『قٌصص ﺑٱرۅد』

⍅هم نزل وهم يدبچ⍆

ألسلام عليكم
اشلونكم
قصه جديده ببارت رأس السنه
اتمنى تعجبكم ولا تنسون تنطون رأيكم

ثمن سنوات عمري چان ، ثمن سنوات طفلة يعني متفتهم بالضبط الداير مدايرها يجوز اتذكر شغلات بس اكيد مو كلها و اغلب الاشياء الي اتذكرها هي الاشياء الي تقهر ، لأن مصيبة الانسان هي الذكريات الحزينة و هسه اي واحد نسأله و نطلب منه يحچيلنه شغلات فرايحيه راح يتذكر شغلات قليلة بس اذا نگله احچيلنه شي انتَ بچيت بي لو انقهرت بي يطلع قائمة من الذكريات الي بقت محفورة براسه .

أني بدت رحلتي وي هالقائمة من عمر ٨ سنوات چنت صغيرة ، صغيرة لدرجة چنت اختل وره الدواشگ لو وره البردة من يصير صياح على أمي ، أمي الي ما سوت شي غلط بحياتها غير تزوجت و تطلگت ، معقولة الي تطلگ هيچ تنظلم ؟ معقولة الي تنجبر تتزوج واحد هو اصلا مو اختيارها هو اختيار (خالي) و يطلع الاختيار غلط و يصير انفصال هيچ تتعذب أمي ؟
أمي اصلا ماتت ناقصة عمر ! و صح كل واحد ويومه بس القهر و الاهانة تنقص عمر الانسان الضعف

امي توفت بعمر ٣٣ سنه ! صغيرة مشافت شي من الدنيا و مفرحت بشي من الدنيا غير بس بيه و بأخوية

اخوية الصغير اني چنت المسؤولة عنه من عمري صغير بس شنو چانت مسؤوليتي ؟ مسؤوليتي ابعده عن بنات خالي و عن ابن خالي الچبير ، شغلتي اركض وراه من الغرفة الي محصورين بيها اني وامي واخوية و اجيبه من الصالة لو من الطابق الثاني انزله جوه هم ارجع احصره بالغرفة ، طفل چان واني هم طفلة نحب نلعب حالنا حال هالجهال .

بس شلون نلعب ؟ شلون نضوج جهال خوالي ؟ شلون مو احنى جهال المطلگه  جهال الجايه نزل عدهم وهمه اصلا بيتهم متروس بشر ؟ شلون نلعب و نتونس و احنى دناخذ اللگمة من حلوگهم و نخليها بحلوگنه (على گولة زوجة خالي) ؟ شلوون اريد افتهم ؟

جملة هم نزل و هم يدبچ بقت محفورة بالقائمة لهذا يومنه و الله العظيم وروح امي الي يگول هالجملة بعد كل هالعمر اضوج منه ، اكرهه حتى لو قريب مني حتى لو صديق مقرب لو صديقة مقربة ، اكرهه لأن هالجملة چنت اسمعها تقريباً كل اسبوع اربع مرات بس تعودنه و تأقلمنه يصير لعبنه اني واخوية بهل الغرفة گمت اخترع شغلات لأخوية حتى بس يفرح و يتونس چنت ابوگ الچاكوچ من المخزن و ابوگ وياه بسامير صغار واجيبهم للغرفة ادگهم بالحايط و اربط سيارات اخوية بخيط و اخلي السيارات هو يجر الخيط و يشوف السيارة شلون تمشي ع الحايط يكيف حبيبي و حتى بالمدرسة چنت اني الي اودي و اجيبه وياي .

چنت بره البيت اصير سباعية الي يأذي اخوية اروح اتعارك وياه ، بس ببيت خوالي لا والله ليش الچذب اخاف لان الاذية تصير مباشرة على أمي و يسمعوها حچي محلو ، و بدينه نكبر و خوالي بدو يكرهون سالفة بقائنه هناك ، شالونه و ذبونا ببيت ابوية و امي بقت يمهم گالوله انت اصرف عليهم احنى خلص ما عدنه وهذوله عدهم مدارس مترهم بعد واختنه احنى نتكفل بيها ، اذا هسه اوصف تعابير وجه امي بيوم الي هي بيدها تلم هدومنه و شلون دموعها توگع ع الهدوم و تشمشم بهدومنه احس گلبي يريد يوگف