#الحسن (الوطن عشق رجاله)
ﺍﻟﺠﺰﺀ ﺍﻟﺜﺎﻧﻲ ﻭﺍﻟﺜﻼﺛﻴﻦ 💔
للكاتبﺔ GomanFared
" ﺍﺭﻓﻌﻌﻌﻮﻭﻭﻭﻭﻧﻲ ﺗﻮﺍﺍﺍﺍﺍﺍﺍﺍﺍ "
ﻃﻠﻌﺖ ﻓﻲ ﺍﻟﺠﻨﺎﻥ ﺗﻌﻴﻂ ﻭﺗﻜﺸﺦ ﻭﻣﺎﻧﺰﻟﺘﺶ ﻣﻨﻬﺎ ﻭﻻﺩﻣﻌﻪ ﻭﻗﻔﺖ ﺣﺪﺍ ﺍﻟﺴﻴﺎﺭﻩ ﻟﻠﻲ ﻟﻘﺘﻬﺎ ﻗﺪﺍﻣﻬﺎ ﺗﺨﺒﻂ ﻋﻠﻴﻬﺎ ﻭﺗﻌﻴﻂ ﻭﺗﻘﻮﻝ ﺍﺭﻓﻌﻮﻧﻲ .. ﺣﺎﻭﻟﻮﺍ ﻳﻬﺪﻭﻫﺎ ﺇﻧﻌﺎﻡ ﻭﻫﺎﻟﻪ ﻣﺎﻗﺪﺭﻭﺵ ..
ﻋﻠﻴﺎ ﺑﺼﻮﺕ ﻋﺎﻟﻲ : ﺣﻮﻭﻟﻮﺍ ﺣﺎﺍﺍﺍﻭﻟﻠﻠﻮﺍ .. ﺍﺭﻓﻌﻮﻧﻲ ﻗﻠﺖ .. ﺗﺨﺒﻂ ﻉ ﺍﻟﺴﻴﺎﺭﺓ .. ﺍﺭﻓﻌﻮﻭﻭﻭﻭﻭﻭﻧﻲ
ﺍﻟﺤﺎﺝ ﻋﻠﻲ : ﺳﺮﻣﺪ ﺍﺭﻓﻌﻬﻢ ...
ﺳﺮﻣﺪ ﻫﺰ ﺭﺍﺳﻪ ﺑﺈﻳﺠﺎﺏ ... ﻧﺰﻝ ﻟﺴﻴﺎﺭﺗﻪ ﻭﺭﻛﺐ .. ﺭﻛﺒﺖ ﺑﺮﻧﻴﻪ ﻣﻦ ﺍﻟﻘﺪﺍﻡ ﻭﻋﻠﻴﺎ ﻣﻦ ﺍﻟﻠﺘﺎﻟﻲ ﻭﺗﺤﺮﻙ ﺑﻴﻬﻢ ﻃﻮﻝ ..
....
ﻭﺳﻴﻠﻪ : ﻭﻭﻭﻭﻭﻭﻭﻭﻭﻭﻭﻩ ﻋﻠﻴﺎﺍﺍﺍﺍﺍﺍﺍﺍ ﻭﻭﻭﻭﻭﻭﻭﻭﻭﻩ ﻭﻟﺪﻱ
ﻋﺎﺑﺪ ﻭﺩﻣﻮﻋﻪ ﺗﻨﺰﻝ : ﻭﺣﺪﻱ ﺍﻟﻠﻪ ﻭﺣﺪﻱ ﺍﻟﻠﻪ .. ﺷﺪﻫﺎ ..
ﺟﻨﺎﻥ ﻭﺧﻮﻟﻪ ﻳﺒﻜﻮﺍ ﺑﺎﻟﻌﺒﺮﻩ ..
ﻭﺳﻴﻠﻪ ﺑﻬﻠﻊ : ﺍﺭﻓﻌﻨﻲ ... ﺍﺭﺭﺭﻓﻌﻨﻲ ... ﺍﺭﺭﺭﻓﻌﻨﻲ ﻟﻮﻟﺪﻱ ...
ﻋﺎﺑﺪ : ﺑﺎﻩ .. ﺑﺎﻩ ..
ﺷﻮﻳﻪ ﻭﻃﻠﻌﻮﺍ ﻛﻠﻬﻢ ﺭﻛﺒﻮﺍ ﺍﻟﺴﻴﺎﺭﺓ ﻭﺗﺤﺮﻛﻮﺍ ..
.....
ﺍﻟﻤﺴﺘﺸﻔﻰ ﻓﻲ ﺣﺎﻟﺔ ﻃﻮﺍﺭﺉ ﻋﺪﺩ ﻛﺒﻴﺮ ﻣﻦ ﻋﻨﺎﺻﺮ ﺍﻟﺸﺮﻃﻪ ﺭﺍﺣﻮﺍ ﺿﺤﺎﻳﺎ ﻟﻬﺎﻟﻜﻤﻴﻦ ... ﺍﺳﺘﻨﻔﺎﺭ ﻓﻲ ﺍﻟﻤﺴﺘﺸﻔﻰ .. ﺯﺍﺩ ﺍﻟﻮﺿﻊ ﺍﺭﺗﺒﺎﻙ .. ﻟﻤﺎ ﻋﺮﻓﻮﺍ ﺇﻥ ﺍﻟﺤﺴﻦ ﻣﻦ ﺿﻤﻦ ﺍﻟﻤﺼﺎﺑﻴﻦ ﻭﺍﺻﺎﺑﺘﻪ ﺧﻄﻴﺮﺓ ﻟﻠﻐﺎﻳﻪ ..
ﺍﻭﻝ ﻣﺎﻭﺻﻠﻮﺍ ..
ﻧﺰﻟﺖ ﺗﺠﺮﻱ ﻣﻦ ﺍﻟﺴﻴﺎﺭﻩ ﻭﺧﻠﺘﻬﺎ ﻣﻔﺘﻮﺣﻪ .. ﺍﻧﺼﺪﻣﺖ ﺑﺎﻟﻠﻲ ﺷﺎﻓﺘﻪ ﻓﻲ ﺍﻟﻤﺴﺘﺸﻔﻰ ﻭﺍﺫﻛﺮﺕ ﺍﻳﺎﻡ ﺍﻟﺤﺮﺏ ... ﻗﻌﺪﺕ ﺗﺠﺮﻱ ﻭﺗﺴﺄﻝ ﻋﻠﻴﻪ .. ﻭﺗﻘﻮﻝ " ﺍﻧﻲ ﻣﺮﺗﻪ ..."
ﺧﺶ ﺳﺮﻣﺪ ﻭﻣﻌﺎﻩ ﺃﻣﻪ ﻟﺤﻘﻮﻫﺎ .. ﻗﻌﺪﻭﺍ ﻳﺪﻭﺭﻭﺍ ﻟﻴﻦ ﻗﺎﻟﻠﻮﻫﻢ ﺍﻧﻪ ﺣﻴﺨﺶ ﺍﻟﻌﻤﻠﻴﺎﺕ .. ﺭﻛﺒﻮﺍ ﻟﻮﻳﻦ ﻣﺎ ﻓﻲ ﻏﺮﻓﺔ ﺍﻟﻌﻤﻠﻴﺎﺕ ..
ﻭﺻﻠﻮﺍ ﺣﺴﺎﻥ ﻭﻫﺎﻟﻪ ﻭﺍﻧﻌﺎﻡ ﻭﻣﺮﻋﻲ ﻭﺳﺎﺭﺓ .. ﺗﻼﻗﻮﺍ ﻣﻊ ﻭﺳﻴﻠﻪ ﻭﺟﻨﺎﻥ ﻭﺧﻮﻟﻪ ﻭﻋﺎﺑﺪ ... ﺧﺸﻮﺍ ﻃﻮﻝ ﻳﺠﺮﻭﺍ ..
...
ﻭﺍﻓﻘﻪ ﻭﻣﺼﺪﻭﻣﻪ ﻣﺎﻧﺰﻟﺘﺶ ﻣﻨﻬﺎ ﻭﻻﺩﻣﻌﻪ ﺗﺴﺘﻨﻰ ﺍﻣﺘﻰ ﺗﺸﻮﻓﻪ ..
ﺑﺮﻧﻴﻪ ﻣﻘﻌﻤﺰﺓ ﺗﺒﻜﻲ ﻭﺳﺮﻣﺪ ﻣﺎﺷﻲ ﺟﺎﻱ ..
ﻭﺻﻠﻮﺍ ﻓﻴﻬﻢ ﺑﺎﻗﻲ ﺍﻟﻌﻴﻠﻪ ..
ﻋﺎﺑﺪ : ﺳﺮﺭﺭﻣﺪ .. ﺷﻦ ﺻﺎﺭ ..
ﺳﺮﻣﺪ ﺑﺼﻮﺕ ﺑﺎﻛﻲ : ﺗﻮﺍ ﺑﻴﺪﺧﻠﻮﻩ ﺍﻟﻌﻤﻠﻴﺎﺕ ..
ﻭﺳﻴﻠﻪ ﺑﺒﻜﻲ : ﻳﺎﻏﺒﻴﻨﻲ ﻭﻟﺪﻱ ﻳﺎﻏﺒﻴﻴﻴﻴﻴﻨﻲ ..
ﻋﺎﺑﺪ : ﻭﻃﻲ ﺻﻮﺗﻚ ﺣﻨﻲ ﻓﻲ ﻣﺴﺘﺸﻔﻰ ..
ﺍﻟﺒﻨﺎﺕ ﻣﻨﻬﺎﺭﺍﺕ ﻭﻳﺒﻜﻮﺍ ... ﺟﻨﺎﻥ ﺟﺖ ﺑﺤﺪﺍ ﻋﻠﻴﺎ ..
ﺟﻨﺎﻥ ﺑﺒﻜﻲ : ﻋﻠﻴﺎ ..
ﻋﻠﻴﺎ ﺑﺼﻮﺕ ﺣﺎﺩ : ﻣﻌﺎﺵ ﺗﺒﻜﻮﺍ ﻣﻌﺎﺵ ﺗﻔﺎﻭﻟﻮﺍ ﻋﻠﻴﻪ ..
ﺟﻨﺎﻥ ﻣﺮﻛﺰﺓ ﻉ ﻋﻠﻴﺎ ﻭﺍﺿﺢ ﻋﻠﻴﻬﺎ ﻣﺼﺪﻭﻣﻪ .. ﺑﺎﻟﺬﺍﺕ ﺍﻧﻬﺎ ﻣﺎﺑﻜﺘﺶ ﻣﻼﺣﻈﺘﺶ ﺍﻧﻬﺎ ﺑﺎﻛﻴﻪ ..
ﻓﺠﺄﻩ ﺍﻧﻔﺘﺢ ﺍﻟﺒﺎﺏ .. ﻃﻠﻌﺖ ﻣﻨﻪ ﺑﺎﺭﻳﻼ ﻋﻠﻴﻬﺎ ﺍﻟﺤﺴﻦ ﻳﺠﺮﻭﺍ ﺑﻴﻬﺎ ... ﻛﻠﻬﻢ ﺷﺎﻓﻮﻩ ﻭﻗﻌﺪﻭﺍ ﻳﻌﻴﻄﻮﺍ ﻭﻳﺒﻜﻮﺍ .. ﺇﻻ ﻫﻲ ﻛﺎﻧﺖ ﻣﺮﻛﺰﺓ ﻉ ﺗﻔﺎﺻﻴﻞ ﻭﺟﻬﻪ ﺍﻟﻠﻲ ﻛﺎﻥ ﺷﺎﺣﺐ ﺑﺸﺪﻩ ﻣﻦ ﻛﺘﺮ ﻣﺎﻧﺰﻑ ﺧﺸﻮﺍ ﺑﻴﻪ ﻟﻐﺮﻓﺔ ﺍﻟﻌﻤﻠﻴﺎﺕ ﻭﻋﻴﻮﻧﻬﺎ ﻣﻌﺎﻫﻢ .. ﻭﻗﺎﻋﺪﺓ ﺗﺤﺖ ﺗﺄﺛﻴﺮ ﺍﻟﺼﺪﻣﻪ ...
ﺍﻟﻌﻤﻠﻴﻪ ﻳﺪﻳﺮ ﻓﻴﻬﺎ ﺩﻛﺘﻮﺭ ﻣﻌﺮﻭﻑ ﻭﻣﺘﻤﻜﻦ ﻭﻫﻮ ﺻﺪﻳﻖ ﻟﻠﺤﺴﻦ .. ﻛﺎﻥ ﻣﻌﺎﻩ ﺩﻛﺘﻮﺭ ﺗﺎﻧﻲ ﻭﻣﺠﻤﻮﻋﻪ ﻣﻤﺮﺿﺎﺕ ..
ﻋﻠﻴﻬﻢ ﻳﺤﻮﻟﻮﺍ ﺭﺻﺎﺻﺘﻴﻦ .. ﻭﺣﺪﻩ ﻓﻲ ﺻﺪﺭﻩ " ﺍﻟﻘﻠﺐ " ﻭﺍﻟﺘﺎﻧﻴﻪ ﻓﻲ ﻛﺘﻔﻪ ﺍﻟﻴﻤﻴﻦ .. ﺑﺪﻭﺍ ﺑﺎﻟﻠﻲ ﻓﻲ ﺻﺪﺭﻩ ...
ﻛﺎﻧﺖ ﺍﻟﺮﺻﺎﺻﻪ ﺟﺎﻳﻪ ﻓﻮﻕ ﺍﻟﻘﻠﺐ ﻣﺒﺎﺷﺮﺓ .. ﻳﻌﻨﻲ ﺗﺒﻲ ﺩﻗﺔ ﺷﺪﻳﺪﻩ ﺑﺶ ﻳﺤﻮﻟﻮﻫﺎ ﺑﺪﻭﻥ ﻣﻀﺮ ﺍﻟﻘﻠﺐ ﻭﺗﺘﺴﺒﺐ ﻓﻲ ﻧﻬﺎﻳﻪ ﺣﻴﺎﺗﻪ ...
ﻛﻠﻬﻢ ﺑﺮﺍ ﻳﺘﺮﻗﺒﻮﺍ .. ﻣﻤﺮ ﻛﺎﻣﻞ ﺗﻌﺒﺎ ﺑﻌﻴﻠﺔ ﺍﻟﺤﺴﻦ ...
ﺑﺮﻧﻴﻪ ﺗﻘﺮﺍ ﻓﻲ ﺍﻟﻘﺮﺁﻥ .. ﻭﻭﺳﻴﻠﻪ ﺗﺪﻋﻲ ...
ﻭﻋﺎﺑﺪ ﻛﺎﻥ ﻓﻲ ﻣﺼﻠﻰ ﺍﻟﻤﺴﺘﺸﻔﻰ ﻳﺼﻠﻲ ﻭﻳﺪﻋﻲ .. ﻛﻠﻬﻢ ﺑﻜﺎﻫﻢ ﻣﺎﻭﻗﻔﺶ ... ﺇﻻ ﻫﻲ ﻛﺎﻧﺖ ﻣﻘﻌﻤﺰﺓ ﻭﻣﺼﺪﻭﻣﻪ ... ﻗﺎﻋﺪ ﻳﻤﺮ ﻋﻠﻴﻬﺎ ﺷﺮﻳﻂ ﺫﻛﺮﻳﺎﺗﻬﺎ ﻣﻊ ﺍﻟﺤﺴﻦ .. ﻣﺶ ﻣﺴﺘﻮﻋﺒﻪ ﺑﻜﻞ ﺍﻟﻠﻲ ﻗﺎﻋﺪ ﻳﺼﻴﺮ .. ﺗﺬﻛﺮ ﻓﻲ ﻛﻼﻣﻪ ﻟﻴﻬﺎ ﻭﺍﺳﺘﻮﻋﺒﺖ ﺍﻧﻪ ﻳﻮﺩﻉ ﻓﻴﻬﺎ ...
ﺑﺲ ﺍﻛﺜﺮ ﻛﻠﻤﻪ ﺗﺮﻥ ﻓﻲ ﻭﺫﻧﻬﺎ ﺍﻋﺘﺮﺍﻓﻪ ﻟﻴﻬﺎ ﺑﺤﺒﻪ 💔
ﺣﺘﻰ ﻫﻲ ﺗﺤﺒﻪ ﺗﺘﻤﻨﻰ ﻟﻮ ﻳﺮﺟﻊ ﺍﻟﺰﻣﺎﻥ ﻭﺗﺮﺩ ﻋﻠﻴﻪ ﻭﺗﻘﻮﻝ ﺣﺘﻰ ﺃﻧﻲ ﻧﺤﺒﻚ .. ﺑﺲ ﻣﺴﺘﺤﻴﻞ ﻳﺮﺟﻊ ﺍﻟﺰﻣﺎﻥ 💔
ﺍﺳﺘﻤﺮﺕ ﺍﻟﻌﻤﻠﻴﻪ ﺣﻮﺍﻟﻲ 7 ﺳﺎﻋﺎﺕ .. ﻣﺎﻓﻲ ﺣﺪ ﻻﻛﻠﻲ ﻻﺷﺮﺏ .. ﺍﺧﻄﺎ ﺳﺎﺭﻩ ﻷﻧﻬﺎ ﺣﺎﻣﻞ ﻭﺑﺎﻟﺴﻴﻒ ... ﻛﺎﻧﻮﺍ ﻣﻮﺟﻮﺩﻳﻦ ﺑﻮﻋﻠﻴﺎ ﻭﺍﻣﻬﺎ ﺍﻟﻠﻲ ﻛﺎﻧﻮﺍ ﺣﺪﺍ ﺑﻨﺘﻬﻢ ﺍﻟﻤﺼﺪﻭﻣﻪ ﻭﻭﺍﺟﻌﻬﻢ ﺣﺎﻟﻬﺎ ..
***
: ﻓﻬﻤﻪ .. ﺍﻥ ﺍﻟﻠﻲ ﻳﻤﺸﻲ ﻋﻜﺲ ﻣﺎﺃﻧﻲ ﻧﺒﻲ .. ﺣﻴﺎﺧﺪ ﻉ ﺭﺍﺳﻪ ﻟﻴﻦ ﺩﻣﻪ ﻳﺒﺦ .. ﺭﺑﻮﻩ ﺭﺟﻌﻮﻩ ﻟﻮﻋﻴﻪ ﻋﺮﻓﻮﻩ ﺍﻥ ﻋﻨﺪﻩ ﺳﻴﺪ ﻭﺍﻥ ﻫﻮ ﻣﺶ ﺳﻴﺪ ﻧﻔﺴﻪ ..
: ﺗﻢ ﻳﺎﻛﻮﺑﺮﺍ ..
ﻃﺒﻌﺎ ﻣﻨﺬﺭ ﺍﻧﺸﺪ ﻭﺣﻴﺘﻠﻘﻰ ﻋﻘﺎﺏ ﻛﺒﻴﺮ ﻹﻥ ﺧﺎﻟﻒ ﺍﻷﻭﺍﻣﺮ ..
ﻣﻤﻜﻦ ﺗﺘﺴﺄﻟﻮﺍ ﻋﻼﺵ ﻣﺎﻫﺮﺑﺶ .. ﻣﺎﻛﺎﻧﺶ ﻳﺒﻲ ﻳﻬﺮﺏ ﻫﻮ ﻋﺎﺭﻑ ﺍﻧﻪ ﺣﻴﺘﻌﺎﻗﺐ ﺑﺲ ﻣﻘﺘﻨﻊ ﺍﻥ ﺍﻟﻠﻲ ﺩﺍﺭﻩ ﺻﺢ .. ﻭﻋﺎﺭﻑ ﺍﻥ ﻫﻮ ﺍﻫﻢ ﻋﻀﻮ ﻓﻲ ﻣﻨﻈﻤﺘﻬﻢ ﺣﻴﺘﻌﺎﻗﺐ ﻟﻜﻦ ﺣﻴﺤﺮﺻﻮﺍ ﻉ ﺣﻴﺎﺗﻪ ..
***
ﺑﻌﺪ ﺗﻌﺐ ﺍﻛﺜﺮ ﻣﻦ ﺳﺒﻊ ﺳﺎﻋﺎﺕ ... ﺗﺤﻮﻟﺖ ﺍﻟﺮﺻﺎﺻﻪ ﺟﻬﺔ ﺍﻟﻘﻠﺐ .. ﺑﺲ ﻣﺎﺯﺍﻝ ﺍﻟﺨﻄﺮ ﻗﺎﺋﻢ ﻉ ﺣﻴﺎﺓ ﺍﻟﺤﺴﻦ .. ﺧﻴﻄﻮﺍ ﺍﻟﺠﺮﺡ ... ﻭﺷﻮﻳﻪ ﻭﺣﻴﺒﺪﻭﺍ ﺑﻌﻤﻠﻴﻪ ﺍﺯﺍﻟﺔ ﺭﺻﺎﺻﺔ ﺍﻟﻜﺘﻒ ...
ﺑﻌﺪ ﺳﺎﻋﻪ .. ﺑﺪﻭﺍ ﺑﺎﻟﻌﻤﻠﻴﻪ ﺍﻟﺘﺎﻧﻴﻪ ﻣﺎﻛﺎﻧﺘﺶ ﺻﻌﺒﻪ ﺯﻱ ﺍﻷﻭﻟﻰ
ﺍﻧﺘﻬﺖ ﻭﺍﺯﺍﻟﻮﻫﺎ ....
ﻃﻠﻌﻮﺍ ﻣﻦ ﻏﺮﻓﺔ ﺍﻟﻌﻤﻠﻴﺎﺕ ..
ﺍﻟﺪﻛﺘﻮﺭ ﻭﻫﻮﻳﺸﺒﺤﻠﻬﻢ ﻛﻴﻒ ﻳﺮﺍﺟﻮﺍ ﻓﻴﻪ ﺷﻦ ﻳﻘﻮﻝ : ﺣﻮﻟﻨﺎ ﺍﻟﺮﺻﺎﺻﻪ ﺍﻟﻠﻲ ﻛﺎﻧﺖ ﺟﻬﺔ ﺍﻟﻘﻠﺐ ﻭﻛﺎﻧﺖ ﻏﺎﻳﻪ ﻓﻲ ﺍﻟﺨﻄﻮﺭﺓ .. ﻛﺬﻟﻚ ﺍﺯﻟﻨﺎ ﺍﻟﺮﺻﺎﺻﻪ ﺍﻟﻠﻲ ﻓﻲ ﺍﻟﻜﺘﻒ ..
ﻋﺎﺑﺪ : ﻳﻌﻨﻲ ﺗﻮﺍ ﺷﻦ ﺣﺎﻟﻪ ﻳﺎﺩﻛﺘﻮﺭ ..
ﺍﻟﺪﻛﺘﻮﺭ ﺗﻨﻬﺪ : ﻣﺎﻧﺨﻔﻴﻜﻤﺶ .. ﺍﻟﺨﻄﺮ ﻗﺎﺋﻢ ﻉ ﺣﻴﺎﺗﻪ ... ﻻﺯﻡ ﻧﻜﻮﻥ ﺻﺮﻳﺢ ﻭﺿﻌﻪ ﺧﻄﻴﻴﺮ ﻟﻠﻐﺎﻳﻪ ..
ﺣﺴﺎﻥ : ﻧﻄﻠﻌﻮﻩ ﺑﺮﺍ ...
ﺍﻟﺪﻛﺘﻮﺭ : ﺗﺮﻓﻌﻪ ﻭﻳﻦ ﻣﺎﺗﺮﻓﻌﻪ ﻛﻠﻬﻢ ﺣﻴﻘﻮﻟﻮﺍ ﻧﻔﺲ ﺍﻟﺸﻲ .. ﻫﺬﺍ ﻏﻴﺮ ﺍﻥ ﻃﻠﻮﻋﻪ ﻓﻴﻪ ﺧﻄﺮ ﻛﺒﻴﺮ ﺣﺘﻰ ﻟﻮ ﺑﻄﺎﻳﺮﺓ ﺍﺳﻌﺎﻑ .. ﻟﺬﻟﻚ ﻣﺎﻓﻴﺶ ﻗﺪﺍﻣﻨﺎ ﺷﻲ ﻏﻴﺮ ﺍﻧﻨﺎ ﻧﺮﺍﺟﻮ ﺭﺣﻤﺔ ﺭﺑﻲ ﺍﻟﻠﻲ ﻋﻠﻴﻨﺎ ﺩﺭﻧﺎﻩ ..
ﻫﻲ ﺗﺴﻤﻊ ﻓﻲ ﻛﻼﻣﻪ ﻭﺭﺍﻓﻀﻪ ﺗﺘﻘﺒﻞ ﻣﻨﻪ ﺣﺮﻑ .. ﺭﺍﻓﻀﻪ ﺗﻤﺎﻣﺎ .. ﺍﻧﺘﺎﺑﻬﺎ ﺷﻌﻮﺭ ﺑﺎﻟﻐﻀﺐ ﺍﻟﺸﺪﻳﺪ ﺑﻜﻞ ﻗﻮﻩ ﺍﻧﺪﻓﻌﺖ ﻟﻠﺪﻛﺘﻮﺭ ..
ﻋﻠﻴﺎ ﺑﺼﻮﺕ ﻋﺎﻟﻲ : ﻋﻼﺵ ﺍﺳﻤﻜﻢ ﺩﻛﺎﺗﺮﺓ .. ﻫﺎﺍﺍﺍﻩ .. ﻋﻼﺵ .. ﻣﺴﻤﻲ ﺭﻭﺣﻚ ﺩﻛﺘﻮﺭ .. ﻟﻮ ﺭﻭﺡ ﻣﺮﻳﺾ ﺑﻴﻦ ﺍﻳﺪﻳﻚ ﻋﺎﺟﺰ ﺍﻧﻚ ﺗﺤﺎﻓﻆ ﻋﻠﻴﻬﺎ ﻭﺗﺘﻜﻠﻢ ﺑﻀﻌﻒ ﻫﻜﻲ . ﺍﻟﻠﻲ ﺩﺍﺧﻞ ﻫﺬﺍ ﺭﺍﺟﻞ ﻗﻮﻱ ﻭﻳﺎﻣﺎ ﻓﻲ ﺟﺴﻤﻪ ﺍﺛﺎﺭ ﻻﺻﺎﺑﺎﺕ ﺯﻱ ﻫﺎﺩﻱ ﻭﻃﻠﻊ ﻣﻨﻬﺎ ﻭﺍﻗﻒ ﻉ ﺭﺟﻠﻴﻪ .. ﺣﻴﻄﻠﻊ ﻣﻦ ﻫﺎﺩﻱ ﻭﺍﻗﻒ ﻉ ﺭﺟﻠﻴﻪ .. ﺣﻄﻠﻌﻮﻩ ﻣﻨﻬﺎ .. ﺣﻄﻠﻌﻮﻩ ﺳﺎﻣﻌﻨﻲ .. ﺣﻄﻠﻌﻮﻩ ﻣﻨﻬﺎ .. ﻭﻗﻌﺪﺕ ﺗﻀﺮﺏ ﻓﻲ ﺍﻟﺪﻛﺘﻮﺭ ﺟﺒﺪﻭﻫﺎ ﺑﻮﻫﺎ ﻭﻋﻤﻬﺎ .. ﻭﻫﻲ ﺗﻌﻴﻂ ﻭﺗﻘﻮﻝ ﺣﻄﻠﻌﻮﻩ ﻣﻨﻬﺎ ... ﺣﻄﻠﻌﻮﺍ ....
ﺟﻌﻔﺮ ﺑﺒﻜﻲ : ﻳﺎﺑﻨﺘﻲ ﻣﺶ ﻫﻜﻲ ..
ﻋﺎﺑﺪ : ﻭﺣﺪﻱ ﺍﻟﻠﻪ ..
ﻋﻠﻴﺎ ﺑﺼﻮﺕ ﻋﺎﻟﻲ : ﻧﺒﻲ ﺭﺍﺍﺍﺍﺍﺟﻠﻲ ﺭﺟﻌﻮﻭﻭﻟﻲ ﺭﺍﺍﺍﺍﺍﺟﻠﻲ .. ﺭﺩﻭﻭﻭﻭﻭﻟﻲ ﺍﻟﺤﺴﻦ ﺭﺩﻭﻭﻭﻭﻭﻫﻮﻟﻲ ﻫﻮ ﻗﺎﺍﺍﻟﻲ ﻣﺶ ﺣﻨﺨﻠﻴﻚ ﻫﻮ ﻭﻋﺪﻧﻲ ﻫﻮﻭﻭﻭﻭﻭ ..
ﻛﻠﻬﻢ ﺗﺄﺛﺮﻭﺍ ﻭﺍﻧﻬﺎﺭﻭﺍ ﺑﺎﻟﺒﻜﻲ .. ﻭﻭﺳﻴﻠﻪ ﺗﺸﻮﻓﻠﻬﺎ ﻭﺗﺒﻜﻲ ﺑﺎﻟﻌﺒﺮﻩ ..
ﻋﻠﻴﺎ ﺩﻣﻮﻋﻬﺎ ﻧﺰﻟﻮﺍ : ﺭﺩﻭﻭﻭﻭﻭﻭﻭﻩ ﺭﺩﻭﻭﻭﻭﻭﻭﻭﻩ ... ﻳﺎﺑﺎﺑﺎ ﺭﺩﻭﻭﻭﻭﻭﻩ .. ﻳﺎ .. ﺑﺎ ... ﺻﻮﺗﻬﺎ ﺑﺪﻱ ﻳﺨﺘﻔﻲ ﻭﺛﻘﻠﺖ ﺑﻴﻦ ﺍﻳﺪﻳﻦ ﺑﻮﻫﺎ ﻭﻃﺎﺣﺖ ﻓﺎﻗﺪﻩ ﺍﻟﻮﻋﻲ
***
ﻭﺳﺎﺋﻞ ﺍﻹﻋﻼﻡ " ﺍﻟﺘﻠﻔﺰﻳﻮﻥ .. ﺍﻟﺘﻮﺍﺻﻞ ﺍﻹﺟﺘﻤﺎﻋﻲ " ﺗﻨﺎﻗﻠﻮﺍ ﺍﻟﺨﺒﺮ .. ﻭﺍﻟﺪﻧﻴﺎ ﺍﻧﻘﻠﺒﺖ ﺑﻴﻪ ...
ﻓﻲ ﺍﻟﻤﺮﻛﺰ ﺧﻴﻢ ﺍﻟﺤﺰﻥ ﻉ ﻛﻞ ﺍﻟﻀﺒﺎﻁ ﻭﺍﻟﻌﻨﺎﺻﺮ .. ﻭﺟﺎﺩ ﺍﻟﻠﻪ ﻓﻲ ﺣﺎﻟﺔ ﻏﻀﺐ ﺷﺪﻳﺪﻩ ﺣﺲ ﺍﻥ ﻫﻮ ﺍﻟﺴﺒﺐ ﻫﻮ ﺍﻟﻠﻲ ﺍﻭﻝ ﻣﺎﻭﺻﻼﺗﻪ ﻣﻌﻠﻮﻣﺎﺕ ﻋﻦ ﺍﻭﻛﺎﺭ ﻫﺎﻟﻌﺼﺎﺑﺎﺕ ﺗﺤﻤﺲ ﺑﺶ ﻳﻘﻀﻲ ﻋﻠﻴﻬﻢ ﻭﻳﻀﻌﻒ ﻣﻨﻈﻤﺘﻬﻢ ﻣﺎﻛﺎﻧﺶ ﺩﺍﺭﺱ ﺍﻟﻮﺿﻊ ﺻﺢ ﺧﺪﺍﻩ ﺍﻟﺤﻤﺎﺱ ﻭﺿﺎﻋﺖ ﻫﻠﺒﻪ ﺍﺭﻭﺍﺡ .. ﻣﻦ ﺿﻤﻨﻬﻢ ﺁﺩﻡ ﺍﻟﻠﻲ ﻛﺎﻥ ﻣﻦ ﺃﻛﻔﺄ ﺍﻟﻀﺒﺎﻁ ﻋﻨﺪﻫﻢ .. ﻭﻋﺮﺳﻪ ﻛﺎﻥ ﻗﺮﻳﺐ .. ﺑﺪﻝ ﻣﺎﻳﻨﺰﻑ ﻋﺮﻳﺲ ﻓﻲ ﺍﻟﺪﻧﻴﺎ ﺣﻴﻨﺰﻑ ﻋﺮﻳﺲ ﻓﻲ ﺍﻟﺠﻨﻪ ﺇﻥ ﺷﺎﺀﺍﻟﻠﻪ ..
ﺇﺻﺎﺑﻪ ﺍﻟﺤﺴﻦ ﺍﻟﺨﻄﻴﺮﻩ ﺿﺮﺑﻪ ﻗﺎﺳﻤﻪ ﻟﺠﻬﺎﺯ ﺍﻟﻤﻜﺎﻓﺤﻪ ﻓﻲ ﻟﻴﺒﻴﺎ ﻛﺎﻣﻠﻪ ...
ﻋﺒﺪﺍﻟﻘﺪﻭﺱ : ﻣﺶ ﻋﺎﺭﻑ ﻋﻼﺵ ﺣﺎﺱ ﺍﻟﻠﻲ ﺻﺎﺭ ﻣﺶ ﺣﻴﻜﻮﻥ ﻓﻲ ﺻﺎﻟﺤﻨﺎ ..
ﻣﻨﺼﻒ ﺑﺈﺑﺘﺴﺎﻣﻪ ﻣﺎﻛﺮﻩ : ﺍﻃﻤﻦ ﻳﺎﺑﻲ ﻓﻲ ﺻﺎﻟﺤﻨﺎ ﻭﻧﺺ ..
ﻋﺒﺪ ﺍﻟﻘﺪﻭﺱ ﺑﺘﻬﻜﻢ : ﻓﻲ ﺻﺎﻟﺤﻚ ﺍﻧﺖ ﺑﺲ ..
ﻣﻨﺼﻒ ﺿﺤﻚ ﻭﻫﺰ ﺭﺍﺳﻪ ﺍﻳﻤﻴﻦ ﻭﻳﺴﺎﺭ ..
ﻋﺒﺪﺍﻟﻘﺪﻭﺱ " ﻟﻮ ﺻﺎﺭ ﻓﻲ ﺭﺍﺟﻠﻬﺎ ﺣﺎﺟﻪ ﻣﺎﺯﺍﻝ ﺑﺘﺸﺒﺢ ﻓﻲ ﺧﻠﻴﻘﺘﻚ ﻫﻲ ..."
***
ﺗﻌﺮﻓﻪ ﺍﻧﺖ؟
ﺑﻼﻝ ﺑﺮﺑﻜﻪ : ﺍﻛﻴﺪ ﺣﺒﻴﺒﺘﻲ ﻣﻨﻮ ﻣﺎﻳﻌﺮﻓﺎﺵ ..
ﺍﺑﺘﺴﺎﻡ : ﺣﺴﻴﺘﻚ ﺗﺄﺛﺮﺕ ﻫﻠﺒﻪ ﻭﻛﺄﻧﻚ ﺗﻌﺮﻓﻪ ..
ﺑﻼﻝ : ﻃﺒﻴﻌﻲ ﺍﺑﺘﺴﺎﻡ ﻟﻴﺒﻴﺎ ﻛﻠﻬﺎ ﺗﺄﺛﺮﺕ ﺑﺎﻟﺨﺒﺮ ﻣﺎ ﺗﺒﻨﻴﺶ ﺍﻧﻲ ﻧﺘﺄﺛﺮ !!!
ﺍﺑﺘﺴﺎﻡ ﺑﺤﺰﻥ : ﺻﺪﻗﺖ ... ﻭﺟﻌﺘﻨﻲ ﺻﺎﺣﺒﺘﻲ ﻫﻠﺒﻪ .. ﻣﺴﻜﻴﻨﻪ ﺭﺑﻲ ﻳﻠﻄﻒ ﺑﻴﻬﺎ ...
ﺑﻼﻝ : ﺁﺍﺍﻣﻴﻦ ..
***
ﻣﺪﻳﺤﻪ ﻓﻲ ﺣﻮﺵ ﺃﻫﻠﻬﺎ ﺗﻬﺪﺭﺯ ﻣﻊ ﺍﺧﺘﻬﺎ ..
ﻣﺪﻳﺤﻪ ﻭﺩﻣﻮﻋﻬﺎ ﺗﻨﺰﻝ : ﻓﻘﺪﺕ ﺍﻟﻮﻋﻲ ﻣﻦ ﻛﺜﺮ ﻣﺎﻋﻴﻄﺖ ..
ﺍﻣﻴﺮﺓ ﺑﺒﻜﻲ : ﻟﻮ ﺍﻧﻲ ﻣﻨﻬﺎ ﻣﺘﺖ ..
ﻣﺪﻳﺤﻪ : ﻟﻮ ﺗﺸﻮﻓﻲ ﺣﺎﻟﺔ ﻋﻴﻠﺘﻪ ﻣﺴﺎﻛﻴﻦ ..
ﺍﻣﻴﺮﺓ : ﻣﺎﻻ ﺷﻨﻮ .. ﺍﻧﻲ ﻫﻨﻲ ﻗﺮﻳﺐ ﻫﺒﻠﺖ ..
ﻣﺪﻳﺤﻪ ﺗﻨﻬﺪﺕ ﻭﻫﻲ ﺗﻤﺴﺢ ﻓﻲ ﺩﻣﻮﻋﻬﺎ : ﺍﻣﻲ ﻭﺑﻮﻱ ﺑﻴﺮﻭﺡ ﺑﻴﻬﻢ ﻣﺼﻌﺐ ﻓﻲ ﺍﻟﻠﻴﻞ ﺣﻨﻘﻌﺪ ﻣﻌﺎﻙ ﻟﻴﻦ ﻳﺠﻮ ..
ﺍﻣﻴﺮﻩ ﺳﻜﺘﺖ ﻭﻣﺎﺯﺍﻟﻮﺍ ﺩﻣﻮﻋﻬﺎ ﻣﺎﻭﻗﻔﻮﺍ ...
***
ﻓﺘﺤﺖ ﻋﻴﻮﻧﻬﺎ ﻭﻫﻲ ﺗﺘﻔﺤﺺ ﻓﻲ ﺍﻟﻤﻜﺎﻥ ﻛﻠﻪ ﺗﺤﺎﻭﻝ ﺗﺴﺘﻮﻋﺐ ﻫﻲ ﻭﻳﻦ .. ﺍﺫﻛﺮﺕ ﺍﻟﻠﻲ ﺻﺎﺭ ﻭﺩﻣﻮﻋﻬﺎ ﻧﺰﻟﻮﺍ ...
ﺯﻳﻨﺐ : ﻣﺎﻣﺎ ﻋﻠﻴﺎ ..
ﻋﻠﻴﺎ ﺷﺒﺤﺘﻠﻬﺎ ﺑﺒﻜﻲ : ﺍﻟﺤﺴﻦ ...
ﺯﻳﻨﺐ ﺑﺄﺳﻒ : ﺑﻨﺘﻲ ﺣﺒﻴﺒﺘﻲ .. ﻗﻮﻱ ﺭﻭﺣﻚ ﻳﺎﺑﻨﺘﻲ ﻗﻮﻱ ﺭﻭﺣﻚ ﻭﻧﻮﺿﻲ ﺻﻠﻲ ﻭﺍﺩﻋﻲ ... ﻫﻮ ﻫﺬﺍ ﺍﻟﻠﻲ ﻣﺤﺘﺎﺟﻪ ﺧﻠﻴﻚ ﻗﻮﻳﻪ ﺑﻨﺘﻲ ﺯﻱ ﻣﺎﻧﻌﺮﻓﻚ .. ﺑﺶ ﻟﻤﺎ ﺭﺑﻲ ﻳﻨﻮﺿﻪ ﺑﺎﻟﺴﻼﻣﻪ ﻳﻠﻘﺎﻙ ﺑﺼﺤﺘﻚ ﻗﺪﺍﻣﻪ ﺗﻘﻮﻳﻪ ... ﺭﻩ ﺍﻟﻠﻲ ﺻﺎﺭﻟﻪ ﻣﺶ ﺷﻮﻳﻪ ﻉ ﻗﺪ ﻣﺎﺧﺪﻡ ﻓﻲ ﺍﻟﺸﺮﻃﻪ ﻋﻤﺮﻩ ﻣﺎﺻﺎﺭﻟﻪ .. ﻫﻜﻲ ﻗﺎﻟﻮﺍ ... ﻣﺮﺍﺕ ﻳﻄﻠﻊ ﻣﻦ ﻫﺎﻟﺤﺎﻟﻪ ﺿﻌﻴﻒ ﻭﻧﻔﺴﻴﺘﻪ ﺗﺎﻋﺒﻪ ﻻﺯﻡ ﺗﻜﻮﻧﻲ ﻗﻮﻳﻪ ﺑﺶ ﺗﻮﻗﻔﻲ ﺟﻨﺒﻪ ... ﻭﺗﺮﺩﻳﻪ ﺃﺣﺴﻦ ﻣﻦ ﻗﺒﻞ ...
ﻋﻠﻴﺎ ﻛﻼﻡ ﺃﻣﻬﺎ ﺃﺛﺮ ﻓﻴﻬﺎ ﺣﺴﺖ ﺍﻧﻪ ﺻﺢ ﺍﻟﺤﺴﻦ ﺑﺄﻣﺲ ﺍﻟﺤﺎﺟﻪ ﺣﺎﻟﻴﺎ ﻟﺪﻋﺎﺋﻬﺎ ﻭﻟﻮﻧﺎﺽ ﻣﻦ ﺣﺎﻟﺘﻪ ﻫﺎﺩﻱ ﻓﻬﻮ ﺑﺄﻣﺲ ﺍﻟﺤﺎﺟﻪ ﻟﻴﻬﺎ ﻫﻲ ... ﻭﻫﻲ ﻻﺯﻡ ﺗﻜﻮﻥ ﻗﻮﻳﻪ ...
***
ﻣﻨﺬﺭ ﻛﺎﻥ ﻳﺘﻠﻘﻰ ﻓﻲ ﺿﺮﺏ ﻣﺒﺮﺡ ... ﻭﻛﺎﻥ ﻣﺘﺤﻤﻞ ﻣﺶ ﻫﺎﻣﻪ ﺍﻟﻤﻬﻢ ﺍﻟﻠﻲ ﻓﺮﺍﺳﻪ ﺩﺍﺭﻩ ...
ﺟﻤﺎﻋﻪ ﻣﻦ ﺍﻟﺪﻭﻟﻪ ﻣﺎﻋﺠﺒﻬﻤﺶ ﺍﻟﻠﻲ ﺻﺎﺭ ﻷﻧﻪ ﺍﺛﺎﺭ ﺑﻠﺒﻠﻪ .. ﻭﻓﻲ ﻣﻦ ﺍﻟﻨﺎﺱ ﻋﻠﻴﻬﻢ ﺩﺍﺋﺮﺓ ﺷﻚ ﻣﻦ ﻏﻴﺮ ﺷﻲ ...
...
ﻓﻲ ﺍﻟﻠﻴﻞ ..
ﻋﺎﺑﺪ : ﻫﻴﺎ ... ﻧﻮﺿﻮﺍ ﻻﺯﻡ ﺗﺮﻭﺣﻮﺍ ...
ﻭﺳﻴﻠﻪ : ﻣﺎﻧﻴﺶ ﻣﺘﺤﺮﻛﻪ ..
ﻋﺎﺑﺪ : ﻻﺣﺘﺘﺤﺮﻛﻲ ﻗﻌﺎﺩﻛﻢ ﻫﻨﻲ ﻣﺎﻻﺵ ﺩﺍﻋﻲ ﻭﻻﻓﻴﻪ ﻓﺎﻳﺪﻩ ..
ﻋﻠﻲ : ﺍﻣﻲ ﺍﺳﺘﻬﺪﻱ ﺑﺎﻟﻠﻪ ﻭﻫﻴﺎ ﻧﻮﺿﻲ ﻏﺪﻭﺓ ﻣﻦ ﺍﻟﺼﺒﺢ ﻧﺠﻴﺒﻚ ..
ﻧﺎﺿﺖ ﻭﺳﻴﻠﻪ ﺑﺘﺮﻭﺡ ﻭﻣﻌﺎﻫﺎ ﺑﻨﺎﺗﻬﺎ ﻛﺬﻟﻚ ﺑﺮﻧﻴﻪ ﻭﺑﻴﺮﻭﺡ ﺑﻴﻬﺎ ﺣﺴﺎﻥ ﻫﻲ ﻭﻣﺮﺗﻪ ﻭﻋﻤﺘﻪ ﺍﻧﻌﺎﻡ .. ﻭﻋﻴﻠﺔ ﻣﺤﻤﺪ ﺣﺘﻰ ﻫﻤﺎ ﺭﻳﺤﺎﻧﻪ ﺑﺎﻟﺴﻴﻒ ﺭﻭﺣﺖ ﺣﺘﻤﻮﺕ ﻉ ﺍﻟﺤﺴﻦ ﻣﻦ ﺍﻟﺤﺰﻥ ..
ﻋﺎﺑﺪ ﻳﻜﻠﻢ ﻓﻲ ﻋﻠﻴﺎ ..
ﻋﺎﺑﺪ : ﻳﺎﺑﻨﺘﻲ ﻭﺍﻟﻠﻪ ﻣﺎﻓﻲ ﻣﻨﻪ ﻓﺎﻳﺪﻩ ..
ﻋﻠﻴﺎ : ﺳﺎﻣﺤﻨﻲ ﻳﺎﻋﻤﻲ ﺍﻧﻲ ﻣﻦ ﻫﻨﻲ ﻭﺍﻟﻠﻪ ﻣﺎﻧﻲ ﻣﺘﺤﺮﻛﻪ ..
ﻋﺎﺑﺪ : ﻛﻴﻒ ﻳﺎﺑﻨﺘﻲ ﺗﻘﻌﺪﻱ ﺑﺮﻭﺣﻚ ..
ﺳﺮﻣﺪ : ﺍﻧﻲ ﻗﺎﻋﺪ ﺗﻘﻌﺪ ﻣﻌﺎﻱ ..
ﻋﺎﺑﺪﺷﺒﺤﻠﻪ ﺑﻌﺪﻳﻦ ﺷﺒﺤﻠﻬﺎ ﻭﻫﻲ ﻣﺸﺖ ﻭﻗﻔﺖ ﺣﺪﺍ ﺑﺎﺏ ﺍﻟﻌﻨﺎﻳﻪ ﺍﻟﻤﺸﺪﺩﺓ ..
ﻋﺎﺑﺪ ﺷﺒﺢ ﻟﺴﺮﻣﺪ : ﺭﺩ ﺑﺎﻟﻚ ﻋﻠﻴﻬﺎ ..
ﺳﺮﻣﺪ : ﺍﻃﻤﻦ ...
ﻋﺎﺑﺪ : ﺍﻱ ﺷﻲ ﻳﺼﻴﺮ ﻛﻠﻤﻨﻲ ..
ﺳﺮﻣﺪ : ﺣﺎﺿﺮ ...
ﻭﻣﺸﻲ ﻋﺎﺑﺪ ﻭﻗﻌﺪ ﺳﺮﻣﺪ ﻭﺍﻗﻒ ﻭﺣﺎﻁ ﺍﻳﺪﻳﻪ ﻓﺠﻴﻮﺑﻪ ﻭﻳﺸﺒﺢ ﻟﻌﻠﻴﺎ " ﻓﻬﺎﻟﻔﺘﺮﺓ ﺍﻟﻘﺼﻴﺮﺓ ﺣﺒﺎﺗﻪ ﻛﻞ ﻫﺎﻟﺤﺐ ﻭﻧﺴﺖ ﺍﻟﻤﺎﺿﻲ ﻛﻠﻪ !! ﻣﺎﺗﻨﻼﻣﺶ ﺣﺘﻰ ﻫﻮ ﺍﻟﺤﺴﻦ " ﺍﺑﺘﺴﻢ ﻭﻗﻌﺪ ﻭﺍﻗﻒ ﺑﻌﻴﺪ .. ﻭﺻﻼﺗﻪ ﺭﺳﺎﻟﻪ ﻗﺮﺍﻫﺎ ﻭﺭﺟﻊ ﺣﻂ ﺗﻠﻴﻔﻮﻧﻪ ﻣﻦ ﺟﺪﻳﺪ ﻓﻲ ﺟﻴﺒﻪ ...
***
ﺭﺷﺎ : ﻫﻬﻬﻬﻬﻬﻬﻬﻬﻬﻪ ﺗﺤﻠﻢ ﻭﺧﻴﻲ ...
ﻣﻨﺼﻒ : ﻭﻋﻼﺵ ..
ﺭﺷﺎ : ﻟﻮ ﺗﺒﻲ ﺗﻮﻟﻴﻠﻚ ﺭﻩ ﻭﻟﺘﻠﻚ ﺍﻳﺎﻡ ﻛﺎﻧﺖ ﻣﺨﻄﻮﺑﻪ ﻟﺮﺍﺟﻠﻬﺎ ...
ﻣﻨﺼﻒ : ﻫﻲ ﻛﺎﻧﺖ ﺗﺒﻲ ﺗﺤﺮﻗﻨﻲ ﺑﻴﻪ ... ﻋﺎﺭﻑ ﻗﻠﺒﻬﺎ ﻣﺎﺯﺍﻝ ﻋﻨﺪﻱ ﻭﻣﺸﺎﻋﺮﻫﺎ ﻣﻌﺎﻱ .. ﻏﻴﺮ ﻳﻤﻮﺕ ﻭﻧﺮﺗﺎﺡ ﻣﻨﻪ ﺣﺘﺸﻮﻓﻲ ﻛﻴﻒ ﺣﺘﺮﺟﻌﻠﻲ ﻋﻠﻴﺎ ﻃﻮﻝ ...
ﺭﺷﺎ ﺍﺑﺘﺴﻤﺖ ﺑﺘﻬﻜﻢ ..
***
ﻟﻴﻠﻪ ﻛﺎﻧﺖ ﺻﻌﺒﻪ .. ﺍﻟﻠﻲ ﻣﺎﺭﻗﺪﺵ ﻭﻫﻮ ﻳﺨﻤﻢ .. ﻭﺍﻟﻠﻲ ﻣﺎﺭﻗﺪﺵ ﻭﺩﻣﻮﻋﻪ ﺗﻨﺰﻝ .. ﻫﻲ ﻗﺎﻋﺪﻩ ﻭﺍﻗﻔﻪ ﺣﺪﺍ ﺑﺎﺏ ﺍﻟﻌﻨﺎﻳﻪ ﻣﺎﺗﺒﻴﺶ ﺗﺘﺤﺮﻙ .. ﺗﺒﻜﻲ ﻭﺗﺪﻋﻲ ﻭﺑﺲ ...
ﺍﻟﺪﻛﺘﻮﺭ : ﻟﻴﻬﺎ ﺳﺎﻋﺘﻴﻦ ﻭﺍﻗﻔﻪ ﻧﻔﺲ ﺍﻟﻮﻗﻔﻪ !!..
ﺳﺮﻣﺪ ﻫﺰ ﺭﺍﺳﻪ ﺑﺈﻳﺠﺎﺏ : ﺇﻳﻪ ..
ﺍﻟﺪﻛﺘﻮﺭ : ﻻﺯﻡ ﺗﺮﺗﺎﺡ ﺣﺘﻨﻬﺎﺭ ﻫﻜﻲ ..
ﺳﺮﻣﺪ : ﺗﻮ ﻧﺤﻄﻠﻬﺎ ﻛﺮﺳﻲ ﺗﻘﻌﻤﺰ ..
ﺍﻟﺪﻛﺘﻮﺭ : ﺗﺤﺒﻪ ﻫﻠﺒﻪ ... ﻗﺮﻳﺐ ﻗﺘﻠﺘﻨﻲ ﻉ ﺧﺎﻃﺮﻩ ..
ﺳﺮﻣﺪ ﺍﺑﺘﺴﻢ ﻭﻫﻮ ﻳﺸﻮﻓﻠﻬﺎ ..
ﺍﻟﺪﻛﺘﻮﺭ : ﺇﻥ ﺷﺎﺀ ﺍﻟﻠﻪ ﻳﺘﻌﺪﺍ ﻣﺮﺣﻠﻪ ﺍﻟﺨﻄﺮ ﻭﺗﻔﺮﺣﻮﺍ ﻛﻠﻜﻢ ﺑﺸﻮﻓﺘﻪ ﺑﺄﺣﺴﻦ ﺣﺎﻝ ...
ﺳﺮﻣﺪ : ﻳﺎﺍﺭﺏ ... ﻣﺸﻲ ﺍﻟﺪﻛﺘﻮﺭ ﻭﺳﺮﻣﺪ ﺧﺪﻱ ﻛﺮﺳﻲ ﻭﺣﻄﻪ ﺣﺪﺍﻫﺎ ..
ﺳﺮﻣﺪ : ﻗﻌﻤﺰﻱ ..
ﻋﻠﻴﺎ ﺷﺒﺤﺘﻠﻪ ﺑﻌﺪﻳﻦ ﺷﺒﺤﺖ ﻟﻠﻜﺮﺳﻲ .. ﻭﻗﻌﻤﺰﺕ ..
ﺳﺮﻣﺪ ﻭﻗﻒ ﻣﻘﺎﺑﻠﻬﺎ ﻉ ﺍﺍﻟﺤﻴﻂ ﻭﺍﻳﺪﻳﻪ ﻓﺠﻴﻮﺑﻪ ..
ﺳﺮﻣﺪ : ﺗﺤﺒﻴﻪ ؟
ﻋﻠﻴﺎ ﺷﺒﺤﺘﻠﻪ ﻭﺗﻨﻬﺪﺕ ﻭﻣﺎﺑﺘﺶ ﺗﺠﺎﻭﺏ ... ﻭﺭﺟﻌﺖ ﺭﻛﺰﺕ ﺑﻨﻈﺮﻫﺎ ﻓﻲ ﺍﻟﻔﺮﺍﻍ ...
ﺳﺮﻣﺪ : ﺗﻨﻬﺪﻳﺘﻚ ﻫﺎﺩﻱ ﺍﺑﻠﻎ ﺍﺟﺎﺑﻪ ..
ﻋﻠﻴﺎ ﺳﺎﻛﺘﻪ ﻭﺑﺲ ..
ﺳﺮﻣﺪ : ﺣﺘﻰ ﻫﻮ ﻳﺤﺒﻚ ﻭﻫﻠﺒﻪ ﻣﺶ ﺷﻮﻳﻪ .. ﻧﻌﺮﻓﻪ ﻛﻮﻳﺲ .. ﻋﻤﺮﻩ ﻣﺎﻋﺎﺵ ﺍﻱ ﺷﻲ ﻟﻴﻪ ﻋﻼﻗﻪ ﺑﺎﻟﺤﺐ ﻭﺍﻟﻤﺸﺎﻋﺮ .. ﺍﻟﻨﺴﺎﻭﻳﻦ ﻓﻲ ﺣﻴﺎﺗﻪ ﻣﺎﻟﻬﻴﻤﺶ ﻭﺟﻮﺩ .. ﺍﺧﻄﻰ ﻣﻦ ﻋﻴﻠﺘﻪ ﻣﺤﺎﺭﻣﻪ ﺑﺲ ... ﻟﻜﻦ ﺍﻧﺘﻲ ﺍﺧﺘﺼﺮﺗﻲ ﺍﻟﻨﺴﺎﻭﻳﻦ ﻛﻠﻬﻢ ﻓﻴﻚ ﻋﻨﺪﻩ .. ﻋﻤﺮﻱ ﻣﺎﺭﻳﺖ ﻭﺟﻬﻪ ﻳﺤﻤﺮ .. ﺍﻭ ﺭﻳﺘﻪ ﺧﺠﻮﻝ .. ﺍﻭ ﻳﺮﺗﺒﻚ .. ﺍﻭ ﻋﻴﻮﻧﻪ ﻧﻈﺮﺗﻬﻢ ﻛﺎﻧﺖ ﺣﻨﻮﻧﻪ ﺇﻻ ﻟﻤﺎ ﺧﺸﻴﺘﻲ ﺍﻧﺘﻲ ﻟﺤﻴﺎﺗﻪ ﻗﻠﺒﺘﻴﻪ ﻗﻠﺐ ..
ﻋﻠﻴﺎ ﺩﻣﻮﻋﻬﺎ ﻳﻨﺰﻟﻮﺍ ﺳﻴﻞ ... ﻣﻦ ﻛﻼﻡ ﺳﺮﻣﺪ ..
ﺳﺮﻣﺪ ﺗﻨﻬﺪ : ﺣﻴﻨﻮﺽ ﻣﻨﻬﺎ ﺍﻧﻲ ﻧﻌﺮﻓﻪ ﺣﻴﻨﻮﺽ ﻣﻨﻬﺎ ..
ﻋﻠﻴﺎ ﺑﺼﻮﺕ ﺑﺎﻛﻲ : ﻳﺎﺍﺍﺭﺏ ...
***
72 ﺳﺎﻋﻪ ﻟﻮ ﻓﺎﺗﺖ ﻉ ﺧﻴﺮ ﺣﻴﺘﺨﻄﺎ ﻣﺮﺣﻠﻪ ﺍﻟﺨﻄﺮ ﻭﺇﻣﺎ 💔..
ﺗﻌﺪ ﻓﻲ ﺍﻟﺴﺎﻋﺎﺕ .. ﻓﺎﺕ ﻳﻮﻡ ﻭﻫﻲ ﺗﺮﺍﺟﻲ ﺍﻣﺘﻰ ﻳﺮﺟﻌﻠﻬﺎ ﺣﺒﻴﺒﻬﺎ ﺍﻹﻧﺴﺎﻥ ﺍﻟﻠﻲ ﻣﻠﻜﻬﺎ ﻛﻠﻬﺎ .. ﺍﻟﻠﻲ ﺧﻼﻫﺎ ﺗﺤﺲ ﺍﻥ ﺍﻟﺤﻴﺎﻩ ﺑﻌﺪﻩ ﻣﺴﺘﺤﻴﻠﻪ .. ﺳﻜﺮﺕ ﺭﺍﺳﻬﺎ ﻉ ﺍﻟﻤﺮﻭﺍﺡ ﺑﺲ ﺑﻌﺪ ﺍﻟﺤﺎﺡ ﻣﻦ ﺑﻮﻫﺎ ﺭﻭﺣﺖ ﺳﺎﻋﻪ .. ﺩﻭﺷﺖ ﻭﻏﻴﺮﺕ ﺣﻮﺍﻳﺠﻬﺎ ﻭﻭﻟﺖ ﻃﻮﻝ .. ﻓﺎﺗﻮﺍ ﻣﻦ 72 ﺳﺎﻋﻪ 40.. ﺳﺎﻋﻪ ﻭﻣﺎﻓﻴﺶ ﺍﻱ ﺗﻄﻮﺭ ...
ﻋﻠﻴﺎ ﺑﺘﻮﺳﻞ : ﻣﺶ ﺣﻨﻌﻄﻞ ﻧﺒﻲ ﻧﺸﻮﻓﻪ ﺷﻮﻳﻪ ... ﺣﺮﺍﻡ ﻋﻠﻴﻜﻢ ..
ﺍﻟﺪﻛﺘﻮﺭ ﺗﻨﻬﺪ : 5 ﺩﻗﺎﻳﻖ ﻭﻻﺗﺎﻧﻴﻪ ﺯﻳﺎﺩﻩ ...
ﻋﻠﻴﺎ : ﺣﺎﺿﺮ ﺣﺎﺿﺮ ﺣﺎﺿﺮ ..
ﺭﻓﻌﻮﻫﺎ ﻟﺒﺴﺖ ﺍﻟﻴﻮﻧﻴﻔﻮﺭﻡ .. ﻭﻃﺎﻗﻴﻪ ﻭﻗﻔﺎﺯﺍﺕ .. ﻓﺘﺤﻮﻟﻬﺎ ﺍﻟﺒﺎﺏ ﺧﺸﺖ .. ﺍﻧﺼﺪﻣﺖ ﺑﺎﻟﻠﻠﻲ ﺷﺎﻓﺘﻪ ﺭﺍﻗﺪ ﻭﺍﻷﺟﻬﺰﺓ ﺣﻮﺍﻟﻴﻪ .. ﻗﺮﺑﺖ ﺷﺎﻓﺖ ﺻﺪﺭﻩ ﺍﻟﻌﺮﻳﺎﻥ ﻣﻠﻔﻮﻑ ﺑﻀﻤﺎﺩﺍﺕ .. ﻭﻛﺘﻔﻪ .. ﻧﺰﻟﻮﺍ ﺩﻣﻮﻋﻬﺎ ﻭﻗﻔﺖ ﺣﺪﺍﻩ ﻗﻌﺪﺕ ﺗﺘﺄﻣﻞ ﻓﻴﻪ ﺑﺘﻤﻮﺕ .. ﻉ ﻧﻈﺮﺓ ﻣﻦ ﻧﻈﺮﺍﺗﻪ ﺍﻟﻤﻤﻴﺰﺓ .. ﺑﺘﻤﻮﺕ ﻉ ﺍﺑﺘﺴﺎﻣﺘﻪ ﺍﻟﺨﺎﺻﻪ . ﺑﺘﻤﻮﺕ ﻉ ﻧﺒﺮﺓ ﺻﻮﺗﻪ ﺍﻟﺨﺸﻨﻪ ﺍﻟﻠﻲ ﻓﻴﻬﺎ ﺑﺤﻪ ﺑﺴﻴﻄﻪ .. ﺑﺘﻤﻮﺕ ﻉ ﺿﺤﻜﺘﻪ .. ﺑﺘﻤﻮﺕ ﻭﺗﺸﻮﻓﻪ ﻳﺮﺟﻊ ﻭﺍﻗﻒ ﻉ ﺭﺟﻠﻴﻪ ﻗﺪﺍﻣﻬﺎ ﻣﻦ ﺟﺪﻳﺪ ...
ﺣﻮﻟﺖ ﺍﻟﻜﻤﺎﻣﻪ ﺷﻮﻳﻪ : ﺍﻧﺖ ﻭﻋﺪﺗﻨﻲ ... ﻭﺍﻧﺖ ﺭﺍﺟﻞ ﺣﺮ ﻭﻋﺪﻙ ﺩﻳﻦ ﻋﻠﻴﻚ .. ﻣﺎﺗﺨﻠﻨﻴﺶ ﺑﺮﻭﺣﻲ .. ﺍﻧﻲ ﻣﻦ ﻏﻴﺮﻙ ﻭﺣﻴﺪﻩ ﻣﺎﻋﻨﺪﻱ ﺣﺪ .. ﻧﺒﻲ ﻧﻌﻴﺶ ﻋﻤﺮﻱ ﻛﻠﻪ ﻓﻲ ﺣﻀﻨﻚ ﻓﻲ ﺣﻤﺎﻳﺘﻚ ﻓﻲ ﺣﺒﻚ .. ﻧﺒﻴﻚ ﺍﻧﺖ .... ﻧﺒﻴﻚ ﺍﻧﺖ ﻳﺎﺃﺣﻠﻰ ﺻﺪﻓﺔ ﻓﺮﺿﻬﺎ ﻋﻠﻴﺎ ﺍﻟﻘﺪﺭ ..💖
ﻗﺪﻣﺖ ﻭﺷﺪﺕ ﺍﻳﺪﻩ : ﻣﺤﺮﻭﻣﻪ ﺣﺘﻰ ﻧﻠﻤﺲ ﺍﻳﺪﻙ ﻭﺍﻧﺖ ﻓﻲ ﻫﺎﻟﺤﺎﻟﻪ ... ﺁﺍﺍﺍﺍﻩ ﻳﺎﻟﺤﺴﻦ .. ﻗﻠﺒﻲ ﻳﺘﻘﻄﻊ ﻋﻠﻴﻚ ﺗﻘﻄﻴﻊ ...
ﺍﻩ ﻟﻮ ﻧﻘﺪﺭ ﻧﻠﻤﺲ ﺍﻳﺪﻙ ﺑﺲ ﺑﺲ ﻧﺤﺴﻚ ﻣﻮﺟﻮﺩ ﺍﻩ ﻟﻮ ﻧﻠﻤﺲ ﺍﻳﺪﻙ ﺑﺲ ﺑﺶ ﻳﻬﺪﺍ ﻗﻠﺒﻲ .. ﻭﻗﻌﺪﺕ ﺗﺒﻜﻲ ﺑﺎﻟﻌﺒﺮﻩ ..
🎶 ﺑﻠﻤﺴﺔ ﺍﻳﺪ ﺑﺄﺭﺿﻰ ﺃﻛﻴﺪ
ﻭﺑﺎﻧﺴﻰ ﺍﻧﻚ ﻛﻨﺖ ﺑﻌﻴﺪ
ﻛﻴﻒ ﺑﺘﻮﺏ ﺍﻟﻬﻮﺍ ﻣﻜﺘﻮﺏ
ﻳﻘﺴﻢ ﻗﻠﺒﻲ ﺗﻼﺕ ﻗﻠﻮﺏ
ﻗﻠﺐ ﻳﺤﺒﻚ
ﻗﻠﺐ ﻳﺪﻭﺏ
ﻗﻠﺐ ﻳﻐﺎﺭ ﻋﻠﻴﻚ ..
ﺧﺪﻧﻲ ﺑﺤﻀﻨﻚ ﺧﺎﻑ ﻋﻠﻲ
ﺣﺴﺴﻨﻲ ﺑﻮﺟﻮﺩﻙ ﻓﻴﻲ
ﻣﺎﺑﻌﺮﻑ ﻗﻴﻤﺔ ﻋﻴﻨﻴﻲ
ﻏﻴﺮ ﻟﻤﺎ ﻳﺸﻮﻓﻮﻙ ..
ﻭﻋﺪﻧﻲ ﻇﻞ ﺍﻟﻌﻤﺮ ﺑﻘﺮﺑﻲ ﻭﺃﻭﻋﺪﻧﻲ ﻣﺎﺗﻔﺮﻗﻨﺎ ﻏﺮﺑﻪ
ﺍﻧﺎ ﺭﻭﺣﻲ ﻭﻋﻴﻨﻴﻲ ﻭﻗﻠﺒﻲ ﺧﻠﻘﻮﺍ ﺗﻴﺤﺒﻮﻙ ...
ﺍﺫﺍ ﺣﺪﻙ ﻣﺎﺑﻘﻴﺖ ﻭﻉ ﻛﺘﻔﻚ ﻣﺎﻏﻔﻴﺖ
ﻳﻌﻨﻲ ﺃﻧﺎ ﻣﺎﻋﺸﺖ ﺑﻌﻤﺮﻱ ﻭﻉ ﺍﻟﺪﻧﻴﺎ ﻣﺎﺟﻴﺖ
ﺧﺪﻧﻲ ﺑﺤﻀﻨﻚ ﺧﺎﻑ ﻋﻠﻴﺎ ﺣﺴﺴﻨﻲ ﺑﻮﺟﻮﺩﻙ ﻓﻴﻲ
ﻣﺎﺑﻌﺮﻑ ﻗﻴﻤﺔ ﻋﻴﻨﻴﻲ ﻏﻴﺮ ﻟﻤﺎ ﻳﺸﻮﻓﻮﻙ
ﺍﻭﻋﺪﻧﻲ ﻇﻞ ﺍﻟﻌﻤﺮ ﺑﻘﺮﺑﻲ
ﺍﻭﻋﺪﻧﻲ ﻣﺎﺗﻔﺮﻗﻨﺎ ﻏﺮﺑﻪ
ﺍﻧﺎ ﺭﻭﺣﻲ ﻭﻋﻴﻨﻴﻲ ﻭﻗﻠﺒﻲ ﺧﻠﻘﻮﺍ ﺗﻴﺤﺒﻮﻙ ..
ﺃﻭﻋﺪﻧﻲ ......
.... ﻳﺘﺒﻊ
