『قٌصص ﺑٱرۅد』

⍅سنين العمر محتاجلها صفنه⍆

بوقتها تأخرو اكثر من طالب على موعد السفرة و بقى السايق و الاساتذة واگفين جوه يم باب السيارة .. صار حچي بيناتهم اذا ما جوي بعد ربع ساعة ينطلقون لان وراهم طريق والسفرة مو قريبة السفرة للحبانية ...

وجوي اخر كم طالب بس ثنين اصلاً ما جوي و انطلقنا ... طلع بينا الباص و من عده هالباص اكو 2 بعد ... اغاني و الكل يصفگ و الكل يضحك .. اني الوحيدة الي چنت اخجل من كل شي و حتى السفرة مچنت ناوية اجي بيها لو مو صديقتي تلح عليه ..

طلعنه و لحد هسة اتذكر صوت الطلاب و الاغاني البسيطة مالتهم و شعر البنات شلون يتطاير بالهوه ... لان الشبابيك مفتوحة مال الباص و الدنيا چاانت صيف ..

الشباب صح بيهم رزنين و مؤدبين بس هم بيهم شوية طربگة ... يعني بيهم الي يرگص و بيهم الي يهز چتف .. وصلنا للگراج المقابيل الاستعلامات مال الدخول و الاساتذة نزلو فهمومهم و طبعا قبلها منطيهم خبر ... فوتونا و بدينا ننزل الغراض ..

الغراض چانت كومة .... بس البنات انظم من الشباب بهواي .. يعني الشباب اقوى شي يجيبوه جنطه ع الظهر و بيها جدر صغير .. لو لفات وببسي.. بس احنى البنات جايبين اشكال والوان اكلات .. الي مركبة دولمة والي مركبة برياني و الي مسوية كبه و الي والي والي ..ومن عده هالاشياء جايبين جراجف للگعدة .. نزلنا الغراض و گمنا نتمشى من يم ملعب التنس الي بالبداية و دخلنا بنص المدينة السياحية .. اول مرة اليه اروح سفرة بعيدة بذاك الوكت ..

گمت اباع مثل المخبلة ع البيوت المتشابهه و على الفندق الچبير ... وبنفس الوقت اسمع صوت الاعلان بالسماعات الكبار الي موزعة بكل مكان ..

چان الحچي كله على مطعم الخيمة ماعرف مسرح الخيمة هيچ شي اتذكر .. صار عندي فضول اشوفه للخيمة الي يحچي عليها و رحت اشوفها بيومها وياريتني ما رحت..

المهم ..
كعدنا اني و البنات و چانت صديقتنا سهاد جايبه وياها ريشة ... گمنا نلعب و گلتلهم متسمعون هذا المذيع من اول مفتنا للحبانية لحد هسة صوته يلعلع الخيمة و الخيمة امشي نروح نشوفه؟

گالو امشي ... عفنا الغراض يم الاساتذة ورحنى نتمشى ... وصلنا لهناك و لحگونا اربع شباب بس مو من كليتنا .. لان طلابنا كلهم نعرفهم ..

بوقتها چان اكو غير سفرات غيرنا .. الي لحگونا شكلهم مو مال كلية مبينين اعدادية هيچ شي ... واحد بيهم كلش ميستحي گام يحچي كلام كلش ثگيل ...

وحدة من البنات شگد گلتلها عوفي عوفي خلي يولي .. متحملت واندارت عليه غلطت عليه ورزلته ..
بهل الحچي هو هم گام يغلط و ما شفنا الا واحد طار بالهوه و شمر نفسه عليه.. الولد اسمه علاء مو من قسمنا من غير قسم ..

طار عليه وضربه و وگعو ثنينهم بالگاع و الشباب الي وي الولد السخيف كلهم گامو يضربون بعلاء ... الدم گام يطلع من كل مكان من وجهَ واحنى نصيح ...