#الحسن (الوطن عشق رجاله )
ﺍﻟﺠﺰﺀ ﺍﻟﺜﺎﻟﺚ ﻭﺍﻟﺴﺘﻴﻦ
للكاتبة GomanFared
} ﺍﺷﺪﻧﺎ ﺑﻴﻪ ﻛﺜﻴﺮﺍ .... ﻛﺎﻥ ﺑﻄﻼ ... ﻭﻓﺎﺭﺳﺎ .. ﻭﺭﺟﻼ ﻋﺎﺷﻖ ﻟﻠﻮﻃﻦ .. ﻭﻣﻦ ﺍﺣﺪ ﺍﻷﺳﻤﺎﺀ ﺍﻟﻘﻮﻳﻪ ﺍﻟﺘﻲ ﺳﺎﻫﻤﺖ ﻓﻲ ﺍﺭﺳﺎﺀ ﺍﻷﻣﻦ ﻓﻲ ﺍﻟﻌﺎﺻﻤﻪ ... ﻣﻨﺎ ﻣﻦ ﺟﻌﻞ ﻣﻨﻪ ﻗﺪﻭﺓ ﻷﺑﻨﺎﺋﻪ .. ﻭﻟﻜﻦ ﺍﻟﻴﻮﻡ ... ﺳﻘﻂ ﺍﻟﻘﻨﺎﻉ ... ﻭﺍﺗﻀﺤﺖ ﺍﻟﺤﻘﻴﻘﻪ .. ﻭﺗﻌﻠﻤﻨﺎ ﺩﺭﺳﺎ ﺟﺪﻳﺪﺍ ﻓﻲ ﺍﻥ ﻻﻧﺨﺪﻉ ﺑﺎﻟﻤﻈﺎﻫﺮ ﻣﺮﺓ ﺃﺧﺮﻯ ... ﺍﻟﺤﺴﻦ ﺍﻟﺼﺎﺩﻕ .. ﺍﻟﻘﺎﺗﻞ .. ﺍﻟﺬﻱ ﻟﺒﺲ ﺛﻮﺏ ﺣﺴﻦ ﺍﻟﺨﻠﻖ ﻭﺧﺪﻉ ﺍﺑﺼﺎﺭﻧﺎ ﺑﻪ .. ﻧﺰﻉ ﻋﻨﻪ ﺍﻟﺜﻮﺏ ﺍﻟﺬﻱ ﺗﻨﻜﺮ ﺑﻪ ﻫﺬﺍ ﺍﻟﻴﻮﻡ .. ﻟﻦ ﺃﺗﻜﻠﻢ ﺃﻛﺜﺮ ﺑﻞ ﺳﺄﺗﺮﻙ ﻟﻜﻢ ﺍﻟﺤﻜﻢ ﺑﻌﺪ ﻣﺸﺎﻫﺪﺓ ﻫﺬﺍ ﺍﻟﻔﻴﺪﻳﻮ {
📽📼 ﻣﺤﺘﻮﻯ ﺍﻟﻔﻴﺪﻳﻮ ﻛﺎﻥ ﻛﺎﻟﺘﺎﻟﻲ ... ﺍﻟﺤﺴﻦ ﻛﺎﻧﺖ ﻓﻲ ﺣﻀﻨﻪ ﻧﻬﻠﻪ .. ﺑﻌﺪﻫﺎ ﺩﻓﻬﺎ ﻭﻃﻠﻊ ﺍﻟﻤﺴﺪﺱ ﻭﺍﻃﻠﻖ ﻋﻠﻴﻬﺎ ... ﻭﻃﺎﺣﺖ ﻗﺪﺍﻣﻪ .. ﻭﺍﻟﺤﺴﻦ ﻫﺮﺏ ...
ﻛﺎﻥ ﺍﻟﻔﻴﺪﻳﻮ ﻣﺒﻌﻮﺙ ﻟﻠﻘﻨﺎﺓ ﻭﺍﻧﺘﺸﺮ ﺑﺸﻜﻞ ﻛﺒﻴﺮ ﻉ ﺍﻟﻔﻴﺲ ﺑﻮﻙ ..
ﻭﺍﺳﺘﻤﺮ ﺍﻹﻋﻼﻣﻲ ﺍﻟﻤﺄﺟﻮﺭ ﻫﺬﺍ ﻓﻲ ﺍﺣﺪ ﺍﻟﻘﻨﻮﺍﺕ ﻓﻲ ﺗﺄﻟﻴﻒ ﺍﻟﻘﺼﺺ ﻭﺍﻟﻄﻌﻦ ﻓﻲ ﺍﻟﺤﺴﻦ .. ﻗﺎﻝ ﺍﻧﻪ ﻛﺎﻥ ﻉ ﻋﻼﻗﻪ ﻣﺨﻔﻴﻪ ﺑﻨﻬﻠﻪ ﺍﻟﺼﻴﺪ ﻭﻛﺎﻧﻮﺍ ﻳﺘﻼﻗﻮﺍ ﺑﺎﻟﺴﺮ ... ﻭﻷﻥ ﺍﻟﺤﺴﻦ ﻣﺘﺰﻭﺝ ﻭﻟﻴﻪ ﻣﺮﻛﺰ ﻭﻋﻴﻠﺘﻪ ﻣﻌﺮﻭﻓﻪ ﻛﺎﻥ ﻳﺒﻲ ﺍﻟﻌﻼﻗﻪ ﻫﺎﺩﻱ ﺗﻜﻮﻥ ﻓﻲ ﺍﻟﺨﻔﺎﺀ .. ﻭﻟﻤﺎ ﺍﺳﺘﺎﺀﺕ ﻧﻬﻠﻪ ﻣﻦ ﻭﺿﻌﻬﻢ ﻫﺬﺍ ﺩﺏ ﺑﻴﻨﺎﺗﻬﻢ ﺧﻼﻑ .. ﺍﺿﻄﺮ ﺍﻟﺤﺴﻦ ﺍﻧﻪ ﻳﻘﺘﻠﻬﺎ ﻭﻫﻮ ﻳﺤﺎﻭﻝ ﺍﻟﻬﺮﻭﺏ ﻛﺎﻧﺖ ﺍﻟﺸﺮﻃﻪ ﻭﺍﺻﻠﻪ ﻟﺤﻮﺵ ﻧﻬﻠﻪ ﻭﻗﺒﻀﻮﺍ ﻋﻠﻴﻪ .. ﻭﻃﺒﻌﺎ ﺟﺎﺑﻮﺍ ﺷﻬﺎﺩﻩ ﺍﻟﺨﺪﺍﻣﻪ ﺍﻟﻠﻲ ﺗﺨﺪﻡ ﻋﻨﺪﻫﺎ ﻭﺍﻟﻠﻲ ﺷﻬﺪﺕ ﻉ ﻫﺬﺍ ﻛﻠﻪ ﻉ ﺃﺳﺎﺱ ﻭﻫﻲ ﺍﻟﻠﻲ ﺣﻜﺖ ﺗﻔﺼﻴﻞ ﺍﻟﺠﺮﻳﻤﻪ ﺍﻟﻠﻲ ﺷﺎﻓﺘﻪ ﺑﺎﻟﺪﺭﻗﻪ ﻋﻦ ﺍﻟﺤﺴﻦ ....
ﺍﻷﻋﻼﻣﻲ ﻛﺎﻥ ﻳﺰﻳﺪ ﻓﻲ ﺍﻟﺘﺸﻮﻳﻪ ﺍﻛﺜﺮ ﻭﺃﻛﺜﺮ .. ﺯﻱ ﻫﻠﺒﻪ ﺇﻋﻼﻣﻴﻴﻦ ﻣﻮﺟﻮﺩﻳﻦ ﺣﺎﻟﻴﺎ ﻣﺤﺘﺮﻓﻴﻦ ﻓﻲ ﺗﺤﻮﻳﻞ ﺍﻟﺤﻖ ﻟﺒﺎﻃﻞ ﻭﺍﻟﺸﺮﻳﻒ ﻟﺨﺎﺋﻦ ... ﻭﺍﻟﺼﺎﺩﻕ ﻟﻜﺎﺫﺏ .. ﺍﻳﻀﺎ ﻓﻲ ﺗﺤﻮﻳﻞ ﺍﻟﺒﺎﻃﻞ ﻟﺤﻖ ﻭﺍﻟﺨﺎﺋﻦ ﻳﺨﻠﻮﻩ ﺷﺮﻳﻒ ﻭﺍﻟﻜﺎﺫﺏ ﻳﺨﻠﻮﻩ ﺻﺪﻳﻖ .. ﺍﻟﻨﻮﻋﻴﻪ ﻫﺎﺩﻱ ﻣﻦ ﺍﻹﻋﻼﻣﻴﻴﻦ ﻫﻤﺎ ﺍﻟﻠﻲ ﻳﺴﻤﻮﺍ ﻓﻴﻬﻢ ﺇﻋﻼﻣﻴﻲ ﺍﻟﺪﻓﻊ ﺍﻟﻤﺴﺒﻖ ﺍﻟﻠﻲ ﻣﺴﺘﻌﺪﻳﻦ ﻳﻄﻌﻨﻮﺍ ﺣﺘﻰ ﻓﻲ ﺍﻷﻧﺒﻴﺎﺀ ﻟﻤﺎ ﺗﺠﺮﻱ ﻓﻲ ﺍﻳﺪﻳﻬﻢ ﺍﻟﻌﻤﻠﻪ 💷💴💵💸..
🍁 ﻭﺿﻊ ﺍﻟﺤﺴﻦ ﻛﺎﻥ ﺻﻌﺐ ﻫﻠﺒﻪ ﻛﻞ ﺷﻲ ﻛﺎﻥ ﺿﺪﻩ ﻛﻞ ﺍﻷﺩﻟﻪ ﺗﺜﺒﺖ ﺍﻧﻪ ﻗﺎﺗﻞ ﻧﻬﻠﻪ ﺑﺎﻟﺬﺍﺕ ﺍﺛﺎﺭ ﺑﺼﻤﺎﺗﻪ ﻉ ﺍﺩﺍﻩ ﺟﺮﻳﻤﺔ ﻗﺘﻞ ﻧﻬﻠﻪ " ﺍﻟﻤﺴﺪﺱ .."
ﻋﻴﻠﺘﻪ ﻓﻲ ﺣﺎﻟﺔ ﺻﺪﻣﻪ ﻣﺎﺣﺪ ﻣﺴﺘﻮﻋﺐ ﺍﻟﻠﻲ ﺻﺎﺭ ﺑﻜﻞ .. ﻣﻊ ﻣﺮﻭﺭ ﺍﻷﻳﺎﻡ ﺍﻟﻔﻀﻴﺤﻪ ﺍﻟﻠﻲ ﺭﺍﻓﻘﺖ ﺟﺮﻳﻤﺔ ﺍﻟﻘﺘﻞ ﺗﺄﻟﻒ ﻋﻠﻴﻬﺎ ﺍﻛﺜﺮ ﻣﻦ ﻗﺼﻪ ﻭﻋﻴﻠﺔ ﺍﻟﺼﺎﺩﻕ ﺍﻧﺤﻄﺖ ﻓﻲ ﻣﻮﻗﻒ ﺻﻌﺐ ﻫﻠﺒﻪ ..
ﻋﻠﻴﺎ ﻭﺟﻨﺎﻥ ﻓﻲ ﺍﻟﺠﺎﻣﻌﻪ ﺍﻟﻐﻤﺰ ﻭﺍﻟﻠﻤﺰ ﻭﺍﻟﻨﻈﺮﻩ ﺍﻟﺴﻴﺌﻪ ﺍﻟﻠﻲ ﻻﺣﻘﺘﻬﻢ ﺑﺎﻟﺬﺍﺕ ﻋﻠﻴﺎ ﺍﻟﻠﻲ ﻗﺼﺔ ﺍﻟﺨﻴﺎﻧﻪ ﻓﻴﻬﺎ ﺇﻫﺎﻧﻪ ﻛﺒﻴﺮﻩ ﻟﻴﻬﺎ .. ﻏﻴﺮ ﻋﻦ ﻫﻜﻲ ﺍﻟﻨﺎﺱ ﺭﺟﻌﺖ ﺗﺘﻜﻠﻢ ﺑﻘﺼﺘﻬﺎ ﺍﻟﻘﺪﻳﻤﻪ ﻣﻦ ﺃﻭﻝ ﻭﺟﺪﻳﺪ ... ﻭﺷﻌﺒﻨﺎ ﻋﻨﺪﻩ ﻣﻮﻫﺒﻪ ﻓﺬﺓ ﻓﻲ ﺗﺄﻟﻴﻒ ﺍﻟﻘﺼﺺ ﻭﻳﺎﻗﺪﺍﺵ ﻗﺼﻪ ﻭﻗﺼﻪ ﺍﻟﻔﻮﻫﺎ .. ﺍﻧﺘﺸﺮﺕ ﻓﻲ ﺍﻟﻘﺮﻭﺑﺎﺕ ﻭﺍﻟﺼﻔﺤﺎﺕ ﻓﻲ ﺍﻟﻔﻴﺲ ...
ﺑﺲ ﻋﻠﻴﺎ ﻫﺎﻟﻤﺼﻴﺒﻪ ﺍﻟﻠﻲ ﺣﻠﺖ ﻋﻠﻴﻬﺎ ﺑﺮﻏﻢ ﺍﻧﻬﺎ ﻛﺎﻧﺖ ﻣﺆﻟﻤﻪ ﺃﻟﻤﺘﻬﺎ ﻣﻦ ﻧﺎﺣﻴﻪ ﻭﺣﺪﻩ ﺑﺲ ﻉ ﺭﺍﺟﻠﻬﺎ ﻉ ﺣﺒﻴﺒﻬﺎ ﺍﻟﻠﻲ ﻛﺎﻧﺖ ﻭﺍﺛﻘﻪ ﻭﻣﺘﺄﻛﺪﻩ ﺍﻥ ﻓﻲ ﺣﺪ ﺩﺑﺮﻫﺎﻟﻪ ﻭﺛﻘﺘﻬﺎ ﻓﻴﻪ ﻣﺎﺃﻧﻬﺰﺗﺶ ﻭﻟﻮﺷﻮﻳﻪ ..
ﻋﻴﻠﺘﻪ ﻛﺎﻧﻮﺍ ﻣﺸﺘﺘﻴﻦ ﻫﻠﺒﻪ ﻓﻲ ﻣﻨﻬﻢ ﺍﻧﺘﺎﺑﻪ ﺍﻟﺸﻚ ... ﻭﺍﻟﻠﻲ ﻛﺎﻥ ﻣﻠﻔﺖ ﻟﻠﻨﻈﺮ ﻫﻮ ﻋﺪﻡ ﺩﻓﺎﻉ ﺳﺮﻣﺪ ﻋﻦ ﺍﻟﺤﺴﻦ ﻓﺒﺮﻧﺎﻣﺠﻪ ..
ﺳﺮﻣﺪ : ﺷﻦ ﺑﻨﻘﻮﻝ ﺷﻦ ﻋﻨﺪﻱ ﺍﻧﺘﻮﺍ ﻋﺎﺭﻓﻴﻦ ﺍﻧﻲ ﻓﻲ ﺑﺮﻧﺎﻣﺠﻲ ﻧﻄﻠﻊ ﻓﻜﻞ ﺷﻲ ﺑﺎﻟﻮﺛﺎﺋﻖ .. ﺑﻨﺪﺍﻓﻊ ﻋﻨﻪ ﻣﻦ ﺑﻴﺼﺪﻗﻨﻲ ﺑﻴﻘﻮﻟﻮﺍ ﻋﻤﻪ ...
ﺍﻧﻌﺎﻡ : ﻳﻌﻨﻲ ﻣﺶ ﺣﺘﻘﻮﻝ ﺷﻲ .. ﻣﺶ ﺣﺪﻳﺮ ﺷﻲ ..
ﺳﺮﻣﺪ : ﺣﻨﺤﺎﻭﻝ ﻧﺪﺍﻓﻊ ﻋﻨﻪ ﺑﻄﺮﻳﻘﻪ ﻣﻘﻨﻌﻪ ..
ﺑﺮﻧﻴﻪ : ﺍﻧﻲ ﻣﺎﻋﻠﻴﺎﺵ ﻓﻲ ﺍﻟﻘﻄﺎﻑ ﻫﺬﺍ ﻛﻠﻪ .. ﺍﻟﺤﺴﻦ ﺑﺮﻱﺀ ﺩﺑﺮﻭﺍ ﻛﻴﻒ ﺍﻃﻠﻌﻮﻩ ﻣﻦ ﻫﺎﻟﻤﺼﻴﺒﻪ ..
ﻣﺤﻤﺪ : ﻭﻣﻦ ﻗﺎﻝ ﺑﺮﻱﺀ ..
ﺷﺒﺤﻮﻟﻪ ﻛﻠﻬﻢ ...
ﻣﺤﻤﺪ : ﻣﺎﺗﺸﺒﺤﻮﻟﻴﺶ ﻫﻜﻲ .. ﺣﻴﺎﺓ ﺍﻟﺤﺴﻦ ﻣﺎﺣﺪ ﻳﻌﺮﻑ ﻋﻨﻬﺎ ﺇﻻ ﻟﻠﺤﺴﻦ ﻳﺒﻲ ﻳﻄﻠﻌﻪ ... ﻭﻣﻦ ﻃﻮﻝ ﻋﻤﺮﻩ ﻏﺎﻣﺾ ﻭﻣﺶ ﻭﺍﺿﺢ ..
ﻋﺎﺑﺪ : ﺷﻦ ﺗﻘﻮﻝ ﺍﻧﺖ .. ﺗﻮﺍ ﻃﻠﻌﺖ ﻣﺎﺗﻌﺮﻓﺎﺵ؟ "!! ﻣﺎﻻﺵ ﻋﻠﻢ ﺑﺄﻥ ﺍﻟﻤﺆﺍﻣﺮﺓ ﻫﺎﺩﻱ ﻣﻦ ﺗﺪﺑﻴﺮ ﺳﺮﻣﺪ " ..
ﻣﺤﻤﺪ : ﺍﻳﻪ ﻣﺎﻧﻌﺮﻓﺎﺵ ﻭﻻﺃﻧﺖ ﺗﻌﺮﻓﻪ .. ﻛﻠﻨﺎ ﻣﺎﻧﻌﺮﻓﻮﺍ ﺷﻲ ﻋﻦ ﺍﻟﺤﺴﻦ ﻟﻤﺎ ﻳﻄﻠﻊ ﻣﻦ ﺍﻟﺒﺎﺏ ﺷﻦ ﻳﺪﻳﺮ ...
ﻛﻠﻬﻢ ﺳﻜﺘﻮﺍ ﻭﺍﻟﻜﻼﻡ ﺑﺪﻱ ﻳﻠﻌﺐ ﻓﻌﻘﻮﻟﻬﻢ ﻣﺎﻋﺪﺍ ﺑﺮﻧﻴﻪ ...
ﺳﺮﻣﺪ : ﻛﻼﻡ ﻣﺤﻤﺪ ﻣﻘﻨﻊ .. ﻣﻊ ﺍﻷﺳﻒ ﻃﺒﻌﺎ ... ﺍﻟﺤﺴﻦ ﻳﻐﻴﺐ ﻋﻦ ﺍﻟﺤﻮﺵ ﺑﺎﻷﺳﺎﺑﻴﻊ ﺑﺤﺠﺔ ﺍﻧﻪ ﻓﻲ ﺍﻟﻤﺮﻛﺰ ﺣﺘﻰ ﺑﻌﺪ ﺗﺰﻭﺝ .. ﻳﻌﻨﻴﻴﻲ .. ﻣﺎﺣﺪ ﻳﻌﺮﻑ ﺍﺫﺍ ﻛﺎﻥ ﻫﻮ ﻓﻲ ﺍﻟﻤﺮﻛﺰ ﺍﻭ ... ﻣﻂ ﺷﻮﺍﺭﺑﻪ ﺑﺘﺴﺎﺅﻝ ... ﺍﻭ .. ﻻ ..
ﻫﻨﻲ ﺧﺸﺖ ﻋﻠﻴﻬﻢ ﻋﻠﻴﺎ ﺍﻟﻠﻲ ﻋﻴﻮﻧﻬﺎ ﺣﻤﺮ ﻣﻦ ﺍﻟﺒﻜﻲ ﻭﻣﺎﺯﺍﻝ ﺗﺒﻜﻲ ﺑﺲ ﻣﻼﻣﺢ ﻭﺟﻬﻬﺎ ﻛﺎﻥ ﺑﺎﺩﻱ ﻋﻠﻴﻬﺎ ﺍﻟﻐﻀﺐ ﺍﻟﺸﺪﻳﺪ ...
ﻋﻠﻴﺎ ﺑﻐﻀﺐ ﻭﺗﻮﺟﻪ ﻓﻜﻼﻣﻬﺎ ﻟﺴﺮﻣﺪ : ﺍﻧﺖ ﻛﻴﻒ ﺗﺪﻭﻱ ﻛﻴﻒ ﻛﻴﻒ ﺗﻔﻜﺮ ﻫﻜﻲ ... ﻛﻴﻴﻴﻒ .. ﻣﺪﺍﻳﺮﻙ ﺻﺎﺣﺒﻪ ﻭﺧﻮﻩ ﻣﺶ ﻋﻤﻪ ... ﻛﻴﻒ ﺗﺸﻚ ﻓﻴﻪ ﻭﺗﺼﺪﻕ ﻋﻠﻴﻪ ﺍﻷﻛﺎﺫﻳﺐ ﻫﺎﺩﻱ .. ﺻﺪﻣﺘﻲ ﻓﻴﻚ ﺍﻧﺖ ﺍﻛﺜﺮ ﻣﻦ ﻛﻞ ﺷﻲ ..
ﺳﺮﻣﺪ ﺍﺑﺘﺴﻢ : ﻣﻌﺬﻭﺭﺓ ﺍﻟﻠﻲ ﺻﺎﺭ ﻣﺶ ﺳﺎﻫﻞ ﻋﻠﻴﻚ ..
ﻋﻠﻴﺎ ﺷﺒﺤﺘﻠﻪ ﺑﺤﺪﻩ : ﺍﻳﻪ ﻣﺶ ﺳﺎﻫﻞ ﺑﻜﻞ ﺍﻥ ﺍﻟﺮﺍﺟﻞ ﺍﻟﺸﺮﻳﻒ ﺍﻟﻤﺴﺘﻘﻴﻢ .. ﺍﻟﻠﻲ ﻫﻤﻪ ﻛﻠﻪ ﻳﺨﺪﻡ ﺑﻼﺩﻩ ﻭﻧﺎﺳﻬﺎ ﻳﻨﺤﻂ ﻓﻲ ﻫﺎﻟﻤﻮﻗﻒ ﻭﻳﺘﻌﺮﺽ ﻟﻤﺆﺍﻣﺮﺓ ﺩﺑﺮﻭﻫﺎﻟﻪ ﻛﻤﺸﺔ ﺣﻘﺮﺍﺀ ﻻﺫﻣﻪ ﻟﻴﻬﻢ ﻭﻻﺿﻤﻴﺮ ﻭﻭﺍﺿﺢ ﺍﻧﻪ ﻣﻮﺟﻌﻬﻢ ﻫﻠﺒﻪ ﻭﻣﻘﻠﻖ ﻧﻮﻣﻬﻢ ...
ﺍﺳﻤﻊ ﻭﺍﺳﻤﻌﻮﺍ ﻛﻠﻜﻢ ... ﺍﻟﺤﺴﻦ ﺑﺮﻱﺀ ﻣﻦ ﻛﻞ ﺷﻲ ﻭﺍﻟﻠﻲ ﺩﺍﺭ ﻓﻴﻪ ﻫﻜﻲ ﺣﻴﺨﻴﺐ ﻣﺴﻌﺎﻩ ﻭﺣﻴﻄﻠﻊ ﺍﻟﺤﺴﻦ ﻣﻦ ﺳﺠﻨﻪ ﻣﺮﻓﻮﻉ ﺍﻟﺮﺍﺱ .. ﻭﺍﻟﻠﻲ ﺑﻴﺠﻴﺐ ﺳﻴﺮﺗﻪ ﺑﺴﻮﺀ ﻣﺶ ﺣﻨﺪﻳﺮﻟﻪ ﺍﻱ ﺍﻋﺘﺒﺎﺭ .. ﻭﺣﻴﺴﻤﻊ ﻣﻨﻲ ﺍﻟﻠﻲ ﻳﺴﺘﺤﻖ ﻳﺴﻤﻌﻪ .. ﻭﻟﻔﺖ ﻭﻃﻠﻌﺖ ﻭﻫﻲ ﻑ ﻗﻤﺔ ﺍﻟﻐﻀﺐ ..
ﻣﺤﻤﺪ ﻭﺳﺮﻣﺪ ﻃﺎﺭﺗﻠﻬﻢ ﺑﺲ ﻛﺘﻤﻮﺍ ﻏﻀﺒﻬﻢ .. ﺍﻣﺎ ﻋﺎﺑﺪ ﻭﺍﻧﻌﺎﻡ ﻓﺰﺍﺩﺕ ﺛﻘﺘﻬﻢ ﺍﻛﺜﺮ ﻓﻲ ﺑﺮﺍﺀﺓ ﺍﻟﺤﺴﻦ ﻛﻼﻡ ﻋﻠﻴﺎ ﺃﺛﺮ ﻋﻠﻴﻬﻢ ...
***
ﺍﺣﻤﺪ : ﺍﻟﻜﻮﺑﺮﺍ ﻭﺭﺍﻫﺎ ﻣﺎﺗﺒﻴﺶ ﺍﺗﻨﻴﻦ ﻳﺤﻜﻮﺍ ﻓﻴﻬﺎ ..
ﻋﺎﺩﻝ : ﻫﻮ ﻓﻲ ﺷﻲ ﺑﻴﻨﻪ ﺑﻴﻦ ﻧﻬﻠﻪ .. ﻣﺎﻧﻘﺼﺪﺵ ﺑﻬﺪﺍﻛﺎ ﺍﻟﻤﻌﻨﻰ ..
ﺍﺣﻤﺪ : ﺍﻳﻪ ... ﻭﺣﻜﺎﻟﻪ ﺍﺣﻤﺪ ﺍﻟﻘﺼﻪ ﻛﺎﻣﻠﻪ ..
ﻋﺎﺩﻝ : ﻳﻌﻨﻲ ﻛﺎﻧﺖ ﻣﺘﻌﺎﻭﻧﻪ ﻣﻌﺎﻩ ﺑﺸﻜﻞ ﻓﺮﺩﻱ ...
ﺍﺣﻤﺪ : ﺍﻳﻪ ..
ﻋﺎﺩﻝ : ﻳﻌﻨﻲ ﻓﻲ ﺍﻟﻤﺮﻛﺰ ﻫﻨﻲ ﻣﺎﻛﺎﻥ ﺣﺪ ﻳﻌﺮﻑ ﻏﻴﺮﻙ ..
ﺍﺣﻤﺪ : ﻻ ﺍﻟﻌﻤﻴﺪ ﺟﺎﺩ ﺍﻟﻠﻪ ﺍﻟﻠﻪ ﻳﺮﺣﻤﻪ ﺣﺘﻰ ﻫﻮ ﻛﺎﻥ ﻋﺎﺭﻑ ..
ﻋﺎﺩﻝ : ﻳﻌﻨﻲ ﺍﺣﺘﻤﺎﻝ ﺍﻥ ﺍﻟﻜﻮﺑﺮﺍ ﻭﺟﻤﺎﻋﺘﻪ ﻋﺮﻓﻮﺍ ﺑﺎﻟﺘﻌﺎﻭﻥ ﻫﺬﺍ ﻭﺗﺨﻠﺼﻮﺍ ﻣﻨﻬﻢ ﺍﻟﺰﻭﺯ ...
ﺍﺣﻤﺪ : ﺍﻟﻤﺤﻴﺮ ﻓﻲ ﺍﻟﻤﻮﺿﻮﻉ ﻛﻠﻪ ﻳﺎﻓﻨﺪﻱ .. ﺍﻥ ﺍﻟﻠﻲ ﻗﺎﻋﺪ ﻳﺼﻴﺮ ﻓﻲ ﺍﻟﻔﺘﺮﺓ ﺍﻷﺧﻴﺮﻩ ﻗﺎﻋﺪ ﻳﻀﺮ ﺍﻟﺤﺴﻦ ﻣﻌﻨﻮﻳﺎ ﻧﺒﺪﻭﻫﺎ ﺑﺎﻟﻜﻤﻴﻦ ... ﻣﻮﺕ ﻫﻼﻝ .. ﻣﻮﺕ ﺑﻨﺖ ﺍﻟﺒﻲ ﻭﺭﺍﺟﻠﻬﺎ ﻭﻫﻤﺎ ﻓﻲ ﻃﺮﻳﻘﻬﻢ ﻟﻠﻨﺎﻳﺐ ﺍﻟﻌﺎﻡ .. ﺍﻟﻨﺎﺱ ﻫﺎﺩﻱ ﻛﻠﻬﺎ ﻣﺮﺗﺒﻄﻪ ﺑﺎﻟﺤﺴﻦ ..
ﻋﺎﺩﻝ : ﻭﻣﻮﺕ ﺍﻟﻔﻬﺪ؟
ﺍﺣﻤﺪ : ﺍﻫﺎﺍﺍ ﻣﻮﺕ ﺍﻟﻔﻬﺪ ﻳﺨﺘﻠﻒ ... ﻳﻮﻣﻬﺎ ﺍﻟﻔﻬﺪ ﻛﺎﻥ ﻣﺘﻮﺍﺻﻞ ﻣﻌﺎﻧﺎ ﺑﺠﻬﺎﺯ ﺍﻹﺗﺼﺎﻝ ... ﻭﻗﺘﻬﺎ ﻫﻮ ﺍﻟﻠﻲ ﻻﺣﻖ ﺍﻟﺠﻤﺎﻋﻪ ﺍﻟﻠﻲ ﺩﺍﺧﻞ ﻣﻘﺮ ﻋﻘﺪ ﺍﻟﺼﻔﻘﻪ ... ﻋﺰ ﺍﻟﺪﻳﻦ ﻛﺎﻥ ﻣﺼﺎﺏ ﻭﺍﻟﻌﻨﺎﺻﺮ ﺍﻟﻠﻲ ﻗﺒﻀﻮﺍ ﻋﻠﻴﻪ ﻗﺎﻟﻮﺍ ﺍﻥ ﻣﺤﻤﺪ ﻫﻮ ﺍﻟﻠﻲ ﺻﻮﺏ ﻋﻠﻴﻪ ﻭﻻﺣﻖ ﺍﻟﺒﺎﻗﻲ ...
ﻋﺎﺩﻝ : ﻟﺸﻦ ﺗﺒﻲ ﺗﻮﺻﻞ ..
ﺍﺣﻤﺪ : ﻟﻤﺎ ﻟﻘﻲ ﺍﻟﺤﺴﻦ ﺍﻟﻔﻬﺪ ﻗﺒﻞ ﻳﻤﻮﺕ ﻛﺎﻧﺖ ﻓﻲ ﻣﻌﺎﻩ ﺟﺜﺔ ﺗﺎﻧﻴﻪ ﻟﻠﺬﺍﺭﻉ ﺍﻷﺳﻮﺩ ﺍﻗﺮﺏ ﺭﺟﺎﻝ ﺍﻟﻜﻮﺑﺮﺍ ﻟﻴﻪ ﻭﻭﺍﺿﺢ ﺍﻥ ﺍﻟﻔﻬﺪ ﻗﺘﻠﻪ ...
ﻋﺎﺩﻝ : ﺍﻟﻜﻮﺑﺮﺍ ﻗﺘﻞ ﺍﻟﻔﻬﺪ
ﺍﺣﻤﺪ : ﻗﺘﻠﻪ ﻭﻫﺮﺏ
ﻋﺎﺩﻝ : ﻭﺿﺢ ...
ﺍﺣﻤﺪ : ﻋﻼﺵ ﻣﺎﻫﺮﺑﺶ .. ﻃﻮﻝ ... ﻋﻼﺵ ﻳﻘﺘﻠﻪ ... ﺧﺼﻮﺻﺎ ﺍﻟﻠﻲ ﺍﺗﻀﺢ ﺍﻧﻪ ﺿﺮﺏ ﻉ ﻳﺪ ﺍﻟﻔﻬﺪ ﺑﺶ ﻳﻄﻴﺢ ﺳﻼﺡ ﺍﻟﻔﻬﺪ ﻣﻨﻪ ... ﻋﻼﺵ ﻣﺎﻫﺮﺑﺶ .. ﻋﻼﺵ ﻗﺘﻠﻪ ...
ﻋﺎﺩﻝ ﺿﻴﻖ ﻋﻴﻮﻧﻪ ﻭﻫﻮ ﻳﺸﺒﺢ ﻷﺣﻤﺪ ...
ﺍﺣﻤﺪ : ﺍﻟﻜﻮﺑﺮﺍ ﻣﻘﻨﻊ ﻭﻣﺎﺣﺪ ﻳﻌﺮﻑ ﻫﻮﻳﺘﻪ ﺇﻻ ﺍﻗﺮﺏ ﺍﻗﺮﺏ ﺍﻓﺮﺍﺩ ﺗﻨﻈﻴﻤﻪ ...
ﻋﺎﺩﻝ : ﺍﻟﻔﻬﺪ ﻋﺮﻑ ﻫﻮﻳﺘﻪ ..
ﺍﺣﻤﺪ : ﻗﺘﻠﻪ ...
ﻋﺎﺩﻝ ﻭﺃﺣﻤﺪ ﻗﻌﺪﻭﺍ ﻳﺸﺒﺤﻮﺍ ﻟﺒﻌﺾ ﻭﻫﻤﺎ ﺳﺎﻛﺘﻴﻦ .. ﺑﻌﺪﻳﻦ
ﻋﺎﺩﻝ : ﻋﺪﻭﻧﺎ ﻭﻋﺪﻭ ﺍﻟﺤﺴﻦ ﻗﺮﻳﺐ ﻋﻠﻴﻪ ﻫﻠﺒﻪ ..
ﺍﺣﻤﺪ : ﻫﻠﺒﻪ ... ﻭﺍﻟﻠﻲ ﺣﻜﺎﻫﻮﻟﻲ ﻋﻦ ﻗﺼﺔ ﺑﻮﻩ ﺧﻼﻧﻲ ﻧﺮﺑﻂ ﺍﻷﺣﺪﺍﺙ ﺑﺒﻌﺾ ..
ﻋﺎﺩﻝ ﻓﺘﺢ ﻋﻴﻮﻧﻪ ﻉ ﻭﺳﻌﻬﻢ ﻭﻫﻮ ﻳﺸﻮﻑ ﻷﺣﻤﺪ ﺑﺼﺪﻣﻪ ..
ﺍﺣﻤﺪ ﻏﻤﺾ ﻋﻴﻮﻧﻪ ﻭﻓﺘﺤﻬﻢ ﻭﻫﻮ ﻣﺎﻁ ﺷﻮﺍﺭﺑﻪ ﻟﺪﺍﺧﻞ ﺗﺄﻛﻴﺪﺍ ﻉ ﻓﺒﺎﻝ ﺍﻟﻌﻤﻴﺪ ..
ﻋﺎﺩﻝ : ﺍﺣﻤﺪ ... ﻳﻘﻌﺪ ﺑﻴﻨﺎﺗﻨﺎ ...
ﺍﺣﻤﺪ : ﻭﻫﺎﺩﺍ ﺍﻟﻠﻲ ﺑﻨﺪﻳﺮﻩ .. ﺣﻨﺨﺪﻡ ﻣﻦ ﺟﻬﺘﻲ ﺑﺴﺮﻳﻪ .. ﻭﺍﻧﺖ ﻛﺬﻟﻚ ..
ﻋﺎﺩﻝ : ﺗﻢ ... ﺑﺲ ﺧﻠﻴﻚ ﺣﺬﺭ ...
ﺍﺣﻤﺪ : ﺍﻛﻴﺪ ..
ﻋﺎﺩﻝ ﺗﻨﻬﺪ : ﺑﺲ ﺗﻮﺍ ﺍﻷﻫﻢ ﻫﻮ ﺑﺮﺍﺀﺓ ﺍﻟﺤﺴﻦ ...
ﺍﺣﻤﺪ : ﻣﻮﻗﻔﻪ ﺻﻌﺐ ﻫﻠﺒﻪ ﻛﻞ ﺷﻲ ﺿﺪﻩ ﻣﻊ ﺍﻷﺳﻒ ..
ﻋﺎﺩﻝ : ﻣﻠﻌﻮﺑﻪ ﺻﺢ .. ﻭﻣﺘﺨﻄﻄﻠﻬﺎ ﻛﻮﻳﺲ .. ﺍﻟﻔﻴﺪﻳﻮ ﺍﻧﻲ ﻣﺘﺄﻛﺪ ﻣﻠﻴﻮﻥ ﻓﻲ ﺍﻟﻤﻴﻪ ﺍﻧﻪ ﻣﻔﺒﺮﻙ .. ﺑﺲ ﺑﺄﺣﺘﺮﺍﻓﻴﻪ ﺗﺒﻲ ﻣﺤﺘﺮﻓﻴﻦ ﺑﺶ ﻳﻜﺸﻔﻮﺍ ﺍﻟﻔﺒﺮﻛﻪ ﻫﺎﺩﻱ ﻭﻟﻸﺳﻒ ﻣﺎﻋﻨﺪﻧﺎﺵ ﺣﺪ ﺑﺎﻹﻣﻜﺎﻧﻴﺎﺕ ﻫﺎﺩﻱ ..
ﺍﺣﻤﺪ : ﺍﻟﺒﺼﻤﺎﺕ ﺍﻟﻠﻲ ﻉ ﻣﺴﺪﺱ ﺍﻟﻠﻲ ﻣﺎﺗﺖ ﻧﻬﻠﻪ ﺑﺮﺻﺎﺻﻪ ﻣﻨﻪ ﻫﺬﺍ ﺩﻟﻴﻞ ﻛﺎﻓﻲ ﻳﺨﻠﻴﻪ ﻳﺎﺧﺪ ﺣﻜﻢ ﺍﻹﻋﺪﺍﻡ ...
ﻋﺎﺩﻝ : ﺍﻣﺘﻰ ﻣﺤﻜﻤﺘﻪ ...
ﺍﺣﻤﺪ : ﺍﺧﺮ ﺍﻷﺳﺒﻮﻉ ...
ﺗﻨﻬﺪ ﻋﺎﺩﻝ ﻭﺳﻜﺖ ...
***
ﻋﻠﻴﺎ ﻓﻲ ﺣﻮﺵ ﺃﻫﻠﻬﺎ ...
ﺟﻌﻔﺮ : ﺣﻨﻲ ﻋﺎﺭﻓﻴﻨﻪ ﻛﻮﻳﺲ ﻣﺴﺘﺤﻴﻞ ﻳﺎﺑﻨﺘﻲ ﻧﺼﺪﻗﻮﺍ ﻋﻠﻴﻪ ﺍﻟﻘﻄﺎﻑ ﺍﻟﻔﺎﺭﻍ ..
ﻋﻠﻴﺎ ﺑﺤﺰﻥ : ﻋﺎﺭﻓﺎﺗﻚ ﻳﺎﺑﺎﺑﺎ .. ﻋﺎﺭﻓﺘﻜﻢ ﻛﻠﻬﻢ ﻣﺴﺘﺤﻴﻞ ﺗﺼﺪﻗﻮﺍ ﻋﻠﻴﻪ ﺍﻟﻠﻲ ﻗﺎﻟﻮﻩ ﻋﻨﻪ .. ﻭﺍﻧﻲ ﻭﺍﻟﻠﻪ ﻣﺎﻫﻤﺘﻨﻲ ﺩﻭﺓ ﺍﻟﻨﺎﺱ .. ﺑﻌﺪ ﺍﻟﻠﻲ ﺻﺎﺭ ﻣﻌﺎﻱ .. ﻣﻌﺎﺵ ﻳﻔﺮﻕ ﻋﻨﺪﻱ ﺍﻟﻠﻲ ﻳﻘﻮﻟﻮﻩ ﻫﻤﻲ ﻛﻠﻪ ﻓﻲ ﺍﻟﺤﺴﻦ ﻛﻴﻒ ﺣﻴﻄﻠﻊ ﻣﻦ ﻫﺎﻟﻤﺼﻴﺒﻪ ﻫﺎﺩﻱ ..
ﺟﻌﻔﺮ : ﺧﻠﻴﻚ ﻭﺍﺛﻘﻪ ﺑﺮﺑﻚ ﻫﻮ ﺣﻂ ﺭﺍﺟﻠﻚ ﻓﻲ ﺍﺑﺘﻼﺀ ﻳﺨﺘﺒﺮ ﻓﻲ ﺻﺒﺮﻩ ﻭﺇﻳﻤﺎﻧﻪ ﻭﺍﺑﺘﻼﺀ ﻟﻴﻚ ﺣﺘﻰ ﺍﻧﺘﻲ ﻳﺨﺘﺒﺮ ﻓﻲ ﺻﺒﺮﻙ ﻭﺇﻳﻤﺎﻧﻚ ... ﻭﺍﻛﻴﺪ ﻓﻲ ﺍﻟﻠﻲ ﺻﺎﺭ ﺧﻴﺮﻩ ...
ﻋﻠﻴﺎ ﺗﺸﺒﺤﻠﻪ ﺑﻴﺄﺱ ...
ﺟﻌﻔﺮ : ﺳﻴﺪﻧﺎ ﻳﻮﺳﻒ ﺧﺶ ﺍﻟﺴﺠﻦ ﻭﻗﻌﺪ ﻓﻴﻪ ﺳﻨﻴﻦ ... ﻭﻟﺤﻘﻪ ﻛﻼﻡ ﻓﻲ ﻋﺮﺿﻪ ... ﻭﻣﻊ ﻫﺬﺍ ﺳﺠﻨﻪ ﻛﺎﻥ ﺧﻴﺮﻩ ﻟﻴﻪ ﻫﻮ ﺍﻟﻠﻲ ﻭﺻﻠﻪ ﻟﻤﻠﻚ ﻣﺼﺮ ..
ﻋﻠﻴﺎ ﻧﻈﺮﺗﻬﺎ ﺗﻐﻴﺮﺕ ﻟﻨﻈﺮﻩ ﻣﺘﺄﻣﻠﻪ ..
ﺟﻌﻔﺮ : ﻓﻲ ﻛﻞ ﺷﻲ ﻳﺼﻴﺮ ﻣﻌﺎﻧﺎ ﻧﺪﻭﺭﻭﺍ ﻓﻴﻪ ﻉ ﺍﻟﺨﻴﺮ ﺑﻨﺘﻲ ... ﻭﻣﺎﺗﻨﺴﻴﺶ ﺍﻟﻠﻲ ﺻﺎﺭ ﻣﻌﺎﻙ .
ﻋﻠﻴﺎ ﺍﺑﺘﺴﻤﺖ ﻭﻗﺮﺑﺖ ﻣﻦ ﺑﻮﻫﺎ ﻭﺑﺎﺳﺖ ﺍﻳﺪﻩ : ﺭﺑﻲ ﻣﺎﻳﺤﺮﻣﻨﻲ ﻣﻨﻚ ﻳﺎﺍﺍﺭﺏ ..
ﺟﺘﻬﻢ ﺯﻳﻨﺐ ﺍﺑﺘﺴﻤﺖ : ﻫﻴﺎ ﻧﻮﺿﻮﺍ ﺍﻟﻐﺪﻱ ﻭﺍﺗﻲ ....
ﻧﺎﺽ ﺟﻌﻔﺮ ﻭﻣﻌﺎﻩ ﺑﻨﺘﻪ ﻭﺧﺸﻮﺍ ﺩﺍﺧﻞ ...
.....
🍃 ﻣﺮﺕ ﺍﻷﻳﺎﻡ ﻭﺟﻲ ﻳﻮﻡ ﻣﺤﻜﻤﺔ ﺍﻟﺤﺴﻦ ...
ﻛﺎﻥ ﻣﻮﺟﻮﺩ ... ﺍﺣﻤﺪ ... ﺳﺮﻣﺪ ... ﻋﺎﺑﺪ ... ﺣﺴﺎﻥ ... ﻋﻠﻲ ...
ﻛﺎﻧﻮﺍ ﻭﺍﻗﻔﻴﻦ ﻳﺴﺘﻨﻮﺍ ﺍﻣﺘﻰ ﻳﺠﻴﺒﻮﻩ ﻭﺗﺒﺪﺍ ﺍﻟﺠﻠﺴﻪ ..
ﺍﺣﻤﺪ ﻋﻴﻨﻪ ﻛﺎﻧﺖ ﻉ ﺳﺮﻣﺪ ﻭﻫﻮ ﻭﺍﻗﻒ ﻳﺘﻜﻠﻢ ﻣﻊ ﺧﻮﺗﻪ ... ﺣﺲ ﺍﻥ ﻧﻘﺎﺷﻬﻢ ﻣﺎﻛﺎﻧﺶ ﻃﺒﻴﻌﻲ ﻭﻛﺄﻥ ﻋﺎﺑﺪ ﻭﺳﺮﻣﺪ ﻧﻘﺎﺷﻬﻢ ﺣﺎﺩ .. ﺑﻌﺪﻳﻦ ﻋﺎﺑﺪ ﻣﺸﻲ ﻟﻮﻻﺩﻩ .. ﻭﺳﺮﻣﺪ ﻗﻌﺪ ﻳﻜﻠﻢ ﻓﻲ ﻣﺤﻤﺪ ...
ﺍﺣﻤﺪ " ﻣﻦ ﺍﻭﻝ ﻳﻮﻡ ﺭﻳﺘﻚ ﻓﻴﻪ ﻋﻦ ﻗﺮﺏ ﻣﺎ ﺍﺭﺗﺤﺘﻠﻜﺶ ﻓﻲ ﺷﻲ ﻛﺒﻴﺮ ﻭﺭﺍﻙ ﻣﺶ ﺍﻧﺖ ﺑﺲ ﺣﺘﻰ ﺧﻮﺗﻚ ..." ﻭﻗﻒ ﻉ ﺣﻴﻠﻪ ... ﻟﻤﺎ ﺷﺎﻑ ﺍﻟﺤﺴﻦ ﻣﻦ ﺑﻌﻴﺪ ﻛﻴﻒ ﺧﺎﺵ ﻭﻣﻜﻠﺒﺶ ﻭﺷﺎﺩﻩ ﻣﻦ ﺫﺭﺍﻋﻪ ﺍﻟﻴﻤﻴﻦ ﺷﺮﻃﻲ ﻭﻣﻦ ﻳﺪﻩ ﺍﻟﻴﺴﺎﺭ ﺷﺮﻃﻲ ... ﻛﺎﻧﺖ ﻟﺤﻴﺘﻪ ﻛﺎﺑﺮﻩ ﺷﻮﻱ ﺑﺲ ﻛﺎﻥ ﻣﻨﻈﺮﻩ ﻣﻬﻨﺪﻡ ﻭﻣﺴﺎﻭﻱ .. ﺑﻨﻔﺲ ﺍﻟﻬﻴﺒﻪ ﻭﺍﻟﺮﺍﺱ ﺍﻟﻤﺮﻓﻮﻉ ﻣﺎﺗﻐﻴﺮ ﺷﻲ ... ﻳﻤﺸﻲ ﻓﻲ ﺍﻟﻤﻤﺮ ﻣﺸﻴﺘﻪ ﺍﻟﻮﺍﺛﻘﻪ ﻭﻻﻛﺄﻧﻪ ﻣﺴﺠﻮﻥ ﻭﻣﻤﻜﻦ ﻳﺤﻜﻢ ﻋﻠﻴﻪ ﺑﺎﻹﻋﺪﺍﻡ ... ﺍﻟﻤﻮﺟﻮﺩﻳﻦ ﻓﻲ ﺍﻟﻤﺤﻜﻤﻪ ﻛﻠﻬﻢ ﻛﺎﻧﻮﺍ ﻳﺸﺒﺤﻮﻟﻪ ...
ﺧﻄﻢ ﺣﺪﺍ ﺑﻮﻩ ﻭﺧﻮﺗﻪ ﺷﺎﻓﻠﻬﻢ ﻉ ﺟﻨﺐ ﻭﺍﺑﺘﺴﻢ .. ﻏﻴﺮ ﻋﻴﻮﻧﻪ ﻟﻌﻤﺎﻣﻪ ﺍﺧﺘﻔﺖ ﺍﺑﺘﺴﺎﻣﺘﻪ ﻭﺣﻴﺎﻫﻢ ﺑﺮﺍﺳﻪ ... ﻏﻴﺮ ﻋﻴﻮﻧﻪ ﻷﺣﻤﺪ ... ﻏﻤﺰ ﺑﻌﻴﻨﻪ .. ﺍﺣﻤﺪ ﺿﺤﻚ ... ﻭﺑﻌﺪﻳﻦ ﺷﺒﺢ ﺍﻟﻘﺪﺍﻡ ﻭﻛﻤﻠﻮﺍ ﺑﻴﻪ ﻟﻠﻘﺎﻋﻪ ...
ﻣﺤﻤﺪ : ﻫﺬﺍ ﺷﻜﻞ ﻭﺍﺣﺪ ﺑﻴﺤﻜﻤﻮﺍ ﻋﻠﻴﻪ ﺑﺎﻷﻋﺪﺍﻡ !!
ﺳﺮﻣﺪ ﺍﺑﺘﺴﻢ ﺗﻬﻜﻤﺎ : ﺍﻧﻲ ﺍﻟﻠﻲ ﻧﻌﺮﻓﻪ ﻳﻀﻌﻒ ﺷﻮﻳﻪ ﻭﻳﺮﺟﻊ ﻳﻘﻮﻯ ﻭﻟﻮ ﺍﻧﻜﺴﺮ ﻣﻦ ﺩﺍﺧﻞ ﻣﺴﺘﺤﻴﻞ ﻳﺨﻠﻲ ﺣﺪ ﻳﻼﺣﻆ ﻛﺴﺮﺗﻪ ... ﻟﻜﻦ ﻛﻠﻪ ﻣﺎﻓﻴﺶ ﻣﻨﻪ ﻓﺎﻳﺪﻩ ﻣﺮﺑﻮﻁ ﻋﻠﻴﻪ ﺣﺒﻞ ﺍﻟﻘﻀﻴﻪ ﺑﺄﺣﻜﺎﻡ ﺻﻌﺐ ﻳﻔﻠﺖ ... ﻭﺍﺫﻛﺮ ﻧﻬﺎﺭ ﻟﻤﺎ ﻟﻒ ﻋﻠﻴﻪ ﺍﻟﻄﻮﺑﻮ ﻭﺍﺑﺘﺴﻢ ﺑﻐﺮﻭﺭ ...
ﺷﻮﻳﻪ ﻭﺧﺸﻮﺍ ... ﻭﺑﺪﺕ ﺍﻟﺠﻠﺴﻪ ... ﺳﻤﻊ ﺍﻟﻘﺎﺿﻲ ﻣﻦ ﻭﻛﻴﻞ ﺍﻟﻨﻴﺎﺑﻪ ﺍﻟﻠﻲ ﻛﻼﻣﻪ ﻛﻠﻪ ﻛﺎﻥ ﺿﺪ ﺍﻟﺤﺴﻦ ﻣﺶ ﻹﻧﻪ ﻗﺎﺻﺪ ﻫﺎﻟﺸﻲ ﺑﺲ ﻫﺬﺍ ﺍﻟﻤﻮﺟﻮﺩ ﻗﺪﺍﻣﻪ ﻛﻞ ﺷﻲ ﺿﺪ ﺍﻟﺤﺴﻦ .. ﺑﻌﺪﻳﻦ ﺗﻜﻠﻢ ﻣﺤﺎﻣﻲ ﺟﺎﺑﻪ ﺳﺮﻣﺪ .. ﺑﺲ ﺩﻓﺎﻋﻪ ﻛﺎﻥ ﺿﻌﻴﻒ ﻭﻛﺈﻧﻪ ﻣﺎﺧﺪﻣﺶ ﻉ ﺍﻟﻘﻀﻴﻪ ﺍﺻﻼ ﻭﺍﺣﻤﺪ ﺭﻛﺰ ﻫﻠﺒﻪ ..
ﺍﻟﻘﺎﺿﻲ ﺷﺒﺤﻠﻪ : ﺍﻟﺤﺴﻦ ﺍﻟﺼﺎﺩﻕ ﻋﻨﺪﻙ ﺷﻲ ﺗﺒﻲ ﺍﺿﻴﻔﻪ ..
ﺍﻟﺤﺴﻦ ﺍﺑﺘﺴﻢ : ﺑﻨﻘﻮﻝ ﺣﺎﺟﻪ ﻭﺣﺪﻩ ﺭﺳﺎﻟﻪ ﻭﻧﺘﻤﻨﻰ ﺍﻧﻬﺎ ﺗﻮﺻﻞ .. ﺍﻟﻠﻲ ﺩﺍﺭ ﻓﻴﺎ ﻫﻜﻲ ﺧﺪﻣﻨﻲ ﺧﺪﻣﺔ ﻋﻤﺮ ﺑﺪﻭﻥ ﻣﺎﻳﻘﺼﺪ ... ﻫﺬﺍ ﻛﻞ ﺷﻲ ...
ﺳﺮﻣﺪ ﺿﻴﻖ ﻋﻴﻮﻧﻪ ﺑﻌﺪﻡ ﻓﻬﻢ ...
ﺍﻟﻘﺎﺿﻲ ﻫﺰ ﺭﺍﺳﻪ ﺑﺈﻳﺠﺎﺏ ... ﻃﻠﻊ ﻫﻮ ﻭﺍﻟﻤﺴﺘﺸﺎﺭﻳﻦ ﻳﺘﺸﺎﻭﺭﻭﺍ ﺷﻮﻳﻪ ... ﺍﻟﺤﺴﻦ ﻛﺎﻥ ﻳﺸﺒﺢ ﻷﺣﻤﺪ ﻭﺍﺣﻤﺪ ﻳﺸﺒﺤﻠﻪ ﻭﻛﺄﻧﻪ ﻳﺒﻲ ﻳﻘﻮﻟﻪ ﺷﻲ .. ﺑﻌﺪﻳﻦ ﻏﻴﺮ ﻋﻴﻮﻧﻪ .. ﺟﻬﺔ ﺑﻮﻩ ﻭﺧﻮﺗﻪ ﻭﻋﻤﺎﻣﻪ ﺍﻟﻠﻲ ﻛﺎﻧﻮﺍ ﻳﺸﺒﺤﻮﻟﻪ ﺍﺑﺘﺴﻢ .. ﻭﻫﻤﺎ ﺍﺑﺘﺴﻤﻮﺍ ﻣﻨﻬﻢ ﺑﺄﻟﻢ ﻭﻣﻨﻬﻢ ﺑﺰﻳﻒ ..
ﺧﺶ ﺍﻟﻘﺎﺿﻲ ﻭﻣﻌﺎﻩ ﺍﻟﻤﺴﺘﺸﺎﺭﻳﻦ ...
ﺍﻟﻘﺎﺿﻲ ﺑﻌﺪ ﻗﺎﻝ ﻣﻘﺪﻣﻪ ﻃﻮﻳﻠﻪ ﻋﺮﻳﻀﻪ ﺧﺶ ﻓﻲ ﺍﻟﻨﻄﻖ ﺑﺎﻟﺤﻜﻢ ...
ﺍﻟﻘﺎﺿﻲ : ﻭﻧﻈﺮﺍ ﺍﻥ ﻛﻞ ﺍﻷﺩﻟﻪ ﺗﺄﻛﺪ ﺍﺭﺗﻜﺎﺏ ﺍﻟﻤﺘﻬﻢ ﻟﺠﺮﻳﻤﺘﻪ .. ﺣﻜﻤﻨﺎ ﻋﻠﻴﻪ ﺍﻟﺤﺴﻦ ﻋﺎﺑﺪ ﻋﻠﻲ ﺍﻟﺼﺎﺩﻕ .. ﺑﺎﻹﻋﺪﺍﻡ .. ﻭﺍﻟﺤﻜﻢ ﻗﺎﺑﻞ ﻟﻠﻨﻘﺾ ... ﺭﻓﻌﺖ ﺍﻟﺠﻠﺴﻪ ..
ﺍﻟﺤﺴﻦ ﺭﻓﻊ ﺭﺍﺳﻪ ﻓﻮﻕ ﻭﺍﺑﺘﺴﻢ ﺑﺄﻟﻢ ﻭﺑﻮﻩ ﻭﺧﻮﺗﻪ ﻗﺮﻳﺐ ﻣﺎﺗﻮﺍ ﻟﻤﺎ ﺳﻤﻌﻮﺍ ﺍﻟﺤﻜﻢ ...
ﺍﺣﻤﺪ ﻛﺎﻥ ﻣﺘﻮﻗﻊ " ﻭﺍﻟﻠﻪ ﻣﺎﻣﺨﻠﻴﻚ .."..
ﺳﺮﻣﺪ ﻛﺎﻧﺖ ﻣﻼﻣﺢ ﻭﺟﻬﻪ ﺑﺎﺭﺩﻩ ﻭﻣﺤﻤﺪ ﻛﺬﻟﻚ ... ﺧﺪﻭﺍ ﺍﻟﺤﺴﻦ ﻭﻃﻠﻌﻮﻩ ﻣﻦ ﺑﺎﺏ .. ﻭﺍﻟﺤﺎﺿﺮﻳﻦ ﻃﻠﻌﻮﺍ ﻣﻦ ﺑﺎﺏ ...
ﻃﻠﻌﻮﺍ ﻋﻴﻠﺘﻪ ﺑﺮﺍ ﺍﻟﻤﺤﻜﻤﻪ ﻭﻣﻌﺎﻫﻢ ﺍﺣﻤﺪ ﻭﻛﺎﻧﺖ ﻓﻴﻪ ﺻﺤﺎﻓﻪ ... ﻭﻗﻨﻮﺍﺕ ... ﺷﻮﻳﻪ ﻭﻃﻠﻌﻮﺍ ﺍﻟﺤﺴﻦ ﻭﺑﺪﺕ ﺍﻟﻘﻨﻮﺍﺕ ﺗﺼﻮﺭ ... ﻭﻣﺮﺍﺳﻠﻴﻦ ﻳﺘﻜﻠﻤﻮﺍ ..
ﻣﺮﺍﺳﻠﻪ : ﻧﺸﺎﻫﺪ ﺍﻵﻥ ﺧﺮﻭﺝ ﺍﻟﺤﺴﻦ ﺍﻟﺼﺎﺩﻕ ... ﺍﻟﻤﺘﻬﻢ ﺑﻘﺘﻞ ﺍﻟﻨﺎﺋﺒﻪ ﻧﻬﻠﻪ ﺍﻟﺼﻴﺪ ... ﻭﻳﺘﻢ ﻧﻘﻠﻪ ﺣﺎﻟﻴﺎ ﺇﻟﻰ ﺳﺠﻦ ﻋﻴﻦ ﺯﺍﺭﺓ ...
ﺭﻛﺒﻮﺍ ﺍﻟﺤﺴﻦ ﻓﻲ ﺍﻟﺴﻴﺎﺭﺓ ﺍﻟﻠﻲ ﺣﺘﻨﻘﻠﻪ ﻟﻠﺴﺠﻦ ... ﻭﻣﺸﺖ ﺍﻟﺴﻴﺎﺭﺓ ..
ﺷﺒﺤﺖ ﺍﻟﻤﺮﺍﺳﻠﻪ ﻟﻠﻜﺎﻣﻴﺮﺍ : ﻫﺬﺍ ﻭﻗﺪ ﺣﻜﻢ ﻉ ﺍﻟﺤﺴﻦ ﺍﻟﺼﺎﺩﻕ ﺑﺎﻹﻋﺪﺍﻡ ... ﻣﻦ ﺍﻣﺎﻡ ﻣﺤﻜﻤﻪ ******* ﺍﻣﺎﻝ ﺍﻟﻬﺎﺩﻱ ... ﺍﻝ ***** ﻃﺮﺍﺑﻠﺲ ...
ﻋﻠﻴﺎ ﻛﺎﻧﺖ ﺗﺘﻔﺮﺝ ﻉ ﺍﻟﺘﻠﻔﺰﻳﻮﻥ ﻗﻌﺪﺕ ﺗﺮﺟﻒ ﻣﻊ ﺑﻌﻀﻬﺎ ﻳﺪﻭﺏ ﻟﻤﺤﺖ ﺍﻟﺤﺴﻦ ﻭﻫﻮﻃﺎﻟﻊ ﻭﻫﻤﺎ ﻣﺮﻛﺒﻴﻨﻪ ... ﺣﺎﻭﻟﺖ ﺗﺴﺘﺠﻤﻊ ﻧﻔﺴﻬﺎ ﻭﻧﺎﺿﺖ ﻭﻫﻲ ﺣﺎﺳﻪ ﺑﺎﻟﻤﻮﺕ ﻳﺘﺴﻠﻞ ﻟﺠﺴﺪﻫﺎ ...
ﺍﻧﻌﺎﻡ ﺑﺮﻧﻴﻪ ﻭﺳﺎﺭﻩ ﻭﻫﺎﻟﻪ ﻭﺭﻳﺤﺎﻧﻪ ﺍﻟﻠﻲ ﻛﺎﻧﻮﺍ ﻳﺒﻜﻮﺍ ﺷﺒﺤﻠﻮﻫﺎ ﻛﻴﻒ ﻧﺎﺿﺖ ﺑﺪﻭﻥ ﻣﺎﺗﻘﻮﻝ ﺣﺮﻑ .. ﻣﺎﻟﺤﻘﺘﺶ ﺃﺻﻼ ﺗﻤﺸﻲ ﺧﻄﻮﺗﻴﻦ ﺇﻻ ﻭﻃﺎﺣﺖ ﻣﻦ ﻃﻮﻟﻬﺎ ...
....
ﺭﺍﻗﺪﻩ ﻉ ﺳﺮﻳﺮ ﺑﺮﻧﻴﻪ ... ﺑﻌﺪ ﻓﺎﻗﺖ ﻭﺑﻜﺖ ﻟﻴﻦ ﻃﺎﺏ ﻛﺒﺪﻫﺎ .. ﻭﺭﻗﺪﺕ ﻭﺩﻣﻮﻋﻬﺎ ﻉ ﺧﺪﻫﺎ ...
ﺑﺮﻧﻴﻪ ﺑﺼﻮﺕ ﻣﺒﺤﻮﺡ : ﻫﻴﺎ .. ﺍﻃﻠﻌﻮﺍ ﺧﻠﻮﻫﺎ ﺗﺮﻗﺪ ..
ﻃﻠﻌﻮﺍ ﻭﻃﻠﻌﺖ ﻫﻴﺎ ﻭﺭﺍﻫﻢ ﻭﺳﻜﺮﺕ ﺍﻟﺒﺎﺏ ...
ﺍﻧﻌﺎﻡ : ﻣﺴﻜﻴﻨﻪ ﻣﺎﻟﺤﻘﺘﺶ ﺗﻔﺮﺡ ﺑﺤﻤﻠﻬﺎ ... ﻭﻻﻫﻮ ﻣﺴﻜﻴﻦ ﻭﻟﻴﺪ ﺧﻮﻱ ﻳﻄﻠﻊ ﻣﻦ ﺣﺎﺟﻪ ﻳﺨﺶ ﻓﻲ ﺣﺎﺟﻪ ..
ﺳﺎﺭﺓ : ﺍﻟﻠﻪ ﻳﻨﺘﻘﻢ ﻣﻦ ﺍﻟﻠﻲ ﻛﺎﻥ ﺍﻟﺴﺒﺐ ..
ﺭﻳﺤﺎﻧﻪ ﺍﻟﻠﻲ ﻛﺎﻧﺖ ﺳﺮﺣﺎﻧﻪ ﺑﺘﻔﻜﻴﺮﻫﺎ " ﻣﻌﺎﺵ ﻧﻘﺪﺭ ﻧﺴﻜﺖ ﺃﻛﺜﺮ ﻣﻦ ﻫﻜﻲ .. ﻻﺯﻡ ﻧﺪﻳﺮ ﺷﻲ ﻻﺯﻡ ...."
... ﻳﺘﺒﻊ
