『قٌصص ﺑٱرۅد』

⍅احمر⍆

وره ما خلصت العركة و كل شي انتهى بگعدة صلح ... اني ما چنت موجود بنصهم اني چنت نايم بمستشفى بمكان بعيد ... سمعت و عرفت من أمي هالحچي .. أمي الي چانت تجيني يوميا .. تجي يوميا شايله وياها جيس مال اكل و كل يوم ميقبلون يدخلون هالچيس و تگعد تتوسل حتى يدخلولي الاكل ...

بالمستشفى اني رجلي سوولها اكثر من عملية .. طبعا انضربت برجلي ست طلقات و ما اعرف شلون عشت اصلا .. من وگعت بالگاع توقعت روحي متت بس ماعرف شلون رجعت للحياة ..

يعني هالطلقات حسب ما سمعت من الدكتور .. مو كلها من سلاح واحد .. اكو اختلاف بأحجام الاطلاقات .. ماعرف شلون ما وحده من هالسته جتي فوگ بصدري لو براسي و موتتني .. يجوز عشت حتى يصير الي صار وياي و حتى يجي يوم احچي كل شي ..

المهم .. العركة چانت بينا و بين عائلة ثانية .. احنى كاعدين بمنطقة ببغداد .. شارعنا بي ٣ بيوت عمامي .. و الشارع الورانه هم بي گرايبنا .. البيت الي تعاركنه وياهم هم مثلنه .. گرايب بنفس الشارع ..

و طبعا هالشي موجود بهواي مناطق ببغداد و حتى اكو شوارع كاملة حاليا (تتسمى على اسامي العشاير الي گاعدين بيها) .. العركة چانت علمود طير .. اي طير .. طير من نوع احمر .. هالطير مو نادر و سعره هم مو غالي .. الطير راح يم واحد هم عنده طيور .. و لزمه .. اجه گرايبي على ابو الطير گاله هذا طيري يمك وانته لزمته رجعلياه .. گاله ما ارجعه .. گرايبي تخبل .. راح جاب مصيادة و بالصچم گام يضرب طيوره للولد الي من العشيرة الثانية ..

و طبعا الطيور (الحمر) من يطيرون يطيرون بتجمع واحد و مو صعب ينضربون .. گوم الولد الثاني انزل اضرب گرايبي .. و گرايبي هم ضربه .. و علگت بيناتهم ..

اخوة الولد طلعو ضربو گرايبي و گرايبي جاب اخوته و دگ داگ دگ داگ صارت بالاسلحة .. و اني اكلت ست طلقات برجلي ..

طبعا بيوم الي هدينه عليهم .. اني مسألت هواي ليش و شلون .. گبل انطوني سلاح و ركضت وي اخوتي و ولد عمي .. وصار الي صار .. طبعا هيه انحلت بعدين و صار بيها فصل .. و اني تعالجت و طلعت بس رجلي خرطت العافية .. لو ماعرف شيصير متصيرلها قائمة .. يعني بلاتين بيها و اعرج و مستحيل راح امشي عدل بيوم من الايام ..

و تصالحو العشيرتين مثل ما گلت .. طبعا احنى وضعنا المادي عادي .. و اني چان شغلي بالبناء ديكورات .. وره منضربت بقيت اشتغل بنفس شغلي بس مو مثل قبل .. لان رجلي أثرت على وضعي هواي .. طبعا هالحجي قديم كلش .. و مو بس أثرت على وضعي بالشغل .. نفسيتي هم انكسرت و ثقتي بروحي صارت صفر .. چنت اخاف من اللقب .. چنت اخاف لا يگولون عليه فلان الاعرج .. و گالو .. گامو يسموني فلان الاعرج ..

مچانو يگولوها گبالي لان يخافون بس ورايه اكيد تنحچي و تنگال .. هالشي بالنفسية .. و بالنسبة للمشي هم نفس الحالة .. اتعب بسرعه .. بس امشي مسافة اتعب .. زين اني تنقلاتي بوقت الشغل بالكوسترات و ماكو كوستر تاخذني من باب البيت و ترجعني لباب البيت .. لازم امشي لراس الشارع .. عشت سنين صعبة .. لحد ما تغير وضعنا المادي شوية و بطلت من هالشغلة و صار عندي سيارة .. و طبعا تزوجت و لان اني ماعندي علم قوي و شهادتي متوسطة چنت خايف لا يطلع ابني هم اعرج ..