『قٌصص ﺑٱرۅد』

⍅حالات⍆

_

ابوية اشترالنه بيت صغير وره ما وزعو الورث عمامي و هو اخذ حصته ... قبلها چِنه گاعدين ايجار البيت هذا چان بالنسبة النه قصر رتبناه و سويناه يخبل انتقلنا بي اول يوم الجوارين جابولنه غداء و عرفونا عن نفسهم و امي هم عرفتهم علينه... معرفة نسوان يعني ...

بيومها عرفت هذولة الي بصفنه ع اليمين بيت ام حيدر .. و الي ع اليسار بيت ام حسام ... و الركن بيت ام قصي ... و عرفت زينب بت ام حسام هي من عمري هم ١٨ سنة تقريباً ... و هبة بنت خالة ام حيدر اصغر مني ...

چنت مكيفة بكل شي بس اكثر شي مكيفة بي هي ماما و فرحتها و بابا و فرحته بحياتي ما شفتهم هيچ مرتاحين و مكيفين و الضحكة مرسومة على وجوهم ...

من گعدنا بالبيت بابا گالي تعالي نغسل السطح لان البيت كله كمل تقريبا و رتبنا الاثاث كل شي بمكانه و صعدنا المغربية اني و بابا نغسل السطح و ماما هم صعدت ويانه ...

احنى عائلة من اربع نفرات بس ماما و بابا و اني و حمودي اخوية الصغيروني .. و طبعا بيومها نام من وكت لان تعب من التحويله ... بالسطح بقيت اباوع ع البيوت المقابيلنه ... شفت الشباك مال الصالة المقابيل بيتنا مفتوحه برداتها و الانارة مشتغلة و چان المشهد كلش واضح ...

شفت ولد ديمسح الكاع ... المشهد چان غريب بالنسبة حتى صحت ماما گلتلها شوفي هالولد شديسوي .. امي گالت هذا ولد لو بنية .. گلتلها ماما عفية مدتشوفي ولد فدوه اروحلچ ...

و طبعا المشهد چان غريب لان الولد عنده لحيه و ديمسح بطريقة البنات يعني منزل ايديناته ع الگاع و بالوصله مال مسح يمسح يمين يسار ... امي گالت منعرف بنتي شنو ظرفه هالولد و گالت بعد لا تباعين عيب نباع على بيوت الناس ...

اني رجعت اغسل وي بابا السطح بس بقيت كل ما اتقرب من الحايط اباوع بسرعة عليه و شفته سد البردات وراها بس بقى الشبابيك مفتوحه حتى يتغير الجو مال الصالة البيت چان واضح كلش لان مقابيلنا ...

يعني الگراج و الحديقة و الشباك مال الصالة و شباك المطبخ كلهم واضحات ... شفته تحول من الصالة للمطبخ طبعاً الشباك مال المطبخ بنهاية الگراج
شفته بالبداية فتح باب المطبخ و فرغ المي مال السطلة الي چان يمسح بيها الصالة ... فرغها بالگراج و بعدين گام يغسل مواعين ع السنگ و تعطل بالغسل يعني مو سالفة واحد يغسل ايديناته و هاي هي سالفة واحد مبين ديغسل مواعين ...

حسيت السالفة صارت اغرب بعد و توقعت هالولد عايش وحده بهل البيت و هو ديسوي هالامور كلها وحده و عفت السالفة و بقيت اغسل وي بابا السطح و قبل منخلص السطح و ننزل سمعت صوت هورن سيارة ...

رحت تقدمت شفت سيارة واگفة گبال باب گراج بيت هالولد و هو چان ديغسل الطرمة ... هو رأساً فتح باب الگراج و فاتت السيارة .. نزل من السياره رجال چبير بالعمر وحده و فات جوه .. وراها خلصنا غسل السطح و نزلنا جوه...