『قٌصص ﺑٱرۅد』

⍅حوض السمچ⍆

_

رحنى للسوگ و تفاهمنه ويا ابو الاحواض شلون نريد شكله للحوض مال سمچ و ابوية بوقتها طلب منه يسويلنه قاعدة حديد و جواها تتخله سندانه چان اسعد يوم بحياتي لأن اني اكثر واحد بأخوتي چنت يوميا اكرر طلبي لأبوية و أمي ..

چنت يوميا اگللهم اريد سمچ بالبيت ... و بقيت أحسب يوم يوم و ساعة ساعة شوكت نروح نستلم الحوض .. چنت اني الچبير بأخوتي عمري تسع سنوات و اختي الاصغر مني سبعة و اخر واحد اخونه عمره خمس سنوات ..

و اجه اليوم الي چنت منتظره رحت وي ابوية استلمنا الحوض و خلينا على الكشن الوره (لان گزاز) حتى مينكسر و القاعدة الحديد خليناها بالصندوگ.. و اخذنا السمچ بچياسه و جينا للبيت لگيت اختي و اخوية ينتظرونه بالگراج ...

گمت اضحك من شفتهم وهمه هم يضحكون و فرحانين بالحوض و طببنه الحوض للصالة و أمي جرت صوندة ترسته مي و بدينا نخلي بي الغراض و الحصو و شكلنا الماطور مالته هم .. مكان الحوض صار بصف باب الصالة الداخليه الي تطلع ع الهول...

و انترس الحوض مي و رتبناه و خلينا السمچ بي چِنه اني واخوتي نبقى مقابيل الحوض يومياً واگفين نباوع ع السمچ شلون يتحرك و مرات ندگ بأصابيعنه الصغار ع الحوض حتى يتحركون السمچات...

چان هواي سمچ بالحوض بس كلهم صغار و الوان ك
گمت اسميهم اسامي و اختي هم تسميهم و من چِنه نروح للمدرسة نحچي لأصدقائنه على السمچ هواي چان عدهم سمچ و هم يحچولنه...

تعلقنه هواي بهل الحوض و بالسمچ الي بداخله.. و بيوم من الايام ابوية تعارك وي أمي و طبو للصالة و سدو الباب عليهم اني و اختي نزلنه راسنه يم الفتحه مال باب الصالة نتصنت.. أي اعترف نتصنت لأن چِنه جهال و عدنا فضول نعرف شبيهم امنا و ابونا شنو هالصياح و ليش؟

كل العركة چانت علمود خالتنه .. منعرف بالضبط شنو الموضوع بس امي چانت تحلف على فد شي و ابونه ممصدگ و تعصب كلش الى درجة گمنا نسمع شغلات تتكسر بالصالة خفنه اني واختي و اختي انهزمت صعدت فوگ لغرفتها بس اني بقيت منزل راسي واسمع ..

الى ان صارت طبة قوية و صوت مي الحوض صار بالگاع و طلع من جوه الباب مال الصالة الي اني منزل راسي و اسمع صوتهم منها .. و المي من تطشر تطشر وياه السمچ و من جوه الباب طلعو سمچتين..

گمت ابچي اني بصوت عالي و ردت افتح باب الصالة چان ابوية قافلها .. گمت ادگ الباب قوي و اصيح السمچ ماتتت من خوفي على السمچ شلته بيدي و حطيتهم بگلاص ترسته مي من المطبخ بس سمچتين و رجعت ادگ الباب چان يطلع ابوية بس شكله مو ذاك ابوية الحنين الي يحبنا شكله واحد ثاني عيونه تخوف ..

چان يگلي شتريد؟ بصوت عالي كلش رفعت الگلاص بوجهه داگله السمچات چان ياخذ الگلاص مني و ضربه بالگاع مال الصالة و دفرني كل قوته و رجع فات للصالة ..