#الحسن (الوطن عشق رجاله )
ﺍﻟﺠﺰﺀ ﺍﻟﺜﺎﻧﻲ ﻭﺍﻟﺴﺘﻴﻦ 📂
للكاتبة GomanFared
ﺍﺑﺘﺴﻤﺖ ﺑﺘﻬﻜﻢ ﻭﻗﺎﻟﺖ : ﻗﻠﺘﻬﺎ .. ﻣﺶ ﺣﻴﻘﻌﺪ ﻣﺪﺭﻕ ﻟﻴﻮﻡ ﺍﻟﻘﻴﺎﻣﻪ .. ﻗﺪﻣﺖ ﻭﻗﻌﻤﺰﺕ ﺣﺪﺍﻩ ... ﺧﺪﺕ ﻣﻨﻪ ﺍﻟﺼﻮﺭﺓ ﺗﺸﺒﺤﻠﻬﺎ ﺑﺈﺑﺘﺴﺎﻣﻪ ﻭﻋﻴﻮﻥ ﻣﺪﻣﻌﻪ ... ﺷﺒﺤﺖ ﻟﻠﺤﺴﻦ ... ﺍﻧﺖ ﻭﻟﺪ ﺍﻟﺮﺍﺟﻞ ﻫﺬﺍ ﻭﺍﻟﻤﺮﺍﻩ ﻫﺎﺩﻱ ... ﺍﻟﻠﻲ ﺭﺍﺣﻮ ﻓﻲ ﻋﺰ ﺷﺒﺎﺑﻬﻢ .. ﺩﻣﻌﺘﻬﺎ ﻧﺰﻟﺖ .. ﺷﺒﺤﺖ ﻟﻠﺼﻮﺭﺓ .. ﻣﻮﺗﻬﻢ ﻟﺘﻮﺍ ﻧﺬﻭﻕ ﻓﻲ ﻣﺮﺍﺭﺗﻪ ... ﻭﺍﻟﻠﻲ ﻛﺎﻥ ﻣﻬﻮﻥ ﻋﻠﻴﺎ ﺍﻧﺖ ... ﻋﺎﺷﻮﺍ ﻣﻌﺎﻱ .. ﻭﻛﺎﻧﻮﺍ ﻭﻟﺪﻱ ﻭﺑﻨﺘﻲ ... ﺑﺮﻏﻢ ﺍﻥ ﺍﻟﻔﺮﻕ ﺑﻴﻨﻲ ﻭﺑﻴﻦ ﺑﻮﻙ ﻓﻲ ﺳﻦ ﻣﺶ ﻫﺬﺍﻛﺎ ﺍﻟﻔﺮﻕ ... ﻛﺎﻥ ﻳﻨﺎﺩﻱ ﻓﻴﺎ ﺧﺎﻟﺘﻲ ﻭﺍﻧﻲ ﻧﻘﻮﻟﻪ ﻳﺎﻭﻟﺪﻱ ... ﻋﻤﺮﻱ ﻣﺎﺭﻳﺖ ﻣﻨﻪ ﻣﻮﺟﻌﻪ ﻭﻻ ﻣﻨﻬﺎ .. ﻛﺎﻥ ﻓﻲ ﻛﻞ ﻋﻴﺪ ﺍﻡ ﻳﺤﺴﺒﻨﻲ ﻓﻬﺪﻳﻪ .. ﺑﺮﻏﻢ ﺍﻧﻲ ﺗﻤﻨﻴﺖ ﻣﻦ ﻗﻠﺒﻲ .
ﻳﻘﻮﻟﻲ ﺃﻣﻲ .. ﻫﺎﺩﻱ ﻫﺪﻳﺘﻲ ﺍﻟﻠﻲ ﻛﻨﺖ ﻧﺒﻴﻬﺎ ﻣﻨﻪ ... ﺷﺒﺤﺖ ﻟﻠﺤﺴﻦ ... ﺟﺪﻙ ﻣﺎﺕ ﻛﻞ ﻳﻮﻡ ﺍﻟﻒ ﻣﻮﺗﻪ ﻣﻮﺗﻪ ﺑﻌﺪ ﺭﺍﺡ ﺳﻴﻒ ﻣﻦ ﻫﺎﻟﺪﻧﻴﺎ ... ﻛﺎﻥ ﺣﻴﻠﺤﻘﻪ .. ﻟﻮﻻ ﺍﻟﻄﺎﻑ ﺭﺑﻲ ... ﺍﻟﻠﻲ ﻧﺒﻲ ﻧﻘﻮﻟﻪ ﻳﺎﻭﻟﺪﻱ ... ﺍﺣﻨﻲ ﺩﺭﻧﺎ ﻫﻜﻲ ﻉ ﺧﺎﻃﺮ ﺟﺪﻙ ﻭ ﻉ ﺧﺎﻃﺮﻙ ..
ﺍﻟﺤﺴﻦ ﺭﻓﻊ ﺣﻮﺍﺟﺒﻪ ﻭﺩﻣﻮﻋﻪ ﺗﻨﺰﻝ ﻭﺑﺘﻬﻜﻢ : ﻉ ﺧﺎﻃﺮﻱ !!!ﻛﻴﻒ ؟؟ﺍﻧﻲ ﻧﻌﻴﺶ ﻓﻲ ﻛﺬﺑﻪ ﻓﻮﻕ 30 ﺳﻨﻪ ﻣﻦ ﻋﻤﺮﻱ ... ﺍﻧﻜﻢ ﺗﺤﺮﻣﻮﻧﻲ ﻣﻨﻬﻢ ﺣﺘﻰ ﻭﻫﻮ ﻣﻴﺘﻴﻦ !! ؟ .. ﺍﻧﻜﻢ ﺗﺨﻠﻮﻧﻲ ﻧﻌﻴﺶ ﻣﻊ ﻣﺮﺍﺓ ﻭﺑﻨﺎﺗﻬﺎ ﻭﻫﻤﺎ ﻣﺶ ﻣﺤﺎﺭﻡ ﻟﻴﺎ .. ﻛﻴﻒ ﻗﺪﺭﺗﻮﺍ ﺗﺤﻄﻮﺍ ﺫﻧﺐ ﺯﻱ ﻫﺬﺍ ﻓﻲ ﺫﻣﺘﻜﻢ ... ﻛﻴﻒ ﻗﻌﺪﺗﻮﺍ ﺗﻜﺬﺑﻮﺍ ﻋﻠﻴﺎ ﺍﻟﻌﻤﺮ ﻫﺬﺍ ﻛﻠﻪ ﻭﺍﻧﺘﻢ ﺗﻀﺤﻜﻮﺍ ﻓﻮﺟﻬﻲ . ؟ ! ﻛﻴﻒ .. ﻓﻬﻤﻮﻧﻲ ﻛﻴﻒ .. ﺍﻗﺮﺏ ﺍﻟﻨﺎﺱ ﺍﻛﺜﺮ ﻧﺎﺱ ﻧﻮﺛﻖ ﻓﻴﻬﻢ ﻃﻠﻌﻮﺍ ﻣﻌﻴﺸﻴﻨﻲ ﻋﻤﺮ ﻛﺎﻣﻞ ﻓﻮﻫﻢ ﻓﻜﺬﺑﻪ ... ﻋﻼﺵ ﻋﻼﺵ ﺩﺭﺗﻮﺍ ﻓﻴﺎ ﻫﻜﻲ .. ﺑﺼﻮﺕ ﻋﺎﻟﻲ ﻭﺑﻐﻀﺐ .. ﻋﻼﺍﺍﺍﺍﺍﺍﺵ ..
ﺍﻧﺘﻔﻀﺖ ﺑﺮﻧﻴﻪ ﻭﺩﻣﻮﻋﻬﺎ ﺗﻨﺰﻝ ﻭﻣﺎﻗﺪﺭﺗﺶ ﺗﺮﺩ ... ﻫﻮﻧﺎﺽ .. ﻃﺎﺡ ﺍﻷﻟﺒﻮﻡ ﻟﻮﻃﺎ ﻋﻔﺲ ﻋﻠﻴﻪ ﻭﻃﻠﻊ ﻣﻦ ﺍﻟﺪﺍﺭ .. ﻧﺎﺿﺖ ﺑﺮﻧﻴﻪ ﻭﺭﺍﻩ ..
ﺑﺮﻧﻴﻪ ﺑﺒﻜﻲ : ﻳﺎﻭﻟﺪﻱ ﺍﺳﺘﻨﻰ .. ﺗﺮﺑﺢ ﺍﺳﻤﻌﻨﻲ .. ﺗﺮﺑﺢ ..
ﺍﻟﺤﺴﻦ ﻛﺎﻥ ﻏﻀﺐ ﺍﻟﺪﻧﻴﺎ ﻛﻠﻬﺎ ﻓﻴﻪ ﻣﺎﺑﺎﺵ ﻳﻌﺪﻝ ﻋﻠﻴﻬﺎ .. ﻃﻮﻝ ﺗﻮﺟﻪ ﻟﺒﺎﺏ ﺍﻟﺤﻮﺵ ﻭﻃﻠﻊ ... ﻭﺧﻼ ﺍﻟﺒﺎﺏ ﻣﻔﺘﻮﺡ ﻗﻌﺪ ﻣﺎﺷﻲ ﻉ ﺭﺟﻠﻴﻪ ﻟﻮﺟﻬﻪ ﻫﻮ ﻧﻔﺴﻪ ﻳﺠﻬﻠﻬﺎ ﻭﺩﻣﻮﻋﻪ ﺳﻴﻞ ......
...
ﻗﺮﺍﻳﺔ ﺍﻟﻬﻢ ..... ﺍﻳﻪ .. ﺍﺑﺘﺴﻤﺖ .. ﺑﺼﺮﺍﺣﻪ ﻧﺒﻴﻬﺎ ﺗﻄﻠﻊ ﻣﻨﻲ ﺑﻌﻔﻮﻳﻪ ﺑﺪﻭﻥ ﺗﻜﻠﻒ ﻋﺸﻲ ﻭﻃﻮﺭﻃﺎ ﺍﻟﺠﻮ ﻫﺬﺍ ﻣﺎﻧﺤﺒﺎﺵ ..... ﺍﻳﻪ ﻣﺶ ﻋﺎﺭﻓﻪ ﻛﻴﻒ ﻣﺎﻗﺘﻼﺵ ﻣﻦ ﻟﻤﺎ ﺭﻭﺣﺖ ﻣﻦ ﺍﻟﺠﺎﻣﻌﻪ ..... ﻫﻬﻬﻬﻬﻬﻪ .... ﻣﺎﺿﻤﻨﺘﺶ ﺭﺩﻩ ﻓﻌﻠﻪ .. ﻫﻬﻬﻬﻬﻬﻬﻬﻪ .. ﺣﻴﻮﺍﻧﻪ .... ﺗﻤﺎﻡ .... ﻧﺘﻼﻗﻮﺍ ﺍﻟﺴﺒﺖ .. ﺻﺢ ﺳﺤﻮﺭﻙ ﻣﻘﺪﻣﺎ ... ﻭﺻﻜﺮﺕ ...
ﻋﻠﻴﺎ : ﺍﺍﺍﻩ ﻳﺎﺭﺑﻲ .. ﺍﻣﺘﻰ ﻳﺮﻭﺡ ﺑﺲ ... ﺗﻮﺟﻬﺖ ﻟﻠﺮﻭﺷﻦ ﻭﻓﺘﺤﺎﺗﻪ ﺷﺎﻓﺖ ﻟﻮﻃﺎ .. ﺍﺳﺘﻐﺮﺑﺖ .. ﻟﻘﺖ ﺑﺮﻧﻴﻪ ﻣﻘﻌﻤﺰﻩ ﻉ ﺍﻟﺪﺭﻭﺝ ﻭﻛﺄﻧﻬﺎ ﺗﺒﻜﻲ ﻭﺍﻧﻌﺎﻡ ﺗﻜﻠﻢ ﻓﻴﻬﺎ .. ﻗﻠﺒﻬﺎ ﺍﻧﻘﺒﺾ .. ﻃﻮﻝ ﻃﻠﻌﺖ ﻣﻦ ﺷﻘﺘﻬﺎ ﻭﻧﺰﻟﺖ ﻟﻮﻃﺎ .. ﻓﺘﺤﺖ ﺍﻟﻔﺎﺻﻞ .. ﻭﻃﻠﻌﺖ ﺑﺮﺍ ... ﻧﺰﻟﺖ ﻛﻢ ﺩﺭﺟﻪ ﻟﻴﻦ ﻭﺻﻠﺖ ﻓﻲ ﺍﻟﺪﺭﺟﻪ ﺍﻟﻠﻲ ﻓﻴﻬﺎ ﺑﺮﻧﻴﻪ ﻭﺍﻧﻌﺎﻡ ..
ﺍﻧﻌﺎﻡ ﺑﺨﻮﻑ : ﻗﻮﻟﻴﻠﻲ ﺷﻦ ﺻﺎﺭ ﺗﺮﺑﺤﻲ ..
ﺑﺮﻧﻴﻪ ﺗﺒﻜﻲ ﻭﺧﻼﺹ .
ﻋﻠﻴﺎ ﺑﺨﻮﻑ : ﺷﻦ ﻓﻲ ..
ﺑﺮﻧﻴﻪ ﻭﻗﻔﺖ ﺑﻜﻲ ﻭﺷﺒﺤﺖ ﻟﺒﻨﺘﻬﺎ : ﺍﺗﺼﻠﻴﻠﻲ ﺑﻌﺎﺑﺪ ﺑﺴﺮﻋﻪ
ﺍﻧﻌﺎﻡ : ﺑﺎﻩ ﺷﻦ ﻓﻲ ..
ﺑﺮﻧﻴﻪ ﺑﻌﻴﺎﻁ : ﺗﺤﺮﺭﺭﺭﻛﻲ ..
ﻃﻮﻝ ﺍﻧﻌﺎﻡ ﺧﺸﺖ ﺍﺗﺼﻠﺖ ﺑﻌﺎﺑﺪ ﻣﻦ ﺗﻠﻴﻔﻮﻥ ﺃﻣﻬﺎ .. ﺍﻣﺎ ﻋﻠﻴﺎ ﻓﻜﺎﻧﺖ ﺗﺸﺒﺢ ﻟﺒﺮﻧﻴﻪ ﺍﻟﻠﻲ ﺗﺸﺒﺢ ﻟﻠﺒﺎﺏ ﺍﻟﻤﻔﺘﻮﺡ ﻭﺣﺎﻃﻪ ﺍﻳﺪﻳﻬﺎ ﻉ ﻓﻬﻤﺎ ﻭﺩﻣﻮﻋﻪ ﻣﺎﺑﻄﻠﺘﺶ ﻧﺰﻭﻝ ..
ﺟﺖ ﺍﻧﻌﺎﻡ ﻭﻓﻴﺪﻫﺎ ﺍﻟﺘﻠﻴﻔﻮﻥ ﺧﺪﺍﺗﻪ ﺑﺮﻧﻴﻪ ﻭﻣﺸﺖ ﺑﻴﻪ ﻣﻦ ﺣﺪﺍﻫﻢ ..
ﻋﻠﻴﺎ ﺑﻘﻠﻖ : ﺷﻦ ﺻﺎﺭ ﺑﺎﻟﺰﺑﻂ ..
ﺍﻧﻌﺎﻡ ﺑﺤﻴﺮﻩ : ﻣﺶ ﻋﺎﺭﻓﻪ .. ﻣﺶ ﻓﺎﻫﻤﻪ ﺗﻌﺎﺭﻛﺖ ﻣﻊ ﺍﻟﺤﺴﻦ ﻭﻻﺷﻨﻮ ﻣﺎﻓﻬﻤﺘﺶ ﻛﺎﻥ ﻃﺎﻟﻊ ﻭﻫﻮ ﻣﺶ ﺷﺎﻳﻒ ﻗﺪﺍﻣﻪ ﻭﻫﻲ ﻭﺭﺍﻩ ﺗﺒﻜﻲ ﻭﺗﻘﻮﻟﻪ ﺍﺳﻤﻌﻨﻲ .. ﻣﺶ ﻓﺎﻫﻤﻪ ﺷﻲ ...
ﻋﻠﻴﺎ ﺑﺼﺪﻣﻪ : ﻗﺼﺪﻙ ﺍﻟﺤﺴﻦ ﺟﻲ !! ؟؟
ﺍﻧﻌﺎﻡ : ﺕ ﺍﻳﻴﻴﻴﻪ ﻛﺎﻥ ﻣﻘﻌﻤﺰ ﺣﺪﺍﻫﺎ ...
ﻋﻠﻴﺎ ﺧﺪﺕ ﺗﻠﻔﻮﻧﻬﺎ ﻭﺍﺗﺼﻠﺖ ﺑﻴﻪ ﺳﻤﻌﺖ ﺻﻮﺕ ﺭﻧﺘﻪ ﺩﺍﺧﻞ ﺧﺸﺖ ... ﻟﻘﺎﺗﻪ ﻣﺤﻄﻮﻁ ﻉ ﻃﺎﻭﻟﻪ ﻓﻲ ﺍﻟﺼﺎﻟﻪ ﻋﻴﻮﻧﻬﺎ ﺗﻌﺒﻮﺍ ﺩﻣﻮﻉ ﻭﺧﺎﻓﺖ ﻫﻠﺒﻪ ..
ﺑﻌﺪ ﺣﻮﺍﻟﻲ ﻧﺺ ﺳﺎﻋﻪ ﺟﻲ ﻋﺎﺑﺪ ﺑﻌﻴﻠﺘﻪ .. ﻭﻟﺤﻘﻪ ﻣﺤﻤﺪ ﺑﻌﻴﻠﺘﻪ .. ﻭﻋﻠﻲ ﺑﻌﻴﻠﺘﻪ .. ﺑﺮﻧﻴﻪ ﻛﻠﻤﺘﻬﻢ ﻛﻠﻬﻢ ﻭﻗﺎﻟﺖ ﻻﺯﻡ ﻳﺠﻮﺍ ..
ﺍﻣﺎ ﺍﻟﺤﺴﻦ ﺍﻟﻠﻲ ﻛﺎﻧﻮﺍ ﻳﺴﺘﻨﻮﺍ ﻓﻴﻪ ﻣﺮﺕ ﺳﺎﻋﻪ ﺍﺗﻨﻴﻦ ﺗﻼﺛﻪ ﺍﺭﺑﻌﻪ ﻭﻣﺎﺟﺎﺵ ﺗﺴﺤﺮﻭﺍ ﻣﻦ ﻏﻴﺮ ﻧﻴﻪ ... ﺑﻌﺪ ﺍﻟﺴﺤﻮﺭ .. ﺧﺶ ﺳﺮﻣﺪ ﻟﻘﺎﻫﻢ ﺗﻔﺎﺟﺄ ..
ﺳﺮﻣﺪ : ﺇﻥ ﺷﺎﺀ ﺍﻟﻠﻪ ﺧﻴﺮ ..
ﻋﺎﺑﺪ ﺩﺍﺭﻟﻪ ﺍﺷﺎﺭﻩ ﺑﻌﻴﻮﻧﻪ ﺳﺮﻣﺪ ﻃﻠﻊ ﺷﻮﻳﻪ ﻭﻟﺤﻘﻪ ﻋﺎﺑﺪ
ﻓﺎﻃﻤﻪ : ﻛﺎﻥ ﻧﻌﺮﻑ ﺷﻦ ﻓﻲ ..
ﺍﻧﻌﺎﻡ : ﻣﻦ ﺑﻜﺮﻱ ﻭﺍﻧﻲ ﻧﺤﺎﻭﻝ ﻧﻌﺮﻑ ﺷﻲ .. ﻣﺼﺮﻳﻦ ﻣﺎﻳﺘﻜﻠﻤﻮﺵ ﻟﻴﻦ ﻳﺠﻲ ﺍﻟﺤﺴﻦ ..
ﻣﺠﻴﺪﻩ : ﺇﻥ ﺷﺎﺀ ﺍﻟﻠﻪ ﺧﻴﺮ ..
...
ﺟﻨﺎﻥ : ﺭﻳﺤﺎﻧﻪ ﺍﻧﺘﻲ ﻛﻨﺘﻲ ﻋﻨﺪﻫﻢ
ﺭﻳﺤﺎﻧﻪ : ﺍﻳﻪ ﺑﺲ ﺭﻭﺣﺖ ﻭﻗﺖ ﺍﻟﺘﺮﻭﺍﻳﺢ ﻣﺶ ﻋﺎﺭﻓﻪ ﺷﻲ ...
ﺧﻮﻟﻪ : ﺧﺎﻳﻔﻪ ﻫﻠﺒﻪ ...
...
ﻫﺎﻟﻪ : ﺍﻫﺪﻱ ﺣﺒﻴﺒﺘﻲ ﺗﻮ ﺇﻥ ﺷﺎﺀ ﺍﻟﻠﻪ ﻗﺮﻳﺐ ﻳﺨﺶ ..
ﻋﻠﻴﺎ ﺑﺒﻜﻲ : ﻳﺎﺍﺍﺭﺏ ..
ﺳﺎﺭﻩ ﺣﻄﺖ ﺍﻳﺪﻫﺎ ﻉ ﺍﻳﺪ ﻋﻠﻴﺎ ﻭﻃﺒﻄﺒﺖ ﻋﻠﻴﻬﺎ ..
...
ﺳﺮﻣﺪ ﺑﺼﺪﻣﻪ : ﻛﻴﻒ ﻋﺮﻑ ..
ﻋﺎﺑﺪ : ﺷﺎﻑ ﺍﻷﻟﺒﻮﻡ ﺍﻟﻠﻲ ﻓﺪﺍﺭ ﺑﻮﻱ ..
ﺳﺮﻣﺪ ﺑﺈﺳﺘﻴﺎﺀ : ﺍﻣﻤﻤﻲ ﺍﻟﻠﻪ ﻳﻬﺪﻳﻬﺎ ﻣﻦ ﺍﻣﺘﻲ ﺍﻟﺪﺍﺭ ﻫﺎﺩﻱ ﻳﺨﺸﻠﻬﺎ ﺣﺪ ﻛﺎﻧﺖ ﻣﺤﺮﻣﻪ ﻉ ﺍﻟﻜﻞ ..
ﻋﺎﺑﺪ : ﺭﺑﻚ ﺍﺭﺍﺩ ﺍﻟﻤﺪﺭﻕ ﻳﺒﺎﻥ ..
ﺳﺮﻣﺪ : ﻓﻜﺮ ﺗﻮﺍ ﻓﻲ ﺭﺩﺓ ﻓﻌﻠﻪ ..
ﻋﺎﺑﺪ ﺳﻜﺖ ﻭﻗﻌﺪ ﻳﻔﻜﺮ ..
ﺍﺫﻥ ﺍﻟﻔﺠﺮ ﻭﺍﻟﺤﺴﻦ ﻣﺎﺑﺎﻧﺶ ﺗﻮﺍﺻﻠﻮﺍ ﻣﻊ ﺍﻟﻌﻤﻞ ﻣﻊ ﺯﻣﻼﺋﻪ ﻣﺎﺣﺪ ﺷﺎﻓﻪ ﻣﻨﻬﻢ .. ﻛﻠﻬﻢ ﺧﺎﻓﻮﺍ ﺑﺲ ﻋﻠﻴﺎ ﺑﺰﺍﻳﺪ ﻣﺎﺑﻄﻠﺘﺶ ﺑﻜﻲ ﻭﻻﺑﺖ ﺗﺤﻂ ﻓﻲ ﻓﻤﻬﺎ ﻟﻘﻤﻪ ..
🕛🕛 ﻓﺎﺗﻮﺍ 24 ﺳﺎﻋﻪ ... ﻟﺤﻘﺘﻬﺎ 🕛🕛 ﺳﺎﻋﻪ ..
ﻳﻌﻨﻲ ﻳﻮﻣﻴﻦ .. ﻭﻣﺎﺑﺎﻧﺶ ﺍﻟﺤﺴﻦ ... ﻭﻛﻠﻬﻢ ﻣﺸﻐﻮﻟﻴﻦ ﻫﻠﺒﻪ ﻗﺮﻳﺐ ﺍﻟﻴﻮﻡ ﻣﻦ ﺍﻭﻟﻪ ﻷﺧﺮﻩ ﺻﻴﺎﻡ .. ﻋﻠﻴﺎ .. ﺍﻟﻠﻲ ﺭﺍﻓﻀﻪ ﺗﺎﻛﻞ ﺻﺎﺭﻟﻬﺎ ﻫﺒﻮﻁ ﻭﺭﻓﻌﻮﻫﺎ ﻟﻠﻌﻴﺎﺩﻩ ﻭﻗﻌﺪﺕ ﺑﺎﻟﺘﻐﺪﻳﻪ ﻭﻏﺎﺩﻱ ﻋﺮﻓﺖ ﺍﻧﻌﺎﻡ ﺍﻟﻠﻲ ﻣﺸﺖ ﻣﻌﺎﻫﺎ ﺍﻥ ﻋﻠﻴﺎ ﺣﺎﻣﻞ .. ﻭﻋﻠﻴﺎ ﺣﻠﻔﺘﻬﺎ ﻣﺎﺗﻘﻮﻝ ﻟﺤﺪ .. ﻟﻜﻦ ﺍﻧﻌﺎﻡ ﻗﻌﺪﺕ ﻭﺭﺍﻫﺎ ﺗﻮﻛﻞ ﻓﻴﻬﺎ ﻏﺼﺐ ﻋﻨﻬﺎ ﻭﺗﻘﻮﻟﻠﻬﺎ " ﺍﻧﺘﻲ ﻣﺶ ﺑﺮﻭﺣﻚ ﻓﻴﻚ ﺭﻭﺡ ﺗﺎﻧﻴﻪ .." ﻭﻛﺎﻧﺖ ﻋﻠﻴﺎ ﺗﺎﻛﻞ ﻟﻤﺎ ﺗﺴﻤﻊ ﻫﺎﻟﻜﻠﻤﻪ ..
ﻭﺳﻴﻠﻪ ﺑﺒﻜﻲ : ﻋﺸﺖ ﻋﻤﺮﻱ ﺧﺎﻳﻔﻪ ﻣﻦ ﻫﺎﻟﻴﻮﻡ ﺑﻨﻤﻮﺕ ﻳﺎﻋﺎﺑﺪ ..
ﻋﺎﺑﺪ : ﺗﻌﻮﺫﻱ ﻣﻦ ﺍﻟﺸﻴﻄﺎﻥ .. ﺭﺑﻲ ﻣﺎﻳﻘﺪﺭ ﺇﻻ ﺍﻟﺨﻴﺮ ﺇﻥ ﺷﺎﺀ ﺍﻟﻠﻪ ..
ﺗﺎﻟﺖ ﻧﻬﺎﺭ ﻭﺍﻟﺤﺴﻦ ﻏﺎﻳﺐ .. ﻓﻲ ﺍﻟﻠﻴﻞ ﺑﻌﺪ ﺍﻟﺘﺮﺍﻭﻳﺢ ﺑﺎﻟﺰﺑﻂ ﺍﻟﻌﻴﻠﻪ ﻛﻠﻬﻢ ﻣﻊ ﺑﻌﺾ ﻓﻲ ﺩﺍﺭ ﺍﻟﻤﻌﻴﺸﻪ ..
ﺧﻮﻟﻪ : ﻻﺯﻡ ﻧﻔﻬﻤﻮﺍ ﺷﻦ ﺻﺎﻳﺮ ﻟﻴﻨﺎ ﺗﻼﺗﻪ ﺍﻳﺎﻡ ﻉ ﻧﺎﺭ ﻣﺶ ﻓﺎﻫﻤﻴﻦ ﺷﻲ .. ﻭﻣﺮﺗﻪ ﺍﻟﻤﺴﻜﻴﻨﻪ ﻗﺮﻳﺐ ﺗﻤﻮﺕ ﻻﻣﺎﻛﻠﻪ ﻻﺷﺮﺍﺏ .. ﻓﻬﻤﻮﻧﺎ ﺷﻦ ﺻﺎﻳﺮ ﺑﺲ ..
ﻋﺎﺑﺪ : ﺑﺎﺍﺑﺎ ﺣﺘﻔﻬﻤﻮﺍ ﻳﺎﺑﺎﺑﺎ ﺑﺲ ﻟﻤﺎ ﻳﺤﻀﺮ ﺻﺎﺣﺐ ﺍﻟﺸﺄﻥ ..
ﺟﺘﻬﻢ ﺍﻧﻌﺎﻡ ﻗﻌﻤﺰﺕ ..
ﺑﺮﻧﻴﻪ : ﻫﺎﻩ ﺷﻦ ﺣﺎﻟﻬﺎ ..
ﺍﻧﻌﺎﻡ ﺗﻨﻬﺪﺕ : ﻣﺎﺭﻗﺪﺕ ﺇﻻ ﺑﺎﻟﺴﻴﻒ ...
ﻣﺠﻴﺪﻩ : ﻻﺣﻮﻝ ﻭﻻﻗﻮﺓ ﺇﻻ ﺑﺎﻟﻠﻪ ..
ﻓﺠﺄﺓ ﺧﺶ ﻋﻠﻴﻬﻢ ... ﻭﻗﻌﺪ ﻭﺍﻗﻒ ﻓﻲ ﺍﻟﺒﺎﺏ ﻛﻠﻬﻢ ﻳﺸﺒﺤﻮﻟﻪ ...
ﺑﺮﻧﻴﻪ ﻧﺎﺿﺖ : ﻭﻟﻴﺪﻱ ..
ﺍﻟﺤﺴﻦ ﻏﻤﺾ ﻋﻴﻮﻧﻪ ﻭﺍﺷﺮﻟﻬﺎ ﺑﻴﺪﻩ ✋
ﺍﻧﺼﺪﻣﻮﺍ ﻛﻠﻬﻢ ﻣﺶ ﺑﺮﻧﻴﻪ ﺑﺲ .. ﺍﻟﺘﻔﺖ ﺟﻬﺔ ﺍﻟﺮﺟﺎﻟﻪ ﺷﺒﺢ ﻟﻌﺎﺑﺪ ..
ﺍﻟﺤﺴﻦ : ﺗﻌﺎﻟﻰ ﻟﻠﻤﺮﺑﻮﻋﻪ ... ﻣﺸﻲ ... ﻭﻋﺎﺑﺪ ﻧﺎﺽ ﻭﻃﻠﻊ ﻭﺭﺍﻩ ...
ﺟﻨﺎﻥ : ﺷﻜﻠﻪ ﻣﺎﻋﺠﺒﻨﻴﺶ ..
ﺳﺎﺭﻩ : ﺷﻔﺘﻲ ﻛﻴﻒ ﺗﻌﺎﻣﻞ ﻣﻊ ﺣﻨﺎﻱ ..
ﺧﻮﻟﻪ : ﻭﻻ ﺍﻟﻄﺮﻳﻘﻪ ﺍﻟﻠﻲ ﻛﻠﻬﻢ ﺑﻴﻬﺎ ﺑﺎﺑﺎ ... ﻣﺎﺗﻘﻮﻟﺶ ﺍﻟﺤﺴﻦ ﺑﻜﻞ ..
ﻓﻲ ﺍﻟﻤﺮﺑﻮﻋﻪ
ﺧﺶ ﺍﻟﺤﺴﻦ ﻗﻌﻤﺰ ﻭﻭﺭﺍﻩ ﻋﺎﺑﺪ ﻗﻌﻤﺰ ﻣﻘﺎﺑﻠﻪ ..
ﺍﻟﺤﺴﻦ : ﺍﻟﺴﺆﺍﻝ ﺍﻟﻠﻲ ﻧﺴﺄﻟﻪ ﻧﺒﻲ ﺍﺟﺎﺑﺘﻪ ﺍﺟﺎﺑﻪ ﻛﺎﻣﻠﻪ ﺑﺪﻭﻥ ﻟﻒ ﻭﻻﺩﻭﺭﺍﻥ ...
ﻋﺎﺑﺪ : ﻣﺮﻛﺰ ﻉ ﻧﻔﺴﻚ ﻛﻴﻒ ﺗﺘﻜﻠﻢ ﻣﻌﺎﻱ ..
ﺍﻟﺤﺴﻦ ﺑﻨﻔﺎﺫ ﺻﺒﺮ : ﻣﺶ ﻭﻗﺘﻪ ﺑﻜﻞ ..
ﻋﺎﺑﺪ ﻫﺰ ﺭﺍﺳﻪ ﺑﺈﻳﺠﺎﺏ : ﺃﺳﺄﻝ ...
ﺍﻟﺤﺴﻦ : ﺍﻧﻲ ﻭﻳﻦ ﻛﻨﺖ ﻟﻤﺎ ﺑﻮﻱ ﻭﺍﻣﻲ ﺩﺍﺭﻭ ﺍﻟﺤﺎﺩﺙ ﻭﻭﻳﻦ ﻛﺎﻧﻮﺍ ﻣﺎﺷﻴﻦ
ﻋﺎﺑﺪ ﻗﻠﺒﻪ ﻭﺟﻌﻪ ﻟﻤﺎ ﻗﺎﻝ ﺑﻮﻱ ﻭﺃﻣﻲ : ﺍﻣﻚ .. ﺯﻫﺮﻩ .. ﻛﺎﻧﺖ ﻛﻞ ﺷﻬﺮ ﺗﺰﻭﺭ ﻓﻲ ﺃﻫﻠﻬﺎ ﻭﺗﻘﻌﺪ ﻋﻨﺪﻫﻢ ﺍﺳﺒﻮﻉ ﻷﻧﻬﻢ ﻣﻦ ﻣﺪﻳﻨﻪ ﺑﻌﻴﺪﻩ .. ﻫﺬﺍﻛﺎ ﺍﻟﻴﻮﻡ ﺑﻮﻙ ﻛﺎﻥ ﺭﺍﻓﻌﻬﺎ ... ﻭﺧﻼﻙ ﻋﻨﺪ ﺧﺎﻟﺘﻲ ﺑﺮﻧﻴﻪ ..
ﺍﻟﺤﺴﻦ : ﺍﻣﻲ ﻣﺘﻌﻮﺩﻩ ﺗﻤﺸﻲ ﻭﺗﺨﻠﻴﻨﻲ ..
ﻋﺎﺑﺪ : ﻻ .. ﺧﺎﻟﺘﻲ ﻃﻠﺒﺖ ﻣﻦ ﺑﻮﻙ ﻳﺨﻠﻴﻚ ﻋﻨﺪﻫﺎ ﻹﻧﻬﺎ ﺍﺳﺘﺎﺣﺸﺘﻚ ﻭﻟﻴﻬﺎ ﻣﺪﻩ ﻋﻠﻴﻚ ﻣﻦ ﻟﻤﺎ ﺳﻴﻒ ﺳﻴﺐ ﺣﻮﺵ ﺑﻮﻱ ..
ﺍﻟﺤﺴﻦ : ﻋﻼﺵ ﺳﻴﺒﻪ ..
ﻋﺎﺑﺪ : ﺻﺎﺭﺕ ﻣﺸﻜﻠﻪ ﺑﻴﻨﻪ ﻭﺑﻴﻦ ﺑﻮﻱ ...
ﺍﻟﺤﺴﻦ : ﺳﺒﺐ ﺍﻟﻤﺸﻜﻠﻪ ..
ﻋﺎﺑﺪ ﺗﻨﻬﺪ : ﺧﺪﻣﻪ ﺑﻮﻙ ﻭﺍﻟﺘﻬﺪﻳﺪﺍﺕ ﺍﻟﻠﻲ ﻛﺎﻧﺖ ﺗﺠﻴﻪ .. ﺍﺣﻤﻢ
... ﺑﻮﻱ ﻛﺎﻥ ﺧﺎﻳﻒ ﻋﻠﻴﻪ ﻭﻉ ﻋﻴﻠﺘﻪ .. ﻭﻗﺎﻟﻪ .. ﺳﻴﺐ ﺍﻟﺨﺪﻣﻪ ﻟﻜﻦ ﻫﻮ ﺻﻜﺮ ﺭﺍﺳﻪ .. ﻭﺟﺪﻙ ﺧﻴﺮﻩ ﺑﻴﻨﻪ ﻭﺑﻴﻦ ﺍﻟﺨﺪﻣﻪ .. ﺍﺧﺘﺎﺭ ﺧﺪﻣﺘﻪ ﻭﻃﻠﻊ ﻣﻦ ﺍﻟﺤﻮﺵ ..
ﺍﻟﺤﺴﻦ ﺣﺲ ﺑﺘﻮﺗﺮ ﻋﺎﺑﺪ ﻭﺷﻚ ﻓﻲ ﻛﻼﻣﻪ ﺑﺲ ﻣﺎﺑﺎﺵ ﻳﻮﻗﻒ ﻋﻨﺪﻩ ..
ﺍﻟﺤﺴﻦ : ﻟﻤﺎ ﺑﻮﻱ ﻭﺍﻣﻲ .. ﺗﻮﻓﻮﺍ ﻛﺎﻥ ﻋﻤﺮﻱ ﺍﺭﺑﻌﻪ ﺳﻨﻴﻦ .. ﻳﻌﻨﻲ ﻣﺴﺠﻞ ﻉ ﺍﺳﻤﻪ .. ﻛﻴﻒ ﺍﺗﺴﺠﻠﺖ ﻉ ﺍﺳﻤﻚ .. ﻛﻴﻒ ﺩﺭﺗﻠﻲ ﺻﻔﺤﻪ ﻓﻲ ﻛﺘﻴﺐ ﺍﻟﻌﺎﺋﻠﻪ ﻣﺘﺎﻋﻚ . ؟؟ !!
ﻋﺎﺑﺪ : ﺟﺪﻙ ﻛﺎﻧﺖ ﻋﻨﺪﻩ ﻫﻠﺒﻪ ﻋﻼﻗﺎﺕ ﻓﻲ ﺍﻟﺪﻭﻟﻪ ﺣﺎﺟﻪ ﺯﻱ ﻫﺎﺩﻱ ﻣﺶ ﺻﻌﺒﻪ ﻋﻠﻴﻪ ..
ﺍﻟﺤﺴﻦ : ﺍﻟﺘﺰﻭﻳﺮ ﻣﺶ ﺻﻌﺐ ﻋﻠﻴﻪ .. ؟ !!
ﻋﺎﺑﺪ : ﻣﺎﺩﻗﻘﺶ ﻫﻠﺒﻪ ..
ﺍﻟﺤﺴﻦ : ﻣﺎﻧﺪﻗﻘﺶ !!! ؟؟؟ﺍﺳﺎﺳﺎ ﻋﻼﺵ ﺩﻳﺮﻭﺍ ﻫﻜﻲ .. ﻋﻼﺵ ﺗﺒﻮﺍ ﺗﺨﻔﻮﺍ ﺳﻴﺮﺓ ﺳﻴﻒ ﻭﺍﻱ ﺷﻲ ﻳﺘﻌﻠﻖ ﺑﻴﻪ !! ؟
ﻋﺎﺑﺪ : ﺟﺪﻙ ﻫﻜﻲ ﻳﺒﻲ ..
ﺍﻟﺤﺴﻦ ﺷﺒﺤﻠﻪ ﻫﻠﺒﻪ ﻭﻧﺎﺽ : ﺗﻌﺎﻟﻰ ﻣﻌﺎﻱ .. ﻧﺎﺽ ﻋﺎﺑﺪ ﻭﻣﺸﻲ ﻣﻌﺎﻩ ﻭﺻﺪﺭﻩ ﺿﺎﻳﻖ ﻉ ﺍﻵﺧﺮ ﻣﻦ ﻣﻌﺎﻣﻠﻪ ﺍﻟﺤﺴﻦ ﻟﻴﻪ ..
ﺧﺸﻮﺍ ﻟﺪﺍﺭ ﻭﻛﻠﻬﻢ ﻛﺎﻧﻮﺍ ﻳﺸﺒﺤﻮﻟﻬﻢ ﻭﻳﺘﺮﻗﺒﻮﺍ ..
ﺍﻟﺤﺴﻦ : ﻣﻦ ﻫﺎﻟﻠﺤﻈﻪ .. ﻣﺮﺗﻚ ﻭﺑﻨﺎﺗﻬﺎ ﻣﺎﻧﺒﻴﺶ ﻧﺸﻮﻓﻬﻢ ﻣﻦ ﻏﻴﺮﺣﺠﺎﺏ .. ﻭﺣﻴﻜﻮﻥ ﻓﻲ ﺣﺪﻭﺩ ﻓﻲ ﺍﻟﺘﻌﺎﻣﻞ ﻣﻌﺎﻫﻢ ..
ﻭﺳﻴﻠﻪ ﻗﻠﺒﻬﺎ ﺍﻧﻌﺼﺮ ﻭﺩﻣﻮﻋﻬﺎ ﻳﻨﺰﻟﻮﺍ .. ﻭﺍﻟﺒﻨﺎﺕ ﻣﺶ ﻓﺎﻫﻤﺎﺕ ﺷﻲ ﺯﻱ ﺍﻟﻤﺴﺒﻮﻫﺎﺕ ...
ﻭﺣﺴﺎﻥ ﻳﺸﺒﺤﻠﻪ ﺑﺼﺪﻣﻪ ﻭﺍﺳﺘﻐﺮﺍﺏ ﻓﻲ ﻧﻔﺲ ﺍﻟﻮﻗﺖ .. ﻋﻜﺲ ﻋﻠﻲ ﺍﻟﻠﻲ ﻛﺎﻥ ﻋﺎﺭﻑ ﻭﻓﺎﻫﻢ ﻛﻞ ﺷﻲ ...
ﺍﻟﺤﺴﻦ : ﻋﻤﺮﻱ ﻣﺎﺣﻨﻨﺴﻰ ﺍﻟﻠﻲ ﺩﺭﺗﻮﻩ ﻓﻴﺎ ... ﺷﺒﺢ ﻟﺒﺮﻧﻴﻪ .. ﻭﻻﻋﺎﺩ ﻧﻘﺪﺭ ﻧﻮﺛﻖ ﻓﻴﻜﻢ ﺑﻌﺪ ﻫﻜﻲ .. ﻳﻌﺪﻱ ﺭﻣﻀﺎﻥ .. ﺑﻌﺪ ﺍﻟﻌﻴﺪ ﻣﺒﺎﺷﺮﻩ ﺣﻨﻄﻠﻊ ﻣﻦ ﺍﻟﺤﻮﺵ ... ﻭﻳﺎﺭﻳﺖ .. ﻣﺎﻧﺒﻲ ﻧﺘﻮﺍﺻﻞ ﻣﻊ ﺣﺪ ﻣﻨﻜﻢ ﻟﻔﺘﺮﺓ ... ﻭﻟﻒ ﺑﻴﻄﻠﻊ ....
ﻟﻴﻦ ﺳﻤﻊ ﻋﻴﺎﻁ ﻭﻗﻔﻪ ..
ﺍﻧﻌﺎﻡ : ﺃﻣﻴﻴﻴﻴﻴﻴﻴﻴﻴﻲ ..
ﺗﻠﻔﺖ ﺑﺒﻂﺀ ﻟﻘﺎﻫﺎ ﻓﺎﻗﺪﻩ ﺍﻟﻮﻋﻲ ﻓﻲ ﻭﺳﻄﻬﻢ ..💔
***
ﻧﻮﺑﻪ ﻗﻠﺒﻴﻪ ﺑﺲ ﺍﻟﺤﻤﺪ ﻟﻠﻪ ﻋﺪﺕ ﻉ ﺧﻴﺮ ..
ﻣﺤﻤﺪ : ﻳﻌﻨﻲ ﻳﺎﺩﻛﺘﻮﺭ ﻣﺎﻓﻴﺶ ﺧﻄﺮ ﻉ ﺣﻴﺎﺗﻬﺎ ...
ﺍﻟﺪﻛﺘﻮﺭ : ﻻ ﻣﺎﻓﻴﺶ ﺧﻄﺮ ..
ﻛﻠﻬﻢ ﺑﺄﺻﻮﺍﺕ ﻣﺘﻘﻄﻌﻪ : ﺍﻟﺤﻤﺪ ﻟﻠﻪ ...
ﺳﺮﻣﺪ ﻛﺎﻥ ﻳﺸﺒﺢ ﻟﻠﺤﺴﻦ ﺍﻟﻠﻲ ﻛﺎﻥ ﻭﺍﻗﻒ ﺑﻌﻴﺪ ﺷﻮﻳﻪ ﻭﻳﺸﺒﺢ ﻟﻠﻔﺮﺍﻍ ﻭﺳﺮﺣﺎﻥ ...
ﻗﻌﺪ ﺍﻟﺤﺴﻦ ﻓﻲ ﺍﻟﻤﺴﺘﺸﻔﻰ ﻣﺎﺑﺎﺵ ﻳﻔﺎﺭﻗﻬﺎ ﻟﻜﻦ ﻣﺎﺑﺎﺵ ﻳﺨﺶ ﻉ ﺑﺮﻧﻴﻪ .. ﻧﻬﺎﺋﻲ ... ﻗﺎﻋﺪ ﻏﻀﺒﻪ ﻣﻬﺪﺍﺵ .. ﻭﺯﻋﻼﻥ ﻣﻨﻬﻢ ﻫﻠﺒﻪ .. ﻭﻣﺶ ﻗﺎﺩﺭ ﻳﺒﻠﻊ ﺍﻟﻠﻲ ﺻﺎﺭ ﻣﻌﺎﻩ ... ﻣﺎﻳﻨﺒﻠﻌﺶ ﺍﺻﻼ ..
ﺗﻌﻴﺶ ﻋﻤﺮ ﻛﺎﻣﻞ ﻭﺍﻧﺖ ﻓﻲ ﻭﺳﻂ ﻋﻴﻠﻪ ﻉ ﺍﺳﺎﺱ ﺍﻧﻬﻢ ﻋﻴﻠﺘﻚ . ﺭﺍﺟﻞ ﻉ ﺍﺳﺎﺱ ﺍﻧﻪ ﺑﻮﻙ .. ﻣﺮﺍﻩ ﻉ ﺍﺳﺎﺱ ﺍﻧﻪ ﺍﻣﻚ ..
ﺑﻨﺎﺕ ﻉ ﺍﺳﺎﺱ ﺍﻧﻬﻢ ﺧﻮﺍﺗﻚ .. ﻭﻻﺩ ﻉ ﺍﺳﺎﺱ ﺍﻧﻬﻢ ﺧﻮﺗﻚ .. ﻭﻉ ﺍﺳﺎﺱ ﺍﻧﺖ ﻋﻢ ﺻﻐﺎﺭﻫﻢ ... ﻭﺗﻜﺘﺸﻒ ﺍﻥ ﻫﺬﺍ ﻛﻠﻪ ﻛﺬﺏ ... ﻭﺗﻜﺘﺸﻒ .. ﺃﻥ ﻟﻴﻚ ﻋﻴﻠﻪ ﻏﻴﺮﻫﻢ .. ﺑﺲ ﺗﺤﺖ ﺍﻟﺘﺮﺍﺏ .. ﻣﻦ ﺳﻨﻴﻴﻴﻴﻦ ﻭﺳﻨﻴﻴﻴﻴﻦ .. ﺻﻌﺐ ﻫﻠﺒﻪ ...
ﺑﻌﺪ ﺍﺻﻌﺐ 5 ﺍﻳﺎﻡ ﻣﺮﻭﺍ ﻉ ﺍﻟﻌﻴﻠﻪ .. ﻃﻠﻌﺖ ﺑﺮﻧﻴﻪ .. ﺭﻣﻀﺎﻥ ﻫﺬﺍ ﻣﺎﺣﺴﻮﺵ ﺑﺒﻨﺘﻪ ﺑﻜﻞ ﻛﻠﻪ ﻓﺎﺕ ﻓﻲ ﺍﻟﻬﻢ ﻭﺍﻟﻨﻜﺪ ....
ﺍﻟﺤﺴﻦ ﻛﺎﻥ ﻳﺘﺠﻨﺐ ﻳﺠﺘﻤﻊ ﺑﺤﺪ ﻣﻦ ﺍﻟﻌﻴﻠﻪ ﺍﻏﻠﺐ ﻳﻮﻣﻪ ﺑﻴﻦ ﺍﻟﻤﺮﻛﺰ ﻭﺍﻟﺠﺎﻣﻊ ﺣﺘﻰ ﻓﻄﻮﺭ ﻳﻔﻄﺮ ﺑﺮﺍ .. ﻋﻠﻴﺎ .. ﻋﻠﻴﺎ ﺑﺲ ﺍﻟﻠﻲ ﻛﺎﻧﺖ ﺗﻬﻤﻪ ... ﻛﻞ ﻭﻗﺖ ﻣﺘﺄﻛﺪ ﺍﻧﻬﺎ ﺗﻜﻮﻥ ﻓﻴﻪ ﺭﺍﻗﺪﻩ ﻳﺨﺶ ﻟﻠﺤﻮﺵ .. ﺑﺎﻟﺨﻨﺒﻪ ﻳﺸﻮﻓﻬﺎ ﻭﻳﻄﻠﻊ ...
ﻓﻲ ﻟﻴﻠﻪ ...
ﺭﻭﺡ ﻭﺗﻮﺟﻪ ﻟﻠﻌﻨﺒﻪ ﻗﻌﻤﺰ ﺗﺤﺘﻬﺎ ﻭﻫﻮ ﻣﻐﻤﺾ ﻳﻤﺮ ﻗﺪﺍﻣﻪ ﺷﺮﻳﻂ ﺣﻴﺎﺗﻪ .. ﻳﻌﺼﺮ ﻓﻲ ﺫﺍﻛﺮﺗﻪ ﻳﺒﻲ ﻳﺬﻛﺮ ﻭﻟﻮ ﺑﺮﻫﻪ ﺑﺴﻴﻄﻪ ﻣﻦ ﺑﻮﻩ ﻭﺍﻣﻪ .. ﺑﺲ ﻟﻸﺳﻒ ﻣﺎﺫﻛﺮ ﺷﻲ .. ﻭﻻﺍﻱ ﺷﻲ .. ﻭﻛﺈﻥ ﺫﺍﻛﺮﺗﻪ ﺗﻘﻮﻟﻪ .. ﻻﻳﻮﺟﺪ ﻫﺬﺍ ﺍﻟﻤﻠﻒ ..📂
" ﺗﺴﻤﺤﻠﻲ ﻧﺸﺎﺭﻛﻚ ﻭﺣﺪﺗﻚ .."
ﺍﻟﺤﺴﻦ ﻣﺠﺮﺩ ﺳﻤﻊ ﺻﻮﺗﻬﺎ ﺍﻟﻠﻲ ﻟﻴﻪ ﻫﻠﺒﻪ ﻣﺎﺳﻤﻌﺎﺵ ﺣﺲ ﺍﻟﺮﻭﺡ ﺩﺑﺖ ﻓﻴﻪ .. ﺣﺲ ﻫﻠﺒﻪ ﺍﺣﺴﺎﺳﻴﺲ ﺣﻠﻮﻩ ﻣﺪﺍﺧﻠﻪ ..
ﺍﻟﺤﺴﻦ ﻓﺘﺢ ﻋﻴﻮﻧﻪ ﻗﻠﺒﻪ ﻗﻌﺪ ﻳﺮﻓﺮﻑ 💕 ﻫﺰ ﺭﺍﺳﻪ ﺑﺈﻳﺠﺎﺏ ﺭﺩﺍ ﻉ ﺳﺆﺍﻟﻬﺎ .. ﻗﺪﻣﺖ ﻭﻗﻌﻤﺰﺕ ﺟﻨﺒﻪ ﺑﻤﺴﺎﻓﻪ ..
ﺍﻟﺤﺴﻦ ﻗﻌﺪ ﻳﺸﺒﺤﻠﻬﺎ ﻭﺑﺼﻮﺕ ﻣﺒﺤﻮﺡ : ﺧﻴﺮﻙ ﺑﻌﻴﺪﻩ ..
ﻋﻠﻴﺎ : ﺗﺒﻴﻨﻲ ﻧﻘﺮﺏ ..
ﺍﻟﺤﺴﻦ : ﻫﺬﺍ ﺳﺆﺍﻝ ﺗﺴﺄﻟﻴﻪ ..
ﻋﻠﻴﺎ ﺍﺑﺘﺴﻤﺖ ﻭﻗﺮﺑﺖ ﻣﻨﻪ : ﺧﻴﺮﻩ ﺻﻮﺗﻚ .. ﺭﻗﺒﺘﻚ ﺗﻮﺟﻊ ﻓﻴﻚ ..
ﺍﻟﺤﺴﻦ ﺑﻼﻣﺒﺎﻻﻩ : ﻣﺎﺩﻭﺭﻳﺶ ..
ﻋﻠﻴﺎ ﺗﻨﻬﺪﺕ : ﺣﺎﺳﻪ ﺑﻴﻚ ﻭﻓﺎﻫﻤﻪ ﺷﻌﻮﺭﻙ .. ﺍﻟﻠﻲ ﺍﻧﺖ ﺻﻌﺐ ﻫﻠﺒﻪ ... ﻭﻣﻦ ﺣﻘﻚ ﺗﺎﺧﺪ ﻭﻗﺘﻚ ﺑﺎﻟﻄﺮﻳﻘﻪ ﺍﻟﻠﻲ ﺗﺒﻴﻬﺎ ﺑﺶ ﺗﺴﺘﻮﻋﺒﻪ .. ﺑﺲ ﺍﻧﺖ ﻻﺯﻡ ﺗﺘﻘﺒﻞ ﺑﺴﺮﻋﻪ ﻟﺴﺒﺐ ﻭﺍﺣﺪ ﺑﺶ ﺗﺎﺧﺪ ﺑﺘﺎﺭﻩ ...
ﺍﻟﺤﺴﻦ ﻗﻌﺪ ﻳﺸﻮﻑ ﻟﻌﻴﻮﻧﻬﺎ ﻭﻧﻈﺮﺗﻬﻢ ﺍﻟﻠﻲ ﻛﻠﻬﺎ ﻗﻮﺓ ..
ﻋﻠﻴﺎ : ﺳﺒﺤﺎﻥ ﺍﻟﻠﻪ ﺍﻟﻠﻲ ﺍﺭﺍﺩ ﺍﻧﻚ ﺗﻜﻤﻞ ﻃﺮﻳﻘﻪ .. ﺍﻟﻠﻲ ﺍﺭﺍﺩ ﺍﻥ ﻫﺎﻟﻤﺠﺮﻣﻴﻦ ﻣﻬﻤﺎ ﻃﺎﻝ ﺑﻴﻬﻢ ﺍﻷﻣﺪ ﻻﺯﻡ ﺣﺘﻜﻮﻥ ﻟﻴﻬﻢ ﻧﻬﺎﻳﻪ ..
ﺣﻄﺖ ﺍﻳﺪﻫﺎ ﻉ ﺍﻳﺪﻩ .. ﻭﺣﺘﻜﻮﻥ ﻉ ﻳﺪﻙ ﺍﻧﺖ ... ﺳﻜﺘﺖ ﻭﺷﺪﺕ ﻳﺪﻩ ﺑﺈﻳﺪﻫﺎ ﺍﻟﺰﻭﺯ ... ﻋﻴﻠﺘﻚ .. ﺣﺘﻰ ﻟﻮ ﻏﻠﻄﻮﺍ ﻓﻲ ﺍﻧﻬﻢ ﺩﺭﻗﻮﺍ ﻋﻠﻴﻚ .. ﻟﻜﻨﻬﻢ ﻣﺎﻗﺼﺮﻭﺵ ﻓﻲ ﺣﻘﻚ ﺑﻜﻞ .. ﺣﻨﺎﻱ ﺑﺮﻧﻴﻪ ﻋﻤﺘﻲ ﻭﺳﻴﻠﻪ ﻏﺮﻗﻮﻙ ﺑﺎﻟﺤﺐ ﻭﺍﻟﺤﻨﺎﻥ .. ﻓﻀﻠﻮﻙ ﻉ ﺻﻐﺎﺭﻫﻢ .. ﻋﻤﻲ ﻋﺎﺑﺪ ﻛﺎﻥ ﻟﻴﻚ ﺍﺏ ﻳﺤﺒﻚ ﻭﻳﺨﺎﻑ ﻋﻠﻴﻚ .. ﻭﺍﻛﺒﺮ ﺩﻟﻴﻞ ﻣﻮﻗﻔﻪ ﻣﻦ ﺯﻭﺍﺟﻨﺎ ﻟﻮ ﺑﻨﺸﻮﻓﻠﻪ ﻣﻦ ﺯﻭﺍﻳﺘﻪ ﻫﻮ .. ﺣﻨﻌﺮﻑ ﺍﻥ ﻣﻦ ﺧﻮﻓﻪ ﻋﻠﻴﻚ ﺭﻓﺾ .. ﺑﺲ ﺑﻌﺪﻳﻦ ﺗﻘﺒﻞ ﻟﻤﺎ ﺷﺎﻓﻚ ﻣﺮﺗﺎﺡ ...
ﻋﺸﺖ ﺑﻴﻦ ﺧﻮﺕ ﻭﺧﻮﺍﺕ .. ﺭﺑﻲ ﺧﺪﻱ ﻣﻨﻚ ﺷﻲ ﻭﻋﻄﺎﻙ ﺍﺷﻴﺎﺀ ﻳﺎﻟﺤﺴﻦ .. ﻋﻴﻠﻪ ﺗﺤﺒﻚ ﻭﺗﺤﺘﺮﻣﻚ .. ﻭﺍﻧﺖ ﻟﻴﻚ ﻋﻨﺪﻫﻢ ﻣﻜﺎﻧﻪ ﺧﺎﺻﻪ ﻣﺎﺣﺪ ﻭﺻﻠﻬﺎ .. ﺍﺯﻋﻞ ﻣﻨﻬﻢ .. ﻟﻜﻦ ﺭﺩ ﺑﺎﻟﻚ ﺗﻜﻮﻥ ﺟﺎﺣﺪ .. ﻭﺗﻨﻜﺮ ﺟﻤﻴﻠﻬﻢ .... ﻣﺎﻧﻌﺮﻓﻜﺶ ﻫﻜﻲ ...
ﺍﻟﺤﺴﻦ ﺑﺤﺐ : ﺍﻧﻲ ﺭﺑﻲ ﻳﺤﺒﻨﻲ .. ﻟﺤﻄﻚ ﻓﻲ ﻃﺮﻳﻘﻲ .. ﺍﻟﻠﻲ ﻓﺮﺿﻚ ﻋﻠﻴﺎ ... ﺍﻟﻠﻲ ﺟﺒﺮﻧﻲ ﺗﻜﻮﻧﻲ ﻗﺪﺭﻱ ﺍﻟﻠﻲ ﻧﻌﻴﺸﻪ .. ﻋﻠﻴﺎ .. ﺣﻂ ﺍﻳﺪﻩ ﻉ ﺧﺪﻫﺎ .. ﺍﻧﺘﻲ ﺍﻟﺤﺎﺟﻪ ﺍﻟﻮﺣﻴﺪﻩ ﺍﻟﺤﻘﺎﻧﻴﻪ ﻓﺤﻴﺎﺗﻲ .. ﺍﻧﺘﻲ ﺍﻣﻲ ﻭﺑﻮﻱ ﻭﻋﻴﻠﺘﻲ ﺍﻟﻠﻲ ﺍﻧﻲ ﻧﻨﺘﻤﻴﻠﻬﻢ .. ﺍﻧﺘﻲ ﺍﻟﻮﻃﻦ ﺍﻟﺘﺎﻧﻲ ﻟﻴﺎ ﺍﻟﻠﻲ ﻧﻌﺸﻘﻪ ﻋﺸﻖ ﻣﺎﻻﺵ ﺣﺪ ..
ﺍﻧﺘﻲ ﻧﻘﻄﺔ ﻗﻮﺗﻲ ... ﻭﺍﻧﻲ ﺍﻟﻠﻲ ﻛﻨﺖ ﺧﺎﻳﻒ ﺗﻜﻮﻧﻲ ﻧﻘﻄﻪ ﺿﻌﻔﻲ ... ﻋﻠﻴﺎ ﺑﺄﺧﺘﺼﺎﺭ ﺍﻧﺘﻲ ﻛﻞ ﺷﻲ ﻟﻠﺤﺴﻦ ..
ﻋﻠﻴﺎ ﺑﻌﺸﻖ : ﻭﺍﻧﺖ ﺭﻭﺡ ﻋﻠﻴﺎ ﺍﻟﻠﻲ ﻋﺎﻳﺸﻪ ﺑﻴﻬﺎ .. ﻗﺮﺑﺖ ﻣﻨﻪ ﻭﺑﺎﺳﺎﺗﻪ ﻭﻫﻮ ﺑﺎﺩﻟﻬﺎ ... ﻛﺎﻧﺖ ﺑﻮﺳﻪ ﻃﻮﻳﻠﻪ ﺑﻤﺸﺎﻋﺮ ﻗﻮﻳﻪ ﺗﻌﺒﺮ ﻋﻦ ﻛﻞ ﺷﻲ ... ﻣﺎﻗﺪﺭﻭﺵ ﻳﺒﻌﺪﻭﺍ ﻋﻦ ﺑﻌﺾ ﺑﻜﻞ ﻗﺮﺑﻬﺎ ﻟﻴﻪ ﻭﺣﻀﻨﻬﺎ ﻛﺎﻥ ﻳﺒﻲ ﻳﺤﺲ ﺑﺎﻷﻣﺎﻥ ﺍﻛﺜﺮ .. ﻭﻷﻭﻝ ﻣﺮﺓ ﻳﺤﺲ ﺑﺎﻻﻣﺎﻥ ﻓﻲ ﻗﺮﺏ ﺣﺪ ...
ﺍﺳﺘﻤﺮﻭﺍ ﻟﻠﺤﻈﺎﺕ ... ﺑﻌﺪﻳﻦ ﺑﻌﺪﻭﺍ ..
ﺍﻟﺤﺴﻦ ﻭﻫﻮ ﺷﺎﺩ ﻭﺟﻬﻬﺎ : ﺍﺍﺍﺍﺍﺍﻩ ... ﺩﺍﻭﻳﺘﻲ ﻗﻠﺒﻲ ﻓﻠﺤﻈﻪ ..
ﻋﻠﻴﺎ ﺷﺪﺕ ﻭﺟﻬﻪ ﺑﺈﻳﺪﻳﻬﺎ : ﻭﻫﺬﺍ ﺍﻟﻠﻲ ﺍﻧﻲ ﻭﻟﻴﺖ ﻋﺎﻳﺸﻪ ﻉ ﺧﺎﻃﺮﻩ .. ﻧﺮﻋﻰ ﻗﻠﺒﻚ ﻭﻧﺤﺒﻪ ﺑﻜﻞ ﻣﺎﻓﻴﺎ ..
ﺍﻟﺤﺴﻦ : ﺍﺍﺍﺥ ﻣﻨﻚ .. ﻭﺑﺎﺳﻬﺎ ﻣﻦ ﺟﺪﻳﺪ ﺑﺸﻐﻒ ﺷﺪﻳﺪ ... ﻃﻮﻝ .. ﻭﺑﻌﺪﻫﺎ ﺑﻌﺪ .. ﺿﺤﻚ .. ﺧﺎﻳﻒ ﻳﺎﺫﻥ ﻋﻠﻴﻨﺎ ﺍﻟﻔﺠﺮ ..
ﻋﻠﻴﺎ : ﻫﻬﻬﻬﻬﻬﻬﻬﻬﻪ ... ﺍﻟﺤﺴﻦ ..
ﺍﻟﺤﺴﻦ ﺑﻌﺸﻖ : ﺭﻭﺣﻪ ...
ﻋﻠﻴﺎ ﺧﺪﺕ ﺍﻳﺪﻩ ﺣﻄﺘﻬﺎ ﻉ ﺑﻄﻨﻬﺎ : ﻭﻻ ﻋﻨﺪﻙ ﺭﻭﺣﻴﻦ ..
ﺍﻟﺤﺴﻦ ﻓﺘﺢ ﻋﻴﻮﻧﻪ ﻉ ﻭﺳﻌﻬﻢ ﻭﻫﻮ ﻣﺘﻔﺎﺟﺄ ﻭﻓﺮﺣﺎﻥ : ﻧﺤﺒﻚ .. ﻣﻮﻭﻭﻭﺕ .. ﻭﻗﺮﺏ ﻭﺍﺳﺘﻤﺮﺕ .. ﻭﺻﻠﺔ ﺍﻟﺤﺐ .. ﺍﻟﻠﻲ ﻣﺎﺑﻄﻠﺶ ﺍﻟﺤﺴﻦ ﻳﻌﺰﻑ ﻟﺤﻨﻬﺎ ﻟﺤﻦ ﺍﻟﺸﻮﻕ ﺍﻟﻠﻲ ﻣﺎﻻﺵ ﻧﻬﺎﻳﻪ ﻣﻌﺎﻫﺎ ﻭﻻﺣﺪ ... ﻟﻴﻠﺘﻬﺎ ﺭﻛﺒﻮﺍ ﻓﻮﻕ .. ﺗﺴﺤﺮﻭﺍ ﻣﻊ ﺑﻌﺾ .. ﻭﺻﻠﻮﺍ ﺍﻟﻔﺠﺮ ﻭﺭﻗﺪﻭﺍ ﺍﻟﺤﺴﻦ ﺑﺮﺍ ﻭﻋﻠﻴﺎ ﻓﻲ ﺩﺍﺭ ﺍﻟﻨﻮﻡ ..😁 ﺑﺲ ﻧﻮﻣﻪ ﺑﻌﻤﻖ ... ﻭﺭﺍﺣﻪ ....
***
💛 ﻣﺎﺷﻴﻪ ﻓﻲ ﻣﻜﺎﻥ ﻓﺎﺿﻲ ﺗﻤﺸﻲ ﻭﺗﻤﺸﻲ ﻭﻣﺶ ﻋﺎﺭﻓﻪ ﻭﻳﻦ ﻣﺎﺷﻴﻪ .. ﻭﻗﻔﺖ ﻓﺠﺄﺓ ﻟﻤﺎ ﺷﺎﻓﺖ ﻣﻦ ﻣﺴﺎﻓﻪ ﺑﻌﻴﺪﻩ ﻣﻜﺎﻥ ﻛﻠﻪ ﺍﺧﻀﺮ ﻭﻣﺒﻬﺮ ﻟﻠﻌﻴﻦ ﻗﻌﺪﺕ ﺗﺸﺒﺤﻠﻪ .. ﺳﻤﻌﺖ ﺻﻮﺕ ﺿﺤﻚ .. ﻗﺮﺑﺖ ﺍﻛﺜﺮ ﺑﺲ ﻛﺎﻥ ﻫﺎﻭﻳﻪ ﻣﺎﺑﻴﻦ ﺍﻟﻤﻜﺎﻥ ﺍﻟﻠﻲ ﻓﻴﻪ ﻭﺍﻟﻤﻜﺎﻥ ﺍﻷﺧﻀﺮ ﺍﻟﺤﻠﻮ ... ﺭﻛﺰﺕ ﺑﻨﻈﺮﻫﺎ ﺍﻛﺜﺮ .. ﻟﻘﺖ ﺭﺍﺟﻞ ﻭﻣﺮﺍﻩ ﻭﻣﻌﺎﻫﻢ ﺗﻼﺗﻪ ﺷﺒﺎﺏ .. ﺭﻛﺰﺕ ﺍﻛﺜﺮ ﻭﺃﻛﺜﺮ .. ﻫﻤﺎ .. ﺍﻳﻪ .. ﻫﻤﺎ .. ﺑﻮﻫﺎ .. ﺍﻣﻬﺎ .. ﺧﻮﺗﻬﺎ ﺍﻟﺘﻼﺛﻪ .. ﻓﺮﺣﺖ ﻟﻤﺎ ﺷﺎﻓﺘﻬﻢ ﻭﻗﻌﺪﺕ ﺗﺒﻜﻲ .. ﺗﻨﺎﺩﻱ ﻓﻴﻬﻢ ﺑﺲ ﻣﺎﺳﻤﻌﻮﻫﺎﺵ ﻧﺎﺩﺕ ﺑﺼﻮﺕ ﺃﻋﻠﻰ ﺳﻤﻌﻮﻫﺎ ﻭﺷﺒﺤﻮﻟﻬﺎ ﻭﺟﻮﻫﻬﻢ ﻋﺒﺴﺖ ﻫﻲ ﺍﺗﻔﺎﺟﺌﺖ ﻣﻦ ﻧﻈﺮﺗﻬﻢ ﻟﻴﻬﺎ ﻭﺑﻌﺪﻳﻦ ﻧﺎﺿﻮﺍ ﻭﻣﺸﻮﺍ .. ﻭﻫﻲ ﺗﻨﺎﺩﻱ ﻓﻴﻬﻢ ﻭﺗﻌﻴﻂ ...
ﻫﺎﺍﺍﺍﺍﺍﺍﺍﺍﺍﺍﺍﺍﺍﺍﺍﺍﺍﻩ ..
ﻧﺎﺽ ﻣﻔﺰﻭﻉ : ﺣﺒﻴﺒﺘﻲ ﺧﻴﺮﻙ ..
ﻫﺎﻟﻪ ﻭﻫﻲ ﺗﺘﻨﻔﺲ ﺑﺼﻌﻮﺑﻪ ﺷﺒﺤﺘﻠﻪ ﺷﻮﻳﻪ ﻭﺑﺪﺕ ﺗﺒﻜﻲ ..
ﺣﺴﺎﻥ ﺑﺨﻮﻑ : ﻫﺎﻟﻪ ﺧﻴﺮﻙ ﺗﻜﻠﻤﻲ ...
ﻫﺎﻟﻪ ﺑﺎﻟﻌﺒﺮﺓ : ﺣﻠﻤﺖ .. ﺑﻴﻬﻢ .. ﺑﻮﻱ .. ﺍﻣﻲ .. ﺧﻮﺗﻲ .. ﻛﺎﻧﻮﺍ ... ﺯﻋﻼﻧﻴﻦ .. ﻣﻨﻲ ﻭﻭﺍﻧﻬﺎﺭﺕ ﺑﺎﻟﺒﻜﻲ ...
ﺣﺴﺎﻥ ﺷﺪ ﺍﻳﺪﻳﻬﺎ ﺍﻟﺰﻭﺯ ... ﻭﻳﺤﺎﻭﻝ ﻳﻬﺪﻳﻬﺎ ... ﻓﺘﺤﻠﻬﺎ ﻗﺮﺁﻥ ﻫﺪﺕ ﺷﻮﻳﻪ .... ﻭﺭﻗﺪﺕ ﻭﻫﻮ ﻗﻌﺪ ﻣﺸﻐﻮﻝ ﻋﻠﻴﻬﺎ ...
...
ﺗﺎﻧﻲ ﻳﻮﻡ ..
ﻋﻠﻴﺎ : ﺍﻧﺘﻲ ﻛﻨﺘﻲ ﺩﻳﺮﻳﻠﻬﻢ ﻓﻲ ﺷﻲ ﻭﻗﻄﻌﺘﻴﻪ ..
ﻫﺎﻟﻪ : ﺍﻳﻪ ﻭﺍﻟﻠﻪ ﺣﻖ ... ﻛﻨﺖ ﺯﻣﺎﻥ ﻧﻄﻠﻊ ﻓﻲ ﺻﺪﻗﻪ ﻉ ﺍﻣﻲ ﻭﺧﻮﺗﻲ ... ﻳﺎﺭﺑﻲ ﻧﺴﻴﺘﻬﺎ ﺑﺎﻟﻤﺮﻩ ...
ﻋﻠﻴﺎ : ﺧﻼﺹ ﻫﻤﺎ ﻳﺒﻮﻫﺎ ﻣﻨﻚ ... ﻭﻣﺎﻓﻴﺶ ﺯﻱ ﻫﺎﻟﺸﻬﺮ ﺍﻟﻤﺒﺎﺭﻙ .. ﺍﻟﻠﻲ ﺗﻀﺎﻋﻒ ﻓﻴﻪ ﺍﻷﺟﻮﺭ .. ﻃﻠﻌﻲ ﻋﻠﻴﻬﻢ ﺻﺪﻗﻪ .. ﻭﻻﻧﻘﻮﻟﻚ .. ﺷﻦ ﺭﺍﻳﻚ ﺗﺸﻮﻓﻲ ﺍﻛﺜﺮ ﺣﺪ ﻓﻜﺮﺑﻪ ﺍﻭ ﻣﺤﺘﺎﺝ ﻟﺸﻲ ﺿﺮﻭﺭﻱ ﻫﻠﺒﻪ ﺳﺎﻋﺪﻳﻪ ﻓﻴﻬﺎ ...
ﻫﺎﻟﻪ ﺗﻔﻜﺮ ﻓﻜﻼﻡ ﻋﻠﻴﺎ .....
***
ﺍﺣﻤﺪ : ﺳﺒﺤﺎﻥ ﺍﻟﻠﻪ ﻓﻮﻕ 30 ﻋﺎﻡ ﻭﻃﻠﻊ ﻃﻠﻊ ﻓﻲ ﺍﻟﻨﻬﺎﻳﻪ ...
ﺍﻟﺤﺴﻦ ﺣﻂ ﺍﻳﺪﻩ ﻉ ﺻﺪﺭﻩ : ﺣﺎﺱ ﺑﻮﺟﻊ ﻓﻀﻴﻊ .. ﻣﺶ ﻗﺎﺩﺭ ﻧﺴﺘﻮﻋﺐ ﻭﻻﻧﺼﺪﻕ ﺍﻟﻠﻲ ﻋﺮﻓﺘﻪ ...
ﺍﺣﻤﺪ : ﻃﺒﻴﻌﻲ ﺟﺪﺍ ... ﻣﻊ ﺍﻟﻮﻗﺖ ﺣﺘﺘﻘﺒﻞ ﻫﺎﻟﺤﻘﻴﻘﻪ ..
ﺍﻟﺤﺴﻦ : ﻣﺸﻴﺖ ﺯﺭﺕ ﻗﺒﻮﺭﻫﻢ .. ﻗﺎﻋﺪ ﻭﺍﻗﻒ ﻧﺸﻮﻓﻠﻬﺎ ﻭﺧﻼﺹ .. ﺣﺘﻰ ﺍﻟﺪﻋﺎﺀ ﻣﺎﻗﺪﺭﺗﺶ ﻧﺪﻋﻴﻠﻬﻢ ﻣﺶ ﻋﺎﺭﻑ ﻋﻼﺵ ..
ﺍﺣﻤﺪ : ﻫﻮﻥ ﻋﻠﻴﻚ .. ﺍﻧﺖ ﺣﺎﻭﻝ ﺗﻌﺮﻓﻬﻢ ﺍﻛﺜﺮ ﺍﺳﺄﻝ ﺍﻟﻨﺎﺱ ﺍﻟﻠﻲ ﻋﺎﺷﺮﺗﻬﻢ ﻋﻨﻬﻢ .. ﻋﻦ ﻛﻞ ﺗﻔﺎﺻﻴﻠﻬﻢ .. ﺑﺶ ﺗﺘﻘﺒﻞ ﺑﺴﺮﻋﻪ ..
ﺍﻟﺤﺴﻦ ﺗﻨﻬﺪ ﻭﺳﻜﺖ ..
ﺍﺣﻤﺪ : ﺍﺣﻤﺪ ﺭﺑﻚ ﺍﻟﻠﻲ ﻗﻌﺪﺕ ﻓﻲ ﻭﺳﻂ ﻋﻴﻠﺘﻚ ﻓﻮﺳﻂ ﺣﺒﻬﻢ ﻭﺭﻋﺎﻳﺘﻬﻢ .. ﺍﻟﻠﻲ ﻗﺪﺍﻣﻚ ﻣﺎﺗﻮﺍ ﺑﻮﻩ ﻭﺃﻣﻪ ﻣﺤﺮﻭﻗﻴﻦ .. ﺷﺒﺤﻠﻪ ﺍﻟﺤﺴﻦ ... ﻛﻨﺖ ﻓﻲ ﺣﻮﺵ ﺟﻴﺮﺍﻧﻨﺎ ﻧﻠﻌﺐ ﻣﻊ ﺻﻐﺎﺭﻫﻢ .. ﻛﺎﻥ ﻋﻤﺮﻱ 11 ﺳﻨﻪ ... ﻭﻟﻌﺖ ﻓﻲ ﺍﻟﺤﻮﺵ ﺍﻟﻨﺎﺭ ﺑﺴﺒﺐ ﺩﻓﺎﻳﻪ .. ﺍﻧﻲ ﺣﻄﻴﺖ ﻋﻠﻴﻬﺎ ﺣﻮﺍﻳﺠﻲ ﻭﻣﺸﻴﺖ .. ﻭﺍﻟﻨﻮﻋﻴﻪ ﻫﺬﻳﻜﺎ ﺍﻛﺒﺮ ﻏﻠﻂ ﻳﻨﺤﻂ ﻋﻠﻴﻬﺎ ﺍﻱ ﺷﻲ .. ﻫﻤﺎ ﻣﺎﻛﺎﻧﻮﺵ ﺣﺎﺳﻴﻦ ﺑﻴﻬﺎ .. ﻛﺎﻧﻮﺍ ﺍﻟﺰﻭﺯ ﻻﻫﻴﻴﻦ ﺑﺎﻟﺰﻳﺘﻮﻥ ﺍﻟﻠﻲ ﻛﺎﻧﻮﺍ ﻳﺠﻴﺒﻮﺍ ﻓﻴﻪ ﻣﻦ ﺣﻮﺍﺯﺓ ﺧﺎﻟﻲ .. ﻛﺎﻧﻮﺍ ﻳﺒﻴﻌﻮﺍ ﻓﻴﻪ ﻣﻌﻠﺐ ﻟﻠﻤﺤﻼﺕ .. ﺍﻟﻤﻬﻢ ... ﻛﻠﺖ ﺍﻟﻨﺎﺭ ﻧﺺ ﺍﻟﺤﻮﺵ ﻭﻫﻤﺎ ﻣﺶ ﺣﺎﺳﻴﻦ ... ﻣﺶ ﻋﺎﺭﻑ ﺷﻦ ﺻﺎﺭﻟﻬﻢ .. ﻣﺎﺗﻮﺍ ﻣﺨﻨﻮﻗﻴﻦ ﻣﻦ ﺍﻟﺪﺧﺎﻥ ﻭﻻ ﻣﺤﺮﻭﻗﻴﻦ ﺑﺎﻟﻨﺎﺭ .... ﺗﻨﻬﺪ ﺑﺤﺮﻗﻪ ..
ﺑﻌﺪ ﻣﺎﺗﻮﺍ ﻗﻌﺪﺕ ﻓﻲ ﺣﻮﺵ ﻋﻤﻲ ﺷﻮﻳﻪ .. ﻭﺑﻌﺪﻳﻦ ﺑﺤﺠﻪ ﺍﻧﻲ ﻭﻟﺪﻱ ﻭﻋﻤﻲ ﺫﺭﻳﺘﻪ ﺑﻨﺎﺕ ﺣﻄﻨﻲ ﻋﻨﺪ ﺧﻮﺍﻟﻲ .. ﻣﺎﺑﻮﺵ ﻳﺘﺤﻤﻠﻮﺍ ﻣﺴﺆﻭﻟﻴﺘﻲ ﻭﻗﺎﻟﻮﺍ ﺣﻨﻲ ﻣﺶ ﻣﻠﺰﻭﻣﻴﻦ ﺑﻴﻪ ... ﺍﻳﻪ ﻭﺍﻟﻠﻪ .. ﺭﻓﻌﻮﻧﻲ ﻟﺪﺍﺭ ﺃﻳﺘﺎﻡ ... ﻭﻗﻌﺪﺕ ﻏﺎﺩﻱ .. ﺑﺲ ﺍﻟﺤﻤﺪ ﻟﻠﻪ ﺍﻟﻤﺴﺆﻭﻟﻴﻦ ﻋﻨﻪ ﻛﺎﻧﻮﺍ ﻧﺎﺱ ﺗﺨﺎﻑ ﺭﺑﻲ ﺭﻋﻮﻧﺎ ﺍﺣﺴﻦ ﺭﻋﺎﻳﻪ ﻭﻟﻤﺎ ﻭﺻﻠﺖ 18 ﺳﻨﻪ ﻃﻠﻌﺖ ﻣﻨﻪ ﻛﻨﺖ ﻛﻴﻒ ﺧﺎﺵ ﻟﻜﻠﻴﺔ ﺍﻟﺸﺮﻃﻪ ﺧﺪﻣﺖ ﻭﻗﺮﻳﺖ ﻭﺍﻟﺤﻤﺪ ﻟﻠﻪ ﺭﺑﻚ ﻣﺎﻳﺨﻠﻲ ﺣﺪ .. ﻭﻟﻬﺎﻟﻠﺤﻈﻪ ﻗﺎﻋﺪ ﻉ ﺗﻮﺍﺻﻞ ﻣﻊ ﻣﺪﻳﺮ ﺍﻟﻤﻴﺘﻢ ﻋﻤﻲ ﻣﺼﺒﺎﺡ .. ﺍﻟﻠﻪ ﻳﺨﻠﻒ ﻋﻠﻴﻪ .. ﻫﻮ ﺍﻟﻠﻲ ﺧﻼﻧﻲ ﻧﺨﺘﺎﺭ ﺍﻟﺸﺮﻃﻪ ﻭﻛﺒﺮ ﺍﻟﻤﻮﺿﻮﻉ ﻓﺪﺍﺧﻠﻲ ﻭﻭﺻﻠﺖ ﻟﻠﻲ ﺍﻧﻲ ﻓﻴﻪ ...
ﺍﻟﺤﺴﻦ ﺍﺑﺘﺴﻢ : ﺍﻗﺪﺍﺭ ﺭﺑﻚ ... ﻣﻤﻜﻦ ﻟﻮ ﻗﻌﺪﺕ ﻣﻊ ﺣﺪ ﻣﻦ ﻋﻴﻠﺘﻚ ﻣﺎﻭﺻﻠﺘﺶ ﻟﻸﻧﺖ ﻓﻴﻪ ﺗﻮﺍ ...
ﺃﺣﻤﺪ : ﻭﺍﻧﺖ ﻛﺬﻟﻚ ﺍﻗﺪﺍﺭ ﺭﺑﻚ ﺍﻟﻠﻲ ﺧﻼﺗﻚ ﺗﻜﻤﻞ ﺍﻟﻠﻲ ﺑﺪﻱ ﺑﻴﻪ ﺑﻮﻙ ..
ﺍﻟﺤﺴﻦ : ﻭﻫﺬﺍ ﺍﻟﻠﻲ ﺑﻨﺨﺪﻡ ﻋﻠﻴﻪ ﺍﻷﻳﺎﻡ ﺍﻟﺠﺎﻳﻪ .. ﻓﻲ ﺣﺎﺟﺘﻴﻦ ﻣﺶ ﻗﺎﺩﺭ ﻧﺤﻮﻟﻬﻢ ﻣﻦ ﺑﺎﻟﻲ ... ﺍﻟﻄﺮﻳﻘﻪ ﺍﻟﻠﻲ ﻣﺎﺕ ﺑﻴﻬﺎ ... ﻭﻃﻠﻌﺘﻪ ﻣﻦ ﺣﻮﺵ ﺟﺪﻱ ... ﻻﺯﻡ ﻧﻌﺮﻑ ﺷﻦ ﻭﺭﺍ ﻫﺎﻟﺤﺎﺟﺘﻴﻦ ..
ﺍﺣﻤﺪ : ﻭﻧﻲ ﻣﻌﺎﻙ ..
ﺍﻟﺤﺴﻦ ﺷﺒﺤﻠﻪ ﻭﺍﺑﺘﺴﻢ ...
***
ﻓﻲ ﺍﻟﺘﺮﻭﺍﻳﺢ ...
ﺧﻮﻟﻪ ﻛﺎﻧﺖ ﺗﺴﻴﻖ ﻓﻲ ﺍﻟﺠﻨﺎﻥ .. ﺍﻟﻴﻮﻡ ﺍﻟﻠﻲ ﻗﺒﻠﻪ ﻛﺎﻥ ﺍﻟﺠﻮ ﻋﺠﺎﺝ .. ﻭﺍﻟﺠﻨﺎﻥ ﺗﻐﻄﻰ ﺑﺎﻟﺘﺮﺍﺏ .. ﻛﻨﺴﺖ ﻭﺳﻴﻘﺖ ﻭﺧﻼﺹ ﻛﻤﻠﺖ ...
ﻃﻠﻌﺖ ﺍﻣﻬﺎ : ﻣﺎﺯﺍﻝ ﺑﻨﺘﻲ ..
ﺧﻮﻟﻪ ﺗﺴﻴﻖ : ﺧﻼﺹ ...
ﻭﺳﻴﻠﻪ : ﺑﺎﻩ ﺑﻌﺪ ﺗﻜﻤﻠﻲ ﺧﺸﻲ ﺩﻳﺮﻱ ﻋﺼﻴﺮ ﻓﺮﻭﺍﻟﻪ ﺣﺴﺎﻥ ﺑﻴﺨﻄﻢ ﻋﻠﻴﻨﺎ ﻫﻮ ﻭﻣﺮﺗﻪ .. ﻏﻴﺮ ﺣﺎﺳﻪ ﺭﻭﺣﻲ ﺗﺎﻋﺒﻪ ﻭﺃﺧﺘﻚ ﺗﻘﺮﺍ ...
ﺧﻮﻟﻪ ﺍﺑﺘﺴﻤﺖ : ﺣﺎﺿﺮ .. ﺧﺸﺖ ﻭﺳﻴﻠﻪ .. ﻭﺧﻮﻟﻪ ﻭﺍﺟﻌﺘﻬﺎ ﺍﻣﻬﺎ ﻣﻦ ﻧﻬﺎﺭ ﺻﺎﺭ ﺍﺍﻟﻠﻲ ﺻﺎﺭ ﻭﻫﻲ ﻣﻌﺎﺵ ﺯﻱ ﻗﺒﻞ
ﻃﻖ ﺍﻟﺒﺎﺏ .. ﺳﺎﻭﺕ ﺣﻮﺍﻳﺠﻬﺎ ﻭﻓﻴﺪﻫﺎ ﺍﻟﻘﻮﻣﻪ .. ﻓﺘﺤﺖ ﺍﻟﺒﺎﺏ .. ﻭﺍﻧﺼﺪﻣﺖ ..
ﺭﻳﺎﺽ ﻭﺯﻉ ﻧﻈﺮﻩ ﻋﻠﻴﻬﺎ ﻭﺍﺑﺘﺴﻢ : ﺍﺣﻤﻢ ﻭﺟﻪ ﺗﺎﻧﻲ ﻟﻴﻚ .. ﺑﺲ ﺣﻠﻮ ﻫﻠﺒﻪ ..
ﺧﻮﻟﻪ ﺗﻔﻨﺺ : ﺍﻧﺖ ﺷﻦ ﺩﻳﺮ ﻫﻨﻲ ..
ﺭﻳﺎﺽ ﺑﺮﻓﻌﺔ ﺣﺎﺟﺐ ﻭﺍﺑﺘﺴﺎﻣﻪ : ﺟﻴﺖ ﻧﺸﻮﻑ ﻋﻤﻲ ﻋﺎﺑﺪ ..
ﺧﻮﻟﻪ ﺑﺮﻓﻌﺔ ﺣﺎﺟﺐ : ﻋﻤﻚ !!
ﺭﻳﺎﺽ : ﻧﺎﺩﻳﻠﻲ ﺑﻮﻙ ﻳﺎﺑﻨﻴﻪ ... ﻭﺧﺸﻲ ﺍﻟﺒﺴﻲ ﺣﺎﺟﻪ ﻉ ﺭﺍﺳﻚ ..
ﺧﻮﻟﻪ ﺍﺳﺘﺎﻗﻀﺖ ﻟﺮﻭﺣﻬﺎ ﺣﻄﺖ ﺍﻳﺪﻫﺎ ﻉ ﺭﺍﺳﻬﺎ ﻭﺭﻛﺰﺕ ﻉ ﺍﻟﻘﻮﻣﻪ ﺧﺸﺖ ﺗﺠﺮﻱ ﻭﻫﻮ ﻳﻀﺤﻚ ﻋﻠﻴﻬﺎ ..
ﻗﺎﺑﻠﺖ ﺟﻨﺎﻥ ﺍﻟﻠﻲ ﻛﺎﻧﺖ ﻃﺎﻟﻌﻪ ﻣﻦ ﺩﺍﺭﻫﺎ : ﺧﻴﺮﻙ ..
ﺧﻮﻟﻪ ﻭﺟﻬﻬﺎ ﺍﺣﻤﺮ ﻭﻣﺼﺪﻭﻣﻪ : ﺭﻳﺎﺽ !!! ؟
ﺟﻨﺎﻥ ﺑﻀﺤﻜﻪ : ﺧﻴﺮﻩ ..
ﺧﻮﻟﻪ : ﺑﺮﺍ ..
ﺟﻨﺎﻥ : ﺷﻨﻮﻭﻭﻭﻭﻭ ...
ﻉ ﺧﺸﺔ ﺣﺴﺎﻥ ﻭﻣﻌﺎﻩ ﻫﺎﻟﻪ ...
ﺣﺴﺎﻥ : ﻭﻳﻦ ﺑﻮﻱ ...
ﺟﻨﺎﻥ ﻭﻫﻲ ﺗﺴﻠﻢ ﻉ ﻫﺎﻟﻪ : ﻗﺎﻋﺪ ﻣﺎﺭﻭﺣﺶ ﻣﻦ ﺍﻟﺠﺎﻣﻊ ...
ﺣﺴﺎﻥ : ﻓﻲ ﺭﺍﺟﻞ ﺑﺮﺍ ﻳﺒﻴﻪ .. ﺗﻮ ﻧﺨﺶ ﺍﻧﻲ ﻭﻳﺎﻩ ﻟﻠﻤﺮﺑﻮﻋﻪ ﻟﻴﻦ ﻳﺠﻲ ... ﻭﻣﺸﻲ ﺣﺴﺎﻥ ..
ﻫﺎﻟﻪ ﺑﻌﺪ ﺳﻠﻤﺖ ﻉ ﺧﻮﻟﻪ ﺷﺒﺤﺖ ﻟﺠﻨﺎﻥ : ﺧﻴﺮﻫﺎ؟ ..!!
ﺟﻨﺎﻥ ﺑﻀﺤﻜﻪ : ﺍﻟﺮﺍﺟﻞ ﺍﻟﻠﻲ ﺑﺮﺍ ﺭﻳﺎﺽ ...
ﻫﺎﻟﻪ ﺑﻀﺤﻜﻪ ﻭﻣﺘﻔﺎﺟﺌﻪ : ﺍﻟﻠﻪ ...!!!!
ﺧﻮﻟﻪ ﻭﺟﻬﻬﺎ ﺍﺣﻤﺮ ﻭﺧﺸﺖ ﺩﺍﺧﻞ ...
****
ﺑﻌﺪ ﺍﻟﺘﺮﻭﺍﻳﺢ
ﻣﻘﻌﻤﺰﻳﻦ ﺗﺤﺖ ﺍﻟﻌﻨﺒﻪ ﻭﻫﻲ ﻣﺘﻜﻴﻪ ﻉ ﻛﺘﻔﻪ ...
ﺍﻟﺤﺴﻦ : ﺻﺪﻗﻪ !!
ﻋﻠﻴﺎ : ﺍﻳﻪ ﻋﻦ ﻋﻤﻲ ﺳﻴﻒ ﻭﻋﻤﺘﻲ ﺯﻫﺮﺓ ﻭﺑﻼﻝ ﻭﺍﺑﺘﺴﺎﻡ ﺍﻟﻠﻪ ﻳﺮﺣﻤﻬﻢ ...
ﺍﻟﺤﺴﻦ ﺗﻨﻬﺪ : ﺑﺎﻫﻲ ..
ﻋﻠﻴﺎ ﻧﺎﺿﺖ ﻣﻦ ﻋﻜﺘﻔﻪ : ﺍﻧﻲ ﻧﻘﻮﻟﻚ ﻛﻴﻒ
ﺍﻟﺤﺴﻦ ﻭﻫﻮ ﻣﺒﺘﺴﻢ : ﻛﻴﻒ ..
ﻋﻠﻴﺎ : ﻧﻌﺮﻑ ﻧﺎﺱ ﺳﺎﻛﻨﻴﻦ ﺑﺎﻹﻳﺠﺎﺭ ﻣﻬﺪﺩﻳﻦ ﺍﻧﻬﻢ ﻳﻘﻌﺪﻭﺍ ﻓﻲ ﺍﻟﺸﺎﺭﻉ ﻟﻮﻣﺎﺩﻓﻌﻮﺵ ﻭﺣﺎﻟﺘﻬﻢ ﺻﻌﺒﻪ ﻫﻠﺒﻪ .. ﺷﻦ ﺭﺍﻳﻚ ﺗﺪﻓﻌﻪ ﻋﻨﻬﻢ ... ﻭﻳﻜﻮﻥ ﻋﻤﻞ ﺍﻟﺨﻴﺮ ﻫﺬﺍ ﺑﻨﻴﺔ ﺍﻟﻨﺎﺱ ﺍﻟﻠﻲ ﻧﺤﺒﻮﻫﻢ ﻭﻓﻘﺪﺍﻧﻬﻢ ..
ﺍﻟﺤﺴﻦ : ﺗﻢ .. ﺍﻧﺘﻲ ﻋﻄﻴﻨﻲ ﻋﻨﻬﻢ ﻣﻌﻠﻮﻣﺎﺕ ﻭﺍﻧﻲ ﻧﺘﻜﻔﻞ ﺑﺎﻟﺒﺎﻗﻲ ..
ﻋﻠﻴﺎ ﺷﺎﺩﺗﻪ ﺑﺈﻳﺪﻳﻬﺎ ﻣﻦ ﺫﺭﺍﻋﻪ ﻭﺭﻗﺪﺕ ﻉ ﻛﺘﻔﻪ ﻭﻫﻲ ﻓﺮﺣﺎﻧﻪ : ﻧﺤﺒﻚ ﻣﻮﺗﺎﺕ ..
ﺍﻟﺤﺴﻦ ﺑﻀﺤﻜﻪ : ﻣﻮﺗﺎﺕ ..!!!
ﻋﻠﻴﺎ ﺑﻀﺤﻜﻪ : ﻭﻫﻠﺒﺎﺕ ...
ﺍﻟﺤﺴﻦ : ﻫﻬﻬﻬﻬﻬﻬﻬﻬﻬﻬﻬﻪ
....
🌿 ﻭﻓﻌﻼ ﺍﻟﺤﺴﻦ ﻓﻚ ﻛﺮﺑﻪ 3 ﻋﺎﺋﻼﺕ ﻛﺎﻥ ﻣﻤﻜﻦ ﻳﻜﻮﻥ ﻣﺼﻴﺮﻫﻢ ﺍﻟﺸﺎﺭﻉ ...
ﻭﻫﺎﻟﻪ ﻫﻲ ﻭﺣﺴﺎﻥ ﺑﻌﺪ ﻋﻤﻠﻴﺔ ﺑﺤﺚ ﻟﻘﻮﺍ ﺍﺷﺨﺎﺹ ﻳﺒﻮﺍ ﺣﻖ ﻏﺴﻴﻞ ﺍﻟﻜﻠﻴﻪ ﻟﻮﻟﺪﻫﻢ ﻭﺗﻜﻔﻠﻮﺍ ﻫﻤﺎ ﺑﻴﻪ ...
ﺟﻨﺎﻥ ﺍﻟﻠﻲ ﻛﻠﻤﺘﻬﺎ ﻫﺎﻟﻪ ﻋﻦ ﺣﻜﺎﻳﺔ ﺍﻟﺼﺪﻗﻪ ... ﻣﺸﺖ ﺗﺒﺮﻋﺖ ﺑﺸﺮﺍﺀ ﻣﻼﺑﺲ ﻋﻴﺪ ﻭﻋﻄﺘﻬﻢ ﻟﺠﻤﻌﻴﻪ ﺧﻴﺮﻳﻪ ﻣﻮﺛﻮﻗﻪ ﻳﻮﺯﻋﻮﻫﺎ ﺑﻤﻌﺮﻓﺘﻬﻢ ... ﻭﻃﺒﻌﺎ ﺑﻨﻴﺔ ﻣﺤﻤﺪ ﺍﻟﻔﻬﺪ 💔...
🌼 ﺧﻮﻟﺔ ... ﺧﻄﺒﻬﺎ ﺭﻳﺎﺽ ﺭﺳﻤﻲ ﻣﻦ ﺑﻮﻫﺎ .. ﻭﻫﻲ ﺗﺄﻛﺪﺕ ﺗﻤﺎﻣﺎ ﻣﻦ ﺣﺴﻦ ﻧﻴﺘﻪ ﻭﻭﺍﻓﻘﺖ ... ﻣﺎﺑﻮﺵ ﻳﺪﻳﺮﻭﺍ ﺍﻱ ﺷﻲ ﻟﻴﻦ ﺗﺮﻣﻲ ﺑﺮﻧﻴﺔ ﺍﻟﻌﺪﻩ ..
ﺭﻣﻀﺎﻥ ﺍﻟﻀﻴﻒ ﺍﻟﺤﻠﻮ ﺧﻔﻴﻒ ﻳﺠﻲ ﺑﻌﺪ ﺷﻮﻕ ﻭﻳﺘﻢ ﺑﺴﺮﻋﻪ ...
ﺗﻢ ﺭﻣﻀﺎﻥ ﻭﺍﻟﻴﻮﻡ ﺍﻭﻝ ﻳﻮﻡ ﻋﻴﺪ ... ﺍﻷﻗﺎﺭﺏ ﻛﻠﻬﻢ ﺣﻴﺠﻮﺍ ﻷﻧﻪ ﻛﺬﻟﻚ ﺃﻭﻝ ﻋﻴﺪ ﻣﻦ ﻏﻴﺮ ﻋﻠﻲ ﺍﻟﺼﺎﺩﻕ ...
ﻋﻠﻴﺎ ﺗﺒﺨﺮ ﻓﻲ ﺍﻟﺤﺴﻦ ﻭﺗﺘﺄﻣﻞ ﻓﻴﻪ ..
ﺍﻟﺤﺴﻦ ﺑﺈﺑﺘﺴﺎﻣﻪ : ﻣﻌﺎﺵ ﺗﺸﺒﺤﻴﻠﻲ ﻫﻜﻲ ..
ﻋﻠﻴﺎ ﺑﺈﺑﺘﺴﺎﻣﻪ : ﻋﻼﺵ ..
ﺍﻟﺤﺴﻦ ﺑﻀﺤﻜﻪ : ﻧﺒﻲ ﺍﻟﻨﺎﺱ ﺗﺠﻲ ﺗﻠﻘﺎﻧﻲ ﻓﻲ ﺍﺳﺘﻘﺒﺎﻟﻬﻢ ..
ﻋﻠﻴﺎ ﺿﺤﻜﺖ ..
ﻛﻤﻠﺖ ﻭﺣﻄﺖ ﺍﻟﺒﺨﺎﺭﻩ ﻭﺣﻄﺖ ﺍﻳﺪﻫﺎ ﻉ ﺭﺍﺳﻪ ﻭﻗﻌﺪﺕ ﺗﻘﺮﺍ .. ﻭﻫﻮ ﻳﺸﺒﺤﻠﻬﺎ ﺑﺤﺐ ... ﺑﻌﺪ ﻛﻤﻠﺖ ﻗﻌﺪ ﻳﻀﺤﻚ
ﻋﻠﻴﺎ ﺑﺈﺑﺘﺴﺎﻣﻪ : ﻋﻼﺵ ﺗﻀﺤﻚ ..
ﺍﻟﺤﺴﻦ ﺑﻀﺤﻜﻪ : ﺭﻭﻭﺱ ﺻﻮﺍﺑﻌﻚ ﺑﺲ ﻭﺍﺻﻼﺕ ﻓﺮﺍﺳﻲ ..
ﻋﻠﻴﺎ : ﺍﻧﺖ ﻃﻮﻳﻞ ﻫﻠﺒﻪ ..
ﺍﻟﺤﺴﻦ : ﻭﻋﻼﺵ ﻣﺶ ﺍﻧﺘﻲ ﺍﻟﺪﺑﺪﻭﺑﻪ ﺍﻟﻘﺼﻴﺮﻭﻧﻪ ..
ﻋﻠﻴﺎ ﺑﻨﺮﻓﺰﻩ : ﻣﺸﺸﺸﺶ ﺳﺴﺴﻤﻴﻨﻪ ﺍﺍﺍﺍﺍﻧﻲ ..
ﺍﻟﺤﺴﻦ : ﻫﻬﻬﻬﻬﻬﻬﻬﻬﻬﻬﻬﻬﻪ .. ﺑﺎﺳﻬﺎ ﺑﻮﺳﻪ ﺧﻔﻴﻔﻪ ... ﻭﻃﻠﻊ ..
ﻭﻫﻲ ﺍﺑﺘﺴﻤﺖ ﺑﺨﺠﻞ " ﺁﺍﺍﺍﻩ ﻧﺤﺒﻚ ﻭﻳﺎﻧﻲ ﻣﻦ ﺣﺒﻚ .."
ﺍﻭﻝ ﻳﻮﻡ ﻋﺎﺩﻱ ﺯﻱ ﺍﻭﻝ ﻳﻮﻡ ﺭﻣﻀﺎﻥ .. ﻛﺎﻥ ﺣﺰﻳﻦ ﻫﻠﺒﻪ ﻭﺍﻟﺪﻣﻮﻉ ﻫﻲ ﺍﻟﻠﻲ ﺳﻴﻄﺮﺕ ﻉ ﺍﻟﻤﺸﻬﺪ ....
ﺭﻭﺣﻮﺍ ﺍﻷﻗﺎﺭﺏ ﺍﻟﻌﺸﻴﻪ ﻭﻗﻌﺪﻭﺍ ﺍﻟﻌﻴﻠﻪ ﺑﺲ ... ﺍﻟﺤﺴﻦ ﺧﺸﻠﻬﻢ ﺑﻌﺪ ﺳﻘﺪ ﺯﻣﻼﺋﻪ ﻓﻲ ﺍﻟﺨﺪﻣﻪ .. ﻗﻌﺪ ﻭﺍﻗﻒ ﻓﻲ ﺍﻟﺒﺎﺏ ...
ﺍﻟﺤﺴﻦ : ﻋﻠﻴﺎ ﺗﻌﺎﻟﻲ ...
ﺧﻮﺍﺗﻪ ﻛﺎﻧﻮﺍ ﻣﻨﻘﻬﺮﺍﺕ ﻣﻨﻪ ﻭﺃﻣﻪ ﻭﺳﻴﻠﻪ ﺩﻣﻌﺘﻬﺎ ﻣﺎﺟﻔﺖ ﻣﻌﺎﻣﻠﻪ ﺍﻟﺤﺴﻦ ﺗﻐﻴﺮﺕ ﺗﻤﺎﻣﺎ ﺣﺎﺳﺒﻬﻢ ﺯﻱ ﻓﺎﻃﻤﻪ ﻭﺭﻳﺤﺎﻧﻪ .. ﺣﺘﻰ ﻣﻴﺴﻮﻥ ﺍﻟﻠﻲ ﺗﺤﺐ ﻋﻤﻬﺎ ﻫﻠﺒﻪ ﺑﻜﺖ ﻟﻴﻦ ﺧﻼﺹ ﻣﻨﻴﻦ ﺟﺖ ﺗﻌﻴﺪ ﻋﻠﻴﻪ ﺑﺎﻟﺤﻀﻦ ﺯﻱ ﻣﺎﺗﻌﻮﺩﺕ ... ﻭﻗﻔﻬﺎ .. ﻭﻋﻴﺪ ﻋﻠﻴﻬﺎ ﺑﺎﻟﻜﻼﻡ ﺑﺪﻭﻥ ﻣﺎﻳﺸﻮﻓﻠﻬﺎ ...
ﻋﻠﻴﺎ ﻛﻴﻒ ﺟﺖ ﺑﺘﻨﻮﺽ ...
ﺟﻨﺎﻥ ﺑﻐﻀﺐ : ﺑﺬﻣﺘﻚ ﺭﺍﺿﻲ ﻉ ﺍﻟﻠﻲ ﺩﻳﺮ ﻓﻴﻪ ...
ﻛﻠﻬﻢ ﺷﺒﺤﻮﻟﻬﺎ ...
ﺍﻟﺤﺴﻦ ﺗﺠﺎﻫﻠﻬﺎ : ﻫﻴﺎ ﻋﻠﻴﺎ ...
ﺟﻨﺎﻥ ﻧﺎﺿﺖ : ﺑﺘﻬﺮﺏ ﻭﻻ ... ﺑﺪﻳﺖ ﺗﻬﺮﺏ ... ﻟﻜﻦ ﻣﺶ ﺣﺘﻤﺸﻲ ﻗﺒﻞ ﺗﺴﻤﻌﻨﻲ
ﻋﺎﺑﺪ : ﺟﻨﺎﺍﺍﻥ ..
ﺳﺮﻣﺪ : ﺟﻨﺎﻥ ﻣﺶ ﻭﻗﺘﻪ ..
ﺟﻨﺎﻥ : ﻻﻭﻗﺘﻪ ..
ﻫﻮ ﺟﺎﻱ ﺑﻴﻄﻠﻊ ﻟﺤﻘﺖ ﻋﻠﻴﻪ ﻭﺷﺪﺍﺗﻪ ﻣﻦ ﻳﺪﻩ : ﻭﻳﻦ ﻫﺎﺭﺏ ... ﻭﻳﻦ ﻣﺎﺷﻲ ..
ﺍﻟﺤﺴﻦ ﺑﺪﻭﻥ ﻣﺎﻳﺸﺒﺤﻠﻬﺎ : ﺷﻦ ﺗﺒﻲ ..
ﺟﻨﺎﻥ ﺑﻨﺒﺮﺓ ﺑﺎﻛﻴﻪ ﻭﻋﺼﺒﻴﻪ : ﻧﺒﻴﻚ ﺍﻧﺖ .. ﻧﺒﻲ ﺧﻮﻱ ... ﺧﻮﻱ ﺍﻟﻠﻲ ﻳﻌﺎﻣﻞ ﻓﻴﺎ ﺑﻨﺘﻪ ﻣﺶ ﺍﺧﺘﻪ ﺑﺲ ... ﺗﺒﻲ ﻭﻻﻣﺎﺗﺒﻴﺶ ﺍﻧﺖ ﺧﻮﻧﺎ ﻏﺼﺐ ﻋﻨﻚ ﺧﻮﻧﺎ ﺍﻟﻠﻲ ﺭﺑﻴﺘﻨﺎ ﻭﺳﻬﺮﺕ ﻋﻠﻴﻨﺎ ﻭﺣﻨﻲ ﻣﺮﺿﺎ .. ﺍﻟﻠﻲ ﻧﺘﺤﺎﻣﻮﺍ ﺑﻴﻪ ﻭﺣﻨﻲ ﺻﻐﺎﺭ ﻭﺣﻨﻲ ﻛﺒﺎﺭ .. ﺍﻟﻠﻲ ﻟﻤﺎ ﻧﻄﻴﺤﻮﺍ ﻓﻤﺸﻜﻠﻪ ﻳﺤﻠﻬﺎ ﺑﺪﻭﻥ ﻣﺎﻧﻘﻮﻟﻮﻟﻪ .. ﺍﻟﻠﻲ ﻟﻤﺎ ﻧﺒﻜﻮﺍ .. ﻳﺤﻀﻨﺎ ﻭﻳﺨﻔﻒ ﻋﻠﻴﺎ .. ﺍﻟﻠﻲ ﻟﻤﺎ ﻧﻔﺮﺣﻮﺍ ﻧﻠﻘﻮﻩ ﻫﻮ ﺳﺒﺐ ﻓﻲ ﻓﻔﺮﺣﺘﻨﺎ .. ﺍﻟﻠﻲ ﻟﻤﺎ ﻧﻐﻠﻄﻮﺍ ﻳﺄﺩﺑﻨﺎ ﻭﻳﺮﺩﻧﺎ ﻉ ﺍﻟﻐﻠﻂ ..
ﺣﺴﺎﻥ ﺍﺑﺘﺴﻢ ..
ﻛﻤﻠﺖ ﺟﻨﺎﻥ : ﺗﺒﻲ ﻭﻻﻣﺎﺗﺒﻴﺶ ﻏﺼﺐ ﻋﻨﻚ ﺍﻧﺖ ﺧﻮﻧﺎ .. ﻭﺍﺷﺮﺕ ﻉ ﺍﻣﻬﺎ ... ﻭﻫﺎﻟﻤﺮﺍﻩ ﻫﺎﺩﻱ ﺍﻣﻚ ﺍﻟﻠﻲ ﺍﻧﺖ ﻋﻨﺪﻫﺎ ﺍﻏﻠﻰ ﻣﻨﺎ ﺣﻨﻲ ﺻﻐﺎﺭﻫﺎ ... ﻭﺍﺷﺮﺕ ﻉ ﺑﻮﻫﺎ .. ﻭﻫﺬﺍ ﺑﻮﻙ ﺍﻟﻠﻲ ﺩﻳﻤﺎ ﺭﺍﻓﻊ ﺭﺍﺳﻪ ﺑﻴﻚ .. ﻧﻬﻮﻧﻮﺍ ﻋﻠﻴﻚ ﻗﻮﻟﻲ .. ﻫﻮﻧﺎ ﻋﻠﻴﻚ ..
ﻛﻠﻬﻢ ﺗﺄﺛﺮﻭﺍ ﺑﻜﻼﻣﻬﺎ ﻭﻓﻲ ﺍﻟﻠﻲ ﺩﻣﻮﻋﻪ ﻧﺰﻟﺖ ..
ﻫﻮ ﻛﺎﻥ ﻳﺸﺒﺤﻠﻬﺎ ﻫﻠﺒﻪ .. ﺑﻌﺪﻳﻦ ﻭﺯﻉ ﻧﻈﺮﻩ ﻋﻠﻴﻬﻢ ﻭﺟﺖ ﻋﻴﻨﻪ ﻓﻲ ﻋﻴﻦ ﻭﺳﻴﻠﻪ ﺍﻟﻠﻲ ﻛﺎﻧﺖ ﺗﺒﻜﻲ .. ﺑﻌﺪﻳﻦ ﺷﺒﺢ ﻟﻌﺎﺑﺪ ﻫﻠﺒﻪ ..
ﺍﻟﺤﺴﻦ : ﺷﻔﺘﻬﺎ ﺷﻔﺖ ﺑﻨﺘﻚ ﻛﻴﻒ ﺗﻌﻠﻲ ﻓﺼﻮﺗﻬﺎ ﻉ ﺧﻮﻫﺎ ﺍﻷﻛﺒﺮ ﻣﻨﻬﺎ ﻳﺎﺑﻮﻱ ..
ﺟﻨﺎﻥ ﺿﺤﻜﺖ ﻭﺿﺮﺑﺎﺗﻪ ﺷﺪ ﺍﻳﺪﻳﻬﺎ ﻭﻗﺎﻝ : ﻣﺶ ﻣﺴﻤﻮﺡ ﺑﺄﻛﺜﺮ ﻣﻦ ﻫﻜﻲ ...
ﻛﻠﻬﻢ ﺿﺤﻜﻮﺍ ... ﻭﻫﻮ ﺍﺑﺘﺴﻢ .. ﻃﻠﻘﻬﺎ ﻭﻗﺮﺏ ﻣﻦ ﻭﺳﻴﻠﻪ ﺑﺎﺳﻬﺎ ﻉ ﺭﺍﺳﻬﺎ ... ﻭﻫﻲ ﻏﻤﻀﺖ ﻋﻴﻮﻧﻬﺎ ﻭﺗﺒﻜﻲ .. ﻭﻗﺮﺏ ﻣﻦ ﺑﻮﻩ ﻭﺑﺎﺳﻪ ﻉ ﺭﺍﺳﻪ ﻭﻗﻌﻤﺰ ﺣﺪﺍﻩ .. ﻭﻗﻌﺪﻭﺍ ﻳﻬﺪﺭﺯﻭﺍ ﺳﺎﺭﻩ ﻭﺧﻮﻟﻪ ﻳﺸﺒﺤﻮﻟﻪ ﺷﺒﺤﻬﻢ ﻧﺎﺩﺍﻫﻢ ﻗﻌﻤﺰﻭﺍ ﺣﺪﺍﻩ ﻭﻗﻌﺪﻭﺍ ﻳﻬﺪﺭﺯﻭﺍ ﻉ ﺧﻮﻫﻢ ﻭﺷﺎﺩﺍﺕ ﺍﻳﺪﻳﻪ ﻭﺩﻣﻮﻋﻬﻢ ﺗﻨﺰﻝ ... ﻭﺳﻴﻠﻪ ﺗﺸﺒﺤﻠﻬﻢ ﻭﺍﺫﻛﺮﺕ ﺍﻳﺎﻡ ﺯﻣﺎﻥ ﻛﻴﻒ ﻛﺎﻧﻮﺍ ﻳﻘﻌﻤﺰﻭﺍ ﻣﻌﺎﻩ ﻧﻔﺲ ﺍﻟﺘﻘﻌﻤﻴﺰﺓ ﻭﻫﻤﺎ ﺻﻐﺎﺭ .. ﻟﻤﺎ ﻛﺎﻥ ﺍﻟﺤﺴﻦ ﻳﺮﻭﺡ ﻣﻦ ﺍﻟﻜﻠﻴﻪ ... ﻭﻫﻤﺎ ﻣﺴﺘﺎﺣﺸﺎﺗﻪ ....
ﺍﻟﻠﻲ ﺗﺤﻮﻟﻪ ﻛﻨﺪﺭﺗﻪ ﻭﺍﻟﻠﻲ ﺗﺠﻴﺒﻠﻪ ﻣﻴﻪ ﻭﺍﻟﻠﻲ ﺗﺠﻴﺒﻠﻪ ﻏﺪﺍﻩ ...
ﻛﺎﻥ ﺑﻮﻫﻢ ﺍﻟﺘﺎﻧﻲ ﻣﺶ ﺧﻮﻫﻢ ..💓💓...
🍃 ﻓﺎﺗﺖ ﺍﻳﺎﻡ ﻛﺎﻧﺖ ﺍﻟﺤﻴﺎﻩ ﻓﻴﻬﺎ ﺗﺮﺟﻊ ﻟﻄﺒﻴﻌﺘﻬﺎ .. ﻭﻛﺎﻧﺖ ﺷﺒﻪ ﻫﺎﺩﻳﻪ ... ﻭﺍﻟﺤﺴﻦ ﻗﺎﻋﺪ ﻳﺨﺪﻡ ﻫﻮ ﻭﺍﺣﻤﺪ ﻭﻳﺤﺎﻭﻟﻮﺍ ﻳﻮﺻﻠﻮﺍ ﻷﻱ ﺷﻲ ..
ﺭﻳﺤﺎﻧﻪ ﻛﺎﻧﺖ ﻣﻦ ﺧﻮﻓﻬﺎ ﺳﺎﻛﺘﻪ .. ﺗﺤﺎﻭﻝ ﺗﺒﺎﻥ ﻃﺒﻴﻌﻴﻪ ﺑﺮﻏﻢ ﺍﻥ ﻓﻲ ﺣﺎﺟﺰ ﺍﻧﺒﻨﻲ ﺑﻴﻨﻬﺎ ﻭﺑﻴﻦ ﻋﻤﻬﺎ ﻭﺑﻮﻫﺎ ﻛﺬﻟﻚ .. ﺍﻟﻠﻲ ﺭﺍﻗﺒﺎﺗﻪ .. ﻭﻓﺘﺸﺖ ﺗﻠﻴﻔﻮﻧﻪ ﻭﻟﻘﺖ ﺍﻏﻠﺐ ﺍﺗﺼﺎﻻﺗﻪ ﺑﺴﺮﻣﺪ ﻓﺄﻭﻗﺎﺕ ﻣﺨﺘﻠﻔﻪ ﻭﻓﻲ ﺍﻟﻴﻮﻡ ﻗﺮﻳﺐ ﺍﻛﺜﺮ ﻣﻦ ﻋﺸﺮﺍﺕ ﻣﺮﺍﺕ ﻣﻜﺎﻟﻤﺎﺕ ﻣﺴﺘﻠﻤﻪ .. ﺗﻜﺘﻤﺖ ﻭﺳﻜﺘﺖ ﻏﺼﺐ ﻋﻨﻬﺎ .. ﻭﻣﺎﻗﺪﺭﺗﺶ ﺗﺤﻜﻲ ﺣﺘﻰ ﻟﻤﻨﺬﺭ ﻋﻦ ﺍﻟﻠﻲ ﻋﺮﻓﺎﺗﻪ ...
ﻣﺴﺘﻐﺮﺑﻴﻦ ﻫﺪﻭﺀ ﺳﺮﻣﺪ ... ﻫﺬﺍ ﻳﻘﻮﻟﻮﻟﻪ ﻫﺪﻭﺀ ﻣﺎﻳﺴﺒﻖ ﺍﻟﻌﺎﺻﻔﻪ .. ﻭﻣﺶ ﺃﻱ ﻋﺎﺻﻔﻪ ..
ﻓﻲ ﻳﻮﻡ ..
ﻋﻠﻴﺎ ﻛﺎﻧﺖ ﺭﺍﻗﺪﺓ ﻉ ﺍﻟﻜﻨﺒﻪ ﺗﺴﺘﻨﻰ ﻓﻲ ﺍﻟﺤﺴﻦ ﺍﻟﻠﻲ ﻣﻦ ﻟﻤﺎ ﺟﺎﻩ ﺗﻠﻴﻔﻮﻥ ﺍﻟﻤﻐﺮﺏ ﻃﻠﻊ ﺑﺴﺮﻋﻪ ﻭﻣﻌﺎﺵ ﺭﻭﺡ .. ﻧﺎﺿﺖ ﻟﻤﺎ ﺳﻤﻌﺖ ﺻﻮﺕ ﺩﻭﺷﻪ .. ﻟﻘﺖ ﺍﻟﺪﻧﻴﺎ ﺻﺒﺢ .. ﺗﺴﻤﻊ ﻓﻲ ﺻﻮﺕ ﺩﻭﺓ ﻟﻮﻃﺎ ﺧﺎﻓﺖ ﻧﺎﺿﺖ ﻣﻦ ﻣﻜﺎﻧﻬﺎ ﻭﺗﻮﺟﻬﺖ ﻟﻠﺮﻭﺷﻦ ﻓﺘﺤﺎﺗﻪ ﻟﻘﺖ ﻋﻤﺎﻡ ﺍﻟﺤﺴﻦ ﻭﺧﻮﺗﻪ ﻟﻮﻃﺎ ﻳﺘﻨﺎﻗﺸﻮﺍ ﻭﻛﺈﻥ ﻓﻲ ﺷﻲ ﺻﺎﻳﺮ .. ﻃﻮﻝ ﻓﺘﺤﺖ ﺑﺎﺏ ﺍﻟﺤﻮﺵ ﻭﻧﺰﻟﺖ ﻟﻘﺖ ﺍﻟﻔﺎﺻﻞ ﻣﻔﺘﻮﺡ ﻭﻟﻘﺖ ﺍﻧﻌﺎﻡ ﻭﺍﻗﻔﻪ ﻣﻊ ﺳﺎﺭﺓ ﺗﻘﻮﻝ : ﻛﻴﻒ ﺻﺎﺭ ﻫﻜﻲ ﻛﻴﻒ .. ﻭﺳﺎﺭﻩ ﺗﺒﻜﻲ ..
ﻋﻠﻴﺎ ﺑﺨﻮﻑ : ﺷﻦ ﻓﻲ ..
ﺷﺒﺤﻮﻟﻬﺎ ﺍﻟﺰﻭﺯ ﺑﺨﻮﻑ ﻭﻣﺎﻗﺪﺭﻭﺵ ﻳﺮﺩﻭﺍ ..
ﻋﻠﻴﺎ ﻋﻴﻮﻧﻬﺎ ﺗﻌﺒﻮﺍ ﺩﻣﻮﻉ : ﺍﻟﺤﺴﻦ ...
ﻻﺭﺩ ..
ﻋﻠﻴﺎ ﺑﻌﻴﺎﻁ : ﺭﺩﻭﻭﻭﻭﻭﻭﺍ ﻋﻠﻴﺎﺍﺍﺍﺍﺍﺍﺍﺍﺍﺍﺍﺍ ﺗﻜﻠﻤﻮﻭﻭﻭﻭﺍ ..
ﺳﻤﻌﻮﻫﺎ ﺍﻟﺮﺟﺎﻟﻪ ﻭﺟﻮﻫﺎ ..
ﻋﺎﺑﺪﺑﻀﻴﻖ : ﺻﻠﻲ ﻉ ﺍﻟﻨﺒﻲ ﻳﺎﺑﻨﺘﻲ ..
ﻋﻠﻴﺎ ﺑﺒﻜﻲ : ﻗﻮﻟﻲ ﺷﻦ ﻓﻲ ﻳﺎﻋﻤﻲ ﺗﺮﺑﺢ ...
ﻋﺎﺑﺪ ﺷﺒﺤﻠﻬﻢ ﻛﻠﻬﻢ .... ﻣﺶ ﻗﺎﺩﺭ ﻳﺘﻜﻠﻢ ..
ﺳﺮﻣﺪﺑﺤﺰﻡ : ﺍﻟﺤﺴﻦ ... ﻗﺒﻀﻮﺍ ﻋﻠﻴﻪ ﺍﻣﺲ ﺑﺘﻬﻤﺔ ﻗﺘﻞ ﺍﻟﻨﺎﺋﺒﻪ ﻧﻬﻠﻪ ﺍﻟﺼﻴﺪ ...
.... ﻳﺘﺒﻊ
