#الحسن(الوطن عشق رجاله)
ﺍﻟﺠﺰﺀ ﺍﻟﺜﺎﻧﻲ ﻭﺍﻟﺨﻤﺴﻴﻦ 💔
للكاتبة GomanFared
ﻣﺤﻄﻮﻁ ﻉ ﺍﻟﺒﺎﺭﻳﻼ ﻭﻣﻐﻄﻲ ﻛﻠﻪ ﺩﺧﻠﻮﻩ ﻟﺴﻴﺎﺭﺓ ﺍﻹﺳﻌﺎﻑ ﺳﻜﺮﻭﻫﺎ ﻭﺭﻛﺒﻮﺍ ﻭﻣﺸﻮﺍ ....
ﻛﺎﻥ ﻭﺍﻗﻒ ﻗﺪﺍﻡ ﺍﻟﺴﻴﺎﺭﺓ ﺣﺎﺳﺲ ﺑﺨﻨﻘﺔ ... ﺑﺮﻏﻢ ﻧﺠﺎﺡ ﺍﻟﻌﻤﻠﻴﻪ .. ﻟﻜﻦ ﻓﻘﺪﺍﻧﻪ ﻟﻠﻔﻬﺪ ﻣﺎﺧﻼﺷﻲ ﻳﺤﺲ ﺑﻄﻌﻢ ﻫﺎﻟﻨﺠﺎﺡ ﺍﺑﺪﺍ .. ﺍﻧﺤﻄﺖ ﺍﻳﺪ ﻉ ﻛﺘﻔﻪ ..
ﺍﺣﻤﺪ ﺑﺄﻟﻢ : ﻣﻘﺪﺭﻟﻪ ﻳﻤﻮﺕ ﺷﻬﻴﺪ ... ﺍﺷﺮﻑ ﻣﻮﺗﻪ ..
ﺍﻟﺤﺴﻦ : ﻟﻮ ﻛﻨﺖ ﺍﺳﺮﻉ ﺷﻮﻱ ... ﻭﺳﻜﺖ ...
ﺍﺣﻤﺪ : ﻣﻘﺪﺭ ﻣﻘﺪﺭ ﻳﺎﻟﺤﺴﻦ ﻭﺍﻗﺪﺍﺭ ﺍﻟﻠﻪ ﻻﺑﺪ ﺍﻧﻬﺎ ﺗﺼﻴﺮ ..
ﺍﻟﺤﺴﻦ ﺷﺒﺤﻠﻪ : ﺗﻌﺮﻑ ﺷﻦ ﺍﻷﺻﻌﺐ ﻣﻦ ﻫﺬﺍ ﻛﻠﻪ ... ﺍﻧﻚ ﺗﺒﻠﻎ ﺍﺣﺒﺎﺑﻪ ﺍﻟﻠﻲ ﻫﻤﺎ ﺍﺣﺒﺎﺑﻚ ﺑﺄﻧﻜﻢ ﻓﻘﺪﺗﻮﻩ ﻟﻸﺑﺪ ..
ﺍﺣﻤﺪ ﺳﻜﺖ ...
ﺍﻟﺤﺴﻦ ﺗﻨﻬﺪ : ﺑﻨﺮﻭﺡ ...
ﺍﺣﻤﺪ ﻃﺒﻄﺐ ﻉ ﻛﺘﻔﻪ : ﺭﻭﺡ ﻭﻣﺎﺗﻔﻜﺮ ﻓﻲ ﺷﻲ ..
ﺍﻟﺤﺴﻦ ﻣﺸﻲ ﻭﻫﻮ ﺣﺎﺱ ﺑﺤﺰﻥ ﺷﺪﻳﺪ ﻣﺎﺣﺴﺎﺵ ﻗﺒﻞ ﺑﻜﻞ ﺭﻛﺐ ﺍﻟﺴﻴﺎﺭﺓ ﻭﺗﺤﺮﻙ ﻭﻫﻮ ﻣﺶ ﻋﺎﺭﻑ ﺷﻦ ﻳﺪﻳﺮ ... ﻣﺎﺯﺍﻝ ﻭﺟﻊ ﻫﻼﻝ ﻣﺎﺑﺮﺍﺵ ... ﻣﺎﺯﺍﻟﺖ ﺍﺛﺎﺭ ﺩﻣﻮﻉ ﺍﻧﻌﺎﻡ ﻋﻠﻴﻪ ﻭﺍﺿﺤﻪ ﻉ ﻭﺟﻬﻬﺎ ﻭﻫﺬﺍ ﻗﺎﻫﺮﻩ .. ﻛﻴﻒ ﺑﻴﺘﺤﻤﻞ ﺗﻮﺍ ﻳﺸﻮﻑ ﻧﻔﺲ ﺍﻟﺸﻲ ﻓﻲ ﺍﺧﺘﻪ ﺍﻟﺼﻐﻴﺮﻩ ﺍﻟﻘﺮﻳﺒﻪ ﻟﻘﻠﺒﻪ ﻣﻦ ﺑﻴﻦ ﺧﻮﺗﻪ ﻛﻠﻬﻢ ... ﻭﻗﻒ ﻟﻤﺎ ﺟﺖ ﻋﻴﻨﻪ ﻉ ﺍﻛﺜﺮ ﻣﻜﺎﻥ ﻳﺮﺗﺎﺡ ﻓﻴﻪ ﺍﻟﺒﻨﻲ ﺁﺩﻡ ﺍﻟﻤﺆﻣﻦ ... ﻧﺰﻝ .. ﺗﻮﺟﻬﻠﻪ .. ﺣﻮﻝ ﺍﻟﺤﻮﺍﻳﺞ ﺍﻟﻠﻲ ﻛﺎﻥ ﻻﺑﺴﻬﻢ ﻭﻟﺒﺲ ﻏﻴﺮﻫﻢ ... ﻭﺗﻮﺟﻪ ﻟﻤﻜﺎﻥ ﺍﻟﻮﺿﻮﺀ .. ﻭﺧﺶ ﺩﺍﺧﻞ ﻣﺠﺮﺩ ﺭﺟﻠﻪ ﻋﻔﺴﺖ ﻓﻲ ﺍﻟﻤﻜﺎﻥ ﺣﺲ ﺑﺮﺍﺣﻪ ﺟﺬﺑﺎﺗﻪ ﺑﻘﻮﺓ ﺩﺍﺧﻞ ﺻﻠﻰ ﻭﺩﻋﻲ ﻟﺮﺏ ﻳﻌﻄﻴﻪ ﻗﻮﺓ ﻭﺻﺒﺮ ﻭﻳﻨﺼﺮﻩ ﻉ ﺃﻋﺪﺍﺋﻪ ﻭﺍﻋﺪﺍﺀ ﺍﻟﺒﻼﺩ ﺍﻟﻠﻲ ﻳﻌﺸﻘﻬﺎ .... ﻗﺮﻱ ﻗﺮﺁﻥ ﻭﻛﺎﻥ ﻳﺤﺲ ﺑﺎﻟﻘﻮﺓ ﻭﺍﻟﺮﺍﺣﻪ ... ﻭﻛﺄﻥ ﺭﺑﻲ ﺳﺒﺤﺎﻧﻪ ﻣﺴﺢ ﻉ ﻗﻠﺒﻪ ﺑﻴﺪﻩ ...
💓 ﻣﺎﻳﻮﻗﻔﺶ ﺣﺪ ﻉ ﺑﺎﺏ ﺭﺑﻲ ﻭﻳﺮﺩﻩ ... ﻳﺪﺧﻠﻪ ﻭﻣﺴﺘﺤﻴﻞ ﻳﺨﻠﻴﻪ ﻳﻄﻠﻊ ﺯﻱ ﻣﺎﺧﺶ 💖
***
ﺍﺑﺘﺴﺎﻡ ﺍﺑﺘﺴﺎﻡ ..
ﻧﺎﺿﺖ ﻣﺨﻠﻮﻋﻪ : ﺷﻦ ﻓﻲ ...
ﺟﻲ ﻣﻘﺎﺑﻠﻬﺎ ﻭﺣﻂ ﺍﻟﺴﻤﺎﻋﻪ ﻓﻲ ﻭﺫﻧﻬﺎ ..
ﻓﻲ ﻣﻜﺘﺐ ﻋﺒﺪﺍﻟﻘﺪﻭﺱ ...
ﻋﺒﺪﺍﻟﻘﺪﻭﺱ : ﻫﺎﺩﻱ ﻃﺎﻣﻪ ﻛﺒﻴﺮﻩ ...... ﺍﻟﻜﻮﻣﺎﻧﺪﺍ ﺧﻴﺮﻩ ...!!!
. ﻣﺼﻴﺒﻪ .....!!!! ﻭﺍﻟﻜﻮﺑﺮﺍ ﺷﻦ ﺩﺍﺭ ﻟﻤﺎ ﻋﺮﻑ ﺑﻤﻮﺕ ﺍﻟﻜﻮﻣﺎﻧﺪﺍ .......
ﻣﻌﺮﻭﻑ .... ﺗﻢ ﺗﻢ ........ ﺻﻜﺮ ...
ﻃﻠﻊ ﻋﺒﺪ ﺍﻟﻘﺪﻭﺱ ﻣﻦ ﺍﻟﻤﻜﺘﺐ ..
ﻋﻨﺪ ﺍﺑﺘﺴﺎﻡ ﻭﺑﻼﻝ ..
ﺍﺑﺘﺴﺎﻡ ﺑﻔﺮﺣﻪ : ﺧﺮﺑﻮﻫﺎ ﻋﻠﻴﻬﻢ
ﺑﻼﻝ ﺑﻀﺤﻜﻪ : ﻭﻛﺒﻴﺮﻫﻢ ﻓﻄﺲ ..
ﺍﺑﺘﺴﺎﻡ ﺑﻀﺤﻜﻪ ﻭﺣﻤﺎﺱ : ﺍﻧﻲ ﻭﺍﻧﺖ ﻟﻴﻨﺎ ﻳﺪ ﻓﻲ ﻋﻤﻠﻴﻪ ﻛﺒﻴﺮﻩ ﺯﻱ ﻫﺎﺩﻱ ..
ﺑﻼﻝ ﺑﺤﺐ : ﻓﺮﺣﺎﻧﻪ ..
ﺍﺑﺘﺴﺎﻡ ﺑﻔﺮﺡ : ﻫﻠﺐ ....
ﻣﺎﺍﻧﺘﺒﻬﺘﺶ ﻟﻘﺮﺑﻬﺎ ﺍﻟﺸﺪﻳﺪ ﻣﻨﻪ .. ﻭﻫﻮ ﻫﺎﻟﻘﺮﺏ ﻫﺬﺍ ﻓﺮﺻﻪ ﻭﻻﺯﻡ ﻳﻐﻨﻤﻬﺎ ... ﻫﻲ ﻣﺎﻗﺎﻭﻣﺘﺶ .. ﺍﺻﻼ ﻫﻲ ﺑﺎﺩﻻﺗﻪ ﺑﻜﻞ ﺣﺐ ... ﻟﺤﻈﺎﺕ ﻣﺎﺣﺴﻮﺍ ﺑﻴﻬﺎ ﻓﻲ ﺷﻲ ﻏﻴﺮ ﻓﺤﺒﻬﻢ ﺍﻟﻠﻲ ﻛﺎﻧﻮﺍ ﻳﻘﺎﻭﻣﻮﺍ ﻓﻴﻪ ..
ﻓﺠﺄﻩ ... ﻃﻘﻄﻘﻄﻘﻄﻘﻄﻖ ..
ﺍﻧﺨﻠﻌﻮﺍ ﺍﻟﺰﻭﺯ .. ﺑﻼﻝ ﻭﻗﻒ ﻭﺍﺳﺘﺠﻤﻊ ﻧﻔﺴﻪ .. ﻭﻣﺸﻲ ﻟﻠﺒﺎﺏ ﺯﻓﺮ ﺑﻘﻮﺓ ﻭﻓﺘﺤﻪ ..
ﻋﺒﺪﺍﻟﻘﺪﻭﺱ : ﺑﺴﺮﻋﻪ ﻭﺗﻮﺍ ﺍﺭﻭﺍﺣﻜﻢ ..
ﺑﻼﻝ ﺑﺈﺳﺘﻐﺮﺍﺏ : ﻋﻼﺵ ..
ﻋﺒﺪﺍﻟﻘﺪﻭﺱ : ﻣﺎﺗﻨﺎﻗﺸﺶ ﺩﻳﺮ ﺍﻟﻠﻲ ﻗﻠﺖ ﻋﻠﻴﻪ ..
ﺍﺑﺘﺴﺎﻡ ﺟﺘﻬﻢ : ﺑﺎﺑﺎ ﺷﻦ ﻓﻲ ..
ﻋﺒﺪﺍﻟﻘﺪﻭﺱ ﺑﻨﻔﺎﺫ ﺻﺒﺮ : ﻳﺎﺑﺎﺑﺎ ﻣﺎﺗﻨﺎﻗﺸﻮﺵ .. ﻟﻤﻮﺍ ﺣﺎﺟﺘﻜﻢ ﺍﻟﻤﻬﻤﻪ ﻓﻲ ﺷﻨﺎﻃﻲ ﺧﻼﻝ ﺳﺎﻋﻪ ﻻﺯﻡ ﻧﻄﻠﻌﻮﺍ ﻣﻦ ﻫﻨﻲ ... ﺑﺴﺮﻋﻪ ﻫﻴﺎ .. ﻭﻣﺸﻲ ..
ﺑﻼﻝ ﺗﻠﻔﺖ ﻹﺑﺘﺴﺎﻡ : ﻣﻦ ﺷﻦ ﺧﺎﻳﻒ ﺑﺎﻟﺰﺑﻂ ..
ﺍﺑﺘﺴﺎﻡ : ﻳﺎﻣﻦ ﺍﻟﺸﺮﻃﻪ ﻳﺎﻣﻦ ﺍﻟﻜﻮﺑﺮﺍ ....
***
ﻛﺎﻧﺖ ﺭﺍﻗﺪﻩ ﻟﻤﺎ ﺭﻥ ﺗﻠﻴﻔﻮﻧﻬﺎ ﺍﻟﻠﻲ ﺣﻄﺎﺗﻪ ﻉ ﺍﻟﻬﺰﺍﺯ .. ﻧﺎﺿﺖ ﻣﻔﺰﻭﻋﻪ .. ﺟﺒﺪﺗﺎﻩ ﻣﻦ ﺗﺤﺖ ﺍﻟﻤﺨﺪﻩ ﻭﺷﺎﻓﺎﺗﻪ .. ﻧﺎﺿﺖ ﻃﻮﻝ ... ﺣﻄﺖ ﻭﺷﺎﺡ ﻉ ﺭﺍﺳﻬﺎ .. ﻭﻃﻠﻌﺖ ﻣﻦ ﺩﺍﺭ ﺍﻟﻤﻌﻴﺸﻪ ... ﻭﺗﻮﺟﻬﺖ ﻟﺒﺎﺏ ﺍﻟﺤﻮﺵ ﺍﻟﺪﺧﻼﻧﻲ ﻓﺘﺤﺎﺗﻪ ﻭﻃﻠﻌﺖ ﺑﺮﺍ ﻣﺘﻮﺟﻪ ﻟﻠﺒﺎﺏ ﺍﻟﺒﺮﺍﻧﻲ ﻭﻓﺘﺤﺎﺗﻪ .. ﻟﻘﺎﺗﻪ ﻭﺍﻗﻒ ﻭﺍﻳﺪﻳﻪ ﻓﺠﻴﻮﺑﻪ ﻳﺸﺒﺤﻠﻬﺎ ﺑﻨﻈﺮﻩ ﺣﺰﻳﻨﻪ ﻫﻠﺒﻪ ﺍﻭﻝ ﻣﺮﺓ ﺗﺸﻮﻓﻬﺎ ﻓﻌﻴﻮﻧﻪ ...
ﻋﻠﻴﺎ : ﺧﺶ ...
ﺧﺶ ﺍﻟﺤﺴﻦ ﻭﻫﻲ ﺻﻜﺮﺕ ﺍﻟﺒﺎﺏ ﻭﺗﺸﻮﻓﻠﻪ ..
ﻋﻠﻴﺎ ﺑﺨﻮﻑ : ﺧﻴﺮﻙ ..
ﺍﻟﺤﺴﻦ ﻭﻧﻈﺮﺗﻪ ﻧﻈﺮﺓ ﺣﺰﻥ .. ﺍﻟﻢ .. ﺍﺣﺘﻴﺎﺝ : ﺍﺣﻀﻨﻴﻨﻲ ..
ﻋﻠﻴﺎ ﻋﻴﻮﻧﻬﺎ ﺗﻌﺒﻮﺍ ﺩﻣﻮﻉ .. ﻟﻔﺖ ﺍﻳﺪﻳﻬﺎ ﻉ ﺭﻗﺒﺘﻬﺎ ﻭﺣﻀﻨﺎﺗﻪ ﻭﻫﻮ ﻟﻒ ﺍﻳﺪﻳﻪ ﻉ ﺧﺼﺮﻫﺎ ﻭﺣﻀﻨﻬﺎ ﺑﻘﻮﺓ ﻭﺩﻓﻦ ﻭﺟﻬﻪ ﻓﻲ ﺭﻗﺒﺘﻬﺎ ﻳﺸﻢ ﻓﺮﻳﺤﺘﻬﺎ ﻭﻳﺮﺗﺎﺡ ..
ﻋﻠﻴﺎ ﻭﺩﻣﻮﻋﻬﺎ ﻳﻨﺰﻟﻮﺍ : ﺣﺒﻴﺒﻲ ﺷﻦ ﺻﺎﺭ ﻣﻌﺎﻙ ..
ﻭﻫﻮ ﻳﺤﻀﻦ ﻓﻴﻬﺎ ﺑﻘﻮﺓ : ﺗﻌﺒﺎﻥ ..
ﻋﻠﻴﺎ ﺣﻀﻨﺎﺗﻪ ﺍﻛﺜﺮ : ﺳﻼﻣﺘﻚ ﻳﺎﺭﻭﺣﻲ ﺍﻧﻲ ﻣﻦ ﺍﻟﺘﻌﺐ ..
ﻗﻌﺪﻭﺍ ﻫﻜﻲ ﻟﻠﺤﻈﺎﺕ .. ﺷﻮﻳﻪ ﻭﺑﻌﺪ ...
ﻋﻠﻴﺎ ﺷﺪﺕ ﻭﺟﻬﻪ ﺑﺈﻳﺪﻳﻬﺎ : ﺍﺣﻜﻴﻠﻲ ﻳﺎﺭﻭﺣﻲ ﺧﻴﺮﻙ ..
ﺍﻟﺤﺴﻦ : ﺗﻌﺎﻟﻲ ﻧﻘﻌﻤﺰﻭﺍ ...
ﻋﻠﻴﺎ ﻫﺰﺕ ﺭﺍﺳﻬﺎ ﺑﺈﻳﺠﺎﺏ ﻭﻗﻌﻤﺰﻭﺍ ﻉ ﻛﺮﺍﺳﻲ ﻓﻲ ﺍﻟﺠﻨﺎﻥ ..
ﺍﻟﺤﺴﻦ ﺗﻨﻬﺪ ﺑﺤﺮﻗﻪ ﻭﺑﺪﻱ ﻳﺤﻜﻲ ﻟﻌﻠﻴﺎ ﺍﻟﻠﻲ ﺻﺎﺭ ..
***
ﺗﺼﻠﻲ ﻓﻲ ﻗﻴﺎﻡ ﺍﻟﻠﻴﻞ .. ﻭﻗﻠﺒﻬﺎ ﺍﻟﻤﻘﺒﻮﺽ ﻣﺎﺑﺎﺵ ﻳﻬﺪﺍ .. ﺣﻄﺖ ﺍﻳﺪﻫﺎ ﻋﻠﻴﻪ ﻭﻗﻌﺪﺕ ﺗﻤﺴﺢ ﺟﻬﺔ ﻗﻠﺒﻬﺎ : ﻻ ﺇﻟﻪ ﺇﻻ ﺍﻟﻠﻪ ... ﻻﺇﻟﻪ ﺇﻻ ﺍﻟﻠﻪ ... ﻻﺇﻟﻪ ﺇﻻﺍﻟﻠﻪ ... ﻻﺇﻟﻪ ﺇﻻ ﺍﻟﻠﻪ ... ﻳﺎﺭﺑﻲ ﺧﻴﺮ ﻳﺎﺍﺍﺭﺏ ..
ﺍﻧﻌﺎﻡ ﺍﻟﻠﻲ ﻣﺎﺟﻬﺎﺵ ﻧﻮﻡ ﻛﺎﻧﺖ ﺗﺮﺍﻗﺐ ﻓﻲ ﺃﻣﻬﺎ ﻭﺻﺎﺑﻬﺎ ﻧﻔﺲ ﺍﻟﺨﻮﻑ ..
***
ﺇﻧﺎ ﻟﻠﻪ ﻭﺇﻥ ﺇﻟﻴﻪ ﺭﺍﺟﻌﻮﻥ ...
ﺍﻟﺤﺴﻦ : ﻓﻲ ﻛﻞ ﻋﻤﻠﻴﻪ ﻛﻨﺖ ﻣﺶ ﺿﺎﻣﻦ ﻧﺮﻭﺡ ﻣﻨﻬﺎ .. ﺑﺲ ﻫﺎﻟﻤﺮﻩ ﻣﺶ ﻋﺎﺭﻑ ﻋﻼﺵ ﻣﺶ ﻣﺴﺘﻮﻋﺐ ﺍﻟﻠﻲ ﺻﺎﺭ ﻟﻤﺤﻤﺪ .. ﻣﺎﻛﻨﺘﺶ ﻣﺘﻮﻗﻊ ﻧﻔﻘﺪﻩ ﻧﻬﺎﺋﻲ ... ﺳﻜﺖ .. ﻭﺣﻂ ﺍﻳﺪﻩ ﻉ ﺟﺒﻬﺘﻪ ﻭﺍﺗﻜﻰ ﺑﻴﻬﺎ ﻉ ﺍﻟﻄﺎﻭﻟﻪ ... ﺣﺎﺳﺲ ﺑﺎﻟﻘﻬﺮ ...
ﻋﻠﻴﺎ ﺷﺪﺕ ﺍﻳﺪﻩ : ﻻﻋﺎﺵ ﻭﻻﻛﺎﻥ ﺍﻟﻠﻲ ﻳﻘﻬﺮﻙ ... ﻣﻮﺕ ﺍﻟﻔﻬﺪ ﺷﺮﻑ ﻭﻓﺨﺮ ﻭﻧﻌﻤﻪ ﻟﻴﻪ ... ﻭﻛﻠﻪ ﻣﻘﺪﺭ ﻭﻣﻜﺘﻮﺏ .. ﻭﺯﻱ ﻣﺎﻗﻠﺖ ﻣﺎﺣﺪ ﺿﺎﻣﻦ ﺭﻭﺣﻪ ﻓﻴﻜﻢ ﻟﻤﺎ ﺗﻤﺸﻮﺍ ﻟﻤﻬﻤﺎﺗﻜﻢ .. ﺳﻜﺘﺖ ﻭﺑﻌﺪﻳﻦ ﻗﺎﻟﺖ ... ﻭﺟﻨﺎﻥ ﺭﺑﻲ ﻳﺼﺒﺮﻫﺎ ... ﺣﺘﻰ ﻫﻲ ﻣﻜﺘﻮﺑﻠﻬﺎ ﺗﻨﺼﺎﺏ ﺑﻬﺎﻟﻤﺼﻴﺒﻪ .. ﻟﻜﻦ ﺣﻨﻲ ﻣﻌﺎﻫﺎ ﻭﻣﺶ ﺣﻨﺨﻠﻮﻫﺎ .. ﺣﺘﺘﻮﺟﻊ ﺣﺘﺘﻌﺬﺏ .. ﻟﻜﻦ ﺣﻴﻌﺪﻱ ... ﻓﺎﻟﻨﻬﺎﻳﻪ ﺍﻟﻤﻮﺕ ﺣﻖ ... ﻭﺳﺒﺤﺎﻥ ﻣﻦ ﺧﻼ ﺍﻟﻨﺴﻴﺎﻥ ﻧﻌﻤﻪ ...
ﺍﻟﺤﺴﻦ ﻳﺸﺒﺤﻠﻬﺎ : ﻛﻴﻒ ﻧﺨﺒﺮﻫﺎ؟
ﻋﻠﻴﺎ ﺷﺪﺕ ﻉ ﺇﻳﺪﻩ : ﺗﻮ ﻧﻤﺸﻲ ﻣﻌﺎﻙ ..
ﺍﻟﺤﺴﻦ ﻗﺎﻡ ﺍﻳﺪ ﻋﻠﻴﺎ ﻭﺑﺎﺳﻬﺎ : ﺍﻟﺤﻤﺪ ﻟﻠﻪ ﺍﻟﻠﻲ ﻭﻫﺒﻚ ﻟﻴﺎ .. 💖
ﻋﻠﻴﺎ ﺍﺑﺘﺴﻤﺖ ﻭﻗﺮﺑﺖ ﺍﻳﺪﻩ ﻟﻴﻬﺎ ﻭﺑﺎﺳﺘﻬﺎ ﻣﻦ ﺩﺍﺧﻞ : ﻭﺍﻟﺤﻤﺪ ﻟﻠﻪ ﺍﻟﻠﻲ ﻋﻮﺿﻨﻲ ﺑﻴﻚ 💖
***
ﺗﺎﻧﻲ ﻳﻮﻡ
ﺍﻟﺴﺎﻋﻪ 1 ﻇﻬﺮﺍ ..
ﺧﻄﺒﺔ ﺍﻟﺠﻤﻌﻪ .. ﻛﺎﻥ ﻳﻠﻘﻲ ﻓﻴﻬﺎ ﻋﺎﺑﺪ ﻭﻛﺎﻧﺖ ﻋﻦ ﺧﻴﺎﻧﻪ ﺍﻻﻣﺎﻧﻪ .. ﻭﻫﻮ ﻳﺘﻜﻠﻢ ﻭﻳﻮﺯﻉ ﻓﻲ ﻧﻈﺮﻩ ﻉ ﺍﻟﻤﺼﻠﻴﻦ ﻓﻨﺺ ﻟﻤﺎ ﺟﺖ ﻋﻴﻨﻪ ﻉ ﺷﺨﺺ ﻣﻘﻌﻤﺰﺑﻴﻦ ﺍﻟﻤﺼﻠﻴﻦ ﻭﻳﺴﻤﻊ ﻓﻲ ﺍﻟﺨﻄﺒﻪ ﻭﺩﻣﻮﻋﻪ ﺗﻨﺰﻝ ... ﻛﻤﻞ ﺧﻄﺒﺘﻪ ﻋﺎﺩﻱ ﻟﻜﻦ ﻗﻠﺒﻪ ﺍﻧﻘﺒﺾ ... ﺑﻌﺪ ﺗﻤﺖ ﺍﻟﺨﻄﺒﻪ ... ﺍﻗﺎﻣﻮﺍ ﺍﻟﺼﻼﻩ ... ﺗﻤﺖ ﺍﻟﺼﻼﺓ ﻭﺍﻟﻨﺎﺱ ﺑﺪﺕ ﺗﻄﻠﻊ ﻳﺪﻭﺭ ﺑﻨﻈﺮﻩ ﻓﻲ ﺍﻟﻤﻜﺎﻥ ﻣﺎﻟﻘﺎﺵ ﺍﻟﺸﺨﺺ ﺍﻟﻠﻲ ﺷﺎﻓﻪ ﻭﻗﺖ ﺍﻟﺨﻄﺒﻪ .. ﻧﺎﺽ .. ﻣﻦ ﻣﺤﺮﺍﺑﻪ ﻭﻃﻠﻊ ... ﻭﻫﻮ ﻣﺘﻮﺟﻪ ﻟﺴﻴﺎﺭﺗﻪ ﻭﻳﺪﻭﺭ ﺑﻌﻴﻮﻧﻪ ﻓﻲ ﺍﻟﻤﻜﺎﻥ ...
" ﻋﺎﺑﺪ .."
ﻋﺎﺑﺪ ﺗﻠﻔﺖ ﺟﻨﺒﻪ ﺟﺖ ﻋﻴﻨﻪ ﻉ ﺍﻟﻠﻲ ﻧﺪﺍﻩ ﻣﺸﺎﻟﻪ ﻃﻮﻝ ..
ﻋﺎﺑﺪ ﺑﺨﻮﻑ : ﺷﻦ ﺻﺎﺭ ..
ﺳﺮﻣﺪ : ﺑﻮﻱ ...
ﻋﺎﺑﺪ ﺷﺒﺤﻠﻪ ﺑﻌﺪﻳﻦ ﻓﺘﺢ ﻋﻴﻮﻧﻪ ﻉ ﻭﺳﻌﻬﻢ ﺑﺼﺪﻣﻪ : ﻣﺎﺗﻘﻮﻟﻬﺎﺵ ..
ﺳﺮﻣﺪ ﻋﻴﻮﻧﻪ ﻣﻌﺒﻴﺎﺕ ﺩﻣﻮﻉ ﻭﺳﺎﻛﺖ ..
ﻋﺎﺑﺪ : ﻛﻴﻒ ﻣﺎﺕ ..
ﺳﺮﻣﺪ ﺷﺒﺤﻠﻪ ﻭﺍﺑﺘﺴﻢ ﺗﻬﻜﻤﺎ : ﺭﺻﺎﺻﺔ ﻗﻨﺎﺹ ...
ﻋﺎﺑﺪ ﺍﻧﺼﻌﻖ : ﺍﻟﺤﺴﻦ ..
ﺳﺮﻣﺪ ﺑﻀﺤﻜﻪ ﺳﺎﺧﺮﻩ : ﺧﺪﻱ ﺑﺘﺎﺭ ﺑﻮﻩ ﺩﻭﻥ ﻣﺎﻳﺪﺭﻱ ..
ﻋﺎﺑﺪ : ﺳﺒﺤﺎﻧﻚ ﻳﺎﺭﺏ ... ﺷﺒﺢ ﻟﺴﺮﻣﺪ .. ﻭﺍﻧﺖ ﻭﻫﺬﺍﻛﺎ ﻣﺎﺗﺒﻮﺵ ﺗﺘﻌﻈﻮﺍ ..
ﺳﺮﻣﺪ ﺍﺑﺘﺴﻢ ﺗﻬﻜﻤﺎ .. ﺍﺷﺮ ﺑﺈﻳﺪﻩ ...🖐 ﻭﻟﻒ ﻭﻣﺸﻲ ..
ﻋﺎﺑﺪ : ﻭﻳﻦ ﻣﺎﺷﻲ ..
ﺳﺮﻣﺪ ﻭﻫﻮ ﻣﺎﺷﻲ : ﻣﺮﻭﻭﻭﺡ ..
ﻋﺎﺑﺪ ﻗﺪﻡ ﺑﺴﺮﻋﻪ ﻭﺷﺪﻩ ﻣﻦ ﺫﺭﺍﻋﻪ : ﻛﻴﻒ ﻳﺼﻴﺮ ﺗﻮﺍ ..
ﺳﺮﻣﺪ : ﺧﻠﻴﻚ ﻋﺎﺩﻱ ﻋﺎﺩﻱ ﺟﺪﺍ ﺟﺪﺍ ... ﺣﻨﻌﻴﺸﻮﺍ ﺣﻴﺎﺗﻨﺎ ﻳﻮﻣﻴﻦ ﺑﻬﺪﻭﺀ ... ﻭﺑﻌﺪ ﻳﻮﻣﻴﻦ ﺣﺘﻌﺮﻑ ﻛﻞ ﺷﻲ .. ﻧﻔﺾ ﺍﻳﺪ ﺧﻮﻩ ﻭﻣﺸﻲ ...
ﻋﺎﺑﺪ ﻳﺸﺒﺤﻠﻪ ﺑﺄﻟﻢ " ﺍﻟﺤﻤﺪ ﻟﻠﻪ ﺍﻟﻠﻲ ﺑﻌﺪﻧﻲ ﻋﻦ ﻃﺮﻳﻘﻜﻢ ﻣﻦ ﺯﻣﺎﻥ ﻭﺗﺒﺖ ﺑﻜﺮﻱ .. ﺑﺲ ﻳﺎﺗﺮﻯ ﺭﺑﻲ ﺣﻴﻐﻔﺮﻟﻲ ﺳﻜﺎﺗﻲ ﻋﻠﻴﻬﻢ "... ﺗﻨﻬﺪ ﻭﻣﺸﻲ ﻟﺴﻴﺎﺭﺗﻪ ...
***
ﺩﺭﺱ ﺳﻴﺎﺭﺗﻪ ﻗﺪﺍﻡ ﺍﻟﺤﻮﺵ ﻭﻧﺰﻟﻮﺍ .. ﺷﺪﺕ ﺍﻳﺪﻩ ﺗﺒﻲ ﺗﻘﻮﻳﻪ .. ﺗﻮﺟﻬﻮﺍ ﻟﻠﺒﺎﺏ ﺍﻟﺨﺎﺭﺟﻲ ﺍﻟﻠﻲ ﻛﺎﻥ ﻣﺮﺩﻭﺩ ﻓﺘﺤﻪ ﻭﺧﺸﻮﺍ .. ﻭﺻﻠﻮﺍ ﻓﻲ ﺍﻟﺒﺎﺏ ﺍﻟﺪﺧﻼﻧﻲ ..
ﻭﺣﻂ ﺍﻳﺪﻩ ﻉ ﺍﻟﺠﺮﺱ .. ﻭﺿﺮﺑﻪ ..
ﻭﺳﻴﻠﻪ ﻭﻫﻲ ﺗﺤﻂ ﻓﻲ ﺍﻟﻐﺪﻱ : ﺟﻨﺎﻥ ﺍﻓﺘﺤﻲ ﺍﻟﺒﺎﺏ ﻫﺬﺍ ﺍﻟﺤﺴﻦ ﺟﻲ ..
ﺟﻨﺎﻥ ﺑﻔﺮﺣﻪ : ﺍﻟﺤﺴﻦ .. ﻭﻣﺸﺖ ﻃﻮﻝ ﻟﻠﺒﺎﺏ ﻭﻓﺘﺤﺎﺗﻪ ﻟﻘﺖ ﺧﻮﻫﺎ ﻭﻣﻌﺎﻩ ﻣﺮﺗﻪ ﺍﻧﺪﻫﺸﺖ ﻭﺯﺍﺩﺕ ﻓﺮﺣﺖ ..
ﺍﻟﺤﺴﻦ ﻛﺎﻥ ﻳﺘﺼﻨﻊ ﻓﻲ ﺍﻹﺑﺘﺴﺎﻣﻪ ﻭﻋﻠﻴﺎ ﻛﺬﻟﻚ .. ﺳﻠﻤﻮﺍ ﻋﻠﻴﻬﺎ ﻭﺩﺧﻠﺘﻬﻢ ..
ﺟﻨﺎﻥ ﺑﻀﺤﻜﻪ : ﺗﻮﻩ ﻣﺎﻧﻮﺭ ﺍﻟﺒﻴﺖ ..
ﺿﺤﻜﺖ ﻋﻠﻴﺎ ﺑﺄﻟﻢ ﻭﺍﺑﺘﺴﻢ ﺍﻟﺤﺴﻦ ﻣﺠﺎﻣﻠﻪ ..
ﻭﺳﻴﻠﻪ ﻃﻠﻌﺖ ﻣﻦ ﺍﻟﻜﻮﺟﻴﻨﻪ ﺷﺎﻓﺖ ﻋﻠﻴﺎ ﻭﺟﻬﻬﺎ ﺗﻐﻴﺮ ﻟﻜﻦ ﺳﻴﻄﺮﺕ ﻉ ﻧﻔﺴﻬﺎ ﻉ ﺧﺎﻃﺮ ﺍﻟﺤﺴﻦ ...
ﻣﺸﺖ ﺳﻠﻤﺖ ﻋﻠﻴﻪ ﺑﺎﻷﺣﻀﺎﻥ ﻭﻫﻮ ﺑﺎﺱ ﺭﺍﺳﻬﺎ ﻭﺍﻳﺪﻫﺎ .. ﻭﻋﻠﻴﺎ ﺑﺎﺳﺖ ﺭﺍﺳﻬﺎ ﻭﺍﻳﺪﻫﺎ ﻭﻭﺳﻴﻠﻪ ﺳﻠﻤﺖ ﻋﻠﻴﻬﺎ ﺑﺎﻟﺨﺪ ..
ﻭﺳﻴﻠﻪ : ﺗﻌﺎﻟﻮﺍ ﺧﺸﻮﺍ ..
ﺧﺸﻮﺍ ﻛﻠﻬﻢ ﺩﺍﺧﻞ ... ﻟﻘﻮﺍ ﺧﻮﻟﻪ ﺗﺘﻔﺮﺝ ﻉ ﺍﻟﺘﻠﻔﺰﻳﻮﻥ ﺗﻔﺎﺟﺌﺖ ﻟﻤﺎ ﺷﺎﻓﺖ ﻋﻠﻴﺎ ﺳﻠﻤﺖ ﻋﻠﻲ ﺧﻮﻫﺎ ﻭﺳﻠﻤﺖ ﻋﻠﻴﻬﺎ ﻭﻗﻌﻤﺰﻭﺍ .. ﻳﻬﺪﺭﺯﻭﺍ .. ﺟﻨﺎﻥ ﻛﺎﻧﺖ ﻃﻮﻝ ﺍﻟﻮﻗﺖ ﺗﻀﺤﻚ ﻭﺗﺒﺼﺮ .. ﻭﺧﻮﻫﺎ ﻳﺸﺒﺤﻠﻬﺎ ﺑﻀﻴﻖ ﺷﺪﻳﺪ ﻳﺤﺎﻭﻝ ﻉ ﻗﺪ ﻣﺎﻳﻘﺪﺭ ﻳﺨﻔﻴﻪ .. ﻋﻠﻴﺎ ﻛﺬﻟﻚ ﻛﺎﻧﺖ ﺗﺸﻮﻓﻠﻬﺎ ﻭﻣﺮﻛﺰﻩ ﻉ ﺍﻟﺪﺑﻠﻪ ﺍﻟﻠﻲ ﻓﻴﺪﻫﺎ ﻭﺣﺎﺳﻪ ﺑﻘﻠﺒﻬﺎ ﻳﻨﻌﺼﺮ ﻋﺼﺮ ..
ﻓﺘﺢ ﻋﺎﺑﺪ ﺑﺎﺏ ﺍﻟﺤﻮﺵ ﻭﻫﻮ ﻣﺨﻨﻮﻕ ﻫﻠﺒﻪ .. ﺳﻤﻊ ﺻﻮﺕ ﻫﺪﺭﺯﺓ ﺩﺍﺧﻞ ﻛﻤﻞ ﻃﺮﻳﻘﻪ ﻟﻮﻳﻦ ﻣﺎﻫﻤﺎ ﺍﻭﻝ ﻣﺎﻭﻗﻒ ﻉ ﺍﻟﺒﺎﺏ ﻗﻌﺪ ﻳﺸﺒﺢ ﻟﻠﺤﺴﻦ ... ﺍﻟﺤﺴﻦ ﺷﺒﺤﻪ ﻧﺎﺿﻠﻪ ﻃﻮﻝ ﻭﺟﺎﻩ ﺑﺎﺱ ﺭﺍﺳﻪ ﻭﺍﻳﺪﻩ ﻭﻋﺎﺑﺪ ﺷﺎﺩ ﺩﻣﻌﺘﻪ ﺑﺎﻟﺰﻭﺭ ...
ﺍﻟﺤﺴﻦ ﺷﺒﺢ ﻟﻮﺟﻪ ﺑﻮﻩ ﻛﺎﻥ ﻟﻮﻧﻪ ﻣﺨﻄﻮﻑ : ﺑﻮﻱ ﺧﻴﺮﻙ ..
ﻋﺎﺑﺪ ﻫﺰ ﺭﺍﺳﻪ ﺑﺎﻟﻨﻔﻲ ﺑﻌﺪ ﻣﺎﺣﻂ ﻉ ﻭﺟﻬﻪ ﺍﺑﺘﺴﺎﻣﻪ ﺃﻟﻢ : ﺷﻲ .. ﻭﺷﺒﺢ ﻟﻮﺳﻴﻠﻪ .. ﺟﻌﺎﻥ .. ﻗﺎﻟﻬﺎ ﺑﻀﺤﻜﻪ ..
ﻧﺎﺿﺖ ﻭﺳﻴﻠﻪ : ﻫﻲ ﺗﻮﺍﻧﻲ ﻭﺍﻟﻐﺪﻱ ﻗﺪﺍﻣﻚ .. ﻭﻃﻠﻌﺖ ﻣﻦ ﺣﺪﺍﻫﻢ
ﺳﻠﻢ ﻋﺎﺑﺪ ﻉ ﻋﻠﻴﺎ ﻭﻗﻌﻤﺰ .. ﻗﻌﺪﻭﺍ ﻳﻬﺪﺭﺯﻭﺍ ﻭﻫﻮ ﻋﻴﻮﻧﻪ ﻉ ﺍﻟﺤﺴﻦ .. ﻭﺭﺟﻌﺖ ﺫﺍﻛﺮﺗﻪ ﻟﻤﺎﺿﻲ ﺑﻌﻴﺪ ..
ﻓﻼﺵ ﺑﺎﻙ ..
ﺣﺎﺍﺍﺩﺕ !!!
ﻋﺎﺑﺪ ﻭﺩﻣﻮﻋﻪ ﻳﻨﺰﻟﻮﺍ : ﺍﻳﻪ ﺣﺎﺩﺙ ﻣﺎﺗﻮﺍ ﺍﻟﺰﻭﺯ ..
ﻭﺳﻴﻠﻪ ﺗﺒﻜﻲ : ﻳﺎﻧﺎﺭﻱ ﻋﻠﻴﻚ ﻳﺎﺯﻫﺮﻩ ... ﻳﺎﻧﺎﺭﻱ ..
ﻋﺎﺑﺪ ﺑﺄﻟﻢ : ﻣﺼﻴﺒﻪ ...
ﻭﺳﻴﻠﻪ : ﻣﺎﺗﻘﻮﻟﺶ ﺍﻟﺤﺴﻦ ﻣﻌﺎﻫﻢ ..
ﻋﺎﺑﺪ : ﻻ ﻋﻨﺪ ﻣﺮﺕ ﺑﻮﻱ ﻗﺎﻋﺪ ..
ﻭﺳﻴﻠﻪ : ﻳﺎﻧﺎﺭﻱ ﻋﻠﻴﻪ ﻭﻟﻴﺪﻱ ﻣﺴﻜﻴﻦ .. ﻣﺎﺯﺍﻝ ﻣﺎﺳﻜﺮ 4 ﺳﻨﻴﻦ ...
ﻋﺎﺑﺪ : ﺍﻟﻠﻪ ﻏﺎﻟﺐ ..
ﻭﺳﻴﻠﻪ ﺍﻧﻬﺎﺭﺕ ﺗﺒﻜﻲ ﺑﺎﻟﻌﺒﺮﻩ ﻉ ﺻﺎﺣﺒﺔ ﻋﻤﺮﻫﺎ ﻫﻲ ﺍﻟﻠﻲ ﺟﺎﺑﺘﻬﺎ ﻟﺴﻴﻒ ﺑﺶ ﺗﻘﻌﺪ ﺻﺎﺣﺒﺘﻬﺎ ﻣﻌﺎﻫﺎ ... ﻭﻛﺎﻧﺖ ﺗﺤﺐ ﺍﻟﺤﺴﻦ ﺯﻱ ﻭﻟﺪﻫﺎ ﻋﻠﻲ ﻭﺃﻛﺜﺮ .. ﺍﻟﺤﺴﻦ ﺭﺑﻲ ﺣﻂ ﻓﻲ ﻗﻠﻮﺏ ﻧﺴﺎﻭﻳﻦ ﺍﻟﻌﻴﻠﻪ ﻣﺤﺒﺘﻪ ﺣﻂ .. ﻻﻧﻪ ﻣﻘﺪﺭﻟﻪ ﻳﻌﻴﺶ ﻣﻦ ﻏﻴﺮ ﺍﻣﻪ .. ﻭﺑﺮﻧﻴﻪ ﻭﻭﺳﻴﻠﻪ ﺣﺒﻮﻩ ﺍﻛﺜﺮ ﻣﻦ ﺻﻐﺎﺭﻫﻢ ﻭﻋﻄﻮﻩ ﺣﻨﺎﻥ ﻟﻮ ﺍﻣﻪ ﻛﺎﻧﺖ ﻋﺎﻳﺸﻪ ﻣﺎﻛﺎﻧﺘﺶ ﺣﺘﻌﻄﻴﻪ ﻧﺼﻪ ...
ﺍﻟﻮﻗﺖ ﺍﻟﺤﺎﺿﺮ ..
ﺑﻮﻱ ... ﺑﻮﻱ ..
ﻋﺎﺑﺪ ﺍﺳﺘﺎﻗﺾ : ﺷﻨﻮ ﻭﻟﺪﻱ ..
ﺍﻟﺤﺴﻦ : ﺍﻟﺒﺎﻳﻦ ﻣﺎﻛﻨﺘﺶ ﻣﻌﺎﻱ ﺑﻜﻞ ..
ﻋﺎﺑﺪ ﺑﺄﺑﺘﺴﺎﻣﻪ : ﻏﻴﺮ ﻧﺎﻳﺾ ﺑﻜﺮﻱ ﺯﻱ ﻣﺎﺗﻌﺮﻑ ﻧﺮﺍﺟﻲ ﺍﻣﺘﻰ ﻧﺘﻐﺪﺍ ﻭﻧﺤﻂ ﺭﺍﺳﻲ ﻉ ﺍﻟﻤﺨﺪﻩ ..
ﺍﻟﺤﺴﻦ ﺍﺑﺘﺴﻢ ﻉ ﺟﻨﺐ .. ﻭﻫﺰ ﺭﺍﺳﻪ ﺑﺈﻳﺠﺎﺏ
***
ﻃﺎﻟﻌﻪ ﺑﺮﺍ ﺗﺠﻴﺐ ﻓﻲ ﺍﻟﻤﻔﺮﺵ ﺍﻟﻤﻨﺸﻮﺭ .. ﻣﺎﺣﺴﺘﺶ ﺇﻻ ﻭﺍﻳﺪ ﻏﻤﺖ ﻉ ﻋﻴﻮﻧﻬﺎ .. ﻭﺳﻤﻌﺖ ﺻﻮﺗﻪ ﻳﻐﻨﻲ ..
" ﻳﺎﺍﺍﻣﻮ ... ﻳﺎﻣﻮ ... ﻳﺎﺳﺖ ﺍﻟﺤﺒﺎﻳﺐ ﻳﺎﺍﺍﻳﺎﻣﻮ .."
ﺑﺮﻧﻴﻪ ﺑﻀﺤﻜﻪ : ﺣﻮﻝ ﺍﻳﺪﻙ ﻳﺎﻗﺮﺩ ﺧﻠﻴﻨﻲ ﻧﺸﻮﻓﻚ ..
ﺣﻮﻝ ﺍﻳﺪﻩ ﻭﻟﻔﺖ ﺑﺮﻧﻴﻪ ﺿﺮﺑﺎﺗﻪ ﻉ ﻭﺟﻬﻪ ﺿﺮﺑﻪ ﺧﻔﻴﻔﻪ ﻭﻫﻲ ﺗﻀﺤﻚ : ﻗﺮﺩ ... ﻭﺣﻀﻨﺎﺗﻪ ...
ﺳﺮﻣﺪ ﺑﻀﺤﻜﻪ : ﺷﻦ ﻏﺪﺍﻛﻢ ..
ﺑﺮﻧﻴﻪ ﺑﻀﺤﻜﻪ : ﻛﺴﻜﺴﻲ ﺑﺎﻟﺤﻮﺕ ..
ﺳﺮﻣﺪ ﻏﻤﺾ ﻋﻴﻮﻧﻪ : ﻳﺎﺍﺍﺍﺍﻩ .. ﻓﺘﺢ ﻋﻴﻮﻧﻪ ﻭﺿﺤﻚ ﻭﺭﻓﻊ ﺣﺎﺟﺒﻪ ﺍﻹﻳﺴﺎﺭ ﻭﺧﺶ ﻳﺠﺮﻱ ...
ﺑﺮﻧﻴﻪ ﻓﻲ ﺟﺮﺗﻪ : ﺗﻌﺎﻟﻰ ﻫﻨﻲ ... ﺗﻲ ﺭﺍﺟﻲ .. ﻳﺎﻭﻟﺪ ..
ﺗﺎﻛﻞ ﻣﻦ ﺍﻟﻄﻨﺠﺮﻩ ﻧﻘﺘﻠﻚ ...
***
ﺗﻐﺪﻭﺍ ﻭﻏﺴﻠﻮﺍ ﺍﻟﻤﺎﻋﻴﻦ ﻭﺣﻄﺖ ﻭﺳﻴﻠﻪ ﺍﻟﻌﺎﻟﻪ ... ﻛﺎﻥ ﻃﻮﻝ ﺍﻟﻮﻗﺖ ﺍﻟﺤﺴﻦ ﻳﺴﺮﻕ ﻓﻨﻈﺮﺍﺕ ﻟﺠﻨﺎﻥ ﻛﻞ ﻣﺎ ﻳﺸﻮﻑ ﺿﺤﻜﺘﻬﺎ ﻗﻠﺒﻪ ﻳﻮﺟﻌﻪ ﻭﺗﺼﻌﺐ ﻋﻠﻴﻪ ﺍﻟﺤﻜﺎﻳﻪ ﺍﻛﺜﺮ ﻭﺃﻛﺜﺮ ...
ﻟﻌﻨﺪ ﺁﺫﻥ ﺍﻟﻌﺼﺮ ... ﻣﺸﻲ ﻫﻮ ﻭﺑﻮﻩ ﻭﺻﻠﻮﺍ ﺍﻟﻌﺼﺮ .. ﻭﺍﻟﺤﺴﻦ ﺣﺘﻰ ﻟﺒﻮﻩ ﻣﺎﻗﺪﺭﺵ ﻳﺤﻜﻲ .. ﺍﻣﺎ ﻋﻠﻴﺎ ﻓﻜﺎﻧﺖ ﺗﻤﺜﻞ ﻃﻮﻝ ﺍﻟﻮﻗﺖ ﺍﻧﻬﺎ ﻋﺎﺩﻳﻪ ﻣﺶ ﻣﺮﻛﺰﺓ ﺑﻜﻞ ﻉ ﻭﺳﻴﻠﻪ ﺍﻟﻠﻲ ﻛﺎﻧﺖ ﻣﺶ ﻃﺎﻳﻘﺎﺗﻬﺎ .. ﺗﻔﻜﻴﺮﻫﺎ ﻛﻠﻪ ﻓﺠﻨﺎﻥ ...
ﺟﺖ ﺟﻨﺎﻥ ﻗﻌﻤﺰﺕ ﺣﺪﺍﻫﺎ : ﻟﻮﻟﻮ ..
ﻋﻠﻴﺎ ﺗﺼﻨﻌﺖ ﺍﻹﺑﺘﺴﺎﻣﻪ : ﻧﻌﻢ ﺟﻨﺠﻮﻥ ..
ﺟﻨﺎﻥ ﺑﻀﻴﻖ : ﻧﺘﺼﻞ ﺑﻤﺤﻤﺪ ﻣﻦ ﺑﻜﺮﻱ ﻣﻘﻔﻞ ..
ﻋﻠﻴﺎ ﺑﻠﻌﺖ ﺭﻳﻘﻬﺎ ﻭﺍﺑﺘﺴﻤﺖ ﻣﺠﺎﻣﻠﻪ : ﺍﺣﻤﻢ .. ﻣﻤﻜﻦ ﻣﺸﻐﻮﻝ ﺍﻭ ﺣﺎﺟﻪ ..
ﺟﻨﺎﻥ : ﻣﺎﻳﻨﺸﻐﻠﺶ ﻋﻨﻲ ... ﻻﺯﻡ ﻳﻜﻠﻤﻨﻲ ﻛﻞ ﺳﺎﻋﺘﻴﻦ ... ﺣﺘﻰ ﻟﻮ ﻳﺴﺄﻝ ﻛﻴﻒ ﺣﺎﻟﻚ ﻭﻳﺴﻜﺮ ..
ﻋﻠﻴﺎ : ﻫﺎﻟﻤﺮﺓ ﺍﻧﺸﻐﻞ ...
ﺟﻨﺎﻥ ﻣﻄﺘﺖ ﺷﻮﺍﺭﺑﻬﺎ : ﻣﻤﻜﻦ .. ﻭﺗﻨﻬﺪﺕ
ﻉ ﺧﺸﺔ ﻋﺎﺑﺪ ﻭﺍﻟﺤﺴﻦ ﻗﺎﺑﻠﺘﻬﻢ ﻭﺳﻴﻠﻪ ... ﻣﺸﻮﺍ ﻣﻌﺎﻫﺎ ﻭﺧﺸﻮﺍ ﺩﺍﺧﻞ ﻟﻘﻮﺍ ﺟﻨﺎﻥ ﻭﻋﻠﻴﺎ ﻣﻘﻌﻤﺰﻳﻦ ..
ﺍﻟﺤﺴﻦ : ﺧﻮﻟﻪ ﻭﻳﻦ ..
ﻭﺳﻴﻠﻪ : ﺧﺸﺖ ﺭﻗﺪﺕ ...
ﻋﺎﺑﺪ : ﺣﺘﻰ ﺍﻧﻲ ﺧﻞ ﺑﻨﺨﺶ ﻧﺮﻗﺪ ﺷﻮﻳﻪ ..
ﺍﻟﺤﺴﻦ : ﻻ ﺑﻮﻱ ... ﺍﺳﺘﻨﻰ ﺷﻮﻳﻪ ..
ﻛﻠﻬﻢ ﺍﺳﺘﻐﺮﺑﻮﺍ ﻣﺎﻋﺪﺍ ﻋﻠﻴﺎ ..
ﻋﺎﺑﺪ : ﺧﻴﺮﻙ ..
ﺍﻟﺤﺴﻦ ﺷﺒﺢ ﻟﺠﻨﺎﻥ ... ﺟﻨﺎﻥ ﺷﺒﺤﺘﻠﻪ ﻭﺍﺳﺘﻐﺮﺑﺖ ... ﺍﻟﺤﺴﻦ ﻗﺪﻡ ﺑﺒﻂﺀ ... ﺣﻂ ﺍﻳﺪﻩ ﻓﻲ ﺟﻴﺒﻪ .. ﻃﻠﻊ ﺣﺎﺟﻪ ﻣﺪﻫﺎ ﻟﺠﻨﺎﻥ ..
ﻋﻴﻨﻬﺎ ﺟﺖ ﻋﺎﻟﺤﺎﺟﻪ ﺍﻟﻠﻲ ﻣﺪﻫﺎ ﺍﻟﺤﺴﻦ ﺭﻛﺰﺕ ﺍﻛﺜﺮ ... ﻛﺎﻧﺖ ﺩﺑﻠﺔ ﻣﺤﻤﺪ ... ﺍﻳﻪ ﻫﻲ ﺩﺑﻠﺘﻪ ... ﺑﺲ ﺷﻦ ﺟﺎﺑﻬﺎ ﻟﻠﺤﺴﻦ .. ﻋﻼﺵ ﺍﻟﺤﺴﻦ ﻭﺍﺧﺪﻫﺎ ﻭﺟﺎﺑﻬﺎﻟﻬﺎ !!!
ﺟﻨﺎﻥ ﺑﻠﻌﺖ ﺭﻳﻘﻬﺎ ﻭﻭﻗﻔﺖ ﺷﺒﺤﺖ ﻟﺨﻮﻫﺎ ﻫﻠﺒﻪ ﺑﻌﺪﻳﻦ ﺷﺒﺤﺖ ﻟﺪﺑﻠﻪ .. ﺍﺑﺘﺴﻤﺖ ﺍﻳﻪ ﺍﺑﺘﺴﻤﺖ ﻭﺧﺪﺕ ﺍﻟﺪﺑﻠﻪ : ﺳﻴﺒﻨﻲ ... ﺍﺣﻤﻢ .. ﻛﻨﺖ ﻋﺎﺭﻓﻪ ﺍﻧﻪ ﺣﻴﺴﻴﺒﻨﻲ .. ﺍﻳﻪ .. ﺍﺣﻤﻢ .. ﻳﻠﻼ ﺍﻥ ﺷﺎﺀ ﺍﻟﻠﻪ ﺭﺑﻲ ﻳﺒﻌﺘﻠﻪ ﻭﺣﺪﻩ ﺧﻴﺮ ﻣﻨﻲ ... ﻧﺼﻴﺐ ..
ﻋﻠﻴﺎ ﺗﺸﺒﺤﻠﻬﺎ ﺑﺨﻮﻑ ﻭﺃﻣﻬﺎ ﻭﺑﻮﻫﺎ ﻣﺼﺪﻭﻣﻴﻦ .. ﻭﺍﻟﺤﺴﻦ ﻣﻀﻴﻖ ﻋﻴﻮﻧﻪ ﻭﻫﻮ ﻳﺸﺒﺤﻠﻬﺎ ﺑﺎﻟﺨﻮﻑ ...
ﺍﻟﺤﺴﻦ : ﺟﻨﺎﻥ .. ﻣﺤﻤﺪ ...
ﺟﻨﺎﻥ ﺑﻀﺤﻜﻪ : ﺳﻴﺒﻨﻲ .. ﻹﻥ ﺣﻨﻲ ﻣﺶ ﻣﻨﺎﺳﺒﻴﻦ ﻟﺒﻌﺾ ... ﺍﺣﻤﻢ ... ﺑﻨﺨﺶ ﻧﺮﻗﺪ ..
ﺍﻟﺤﺴﻦ ﺷﺪﻫﺎ ﻣﻦ ﺫﺭﺍﻋﻬﺎ : ﺟﻨﺎﺍﻥ ..
ﺟﻨﺎﻥ ﺑﻌﺼﺒﻴﻪ : ﺷﻦ ﺗﺒﻲ ... ﺷﻨﻮ ... ﺍﻫﺎﺍﺍﺍﺍ ... ﻣﺎﻧﺒﻴﺶ ﻧﺴﻤﻌﻚ ﻣﺎﻧﺒﻴﺶ ﻧﺴﻤﻊ ﺧﻠﻴﻨﻲ .. ﻗﻌﺪﺕ ﺍﺩﻑ ﻓﻴﻪ ﻭﺗﺤﻮﻝ ﻓﻲ ﺍﻳﺪﻫﺎ ﻣﻨﻪ ..
ﻋﻠﻴﺎ ﺟﺘﻬﺎ : ﺣﺒﻴﺒﺘﻲ ﺍﻫﺪﻱ ﺷﻮﻳﻪ ﻭﺍﺳﻤﻌﻲ ..
ﻋﺎﺑﺪ : ﺷﻦ ﺻﺎﺭ ﻳﺎﻟﺤﺴﻦ ﻓﻬﻤﻨﺎ ..
ﺍﻟﺤﺴﻦ ﻃﻠﻘﻬﺎ ﻭﺷﺒﺢ ﻟﺒﻮﻩ ﻭﺑﺄﻟﻢ : ﻣﺤﻤﺪ ﺍﺳﺘﺸﻬﺪ ﺃﻣﺲ ..
ﻭﺳﻴﻠﻪ ﺣﻄﺖ ﺍﻳﺪﻫﺎ ﻉ ﻓﻤﻬﺎ ﻭﺷﻬﻘﺖ ﺑﺼﺪﻣﻪ ...
ﻭﺑﻮﻩ ﻣﻔﻨﺺ ﻋﻴﻮﻧﻪ ...
ﺟﻨﺎﻥ ﺑﻨﻈﺮﺓ ﺑﺎﺭﺩﻩ : ﺑﺎﻩ ﺧﻼﺹ ﺳﻤﻌﺘﻚ ﺷﻦ ﻗﻠﺖ .. ﺧﻠﻮﻧﻲ ﻧﺨﺶ ﻧﺮﻗﺪ .. ﺩﻓﺖ ﻋﻠﻴﺎ ﻭﻣﺸﺖ ﻟﺪﺍﺭﻫﺎ ﻟﺤﻘﺘﻬﺎ ﺍﻣﻬﺎ ﻭﻫﻤﺎ ﻟﺤﻘﻮﻫﺎ ..
ﻓﺘﺤﺖ ﺑﺎﺏ ﺍﻟﺪﺍﺭ ﻭﺧﺸﺖ ﺳﺮﻳﺮﻫﺎ ﻭﺣﻄﺖ ﻋﻠﻴﻬﺎ ﺍﻟﻐﻄﺎ ..
ﺧﻮﻟﻪ ﻧﺎﺿﺖ ﻣﺨﻠﻮﻋﻪ .. ﺷﺎﻓﺖ ﺍﻣﻬﺎ ﺧﺸﺖ ﻭﺑﻌﺪﻫﺎ ﺑﻮﻫﺎ ﻭﺧﻮﻫﺎ ﻭﻣﺮﺕ ﺧﻮﻫﺎ ..
ﻭﺳﻴﻠﻪ ﺣﻮﻟﺖ ﺍﻟﻐﻄﺎ ﻣﻦ ﻉ ﺟﻨﺎﻥ : ﺟﻨﺎﻥ ... ﺧﻄﻴﺒﻚ ﻣﺎﺕ .. ﻣﺎﺕ .. ﺍﺑﻜﻲ ..
ﺟﻨﺎﻥ ﺷﺒﺤﺘﻠﻬﺎ ﻭﻧﺎﺿﺖ ﻗﻌﻤﺰﺕ : ﺍﻧﺘﻲ ﻣﻔﺮﻭﺽ ﺗﻔﺮﺣﻲ ﺗﻮﺍ ..
ﺷﺒﺤﺘﻠﻬﺎ ﻭﺳﻴﻠﻪ : ﺍﺑﻜﻲ ..
ﺟﻨﺎﻥ : ﻻ ..
ﻭﺳﻴﻠﻪ : ﺟﻨﺎﻥ ﺍﺑﻜﻲ .
ﺟﻨﺎﻥ : ﻻ .. ﻻ ..
ﻛﻠﻬﻢ ﻳﺘﻔﺮﺟﻮﺍ ﻉ ﻣﻮﻗﻒ ﻭﻋﻠﻴﺎ ﻭﺧﻮﻟﻪ ﺩﻣﻮﻋﻬﻢ ﺗﻨﺰﻝ ..
ﻭﺳﻴﻠﻪ : ﺍﺑﻜﻲ .. ﻣﺎﺕ .. ﺭﻩ ﻣﺤﻤﺪ ﻣﺎﺕ ..
ﺟﻨﺎﻥ ﺑﺼﻮﺕ ﻋﺎﻟﻲ : ﻣﺎﻧﺒﻴﻴﻴﺸﺶ ﻣﺎﻧﺒﻴﻴﺶ ...
ﻭﺳﻴﻠﻪ ﺑﺼﻮﺕ ﺣﺎﺩ ﻭﻋﺎﻟﻲ : ﺍﺑﻜﻲ ... ﻗﻠﺖ ﺍﺑﻜﻲ .. ﺧﻼﺹ ﻣﺎﺕ ﻭﺍﻟﻠﻲ ﻣﺎﺕ ﻳﺒﻜﻮﺍ .. ﻋﻠﻴﻪ ..
ﺟﻨﺎﻥ ﺑﻌﻴﺎﻁ : ﻣﺎﻧﺒﻴﻴﺶ ﻣﺎﻧﺒﻴﻴﻴﺶ .. ﺍﻃﻠﻌﻮﺍﺍﺍ ..
ﻭﺳﻴﻠﻪ : ﻣﺶ ﻃﺎﻟﻌﻪ ﻟﻴﻦ ﺗﺒﻜﻲ ... ﺑﺼﻮﺕ ﻋﺎﻟﻲ ... ﺍﺑﻜﻲ .. ﻳﺎﻣﺎﺍﺍﺍﻣﺎ ﺍﺑﻜﻲ ﻭﻧﺰﻟﻮﺍ ﺩﻣﻮﻋﻬﺎ ..
ﺟﻨﺎﻥ ﻟﻤﺎ ﺷﺎﻓﺖ ﺩﻣﻮﻋﻬﺎ ﺍﻣﻬﺎ ﺳﻜﺘﺖ ﻭﻗﻌﺪﺕ ﺗﺸﻮﻓﻠﻬﺎ : ﻳﻌﻨﻲ ﻣﺎﺕ ﺧﻼﺹ ﻳﺎﻣﺎﻣﺎ ﺧﻼﺹ ..
ﻭﺳﻴﻠﻪ ﺗﻬﺰ ﻓﻲ ﺭﺍﺳﻬﺎ ﺑﺈﻳﺠﺎﺏ ﻭﺗﺒﻜﻲ ..
ﺟﻨﺎﻥ ﻧﺰﻟﻮﺍ ﺩﻣﻮﻋﻬﺎ : ﻣﺎﻣﺎ ... ﺷﺒﺤﺘﻠﻬﺎ ﻭﺳﻴﻠﻪ ... ﺧﺪﺕ ﺑﻨﺘﻬﺎ ﻓﻲ ﺣﻀﻨﻬﺎ ﻭﻗﻌﺪﻭﺍ ﻳﺒﻜﻮﺍ ﺍﻟﺰﻭﺯ ﺑﺼﻮﺕ ﻋﺎﻟﻲ ..
ﺧﻮﻟﻪ ﻧﺎﺿﺖ ﺑﺒﻜﻲ : ﺗﻌﺎﻟﻮﺍ ﻧﻄﻠﻌﻮﺍ ...
ﺍﻟﺤﺴﻦ ﺩﻣﻌﺘﻪ ﻋﺒﺖ ﻋﻴﻨﻪ ﻃﻠﻊ ﺑﺴﺮﻋﻪ .. ﻭﺧﻮﻟﻪ ﺧﺪﺕ ﻋﻠﻴﺎ ﻭﺑﻮﻫﺎ ﻭﻃﻠﻌﻮﺍ ...
ﻋﻠﻴﺎ ﺑﺒﻜﻲ : ﺭﺑﻲ ﻳﺼﺒﺮﻫﺎ ..
ﻋﺎﺑﺪ ﻣﺸﻲ ﻭﺧﻼﻫﻢ .. ﻭﺧﺶ ﻟﺪﺍﺭﻩ ..
ﻭﻋﻠﻴﺎ ﻭﺧﻮﻟﻪ ﻣﺸﻮﺍ ﻗﻌﻤﺰﻭﺍ ﻓﻲ ﺍﻟﺼﺎﻟﻪ ﻭﻫﻤﺎ ﻳﺒﻜﻮﺍ ..
***
ﺁﺍﺍﺍﻩ ﺍﺳﺘﺎﺣﺸﺖ ﺷﺎﻫﻴﻚ ﻳﺎﺳﻤﺤﻪ ..
ﺑﺮﻧﻴﻪ ﺑﻀﺤﻜﻪ : ﻣﺎﻳﺪﻳﺮﻭﻟﻜﻤﺶ ﻓﻲ ﺷﺎﻫﻲ ﻏﺎﺩﻱ ..
ﺳﺮﻣﺪ ﺑﻀﺤﻜﻪ : ﺗﻮ ﺑﺎﻟﻠﻪ ﻳﺎﺑﺮﺑﺮ ﻫﺬﺍ ﻛﻼﻡ .. ﻓﻲ ﺯﻱ ﺷﺎﻫﻴﻚ ﻓﻲ ﺍﻟﺪﻧﻴﺎ ﻛﻠﻬﺎ ..
ﺑﺮﻧﻴﻪ ﺑﻀﺤﻜﻪ : ﻣﻠﺴﻦ ﻳﺎﻛﺒﺪﻱ ..
ﺍﻧﻔﺘﺢ ﺑﺎﺏ ﺍﻟﺤﻮﺵ ﻭﺧﺸﺖ ﺍﻧﻌﺎﻡ .. ﺳﺮﻣﺪ ﺷﺒﺢ ﻟﻠﺒﺎﺏ .. ﻭﺑﺒﻂﺀ ﺣﻂ ﻃﺎﺳﺔ ﺍﻟﺸﺎﻫﻲ ﻉ ﺍﻟﻄﺎﻭﻟﻪ ﻭﻫﻮ ﻳﺸﻮﻑ ﻷﺧﺘﻪ .. ﻛﻴﻒ ﺿﺎﻋﻔﻪ ﻭﻭﺟﻬﻬﺎ ﺫﺍﺑﻞ .. ﻗﻌﺪ ﻳﺸﺒﺤﻠﻬﺎ ﻫﻠﺒﻪ .. ﻭﻫﻲ ﻣﺎﻛﺎﻧﺘﺶ ﻻﻫﻴﻪ ﻛﺎﻧﺖ ﺗﻜﻠﻢ ﻓﻲ ﺣﺪ ﻭﺭﺍﻫﺎ .. ﻛﺎﻧﺖ ﺭﻳﺤﺎﻧﻪ ﺍﻟﻠﻲ ﺍﻭﻝ ﻣﺎﺧﺸﺖ ﺟﺖ ﻋﻴﻨﻬﺎ ﻉ ﻋﻤﻬﺎ ..
ﺭﻳﺤﺎﻧﻪ ﺑﻔﺮﺣﻪ : ﻋﻤﻮﻭﻭﻭ ... ﺍﻧﻌﺎﻡ ﺍﻟﺘﻔﺘﺖ ﻭﺷﺒﺤﺘﻠﻪ ﻭﻫﻮ ﻳﺸﺒﺤﻠﻬﺎ .. ﻧﺎﺽ ﻟﻤﺎ ﺷﺎﻑ ﺭﻳﺤﺎﻧﻪ ﺟﺎﻳﺎﺗﻪ ﺣﻀﻨﻬﺎ ...
ﺭﻳﺤﺎﻧﻪ ﺑﻌﺪﺕ : ﻟﻴﻚ ﻭﺣﺸﻪ ﻳﺎﺳﺮﻣﻮﺩﻩ ..
ﺳﺮﻣﺪ ﻭﻋﻴﻨﻪ ﻓﻲ ﺍﻧﻌﺎﻡ : ﺍﻧﺘﻢ ﺍﻛﺜﺮ ..
ﺍﻧﻌﺎﻡ ﻗﺪﻣﺘﻠﻪ : ﺍﻣﺘﻰ ﺭﻭﺣﺖ ..
ﺳﺮﻣﺪ : ﺍﻣﺲ ﻓﻲ ﺍﻟﻠﻴﻞ ... ﻗﻌﺪﻭﺍ ﻳﺸﺒﺤﻮﺍ ﻟﺒﻌﺾ ﻫﻠﺒﻪ .. ﺍﻧﻌﺎﻡ ﺩﻣﻮﻋﻬﺎ ﻉ ﻭﺷﻚ ﺍﻟﺴﻘﻮﻁ ﻭﻣﻼﻣﺢ ﻭﺟﻬﻬﺎ ﻛﻠﻬﺎ ﺣﺰﻥ .. ﺍﺭﺗﻤﺖ ﻃﻮﻝ ﻉ ﺻﺪﺭ ﺧﻮﻫﺎ ﻭﻗﻌﺪﺕ ﺗﺒﻜﻲ .. ﺍﻣﺎ ﻫﻮ ﻓﻜﺎﻥ ﻗﻠﺒﻪ ﻳﻌﺼﺮ ﻓﻴﻪ ﻋﺼﺮ ﺣﻂ ﺍﻳﺪﻳﻪ ﻋﻠﻴﻬﺎ ﻭﻗﻌﺪ ﻳﻤﺸﻲ ﻉ ﻇﻬﺮﻫﺎ ...
ﻭﺭﻳﺤﺎﻧﻪ ﺩﻣﻌﺖ .. ﻭﺑﺮﻧﻴﻪ ﺗﺒﻜﻲ ...
***
ﺧﻮﻟﻪ ﺗﻨﻬﺪﺕ ﺑﺤﺮﻗﻪ : ﺍﺳﺘﻐﻔﺮ ﺍﻟﻠﻪ ﺍﻟﻌﻈﻴﻢ .. ﺍﻟﻠﻬﻢ ﻻﺇﻋﺘﺮﺍﺽ ..
ﻋﻠﻴﺎ ﺑﻨﺒﺮﺓ ﺣﺰﻥ : ﻧﺼﻴﺐ ...
ﺧﻮﻟﻪ : ﻧﺼﻴﺐ ... ﺻﺢ ... ﻧﺼﻴﺐ ... ﺍﻟﻠﻪ ﻳﺮﺣﻤﻪ ﻭﻳﺼﺒﺮ ﻭﺧﻴﺘﻲ ..
ﻋﻠﻴﺎ : ﺍﻟﻠﻬﻢ ﺁﻣﻴﻦ ..
ﺧﺶ ﺍﻟﺤﺴﻦ ﺍﻟﻠﻲ ﻋﻴﻮﻧﻪ ﻛﺎﻧﻮﺍ ﺣﻤﺮ : ﻫﻴﺎ ﻋﻠﻴﺎ ..
ﻋﻠﻴﺎ ﻋﺼﺮﻫﺎ ﻗﻠﺒﻬﺎ ﻟﻤﺎ ﺷﺎﻓﺘﻪ ﻫﻜﻲ ﻧﺎﺿﺖ : ﻫﻴﺎ ..
ﺍﻟﺤﺴﻦ : ﺧﻮﻟﻪ ﺍﻱ ﺣﺎﺟﻪ ﺗﺼﻴﺮ ﺍﻱ ﺣﺎﺟﻪ ﺍﺗﺼﻠﻲ ﻃﻮﻝ .. ﻭﺧﻠﻲ ﺗﻠﻴﻔﻮﻧﻚ ﻓﻴﺪﻙ ﺣﻨﻜﻠﻤﻚ ﻣﺮﺓ ﻣﺮﺓ ﻧﻄﻤﻦ ..
ﺧﻮﻟﻪ ﻫﺰﺕ ﺭﺍﺳﻬﺎﺑﺂﻳﺠﺎﺏ ﻭ ﻃﻠﻊ ﺑﻤﺮﺗﻪ ﻭﺳﻜﺮ ﺍﻟﺒﺎﺏ ..
***
ﻧﺼﻴﺐ ..
ﺍﻧﻌﺎﻡ ﺑﺒﻜﻲ : ﺭﺑﻲ ﻣﺶ ﻣﻘﺪﺭﻧﺎ ﻟﺒﻌﺾ .. ﺿﺤﻜﺖ ﻣﻦ ﺑﻴﻦ ﺩﻣﻮﻋﻬﺎ .. ﻗﻠﺖ ﺗﻮ ﺳﺮﻣﺪ ﺑﻴﻔﺮﺡ ..
ﺳﺮﻣﺪ ﺍﺑﺘﺴﻢ ﺑﺄﻟﻢ : ﻧﻔﺮﺡ ﻟﺤﺰﻧﻚ ..!!!
ﺍﻧﻌﺎﻡ : ﻣﺎﺗﺒﻴﺸﻲ ﻣﻦ ﺍﻷﻭﻝ ..
ﺳﺮﻣﺪ : ﺍﺣﻤﻢ ... ﻧﺼﻴﺐ .. ﺯﻱ ﻣﺎﻗﺘﻠﻚ .. ﺷﺒﺢ ﻟﺮﻳﺤﺎﻧﻪ .. ﺗﻐﺪﻳﺘﻲ ﻓﻲ ﺣﻮﺵ ﻣﺤﻤﺪ ..
ﺍﻧﻌﺎﻡ ﺗﻤﺴﺢ ﻓﻲ ﺩﻣﻮﻋﻬﺎ : ﺍﻳﻪ ... ﺑﺲ ﻟﺤﻈﻪ ﻫﻮ ﻣﺶ ﺳﺎﻓﺮ ﻣﻌﺎﻙ ..
ﺳﺮﻣﺪ : ﺭﻭﺣﻨﺎ ﻣﻊ ﺑﻌﺾ ﺑﺲ ﻫﻮ ﻣﺶ ﻋﺎﺭﻑ ﺷﻦ ﻋﻨﺪﻩ ﻣﺎﺷﻲ ﻳﺘﻤﻪ ..
ﺍﻧﻌﺎﻡ : ﺑﺎﻩ ﺍﻧﺖ ﺷﻦ ﺣﺎﻟﻚ ﺗﻮﺍ ...
ﺳﺮﻣﺪ : ﺍﺣﺴﻦ ﺑﻬﻠﺒﻪ ..
ﺭﻳﺤﺎﻧﻪ ﺟﺘﻬﻢ : ﻭﻳﻦ ﺑﺎﻗﻲ ﺍﻟﻌﻴﻠﻪ ..
ﺍﻧﻌﺎﻡ : ﻣﺶ ﻗﺘﻠﻚ ﻣﺮﻋﻲ ﻭﺣﺴﺎﻥ ﻃﺎﻟﻌﻴﻦ ﺯﺭﺩﻩ ﺑﻨﺴﺎﻭﻳﻨﻬﻢ ..
ﺭﻳﺤﺎﻧﻪ : ﻗﺼﺪﻱ ﻋﻠﻴﺎ ﻭﺍﻟﺤﺴﻦ ...
ﺍﻧﻌﺎﻡ ﺍﺑﺘﺴﻤﺖ : ﻣﺎﺷﻴﻴﻦ ﻳﺘﻐﺪﻭﺍ ﻓﺤﻮﺵ ﻋﺎﺑﺪ ..
ﺳﺮﻣﺪ ﻓﻬﻢ ﺇﻥ ﺍﻟﺤﺴﻦ ﻣﺎﺷﻲ ﺑﻴﺒﻠﻎ ﺟﻨﺎﻥ ...
ﺷﻮﻳﻪ ﻭﺍﻧﻔﺘﺢ ﺍﻟﺒﺎﺏ .. ﻋﻴﻮﻧﻬﻢ ﺗﻮﺟﻬﺘﻠﻪ ..
ﺧﺸﺖ ﻋﻠﻴﺎ ﻭﺧﺶ ﺑﻌﺪﻫﺎ ﺍﻟﺤﺴﻦ ... ﻗﺎﻡ ﻋﻴﻨﻪ ﺟﺖ ﻓﻲ ﻋﻴﻦ ﺳﺮﻣﺪ .. ﺍﻟﻠﻲ ﺍﺑﺘﺴﻤﻠﻪ ﻃﻮﻝ ..
ﻗﺪﻡ ﺍﻟﺤﺴﻦ : ﺍﻣﺘﻰ ﺗﺒﻄﻞ ﺟﻮ ﺍﻟﻤﺮﺍﻫﻘﻴﻦ ﺍﻟﻠﻲ ﺍﺩﻳﺮ ﻓﻴﻪ ..
ﺳﺮﻣﺪ ﻧﺎﺿﻠﻪ ﺑﻴﻤﺸﻴﻠﻪ ﻭﻗﺎﻝ ﺑﻀﺤﻜﻪ : ﺗﻲ ﻏﻴﺮ ﻣﺶ ﻗﺪﺍﻡ ﻣﺮﺗﻚ ﻳﺎﺭﺍﺟﻞ ..
ﺍﻟﺤﺴﻦ ﻗﺪﻣﻠﻪ ﻭﺳﺮﻣﺪ ﻳﻘﺪﻡ .. ﻭﺣﻀﻨﻮﺍ ﺑﻌﺾ ..
ﺍﻟﺤﺴﻦ : ﺍﻣﺘﻰ ﺭﻭﺣﺖ ..
ﺳﺮﻣﺪ ﻭﻫﻮ ﻣﺒﺘﺴﻢ : ﺍﻟﺒﺎﺭﺡ ﻓﻲ ﺍﻟﻠﻴﻞ ..
ﺑﻌﺪﻭﺍ ﻋﻦ ﺑﻌﺾ ﻭﻗﺎﻝ ﺍﻟﺤﺴﻦ : ﺍﻟﺤﻤﺪ ﻟﻠﻪ ﻉ ﺍﻟﺴﻼﻣﻪ ..
ﺳﺮﻣﺪ ﺑﻀﺤﻜﻪ : ﺑﺎﻩ ﺍﻟﻠﻲ ﺗﻔﻜﺮﺕ .. ﺍﻟﻠﻪ ﻳﺴﻠﻤﻚ ﻳﺎﺳﻴﺪﻱ ...
ﻋﻠﻴﺎ : ﺍﻟﺤﻤﺪ ﻟﻠﻪ ﻉ ﺍﻟﺴﻼﻣﻪ
ﺳﺮﻣﺪ ﻟﻤﺎ ﺷﺎﻓﻬﺎ ﺍﺫﻛﺮ ﺍﺧﺘﻬﺎ ﺍﺑﺘﺴﻢ : ﺍﻟﻠﻪ ﻳﺴﻠﻤﻚ ..
ﺑﺮﻧﻴﻪ ﻃﻠﻌﺖ : ﺟﻴﺘﻮﺍ .. ﻧﺤﺴﺎﺑﻜﻢ ﺑﺘﻘﻌﺪﻭﺍ ﻟﻠﻴﻞ ..
ﺍﻟﺰﻭﺯ ﻣﻼﻣﺢ ﻭﺟﻬﻬﻢ ﺑﻴﻨﺖ ﺍﻥ ﻓﻲ ﺷﻲ ..
ﺍﻧﻌﺎﻡ : ﻣﺎﺗﻘﻮﻟﻮﺵ ﺗﻌﺎﺭﻛﺘﻮﺍ ﻣﻊ ﻭﺳﻴﻠﻪ ...
ﺳﻜﺘﻮﺍ ﺍﻟﺰﻭﺯ ...
ﺑﺮﻧﻴﻪ : ﻭﺍﻟﻠﻪ ﻗﺒﻞ ﻣﺎﻧﺒﻴﻜﻢ ﺗﻤﺸﻮﺍ ..
ﺍﻟﺤﺴﻦ : ﻣﺎﺻﺎﺭ ﺷﻲ ﺑﻴﻨﺎ ﻭﺑﻴﻦ ﺃﻣﻲ .. ﻭﺯﻉ ﻧﻈﺮﻩ ﻋﻠﻴﻬﻢ .. ﺗﻨﻬﺪ ..
ﺣﻨﻲ ﻛﻨﺎ ﻣﺎﺷﻴﻴﻦ ... ﺑﺶ ﻧﺒﻠﻐﻮﺍ ﺟﻨﺎﻥ .. ﺍﻥ ﺧﻄﻴﺒﻬﺎ ﺍﺳﺘﺸﻬﺪ ..
ﺍﻧﻌﺎﻡ ﺿﺮﺑﺖ ﺑﺄﻳﺪﻫﺎ ﻉ ﺧﺪﻫﺎ ﺑﻘﻮﻩ ﻃﻮﻝ ﺳﺮﻣﺪ ﺷﺒﺤﻠﻬﺎ ...
ﺑﺮﻧﻴﻪ ﻭﺭﻳﺤﺎﻧﻪ ﺍﻧﺼﺪﻣﻮﺍ ....
ﺍﻧﻌﺎﻡ ﺑﺒﻜﻲ : ﻳﺎﻧﺎﺭﻱ ﻋﻠﻴﻬﺎ ﻳﺎﻧﺎﺭﻱ ..
ﺑﺮﻧﻴﻪ ﺑﺒﻜﻲ : ﺣﺴﺒﻨﺎ ﺍﻟﻠﻪ ﻭﻧﻌﻢ ﺍﻟﻮﻛﻴﻞ ..
ﺭﻳﺤﺎﻧﻪ : ﺭﺑﻲ ﻳﺼﺒﺮﻫﺎ ..
ﺍﻧﻌﺎﻡ : ﺷﻦ ﺩﺍﺭﺕ ﻟﻤﺎ ﻋﺮﻓﺖ ..
ﻋﻠﻴﺎ ﻭﺩﻣﻮﻋﻬﺎ ﺗﻨﺰﻝ : ﺍﻧﺼﺪﻣﺖ ﺻﺪﻣﻪ ﻗﻮﻳﻪ ..
ﺍﻧﻌﺎﻡ : ﺗﻮﺍ ﺍﺭﻓﻌﻮﻧﻲ ...
ﺳﺮﻣﺪ : ﺗﻮ ﻧﺮﻓﻌﻚ ..
ﺍﻟﺤﺴﻦ : ﺍﻧﻲ ﻧﺮﻓﻌﻬﺎ ﺍﻧﺖ ...
ﻗﺎﻃﻌﻪ ﺳﺮﻣﺪ : ﻣﺎﻓﻴﺎ ﺷﻲ .. ﻫﻴﺎ ﺍﻧﻌﺎﻡ ...
ﻣﺸﻲ ﻟﺴﻴﺎﺭﺗﻪ ﺭﻛﺐ ﻭﺭﻛﺒﺖ ﺍﺧﺘﻪ ﺟﻨﺒﻪ ﻭﺍﻧﻔﺘﺢ ﺍﻟﺒﺎﺏ ﻭﻃﻠﻌﻮﺍ ..
....
ﻓﺘﺤﺖ ﺑﺎﺏ ﺍﻟﺪﺍﺭ ﻟﻘﺖ ﺟﻨﺎﻥ ﻓﻲ ﺣﻀﻦ ﺍﻣﻬﺎ ﻭﺩﻣﻮﻋﻬﺎ ﺗﻨﺰﻝ ..
ﺍﻧﻌﺎﻡ ﺑﻨﺒﺮﺓ ﺑﺎﻛﻴﻪ : ﺟﻨﺎﻥ ...
ﺟﻨﺎﻥ ﺑﻌﺪﺕ ﻋﻦ ﺍﻣﻬﺎ ﻭﻗﻌﺪﺕ ﺗﺸﺒﺢ ﻟﻌﻤﺘﻬﺎ : ﻧﺎﺭﻱ ﻧﺎﺭﻙ ﻳﺎﻋﻤﺘﻲ ...
ﻃﻮﻝ ﻣﺸﺘﻠﻬﺎ ﺍﻧﻌﺎﻡ ﻭﺣﻀﻨﺘﻬﺎ ﻭﻗﻌﺪﻭﺍ ﻳﺒﻜﻮﺍ ﺑﺎﻟﻌﺒﺮﻩ ﻭﺳﻴﻠﻪ ﻧﺎﺿﺖ ﻭﻗﻔﺖ ﺣﺪﺍﻫﻢ ﻭﺗﺒﻜﻲ ...
ﺍﻣﺎ ﻫﻮ ﻓﻜﺎﻥ ﻭﺍﻗﻒ ﻉ ﺍﻟﺒﺎﺏ ﻳﺸﻮﻓﻠﻬﻢ " ﻣﻌﻠﻴﺸﻲ .. ﻳﺒﻜﻮﺍ .. ﻳﺘﻮﺟﻌﻮﺍ .. ﻛﻠﻪ ﻳﻌﺪﻱ ﻭﺳﻴﻮﺭﻫﻢ ﻳﻨﺴﻮﺍ "
.... ﻳﺘﺒﻊ
