『قٌصص ﺑٱرۅد』

⍅نـدم⍆

‏﴿ وبشــرّ الـصّابريـن ﴾
‏هي أكبر أمل في إنتظار مانُريد
‏آللهم بشرنآ بتحقيق مآ صبرنآ لاجله ..♥️

تربينا كلنه بـ بيت جدي ... اني واخوتي و جهال عمي ويانه... بيت جدي صغير بس چان شايلنه كلنه... بضحكنه بقهرنه بلعبنه بعركاتنه بأكلنه بشربنه شايلنه... صح چان الوضع تعبان بس چِنه نضحك و نحس بطعم الضحك ... من چان يصير موقف رغم الهموم الي شايليها اهلنه بس چانو يضحكون من كل گلبهم ...

مرات چِنه نلتم كُلنا نگعد بالصالة... كلنه نتابع فلم السهرة لو المسلسلة ..

احنا الجهال چِنه نگعد يم الرجلينات ونتابع وياهم الطالع بالتلفزيون ... بهل الوقت تحديداً چان ممنوع الضحك و ممنوع الحچي لان الكبار مندمجين وي الاحداث ...

احنا الجهال مرات تلزمنه الضحكة و اذا نضحك ننضرب هههههههه .. و اذا واحد بينه تحصره ضحكة يركض بره بالممر الي يطلع على الباب الوره يضحك ..

و مرات چِنه نباوع عليهم اذا يضحكون وي موقف بالمسلسله كلنه نضحك ضحكة قوية ع اساس وياهم متابعين المسلسله بس چذب والله .. احنى چِنه نضحك هيچ لواگة على گولة عمي ...

چانت سوالفنا بسيطة لا انترنت لا ستلايت لا موبايلات ..

احلى شغلة چِنه متونسين بيها هي المرجوحة البره .. مرجوحة مسويها بـ النبگة مال الحديقة .. اكو نبگة چبيرة بـ الحديقة جدي الله يرحمة چان رابط بيها حبل ثخين .. حبل مال شر هدوم بس ثخين مو مثل حبال هـ الايام بس ينجر شوية ينگطع ..

لا ..
حبل من هذا الي يشبه القيطان مال الاحذية الرياضية (مكرم القارئ) .. بس ثخين كلش و قوي ..
رابطة بالنبگة البرى و مخلي مخدة عليه و كلنه الجهال چِنه نلعب هناك .. مو بس احنى..
حتى امي چانت مرات تصعد ونسوان عمامي هم وحتى عمامي ...
هاي چانت احلى لعبة عدنه..

حياة بسيطة و الـ گلوب نظيفة و كلنه گلب على گلب ... مچانت اكو مشاكل بين نسوان عمامي ولا حتى عمامي وابوية .. كلنه نلتم بوقت العشا نتعشى سويه..
بس الريوگ والغده لا ..
لان اوقات الشغل و اوقات الدوام مترهم ..
بس العشه كلنه موجودين ..

چنت من بين جهال عمامي اقرب شي على گلبي بنت عمي الاصغر مني بأربع سنين ... چنت اكثر وحدة ادافع عنها و اللعب وياها .. يعني اذا واحد بچاها حتى لو چبير واعرف المعركة بيني و بينه خسرانة و شبه محسومة لصالحة .. هم افوت بيها و اضربه و اشبع كتل و بعدين اروح ابچي يم جدي ..

جدي چان اكثر ثنين يحچيلنه قصص اليا والها .. چان يكعدنا يم راسه ويلف المخدة جوه راسة ويطفي الراديو مالته الاسود و يگعد يحچيلنه قصص ..

و كل شوية نگمز نگله زين ليش هيچ .. زين هو سبع .. زين هي حلوة .. يمكن القصة من خمسين سطر بس اني وياها نسألة 5,000 سؤال وهو خطية مچان يتعاجز و يجاوب ...