﻬﺎ ﺗﺘﻮﺟﻊ ﻭﻭﺍﺣﺪ ﻃﺎﻳﺢ ﻭﻫﺎﻟﻪ ﻣﻐﻤﻰ ﻋﻠﻴﻬﺎ ﻭﺗﻨﺰﻑ ..
ﺍﻧﻌﺎﻡ ﺑﺬﻋﺮ : ﻫﺎﺍﺍﻟﻪ ﻫﺎﺍﺍﺍﻟﻪ ﺣﺎﻣﻞ ...
ﺍﻟﺤﺴﻦ : ﻛﻠﻤﻲ ﺍﻹﺳﻌﺎﻑ ﺑﺴﺮﻋﻪ .. ﺍﻟﺤﺴﻦ ﻓﻘﺪ ﻋﻠﻴﺎ ﻭﺍﻟﺼﻐﺎﺭ .. ﺣﻨﺎﺍﺍﻱ .. ﻋﻠﻴﺎﺍﺍﺍ ..
ﺍﺷﺮﺗﻠﻪ ﺑﺮﻧﻴﻪ ﺑﺼﺒﻌﻬﺎ ﺍﻧﻬﺎ ﻓﻮﻕ ..️☝
ﺍﻟﺤﺴﻦ ﻃﻮﻝ ﻣﺸﻲ ﻳﺠﺮﻱ ﺭﻛﺐ ﻓﻮﻕ ﻓﺘﺢ ﺍﻟﺸﻘﻪ ﻭﺧﺶ : ﻋﻠﻴﺎﺍﺍﺍﺍ ...
ﻋﻠﻴﺎ ﺍﻟﻠﻲ ﻛﺎﻧﺖ ﺣﺎﺑﺴﻪ ﺭﻭﺣﻬﺎ ﻫﻲ ﻭﺍﻟﺼﻐﺎﺭ ﻓﻲ ﺩﺍﺭ ﻧﻮﻡ ﺳﻤﻌﺖ ﺻﻮﺕ ﺍﻟﺤﺴﻦ .. ﻃﻮﻝ ﻧﺎﺿﺖ ﻓﺘﺤﺖ ﺍﻟﺒﺎﺏ ﻭﻃﻠﻌﺖ .. ﻟﻘﺎﺗﻪ ﻗﺪﺍﻣﻬﺎ ﺣﻀﻨﺎﺗﻪ ﻃﻮﻝ ﻭﻫﻮ ﺣﻀﻨﻬﺎ ﺑﻘﻮﺓ ... ﻭﻳﺸﺒﺢ ﻟﻠﺼﻐﺎﺭ ﻭﺭﺍﻫﺎ ﺑﻌﺪ ﻋﻠﻴﺎ ﻭﻫﻲ ﻓﺤﻀﻨﻪ ﻭﻗﺮﺏ ﺍﻟﺼﻐﺎﺭ ﻟﻴﻪ ..
ﺍﻟﺤﺴﻦ : ﻣﺎﺗﺨﺎﻓﻮﺵ ﺧﻼﺹ ﻣﻌﺎﺵ ﻓﻲ ﺣﺪ ... ﺧﻠﻴﻜﻢ ﻫﻨﻲ ﺷﻮﻳﻪ ﻭﺟﺎﻱ ﺑﻨﺸﻮﻑ ﺷﻦ ﺻﺎﺭ ﻟﻮﻃﺎ ..
ﺍﻟﺤﺴﻦ ﻃﻠﻊ ﻭﺑﻤﺠﺮﺩ ﻣﺎﻃﻠﻊ ﻋﻠﻴﺎ ﺧﺎﻓﺖ ...
ﺍﻭﻝ ﻣﺎﻃﻠﻊ ﺍﻟﺤﺴﻦ ﺳﻜﺮ ﺍﻟﺒﺎﺏ ﻭﻧﺰﻝ ﻭﺻﻞ ﻓﻲ ﻣﺴﺘﺮﺍﺡ ﺑﻴﻦ ﺍﻟﺪﺭﻭﺝ ﺷﺎﻑ ﺍﺗﺮ ﺩﻡ ﺍﺳﺘﻐﺮﺏ ﺗﺒﻌﻪ ﻟﻘﺎﻩ ﻭﺍﺻﻞ ﻓﻮﻕ ... ﻭﻻ ﺭﻛﺐ ﻳﺘﺒﻊ ﻓﻲ ﺍﻷﺛﺮ ... ﻓﺘﺤﺖ ﻋﻠﻴﺎ ﺍﻟﺒﺎﺏ ..
ﺍﻟﺤﺴﻦ ﺭﻛﺰ ﻓﻴﻬﺎ ﻓﺘﺢ ﻋﻴﻮﻧﻪ ﻉ ﻭﺳﻌﻬﻢ : ﻋﻠﻴﺎ .. ﺍﻧﺘﻲ .. ﺗﻨﺰﻓﻲ ..
ﻋﻠﻴﺎ ﻣﻦ ﺣﺮﺍﺭﺓ ﺍﻟﻤﻮﻗﻒ ﻭﺭﻫﺒﺘﻬﺎ ﻭﺍﻟﺨﻮﻑ ﺍﻟﻠﻲ ﻛﺎﻥ ﻣﺴﻴﻄﺮ ﻋﻠﻴﻬﺎ ﻣﺎﺭﻛﺰﺗﺶ ﻉ ﺭﻭﺣﻬﺎ ﺷﺒﺤﺖ ﻟﻮﻃﺎ ﻟﻘﺖ ﺭﻭﺣﻬﺎ ﺗﻨﺰﻑ ﻓﻌﻼ ﺭﻛﺒﻠﻬﺎ ﺍﻟﺤﺴﻦ ﻃﻮﻝ ﻃﻠﻌﻬﺎ ﻭﺳﻜﺮ ﺑﺎﺏ ﺍﻟﺸﻘﻪ ﺑﺎﻟﻤﻔﺘﺎﺡ .. ﺟﺎﻱ ﺑﻴﻘﻴﻤﻬﺎ ﻣﺎﺧﻠﺘﺎﺵ ..
ﻋﻠﻴﺎ ﻭﺩﻣﻮﻋﻬﺎ ﻳﻨﺰﻟﻮﺍ : ﺩﻡ ﻧﺠﺎﺳﻪ ﻣﺎﺗﻤﺴﻨﻴﺶ ..
ﺍﻟﺤﺴﻦ ﻣﺎﺑﺎﺵ ﻳﻌﺪﻝ ﺟﺎﻱ ﺑﻴﻘﻴﻤﻬﺎ ..
ﻋﻠﻴﺎ ﺑﻌﻴﺎﻁ : ﻣﺎﺗﻤﺴﻨﻴﻴﻴﺶ ..
ﺍﻟﺤﺴﻦ ﺑﺮﻏﻢ ﺻﺪﻣﺘﻪ ﻣﻦ ﺭﺩﺕ ﻓﻌﻠﻬﺎ ﻟﻜﻦ ﺳﺎﻳﺮﻫﺎ ﻧﺰﻟﺖ ﻭﻫﻮ ﻳﻨﺰﻝ ﻣﻌﺎﻫﺎ ﻭﻣﺮﻛﺰ ﻋﻠﻴﻬﺎ ﻟﻴﻦ ﻭﺻﻠﻮﺍ ﻟﻮﻃﺎ ..
ﺍﻟﺤﺴﻦ ﺑﺘﺮﺟﻲ :. ﻋﻠﻴﺎ ...
ﻋﻠﻴﺎ : ﺍﺻﺼﺼﺺ ﻓﻨﺼﺖ ﻋﻴﻮﻧﻬﺎ ﻟﻤﺎ ﺷﺎﻓﺖ ﻭﺍﺣﺪ ﻃﻠﻊ ﻣﻦ ﻭﺭﺍ ﺍﻟﺤﺴﻦ .. ﻋﻠﻴﺎ ﺑﺪﻭﻥ ﺷﻌﻮﺭ ﺑﺪﻭﻥ ﻭﻋﻲ ﻣﻨﻬﺎ ﺟﺒﺪﺕ ﺍﻟﺤﺴﻦ ﺑﻘﻮﺓ ﻭﺟﺖ ﻗﺪﺍﻣﻪ ...
ﺍﻟﺤﺴﻦ ﺍﻧﺼﺪﻡ ﻃﻮﻝ ﺭﻓﻊ ﺳﻼﺣﻪ ﻭﺻﻮﺏ ﻋﻠﻴﻪ ﻃﺎﺡ ...
ﺍﻟﺤﺴﻦ ﺣﻀﻨﻬﺎ : ﻋﻠﻴﺎ ... ﺣﺲ ﺑﺸﻲ ﻉ ﺍﻳﺪﻩ ﺍﻟﻠﻲ ﻟﻔﻬﺎ ﻉ ﺧﺼﺮﻫﺎ ﻟﻤﺎﺷﺎﻓﻪ ﻟﻘﺎﻩ ﺩﻡ .. ﻋﻠﻴﺎ ﺷﺪﺕ ﺍﻳﺪﻩ ﺑﻘﻮﺓ ﺑﻌﺪﻳﻦ ﺍﺭﺗﺨﺖ ﻭﻓﻘﺪﺕ ﺍﻟﻮﻋﻲ ﺑﻴﻦ ﺍﻳﺪﻳﻪ ...
.... ﻳﺘﺒﻊ ...
