『قٌصص ﺑٱرۅد』

⍅صـديقة الطفوله⍆

- مساء الخير ؛
- للمُقبلين على الحياة بكلّ تفاؤل

من الابتدائية لحد متزوجت ما عندي صديقة مقربة الي غير بس وحدة ...
زينة

... زينة چانت احلى شي بـ الدنيا بحياتي .. چنت اذا انقهر اول شخص يجي على بالي زينة .. اروح اشكيلها همي واسولفلها وابد ما افكر اتصل بخواتي لو بأمي ..

لان الي بيني و بينها اكبر حتى من علاقة الخوات .. اسرارنا سوه حچينا سوه اكلنا سوه حتى الاشياء الي نحبها نفس الشي ... صديقة طفولتي واختي و حبيبتي بهل الدنيا ..

چنت حتى اذا اكل شي و اشوفه طيب رأساً اعزل حصتها على صفحة حتى من تجي تضوگها ... احبها لدرجة جبيرة و حتى لبسنه مرات يكون نفس اللون ...

زوجي چان يضوج منها و اصلا مو بس من صديقتي يضوج هو تركيبته يضوج من كلشي ... و بمرور سنتين بعد زواجي صارت مشاكل چبيرة بيني و بينه و اني توقعت وره ميصير عنده جاهل يتغير ..

صار عندي الجاهل (بنية) وهو متغير ..
يضرب و يسب على اتفه الاسباب .. و چنت بـ البداية اضم هالشي حتى احافظ على (بيتي و زوجي) مثل ما هواي من النساء يسوون هـ الشي بس في سبيل يحافظون على انو همه متزوجات و عدهم عائلة ..

بس يوم وره يوم الشي زاد عن حده لحد موصلت وياه لطريق مغلق و انفصلنا ورجعت لبيت اهلي .. مراح اگول اهلي معجبهم الوضع بس تحملوني و دللو بنتي ...

وره فتره تقدملي ولد گرايبنا من بعيد و رفضت لان چنت صدگ ناويه انذر روحي لبنتي وبس .. بس طلب يحچي وياي و قنعني بكلامه انو هو اصلاً چان مخلي عينه عليه قبل ما اتزوج بس ظروفه چانت تعبانة و هسه هو وضعه تغير و توظف و عنده شغل زين ...

قبلت و الولد شكله كلش مقبول و اسلوبه بـ الحچي بعد احلى من شكله ..

مثقف و رومانسي يعني وره مقبلت و حددنا فترة نتزوج بيها چان معيشني مثل الافلام ..

حب حب حب .. اني چان شيصير وياي كلشي اروح احچي لصديقتي زينة ..
زينة چانت متأخرة قسمتها و السبب بصراحة شكلها ...

شكلها چان مو كلش حلو .. بس هيه بالاول و الاخير خلقة الله ... اني چنت احبها كوني بنية يعني و اموت عليها .. بس چنت دائما احاول اسرحلها شعرها و امكيجها من نطلع ..

چانت هيه تحچي السالفة بحجة شقه ..
تگول اشو من نطلع لحد منرجع الشباب بس الچ يصچموچ اني محد يسمعني كلمه .. اكلها بابا همه چانو يسمعونا حچي ثنينه مو بس اني ...

مع العلم اني اعرف كلش زين السبب وين ... بس انقهر عليها و ما ابينلها هـ الشي .... اني حلوة و شكلي طفولي ... يعني رغم مصار عندي بنية و تزوجت و تعبت كلش بفترة الزواج بس بقه شكلي هو هو ...

المهم ...
وافقت ع الزواج و الولد طلع صدگ يحبني ... و حددنا موعد للزواج بس شوية بعيد لان هو عنده شغل و يريد يرتب كلشي قبل الزواج ...