『قٌصص ﺑٱرۅد』

⍅أوراق الخريف⍆

چنت شوية شوية اتقرب من باب الكراج ... و عاجبني اعبره ... بس اخاف لان امي مخوفتني من هواي شغلات ... اولهم العجوز الي تاكل جهال ...

و ثانيهم العصابة الي تخطف الجهال عصابة الكف الاسود ... علمود هالشي چنت ابقى بالطرمة العب ...

اغسل الكاشي بالمي و اتزحلگ عليه لو مرات ارسم احرف بالمي ع الحياطين لو مرات اسوي مثل الخطوط بـ التراب مال حديقة و اترس هالخطوط مي ... بس بره الباب ما اطلع ....

و بعدين كبرت سنه و صار عمري يأهلني لدخول الابتدائية ... ودخلت ... چنت اسمع قصص من الاكبر مني .. مثلا ابن عمي صف ثاني ابتدائي ... گالي اصعب يوم بالمدرسة هو اول يوم ... ك
گلتله شلون صعب؟

گال وحدك بالمدرسة و امك و ابوك مموجودين ... گلتله انته بچيت؟

گال اي والله مو بس اني هواي طلاب و طالبات گامو يبچون ... و چان عندي خوفه من اول يوم ... و افكر بي...

لحد ما اجه يوم دخولي للابتدائية ... امي ودتني لباب المدرسة ... هو بس عفتها من يم الباب اني بچيت ..

بعدني حتى مفايت للصف ... بس المعلمة اخذتني للصف و هي اصلاً چانت صديقة أمي ...

الوجوه بالصف كلها وجوه جديدة .. و چنت اتوقع اني الوحيد الي ديصير وياي هالشي ... بس الي عرفته وره شوية .. كل الموجودين حالهم من حالي ... و كلهم هم اول يوم الهم يدخلون للمدرسة ...

كلهم تقريبا يباعون ع المعلمة و ع الصف نفس ما اني اباوع ... و مرات نباوع واحد ع الثاني و نبتسم و مرات نستحي ... اني الي بصفي و الي مشاركتني الرحله چانت بنية ...

و البنات معروفات حتى همه و صغار عدهم شعور اسمه حنيه ... يعني هي هم چان الها اول يوم .. وهم خايفه بس گعدت بالفرصه تگلي عادي هذا الشي و تحاول تنسيني تفكيري بأمي مع العلم اني متاكد هي هم چانت تفكر بأمها..

و بالرجعه للبيت اني گمت اسألها وين بيتكم .. خطية تگلي ما اندله بس احنى بصف بيت خاله ام سحر و بصف بيت خاله ام اريج ...

و سالتني انته وين بيتكم ... گلتلها احنا هناك و اشرتلها بأصبعي ... گالت زين .... و طلعت المطاره مال المي مالتها و گالت اني امي متقبل انطي منها لأحد بس هاك اشرب ...

گلتلها لا عندي عندي وحده ... و فتحت الجنطة و طلعت المطاره مالتي چان عليها صورة بابا سنفور و سنفورة .. و گلتلها اني هم امي گالت لاتنطي لأحد بس اذا تريدين هاچ ...

و اخذت عضه من اللفة مالتها وهي هم اخذت عضه من لفتي ... و خلص اول يوم واني مخايف ... ومن طلعنا للبيوت .. شفت امها تنتظرها بره و هي هم شافت امي تنتظرني و سلمت عليها بيدي و هي هم سلمت عليه ...

و خلص اول يوم بفضلها ... و ثاني يوم چنت متحضر للمدرسة و مكيف عندي مدرسة عكس بعض الجهال ليش مكيف؟؟؟ لان تماره بالمدرسة ...