#الحسن (الوطن عشق رجاله )
ﺍﻟﺠﺰﺀ ﺍﻟﺤﺎﺩﻱ ﻭﺍﻟﺨﻤﺴﻴﻦ " ﺍﻟﻘﺴﻢ ﺍﻷﻭﻝ 💓"
للكاتبة GomanFared
ﻭﺍﺧﺪﻩ ﻗﺮﺍﺭ ﻭﻣﺎﺷﻴﻪ ﺑﺘﻨﻔﺪﻩ ﺭﻛﺒﺖ ﺍﻷﺻﻨﺼﻴﺮ ﺭﻓﻌﻬﺎ ﻟﻮﻳﻦ ﻣﺎﺗﺒﻲ ﻃﻠﻌﺖ ﻣﻨﻪ ... ﺧﺪﺕ ﻧﻔﺲ .. ﻭﻛﻤﻠﺖ ﻃﺮﻳﻘﻬﺎ ﻟﻴﻦ ﻭﺻﻠﺖ ﻟﻤﻜﺘﺐ ﺍﻟﺴﻜﺮﺗﺎﺭﻳﻪ ..
ﺧﻮﻟﻪ ﺑﺈﺑﺘﺴﺎﻣﻪ : ﺻﺒﺎﺡ ﺍﻟﺨﻴﺮ ...
ﺍﻟﺴﻜﺮﺗﻴﺮﻩ ﺍﺑﺘﺴﻤﺖ : ﺻﺒﺎﺡ ﺍﻟﺨﻴﺮﺍﺕ ﺍﻫﻼ ﺧﻮﻟﻪ ..
ﺧﻮﻟﻪ : ﺃﻫﻼ ﺑﻴﻚ ... ﺍﺣﻤﻢ .. ﻣﻦ ﻓﻲ ﺩﺍﺧﻞ ..
ﺍﻟﺴﻜﺮﺗﻴﺮﻩ : ﺍﺳﺘﺎﺫ ﻭﻟﻴﺪ ..
ﺧﻮﻟﻪ ﺍﺑﺘﺴﻤﺖ : ﻣﻤﻜﻦ ﺗﻘﻮﻟﻠﻴﻪ ﻧﺒﻲ ﻧﻘﺎﺑﻠﻪ ..
ﺍﻟﺴﻜﺮﺗﻴﺮﺓ : ﺍﻭﻛﻲ ... ﺍﺗﺼﻠﺖ ﺑﻮﻟﻴﺪ ﻭﺑﻠﻐﺎﺗﻪ ﻭﻫﻮ ﻗﺎﻟﻠﻬﺎ ﺩﺧﻠﻴﻬﺎ .. ﺻﻜﺮﺕ ... ﻗﺎﻟﻚ ﺗﻔﻀﻠﻲ ..
ﺧﻮﻟﻪ ﺑﺈﺑﺘﺴﺎﻣﻪ ﺣﻴﺖ ﺍﻟﺴﻜﺮﺗﻴﺮﻩ ﻭﺗﻮﺟﻬﺖ ﻟﻤﻜﺘﺐ ﻭﻟﻴﺪ ﻃﻘﺖ ﻉ ﺍﻟﺒﺎﺏ ﺍﺫﻧﻠﻬﺎ ﺑﺎﻟﺪﺧﻮﻝ ﻭﺧﺸﺖ ..
ﺧﻮﻟﻪ : ﺻﺒﺎﺡ ﺍﻟﺨﻴﺮ ...
ﻭﻟﻴﺪ ﺑﺈﺑﺘﺴﺎﻣﻪ : ﺻﺒﺎﺡ ﺍﻟﻨﻮﺭ ... ﺗﻔﻀﻠﻲ ﻗﻌﻤﺰﻱ ... ﻗﻌﻤﺰﺕ ﺧﻮﻟﻪ ..
ﻭﻟﻴﺪ : ﻋﺎﺵ ﻣﻦ ﺷﺎﻓﻚ ..
ﺧﻮﻟﻪ : ﺗﺴﻠﻢ ..
ﻭﻟﻴﺪ : ﺷﻦ ﺗﺤﺒﻲ ﺗﺸﺮﺑﻲ ..
ﺧﻮﻟﻪ ﺑﺈﺑﺘﺴﺎﻣﻪ : ﻧﻔﻀﻞ ﻧﺨﺶ ﻓﻲ ﺍﻟﻤﻮﺿﻮﻉ ﻃﻮﻝ ..
ﻭﻟﻴﺪ : ﺍﻋﺬﺭﻳﻨﻲ ﺍﻧﻲ ﻣﺎﻧﻘﺪﺭﺵ ﻧﺮﻛﺰ ﻟﻮ ﻣﺎﺷﺮﺑﺘﺶ ﻗﻬﻮﺗﻲ ﻧﺸﺮﺑﻬﺎ ﻭﻧﺘﻜﻠﻤﻮﺍ
ﺧﻮﻟﻪ ﺍﺑﺘﺴﻤﺖ ﻣﺠﺎﻣﻠﻪ : ﺗﻤﺎﻡ ..
ﺷﻮﻳﺔ ﻭﺟﺖ ﺍﻟﻘﻬﻮﺓ ﻟﻮﻟﻴﺪ ﻭﻣﻌﺎﻫﺎ ﻋﺼﻴﺮ ﻟﺨﻮﻟﻪ ﺍﻟﻠﻲ ﺷﺮﺑﺖ ﻣﻨﻪ ﺭﺷﻔﺘﻴﻦ ﺑﺲ .. ﻭﻫﻲ ﺗﺴﺘﻨﻰ ﻓﻲ ﻭﻟﻴﺪ ﺍﻟﻠﻲ ﻛﺎﻥ ﻳﺸﺮﺏ ﺑﺒﻄﺊ ﻭﻳﺸﺒﺤﻠﻬﺎ ﻭﻳﺸﺒﺢ ﻟﻠﺒﺎﺏ .. ﻟﺤﻈﺎﺕ ... ﻭﺍﻧﻔﺘﺢ .. ﺣﻂ ﻭﻟﻴﺪ ﺍﻟﻔﻨﺠﺎﻥ ﻭﺍﺑﺘﺴﻢ ﻭﻧﺎﺽ .. ﻭﺧﻮﻟﻪ ﻧﺎﺿﺖ ..
ﺭﻳﺎﺽ ﺑﺮﻓﻌﺔ ﺣﺎﺟﺐ : ﺻﺒﺎﺡ ﺍﻟﺨﻴﺮ ..
ﺧﻮﻟﻪ ﺍﺑﺘﺴﻤﺖ ﻣﺠﺎﻣﻠﻪ : ﺻﺒﺎﺡ ﺍﻟﺨﻴﺮ ..
ﻗﺪﻡ ﺭﻳﺎﺽ ﻭﻗﻌﻤﺰ ﻉ ﻛﺮﺳﻲ ﺍﻟﻤﻜﺘﺐ ﻭﻭﻟﻴﺪ ﻭﺧﺮ ..
ﻭﻟﻴﺪ : ﺍﻧﻲ ﻋﻨﺪﻱ ﻣﺎﻧﺪﻳﺮﻧﺴﺘﺄﺫﻥ ..
ﺭﻳﺎﺽ ﻫﺰ ﺭﺍﺳﻪ ﺑﺈﻳﺠﺎﺏ ... ﻃﻠﻊ ﻭﻟﻴﺪ .. ﻭﺭﻳﺎﺽ ﺷﺒﺢ ﻟﺨﻮﻟﻪ ﺑﺄﺑﺘﺴﺎﻣﻪ ﺗﻬﻜﻤﻴﻪ ..
ﺭﻳﺎﺽ : ﻛﻴﻒ ﺻﺎﺭ ..
ﺧﻮﻟﻪ : ﻟﻮ ﺑﺘﺘﻌﺎﻣﻞ ﻣﻌﺎﻱ ﺑﺎﻷﺳﻠﻮﺏ ﻫﺬﺍ ﻗﻮﻟﻲ ﺧﻞ ﺍﻧﻮﺽ ﻧﻄﻠﻊ ..
ﺭﻳﺎﺽ ﺍﺑﺘﺴﻢ : ﺍﺳﻒ .. ﺗﻔﻀﻠﻲ .. ﻧﺴﻤﻊ ﻓﻴﻚ ..
ﺧﻮﻟﻪ ﺷﺒﺤﺘﻠﻪ ﻉ ﺟﻨﺐ : ﻧﺒﻲ ﻧﻮﻟﻲ ﻟﻠﺨﺪﻣﻪ ..
ﺭﻳﺎﺽ : ﻭﻫﺬﺍ ﺍﻟﻤﻔﺮﻭﺽ ..
ﺧﻮﻟﻪ ﺳﻜﺘﺖ ..
ﺭﻳﺎﺽ ﺑﺈﺑﺘﺴﺎﻣﻪ : ﻭﺷﻦ ﺗﺎﻧﻲ ...
ﺧﻮﻟﻪ ﺗﺸﺒﺤﻠﻪ ﻭﺳﺎﻛﺘﻪ ..
ﺭﻳﺎﺽ ﺍﺑﺘﺴﻢ : ﺗﻮ ﻧﻘﻮﻝ ﺍﻧﻲ .. ﺍﻧﺘﻲ ﻫﻜﻲ ﺗﻘﺮﻳﺒﺎ ﺗﺮﺍﺟﻌﺘﻲ ﻋﻦ ﺭﺩﻙ ﻉ ﻣﻮﺿﻮﻋﻨﺎ ﺻﺢ؟ !!
ﺧﻮﻟﻪ : ﻣﺶ ﺑﺎﻟﺰﺑﻂ .. ﺍﻣﻤﻢ .. ﺍﻧﻲ .. ﻳﻌﻨﻲ .. ﻧﺒﻲ ﻧﻌﻄﻲ ﺍﻟﻤﻮﺿﻮﻉ ﻓﺮﺻﻪ ﺑﻌﺪﻳﻦ ﺣﻨﻘﻮﻝ ﺭﺩﻱ ﺍﻟﻨﻬﺎﺋﻲ ..
ﺭﻳﺎﺽ ﺍﺑﺘﺴﻢ ﺑﻔﺮﺣﻪ ﻣﻜﺘﻮﻣﻪ : ﻭﺿﺤﻲ ﺍﻛﺜﺮ ..
ﺧﻮﻟﻪ : ﻳﻌﻨﻲ ﻧﻌﺮﻓﻚ ﺍﻛﺜﺮ ﺯﻱ ﻣﺎﺍﻧﺖ ﻋﺮﻓﺘﻨﻲ ..
ﺭﻳﺎﺽ : ﺍﻣﻤﻢ .. ﺗﻌﺎﺭﻑ ..
ﺧﻮﻟﻪ : ﺑﺎﻟﺰﺑﻂ ..
ﺭﻳﺎﺽ ﺍﺑﺘﺴﻢ : ﻣﺎﻓﻴﺶ ﻣﺸﻜﻠﻪ ..
ﺧﻮﻟﻪ ﺷﺒﺤﺘﻠﻪ ﻫﻠﺒﻪ .. ﺑﻌﺪﻳﻦ ﻧﺎﺿﺖ : ﺍﻣﺘﻰ ﻧﻘﺪﺭ ﻧﺒﺪﺍ ﺧﺪﻣﻪ؟ ..
ﺭﻳﺎﺽ : ﻣﻜﺘﺒﻚ ﻳﺴﺘﻨﻰ ﻓﻴﻚ .. ﻣﺎﺧﻠﻴﺖ ﺣﺪ ﻳﺨﺪﻡ ﻓﻴﻪ ﺑﻌﺪﻙ ..
ﺧﻮﻟﻪ ﺭﻣﺸﺖ ﻋﻴﻮﻧﻬﺎ ﻣﻦ ﺍﻟﺨﺠﻞ ﻭﺳﻜﺘﺖ ﻭﻟﻔﺖ ﻭﻃﻠﻌﺖ ﻃﻮﻝ ..
ﺍﻣﺎ ﻫﻮ ﺿﺤﻚ ﻋﻠﻴﻬﺎ ... ﻭﺧﺸﻠﻪ ﻭﻟﻴﺪ ﺗﻜﻠﻤﻮﺍ ﺷﻮﻳﻪ ﻭﻃﻠﻊ ﺭﻳﺎﺽ ﻃﻮﻝ ..
***
ﻣﻌﺎﺵ ﻳﻮﺟﻊ ﻓﻴﻚ ﻳﺎﺃﻣﻲ ..
ﻋﻠﻴﺎ ﺑﻀﺤﻜﻪ : ﻭﺍﻟﻠﻪ ﻻ .. ﻳﻌﻨﻲ ﻋﺎﺩﻱ ...
ﺍﻣﻴﺮﺓ : ﻟﻠﻮﺷﻪ ﺭﻩ ﺟﺮﺣﻚ ﻗﺎﻋﺪ ﺟﺪﻳﺪ ﻣﺎﺗﺴﺘﻬﻨﻴﺶ ﺑﻴﻪ ..
ﻋﻠﻴﺎ : ﻭﻭﺍﻙ ﻳﺎﺭﺑﻲ .. ﺭﻩ ﺑﻨﺪﻳﺮ ﺭﺯ ﻣﺴﻘﻲ ﻣﺶ ﺑﺎﺯﻳﻦ ..
ﺯﻳﻨﺐ ﺑﻀﺤﻜﻪ : ﺑﺎﻫﻲ ﺭﺩﻱ ﺑﺎﻟﻚ ..
ﻭﺑﺪﻭﺍ ﻻﻫﻴﻴﻦ ﺑﺎﻟﻐﺪﻱ ﻭﻳﺴﺘﻨﻮﺍ ﻣﺪﻳﺤﻪ ﻭﻣﺮﺍﺩ ﺍﻣﺘﻰ ﻳﻮﺻﻠﻮﺍ ﺟﺎﻳﺒﻬﻢ ﺧﻮ ﻣﺮﺍﺩ ﻣﻦ ﺍﻟﻤﻄﺎﺭ ﻃﻮﻝ ﻟﺤﻮﺵ ﺟﻌﻔﺮ ﻷﻧﻪ ﺍﻷﻗﺮﺏ ...
***
ﻭﺍﻗﻒ ﻉ ﻓﺎﺗﻴﺮﻧﻪ ﻋﺮﺽ ﻓﻴﻬﺎ ﻗﻔﻄﺎﻥ ﺳﻬﺮﺓ ﺣﻠﻮ ﺑﺎﻟﻤﺮﺓ ﺗﺨﺎﻳﻠﻬﺎ ﻓﻴﻪ ﻗﻔﻄﺎﻥ ﺑﺎﻟﻠﻮﻥ ﺍﻟﺬﻫﺒﻲ ﺣﻴﺨﻠﻴﻬﺎ ﺗﺸﻊ ﺍﻛﺜﺮ ﻭﺍﻛﺜﺮ .. ﺧﺶ ﻟﻠﻤﺤﻞ ﻭﺷﺮﺍﻩ ﻭﻋﻄﺎﻫﻢ ﺗﺎﺭﻳﺦ ﻳﻮﻡ ﻣﻌﻴﻦ ﻳﻮﺻﻠﻬﻮﻟﻬﺎ ﻓﻴﻪ ..
ﻭﻫﻮ ﻃﺎﻟﻊ ﺭﻥ ﺗﻠﻴﻔﻮﻧﻪ ﻭﻛﺎﻧﺖ ﻫﻲ ﺍﺑﺘﺴﻢ ﺑﺤﺐ ﻭﺭﺩ ..
ﺍﻟﻔﻬﺪ : ﺷﻤﻮﺳﺘﻲ ..
ﺟﻨﺎﻥ ﺑﻀﺤﻜﻪ : ﺳﻤﺎﺭﺗﻲ ... ﺷﻦ ﺩﻳﺮ ..
ﺍﻟﻔﻬﺪ ﺑﻀﺤﻜﻪ : ﺑﻨﻤﺸﻲ ﻟﻠﺨﺪﻣﻪ ﺗﻮﺍ ..
ﺟﻨﺎﻥ : ﻧﺒﻲ ﻧﺸﻮﻓﻚ ..
ﺍﻟﻔﻬﺪ ﻳﺸﺒﺢ ﻟﻠﺴﺎﻋﻪ : ﻭﺍﻟﻠﻪ ﺍﻧﻲ ﺍﻟﻠﻲ ﻧﺒﻲ ﻧﺸﻮﻓﻚ ﻣﺴﺘﺎﺣﺸﻚ ﻣﻮﺕ .. ﺑﺲ ﺣﺒﻴﺒﺘﻲ ﻻﺯﻡ ﻧﻤﺸﻲ ﻟﻠﻤﺮﻛﺰ ﻣﺎﺻﺪﻗﺖ ﺭﺟﻌﺖ ﻟﻠﺨﺪﻣﻪ ﻣﻨﻘﺪﺭﺵ ﻧﺘﺄﺧﺮ ﻉ ﺍﻭﻝ ﻣﻬﻤﻪ ﺑﻌﺪ ﻫﺎﻹﻧﻘﻄﺎﻉ ..
ﺟﻨﺎﻥ ﺳﻜﺘﺖ ..
ﺍﻟﻔﻬﺪ : ﺷﻤﻮﺳﻪ ... ﺣﺒﻴﺒﻲ ..
ﺟﻨﺎﻥ : ﺍﻣﻤﻤﻢ ..
ﺍﻟﻔﻬﺪ ﺑﻀﺤﻜﻪ : ﻳﺎﺭﻭﺡ ﺍﻟﺴﻤﺎﺭﺓ .. ﻭﻋﺪ ﻣﻨﻲ ﻧﻬﺎﺭ ﻛﺎﻣﻞ ﺣﻴﻜﻮﻥ ﻟﻴﻚ ﺍﻧﺘﻲ ﺑﺮﻭﺣﻚ ..
ﺟﻨﺎﻥ : ﻭﻋﺪﺗﻨﻲ ﺭﻩ ..
ﺍﻟﻔﻬﺪ ﺑﺄﺑﺘﺴﺎﻣﻪ : ﻭﻋﺪ ..
ﺟﻨﺎﻥ : ﺑﺎﻩ ﺗﻮﺍ ﺍﻧﻲ ﻋﻨﺪﻱ ﻣﺤﺎﺿﺮﻩ ﻣﻀﻄﺮﺓ ﻟﻸﺳﻒ ﻧﺼﻜﺮ ..
ﺍﻟﻔﻬﺪ : ﻭﻻﻳﻬﻤﻚ ... ﺷﻤﻮﺳﻪ ..
ﺟﻨﺎﻥ : ﺍﻣﻤﻢ ..
ﺍﻟﻔﻬﺪ ﺑﻨﺒﺮﻩ ﻫﺎﺩﻳﻪ : ﻧﺤﺒﻚ ﻟﻠﻤﻮﺕ ...
ﺟﻨﺎﻥ ﺑﺤﺐ : ﻭﺍﻧﻲ ﻧﺤﺒﻚ ﻣﻮﺕ ...
ﺍﻟﻔﻬﺪ : ﺭﺩﻱ ﺑﺎﻟﻚ ﻉ ﺭﻭﺣﻚ ..
ﺟﻨﺎﻥ : ﺣﺘﻰ ﺍﻧﺖ ... ﺭﺩ ﺑﺎﻟﻚ ﻉ ﺭﻭﺣﻲ ..
ﺍﻟﻔﻬﺪ ﺍﺑﺘﺴﻢ : ﻓﻲ ﺍﻣﺎﻥ ﺍﻟﻠﻪ ..
ﺟﻨﺎﻥ : ﺳﻼﻡ ... ﻭﺻﻜﺮﺕ ... ﺗﻨﻬﺪﺕ ﻭﺍﺑﺘﺴﻤﺖ ﻭﻣﺸﺖ ﻟﻤﺤﺎﺿﺮﺗﻬﺎ ..
ﺍﻣﺎ ﻫﻮ ﻓﺘﻮﺟﻪ ﻃﻮﻝ ﻟﻠﻤﺮﻛﺰ ... ﻷﻥ ﺣﻴﻜﻮﻥ ﻣﻦ ﺿﻤﻦ ﻗﻮﺍﺕ ﺍﻷﻣﻦ ﺍﻟﻠﻲ ﺣﺘﺸﺎﺭﻙ ﻓﻲ ﻋﻤﻠﻴﻪ ...3\29
***
ﻣﻨﻄﻘﻪ ﻓﻲ ﺣﻲ ﻣﻦ ﺍﺣﻴﺎﺀ ﺍﺣﺪ ﻣﻨﺎﻃﻖ ﻃﺮﺍﺑﻠﺲ .. ﻣﻬﺠﻮﺭﺓ ﺑﺴﺒﺐ ﺍﻟﺪﻣﺎﺭ ﺍﻟﻠﻲ ﺧﻠﻔﺎﺗﻪ ﺍﻟﺤﺮﺏ .. ﻛﺎﻥ ﻳﻤﺸﻲ ﻭﺭﺍﻓﻊ ﻣﻌﺎﻩ ﻋﻮﺍﻟﻪ ﻭﺭﺍﻕ ﻭﺳﻼﺡ ﻭﺷﻨﻄﻪ ﺍﻟﻼﺏ .. ﻭﻳﺪﻭﺭ ﺑﻌﻴﻮﻧﻪ ﻓﻲ ﺍﻟﻤﻜﺎﻥ ﻭﻳﻐﻨﻲ ..
ﻭﺍﻧﻲ ﻣﺎﺭﻕ ﻣﺮﻳﺖ ﺟﻨﺐ ﺍﺑﻮﺍﺏ ﺍﻟﺒﻴﺖ
ﻭﺍﻧﻲ ﻣﺎﺭﻕ ﻣﺮﻳﺖ ﺟﻨﺐ ﺍﺑﻮﺍﺏ ﺍﻟﺒﻴﺖ
ﺍﻟﺒﻴﺖ ﺍﻟﻞ ﻛﺎﻧﻮﺍ ﺳﻜﺎﻧﻮﺍ ﻉ ﺍﺑﻮﺍﺑﻮ ﺩﻗﻴﺖ
ﻣﺎﻓﻲ ﺣﺪ ﻟﻘﻴﺖ .. ﻉ ﺍﺑﻮﺍﺑﻮ ﺩﻗﻴﺖ
ﺭﺩﻭﺍ ﻋﻠﻲ ﺣﻴﻄﺎﻧﻮﺍ ...
ﺳﻜﺖ ﺑﻌﺪﻳﻦ ﻗﺎﻝ : ﻫﺬﺍ ﻣﻜﻴﻦ ﺳﻤﺢ ﺍﻥ ﺷﺎﺀ ﺍﻟﻠﻪ ﻧﺬﻛﺮ ﻧﺸﻜﺮﻩ ﺑﻌﺪﻳﻦ ﻉ ﺍﺧﺘﻴﺎﺭﻩ .. ﻭﺻﻞ ﻓﻲ ﻃﺎﻭﻟﻪ ﻭﺣﻂ ﻋﻠﻴﻬﺎ ﺣﺎﺟﺎﺗﻪ .. ﻭﻗﻌﻤﺰ ﻉ ﺍﻟﻜﺮﺳﻲ ﻭﻛﺎﻥ ﻓﻲ ﻣﻈﻠﻪ ﺍﻇﻠﻞ ﻓﻴﻪ .. ﻳﺸﺒﺢ ﻣﻦ ﺑﻌﻴﺪ ﻓﻲ ﺷﺨﺼﻴﻦ ﻳﺤﺒﻬﻢ ﺟﺎﻳﻴﻦ ﻧﺎﺽ ﻉ ﺣﻴﻠﻪ ﻭﻣﺸﺎﻟﻬﻢ ﺳﻠﻢ ﻋﻠﻴﻬﻢ ..
ﺳﺮﻣﺪ ﺍﻟﻜﻮﺑﺮﺍ : ﻛﻮﻣﺎﻧﺪﺍ ﻳﺎﻏﺎﻟﻲ ... ﺣﻠﻠﺖ ﺍﻫﻼ ﻭﻭﻃﺌﺖ ﺳﻬﻼ ..
ﺍﻟﻜﻮﻣﺎﻧﺪﺍ : ﺑﺮﺍ ﻗﻌﻤﺰ ..
ﺳﺮﻣﺪ ﺍﻟﻜﻮﺑﺮﺍ : ﻫﻬﻬﻬﻬﻬﻬﻬﻬﻬﻪ .. ﺷﻦ ﺟﻮ ﻳﺎﺭﺍﺱ ﺍﻟﻠﻔﻊ ..
ﺭﺍﺱ ﺍﻟﻠﻔﻊ : ﺯﻱ ﺟﻮﻙ ..
ﻗﻌﻤﺰﻭﺍ ﺍﻟﺘﻼﺗﻪ ..
ﺍﻟﻜﻮﻣﺎﻧﺪﺍ : ﺍﺷﺮﺣﻠﻲ ﺑﺎﻟﺘﻔﺼﻴﻞ ﺷﻦ ﺑﻴﺼﻴﺮ ﺍﻟﻠﻴﻠﻪ .. ﺭﻩ ﺍﻟﺤﻜﺎﻳﻪ ﻣﺶ ﺳﺎﻫﻠﻪ ﺑﻜﻞ ﻓﻴﻬﺎ ﺟﻤﺎﻋﻪ ﺗﻘﺎﻝ ﻣﻦ ﺑﺮﺍ ..
ﺳﺮﻣﺪ ﺍﻟﻜﻮﺑﺮﺍ ﺍﺑﺘﺴﻢ ﺑﺜﻘﻪ ﻭﻧﺎﺽ : ﺭﻛﺰ ﻣﻌﺎﻱ ﻳﺎﻛﺒﻴﺮ ﻭﺣﺘﻰ ﺍﻧﺖ ﻳﺎﻟﻔﻊ ..
ﺑﺪﻱ ﻳﺸﺮﺣﻠﻬﻢ ﺷﻦ ﺣﻴﺼﻴﺮ ﺍﻟﻠﻴﻠﻪ ﺑﺎﻟﺰﺑﻂ .. ﻭﺷﻦ ﺷﺮﻭﻁ ﺍﻟﺼﻔﻘﺘﻴﻦ ﺍﻟﺴﻼﺡ ﻭﺍﻟﻤﺨﺪﺭﺍﺕ .. ﻭﻛﻞ ﻣﺎﻳﺨﺺ ﺍﻟﻠﻴﻠﻪ ... ﻭﺍﻟﺘﺪﺍﺑﻴﺮ ﺍﻷﻣﻨﻴﻪ ﻣﺸﺪﺩﻩ ﺍﻟﻠﻲ ﺧﺪﺍﻫﺎ ﻭﺍﻟﻤﺴﻠﺤﻴﻦ ﺍﻟﻠﻲ ﻧﺸﺮﻫﻢ ..
ﻓﻲ ﻧﻔﺲ ﺍﻟﻤﻜﺎﻥ ﻣﻦ ﺟﻬﺔ ﺗﺎﻧﻴﻪ .. ﻣﺠﻤﻮﻋﻪ ﺷﺒﺎﺏ ﻫﻴﺌﺘﻬﻢ ﻫﻴﺌﺔ ﻣﺪﻣﻨﻴﻦ ﻳﺘﺮﺩﺩﻭﺍ ﻉ ﺍﻟﻤﻜﺎﻥ ﻣﻦ ﻣﺪﻩ ﺑﺶ ﻳﺎﺧﺪﻭﺍ ﺟﺮﻋﺎﺗﻬﻢ .. ﻣﻦ ﺑﻌﻴﺪ ﺷﻮﻱ ﻭﺍﺣﺪ ﺩﺭﻭﻳﺶ ﺍﻭ ﻣﻬﺒﻮﻝ ﻣﻨﻈﺮﻩ ﻣﺰﺭﻱ ﻳﻤﺸﻲ ﻭﻳﺼﻔﻖ ... ﻭﻳﻨﻘﺰ ﻭﻳﻐﻨﻲ .. ﻭﺷﺎﺩ ﻣﻘﻄﻊ ﺍﻏﻨﻴﻪ ﻳﺎﺩﻧﻴﺎ ﻳﺎﺩﻭﺍﺭﻩ ..
ﻣﻦ ﺟﻬﻪ ﺗﺎﻧﻴﻪ .. ﻓﻲ ﻭﺍﺣﺪ ﺟﺎﻱ ﺑﺴﻴﺎﺭﺓ ﻗﺪﻳﻤﻪ ﻣﻠﺘﺤﻲ ﻭﻳﺪﻭﺭ ﻓﻲ ﺍﻟﻤﻜﺎﻥ ﺷﺒﺢ ﻟﻠﻤﺠﻨﻮﻥ ﻭﻫﺰ ﺭﺍﺳﻪ ﺍﻳﻤﻴﻦ ﻭﻳﺴﺎﺭ .. ﻭﻗﺎﻝ
: ﺍﻟﺤﻤﺪ ﻟﻠﻪ ﺍﻟﺬﻱ ﻋﺎﻓﺎﻧﺎﻭ ﻓﻀﻠﻨﺎ ﻉ ﻛﺜﻴﺮ ﻣﻦ ﻋﺒﺎﺩﻩ ..
ﺟﺎﻩ ﺻﻮﺕ ﻓﻲ ﻭﺫﻧﻪ ﻳﻘﻮﻝ : ﺗﻮﻳﺒﺎﻧﻠﻚ ..
: ﻫﻬﻬﻬﻬﻬﻬﻬﻬﻬﻪ .... ﻓﺎﺕ ﺑﻌﺪﻫﺎ ﻣﻦ ﺣﺪﺍ ﺍﻟﻤﺪﻣﻨﻴﻦ ﺷﺒﺤﻠﻬﻢ ﺑﺈﺯﺩﺭﺍﺀ ... ﺍﻟﻠﻬﻢ ﻋﺎﻓﻴﻨﺎ ...
: ﻧﺎﺩﻡ ﺍﺷﺪ ﺍﻟﻨﺪﻡ ﺍﻟﻠﻲ ﺧﻠﻴﺘﻚ ﺍﻧﺖ ﺗﻮﺯﻉ ﺍﻷﺩﻭﺍﺭ ..
: ﻫﻬﻬﻬﻬﻬﻬﻬﻬﻬﻪ ...
ﻧﺨﻠﻮﻫﻢ .... ﻭﻧﺮﺟﻮﺍ ﻟﻠﻜﻮﺑﺮﺍ ﻭﺟﻤﺎﻋﺘﻪ ..
ﺍﻟﻜﻮﻣﺎﻧﺪﺍ : ﺷﻴﻄﺎﻥ ...
ﺍﻟﻜﻮﺑﺮﺍ ﺑﻀﺤﻜﻪ ﺧﺒﻴﺜﻪ : ﺗﺮﺑﻴﺘﻚ ﻳﺎﻛﺒﻴﺮ ...
ﺍﻟﻜﻮﻣﺎﻧﺪﺍ ﺑﻀﺤﻜﻪ : ﺍﻟﺼﻔﻘﺘﻴﻦ ﻟﻮ ﺗﻤﻮﺍ ﺣﻴﺰﻳﺪﻭﺍ ﺛﻘﻠﻨﺎ ﻫﻠﺒﻪ ﺑﺮﺍ ﺍﻟﺒﻼﺩ ...
ﺍﻟﻜﻮﺑﺮﺍ : ﺣﻴﺘﻤﻮﺍ ﻭﺣﻨﻮﻟﻮﺍ ﻛﺒﺎﺍﺍﺍﺭ ﻗﻮﻱ ﻗﻮﻱ " ﻗﺎﻟﻬﺎ ﺑﺎﻟﺼﻌﻴﺪﻱ "
ﺭﺍﺱ ﺍﻟﻠﻔﻊ : ﺗﺘﻜﻠﻢ ﺑﺜﻘﺔ ﻣﺮﻳﺤﺘﻨﻲ ..
ﺍﻟﻜﻮﺑﺮﺍ ﺑﺈﺑﺘﺴﺎﻣﻪ : ﺍﺭﺗﺎﺡ ﻭﺍﻃﻤﻦ ﺩﺍﻣﻨﻲ ﻣﻮﺟﻮﺩ ...
ﺍﻟﻜﻮﻣﺎﻧﺪﺍ : ﻫﻼﻝ ﺍﻧﺖ ﺍﻟﻠﻲ ﺩﺭﺕ ﻓﻴﻪ ﻫﻜﻲ ﻭﻻ ﻭﺍﺣﺪ ﻣﻦ ﺭﺟﺎﻟﻚ ..
ﺍﻟﻜﻮﺑﺮﺍ : ﺍﻧﻲ ...
ﺍﻟﻜﻮﻣﺎﻧﺪﺍ ﺷﺒﺤﻠﻪ ﻫﻠﺒﻪ ﻭﻏﻴﺮ ﻋﻴﻮﻧﻪ ﻟﺠﻬﺔ ﺍﻟﺤﻴﺎﺵ ... ﻭﺍﻟﻜﻮﺑﺮﺍ ﻗﻌﺪ ﻳﺸﺒﺤﻠﻪ ﺑﻀﻴﻖ ...
***
ﺍﻟﺴﺎﻋﻪ 2 ﻇﻬﺮﺍ ..
ﻃﻖ ﺍﻟﺒﺎﺏ ... ﻣﺸﻮﺍ ﺍﻟﺘﻼﺛﻪ ﻳﺠﺮﻭﺍ ...
ﻓﺘﺤﺖ ﺍﻣﻴﺮﻩ ﺍﻟﺒﺎﺏ ..
ﻣﺪﻳﺤﻪ ﺑﻌﻴﻄﻪ : ﻳﺎﻗﻠﺒﺎﺍﺍﺍﺗﻲ
ﺍﻟﺜﻼﺗﻪ ﺣﻀﻨﻮﻫﺎ ﻣﻊ ﺑﻌﺾ ..
ﺯﻳﻨﺐ ﺍﺩﻑ ﻓﻴﻬﻢ : ﺗﻲ ﺣﻮﻟﻲ ﺍﻧﺘﻲ ﻭﻳﺎﻫﺎ ﺍﻧﻲ ﺍﻣﻬﺎ ﺍﻣﻬﺎ ..
ﺿﺤﻜﻮﺍ ﺍﻣﻴﺮﻩ ﻭﻋﻠﻴﺎ ﻭﺑﻌﺪﻭﺍ ﻭﺣﻀﻨﺖ ﺯﻳﻨﺐ ﺑﻨﺘﻬﺎ ﺑﻘﻮﺓ ﺑﻌﺪﺗﻬﺎ : ﺷﻦ ﻣﺪﺍﻳﺮﺓ ﻣﻊ ﺍﻟﺤﻤﻞ ...
ﻣﺪﻳﺤﻪ ﺗﻤﺴﺢ ﻓﻲ ﺩﻣﻮﻋﻬﺎ : ﺗﻤﺎﻡ ﺍﻟﺤﻤﺪ ﻟﻠﻪ ..
ﻋﻠﻴﺎ ﺑﻀﺤﻜﻪ : ﺧﻠﻴﻬﺎ ﺗﺨﺶ ﻗﺒﻞ ... ﺩﺧﻠﻮﻫﺎ .. ﺯﻳﻨﺐ ﺷﺒﺤﺖ ﻟﻠﺒﺎﺏ ﻭﻗﺎﻟﺖ : ﺭﺍﺟﻠﻚ ﻭﻳﻦ ..
ﻣﺪﻳﺤﻪ : ﻣﺸﻮﺍ ﻫﻮ ﻭﻣﺼﻌﺐ ﻣﺸﻮﺍﺭ ﻭﺟﺎﻳﻴﻦ ..
ﺳﻜﺮﺕ ﺯﻳﻨﺐ ﺍﻟﺒﺎﺏ ﻭﺧﺸﻮﺍ ﻗﻌﻤﺰﻭﺍ ..
ﺍﻣﻴﺮﻩ ﺑﻀﺤﻜﻪ : ﺷﻦ ﻗﺎﻟﻮﻟﻚ ..
ﻣﺪﻳﺤﻪ ﺿﺤﻜﺖ : ﺑﻨﻮﺗﻪ ..
ﻋﻠﻴﺎ : ﻳﺎﻭﺧﻴﺘﻲ ﺳﻠﻢ ﻣﻨﻴﺎﺗﻚ ..
ﻣﺪﻳﺤﻪ : ﺗﻮﺣﻤﺖ ﻋﻠﻴﻚ ﻓﺮﺧﻪ ﻋﻠﻴﺎ ﺩﻳﻤﺎ ﻧﺒﻠﺤﻖ ﻓﻲ ﺻﻮﺭﻙ ..
ﻋﻠﻴﺎ ﺑﻐﺮﻭﺭ : ﻣﻦ ﺯﻳﻬﺎ ..
ﺍﻣﻴﺮﻩ : ﺷﻦ ﺑﻴﺤﺰﻫﺎ 😒...
ﺿﺤﻜﻮﺍ ﻛﻠﻬﻢ ...
ﺯﻳﻨﺐ ﻧﺎﺿﺖ ﻭﻣﺸﺖ ﻟﻠﻜﻮﺟﻴﻨﻪ ..
ﻣﺪﻳﺤﻪ : ﻣﺎﻣﺎ ﺗﻌﺎﻟﻲ ﻗﻌﻤﺰﻱ ﻧﺒﻲ ﻧﻬﺪﺭﺯ ﻋﻠﻴﻜﻢ ﺍﻧﻲ ..
ﺯﻳﻨﺐ ﻓﻲ ﺍﻟﺒﺎﺏ : ﺗﻮ ﻧﻬﺪﺭﺯﻭﺍ ﻟﻴﻦ ﻧﺸﺒﻌﻮﺍ ... ﻭﻣﺸﺖ ..
ﻣﺪﻳﺤﻪ : ﻫﻬﻬﻬﻬﻪ ﻭﺷﺒﺤﺖ ﻟﻌﻠﻴﺎ .. ﺷﻦ ﺟﻮﻙ ﻟﻠﻮﺷﻪ ..
ﻋﻠﻴﺎ ﺑﺄﺑﺘﺴﺎﻣﻪ : ﺍﻟﺤﻤﺪ ﻟﻠﻪ ..
ﻣﺪﻳﺤﻪ : ﻣﺎﻓﻴﺶ ﺣﻮﻳﺠﻪ ..
ﻋﻠﻴﺎ ﻣﻼﻣﺢ ﻭﺟﻬﻬﺎ ﺗﻐﻴﺮﻭﺍ .. ﻭﺍﻣﻴﺮﻩ ﻛﺬﻟﻚ ..
ﻣﺪﻳﺤﻪ : ﺧﻴﺮﻛﻢ ...
ﻋﻠﻴﺎ ﺗﺼﻨﻌﺖ ﺍﺑﺘﺴﺎﻣﻪ : ﻣﺎﺯﺍﻝ ﺭﺑﻲ ﻣﺎﺍﺭﺍﺩﺵ ..
ﻣﺪﻳﺤﻪ ﺑﺈﺑﺘﺴﺎﻣﻪ : ﻣﺎﺯﺍﻝ ﺍﻟﻮﻗﺖ ﻗﺪﺍﻣﻜﻢ ...
ﻋﻠﻴﺎ ﻫﺰﺕ ﺭﺍﺳﻬﺎ ﺑﺈﻳﺠﺎﺏ ..
ﺍﻣﻴﺮﻩ ﺑﺘﻐﻴﺮ ﺍﻟﺠﻮ : ﺍﻳﻪ ﺍﺣﻜﻴﻠﻨﺎ ﻋﻦ ﺗﺮﻛﻴﺎ ﻭﺍﺟﻮﺍﺋﻬﺎ ﻗﺎﻋﺪﻩ ﺯﻱ ﻣﺎﻫﻲ ﻭﻻﺗﻐﻴﺮﺕ ..
ﺿﺤﻜﺖ ﻣﺪﻳﺤﻪ ﻭﺑﺪﺕ ﺗﺤﻜﻴﻠﻬﻢ ﻭﺷﻮﻳﻪ ﻭﻧﺎﺿﻮﺍ ﻳﻌﺎﻭﻧﻮﺍ ﻓﻲ ﺍﻣﻬﻢ ﻉ ﺍﻟﻐﺪﻱ .. ﻭﺟﻲ ﻣﺮﺍﺩ ﻣﻊ ﻣﺼﻌﺐ ﻭﺟﻌﻔﺮ ﻣﻌﺎﻫﻢ ﻭﺗﻐﺪﻭﺍ ..
***
ﻫﺬﺍ ﻫﻮ؟
ﻣﻨﺬﺭ : ﺍﻳﻪ .. ﻧﺰﻟﻮﺍ ﺍﻟﺰﻭﺯ ﻣﻦ ﺍﻟﺴﻴﺎﺭﺓ ﻭﻛﺎﻧﻮﺍ ﺑﻬﻴﺌﺎﺕ ﻣﺨﺘﻠﻔﻪ ﺧﻄﻤﻮﺍ ﻉ ﺍﻟﻤﺪﻣﻨﻴﻦ ﺍﻟﻠﻲ ﻛﺎﻧﻮﺍ ﻣﺘﻠﻮﺣﻴﻦ ﻭﺍﺿﺢ ﻣﻦ ﺍﻟﺠﺮﻋﻪ ﺍﻟﻠﻲ ﺧﺪﻭﻫﺎ .. ﻟﻤﺎ ﺷﺎﻓﻬﻢ ﻣﻨﺬﺭ ﺻﺪﺭﻩ ﺿﺎﻕ ﻷﻥ ﺑﺪﺍﻳﺔ ﺿﻴﺎﻋﻪ ﻛﺎﻧﺖ ﻫﺎﺩﻱ ﺍﻭﻝ ﻣﺮﺍﺣﻠﻬﺎ .. ﺷﺎﺍﻓﻮﺍ ﺍﻟﻤﻬﺒﻮﻝ ﻳﻨﻘﺰ ﻭﻳﻐﻨﻲ ..
ﻋﺰ ﺍﻟﺪﻳﻦ : ﻫﺬﺍ ﺷﻜﻠﻪ ﺷﻘﺎ ﻋﻤﺮﻩ ﺣﻄﻪ ﻓﻲ ﺣﻮﺵ ﻣﺴﺤﻮﻩ ﻓﻲ ﺍﻟﺤﺮﺏ ..
ﻣﻨﺬﺭ : ﻫﻠﺒﻪ ﺯﻳﻪ ..
ﻳﺎﺩﻧﻴﺎ ... ﻧﻮﺭﺗﻲ .... ﻃﺒﻌﻚ ﺩﻭﻭﻭﻡ ﻏﺪﺍﺭﺓ ... ﻭﻳﺮﻗﺺ ..
ﺧﻄﻤﻮﺍ ﻣﻦ ﺣﺪﺍﻩ ﻭﻫﻮ ﻣﺴﺘﻤﺮ ﺑﺈﺳﺘﻌﺮﺍﺽ ﻣﻮﺍﻫﺒﻪ ﻟﻴﻦ ﺑﻌﺪﻭﺍ ﻭﺗﻜﻠﻢ ..
: ﺗﻮﺍ ﺧﺸﻮﺍ ﺯﻭﺯ ﻣﺘﻮﻗﻊ ﺍﻧﻬﻢ ﺍﻟﻜﺎﻣﻠﻴﻮﻥ ﻭﺍﺑﻮ ﺍﻟﺨﻨﺴﺎﺀ ...
ﻭﺍﺣﺪ ﻣﻦ ﺍﻟﻤﺪﻣﻨﻴﻦ : ﻣﺘﺄﻛﺪ
: ﺍﻳﻪ ﻫﻴﺌﻪ ﻣﻨﺬﺭ ﺣﺎﻓﻈﻬﺎ ﻛﻮﻳﺲ ﻣﻬﻤﺎ ﺣﺎﻭﻝ ﻳﻐﻴﺮﻫﺎ ..
ﺍﻟﻤﻠﺘﺤﻲ ﺷﺎﺭﻛﻬﻢ : ﺷﻔﺘﻬﻢ ﺗﻮﺍ ...
....
ﻛﺎﻥ ﻣﻮﺟﻮﺩ ﻉ ﻫﺪﻳﻜﺎ ﺍﻟﻄﺎﻭﻟﻪ ﺍﻟﻜﻮﺑﺮﺍ ﻣﻘﻨﻊ ﻭﺣﺪﺍﻩ ﺭﺟﺎﻟﺘﻪ ﺷﺎﻑ ﺍﻟﻜﺎﻣﻠﻴﻮﻥ ﻭﺍﺑﻮ ﺍﻟﺨﻨﺴﺎﺀ ﺟﺎﻳﻴﻦ ... ﻭﺻﻠﻮﺍ ﻓﻴﻪ ..
ﻣﻨﺬﺭ ﺑﺄﺑﺘﺴﺎﻣﻪ ﺗﻬﻜﻤﻴﻪ : ﻣﺴﺘﺠﻢ ﻳﺎﺭﺍﺱ ..
ﺍﻟﻜﻮﺑﺮﺍ : ﻉ ﺍﻷﺧﺮ ..
ﻣﻨﺬﺭ ﺑﻀﺤﻜﻪ : ﺩﻭﻭﻡ
ﺍﻟﻜﻮﺑﺮﺍ : ﻳﺪﻭﻭﻡ ﻋﺰﻙ ﻓﻮﺟﻮﺩﻱ ..
ﻣﻨﺬﺭ ﺍﺑﺘﺴﻢ ﻉ ﺟﻨﺐ ﻭﺳﻜﺖ ..
ﺷﺒﺤﻠﻬﻢ ﻭﻗﺎﻝ : ﻗﻌﻤﺰﻭﺍ ...
ﺑﺪﻱ ﺍﻟﻜﻮﺑﺮﺍ ﻳﺸﺮﺣﻠﻬﻢ ﺍﻟﻠﻲ ﺑﻴﺼﻴﺮ ﺍﻟﻠﻴﻠﻪ ﻭﺩﻭﺭﻫﻢ ﻓﻴﻪ ﻭﻫﻤﺎ ﻛﺎﻧﻮﺍ ﻣﺮﻛﺰﻳﻦ ﻣﻌﺎﻩ ﻛﻮﻳﺲ ...
ﺑﻌﺪﻫﺎ ﺗﻮﺟﻬﻮﺍ ﻷﻣﺎﻛﻨﻬﻢ ﺍﻟﻠﻲ ﻗﺎﻝ ﻋﻠﻴﻬﺎ ﻭﻧﺎﺽ ﻳﺪﻫﻮﺭ ﻓﻲ ﺍﻟﻤﻜﺎﻥ ﻭﻭﺭﺍﻩ ﺭﺟﺎﻟﺘﻪ ﺑﺲ ﺑﻤﺴﺎﻓﻪ ﺑﻌﻴﺪﻩ ... ﺧﻄﻢ ﺣﺪﺍ ﺍﻟﻤﻠﺘﺤﻲ ﺍﻟﻠﻲ ﻛﺎﻥ ﻣﺪﺍﻳﺮ ﺭﻭﺣﻪ ﻳﻮﻛﻞ ﻓﻲ ﺣﻴﻮﺍﻧﺎﺕ ﺳﺎﻳﺒﻪ ﻓﻲ ﻫﺎﻟﻤﻜﺎﻥ ..
ﺷﺒﺤﻠﻪ ﻫﻠﺒﻪ ﺑﻌﺪﻳﻦ ﻛﻤﻞ ﺍﻟﻘﺪﺍﻡ ..
ﺍﻟﻤﻠﺘﺤﻲ : ﻓﻲ ﻭﺍﺣﺪ ﻻﺑﺲ ﺍﺳﻮﺩ ﻭﻣﻘﻨﻊ ﺟﺎﻱ ﺟﻴﻬﺘﻜﻢ
ﺍﻟﻤﻬﺒﻮﻝ : ﻫﺬﺍ ﺍﻟﻜﻮﺑﺮﺍ ... ﺟﻤﺎﻋﺔ ﺧﻠﻴﻜﻢ ﻋﺎﺩﻳﻴﻦ .. ﻟﻤﺢ ﺍﻟﻜﻮﺑﺮﺍ ... ﻭﻳﺮﺩﺩ ﻓﻲ ﺍﻷﻏﻨﻴﻪ ﻟﻤﺎ ﺷﺒﺤﻠﻪ ﺍﻟﻜﻮﺑﺮﺍ .. ﺍﻟﺪﻧﻴﺎ ﺩﻭﻭﻭﺭ ﻭﺍﻟﻠﻲ ﻳﺪﻳﺮ ﻳﻠﻘﻰ ... ﻭﻳﻌﺎﻭﺩ ﻓﻴﻬﺎ ﻭﻳﻘﻮﻝ .. ﺍﻟﻜﻮﺑﺮﺍ ﺷﺒﺤﻠﻪ ﻫﻠﺒﻪ .. ﻟﻴﻦ ﻓﺠﺄﺓ ﺍﻟﻤﻬﺒﻮﻝ ﻗﻌﺪ ﻳﻨﻘﺰ ﻭﻳﺮﻗﺺ ...
ﺍﻟﻜﻮﺑﺮﺍ " ﺣﻼﺍﻝ ﻓﻴﻚ ﺗﻨﺤﻂ ﻓﻲ ﻃﺎﺣﻮﻧﻪ ﺍﺩﻭﺭ ﺑﻴﻚ ﻭﺗﻄﺤﻦ ﻋﻈﺎﻣﻚ ..." ﻭﻛﻤﻞ ﻃﺮﻳﻘﻪ .. ﻓﺎﺕ ﺣﺪﺍ ﺍﻟﻤﺪﻣﻨﻴﻦ ﻭﻫﻤﺎ ﻳﻀﺤﻜﻮﺍ ﻭﻳﻐﻨﻮﺍ ﻭﻳﻘﻮﻟﻮﺍ ﻓﻲ ﺩﻭﻩ ﻣﺶ ﻣﻔﻬﻤﻮﻣﻪ ﺍﺑﺘﺴﻢ ﺑﺘﻬﻜﻢ ﻭﻣﺸﻲ ..
ﻓﻲ ﻭﺍﺣﺪ ﻣﻦ ﺍﻟﻤﺪﻣﻨﻴﻦ ﺭﻛﺰ ﻉ ﺷﻲ ﻣﺎﺭﻛﺰﻭﺵ ﻋﻠﻴﻪ ﺍﻟﻠﻲ ﻗﺒﻠﻪ ﻣﺸﻴﺔ ﺍﻟﻜﻮﺑﺮﺍ ﻓﻴﻬﺎ ﺷﻲ ﻣﺶ ﻃﺒﻴﻌﻲ ... ﺑﺮﻏﻢ ﺍﻧﻪ ﺷﺒﻪ ﻣﺘﻌﺎﻓﻲ ﺑﺲ ﻣﺎﺯﺍﻝ ﻣﺸﻴﺘﻪ ﻣﺶ ﻣﺰﺑﻮﻃﻪ ..
ﺍﻟﻤﺪﻣﻦ : ﺍﻟﻜﻮﺑﺮﺍ ﺃﻋﺮﺝ ..
ﺍﻟﻤﻠﺘﺤﻲ : ﺷﻨﻮ ﻳﺎﺩﺭﻭﻳﺶ
ﺍﻟﻤﻬﺒﻮﻝ : ﻣﺎﻋﻨﺪﻳﺶ ﻋﻠﻢ ﺑﺸﻲ ﺯﻱ ﻫﺬﺍ ..
ﺍﻟﻤﻠﺘﺤﻲ : ﻣﺶ ﻣﻬﻢ ﺗﻮﺍ ... ﺧﻠﻮﺍ ﻋﻴﻮﻧﻜﻢ ﻣﻔﺘﻮﺣﻪ ... ﻭﺍﻧﺖ ﻛﻤﻞ ﺍﻟﻮﺻﻠﻪ ﻣﺘﺎﻋﻚ ﻣﺴﺘﻤﺘﻊ ﻫﻠﺒﻪ ...
ﺍﻟﻤﺪﻣﻦ ﺑﻀﺤﻜﻪ : ﻭﺍﻟﻠﻪ ﺍﻧﻲ ﻭﺍﻟﺠﻤﺎﻋﻪ ﻣﺤﺼﻠﻴﻦ ﻋﻠﻴﻬﺎ ﺟﻮ ..
ﺍﻟﻤﻬﺒﻮﻝ : ﻏﻴﺮ ﻳﺘﻢ ﺍﻟﻠﻲ ﺣﻨﻲ ﻓﻴﻪ ﺑﺲ ...
ﺍﻟﻤﺪﻣﻦ ﻭﺍﻟﻤﻠﺘﺤﻲ : ﻫﻬﻬﻬﻬﻬﻬﻬﻬﻬﻬﻬﻬﻬﻬﻪ
***
ﺍﻟﺤﻴﺎﺓ ﻏﺎﺩﻱ ﺣﻠﻮﺓ ﺑﺲ ﻟﻤﺎ ﺍﻟﻮﺍﺣﺪ ﻳﺒﺪﺍ ﺑﻌﻴﺪ ﻋﻦ ﺍﻫﻠﻪ ﻭﻧﺎﺳﻪ ﻳﺤﺲ ﺑﺎﻟﻮﺣﺸﻪ ....
ﺃﻣﻴﺮﺓ ﺑﻀﺤﻜﻪ : ﻗﺪﺍﺵ ﺧﺎﻃﺮﻱ ﻧﺤﺲ ﺑﻴﻬﺎ ﻫﺎﻟﻮﺣﺸﻪ ﺣﺘﻰ ﺍﻧﻲ ..
ﻋﻠﻴﺎ ﻭﻣﺪﻳﺤﻪ : ﻫﻬﻬﻬﻬﻬﻬﻬﻬﻬﻬﻬﻬﻬﻬﻬﻬﻪ ..
ﻋﻠﻴﺎ ﺑﻀﺤﻜﻪ : ﻳﺎﻛﻠﺒﻪ ..
ﻣﺪﻳﺤﻪ : ﺍﻳﻪ ﺷﻦ ﺟﻮ ﺳﻠﻔﺘﻚ ﻣﻌﺎﻙ .
ﻋﻠﻴﺎ : ﺯﻱ ﺍﻟﻮﺧﻴﻪ ﻣﺮﺍﺓ ﻃﻴﺒﻪ ﻭﺗﺨﺎﻑ ﺭﺑﻲ ...
ﺍﻣﻴﺮﺓ : ﺍﻳﻪ ﺣﻘﻪ ﻛﻠﻤﺘﻲ ﺳﻠﻔﺘﻚ ﺍﻟﻜﺒﻴﺮﻩ ﻓﻲ ﻣﻮﺿﻮﻉ ﺧﻮﻙ ..
ﻣﺪﻳﺤﻪ ﺑﺈﻧﺘﺒﺎﻩ : ﻣﻮﺿﻮﻉ ﺷﻨﻮ ..
ﻋﻠﻴﺎ ﺑﻀﺤﻜﻪ : ﺑﻨﺨﻄﺒﻮﺍ ﻟﻤﺼﻌﺐ ﺑﻨﺖ ﺳﻠﻔﻲ ..
ﻣﺪﻳﺤﻪ : ﻭﺍﻧﻲ ﺍﺧﺮ ﻣﻦ ﻳﻌﻠﻢ ..
ﻋﻠﻴﺎ : ﺗﻲ ﻏﻴﺮ ﺭﻳﺤﻴﻨﺎ ﺗﻮﺍ ﺑﺲ ﺻﺎﺭ ﻣﻨﻪ .. ﺣﺘﻰ ﺍﻟﻤﺮﺍﺓ ﻟﻤﺎ ﺭﺣﺒﺖ ﺑﺎﻟﻤﻮﺿﻮﻉ ﻗﻠﺖ ﻷﻣﻲ ﺑﻌﺪ ﺗﺮﻭﺡ ﻣﺪﻳﺤﻪ ﻧﻤﺸﻮﺍ ﻧﺨﻄﺒﻮﻫﺎ ..
ﺍﻣﻴﺮﻩ : ﻃﻠﻌﺖ ﺣﺘﻰ ﺍﻧﻲ ﺍﻟﻠﻲ ﻣﻌﺎﻫﻢ ﺍﺧﺮ ﻣﻦ ﻳﻌﻠﻢ ..
ﻣﺪﻳﺤﻪ ﻭﻋﻠﻴﺎ 😂😂
***
ﻓﺎﺕ ﺍﻟﻨﻬﺎﺭ ﻭﺍﻟﺪﻧﻴﺎ ﺑﺪﺕ ﺍﻇﻠﻢ ...
ﻣﺠﻤﻮﻋﻪ ﺳﻴﺎﺭﺍﺕ ﻣﺰﻳﻨﻪ ﻛﺎﻧﺖ ﻣﻮﺟﻮﺩﻩ ﻓﻲ ﺍﻟﺤﻲ ﺍﻟﻤﻬﺠﻮﺭ ﻭﻛﺎﻥ ﻓﻲ ﻋﺪﺩ ﻛﺒﻴﺮ ﻣﻨﺘﺸﺮ ﻣﻦ ﺍﻟﺮﺟﺎﻝ ﻓﻲ ﻛﻞ ﻣﻜﺎﻥ ..
ﻓﻲ ﺩﺍﺧﻞ ﻭﺍﺣﺪ ﻣﻦ ﺍﻟﻤﺒﺎﻧﻲ ﻛﺎﻥ ﺍﻟﻜﻮﺑﺮﺍ ﻣﻮﺟﻮﺩ ﻣﻊ ﻋﺰ ﺍﻟﺪﻳﻦ ﻳﺘﻔﺎﻫﻤﻮﺍ ﻉ ﺍﻟﻄﺮﻳﻘﻪ ﺍﻟﻠﻲ ﺣﻴﻮﺻﻠﻮﺍ ﺑﻴﻬﺎ ﺍﻟﺒﻀﺎﻋﻪ ﻟﻤﻜﺎﻧﻬﺎ ﺍﻟﻤﺨﺼﺺ ...
ﻣﻦ ﺟﻬﺔ ﺗﺎﻧﻴﻪ ﻛﺎﻥ ﺍﻟﻜﺎﻣﻠﻴﻮﻥ ﻭﺭﺍﺱ ﺍﻟﻠﻔﻊ ﻳﺘﻨﺎﻗﺸﻮﺍ ﻓﻲ ﺷﺮﻭﻁ ﺍﻟﺼﻔﻘﻪ ﺍﻟﻠﻲ ﺣﻴﺒﻴﻌﻮﺍ ﻓﻴﻬﺎ ﻫﻤﺎ ...
ﺑﺲ ﻓﻲ ﻣﻜﺎﻥ ﻣﺴﺘﺨﻄﻲ ﻣﻦ ﻫﺎﻟﻤﺒﻨﻰ ﻛﺎﻥ ﺍﻟﻜﻮﻣﺎﻧﺪﺍ ﻣﻘﻌﻤﺰ ﺑﺮﻭﺣﻪ ﻓﻲ ﻳﺪﻩ ﺳﺎﻋﻪ ﻓﻀﻪ ﺍﻧﺘﻴﻜﺎ ﻓﺘﺤﻬﺎ ﻛﺎﻧﺖ ﻓﻴﻬﺎ ﺻﻮﺭﺓ ﺷﺨﺺ ﻳﺘﺄﻣﻞ ﻓﻴﻪ .... ﺗﻨﻬﺪ ﺑﺤﺮﻗﻪ ﻭﺻﻜﺮ ﺍﻟﺴﺎﻋﻪ ...
ﻣﻦ ﺟﻬﺔ ﺗﺎﻧﻴﻪ ﻓﻲ ﺍﻟﺤﻲ ﺍﻟﻤﻬﺠﻮﺭ ...
ﺍﻟﻤﻠﺘﺤﻲ : ﺧﻼﻝ ﻧﺺ ﺳﺎﻋﻪ ﺗﻜﻮﻧﻮﺍ ﻣﻮﺟﻮﺩﻳﻦ ﻫﻨﻲ ...
ﺍﻟﻤﻬﺒﻮﻝ : ﺍﺣﺮﺻﻮﺍ ﻉ ﺍﻟﻬﺪﻭﺀ ﻭﻣﺎﺗﺘﺤﺮﻛﻮﺵ ﺍﻻﺑﺎﻷﻣﺮ ...
ﺍﻟﻤﺪﻣﻦ : ﻧﺴﺘﺄﺫﻧﻜﻢ ﺷﻮﻳﻪ ...
ﺍﻟﻤﻠﺘﺤﻲ : ﺧﻮﺩ ﺭﺍﺣﺘﻚ ﻋﻨﺪﻙ ﻋﺸﺮﻩ ﺩﻗﺎﻳﻖ ..
ﺿﺤﻚ ﺍﻟﻤﺪﻣﻦ ﻭﺧﺪﻱ ﻣﻜﺎﻥ ﻣﺴﺘﺨﻄﻲ ... ﻃﻠﻊ ﻫﺎﺗﻒ ﻗﻌﺪ ﻳﻜﺘﺐ ﻓﻲ ﺭﺳﺎﻟﻪ ﻭﺑﻌﺘﻬﺎ ...
ﺍﻟﻤﻬﺒﻮﻝ ﻛﺬﻟﻚ ﺩﺍﺭ ﻧﻔﺲ ﺍﻟﺸﻲ ﺍﺑﺘﺴﻢ ﻭﺑﻌﺘﻬﺎ ﻭﺟﺎﻩ ﺗﻢ ﺍﻟﺘﺴﻠﻴﻢ ﻭﺻﻜﺮ ﺍﻟﺘﻠﻴﻔﻮﻥ ...
ﺍﻟﻤﻠﺘﺤﻲ : ﻭﺍﻧﻲ ﺷﻦ ﻋﻨﺪﻱ ﺑﻨﺪﻳﺮ ...
ﺍﻟﻤﺪﻣﻦ ﺳﻤﻌﻪ ﻭﺿﺤﻚ : ﻣﺺ ﺍﻟﻠﻴﻢ ..
ﺿﺤﻜﻮﺍ ﺍﻟﺘﻼﺗﻪ ..
" ﻃﺒﻌﺎ ﻛﺎﻧﻮﺍ ﻳﺘﻮﺍﺻﻠﻮ ﻋﻦ ﻃﺮﻳﻖ ﺟﻬﺎﺯ ﺍﺗﺼﺎﻝ ﻉ ﻫﻴﺌﻪ ﺳﻤﺎﻋﻪ ﻣﺤﻄﻮﻁ ﻓﻲ ﻭﺫﺍﻧﻬﻢ ..."
....
ﺍﻟﻜﻮﺑﺮﺍ : ﺗﻤﺎﻡ ﺍﻟﺘﻤﺎﻡ ...
ﺍﺑﻮﺍﻟﺨﻨﺴﺎﺀ : ﻃﺮﻳﻘﺔ ﺯﻱ ﻫﺎﺩﻱ ﻧﺎﺟﺤﻪ ﻻﻣﺤﺎﻟﻪ ..
ﺍﻟﻜﻮﺑﺮﺍ ﻫﺰ ﺭﺍﺳﻪ ﺑﺈﻳﺠﺎﺏ ﻭﻣﺸﻲ ﻉ ﺗﺮﻛﻴﻨﻪ ... ﻳﻔﻜﺮ .. ﺑﻌﺪﻳﻦ ﻗﺎﻡ ﺗﻠﻴﻔﻮﻧﻪ ﻭﺑﻌﺖ ﺭﺳﺎﻟﻪ ﻟﺮﻗﻢ ﻣﻌﻴﻦ ... ﺑﻌﺪ ﺑﻌﺘﻬﺎ ... ﺧﻄﺮ ﻓﻲ ﺑﺎﻟﻪ ﻃﻴﻔﻬﺎ ﺍﺑﺘﺴﻢ ... ﻛﺘﺒﻠﻬﺎ ﺭﺳﺎﻟﻪ ... ﻭﺣﻂ ﺗﻠﻴﻔﻮﻧﻪ ﻓﻲ ﺟﻴﺒﻪ ﻭﻭﻻ ﻷﺑﻮﺍﻟﺨﻨﺴﺎﺀ ...
🌸 ﺟﻨﺎﻥ ﻛﺎﻧﺖ ﻓﻲ ﺍﻟﻜﻮﺟﻴﻨﻪ ﺍﺩﻳﺮ ﻓﻲ ﻧﺴﻜﺎﻓﻴﻪ ﺑﺶ ﺗﻘﺮﺍ ﻭﺗﻤﺨﻤﺦ ﻋﻠﻴﻪ .. ﻛﺎﻧﺖ ﺗﻔﻜﺮ ﻓﺎﻟﺴﻤﺎﺭﺓ ﻭﺗﺒﺘﺴﻢ ﺑﺮﻭﺣﻬﺎ ﻟﻴﻦ ﺳﻤﻌﺖ ﺻﻮﺕ ﺍﻟﺮﺳﺎﻟﻪ .. ﺧﺪﺕ ﺗﻠﻴﻔﻮﻧﻬﺎ ﻣﻦ ﻉ ﺍﻟﻄﺎﻭﻟﻪ ﻭﻓﺘﺤﺘﻬﺎ ..
( ﺍﻧﻲ ﺍﻛﺜﺮ ﺍﻧﺴﺎﻥ ﻣﺤﻈﻮﻅ ﻓﺎﻟﺪﻧﻴﺎ ﻹﻥ ﻗﻠﺒﻚ ﺣﺒﻨﻲ .. ﻧﺤﺒﻚ ﻟﻠﻤﻮﺕ ﺷﻤﻮﺳﺘﻲ ) ...
ﺿﺤﻜﺖ ﺑﺨﺠﻞ ﻭﺑﻌﺘﺘﻠﻪ ﺭﺳﺎﻟﻪ ﺑﺲ ﻣﺎﺗﻤﺶ ﺍﻟﺘﺴﻠﻴﻢ ﺍﺗﺼﻠﺖ ﻟﻘﺎﺗﻪ ﻣﻘﻔﻞ ".. ﺭﺑﻲ ﻳﺤﻔﻈﻚ ﻟﻴﺎ ..."💓
🌸 ﻋﻠﻴﺎ ﻛﺎﻧﺖ ﺗﻬﺪﺭﺯ ﻣﻊ ﺍﻣﻬﺎ ﻭﺧﻮﺍﺗﻬﺎ ﻭﺗﻀﺤﻚ ﻟﻴﻦ ﻫﺰ ﺗﻠﻴﻔﻮﻧﻬﺎ ﺍﻟﻠﻲ ﻛﺎﻥ ﻣﺤﻄﻮﻁ ﻉ ﺭﺟﻠﻴﻬﺎ ﺧﺪﺍﺗﻪ ﻟﻘﺖ ﺭﺳﺎﻟﻪ ﻓﺘﺤﺘﻬﺎ ..
( ﻳﺎﺭﻳﻼ ﺭﺍﺟﻠﻚ ﻳﺤﺒﻚ ﻭﻟﻤﺎ ﻳﺮﻭﺡ ﻳﺒﻲ ﻗﻄﺎﻳﻒ )
ﺿﺤﻜﺖ ﺑﺨﺠﻞ ﻭﺑﻌﺘﺘﻠﻪ ﺭﺳﺎﻟﻪ .. ﺑﺲ ﻣﺎﺗﻤﺶ ﺍﻟﺘﺴﻠﻴﻢ ﻋﺮﻓﺖ ﺍﻧﻪ ﻣﺴﻜﺮﻩ " ﺍﺳﺘﻮﺩﻋﻚ ﺍﻟﻠﻪ ﻳﺎﺭﻭﺡ ﺍﻟﺮﻳﻼ "💓
ﻓﻲ ﻧﻔﺲ ﺍﻟﻠﺤﻈﻪ ﻭﺻﻠﺖ ﺭﺳﺎﻟﻪ ﻷﻣﻴﺮﺓ ﻭﻗﺮﺗﻬﺎ
( ﺃﺣﺒﻴﻨﻲ ﺑﻼ ﻋﻘﺪ ﻭﺿﻴﻌﻲ ﻓﻲ ﺧﻄﻮﻁ ﻳﺪﻱ ... ﺍﺣﺒﻴﻨﻲ ﺍﻣﻴﺮﺗﻲ ﻭﻣﺎﺗﺨﺎﻓﻲ ﻣﻦ ﺷﻲ ) ...
🍁 ﺍﻣﻴﺮﻩ ﻋﺎﻭﺩﺕ ﺗﻘﺮﺍ ﻓﻲ ﺭﺳﺎﻟﺘﻪ ﻣﺎﻓﻬﻤﺘﻬﺎﺵ ﻛﻮﻳﺲ ... ﻫﻲ ﺍﺻﻼ ﺗﺤﺒﻪ .. ﺑﺲ ﻛﻴﻒ ﻋﺮﻑ ﺍﻧﻬﺎ ﺗﺨﺎﻑ ﻣﻨﻪ ... ﻣﻌﻘﻮﻝ ﻟﻬﺎﻟﺪﺭﺟﻪ ﺑﺎﻳﻦ ﻋﻠﻴﻬﺎ؟ ! ﺣﻄﺖ ﺗﻠﻴﻔﻮﻧﻬﺎ ﻓﻲ ﺟﻴﺐ ﻓﺎﻧﻠﻴﺔ ﺍﻟﺘﻮﺗﻪ ﻭﺗﺤﺎﻭﻝ ﺗﺮﻛﺰ ﻓﻲ ﺍﻟﻬﺪﺭﺯﺓ ﻣﻊ ﺍﻣﻬﺎ ﻭﺧﻮﺍﺗﻬﺎ ﺑﺲ ﻣﺶ ﻗﺎﺩﺭﺓ ﺗﻔﻬﻢ ﻣﻨﻬﻢ ﺷﻲ ﻷﻥ ﺗﻔﻜﻴﺮﻫﺎ ﻛﻠﻪ ﻓﻲ ﺍﻟﺮﺳﺎﻟﻪ ...
... ﻳﺘﺒﻊ ...
💥💥 ﺑﻌﺪ ﻗﺮﻳﺘﻮﺍ ﻫﺎﻟﺠﺰﺀ ﻧﺒﻲ ﻧﻌﺮﻑ ﺯﺑﻄﻮﺍ ﻣﻦ ﻫﻤﺎ ﺍﻟﻤﻠﺘﺤﻲ ﻭﺍﻟﻤﺪﻣﻦ ﻭﺍﻟﻤﻬﺒﻮﻝ ... ﻟﻮ ﺯﺑﻄﻮﻫﻢ ﻗﻮﻟﻮﻟﻲ ﻣﻦ ﻫﻤﺎ ...
